ᖃᐅᔨᓴᕈᑎᖃᕐᓂᖅ ᑖᒃᓯᓂ ᐃᓚᒋᔭᐅᓂᐊᕐᑐᖅ ᒪᓕᒐᕋᓛᓂ ᐋᖅᑭᒃᓱᐃᒃᑲᓐᓂᓕᖅᐸᑕ

For the English version of this story, please see Allowing surveillance in taxis part of proposed bylaw overhaul.

ᒪᓕᒐᕋᓛᙳᖁᔭᐅᔪᖅ ᒪᓕᒋᐊᓕᖕᓂ ᓄᑖᙳᕆᐊᖅᑎᑦᑎᓂᕐᒥᒃ ᐊᐅᓚᑦᑎᓂᕐᒥ ᐃᖃᓗᖕᓂ ᑖᒃᓯᖏᓐ ᓄᖃᖅᑎᑕᐅᑲᐃᓐᓇᓚᐅᕐᒪᑦ ᒪᐃ 14-ᒥ ᓄᓇᓕᐸᐅᔭᐃᑦ ᑲᑎᒪᑎᓪᓗᒋ ᓲᖃᐃᒻᒪ ᑲᑎᒪᔩᑦ ᐃᓚᖏᑦ ᐅᐸᒍᑎᓯᒪᓚᐅᙱᒻᒪᑕ.

“ᐅᓇ ᒪᓕᒐᕋᓛᖅ ᐊᖏᐸᓗᖕᒪᑦ, ᐃᓗᓕᖃᐅᖅᖢᓂ,” ᐅᖃᕐᑐᖅ ᑲᑎᒪᔨ ᑲᐃᐅᓪ ᓴᐳᑦ, ᑖᓐᓇᓗ ᐃᒃᓯᕙᐅᑕᕆᔭᐅᓪᓗᓂ ᑖᒃᓯᓕᕆᓂᕐᒧᑦ ᑲᑎᒪᔨᕋᓛᓂ.

ᑲᑎᒪᔩᑦ ᓂᕈᐊᓚᐅᕐᓯᒪᔪᑦ ᒪᓕᒐᕋᓛᖅ ᓈᒻᒪᒋᔭᐅᓪᓗᓂ ᓯᕗᓪᓕᖅᐹᒥ ᐅᖃᓕᒫᖅᑕᐅᑎᓪᓗᒍ ᑭᓯᐊᓂᓕ ᐊᐃᑉᐸᖓᓂ ᐅᖃᓕᒫᖅᑕᐅᓂᖓ ᐱᓕᕆᐊᖑᔪᓐᓃᓚᐅᑲᓚᐅᖅᑐᖅ ᐅᑯᐊ ᒪᐃᔭ ᓵᓚᒪᓐ ᐊᕙᓂ, ᐊᒻᒪ ᑲᑎᒪᔩᑦ ᕈᒦᓐ ᓯᑏᕙᓐᓴᓐ ᐊᒻᒪ ᕼᐃᐅᕆ ᕕᓕᐅᕋᑎ — ᐅᐸᒍᑎᓚᐅᙱᑦᑐᑦ ᐱᓇᓱᐊᕈᓯᐅᓚᐅᖅᑐᒥ ᑲᑎᒪᓂᕐᒥ — ᐅᖃᓕᒫᕈᓐᓇᕐᓂᐊᕐᒪᑕ ᐊᓯᔾᔨᖅᑕᐅᔪᒪᔪᓂᒃ.

ᒪᓕᒐᕋᓛᙳᖅᑎᑕᐅᔪᒪᔪᖅ ᐅᖃᐅᓯᖃᖅᑐᖅ ᑕᒪᐃᓐᓂ ᓄᓇᓯᐅᑎᓂ ᐊᑭᓕᖅᓱᕐᓗᒋ ᐊᑐᖅᑐᐊᒐᒃᓴᓂᒃ, ᑖᓐᓇᓗ ᐱᔾᔪᑎᖃᓗᐊᖅᖢᓂ ᑖᒃᓯᓂᒃ.

ᐊᖏᓂᖅᐹᓪᓕ ᐊᓯᔾᔨᖅᑕᐅᓇᖅᑐᑦ ᐊᖁᑎᐅᔪᑦ ᓄᓇᓯᐅᑎᖏᓐᓄᑦ ᓂᐱᓕᐅᕈᑎᒥ ᐊᒻᒪ ᐊᔾᔨᓕᐅᕈᑎᒥ ᐋᖅᑭᒃᓯᒋᐊᖃᕋᔭᖅᖢᑎ ᐊᒻᒪᓗ ᑲᒻᐸᓂᐅᔪᑦ ᓄᓇᓯᐅᑎᖃᕆᐊᖃᕐᓗᑎᒃ ᐊᑐᐃᓐᓇᐅᔪᓐᓇᖅᑐᓂᒃ ᐊᒃᓴᓗᐊᓕᖕᓄᑦ ᐃᒃᓯᕙᐅᑕᓄᑦ ᓄᓇᓯᐅᑎᖏᓐᓂ.

ᓴᐳᑦ ᐅᖃᐅᓯᖃᓚᐅᕐᒥᔪᖅ ᓄᓇᓕᖕᓂ ᐱᓕᕆᐊᖑᔪᒪᔪᒥᒃ ᐃᒻᒥᒃᑯᑦ ᐸᓯᓕᕆᔨᐅᔪᒪᓂᕐᒥᒃ ᐃᖃᓗᖕᓂ ᐊᒻᒪᓗ ᐊᐱᕆᓪᓗᓂᒋᑦ ᖃᓄᖅ ᒪᓕᒐᕋᓛᖅ ᐋᖅᑭᒋᐊᖅᑕᐅᔪᓐᓇᕋᔭᕐᒪᖔᑦ ᑕᐃᒪᐃᑦᑐᒥ ᓇᖕᒥᓂᖅ ᐱᓕᕆᐊᖃᓕᕈᒪᓗᓂ.

ᕌᑦ ᒪᒡᕗᐊᑦ, ᓄᓇᓕᐸᐅᔭᐃᑦ ᒪᓕᒐᕋᓛᓕᕆᓂᕐᒧᑦ ᐊᖓᔪᖅᑳᖅ, ᐅᖃᓚᐅᕐᑐᖅ ᒪᓕᒐᕋᓛᖅ ᐊᖏᒡᓕᒋᐊᖅᑕᐅᔪᓐᓇᕐᓂᖓᓂ ᒪᓕᒐᖃᕐᓂᕐᓴᐅᓕᓗᓂ ᓄᓇᓯᐅᑎᓂ ᐊᖏᓂᕐᓴᓂ ᐊᒡᔭᖅᑐᐃᖃᑦᑕᕋᔭᖅᑐᓄᑦ.

ᒪᐃᔭᐅᑉ ᑐᒡᓕᖓ ᑭᒻ ᓯᒥᑦ, ᐅᖃᖅᖢᓂ ᑭᖑᓪᓕᕐᒥ ᑲᑎᒪᖃᑕᐅᔾᔮᙱᓐᓂᕐᒥᓂ ᑕᒪᑐᒧᖓ ᐃᓱᒪᖏᔭᖏᓐᓂᒃ ᐅᖃᐅᓯᖃᑲᑕᓚᐅᕐᒥᔪᖅ.

ᐊᑕᐅᓯᐅᒐᓗᐊᕐᒥᒡᒎᖅ ᐊᒃᓴᓗᐊᓕᖕᓄᑦ ᐃᒃᓯᕙᐅᑕᓄᑦ ᐅᓯᔪᓐᓇᖅᑐᒥ ᐱᖃᕈᑎ ᒪᑯᐊ ᒥᑭᓐᓂᕐᓴᐃᑦ ᑖᒃᓯᓕᕆᔨᐅᔪᑦ ᓈᒻᒪᒐᔭᕐᓂᕋᖅᖢᓂᐅᒃ, ᐅᖃᕐᑐᖅ. ᑭᓯᐊᓂᓕ ᐃᓱᒪᒋᓪᓗᒍ ᐊᑕᐅᓯᑐᐊᕐᒥ ᑖᒃᓯᓕᕆᔨᑕᖃᕐᓂᖓᓂ ᓄᓇᓕᖕᓂ, ᐅᓇ ᓄᑖᖅ ᒪᓕᒋᐊᓕᒃ ᐊᑕᐅᓯᕐᒥ ᓄᓇᓯᐅᑎᑕᖃᐃᓐᓇᐅᔭᕆᐊᖃᕋᔭᕐᓂᖓᓂᒃ ᐊᑐᐃᓐᓇᐅᔪᓐᓇᖅᑐᒥ ᑕᒪᒃᑯᓄᖓ ᐊᒃᓴᓗᐊᓕᖕᓂ ᐃᒃᓯᕙᐅᑕᓕᖕᓄᑦ.

“ᑕᒪᓐᓇ ᐃᓱᒫᓗᖕᓇᖅᑰᔨᖕᒪᑦ, ᐱᓗᐊᕐᑐᒥ ᑖᒃᓰᑦ ᐃᓐᓇᑐᖃᕐᓄᑦ ᐊᑐᖅᑕᐅᖃᒃᑕᕆᐊᖃᕐᓂᖏᓐᓄᑦ,” ᐅᖃᕐᑐᖅ ᓯᒥᑦ.

ᖃᓄᐃᓕᖓᔾᔪᑎᒃᓴᒥ ᐊᑐᖅᑕᐅᔭᕆᐊᓕᖕᒥ ᐃᓚᓕᐅᔾᔨᔪᓐᓇᕐᒥᔪᑦ, ᐅᖃᕐᑐᖅ ᕌᑦ ᒪᒡᕗᐊᑦ, ᓄᓇᓕᐸᐅᔭᐃᑦ ᒪᓕᒐᕋᓛᓕᕆᓂᕐᒧᑦ ᐊᖓᔪᖅᑳᖓ, ᐅᖃᓚᐅᕐᑐᖅ ᓄᓇᓯᐅᑎᖃᕈᑎ ᐃᒪᓐᓇᑎᒋ ᐅᓄᖅᑎᒋᔪᓂ ᑕᐃᒪᓕ ᐱᑕᖃᕆᐊᖃᖅᐸᒡᓗᓂ ᑲᑉᐸᓂᐅᑉ ᓄᓇᓯᐅᑎᖏᓐᓂᒃ.

ᓯᒥᑦ ᐊᐱᕆᓚᐅᕐᒥᔪᖅ ᖃᓄᖅ ᐊᖁᑎᑦ ᓄᓇᓯᐅᑎᓄ ᖃᐅᔨᓴᖅᑕᐅᖃᑦᑕᕋᔭᕐᓂᖏ ᐅᖃᐅᓯᐅᓯᒪᖕᒥᔪᖅ ᒪᓕᒐᕋᓛᙳᖅᑎᑕᐅᔪᒪᔪᒥᒃ.

ᒫᓐᓇᓕ ᒪᓕᒐᕋᓛᖅ ᐊᖁᑎᖃᕆᐊᖃᙱᑎᑦᑎᓯᒪᖕᒪᑦ ᐱᕋᔭᒃᓯᒪᓂᑯᕕᓂᕐᓂᒃ, ᐊᒻᒪᓗ ᐊᔪᓗᐊᕐᓂᕐᓴᐃᑦ ᒥᒃᓵᓄᑦ ᖃᐅᔨᓴᕈᑎᖃᕐᒥᓗᑎᒃ, ᐅᖃᕐᑐᖅ, ᑕᐅᑐᒃᖢᒋ ᐅᓄᕐᓂᖏᑦ ᐊᔪᕈᑎᖃᖅᐸᒃᑐᑦ ᐃᓄᐃᑦ — ᓲᕐᓗ ᓱᕈᓰᑦ ᐊᒻᒪ ᐃᓐᓇᑐᖃᐃᑦ — ᑖᒃᓯᑲᑕᒋᐊᖃᖅᐸᒃᑐᑦ.

“ᖃᐅᔨᓴᖅᑕᐅᔾᔪᑎᓂ ᐊᓂᒍᐃᔪᓐᓇᙱᑉᑐᖃᖅᐸᑦ ᑕᐃᒪᓕ ᐱᔨᑦᑎᕋᐅᑎᖃᓪᓗᐊᙱᑦᑐᑦ ᓄᓇᑦᑎᓐᓂ,” ᓯᒥᑦ ᐅᖃᕐᑐᖅ.

ᐊᐱᕐᓱᖅᑕᐅᑎᓪᓗᒍ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ, ᓯᒥᑦ ᐅᖃᓚᐅᕐᑐᖅ ᒪᓕᒐᕋᓛᙳᖅᑎᑕᐅᔪᒪᔪᖅ “ᐱᒻᒪᕆᐊᓘᖕᒪᑦ” ᓲᖃᐃᒻᒪ ᓇᖕᒥᓂᕆᔭᐅᔪᑦ ᑖᒃᓰᑦ ᐃᖃᓗᖕᓂ ᐊᑐᐃᓐᓇᓚᕆᑐᐊᖑᖕᒪᑕ ᑭᒃᑯᑐᐃᓐᓇᕐᓄᑦ ᓇᒧᙵᐅᔾᔪᑎᐅᓇᓱᒃᖢᑎᒃ.

“ᑭᒃᑯᓕᒫᓄᑦ ᐅᓯᑲᖅᑕᖅᑎᐅᙱᑦᑑᒐᓗᐊᑦ ᑭᓯᐊᓂᓕ ᑕᐃᒪᓐᓇ ᐊᑐᖅᑕᐅᖕᒪᑕ,” ᐅᖃᕐᑐᖅ, ᐅᖃᒃᑲᓐᓂᖅᖢᓂ ᓄᓇᓕᐸᐅᔭᐃᑦ ᐱᓕᕆᐊᖃᖁᓇᔭᕐᓂᖏᓐᓂᒃ ᑭᒃᑯᓕᒫᓂ ᐅᓯᑲᖅᑕᖅᑎᐅᓇᔭᕐᓂᕐᒥᒃ.

ᑭᖑᓪᓕᕐᒥ ᑲᑎᒪᓛᖅᑐᑦ ᒪᐃ 28-ᖑᓕᖅᐸᑦ.