ᑕᐃᕕᑦ ᓂᖏᐅᖓᓐ, ᓴᐅᒥᐊᓂ, ᐊᒻᒪ ᐳᔾᔫᑦ ᑯᓱᒐᖅ ᑲᖏᖅᖠᓂᖅᒥᐅᑖᒃ ᐱᓕᕆᖃᑎᒌᓕᖅᑎᑕᐅᔫᒃ ᐅᖃᖅᑎᐅᓂᐊᕐᓗᑎᒃ ᐱᖓᓱᓄᑦ ᑲᓇᑕᒥ ᕼᐋᑭᖅᑎᑦ ᑲᑐᔾᔨᖃᑎᒌᑦ ᐱᙳᐊᖅᑎᓪᓗᒋᑦ ᑖᒃᑯᐊᓗ ᐄᐲᑏᐊᓐᒥ (APTN) ᓴᖅᑭᔮᕐᓂᐊᖅᖢᑎᒃ ᐊᒻᒪ ᐅᕘᓇ Sportsnet “ᐃᓄᒃᑎᑐᑦ ᕼᐋᑭ ᐅᓐᓄᒃᑯᑦ ᑲᓇᑕᒥ” ᑕᓚᕖᓴᓐᑯᑦ. (ᐊᔾᔨᙳᐊᖅ ᐅᕙᙵᑦ ᐳᔾᔫᑦ ᑯᓱᒐᖅ)

ᐅᓇ ᐊᕐᓴᐅᔭᖅ ᐱᒋᐊᕈᑎᖃᕐᓂᐊᖅᑐᖅ ᐃᓄᒃᑎᑐᑦ ᐱᖓᓱᓄᑦ ᑲᓇᑕᒥ ᕼᐋᑭᖅᑎᓄᑦ ᑲᑐᔾᔨᖃᑎᒌᓄᑦ ᐃᓚᒋᔭᐅᔪᓄᑦ (NHL) ᐅᐱᕐᖔᖅ

ᑲᖏᖅᖠᓂᖅᒥᐅᑕᑦ ᑕᐃᕕᑦ ᓂᖏᐅᖓᓐ, ᐳᔾᔫᑎᑦ ᑯᓱᒐᖅ ᐊᒻᒪ ᕌᐳᑦ ᖃᑉᕕᑐᒃ ᐱᙳᐊᖅᑐᓂ ᐅᖃᐅᓯᖃᖅᐸᓪᓕᐊᖃᑦᑕᕐᓂᐊᖅᑐᑦ ᐄᐲᑏᐊᓐᑯᓐᓄᑦ (APTN) ᐊᒻᒪ Sportsnet-ᑯᓐᓄᑦ.

By ᑭᐅᔅᑕᓐ ᕗᐃᓕᐊᒻᔅ

For English version, see The puck drops in Inuktitut for 3 NHL games this spring

ᐸᕐᓇᒃᓯᒪᒋᑦᑎ ᐆᒧᖓ ᐃᓄᒃᑎᑐᑦ ᕼᐋᑭ ᐅᓐᓄᒃᑯᑦ ᑲᓇᑕᒥ.

ᐊᖏᒡᓕᒋᐊᕐᓂᐅᔪᖅ ᐄᐲᑏᐊᓐᑯᓐᓂᑦ ᐊᒻᒪ Sportsnet-ᑯᑦ ᑯᕇᑐᑦ ᕼᐋᑭ ᐅᓐᓄᒃᑯᒧᑦ, ᑕᓚᕖᓴᓕᕆᔨᑦ ᐱᙳᐊᖅᑐᓂ ᐅᓂᒃᑲᐅᓯᖃᖅᐸᓪᓕᐊᖃᑦᑕᖅᑐᑦ ᑲᖏᖅᖠᓂᖅᒥᑦ ᐱᓕᕆᐊᖃᓕᖅᑎᑦᑎᕗᑦ ᑲᓇᑕᒥ ᕼᐋᑭᑎᒃᑯᑦ ᑲᑐᔾᔨᖃᑎᒌᑦ ᐱᙳᐊᖅᑕᖏᓐᓂᒃ ᐃᓄᒃᑎᑑᕐᓗᑎᒃ ᑕᒪᑐᒪᓂ ᕼᐋᑭᕐᓇᕐᓂᖓᓂ.

ᕌᐳᑦ ᖃᑉᕕᑐᒃ, ᐃᓚᒋᔭᐅᓂᐊᕐᑐᖅ ᓴᖅᑭᔮᖅᑐᓂᒃ ᐱᙳᐊᖅᑐᓂᑦ ᐅᖃᓪᓚᒃᑎᐅᔪᓂᒃ, ᐅᖃᓚᐅᕐᑐᖅ ᐅᖄᓚᕝᕕᐅᑎᓪᓗᒍ ᐃᖅᑲᓚᐅᖅᑕᖓ ᐊᒃᑲᒋᓚᐅᖅᑕᖏ ᓰᐲᓰᑯᓐᓂ. ᖃᑉᕕᑐᒃ ᐅᖃᓪᓚᒃᑎᐅᕙᒃᑐᖅ ᓰᐲᓰᑯᑦ ᓈᓚᐅᑎ 1-ᒥ ᐱᓕᕆᐊᕆᕙᒃᑕᖓᓂ ᑐᓵᔭᒃᓴᑦ.

ᕌᐳᑦ ᖃᑉᕕᑐᒃ ᑲᖏᖅᖠᓂᖅᒥᐅᑕᖅ ᐃᓚᒋᔭᐅᓕᓚᐅᕐᒥᔪᖅ ᐅᑯᓇᓂ “ᕼᐋᑭ ᐅᓐᓄᒃᑯᑦ ᑲᓇᑕᒥ ᐃᓄᒃᑎᑐᑦ” ᐱᓕᕆᖃᑎᒌᓄᑦ. (ᐊᔾᔨᙳᐊᖅ ᐅᕙᙵᑦ ᕙᙵᑦ ᕌᐳᑦ ᖃᑉᕕᑐᒃ)

“ᐊᒃᑲᒋᓚᐅᕐᓯᒪᔭᕋ ᐊᑕᐅᓰᖅᖢᓂ ᐅᖃᓚᐅᕐᓯᒪᔪᖅ, ‘ᑕᐃᒪᑐᖅ ᐃᓚᒋᔭᐅᓚᖓ ᐱᙳᐊᖅᐸᓪᓕᐊᔪᓂ ᐃᓄᒃᑎᑐᑦᑕᐅᖅ,’ ᑖᔅᓱᒥᖓᓕ ᐃᓱᒪᓚᐅᕐᑐᖓ ᐊᐱᕆᔭᐅᒐᒪ,” ᐅᖃᕐᑐᖅ.

“ᐃᓱᒪᒋᓚᐅᕐᑕᖓᖃᐃ ᓱᓕᓕᕐᒪᑦ.”

ᐃᓄᒃᑎᑐᑦ ᐱᙳᐊᖅᐸᓪᓕᐊᔪᓂ ᐅᓂᒃᑳᖅᑎᓂ ᐃᓚᒋᔭᐅᓂᐊᕐᑐᑦ ᐅᑯᐊᒃ ᑕᐃᕕᑦ ᓂᖏᐅᖓᓐ ᐊᒻᒪ ᐳᔾᔫᑦ ᑯᓱᒐᖅ, ᑖᒃᑯᐊᒡᓗ ᐃᓄᒃᑎᑐᑦ ᐅᖃᓪᓚᒃᑎᒋᔭᐅᓚᐅᕐᓯᒪᔫᒃ 2022 ᐱᐃᔨᖕ ᐅᑭᐅᒃᑯᑦ ᐅᓕᒻᐱᒃ ᐱᙳᐊᕕᒡᔪᐊᖅᑐᓂᒃ ᐊᕐᓇᐃᑦ ᐊᒻᒪ ᐊᖑᑎᑦ ᕼᐋᑭᖅᑎᓪᓗᒋᑦ.

ᑲᑉᕕᑐᒃ ᐃᓅᓯᓕᒫᖓᓂ ᕼᐋᑭᖅᑐᓂᒃ ᖁᙱᐊᖏᓐᓇᐅᔭᕐᒪᑦ ᐊᒻᒪ ᐅᖃᖅᖢᓂ ᐱᙳᐊᖃᑎᖃᖃᑦᑕᕐᓯᒪᓂᖓᓂᒃ ᐅᖃᓪᓚᒃᑎᐅᖃᑎᖏᓐᓂ ᓂᖏᐅᖓᓐ ᐊᒻᒪ ᑯᓱᒐᖅᒥ.

ᐅᓇ ᓯᕗᓪᓕᖅᐹᖑᓂᐊᕐᑐᖅ ᓴᖅᑭᔮᖅᑎᑕᐅᓂᐊᕐᑐᖅ ᑕᖅᑭᑦ ᐅᓄᙱᑦᓂ ᐊᒡᒋᖅᑎᓪᓗᒋᑦ, ᑲᑉᕕᑐᒃ ᐅᖃᓚᐅᕐᑐᖅ ᖁᕕᐊᓇᕈᓘᔭᓕᕆᕐᓂᖓᓂ ᐅᑕᖅᑭᑎᓪᓗᒋᑦ ᐃᓄᒃᑎᑐᑦ ᕼᐋᑭᖅᑐᓂᒃ ᑕᐅᑐᖕᓂᐊᕐᓂᖏᓐᓂᒃ.

“ᐃᑲᔪᕈᒪᒐᒃᑭᑦ ᐃᓅᖃᑎᕗᑦ ᐅᑭᐅᕐᑕᖅᑐᕐᒦᑦᑐᑦ ᐱᙳᐊᕈᓯᕐᒥ ᑐᑭᓯᐅᒪᑎᓪᓗᒋᑦ,” ᐅᖃᕐᑐᖅ.

“ᐃᓱᒪᔪᖓ ᐃᓐᓇᕐᓂ ᐃᑲᔪᕐᓂᐊᕋᓱᒋᓪᓗᒍ, ᓲᓪᓗ ᐊᑖᑕᑦᑐᑦ ᖁᕕᐊᒋᖕᒪᒍ ᖁᙱᐊᖅᖢᓂ ᕼᐋᑭᕐᑐᓂᒃ, ᑭᓯᐊᓂᓕ ᖃᓪᓗᓈᑎᑑᖓᔪᓂ ᑭᓯᐊᓂ. ᑕᐃᒪᓕ ᐃᓄᒃᑎᑐᑦ ᐃᓚᐅᓕᕐᐸᑦ ᖁᕕᐊᒋᑦᑎᐊᕐᓂᐊᖅᑕᖓ.”

ᑲᑉᕕᑐᒃ ᐅᖃᓚᐅᕐᑐᖅ ᐅᖃᐅᓯᕐᒥᓂ ᐊᓯᐅᔨᕙᓪᓕᐊᓚᐅᕐᓂᖓᓂ ᐃᓕᓐᓂᐊᕐᑎᓪᓗᒍ. ᓰᐲᓰᑯᓐᓄᑦ ᐅᖃᓪᓚᒃᑎᐅᓕᖅᑎᓪᓗᒍ ᐅᖃᕈᓐᓇᒃᑲᓐᓂᓕᓚᐅᕐᑐᖅ.

ᐃᖅᑲᐅᒪᔪᖅ ᐃᓐᓇᕐᓄᑦ ᐅᖄᓚᕝᕕᐊᖃᑦᑕᕐᓂᖓᓂ ᖃᓄᖅ ᐅᖃᑦᑎᐊᒃᑲᓐᓂᕈᓐᓇᕐᓂᖓᓂ ᐅᖃᐅᓯᕐᓂ ᐊᒻᒪᓗ ᐃᓱᒪᔪᖅ ᐃᓄᒃᑎᑐᑦ ᑐᓴᖅᓴᐅᕙᒃᑐᑦ ᐊᓯᖏᓐᓂ ᐃᓄᒃᑎᑐᑦ ᐊᔪᕈᓐᓃᖅᐹᓪᓕᕈᑎᐅᔪᒪᓂᐊᕐᓗᑎᒃ.

“ᐅᓇᖃᐃ ᐃᑲᔪᕈᓐᓇᕐᓂᐊᕐᑐᖅ ᐃᓅᓱᒃᑐᑦᑎᓐᓂ ᐅᖃᐅᓯᑦᑎᓐᓂ ᐊᔪᕈᓐᓃᕈᒪᓂᕐᒥ,” ᑲᑉᕕᑐᒃ ᐅᖃᕐᑐᖅ.

“ᐅᖃᕐᑐᖃᕐᓂᐊᖅᐳᖃᐃ, ‘ᐅᑯᐊ ᐊᔪᙱᑉᐸᑕ, ᑕᐃᒪᓕ ᐊᔪᕈᓐᓃᕐᓴᓪᓗᐊᖅᑐᖓ ᐃᓄᒃᑎᑐᑦ ᐅᖃᕈᓐᓇᖅᓯᓂᕐᒥᒃ.”

ᑯᕇᑎᑐᑦ ᕼᐋᑭ ᐅᓐᓄᒃᑯᑦ ᑲᓇᑕᒥ ᐊᒻᒪ ᐃᓄᒃᑎᑐᑦ ᕼᐋᑭ ᐅᓐᓄᒃᑯᑦ ᑲᓇᑕᒥ ᓴᖅᑭᔮᓂᐊᖅᑐᑦ 7-ᓂ ᑲᓇᑕᒥ ᕼᐋᑭᖅᑐᓂ ᑲᑐᔾᔨᖃᑎᒌᓄᑦ ᐃᓚᒌᓂ 6-ᓂ ᐱᙳᐊᕐᓂᐅᔪᓂᒃ ᑐᓴᕐᓴᐅᓂᐊᖅᑐᓂᒃ, ᓯᕗᓪᓖᑦ ᐱᖓᓱᑦ ᑯᕇᑐᑦ ᐅᓂᒃᑳᖅᑕᐅᕙᓪᓕᐊᓂᐊᖅᖢᑎᒃ ᐊᒻᒪ ᑭᖑᓪᓖᑦ ᐱᖓᓱᑦ ᐃᓄᒃᑎᑐᑦ.

ᐋᖅᑭᒃᑕᐅᓯᒪᔪᑦ ᐅᕙᓂ ᐃᓄᒃᑎᑐᑦ ᕼᐋᑭ ᐅᓐᓄᒃᑯᑦ ᑲᓇᑕᒥ ᐱᖅᑯᐊᕐᓂᐊᖅᑐᑦ ᐅᑯᐊᖑᔪᑦ:

ᒫᔅᓯ 8: ᐊᑦᒪᓐᑕᓐ ᐅᐊᐃᓗᔅ ᐅᑯᐊᓗ ᑖᓚᔅ ᓯᑖᔅ, 10 ᐅᓐᓄᒃᑯᑦ ᑲᓇᖕᓇᕐᒥᐅᑦ ᖃᐅᔨᓴᐅᑎᖓᒍᑦ;

ᒫᔅᓯ 22: ᐋᑐᕚ ᓴᓂᑐᔅ ᐅᑯᐊᓗ ᓂᐅ ᔫᓯ ᑕᕗᔅ, 7 ᐅᓐᓄᒃᑯᑦ ᑲᓇᖕᓇᕐᒥᐅᑦ ᖃᐅᔨᓴᐅᑎᖓᒍᑦ;

ᐊᐃᕆᓕ 12: ᒪᓐᑐᕆᐊᓪ ᑲᓃᑎᐊᓐᔅ ᐅᑯᐊᓗ ᑐᕌᓐᑐ ᒪᐃᐳᓪ ᓖᕝᔅ, 7 ᐅᓐᓄᒃᑯᑦ ᑲᓇᖕᓇᕐᒥᐅᑦ ᖃᐅᔨᓴᐅᑎᖓᒍᑦ.

ᓄᓇᕗᒻᒥᐅᑦ ᐄᐲᑏᐊᓐᑯᑦ ᑕᐅᑐᒍᓐᓇᕐᑐᑦ ᐊᒻᒪ ᐄᐲᑏᐊᓐ ᐅᖃᐅᓯᕆᔭᐅᔪᓂ ᓴᖅᑭᔮᒐᖅᑎᒍᑦ ᑕᐅᑐᒍᒪᒍᑎ.

 

Share This Story

(0) Comments

Join the Conversation

Your email address will not be published. Required fields are marked *

*