ᐱᓕᕆᔪᑦ ᐃᓄᖕᓂ ᒪᓐᑐᕆᐊᒧᐊᖅᑐᓂ ᐅᐸᒐᓱᒃᑕᖏᓐᓂ ᖃᐅᔨᒪᑎᑦᑎᕙᒃᑐᑦ

For English version, see Team ensures Inuit landing in Montreal get where they need to go

ᓄᑖᓂ ᐱᓕᕆᔨᑕᖃᓕᕐᒪ ᐃᑲᔪᖃᑦᑕᕐᑐᓂᒃ ᒥᑦᑕᕐᕕᒃᒥ ᓄᓇᕕᒻᒥᐅᓂᒃ ᒪᓐᑐᕆᐊᓕᐊᖅᑐᓂᒃ ᐊᐅᓪᓚᓕᖅᑐᓂᓪᓘᓐᓃᑦ ᒪᓐᑐᕆᐊᒥ.

ᐅᓇ ᒥᑦᑕᕐᕕᒃ ᐃᓛᓐᓂ ᐊᖏᕐᕋᖃᕈᓐᓃᓕᕈᑎᐅᔭᓐᓂᖓᓄᑦ ᐊᐅᓪᓚᖃᑦᑕᖅᑐᓄᑦ, ᐅᑯᐊ ᐱᓕᕆᔨᒋᔭᐅᔪᑦ ᐅᕙᓂ ᐊᖏᕐᕋᖅᑎᑦᑎᑦᑎᐊᕐᓂᖅ ᐊᒻᒪ ᐃᓄᐃᑦ ᖃᓪᓗᓈᓃᑦᑐᓄᑦ ᐱᓕᕆᐊᒃᓴᒥ, ᐋᖅᑭᒃᑕᐅᓂᑯ ᒪᑭᕝᕕᒃ ᑯᐊᐳᕇᓴᓐᒧᑦ, ᑕᐃᒪᓐᓇᐃᑎᑦᑎᑦᑕᐃᓕᓇᓱᒃᖢᑎᒃ.

ᐱᓕᕆᐊᒧᑦ ᑐᑭᒧᐊᖅᑎᑦᑎᔨ ᔫᐃ ᐹᑐᕆᔾ ᑲᒪᒋᔭᖃᕐᑐᖅ ᐊᐅᓪᓚᖅᐸᓪᓕᐊᔪᓂᒃ ᐃᓄᐃᑦ ᖃᖓᑕᓲᖓᒍᑦ ᐊᒻᒪ ᑲᓃᑎᐊᓐ ᓄᐊᒃᑯ ᒪᕐᕉᖕᓂ ᐃᖅᑲᓇᐃᔭᖃᑎᖃᖅᖢᓂ.

“ᐃᓄᖕᓂ ᓇᒧᙵᐅᕝᕕᒋᓐᓄᑦ ᐃᑲᔪᖃᑦᑕᖅᑕᕗᑦ, ᐃᑲᔪᖅᑐᑦᑎᐊᕋᓱᒃᑕᕗᑦ ᐊᒻᒪ ᑐᓴᐅᒪᑎᑦᑎᐊᕋᓱᒃᖢᑎᒍ,” ᐅᖃᕐᑐᖅ. “ᑕᒫᓃᑦᑐᒍᑦ ᑐᓵᔨᐅᓇᓱᒃᖢᑕ ᐊᒻᒪ ᑐᑭᓕᐅᕆᔨᐅᓇᓱᒃᖢᑕᓗ.”

ᑖᒃᑯᐊ ᐱᓕᕆᖃᑎᒌᒃᑐᑦ ᐱᒋᐊᓚᐅᕐᓯᒪᔪᑦ ᒫᔅᓯ 4ᒥ, ᑭᓯᐊᓂᓕ ᑖᓐᓇ ᐱᓕᕆᐊᖑᔪᖅ ᐱᓕᕆᐊᕆᔭᐅᓕᓚᐅᕐᓯᒪᔪᖅ ᐊᕐᕌᒍᒥ. ᐹᑐᕆᔾ ᐅᖃᓚᐅᕐᑐᖅ ᐅᓇ ᒥᑦᑕᕐᕕᒃ ᐃᓄᖕᓄᑦ ᓈᒻᒪᙱᓕᐅᕈᑎᖃᓕᔭᓐᓂᖓᓂᒃ ᐊᒻᒪᓗ ᐊᖏᕐᕋᖃᙱᔾᔪᑎᐅᓕᖅᐸᒃᖢᓂ.

ᐃᖅᑲᓇᐃᔮᖃᕐᓂᑯᑦᑕᐅᖅ ᒪᓐᑐᕆᐊᒥ ᐊᖏᕐᕋᖃᙱᑦᑐᓕᕆᓂᕐᒥ ᐊᒻᒪᓗ ᒫᓂ 100-ᓂ 150-ᓄ ᐊᖏᕐᕋᖃᙱᑦᑐᓂ ᐃᓄᒃᑕᖃᓚᐅᕐᓂᖓᓂ 2021-22ᖑᑎᓪᓗᒍ.

ᑖᒃᑯᐊᓕ ᓇᐃᓴᐅᑎᑦ ᖁᕝᕙᖅᐹᓪᓕᓚᐅᖅᑐᑦ 350-ᒧᑦ ᐊᕐᕌᓂ.

“ᐅᓄᓗᐊᖅᑐᐊᓘᖕᒪᑕ ᓇᐃᓴᐅᑎᑦ,” ᐹᑐᕆᔾ ᐅᖃᕐᑐᖅ ᐅᓄᕐᓯᕚᓪᓕᖅᑐᓂ ᓇᐃᓴᐅᑎᓂᒃ. “ᐅᓇ ᓇᐃᓴᐅᑎ ᑕᐃᒪᓐᓇᑎᒋ ᑕᑯᓚᐅᕐᓯᒪᙱᑕᕗᑦ.”

ᐅᓇ ᑕᓕᒃᑯᑦ ᑕᕐᓴᕆᔭᐅᔪᖅ ᑕᑯᔭᐅᓇᓱᖃᑦᑕᕆᐊᓕᒃ ᓄᓇᕕᒻᒥᐅᓄᑦ ᕿᓂᖅᐸᑕ ᐱᔭᕆᐊᖃᖅᑕᖏᓐᓂᒃ ᒪᓐᑐᕆᐊᓪ ᒥᑦᑕᕐᕕᐊᓂ. (ᐊᔾᔨᓕᐅᕆᔨ ᓯᑐᕆᒃ ᒑᓚᓐᑦ)

ᐱᓕᕆᔩᑦ ᑕᓪᓕᒪᐅᓪᓗᑎᒃ ᐊᕕᒃᓯᒪᕙᒃᑐᑦ ᒫᕐᕈᐃᙳᕐᓯᒪᓪᓗᑎᒃ.

ᐊᑕᐅᓰᑦ ᐱᓕᕆᖃᑎᒌᒃᑐᑦ ᐅᓪᓛᒃᑯᑦ ᐃᖅᑲᓇᐃᔭᖅᐸᒃᖢᑎᒃ 8:00-ᒥ 4:00-ᒧᑦ, ᐱᒋᐊᕐᕕᖃᖅᖢᑎᒃ ᐊᐅᓪᓚᖅᐸᓪᓕᐊᕝᕕᒃᓂ ᑕᒪᐃᓐᓄᑦ ᐃᓄᐃᑦ ᖃᖓᑕᓲᖓᒍᑦ ᐊᒻᒪ ᑲᓃᑎᐊᓐ ᓄᐊᒃᑯᑦ ᐃᑲᔪᖅᖢᑎᒃ ᖃᖓᑕᓇᓱᒃᑐᓂᒃ.

ᑭᖑᓂᐊᒐᑦ, ᐱᓱᑲᑕᓕᖅᐸᒃᖢᑎᒃ ᕿᒪᒃᑕᐅᔪᖃᙱᒃᑲᓗᐊᕐᒪᖔ ᐊᓯᐊᓯᒪᔪᖃᙱᒃᑲᓗᐊᕐᒪᖔᓪᓘᓐᓃᑦ. ᐊᓂᕙᒃᖢᑎᒃ ᑐᐊᕚᓪ ᒥᒃᓵᓄᑦ ᑎᑭᖢᒍ ᐅᓪᓕᕕᒃ, ᐋᓐᓂᐊᖅᕕᓕᐊᖅᑐᓄᑦ ᑐᔪᕐᒥᕕᐅᖃᑦᑕᖅᑐᖅ ᓄᓇᕕᒃᒥᐅᓂᒃ, ᑖᓐᓇᓗ ᐅᖓᓯᖕᓂᖃᖅᖢᓂ 3 ᑭᓛᒥᑕᒥ ᑕᑯᓇᓱᒃᐸᒃᖢᑎᒃ ᐊᔾᔭᖅᑕᐅᔭᕆᐊᖃᖅᑐᕕᓂᐅᖕᒪᖔᑦ.

ᐅᓐᓄᒃᑯᑦ ᐱᓕᕆᕙᒃᑐᑦ ᐱᒋᐊᖃᑦᑕᖅᑐᑦ 3:00-ᒥ ᐅᓪᓗᒃᑯᑦ 9:30-ᒧ ᐅᓐᓄᒃᑯᑦ, ᑕᐃᑲᙵᑦ ᐱᒋᐊᖅᖢᑎᒃ ᐅᓪᓕᕕᒃᒥ ᒥᑦᑕᕐᕕᖕᒧᙵᐅᕙᓪᓕᐊᓪᓗᑎᒃ, ᐊᒻᒪᓗ ᑲᒪᒋᔭᖃᖅᐸᒃᖢᑎᒃ ᑎᑭᑉᐸᓪᓕᐊᔪᓂᒃ ᓄᓇᕕᒃᒥ.

ᐱᓇᓱᐊᕈᓯᐅᓪᓕ ᓄᙳᐊᓂ, ᑕᐃᒪᓐᓇᑦᑕᐃᓐᓇ ᐱᓕᕆᕙᒃᑐᑦ ᑭᓯᐊᓂᓕ ᐱᒋᐊᖅᐸᒃᖢᑎᒃ 10:30-ᒥ ᐅᓪᓛᒃᑯᑦ 6:30-ᒧ ᐅᓐᓄᖕᒧᑦ.

ᐊᐱᕆᕙᒃᑐᑦ ᐃᒪᓐᓇ: “ᓇᒧᙵᐅᒐᕕᑦ? ᐃᓂᒃᓴᖃᕋᓗᐊᖅᐲ? ᐊᓯᐅᒍᕕᑦ ᖃᐅᔨᒪᕕᑦ ᓇᒧᑦ ᐅᖄᓚᒋᐊᒃᓵᖅ?”

“ᑐᙵᓱᒃᑎᑕᐅᑦᑎᐊᕋᓱᒃᐸᒃᑐᑦ ᓄᓇᓕᕐᔪᐊᓄᐊᖅᑐᑦ,” ᐅᖃᕐᑐᖅ ᐹᑐᕆᔾ, “ᐱᒻᒪᕆᐅᓛᕐᓕ ᑐᓴᐅᒪᑎᓐᓇᓱᒃᖢᑎᒍ ᖁᐊᕐᓵᕐᓇᕈᓐᓇᖅᑐᓂᒃ ᑕᒫᓂ.”

ᐊᖏᕐᕋᖃᕈᓐᓃᕈᑎᐅᕙᒃᑐᑦ ᐊᔾᔨᒌᖃᑦᑕᒋᒻᒪᑕ.

ᒪᑯᐊᖑᔪᓐᓇᕐᒪᑕ ᖃᓪᓗᓈᑦ ᐃᓄᖕᓂ ᐊᓯᐊᓅᖅᑎᑦᑎᓇᓱᖃᑦᑕᖅᑐᓂᒃ ᑖᒃᓯᓕᕆᔨᐅᙳᐊᖅᖢᑎᒃ ᐅᕝᕙᓘᓐᓃᑦ ᐃᓄᓕᕆᔨᐅᙳᐊᖅᖢᑎᒃ. ᐃᓛᓐᓇᒃᑯᑦ ᑐᑭᓯᖃᑦᑕᐅᑎᓯᒪᙱᓐᓂᒧᑦ ᐸᓯᒥ ᐊᖁᑎᐅᔪᓂᒃ ᐅᓪᓕᕕᒃᒧᑦ ᑐᔪᕐᒥᕕᒃᓄᓪᓘᓐᓃᑦ, ᐅᕝᕙᓘᓐᓃᑦ ᓇᓗᓇᐃᒃᑯᑎᖃᑦᑎᐊᙱᓗᐊᕐᓂᕐᒧᑦ ᐸᐃᑉᐹᓂ.

ᑖᒃᑯᐊᑦᑕᐅᖅ ᐱᓕᕆᔨᐅᔪᑦ ᐃᑲᔪᖃᑦᑕᕐᒥᔪᑦ ᑎᒍᔭᐅᓯᒪᓵᕐᓂᑯᓂᒃ ᐅᕝᕙᓘᓐᓃᑦ ᐃᓱᒪᒃᑯᑦ ᐋᓐᓂᐊᕕᐅᕙᒃᑐᓂᒃ.

ᐹᑐᕆᔾ ᐅᖃᓚᐅᕐᑐᖅ ᑖᒃᑯᐊ ᑖᒃᓯᕈᑎᒃᓴᖏᓐᓂ ᑐᓂᔭᐅᑐᐃᓐᓇᖃᑦᑕᕐᒪᑕ ᐅᕝᕙᓘᓐᓃᑦ ᐸᓯᒃᑰᕈᑎᒃᓴᖏᓐᓂᒃ.

“ᐅᐸᒋᐊᖃᖅᑕᖏᓐᓄᐊᖅᖢᑎᒃ ᐃᓛᓐᓂ ᓇᓗᓇᐃᒃᑯᑎᖃᖃᑦᑕᙱᒻᒪᑕ, ᑕᐃᒪᓐᓇᓗ ᖃᖓᑦᑕᐅᑎᑖᕈᓐᓇᐃᓪᓕᖃᑦᑕᖅᖢᑎᒃ ᐃᖕᒥᖕᓄᑦ,” ᐅᖃᕐᑐᖅ.

ᑭᓇᑐᐃᓐᓇ ᖃᖓᑕᓲᒥ ᐃᒃᓯᕙᐅᑕᖃᖅᑎᑕᐅᙱᑦᑐᖅ ᓇᓗᓇᐃᒃᑯᑎᖃᙱᓐᓂᕐᒧᑦ ᑖᔅᓱᒪ ᐴᑐᕆᔾ ᐃᑲᔪᕈᓐᓇᖅᑕᖏ  ᒪᑭᕝᕕᒃᑯᑦ ᑎᑎᕋᕐᕕᖓᓂ ᐅᖃᖃᑎᖃᕈᓐᓇᕋᒥ. ᐱᔭᕆᐊᖃᕈᓂ ᓇᓗᓇᐃᒃᑯᑎᓂ ᓇᒡᓯᐅᔾᔨᕕᐅᓪᓗᓂ ᐋᖅᑭᒃᓱᐃᕙᒃᑐᖅ ᓇᓗᓇᐃᒃᑯᑎᒋᓂᐊᖅᑐᒥ ᐊᒻᒪᓗ ᖃᖓᑕᓲᖅ ᖃᖓᑦᑕᓚᐅᖅᑎᓐᓇᒍ ᓇᓗᓇᐃᒃᑯᑎᑲᙱᑦᑐᒧᐊᖅᓯᔪᓐᓇᖅᖢᓂ.

ᑕᐃᒪᐃᔭᒻᒪᑕ ᓇᓗᓇᐃᒃᑯᑎᖃᙱᑦᑐᓄᑦ ᑕᒪᒃᑯᓂᖓ ᐋᖅᑭᒃᓯᒪᒃᑲᓐᓂᖅᑐᓂ ᐊᑐᕈᓐᓇᖅᑎᑕᐅᓪᓗᑎᒃ ᓄᓇᕕᒃᒥ ᖃᖓᑕᕙᒃᑐᓄᑦ ᑭᓯᐊᓂᓕ ᒪᓐᑐᕆᐊᒥ ᖃᖓᑕᓲᒃᑯᕕᒃ ᑕᐃᒪᐃᑦᑐᓂ ᓇᓗᓇᐃᒃᑯᑎᓂ ᐊᑐᖃᑦᑕᙱᑦᑐᑦ.

ᐊᒻᒪᓗ ᐃᓄᒃ ᓯᓂᕝᕕᒃᓴᖃᙱᑉᐸᑦ ᑖᒃᑯᐊ ᑐᔪᕐᒥᕕᒃᒥ ᐃᓂᒃᓴᓕᐅᕈᓐᓇᖃᑦᑕᖅᑐᑦ.

“ᐊᐱᖅᑯᑎᒃᓴᖃᕈᔅᓯ ᐅᕙᑦᑎᓐᓄᑦ ᐊᐱᕆᖃᑦᑕᕈᓐᓇᑦᑎᐊᖅᑐᓯ,” ᐅᖃᕐᑐᖅ ᐹᑐᕆᔾ. “ᕿᒪᒃᑕᐅᑎᑦᑎᑦᑕᐃᓕᕙᒃᑐᒍᑦ. ᐃᑲᔪᕈᒪᒐᑦᑕ ᑭᒃᑯᑐᐃᓐᓇᕐᓂ ᐃᑲᔪᖅᑕᐅᔭᕆᐊᓕᖕᓂ.”