ᖁᑦᑎᖕᓂᖅᐹᖅ ᐃᖅᑲᖅᑐᐃᔨᑦ ᐃᑲᔪᖅᓱᐃᓂᖓᓂ ᓄᓇᖃᖅᑳᖅᓯᒪᔪᓄᑦ ᓱᕈᓯᐅᑉ ᓴᐳᔾᔭᐅᓂᖓᓄᑦ ᒪᓕᒐᖓᓐᓂ

For the English version of this story, see Supreme Court upholds federal Indigenous child welfare law.

ᑲᓇᑕᐅᑉ ᖁᑦᑎᓛᖓ ᐃᖅᑲᖅᑐᐃᕕᖓ ᐅᖃᐅᔾᔨᐅᓂᖃᓚᐅᖅᐳᖅ ᒐᕙᒪᑐᖃᒃᑯᑦ ᓱᕈᓯᐅᑉ ᓴᐳᔾᔭᐅᓂᖓᓄᑦ ᒪᓕᒐᖓ ᐱᖁᔭᕐᔪᐊᖑᓂᖓᓂ, ᓇᓗᓇᐃᖅᓯᔪᒥ ᓄᓇᖃᖅᑳᖅᓯᒪᔪᓄᑦ ᐃᓄᐃᑦ ᐱᔪᓐᓇᕐᓂᖃᕐᓂᖓᓂ ᓱᕈᓯᕐᓄᑦ ᐊᒻᒪ ᐃᓚᒌᓄᑦ ᐱᔨᑦᑎᕋᕐᓂᐅᔪᒥ.

ᐃᓚᐅᔪᓕᒫᓂ ᐊᖏᖃᑎᖃᕐᓂᐅᔪᒥ, ᖁᑦᑎᖕᓂᖅᐹᖅ ᐃᖅᑲᖅᑐᐃᔨᑦ ᑲᓇᑕᒥ ᐃᑲᔪᖅᓱᐃᓂᖓᓂ ᐱᖁᔭᒃᓴᖅ C-92−ᒥ, ᒪᓕᒐᐅᔪᒥ ᐱᔾᔪᑎᖃᖅᑐᒥ ᐊᓪᓚᓂᑦ, ᐃᓄᖕᓂ ᐊᒻᒪ ᐊᓪᓚᖓᔪᓂ ᓱᕈᓯᕐᓂ ᒪᒃᑯᒃᑐᓂ ᐊᒻᒪ ᐃᓚᒌᖑᔪᓂᑦ, ᓴᖑᑎᑦᑎᔪᒥ 2022−ᒥ ᑯᐸᐃᖕᒥ ᐊᔪᐃᓐᓇᕆᐊᕐᕕᖕᒥ ᐃᖅᑲᖅᑐᐃᕕᖕᒥ ᐃᓱᒪᓕᐊᖑᔪᒥ ᐅᖃᐅᓯᖃᓚᐅᖅᑐᒥ ᒪᓕᒐᖅ ᐃᓚᖓᒍᒃ ᐱᖁᔭᕐᒧᐊᙳᖏᓐᓂᖓᓂ.

ᐱᖁᔭᒃᓴᖅ C-92 ᒪᓕᒐᙳᓚᐅᖅᐳᖅ 2019−ᒥ ᐊᒻᒪ ᐃᓕᓴᖅᓯᕗᖅ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᐃᓕᓯᒪᐃᓐᓇᖅᑐᒥ ᐱᔪᓐᓇᕐᓂᖃᖅᐳᑦ ᓇᖕᒥᓂᖅ−ᒐᕙᒪᖃᕐᓂᕐᒧᑦ ᓴᐳᔾᔨᓯᒪᓂᐅᔪᒥ ᕿᑐᕐᙵᖏᓐᓂ, ᑐᓂᓯᕗᖅ ᓄᓇᖃᖅᑳᖅᓯᒪᔪᓄᑦ ᐱᖁᔭᒃᓴᒥ ᐱᔪᓐᓇᕐᓂᖓᓂ ᒐᕙᒪᑐᖃᒃᑯᑦ ᒪᓕᒐᖓᓐᓂ ᐊᒻᒪ ᓇᓗᓇᐃᖅᓯᕗᖅ ᑲᓇᑕᒥ ᒥᑭᓛᖑᔪᒥ ᐊᑐᒐᒃᓴᐃᑦ ᐋᖅᑭᒃᑕᐅᓯᒪᓂᖏᑎᒍᑦ ᐸᖅᑭᔭᐅᓂᖏᓐᓂ.

ᕕᕗᐊᕆ 9−ᒥ ᑐᓴᒐᒃᓴᓕᐊᖑᔪᒥ, ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓ ᓇᑖᓐ ᐆᐱᑦ ᐅᖃᓪᓚᓚᐅᖅᐳᖅ ᑲᒧᓰᓐᓇᖅᑐᒥ ᐱᓂᕐᓗᒡᔪᐊᕐᓂᐅᔪᒥ ᓱᓕᓂᐅᔪᒥ ᑭᒡᒐᖅᑐᐃᓂᖃᓗᐊᕐᓂᖓᓂ ᐃᓄᖕᓂ ᓱᕈᓯᕐᓂ ᐸᖅᑭᔭᐅᔪᓂ ᑲᓇᑕᓕᒫᒥ.

“ᐱᖁᔭᒃᓴᖅ C-92 ᐅᑎᒧᑦ ᐊᔭᐅᕆᕗᖅ ᑕᐃᒃᑯᓂᖓ ᓱᓕᓂᐅᔪᓂ, ᐅᑎᒧᑦ ᐊᔭᐅᕆᕗᖅ ᐱᖅᑯᓯᕆᙱᑕᓄᑦ ᐱᐅᓯᖃᓕᖅᑎᑕᐅᓂᕐᒥ ᐃᓱᒪᒋᔭᐅᓂᐅᔪᓂ ᐊᖅᓵᖅᓯᓂᕐᒥ ᓱᕈᓯᕐᓂ ᐃᓚᖏᓐᓂ, ᐊᒻᒪ ᐊᔭᐅᕆᕗᖅ ᑲᓇᑕᒥ ᖃᓄᐃᓕᖓᓂᖓᓂ ᐃᓕᓴᖅᓯᓂᕐᒧᑦ ᑭᒡᒐᖅᑐᐃᓂᐅᔪᒥ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ, ᐃᓄᐃᑦ ᐱᔪᓐᓇᕐᓂᕆᔭᐅᔪᓂ-ᑎᒍᒥᐊᖅᑐᓂ ᐱᓕᕆᕝᕕᐅᔪᓂ ᐊᒻᒪ ᑲᑐᔾᔨᖃᑎᒌᖑᔪᓂ ᐃᓚᖃᖅᑐᒥ ᐊᓪᓚᓂᑦ ᐊᒻᒪ ᐊᓪᓚᖓᔪᓂ ᐸᖅᑭᓂᖏᓐᓂ ᓱᕈᓯᑦᑎᓐᓂ ᐊᒻᒪᓗ ᐊᑐᓕᖅᑎᑦᑎᓂᕐᒥ ᓇᖕᒥᓂᖅᓱᕈᓐᓇᕐᓂᕐᒧᑦ ᐆᒥᖓ ᐱᓕᕆᓂᐅᔪᒥ,” ᐆᐱᑦ ᐅᖃᓚᐅᖅᐳᖅ, ᐅᖃᓪᓚᒃᖢᓂ ᑐᓴᒐᒃᓴᓕᐅᖅᑎᓄᑦ ᑲᓇᑕᐅᑉ ᒪᓕᒐᓕᐅᕐᕕᖏᑕ ᑲᑎᒪᕝᕕᒡᔪᐊᖓᓂ ᓯᓚᑖᓂ.

2019−ᒥ ᖁᑦᑎᖕᓂᖅᓴᒧᑦ ᐅᓐᓂᕐᓗᖕᓂᕐᒥ C-92−ᒥ, ᑯᐸᐃᖕᒥ ᒐᕙᒪᒃᑯᑦ ᑭᐅᓗᓚᐅᖅᐳᑦ ᒪᓕᒐᖅ ᐱᔪᓐᓴᖅᑎᑦᑎᓂᖓᓂ ᐋᑐᕚᒥ ᖄᖏᐅᔾᔨᔪᓐᓇᕐᓂᖓᓂ ᐱᔪᓐᓇᕐᓂᕆᔭᖓᓐᓂ, ᓱᕋᐃᓗᓂ ᑕᐃᒎᓯᓂᑦ ᑲᓇᑕᒥ ᐊᕕᒃᑐᖅᓯᒪᓂᐅᔪᒥ ᐱᔪᓐᓇᕐᓂᖃᕐᕕᒋᔭᖏᓐᓂ ᐊᒻᒪ ᐃᓕᓴᕆᔭᐅᓯᒪᔪᓂ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᓄᓇᖃᖅᑳᖅᓯᒪᔪᓄᑦ ᖃᓄᐃᓕᖓᓂᖓᓂ ᐃᓂᒋᔭᖓᓂ .

ᓄᓇᕕᖕᒥ ᐃᓄᐃᑦ ᑲᑐᔾᔨᖃᑎᒌᖑᔪᒥ ᒪᑭᕝᕕᒃ ᑎᒥᖁᑕᐅᔪᓂ, ᑐᙵᓱᒃᑎᑦᑎᓚᐅᖅᐳᖅ ᖁᑦᑎᖕᓂᖅᐹᖅ ᐃᖅᑲᖅᑐᐃᔨᒃᑯᑦ ᐃᓱᒪᓕᐊᖓᓐᓂ, ᑕᐃᓪᓗᓂᐅᒃ “ᐊᖏᔪᕐᒧᐊᖑᔪᒥ ᓵᓚᖃᕐᓂᐅᔪᒥ ᐃᓄᖕᓄᑦ ᐊᒻᒪ ᖃᓄᐃᙱᑦᑎᐊᕐᓂᐅᔪᒥ ᐃᓚᑦᑎᓐᓂ, ᓱᕈᓯᕐᓄᑦ ᐊᒻᒪ ᒪᒃᑯᒃᑐᓄᑦ.”

“ᐃᓱᒪᓕᐅᕆᓂᖅ ᑕᑯᒃᓴᐅᑎᑦᑎᕗᖅ ᐅᖃᐃᓐᓇᐅᔭᕐᓂᑦᑎᓐᓂ ᐊᒻᒪ ᖃᐅᔨᒪᓪᓗᑕ, ᐃᓕᓯᒪᐃᓐᓇᖅᑐᒥ ᐱᒧᓐᓇᕐᓂᖃᖅᐳᒍᑦ ᓇᖕᒥᓂᖅ−ᐃᓱᒪᓕᐅᕆᔪᓐᓇᕐᓂᕐᒧᑦ, ᐱᓗᐊᖅᑐᒥ ᐱᔾᔪᑎᖃᖅᑎᓪᓗᒍ ᓱᕈᓯᕐᓂ ᐊᒻᒪ ᐃᓚᒌᖑᔪᓄᑦ ᐱᔨᑦᑎᕋᕐᓂᐅᔪᒥ,” ᒪᑭᕝᕕᒃ ᐊᖓᒧᖅᑳᖓ ᐲᑕ ᐋᑕᒥ ᐅᖃᓚᐅᖅᐳᖅ ᑐᓴᒐᒃᓴᓕᐊᖑᔪᒥ.

“ᐅᓪᓗᒥ ᐅᖃᐅᔾᔨᐅᓂᐅᔪᒥ ᓴᙱᒃᑎᒋᐊᖅᓯᕗᖅ ᐱᒻᒪᕆᐅᓂᖓᓂ ᐊᑐᓕᖅᑎᑦᑎᓂᕐᒥ ᓄᓇᖃᖅᑳᖅᓯᒪᔪᓄᑦ ᐱᔪᓐᓇᕐᓂᕆᔭᐅᔪᓂ ᐊᒻᒪ ᐃᒃᐱᒍᓱᑦᑎᐊᕐᓂᕐᒥ ᐱᔪᓐᓇᕐᓂᖃᕐᓂᕆᔭᑦᑎᓐᓂ.”