ᑲᖏᕐᓱᒃᒥᐅᑕᑦ ᕿᒃᓵᕈᑎᖃᕐᑐᑦ ᐊᐃᑉᐸᕇᖕᓂ ᐃᒫᒃᑰᕐᑐᕕᓃᖕᓂ
ᐃᓚᒋᔭᐅᔪᑦ ᐃᖅᑲᐅᒪᔪᑦ ᑳᓕ ᑲᐅᑲᐃᒥ ᐊᒻᒪ ᐊᒪ ᒥᐅᓂᒃᒥ ᐱᓕᕆᐊᖃᖃᑦᑕᕐᓂᖏᓐᓂ ᖃᓄᐃᙱᓐᓂᒃᑯᑦ ᐃᖅᑲᓇᐃᔮᒥ ᐊᒻᒪᓗ ᐃᖃᓗᒐᓱᒍᒻᒪᐅᓂᖏᓐᓂᒃ
ᑳᓕᓐ ᑲᐅᑲᐃ, ᓯᕗᓂᐊᓂ ᓴᐅᒥᐊᓃᑦᑐᖅ ᐊᒻᒪ ᐊᒪ ᒥᐅᓂᒃ, ᑐᓄᐊᓂ, ᐊᔾᔨᓕᐅᖅᑕᐅᓯᒪᔪᑦ ᐱᖓᓱᑦ ᓱᕈᓯᖏᑦ. ᑲᖏᕐᓱᒥᐅᑕᑦ ᕿᒃᓵᕈᑎᖃᕐᑐᑦ ᐃᓅᔪᓐᓃᓚᐅᕐᓂᖏᓐᓂ ᐊᐃᑉᐸᕇᒃ ᐃᒫᖅᖢᑎᒃ ᐃᖃᓗᒐᓱᑲᑕᒃᑐᓄᙵᐅᓪᓗᑎ ᑕᖅᑭᐅᓚᐅᕐᑐᒥᓐ. (ᐊᔾᔨᙳᐊᖅ ᐅᕙᙵᑦ ᐹᓴ ᑲᐅᑲᐃ)
For the English version of this story, please see ‘They were a gift to the community’: Kangirsuk mourns couple after river tragedy.
ᐹᓴ ᑲᐅᑲᐃ ᐃᖅᑲᐅᒪᔪᖅ ᐊᓂᒥᓂ ᑳᓕᓐ ᑲᐅᑲᐃᒥ ᐃᒡᓚᕐᓇᖃᑦᑕᓚᐅᕐᓂᖓᓂ ᐊᒻᒪ ᐱᓕᕆᕈᓘᔭᖅᐸᒃᖢᓂ.
“ᐅᔾᔨᕐᓇᓚᐅᕐᑐᖅ ᐃᒡᓗᕈᓯᕐᒧᐊᕌᖓᑦ,” ᐅᖃᐅᓯᖃᖅᖢᓂ ᐊᓂᒥᓂ, ᐃᓅᔪᓐᓃᕐᓂᑯ ᑰᖕᒥ ᖃᓄᐃᓕᓂᕐᒧᑦ ᑕᖅᑭᐅᓚᐅᕐᑐᒥᓐ ᑲᖏᕐᓱᒥᒃ.
ᑳᓕᓐ ᑲᐅᑲᐃ ᐊᒻᒪ ᐊᐃᑉᐸᖓ ᐊᒪ ᒥᐅᓂᒃ ᐃᑲᕋᓱᓚᐅᕐᓯᒪᖕᒪᑎᒃ ᒪᕿᒋᐊᖅ ᑰᖕᒥ ᔫᓂ 6 ᐅᓪᓛᖓᓂ ᐃᖃᓗᒐᓱᒃᑐᓂ ᐃᓚᐅᓂᐊᕐᒪᑎᒃ ᑖᓐᓇ ᓯᑯ ᓱᕋᒃᑎᓪᓗᒍ ᖄᖓᓃᕝᕕᒋᔭᖓ.
ᐅᓪᓗᒐᓴᖕᓂ ᕿᓂᐊᓪᓚᓚᐅᖅᑎᓪᓗᒋᑦ ᑖᒃᑯᐊ ᕿᓂᕐᑐᑦ ᓇᓂᓯᓕᓚᐅᕐᓯᒪᔪᑦ ᒥᐅᓂᒃ ᐊᒻᒪ ᑲᐅᑲᐃ ᑎᒥᖏᓐᓂ ᔫᓂ 16-ᖑᓕᕐᑎᓪᓗᒍ.
ᐹᓴ ᑲᐅᑲᐃ ᐃᖃᓗᒐᓱᒃᑐᓂ ᐅᐸᒍᑎᔪᒪᒋᓪᓗᓂ ᑕᕝᕙᓂᑦᑕᐃᓐᓇᖅ ᐅᓪᓗᕐᒥ, ᐅᖃᕐᑐᖅ, ᐅᖃᒃᑲᓐᓂᖅᖢᓂ ᑰᖕᒧᐊᑕᐃᓐᓇᓚᐅᕐᓂᖓᓂ ᐃᑲᕐᕌᒃ ᒪᕐᕉᒃ ᐊᓂᒍᖅᑎᓪᓗᒋ ᖃᓄᐃᓕᓂᖃᓚᐅᖅᑎᓪᓗᒋᑦ.
“ᓯᑭᑑᒥ ᑕᒫᓂ ᓄᖅᑲᖓᔪᖃᓚᐅᕐᑐᖅ ᐊᒻᒪ ᑐᒥᒃᑕᖃᖅᖢᓂ ᑰᖕᒧᙵᐅᔪᓂ, ᐅᔾᔨᕆᓯᑳᓪᓚᒃᖢᖓ ᐊᒪᖃᒋᓂᖓᓂ ᐊᒻᒪ ᑳᓕᓐ ᐱᑕᖃᙱᖢᑎᒃ,” ᐅᖃᕐᑐᖅ.
ᑳᓕ ᑲᐅᑲᐃ ᐃᖃᓗᒐᓱᖃᑦᑕᐃᓐᓇᖅᑐᖅ ᐃᓅᓯᖓᓂ, ᓇᔭᖓ ᐅᖃᕐᑐᖅ, ᐊᒻᒪᓗ ᐃᖅᑲᐅᒪᑦᑎᐊᖅᖢᓂ ᐃᖃᓗᒐᓱᖃᑎᒋᕙᒃᖢᓂᐅᒃ — ᐊᒻᒪᓗ ᓂᕿᓕᐊᕆᖃᑦᑕᕐᓂᑯᖏᓐᓂ ᐃᖃᓗᒃᑕᖏᓐᓄᑦ.
“ᑭᖑᓂᖃᕆᓂᐊᖅᑕᒃᑲ ᐃᖃᓗᐃᑦ ᐸᓂᕐᓯᐊᕆᖃᑦᑕᖅᑕᖏᑦ,” ᐹᓴ ᑲᐅᑲᐃ ᐅᖃᕐᑐᖅ.
ᑖᒃᑯᐊᒃ ᐊᐃᑉᐸᕇᒃ ᐱᓕᕆᐊᖃᓚᐅᕐᑐᑦ ᖃᓄᐃᙱᓐᓂᒃᑯᑦ ᐱᓕᕆᐊᖃᕐᓂᕐᒥᒃ ᐊᒻᒪ ᓄᓇᖃᖅᑐᓂ ᐃᑲᔪᖃᑦᑕᖅᖢᑎᒃ ᐋᖓᔮᕈᓐᓃᕋᓱᖃᑦᑕᖅᑐᓂᒃ.
“ᐊᒪ ᐃᑲᔪᒻᒪᕆᓚᐅᕐᓯᒪᔪᖅ ᐊᓂᓐᓂ ᐋᖓᔮᖃᑦᑕᕈᓐᓃᕐᓂᖓᒍᑦ,” ᐹᓴ ᑲᐅᑲᐃ ᐅᖃᕐᑐᖅ, ᐅᖃᒃᑲᓐᓂᖅᖢᓂ ᐋᖓᔮᖅᑕᐃᓕᓯᒪᐃᓐᓇᓚᐅᕐᓂᖓᓂ ᑎᑭᖢᖑ ᐃᓅᔪᓐᓃᕐᕕᖓ.
ᒥᐅᓂᒃ ᓄᓇᖓᓂ ᐱᐅᓯᕚᓪᓕᖅᑎᑦᑎᓇᓱᓚᐅᕐᒪᓐ, ᐹᓴ ᑲᐅᑲᐃ ᐅᖃᕐᑐᖅ. ᐋᖅᑭᒃᓱᐃᕙᒃᖢᓂ ᓄᓇᐃᓐᓇᕐᒥ ᖃᓄᐃᓕᐅᕈᑎᒃᓴᓂ ᒪᑯᑎᑐᓇᖅ ᐃᖃᓗᒐᓱᒋᐊᖃᑦᑕᕐᓂᕐᒥ, ᐸᐅᕐᖓᖅᑕᕆᐊᖅᑎᑦᑎᕙᒃᖢᓂ ᐊᒻᒪᓗ ᐅᕕᓗᕐᓂ ᐊᕝᕗᖅᑎᑦᑎᕙᒃᖢᓂ ᐃᑲᔪᕋᓱᒃᖢᓂ ᐃᓄᖕᓂ ᒪᒥᓴᖅᐸᓪᓕᐊᔪᓂᒃ ᐊᒻᒪ ᐃᓕᖅᑯᓯᖏᓐᓂ ᐊᑐᕐᓂᕐᓴᐅᑎᓐᓇᓱᒃᖢᒋᑦ.
“ᓄᓇᓕᖕᓂ ᐱᒻᒪᕆᒋᔭᐅᓚᐅᖅᑑᒃ,” ᐹᓴ ᑲᐅᑲᐃ ᐅᖃᕐᑐᖅ. “ᖁᕕᐊᒋᙱᑐᐃᓐᓇᙱᓪᓗᒍ ᐃᓅᔪᓐᓃᕐᓂᖏᑦ ᑭᓯᐊᓂᓕ ᐃᓱᒪᒋᓗᒋᑦ ᖃᐅᔨᒪᓚᐅᕐᓂᑦᑎᓐᓂ ᑖᒃᑯᓂᖓ.”
ᐱᖓᓱᓂ ᕿᑐᕐᖓᖅᑑᒃ: 11-ᓂ ᐊᕐᕌᒍᓕ ᐸᓂᖓᓂᒃ ᐊᒻᒪ ᒪᕐᕉᖕᓂ ᐃᕐᓂᖃᖅᖢᑎᒃ 7 ᐊᒻᒪ 5. ᑖᒃᑯᐊᓕ ᑲᒪᒋᔭᐅᓕᕐᑐᑦ ᐊᑦᑕᖏᓐᓄᑦ ᐊᒻᒪ ᐃᑦᑐᒃᑯᖏᓐᓄᑦ.
ᓄᓇᓕᖕᓃᑦᑐᑦ ᐃᓚᒌᓂ ᑲᒪᒋᔭᖃᐃᓐᓇᖅᑐᑦ ᖃᓄᐃᓕᓚᐅᖅᑎᓪᓗᒋᑦ. ᐃᓚᖏᑦ ᓂᕿᓕᐅᕈᔾᔨᖃᑦᑕᓚᐅᕐᑐᑦ ᕿᓂᕐᑐᓂᒃ, ᐊᓯᖏᓪᓗ ᐱᖁᑎᖏᓐᓂ ᐊᑐᖅᑎᑦᑎᓪᓗᑎᒃ ᐊᒻᒪ ᐃᑲᔪᑲᑕᖅᖢᑎᒃ ᕿᓂᑲᑕᒃᑎᓪᓗᒋᑦ.
ᔫᓕᐊ ᓴᐃᓐ-ᐋᐱᓐ, ᑲᖏᖅᓱᐊᓗᒃᒥᐅᑕᖅ ᐅᖃᓚᐅᕐᑐᖅ ᐃᓚᒌᑦ ᑕᑯᓚᐅᕐᓯᒪᙱᓐᓂᕋᖅᖢᓂᒋᑦ ᖃᓄᐃᓕᓚᐅᖅᑎᓐᓇᒋ ᑭᓯᐊᓂᓕ ᐃᑲᔪᕈᒪᓕᓚᐅᕐᒪᑦ ᐊᒻᒪᓗ ᐱᒋᐊᖅᑎᑦᑎᓪᓗᓂ ᐃᑲᔪᖅᑕᐅᔾᔪᑎᒥ GoFundMe ᖃᕋᓴᐅᔭᒃᑯᑦ ᑖᒃᑯᐊ ᓱᕈᓯᕆᔭᐅᔪᑦ ᐃᑲᔪᖅᑕᐅᔾᔪᑎᒃᓴᖏᓐᓂᒃ, ᑖᓐᓇᓕ ᑲᑎᑦᑎᓯᒪᓕᓚᐅᕐᑐᖅ $17,154 ᓇᒐᔭᐅᒥ ᐅᓪᓛᒃᑯᑦ.
(0) Comments