ᑕᓗᕐᔪᐊᖅ ᐃᓕᓐᓂᐊᕐᕕᒃ ᒪᑐᐃᓕᖅᑭᓚᐅᖅᑐᖅ ᐱᓇᓱᐊᕈᓰᑦ ᖁᓕᑦ ᐊᓂᒍᓚᐅᖅᑎᓪᓗᒍ ᐅᖅᓱᐊᓗᒻᒥᑦ ᑯᕕᔪᖃᓚᐅᖅᑎᓪᓗᒍ

For English version, see Taloyoak school reopens 10 weeks after fuel spill

ᓇᑦᓯᓕᒃ ᐃᓕᓐᓂᐊᕕᒃ ᑕᓗᕐᔪᐊᒥ ᒪᑐᓚᖅᑭᓚᐅᖅᑐᖅ ᑯᕕᔪᖃᓚᐅᖅᑎᓪᓗᒍ ᐅᖅᓱᐊᓗᓐᓂᓕ ᒪᑐᓯᒪᓚᐅᕐᖓᑦ ᐱᓇᓱᐊᕈᓯᕐᓄᑦ ᖁᓕᓐᓄᑦ.

ᒥᑭᓂᖅᐹᓐᓂᒃ ᖁᑦᑎᓂᖅᐹᒧᑦ 12−ᓄᑦ ᑐᓐᖓᓱᑦᑎᑕᐅᒃᑲᓐᓂᓚᐅᖅᑐᑦ ᐊᐃᐳᓗ 17−ᒥ, ᐃᓕᓐᓂᐊᖅᑐᓕᕆᔨᒃᑯᑦ ᑯᕆᔅᑕ ᐊᐃᒥ ᐅᖃᓚᐅᖅᑐᖅ ᐃᕐᖐᕐᓈᖅᑕᐅᑎᒃᑯᑦ.

ᒪᑐᓚᐅᖅᑐᖅ ᕕᕝᕗᐊᕆᒥ 7−ᒥ 90-ᖃᓪᓗᑎᓐᓂᑦ ᐅᖅᓱᐊᓗᒻᒥ ᑯᕕᔪᖃᓚᐅᕐᖓᑦ ᐃᓗᐊᓂ.

ᑯᕕᔪᖅ ᐅᖅᓱᐊᓗᖃᕐᕕᒻᒧᑦ ᐅᑎᖅᐸᓪᓕᐊᑦᑕᐅᑎᒋᓚᐅᖅᑐᖅ ᓯᓚᑖᓃᓐᖔᖅᑐᒥᑦ ᐅᖅᓱᐊᓗᒻᒥ ᐆᓇᖅᑐᒃᑯᕕᒻᒧᑦ, ᐅᖃᖅᑐᓂ ᐊᐃᒥ.

ᐱᓇᓱᐊᕈᓯᖅ ᐊᓂᒍᕐᖓᑦ, ᕕᕝᕗᐊᕆ 13−ᒥ, ᐅᖅᓱᐊᓗᔅᓱᓐᓂᓚᐅᖅᓯᒪᒻᒪᑦ ᓱᓕ ᐊᓂᕐᓂᖃᕐᕕᖓᓐᓂ ᖃᐅᔨᓴᐅᑎᒃᑯᑦ ᑭᓯᐊᓂ ᐃᑭᐊᖅᑎᒻᒧᑦ ᑭᓂᕐᓂᓚᐅᖅᓯᒪᔪᖅ ᐅᖅᓱᐊᓗᒃ.

ᐊᕙᑎᓕᕆᔨᒻᒧ ᐅᐸᑦᑕᐅᓪᓗᓂ ᕕᕝᕗᐊᕆ 15−ᒥ ᐊᒻᒪᓗ 16−ᒥ ᕿᒥᕐᕈᔭᖅᑐᖅᑐᑎᑦ ᖃᓄᑎᒋ ᑯᕕᓐᓂᕐᒪᖔᖅ ᐊᓂᕐᓂᖓᓐᓂᓪᓗ ᖃᔨᐅᓴᖅᑐᑎᑦ ᖃᐅᔨᓴᐅᑎᓄᑦ, ᐊᐃᒥ ᐅᖃᖅᑐᓂ.

ᑳᑦᑐᓛᑦᑐᓂᒃ ᐱᓇᓱᐊᕈᓯᒐᓚᓐᓄᑦ ᓴᓗᒻᒪᓴᖅᑕᐅᓪᓗᓂ, ᖃᓪᓗᓈᖅᑕᓂᑦ ᕿᓂᖅᑎᑦᑎᓴᕋᐃᑦᑐᓂᑦ ᐊᑐᖅᑐᑎᑦ ᐅᖅᓱᐊᓗᒻᒧᑦ ᐊᓄᕌᕈᑎᖃᖅᑐᑎᓪᓗ ᐅᖅᓱᐊᓗᔅᓱᓐᓂᒍᓐᓃᕐᓂᐊᕐᖓᑦ.

ᒫᔾᔨ 13−ᖑᓕᖅᑎᓪᓗᒍ ᕿᒥᕐᕈᔭᐅᔭᖅᑐᑲᓐᓂᕐᖓᑦ, ᐃᓚᖓᓐᓂ ᐊᓄᕌᕈᑎᖓᓐᓂ ᐋᖅᑮᑲᓐᓂᕆᐊᖃᓚᐅᖅᓯᒪᔪᑦ ᐊᑯᓐᓂᖏᓐᓂ ᐊᑦᑐᖅᑕᐅᓯᒪᔪᑦ ᐊᒻᒪᓗ ᐃᓚᖓᓐᓄᑦ ᐃᓕᓐᓂᐊᕐᕕᐅᑉ, ᐊᐃᒥ ᐅᖃᖅᑐᓂ.

“ᑕᐃᒫᒃ ᐃᓕᓐᓂᐊᕐᕕᒃ ᒪᑐᐃᒃᑲᓐᓂᓚᐅᖅᑐᖅ ᐃᖅᑲᓇᐃᔭᕐᓇᐅᒐᓗᐊᖅᑎᓪᓗᒋᑦ ᐊᓂᕐᓂᕐᒥᑦ ᐱᐅᓯᔅᓯᐊᓖᑦ ᐹᖓᓗ ᓴᓇᔭᐅᒋᐊᖅᑐᓂ,: ᐅᖃᖅᑐᓂᓗ.

ᐊᓄᕌᕈᑎᒃᑲᓂᕐᒥᑦ ᐊᑐᕐᓂᐊᖅᑐᑦ ᐃᓕᓐᓂᐊᕕᒻᒥ ᖃᓂᒋᔭᖏᓐᓂ, ᐃᓕᓐᓂᐊᕐᕕᓪᓗ ᒪᑐᐃᖓᑎᓚᐅᖃᑦᑕᕐᓗᒍ ᑎᐸᐃᔅᓴᕋᐃᓐᓂᐊᕐᖓᑦ.

ᐃᓕᓐᓂᐊᕐᕕᒃ ᒪᑐᐃᕈᓐᓇᖅᓯᑎᑕᐅᓚᐅᖅᑐᖅ ᐃᓕᓐᓂᐊᖅᑎᓕᒫᐸᓗᓐᓄᑦ ᐊᐃᐳᓗ 11−ᒥ ᖃᐅᔨᓴᖅᑕᐅᖏᓐᓇᖅᑐᑎᑦ ᐊᓄᕌᕈᑎᓄᑦ ᐊᑑᑎᖃᑦᑎᐊᕋᓗᐊᕐᒪᖔᓪᓗ.

ᒥᑭᓂᖅᐹᑦ ᖁᑦᑎᓐᓂᓕᓐᓄᑦ 9−ᒧᑦ ᐃᓕᓐᓂᐊᖅᑏᑦ ᐅᑎᖅᑐᐃᓐᓇᐅᒍᓐᓇᓚᐅᖅᑐᓱᑦ ᓇᑦᓯᓕᒃ ᐃᓕᓐᓂᐊᕕᒻᒧᑦ ᐃᓕᓐᓂᐊᖅᑎᑕᐅᔪᓐᓇᖅᓯᓪᓗᑎᑦ ᑭᓯᐊᓂᓕ ᐊᓄᕌᕈᑎᖓ ᒪᕐᕉᒃ ᐃᓕᓐᓂᐊᕐᕕᒃ ᐃᓪᓗᕈᓰᒃ ᐊᓯᐊᓃᒋᐊᖃᓚᐅᖅᑑᒃ ᓄᓇᕗᑦ ᓯᓚᑦᑐᖅᓴᕐᕕᖓᓐᓂ.

ᐊᐃᒥ ᐅᖃᖅᑐᓂ ᐃᖅᑲᓇᐃᔭᖅᑎᖏᑦ ᐃᓕᓐᓂᐊᖅᑏᓪᓗ ᒫᖓᓐᓂ ᐊᑐᖃᑦᑕᓚᐅᖅᑐᑦ ᐱᓐᖑᐊᕐᕕᒃᑰᑲᐃᓐᓇᖃᑦᑕᕆᐊᖃᖅᑐᑎᑦ, ᓵᖓᓂᐅᓐᖏᑦᑐᖅ, ᐊᑦᑐᖅᑕᐅᓯᒪᓂᖓᓐᓂ ᑕᒪᓐᓇ.

ᐃᓕᓐᓂᐊᕐᕈ ᒪᑐᓯᒪᓚᐅᖅᑐᖅ, ᐃᓕᓐᓂᐊᖅᑏᓪᓗ ᓄᓇᓕᓐᓂ ᐃᓕᓐᓂᐊᖅᑎᑕᐅᕙᑦᑐᑎᑦ ᕼᐊᒻᒪᓚᒃᑯᓐᓂ, ᐸᐃᕆᕕᓐᓂᑦ, ᐃᓐᓇᐃᑦ ᐃᓪᓗᖁᑎᖓᓂ, ᓄᓇᕗᑦ ᑐᓐᖓᕕᒃ ᐊᓪᓚᕕᖓᓐᓂ ᐊᒻᒪᓗ ᓄᓇᕗᑦ ᓯᓚᑦᑐᖅᓴᕐᕕᖓᓐᓂ.