ᓄᓇᕗᒻᒥ ᐱᙳᐊᖅᑏᑦ ᓴᖅᑭᑎᑦᑎᕗᑦ ᐅᑭᐅᒃᑯᑦ ᐱᙳᐊᕐᓂᐅᔪᓂ ᐊᓐᓄᕌᒃᓴᖏᓐᓂ

For the English version of this story, please see Team Nunavut unveils winter Games uniforms.

ᓄᓇᕗᒻᒥ ᐱᙳᐊᖅᑏᑦ ᑐᕌᖅᐸᓪᓕᐊᕗᑦ ᑕᒪᑐᒪᓂ ᐊᕐᕌᒎᔪᒥ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕐᓂᐅᔪᓂ ᓴᖅᑭᔮᕐᔪᐊᖅᑐᓂ ᐊᐅᐸᖅᑐᓂ ᐊᒻᒪ ᑐᖑᔪᖅᑐᓂ ᐊᓐᓄᕌᓂ.

ᓄᑖᖑᔪᑦ ᓴᓇᔭᐅᓂᐅᔪᑦ ᑭᐅᔭᐅᓚᐅᖅᐳᑦ ᐸᑦᑕᒃᑐᕐᔪᐊᕐᓂᐅᔪᓂ ᐊᖓᔪᖅᑳᖑᔪᓂ, ᐊᔪᕆᖅᓱᐃᕙᒃᑐᓂ ᐊᒻᒪ ᐱᙳᐊᖅᑎᓂ ᐱᓇᓱᐊᕈᓯᐅᓚᐅᖅᑑᑉ ᓴᖅᑭᑎᑦᑎᓂᐅᔪᒥ ᖃᓄᐃᓕᐅᕐᓂᐅᔪᒥ ᐃᖃᓗᖕᓂ ᐃᓄᒃᓱᒃ ᖁᑦᑎᒃᑐᒥ ᐃᓕᓐᓂᐊᕐᕕᖓᓂ.

ᑲᐃᔪᓪ ᓵᕐᑎ, ᕚᓕᐹᓪᒥ ᐱᙳᐊᖅᑎᐅᔪᖅ ᐊᑐᖅᑐᒥ ᐊᐅᐸᖅᑐᒥ ᐊᓐᓄᕌᒥ, ᐅᖃᓚᐅᖅᐳᖅ ᖁᕕᐊᕐᔪᐊᖅᐳᖅ ᓵᓚᖃᕋᓱᐊᕐᓂᕐᒥ ᐱᙳᐊᕐᓂᐅᔪᓂ ᐅᒃᐱᕈᓱᖕᓂᖃᑦᑎᐊᕐᒪᑦ ᐱᙳᐊᖅᑎᐅᖃᑎᒋᔭᖏᓐᓂ.

ᐲᑕ ᐋᕆᐊᖅ, ᖁᙱᐊᕐᕕᖕᒦᓚᐅᖅᑐᒥ ᑕᑯᖅᑯᔾᔨᓂᕐᒥ ᐊᓐᓄᕌᖓᓐᓂ, ᐱᙳᐊᓲᖑᕗᖅ ᕗᑦᓲᓪ ᐃᒡᓘᑉ ᐃᓗᐊᓂ ᐊᕿᔭᕐᓂᕐᒥ. ᐅᖃᓚᐅᖅᐳᖅ “ᐊᓕᐊᓇᐃᒋᔭᖃᕐᔪᐊᕐᓂᐊᖅᑐᖓ ᑕᒪᑐᒪᓂ ᐊᕐᕌᒎᔪᒥ ᓵᓚᖃᕋᓱᐊᕐᓂᑦᑎᓐᓂ ᐱᙳᐊᖃᑎᑦᑎᓐᓂ.”

ᑲᒪᒋᔭᖃᖅᑐᖅ ᓄᓇᓕᐅᔪᖅ ᒪᑦ-ᓲ ᕚᓕ, ᐊᓛᔅᑲᒥ, ᓂᕆᐅᒃᐳᑦ ᑎᑭᕋᕐᓂᐊᖅᑐᓂ 2,000−ᓂ ᐱᙳᐊᖅᑎᐅᔪᓂ ᐊᒻᒪ ᑲᑎᙵᓂᐅᔪᒥ ᐃᓚᒋᔭᐅᔪᓂ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᓂᐅᔪᓂ ᐃᓚᖃᖅᑐᒥ ᓄᓇᕗᑦ, ᓄᓇᕕᒃ, ᓄᓇᑦᓯᐊᖅ, ᔫᑳᓐ ᐊᒻᒪ ᑲᓛᖦᖠᐅᑉ ᓄᓈᓐᓂ ᐊᒻᒪ ᐅᐊᖕᓇᒥ ᔅᑳᓐᑕᓇᐃᕕᐊᒥ ᐱᙳᐊᕐᓂᐅᔪᓄᑦ. ᐊᐅᓚᓂᐊᖅᑐᒥ ᒫᔾᔨ 10−ᒥ ᒫᔾᔨ 16−ᒧᑦ.

ᐱᙳᐊᖅᑎᐅᔪᑦ ᓵᓚᖃᕋᓱᐊᕐᓂᐊᖅᐳᑦ ᐊᔾᔨᒌᙱᕈᓘᔭᖅᑐᓂ ᐅᑭᐅᒃᑯᑦ ᐱᙳᐊᕐᓂᐅᔪᓂ ᐃᓚᖃᖅᑐᒥ ᕼᐋᑭᒥ, ᑰᓕᖕ, ᓯᐊᕐᕆᔭᐅᑎᑯᑖᑕᒃᑯᑦ ᑲᑎᙵᓂᐅᔪᓂ ᐊᒻᒪᓗ ᓱᒃᑲᔪᒥ ᓯᐊᕐᕆᔮᕐᓂᐅᔪᒥ.

ᑕᒪᑐᒪᓂ ᐊᕐᕌᒎᔪᒥ ᐊᐅᓚᖁᒻᒥ-ᑎᒍᒥᐊᖅᑎᐅᔪᖅ ᐊᐃᕆᔅ ᓴᐅᓪᓗᐊᐱᐅᓂᐊᖅᐳᖅ, ᐹᑦᒪᓐᑕᓐᒥ ᐱᙳᐊᖅᑎ ᐸᖕᓂᖅᑑᕐᒥᐅᑕᖅ, ᐅᖃᓚᐅᖅᐳᖅ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᒥᓂᔅᑕᖓ ᑕᐃᕕᑦ ᔪᐊᓇᓯ ᒪᑐᐃᖅᓯᕙᓪᓕᐊᓂᕐᒥ ᐅᖃᐅᓯᒃᓴᓕᐊᖓᓐᓂ ᕕᕗᐊᕆ 27−ᒥ.

ᓴᐅᓪᓗᐊᐱᒃ ᑐᕌᖅᑎᑦᑎᓂᐊᖅᐳᖅ ᓄᓇᕗᒻᒥ ᐱᙳᐊᖅᑎᓂᑦ ᒪᑐᐃᖅᐸᓪᓕᐊᓂᖓᓂ ᖁᕕᐊᓱᒍᑕᐅᔪᒥ.

ᔪᐊᓇᓯ ᐅᖃᓚᐅᖅᐳᖅ ᑕᒪᓐᓇ ᖁᕕᐊᓇᕐᓂᐅᓪᓗᓂ ᑕᐃᒃᑯᓄᖓ ᐃᓚᐅᖃᑕᐅᔪᓄᑦ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕐᓂᐅᔪᓂ.

“ᑕᐃᒃᑯᓄᖓ ᑐᕌᖓᔪᓄᑦ ᐊᔪᕆᖅᓱᐃᕙᒃᑐᓂ, ᐱᙳᐊᖅᑎᓄᑦ ᐊᒻᒪ ᐃᓄᓕᒫᓂ ᐅᕙᑦᑎᓐᓂ ᐃᑲᔪᖅᓱᐃᔪᓂ, ᐅᐱᒋᕙᔅᓯ ᐊᖏᖅᓯᒪᐃᓐᓇᕐᓂᔅᓯᓐᓂ ᐊᒻᒪ ᐊᒃᓱᕈᖅᖢᓯ ᐱᓕᕆᓂᔅᓯᓐᓂ ᑐᕌᖅᐸᓪᓕᐊᔪᒧᑦ ᐆᒧᖓ ᑎᑭᐅᑎᓂᐅᔪᒧᑦ,” ᐅᖃᓚᐅᖅᐳᖅ, ᑲᔪᖏᖅᓴᐃᓪᓗᓂ ᐊᑐᕐᓂᖏᓐᓂ ᐊᓐᓄᕌᖏᓐᓂ ᐅᐱᒋᓗᒋᑦ.