ᑲᑎᓯᒪᔫᒃ ᑎᐅᕆᑑᕇ? ᓄᓇᕗᑦ ᐅᑕᕿᔪᖅ ᓱᓕ

For an English version of this story, see, The connected territory? Nunavut still waits

ᓄᓇᕗᒻᒥᐅᓂᒃ ᐃᓚᒋᔭᐅᒍᕕᑦ ᖃᕋᓴᐅᔭᓂᒃ ᐊᑐᕐᐸᒡᓗᑎᒃ, ᓱᖏᐅᑎᔪᒃᓴᐅᕗᑎ ᓱᒃᑲᐃᑦᑐᒥ, ᐊᑭᑐᔪᓂᒃ ᐃᓕᐅᖃᕆᐊᓕᖕᓂ ᐊᒻᒪ ᐃᑭᑉᐸᒃᑐᓂᒃ, ᖃᒥᑉᐸᒃᑐᓂᒃ ᐅᖄᓚᐅᑎᕋᓛᓄᑦ ᐱᔨᑦᑎᕋᐅᑎᓂᒃ.

ᐃᓱᒪᔪᒃᓴᐅᕗᑎ ᓄᓇᕗᑦ ᑕᐃᒪᓐᓇ ᐸᕐᓇᒃᑕᐅᓚᐅᕐᓯᒪᓂᖓᓂᒃ. ᑭᓯᐊᓂᓕ ᑕᐃᒪᓐᓇᐅᓚᐅᙱᑦᑐᖅ.

ᐃᑲᔪᖅᑐᕕᓃᑦ ᐋᕿᒃᓯᕙᓪᓕᐊᓂᕐᒥᒃ ᓄᓇᕗᑦ ᒐᕙᒪᒃᑯᓐᓂ ᐃᓱᒪᓚᐅᕐᓯᒪᔪᑦ ᑖᓐᓇ ᐱᖃᑎᒋᔭᐅᓗᓂ ᒫᓐᓇᓕᓴᒻᒪᕆᖕᓂ ᑐᓴᐅᒪᔾᔪᑎᓕᕆᓂᕐᒥᑦ.

“ᐅᑭᐅᕐᑕᖅᑑᑉ ᑕᐅᑦᑐᖓ ᑐᐊᕕᖅᖢᓂ ᐊᓯᙳᖅᐸᓪᓕᐊᖕᒪᑦ, ᐱᓗᐊᕐᑐᒥᑦ ᑐᓴᕈᓐᓇᐅᑎᓕᕆᓂᒃᑯᑦ ᐅᐊᔭᓅᖅᑐᓂᒃ,” ᓄᓇᕗᒻᒥ ᐊᑐᓕᖅᑎᑕᐅᕙᓪᓕᐊᔪᓂᒃ ᑲᒥᓴᓐ ᐅᖃᓚᐅᕐᓯᒪᔪᑦ 1995-ᒥᑦ, ᐅᕙᓂ ᐅᖃᓕᒫᒐᓕᐊᖑᓯᒪᔪᒥᑦ  Footprints in New Snow ᐅᓂᒃᑳᓕᐊᓂᒃ.

“ᖃᕋᓴᐅᔭᓕᕆᓂᕐᒥᑦ/ᐅᐊᔭᓅᕐᑐᓂᓪᓗ ᐃᓕᓐᓂᐊᕐᓯᒪᔪᖃᕈᓘᔭᓕᕐᒪᑦ. ᓈᒻᒪᒃᑐᓂᒃ ᐋᕿᒃᓱᖅᑕᐅᒍᓂ, ᐸᕐᓇᒃᑕᐅᕙᓪᓕᐊᒍᓂ ᐊᒻᒪᓗ ᐱᓕᕆᔾᔪᑎᑕᖃᕐᓗᓂ, ᐅᓇ ᐅᐊᔭᓅᖅᑐᓂᒃ ᐱᓕᕆᐊᖃᕐᓂᖅ ᐊᖏᒡᓕᒋᐊᕈᓐᓇᖅᑐᖅ ᐊᒻᒪ ᐱᓕᕆᐊᖑᒃᑲᓐᓂᕐᓗᓂ ᐊᒻᒪᓗ ᑮᓇᐅᔭᓕᐅᕈᑎᐅᔪᓐᓇᕐᓯᓗᓂ ᐊᓯᖏᓪᓗ ᐃᑲᔫᑎᐅᔪᓐᓇᖅᑐᑦ,” ᑲᒥᓴᓐ ᐅᖃᓚᐅᕐᑐᑦ.

ᑕᐃᔅᓱᒪᓂ, ᖃᕋᓴᐅᔭᒃᑯᑦ ᐊᑦᑕᑕᕈᓐᓇᐅᑎᓕᕆᓂᖅ ᓄᑖᖑᓚᐅᕐᓯᒪᔪᖅ, ᐊᒻᒪᓗ ᓱᖏᐅᓐᓇᙱᖢᓂ ᐱᖁᑎ. ᐅᖄᓚᐅᑎᒃᑯᑦ ᐊᑦᑕᑕᕆᐊᖃᖅᐸᒃᖢᑎᒃ ᐃᖃᓗᖕᓂ ᐅᑯᑎᒎᓇᖅ ᓄᓇᓇᑦ (Nunanet), ᑭᓯᐊᓂᓕ ᐊᓯᖏᑦ ᓄᓇᕗᒥᑦ ᓄᓇᓖᑦ ᐊᑭᓕᒐᒃᓴᒥᑦ ᐊᑐᐃᓐᓇᖃᓚᐅᙱᑦᑐᑦ.

ᑕᐃᒪᐃᓐᓂᖓᓄᑦ, ᐊᒻᒪᓗ ᐊᑭᑐᔪᒻᒪᕆᐊᓘᓂᖓᓄᑦ ᖁᒻᒧᒃᑎᑕᐅᓯᒪᔪᒃᑯᑦ ᑐᓴᐅᒪᔾᔪᑎᓕᕆᓂᖅ ᐊᒻᒪᓗ ᐱᑕᖃᙱᑦᑎᐊᒻᒪᕆᖕᓂᖅ ᐅᐊᔭᓄᑦ ᐊᑦᑕᑕᐅᑎᐅᓇᔭᖅᑐᓂᒃ, ᖃᐅᔨᒪᓚᐅᕐᒥᔪᑦ ᐋᕿᒃᓱᐃᓂᖅ ᖃᕋᓴᐅᔭᓄᑦ ᐊᑦᑕᑕᕈᓐᓴᐅᑎᓕᕆᓂᖅ ᐊᒃᓱᕈᕐᓇᕋᔭᓚᐅᕐᓂᖓᓂᒃ.

“ᐃᓱᒪᓕᐅᑦᑎᐊᕋᓱᖕᓂᖅ ᓂᕈᐊᒐᒃᓴᐅᔪᓂᒃ ᓄᑖᓂᒃ ᑐᓴᐅᒪᔾᔪᑎᓕᕆᓂᕐᒨᖓᔪᓂᒃ, ᐊᒻᒪᓗ ᓂᕈᐊᕆᔭᐅᔪᑦ ᐊᒃᑕᑕᕈᑎᐅᒍᑎᒃ ᐸᕐᓇᒃᓯᒪᓕᕇᕐᑐᓄᑦ, ᑕᐃᒪᓕ ᑕᒪᓐᓇ ᐱᓕᕆᓂᓪᓚᕆᐅᓂᐊᖅᑐᖅ ᓄᑖᓄᑦ ᓄᓇᕗᑦ ᒐᕙᒪᒃᑯᓐᓄᑦ.”

ᑐᓴᐅᒪᔾᔪᑎᓕᕆᓂᖅ ᒐᕙᒪᓕᕆᕝᕕᐅᓂᐊᖅᑐᓂᒃ

ᐃᒃᓯᕙᐅᑕᖃᖅᖢᑎᒃ ᐃᓄᐃᑦ ᓯᕗᓕᐅᕐᑎᖓᓄᑦ ᔮᓐ ᐊᒪᕈᐊᓕᒃ, ᖁᓕᓂᒃ ᑲᑎᒪᔨᖃᖅᑐᖅ ᑲᒥᓴᓐ ᐱᓕᕆᐊᒃᓴᖃᖅᑎᑕᐅᓚᐅᕐᓯᒪᔪᑦ ᐃᓱᒪᓕᐅᕆᓂᐊᕐᓗᑎᒃ ᖃᓄᖅ ᒐᕙᒪᒃᑯᑦ ᐃᓄᖕᓄᑦ ᓄᓇᕗᒥ ᐋᕿᒃᓯᒪᔭᕆᐊᖃᕐᓂᖓᓂᒃ.

ᐋᕿᒃᓯᓚᐅᕐᑐᑦ ᓄᓇᕗᑦ ᒐᕙᒪᒃᑯ ᐊᑐᐃᓐᓇᐅᔪᓐᓇᖅᑐᒥᒃ, ᐊᑑᑎᖃᕈᓐᓇᕐᓗᓂᓗ ᑐᓴᐅᒪᔾᔪᑎᓕᕆᓂᒃᓴᒥᑦ ᐃᖏᕐᕋᑦᑎᐊᕈᓐᓇᖅᑐᒥᑦ.

ᑕᐃᒪᐃᔾᔪᑎᖃᓚᐅᕐᑐᕐᓕ ᐊᑐᐊᒐᖅ ᒐᕙᒪᒃᑯᑦ ᐊᕕᒃᑐᕐᓯᒪᓗᑎ ᐱᓕᕆᕝᕕᐅᓂᐊᖅᑐᓂᒃ, ᑖᒃᑯᐊᓗ 400 ᐸᓗᖕᓂ ᓄᑖᓂᒃ ᒐᕙᒪᒃᑯᑦ ᐃᖅᑲᓇᐃᔮᒃᓴᖏᓐᓂᒃ 11-ᓄᑦ ᓄᓇᓕᖕᓄᑦ ᒥᑭᓐᓂᕐᓴᓄᐊᖅᑕᐅᓪᓗᑎᒃ 1999-ᓗ 2001-ᓗ ᐊᑯᓐᓂᖓᓂ.

ᑲᒥᓴᓐ ᐃᑲᕐᕋᑲᓪᓛᓗᖕᓂᒃ ᐱᓕᕆᓚᐅᕐᓯᒪᔪᑦ ᖃᐅᔨᓇᓱᒃᖢᒍ ᓈᒻᒪᙱᓕᐅᕈᑎᐅᔪᖅ ᐊᒻᒪᓗ ᑎᑎᕋᐅᓯᕆᓪᓗᒍ ᖃᓄᐃᓕᐅᕈᑎᖏᓐᓂᒃ, ᐃᓚᒋᐊᕈᑎᒃᓴᓄᑦ ᐅᓂᒃᑳᓂ.

ᐃᓚᖓᓂᒡᓕ ᐅᓂᒃᑳᓂᒃ, ᓄᓇᕗᑦ ᐸᕐᓇᐃᔨᖏᑦ ᓴᕿᑦᑎᓕᓚᐅᕐᓯᒪᔪᑦ ᑕᐅᑐᙳᐊᑦᑎᐊᕈᑎᐊᓗᖕᒥ: ᐊᑦᑕᑕᕈᓐᓇᐅᑎᓕᕆᓂᖅ “ᐅᖄᓚᐅᑎᓕᕆᓂᕐᒧᑦ ᐱᓕᕆᕝᕕᒃᓂᑦ” ᐊᑦᑕᑕᕈᑎᐅᓇᔭᖅᑐᓂᒃ ᓄᓇᕗᑦ 25 ᓄᓇᓕᖏᓐᓂᒃ.

ᑖᒃᑯᓇᓂᓕ ᐱᓕᕆᕝᕕᖕᓂ, ᑕᒪᕐᒥ ᓄᓇᖃᖅᑐᐃᑦ ᐊᑭᖃᙱᑦᑐᒥᒃ ᐅᕝᕙᓘᓐᓃᑦ ᐊᑭᑭᑦᑐᒥᑦ ᑐᓴᐅᒪᔾᔪᑎᓕᕆᔾᔪᑎᒃᓴᓂᒃ ᖃᓄᐃᑦᑐᑐᐃᓐᓇᕐᓂᒃ—ᓱᑲᑦᑐᒃᑰᕈᑎᑦ, ᐊᔾᔨᓕᐅᕈᑎᑦ ᑎᑎᖃᓂᒃ, ᖃᕋᓴᐅᔭᐃᑦ ᐊᒻᒪᓗ ᑕᑯᒃᓴᐅᓗᓂ ᑲᑎᒪᒍᑎᒃᓴᑦ ᐅᖄᓚᐅᑎᑎᒍᑦ.

ᑕᐅᑐᙳᐊᓚᐅᕐᒪᑕ ᐅᓇ ᐱᓕᕆᔾᔪᑎᓕᕆᓂᖅ ᒪᐅᓇᕋᔭᖅᖢᓂ ᖃᕋᓴᐅᔭᒃᑯᑦ ᐊᑦᑕᑕᕈᓐᓇᐅᑎᓕᕆᔾᔪᑎᓂᒃ ᐃᓕᓐᓂᐊᕐᕕᒃᓂᑦ, ᐋᓐᓂᐊᕕᖕᓂᒃ, ᕼᐋᒻᒪᓚᒃᑯᑦ ᐃᒡᓗᖁᑎᖏᓐᓂᒃ ᐊᒻᒪᓗ ᒐᕙᒪᓕᕆᕝᕕᐅᔪᓂᒃ ᑎᑎᕋᕐᕕᖕᓂᑦ.

ᓴᕿᑎᓐᓂᐊᕐᓗᒍᑦ ᐊᔪᙱᑦᑐᓐᓇᕋᔭᕐᓂᖓ, 1997-ᒥ ᑲᒥᓴᓐ ᐋᕿᒃᓱᐃᒍᑎᐅᓚᐅᕐᒥᔪᖅ ᑲᑎᒪᕕᒡᔪᐊᕐᓂᒃᓴᒥᑦ “ᐱᓕᕆᓂᐅᑉ ᖃᓄᐃᓕᐅᕈᓯᖓᓂ” ᑲᑎᒪᔭᖅᑐᖅᑐᓂᔅᓗ ᐃᖃᓗᖕᓄᑦ ᐅᐸᒃᑕᐅᓪᓗᓂ ᐱᖓᓱᓂᒃ ᐊᕕᒃᑐᖅᓯᒪᓂᒃᑯᑦ ᐃᓄᐃᑦ ᓄᓇᖏᓐᓂᑦ ᓄᓇᕗᙳᕐᓵᓕᓂᐊᕐᑐᓂᒃ.

ᑕᒪᐅᓇᑦᑕᐃᓐᓇᖅ, ᐊᒥᓱᓂ ᐃᓄᖕᓂ ᐊᑦᑕᑕᖅᑎᑦᑎᓚᐅᕐᓯᒪᔪᑦ ᐊᔪᙱᑕᒥᓄᑦ ᑲᑎᒪᕕᒡᔪᐊᒥ ᖃᓄᑐᐃᓐᓇᖅ ᐊᑐᕈᓐᓇᖅᑕᖏᑦᑎᒍ ᑕᐃᔅᓱᒪᓂ: ᖁᒻᒧᒃᑎᑕᐅᓯᒪᔪᒃᑯ ᑕᓚᕕᓴᓐ, ᐅᖄᓚᐅᑎᒃᑯᑦ ᐊᒻᒪ ᖁᒻᒧᒃᑎᑕᐅᓯᒪᔪᒃᑰᖓᓪᓗᓂ, ᐊᒻᒪ ᐅᖄᓚᐅᑎᓂᒃ ᐊᑐᖅᖢᑎᒃ.

ᑕᒪᓐᓇ ᐃᓚᖃᓚᐅᕐᑐᖅ ᐊᑐᖅᖢᑎᒃ ᖃᓪᓗᓈᑐᑦ-ᐃᓄᒃᑎᑐᑦ ᑐᓵᔨᓂᒃ, ᐊᒻᒪᓗ ᐅᖃᕈᓐᓇᙱᑦᑐᓄᑦ ᐊᒡᒐᑎᒍᑦ ᑐᑭᓕᐅᕆᔨᓂᒃ ᐊᒻᒪᓗ ᓴᕿᑉᐸᓪᓕᐊᔪᑦ ᑎᑎᕋᖅᑕᐅᕙᓪᓕᐊᓪᓗᑎᒃ ᑐᓵᑦᑎᐊᙱᑦᑐᓄᑦ.

“ᑲᑎᒪᓂᕐᔪᐊᕐᒧᑦ ᐋᕿᒃᓱᐃᔨᐅᔪᑦ ᐅᔾᔨᕈᓱᓚᐅᕐᑐᑦ ᖁᐊᕐᓵᕐᓇᑐᐃᓐᓇᕆᐊᓕᒃᓂᒃ ᐱᓕᕆᔾᔪᑎᓕᕆᓂᕐᒧᑦ, ᑭᓯᐊᓂᓕ ᐱᓇᓱᒍᒪᒻᒪᕆᓚᐅᕐᑐᑦ ᓴᕿᑎᑦᑎᔪᓐᓇᕐᓂᕐᒥᑦ ᐊᑑᑎᐅᔪᓐᓇᕋᔭᖅᑐᓂᒃ ᑕᐃᒪᐃᑦᑐᓂᒃ ᑐᓴᐅᒪᔾᔪᑎᓕᕆᓂᖅ ᐊᑐᖅᖢᑎᒃ ᒫᓐᓇ ᐱᖁᑎᒋᔭᐅᔪᓐᓇᖅᑐᑦ,” ᐋᕿᒃᓱᐃᔨᐅᔪᑦ ᑕᐃᔅᓱᒪᓂ ᐃᖕᒥᖕᓂᒃ ᐅᐱᒋᒻᒪᕆᓚᐅᕐᑐᑦ.

“ᐊᒥᓱᑦ ᐃᓄᐃᑦ ᐅᖃᓚᐅᕐᓯᒪᔪᑦ ᕿᓚᒥᐊᓗᒃ ᐱᓕᕆᔾᔪᑎᓕᕆᓂ ᓄᓇᕗᒥᑦ ᐊᑐᖅᑕᐅᑲᑕᓕᓚᐅᕐᓯᒪᖕᒪᑦ ᐃᓄᐃᑦ ᐊᑐᐃᓐᓇᖃᙱᒃᑲᓗᐊᖅᑎᓪᓗᒋ ᒪᑯᓂᖓ ᐅᖄᓚᐅᑎᓂᒡᓘᓐᓃᑦ ᐊᒻᒪ ᓱᑲᑦᑐᒃᑰᕈᑎᓂᒃ.”

ᑕᒪᑦᑕᓕ ᖃᐅᔨᒪᔪᒍᑦ ᒫᓐᓇ, ᓄᓇᕗᑦ ᑎᑭᐅᑎᓚᐅᕐᓯᒪᙱᑦᑐᖅ.

ᑕᒪᒃᑯᐊ ᐃᑲᔫᑎᐅᓂᐊᕋᓗᐊᖅᑎᓪᓗᒋᑦ ᒐᕙᒪᓕᕆᕝᕕᐅᔪᓂᒃ, ᑐᓴᐅᒪᔾᔪᑎᓕᕆᓂᖅ ᓴᙱᙱᓗᐊᕐᓂᕐᒧᑦ ᐋᕿᒃᑕᐅᓯᒪᔪᑦ ᒐᕙᒪᒃᑯᑦ ᐱᓕᕆᐊᖏᓐᓂᒃ ᐊᑲᐅᙱᓕᐅᕈᑎᐅᖔᓕᖅᖢᑎᒃ.

1999-ᒥ, ᐊᑕᐅᓯᑐᐊᖅ ᓄᓇᕗᓕᒫᒥᑦ ᖃᕋᓴᐅᔭᓄᑦ ᐊᑦᑕᑕᕈᓐᓇᐅᑎᓕᕆᓂᕐᒧᑦ ᐱᔨᑦᑎᕋᐅᑎᐅᔪᖅ ᐊᑐᐃᓐᓇᐅᓪᓗᓂ ᓄᓇᕗᒧ ᒪᓂᒻᒪᐃᓯᒪᓚᐅᕐᐳᖅ ᒐᕙᒪᒃᑯᓐᓄᑐᐊᖅ ᐊᒻᒪ ᐃᓚᖏᓐᓄᑦ ᓇᖕᒥᓂᖅ ᐱᓕᕆᐊᓕᖕᓂᒃ, ᐃᓚᖃᖅᖢᑎᒃ ᐊᒥᓲᙱᑦᑐᓂᒃ ᓄᓇᓕᖕᓂᑦ ᐊᑦᑕᑕᕈᓐᓇᐅᑎᓕᕆᔨᓂᒃ.

ᓄᓇᕗᒥ ᐳᕌᑦᐹᓐ ᐱᕙᓪᓕᐊᔪᓕᕆᔨᑦ ᑯᐊᐳᕇᓴᓐ, ᑮᓇᐅᔭᓕᐅᕋᓱᒐᑎᒃ ᑲᑐᔾᔨᖃᑎᒌᖑᔪᑦ, ᖃᐅᔨᓴᓚᐅᕐᓯᒪᕗᑦ ᓄᓇᕗᒥᐅᑕᓂᒃ ᐊᒻᒪᓗ ᖃᐅᔨᓕᖅᖢᑎᒃ ᐱᔪᒪᓪᓚᕆᒃᑐᓂᒃ ᐱᐅᓂᕐᓴᒥᒃ ᖃᕋᓴᐅᔭᓄᑦ ᐊᑦᑕᑕᕈᓐᓇᐅᑎᓕᕆᓂᕐᒧᑦ ᓄᓇᕗᒥᑦ.

ᐊᑐᖅᓗᑎᒃ ᐃᑲᔫᑎᓂᒃ ᐅᕙᙵᑦ ᓴᓈᒃᓴᓕᕆᓂᒃᑯᑦ ᑲᓇᑕᒥ ᐊᒻᒪ ᐊᓯᖏᓐᓂᒃ, ᐳᕌᑦᐹᓐ ᑯᐊᐳᕇᓴᓐ ᐊᑎᓕᐅᓚᐅᕐᓯᒪᕗᑦ ᑳᓐᑐᕌᒥ ᐅᑯᓄᖓ ᔭᓗᓇᐃᒥ ᑐᙵᕕᓖᑦ Ssi Micro ᑖᒃᑯᐊ ᐳᕌᑦᐹᓐᒥ ᖃᕋᓴᐅᔭᓕᕆᓂᕐᒥ ᓄᓇᕗᑦ ᓄᓇᓕᓕᒫᖏᓐᓂ.

ᑕᐃᒪᓐᓇ ‘ᕿᓂᖅ’ ᐊᑦᑕᑕᕈᓐᓇᐅᑎᓕᕆᔨ, ᐊᑐᖃᑦᑕᖅᑐᑦ ᐅᐊᔭᓄ ᐊᑕᙱᑦᑐᓂᒃ ᓄᓇᓕᖕᓅᖅᑎᑦᑎᓪᓗᑎᒃ, ᓴᕿᓕᓚᐅᕐᓯᒪᕗᖅ ᒪᐃ 2005-ᒥᑦ.

ᐊᓱᐃᓛᑕᐃᓐᓇᖅ, ᑕᒪᐃᓐᓂ ᓄᓇᓖᑦ ᓄᓇᕗᒥᑦ ᐊᑐᐃᓐᓇᖃᕈᓐᓇᓕᓚᐅᕐᑐᑦ ᐊᑭᓕᒐᒃᓴᒥᑦ ᖃᕋᓴᐅᔭᓄᑦ ᐊᑦᑕᑕᕈᓐᓇᐅᑎᒥᒃ.

ᐊᖏᔪᑦ ᖃᐅᔨᕚᓪᓕᕈᑎᒻᒪᕇᑦ

ᑭᓯᐊᓂᓕ ᐅᒃᑑᐱᕆ 6, 2011-ᒥ, ᓄᓇᕗᒥᑦ ᓄᓇᖃᖅᑐᑦ ᖃᐅᔨᕚᓪᓕᕈᑎᖃᒻᒪᕆᓚᐅᕐᓯᒪᕗᑦ ᓴᕿᑎᑦᑎᒍᑎᐅᓪᓗᓂ ᓄᓇᕗᑦ ᐊᑐᕐᓗᓂ ᑭᓯᐊᓂ ᖁᒻᒧᒃᑎᑕᐅᓯᒪᔪᒃᑯᑦ ᑐᓴᐅᑎᓕᕆᔪᓐᓇᖅᑐᑦ.

ᖃᕋᓴᐅᔭᓄᑦ ᐃᓚᒃᓴ ᐊᑲᐅᙱᓕᐅᕈᑎᐅᑎᓪᓗᒍ ᐆᒧᖓ ᑕᓕᓵᑦᑯᑦ ᐊᓂᒃ F2 ᖁᒻᒧᒃᑎᑕᐅᓯᒪᔪᖅ ᐊᔪᓕᕈᑎᐅᓚᐅᕐᓯᒪᕗᖅ ᐃᑲᕐᕋᓂᒃ 16-ᓂᒃ, ᐅᖓᓯᒃᑐᒧᑦ ᐅᖄᓚᒍᓐᓇᐃᓪᓕᓪᓗᑎᒃ, ᐅᖄᓚᐅᑎᕋᓛᑦ, ᖃᕋᓴᐅᔭᓄᑦ ᐊᑦᑕᑕᕈᓐᓇᐅᑎᑦ ᐊᒻᒪᓗ ᑮᓇᐅᔭᓕᕆᔾᔪᑎᓄᑦ ᐱᔨᑦᑎᕋᐅᑏᑦ ᐊᔪᓕᖅᖢᑎᒃ.

ᖃᖓᑕᓲᑦ ᓄᖃᖅᑎᑕᐅᔭᕆᐊᖃᓚᐅᕐᓯᒪᔪᑦ ᐅᓄᕐᑐᐃᑦ, ᐊᒥᓱᓂ ᐊᔪᕐᓯᐅᖃᑎᑦᑎᓪᓗᑎᒃ ᐅᓯᔭᐅᔪᒃᓴᓂᒃ, ᐊᒻᒪᓗ ᐸᓖᓯᒃᑯᑦ ᐊᒻᒪ ᓄᓇᕗᑦ ᒐᕙᒪᒃᑯᑦ ᐱᓕᕆᔨᒻᒪᕆᖏᑦ ᐃᖃᓗᖕᓂᑦ ᐊᑐᕆᐊᖃᓕᖅᖢᑎᒃ ᐆᕚᕈᑎᓂᒃ ᓄᓇᓕᖕᓄ ᐅᖃᕋᓱᒃᑎᓪᓗᒋᑦ.

ᑕᐃᒪᐃᓚᐅᕐᑎᓪᓗᒍ, ᒐᕙᒪᐅᔪᑦ ᐊᒻᒪᓗ ᐊᒥᓱᒻᒪᕆᐊᓗᐃᑦ ᑎᒍᒥᐊᖅᑎᐅᔪᑦ ᐊᒻᒪ ᐱᓕᕆᕝᕕᐅᔪᑦ, ᐃᓚᖃᖅᖢᑎᒃ CRTC-ᑯᓐᓂᒃ, ᕿᒥᕐᕈᐊᓕᓚᐅᕐᐳᑦ ᖃᓄᑎᒋ ᐅᔾᔨᖅᓱᖅᑕᐅᑦᑎᐊᕆᐊᖃᕐᓂᖓᓂᒃ ᑲᓇᑕᐅᑉ ᐅᐊᖕᓇᖓᓂᒃ ᑐᓴᐅᒪᔾᔪᑎᓕᕆᔾᔪᓯᖅ.

ᐱᒋᐊᕈᑎᖃᖅᖢᑎᒃ ᓯᕗᓂᐊᒍᑦ ᑐᓴᐅᒪᔾᔪᑎᓕᕆᓂᕐᒥᑦ ᓱᕋᒍᑎᕕᓂᕐᒥᒃ 2009-ᒥᑦ ᐊᐅᔭᒃᑯᑦ ᓈᒻᒪᙱᓕᐅᕈᑎᕕᓂᖅ ᐋᐳᕇᓴᓐ ᓇᓄᖅ (Operation Nanook) ᐅᓇᑕᖅᑐᒃᓴᑦ ᐊᔪᕈᓐᓃᕐᓴᕐᓂᖓᓂᒃ, ᑎᒥᐅᔪᖅ ᑕᐃᔭᐅᔪᖅ Northern Communications and Information Systems(ᐅᑭᐅᕐᑕᖅᑐᕐᒥ ᑐᓴᐅᒪᔾᔪᑎᒌᖕᓂᕐᒧᑦ ᐊᒻᒪ ᑐᓴᐅᒪᔭᒃᓴᓕᕆᓂᕐᒧᑦ ᐱᓕᕆᔾᔪᑎ) ᐱᓕᕆᖃᑎᒌᖑᔪᑦ ᐊᖏᔪᒥᒃ ᖃᐅᔨᓴᓚᐅᕐᓯᒪᖕᒪᑕ ᑐᓴᐅᒪᖃᑦᑕᐅᑎᓕᕆᓂᕐᒧᑦ ᐱᖁᑎᒋᔭᐅᔪᓂᒃ ᑲᓇᑕᐅᑉ ᐅᑭᐅᕐᑕᖅᑐᖓᓂᒃ.

ᐃᓱᒫᓘᑎᖃᖅᑐᑦ ᑭᒃᑯᓕᒫᓂ ᖃᓄᐃᑎᑦᑎᑦᑕᐃᓕᓂᕐᒧᑦ ᐊᒻᒪ ᑲᓇᑕᒥ ᓴᐳᓐᓂᐊᖅᑎᑦ, ᐱᓕᕆᖃᑎᒌᑦ ᐃᓱᒪᓕᐅᕆᓯᒪᔪᑦ ᐋᕿᒃᓱᐃᓂᕐᒥᒃ ᐊᑐᐃᓐᓇᐅᓂᕐᓴᓂᒃ ᐱᔨᑦᑎᕋᐅᑎᓕᕆᓂᕐᒥᒃ, ᐃᑲᔫᑎᒃᓴᒃᑲᓐᓂᕐᓂᒃ, ᐱᓕᕆᐊᖑᐃᓐᓇᕈᓐᓇᕐᓗᓂ ᐊᒻᒪᓗ ᐊᓯᐊᓂ ᑐᙵᕕᒃᓴᐅᓂᐊᖅᑐᓂᒃ, ᐊᒻᒪᓗ ᐱᐅᓯᕚᓪᓕᖅᑎᓪᓗᒍ ᑐᐊᕕᕐᓇᖅᑐᓕᕆᓂᕐᒧᑦ ᐱᓕᕆᓂᐅᔪᑦ.

ᐋᓐᑎᐅᕆᐅᒥᑦ ᑐᙵᕕᓕᒃ ᓴᓇᕝᕕᒃ ᑕᐃᔭᐅᔪᖅ ᐋᑎᒃ ᕙᐃᐳ ᐃᖕᒃ. (Arctic Fibre Inc.) ᓴᕿᓕᓚᐅᕐᐳᖅ, ᑐᒃᓯᕋᐅᓯᐅᖅᖢᓂ ᐋᕿᒃᓱᐃᔪᒪᓂᕐᒥᑦ ᑕᕆᐅᑉ ᐃᓗᐊᒍᑦ ᐅᐊᔭᓂᒃ ᕙᐃᐳ ᐋᑉᑎᒃᓂ ᓂᐅ ᔪᐊᒃ ᓯᑎᒥᑦ ᑕᐅᕗᖓ ᐊᐃᓯᐊᒧᑦ ᐅᑭᐅᖅᑕᖅᑑᑉ ᐱᖓᖕᓇᖓᓂᒃ ᕿᑭᖅᑖᓗᖕᒧᑦ ᐊᖅᑯᑎᐊᒍᑦ, ᐊᑦᑕᑕᕈᑎᐅᓗᓂ ᓄᓇᕗᒥᑦ ᓄᓇᓕᖕᓂᑦ ᐊᖅᑯᑎᐊᓃᑦᑐᓂᒃ.

ᑖᓐᓇ ᑲᒻᐸᓂ ᐱᑖᕆᔭᐅᓕᓚᐅᕐᓯᒪᔪᑦ ᑯᐃᓐᑎᓕᐊᓐ ᓴᑉᓰ ᕼᐆᑎᖕᔅ ᐊᓛᔅᑲᒥᑦ (Quintillion Subsea Holdings), ᑖᒃᑯᐊᓗ ᐋᕿᒃᓱᐃᓚᐅᕐᓯᒪᓪᓗᑎᒃ ᐅᐊᔭᓂᒃ ᐊᓛᔅᑲᐅᑉ ᐅᑭᐅᕐᑕᖅᑐᖓᓂᒃ. ᑭᓯᐊᓂᓕ ᐸᕐᓇᐅᑎ ᐊᑦᑕᑕᖅᑎᑦᑎᓂᕐᒥᒃ ᑲᓇᑕᐅᑉ ᐅᑭᐅᕐᑕᖅᑐᖓᓂ ᐊᑐᓕᖅᑎᑕᐅᔭᕆᐊᖃᑎᖅᐳᖅ.

ᑕᒪᐅᓇᑦᑕᐃᓐᓇᖅ, ᐅᑭᐅᕐᑕᖅᑐᕐᒥᑦ ᑲᑐᔾᔨᖃᑎᒌᖑᔪᑦ ᐊᒻᒪ ᒐᕙᒪᐅᔪᑦ, ᐱᓗᐊᕐᑐᒥ ᓄᓇᕗᑦ ᒐᕙᒪᖓ, ᑐᓂᓯᑲᑕᓕᓚᐅᕐᓯᒪᕗᑦ CRTC-ᑯᓐᓄᑦ ᑲᓇᑕᒥ ᓈᓚᐅᓯᕆᔨᒃᑯᓐᓄᑦ, ᐱᔪᒪᒻᒪᕆᒃᖢᑎᒃ ᐋᕿᒃᓯᒪᒍᑎᒃᓴᒥᑦ ᐱᓕᕆᒃᑲᓐᓂᕐᓂᕐᒥᒃ ᐊᑐᕈᓐᓇᑦᑎᐊᖅᑐᒥᑦ ᑐᓴᐅᒪᔾᔪᑎᓕᕆᓂᕐᒥᒃ ᓄᓇᒥᑦ.

“ᐃᓄᖃᙱᑦᑐᒦᓐᓂᖅ ᐊᑐᖅᑕᐅᔭᕆᐊᖃᙱᓚᖅ ᓇᓗᓇᐃᒃᑯᑎᐅᓂᐊᕐᓗᓂ ᒐᕙᒪᓄᑦ, ᓇᖕᒥᓂᖅ ᐱᓕᕆᐊᓄᑦ ᐅᕝᕙᓘᓐᓃᑦ ᐃᒻᒥᒃᑰᔪᑦ ᐊᑐᐃᓐᓇᖃᕈᓐᓇᙱᓐᓂᖏᓐᓂᒃ ᐱᔨᑦᑎᕋᐅᑎᓂᒃ ᑕᒪᓐᓇ ᐱᒻᒪᕆᐊᓘᓕᖅᑎᓪᓗᒍ ᐅᓪᓗᒥ ᖃᕋᓴᐅᔭᑎᒍᑦ ᑮᓇᐅᔭᓕᐅᕋᓱᖕᓂᐅᓕᖅᑐᒧᑦ ᐊᒻᒪᓗ ᐊᑐᐃᓐᓇᖃᖅᑎᑦᑎᖕᒥᓗᑎᒃ ᐊᓯᖏᓐᓂᒃ ᐱᔨᑦᑎᕋᐅᑎᓂᒃ, ᒪᑯᓂᖓ ᐋᓐᓂᐊᖃᖅᑕᐃᓕᓂᕐᒧᑦ, ᐃᓕᓐᓂᐊᖅᑐᓕᕆᓂᕐᒧᑦ, ᒐᕙᒪᓕᕆᓂᕐᒧᑦ, ᖃᓄᐃᑎᑦᑎᑦᑕᐃᓕᓂᕐᒧᑦ ᐊᒻᒪ ᑮᓇᐅᔭᓕᕆᓂᕐᒧᑦ,” ᓄᓇᕗᑦ ᒐᕙᒪᒃᑯᑦ ᐅᖃᓚᐅᕐᑐᑦ CRTC-ᑯᓐᓄᑦ 2016-ᒥᑦ.

ᒪᑯᓂᖓᓕ ᒫᓐᓇᓕᓴᒻᒪᕆᖕᓂᒃ ᑐᓴᐅᒪᔾᔪᑎᓕᕆᓃᑦ ᒥᒃᓵᓄᑦ ᐸᕐᓇᐃᔨᐅᓚᐅᕐᓯᒪᔪᑦ ᑕᐅᑐᙳᐊᕐᓂᑯᖓ ᓄᓇᕗᒧᑦ, ᓄᓇᕗᑦ ᓱᓕ ᐅᑕᕿᕗᖅ.

ᔨᒻᐱᐅᓪᓄᓇᕗᒥᑦᓄᓇᖃᓚᐅᕐᑐᖅ1979-ᒥᑦᑎᑭᖢᒍ2015, ᐊᒻᒪᓗᑕᐃᑲᓃᓐᓂᕐᒥᓂᒃᐱᓕᕆᐊᖃᓪᓗᐊᑕᖅᖢᓂᑐᓴᒐᒃᓴᓕᐅᖅᑎᐅᓂᕐᒥᒃᐊᒻᒪᐋᕿᒃᓱᐃᔨᐅᓂᕐᒥᒃᓄᓇᑦᓯᐊᕐᒥᐱᕙᓪᓕᐊᔪᓂᒃ.