ᐃᓚᒌᑦ ᓄᓇᕕᒃ ᐃᓚᒋᔭᐅᓪᓚᕆᓕᖅᐳᑦ ᐅᑭᐅᕐᑕᖅᑐᕐᒥ ᐅᑭᐅᒃᑯᑦ ᐱᙳᐊᕕᒡᔪᐊᕐᓇᒧᑦ

For English version, see Team Nunavik now permanent member of Arctic Winter Games

ᐃᓚᐅᖃᑦᑕᕐᓯᒪᓪᓗᑎᒃ ᐅᑭᐅᕐᑕᖅᑐᕐᒥ ᐅᑭᐅᒃᑯᑦ ᐱᙳᐊᕕᒡᔪᐊᕐᓇᒥ ᐊᕐᕌᒍᑦ 50 ᐅᖓᑖᓂ, ᓄᓇᕕᒃ ᐃᓚᒋᔭᐅᓪᓚᕆᖕᓂᐊᓕᕐᑐᖅ ᐱᙳᐊᕕᒡᔪᐊᕐᓇᒧᑦ ᑲᑎᒪᔨᒋᔭᐅᔪᓄᑦ.

ᔫᓂ 20-ᒥ, ᐅᑯᐊ ᐅᑭᐅᕐᑕᖅᑐᕐᒥ ᐅᑭᐅᒃᑯᑦ ᐱᙳᐊᕕᒡᔪᐊᕐᓇᒧᑦ ᑲᑎᒪᔩᑦ ᐊᕐᕌᒍᒧᑦ ᑲᑎᒪᑎᓪᓗᒋᑦ, ᑐᓴᖅᑎᑦᑎᓚᐅᕐᑐᑦ ᓄᓇᕕᒃ ᐱᙳᐊᕆᐊᖅᑐᖅᑎᐅᑐᐃᓐᓇᔾᔮᔪᓐᓃᕐᓂᖓᓂ ᐃᓚᒋᔭᐅᓪᓚᕆᓕᕐᓗᑎᒃ ᐱᒋᐊᕐᓗᓂ ᔭᓄᐊᕆ 1, 2025.

ᐅᑭᐅᕐᑕᖅᑐᕐᒥ ᐅᑭᐅᒃᑯᑦ ᐱᙳᐊᕕᒡᔪᐊᕐᓇᒥ ᐅᑭᐅᕐᑕᖅᑐᕐᒥ ᐱᙳᐊᕈᑎᐅᕙᒃᑐᖅ ᐊᒻᒪ ᐃᓕᖅᑯᓯᕐᓂ ᖃᓄᐃᓕᐅᕈᑎᐅᓪᓗᓂ ᐃᓐᓇᐅᓗᐊᙱᑦᑐᓄᑦ ᐱᙳᐊᖅᑎᓄᑦ ᐅᑯᓇᙶᖅᑐᓂᒃ ᐊᓛᔅᑲ, ᓄᓇᑦᓯᐊᖅ, ᔫᑳᓐ, ᓄᓇᕗᑦ, ᑲᓛᖡᑦ ᓄᓇᖓᓂ, ᓄᓇᕕᒃ, ᐋᐴᑕ ᐅᐊᖕᓇᖓᓂ, ᓄᐊᕗᐃᑦ, ᓱᕖᑕᓐ ᐊᒻᒪ ᕕᓐᓚᓐᒥ.

ᓄᓇᕕᒃ ᐃᓚᐅᖃᑦᑕᖅᓯᒪᔪᖅ ᐱᙳᐊᕕᒡᔪᐊᖅᑐᓂ ᐅᑯᓇᓂ 1972, 1974, 1976 ᐊᒻᒪ 1986-ᒥ. ᐃᓚᐅᖃᑦᑕᐃᓐᓇᖅᑐᑦ ᐱᙳᐊᕕᒡᔪᐊᕐᓇᐅᓕᕌᖓᑦ ᑕᐃᒪᙵᓂ 2000-ᖑᓚᐅᖅᑎᓪᓗᒍ.

“ᐊᕐᕌᒍᒐᓴᒻᒪᕆᐅᓕᖅᑐᓂᒃ ᐅᑯᐊ ᑲᑎᕕᒃ ᓄᓇᓕᓕᒫᑦ ᒐᕙᒪᖓ ᐃᓚᒋᔭᐅᓕᕈᒪᓯᒪᔪᑦ,” ᐅᖃᕐᑐᖅ ᕼᐃᐊᑕ ᓯᓅᐹᓪ, ᑲᑎᕕᒃᑯᓐᓄ ᐃᒃᓯᕙᐅᑕᕆᔭᐅᔪᖅ ᐅᖄᓚᐅᑎᒃᑯᑦ ᐊᐱᖅᓱᖅᑕᐅᑎᓪᓗᒍ.

ᐅᖃᓚᐅᕐᑐᖅ ᐃᓚᒋᔭᐅᓕᖕᓂᖏᑦ “ᐱᕕᒃᓴᑦᑎᐊᕙᐅᓂᐊᕐᓂᖓᓂ” ᐅᖃᓪᓚᖃᑎᖃᑲᑕᖕᓂᕐᒥᒃ ᑲᑎᒪᔨᐅᖃᑕᐅᔪᓂᒃ.

ᐃᓚᒋᔭᐅᓕᖅᖢᑎᒃ ᑲᑎᒪᔨᓄᑦ ᓄᓇᕕᒃ “ᑐᙵᓱᒃᑎᑦᑎᔨᐅᔪᓐᓇᓛᓕᖅᑐᑦ ᐱᙳᐊᕕᒡᔪᐊᕐᓇᒧᑦ,” ᓯᓅᐹᓪ ᐅᖃᕐᑐᖅ. ᑭᓯᐊᓂᓕ ᐅᖃᒃᑲᓐᓂᖅᖢᓂ 2030 ᑎᑭᓚᐅᖅᑎᓐᓇᒍ ᑐᙵᓱᒃᑎᑦᑎᔨᐅᔪᓐᓇᔾᔮᙱᓐᓂᕋᖅᖢᓂ.

ᐃᓚᒋᔭᐅᓚᐅᕐᓂᖏᓐᓄᑦ ᖃᐃᖁᔭᐅᓯᒪᓂᕐᒧᑦ, ᓄᓇᕕᒃ ᐃᓱᒪᓕᐅᕆᔪᓂ ᐃᓚᐅᔪᓐᓇᓚᐅᙱᑦᑐᑦ ᖃᓄᐃᓕᐅᕈᑎᐅᓂᐊᖅᑐᓄ ᐱᙳᐊᕈᑎᒃᓴᓂ, ᑕᐃᒪᓕ ᐅᖃᕈᓐᓇᓚᐅᙱᑦᑐᑦ ᖃᓄᐃᑦᑐᓂ ᐱᙳᐊᖅᑎᖏ ᐃᓚᐅᓂᐊᕐᒪᖔᑕ, ᐅᕝᕙᓘᓐᓃᑦ ᖃᔅᓯᓂ ᐱᙳᐊᖅᑎᓂ ᐃᓚᐅᑎᑦᑎᓇᔭᕆᐊᒃᓴᖏᓐᓂᒃ, ᓯᓅᐹᓪ ᐅᖃᕐᑐᖅ.

ᐅᓇ ᐊᓯᔾᔨᕈᑎᐅᔪᖅ ᓄᓇᕕᒃᒥᐅᓂ ᐱᙳᐊᖃᑎᒌᖕᓇᖅᑐᓂᒃ ᐱᙳᐊᖃᑕᐅᔪᓐᓇᕐᓂᐊᓕᕐᓂᖏᓐᓂᒃ ᓲᕐᓗ ᐹᓕᐹᓪᒥ ᐊᒻᒪ ᕼᐋᑭᖅᑐᓂᒃ.

“ᐊᕐᕌᒍᓂ ᐊᒡᒋᖅᑐᓂᒃ, ᑕᐃᒪᓕ ᐅᑯᐊ ᐃᓚᒌᑦ ᓄᓇᕕᒃ ᐱᙳᐊᕈᑎᖃᒃᑲᓐᓂᕈᓐᓇᓛᓕᕐᑐᑦ,” ᐅᖃᕐᑐᖅ.

ᐅᓇ ᐊᓯᔾᔨᖅᑕᐅᔪᖅ ᐊᑐᓕᑐᐃᓐᓇᕆᐊᓕᒃ 2026 ᐱᙳᐊᕕᒡᔪᐊᕐᓇᒥ, ᐱᙳᐊᕕᒡᔪᐊᓛᖅᖢᑎᒃ ᕗᐊᐃᑦᕼᐅᐊᔅᒥ.

“ᐊᕐᕌᒍᓂ ᐊᒡᒋᖅᑐᓂ ᐱᙳᐊᖅᑎᓂ ᐱᑕᖃᕐᓂᕐᓴᐅᓂᐊᖅᑐᖅ ᐊᒻᒪᓗ ᐱᓕᕆᑎᓪᓗᑎᒍᑦ ᑭᒡᒐᖅᑐᐃᑦᑎᐊᕈᓐᓇᕐᓂᐊᕐᒪᑕ ᐅᑭᐅᕐᑕᖅᑐᕐᒥ ᐅᑭᐅᒃᑯᑦ ᐱᙳᐊᕕᒡᔪᐊᕐᓇᒥ,” ᐅᖃᕐᑐᖅ.

ᑐᓴᒐᒃᓴᑎᒍᑦ ᓄᓇᕐᔪᕐᒥ ᑲᑎᒪᔨᕋᓛᒧᑦ ᐊᖓᔪᖅᑳᖅ ᔮᓐ ᕈᑕ ᐅᖃᓚᐅᕐᑐᖅ “ᖁᕕᐊᓱᑦᑎᐊᖅᑐᖅ ᑐᙵᓱᒃᑎᑦᑎᓂᖏᓐᓂᒃ ᓄᓇᕕᒃ, ᑯᐸᐃᒃᒥ ᐃᓚᒋᔭᐅᓂᐊᓕᕐᓂᖏᓐᓂᒃ.”

“ᐅᓇ ᐅᑭᐅᕐᑕᖅᑐᕐᒥ ᐅᑭᐅᒃᑯᑦ ᐱᙳᐊᕕᒡᔪᐊᕐᓇᒥ ᐊᓯᔾᔨᕐᓯᒍᑎᐅᔪᖅ ᐊᒻᒪᓗ ᓂᐱᖃᕈᑎᐅᒃᑲᓐᓂᓕᖅᖢᓂ ᐅᑭᐅᕐᑕᖅᑐᕐᒥ ᓄᓇᖃᖅᑳᖅᑐᓂᒃ.”