ᐃᓅᓱᒃᑐᓂ ᑭᒡᒐᖅᑐᐃᔨ ᓴᖅᑭᑎᑦᑎᒋᐊᒃᑲᓐᓂᖅᐳᖅ ‘ᑲᒪᓇᓗᐊᖅᑐᐊᓗᐃᑦ’ ᖁᓄᔪᕐᓂᐊᕐᓂᕐᒧᑦ ᐅᖃᐅᓯᐅᓯᒪᔪᑦ

For English version, see ‘This is staggering’: Children and youth representative sounds alarm over child sexual abuse

ᐊᕐᕌᒍᑦ ᐱᖓᓱᑦ ᐊᓂᒍᖅᑎᓪᓗᒋᑦ ᓱᕈᓰᑦ ᖁᓄᔪᕐᓂᐊᖅᑕᐅᖃᑦᑕᕐᓂᖏᑦ ᐱᓗᐊᖅᑐᐊᓘᓕᕐᓂᖓᓂ, ᓄᓇᕗᒥᑦ ᑭᒡᒐᖅᑐᐃᔨ ᓱᕈᓯᕐᓄᑦ ᐊᒻᒪ ᐃᓅᓱᒃᑐᓄ ᐅᖃᓚᐅᕐᑐᑦ ᖃᓄᐃᓕᐅᕈᑎᐅᓚᐅᕐᓯᒪᙱᓐᓂᖓᓂ ᑖᓐᓇ ᐋᖅᑭᒃᑕᐅᓇᓱᒡᓗᓂ.

ᔭᐃᓐ ᐲᑦᔅ ᑕᒪᑐᒥᖓ ᑕᐃᒪᓐᓇᐃᓂᕋᐃᓚᐅᕐᑐᖅ ᐊᐃᕆᓕ 23-ᒥ, ᐅᖃᓪᓚᒃᑎᓪᓗᒍ ᐅᓪᓘᖕᓂ ᒪᕐᕉᖕᓂ ᐊᔾᔨᓕᐅᖅᑕᐅᕙᓪᓕᐊᑎᓪᓗᒋ ᑲᑎᒪᔨᒃᑯᑦ ᑲᑎᒪᔨᕋᓛᖏᓐᓂ ᐱᓕᕆᐊᖑᙱᓗᐊᖅᓯᒪᔪᓄᑦ, ᕿᒥᕐᕈᐊᖅᖢᓂ ᑎᑎᕋᕐᕕᖓᑕ ᐊᕐᕌᒍ 2022-23-ᒧ ᐅᓂᒃᑳᖏᓐᓂ.

ᐲᑦᔅ ᐅᖃᐅᓯᖃᓚᐅᕐᒥᔪᖅ ᐃᓄᓕᕆᔨᒃᑯᑦ ᑐᑭᒧᐊᖅᑎᑦᑎᔨᖓᑕ ᐊᕐᕌᒍᒧᑦ ᐅᓂᒃᑳᓕᐊᖏ ᐃᓚᒌᑦ ᖃᓄᐃᑦᑕᐃᓕᒪᔭᕆᐊᖃᕐᓂᖏᓐᓂ ᐊᕐᕌᒍ 2021-22ᒧ ᐅᖃᐅᓯᖃᓚᐅᕐᓂᖓᓂ 518-ᓂ ᓱᕈᓯᕐᓂ ᖁᓄᔪᕐᓂᐊᕐᓂᕐᒧᑦ ᐅᓗᕆᐊᓇᖅᑐᒦᑦᑐᓂ ᑕᕝᕙᓂ ᐊᕐᕌᒍᒥ, ᐅᕝᕙᓘᓐᓃᑦ 10-ᖑᕙᒃᖢᑎᒃ ᐱᓇᓱᐊᕈᓯᑕᒫᑦ. ᒫᔅᓯ 2020-ᒥ, ᑕᐃᔅᓱᒪᒥ ᐃᓄᓕᕆᔨᒃᑯᓐᓄᑦ ᒥᓂᔅᑕᐅᓂᑯ ᐅᖃᓚᐅᕐᓯᒪᔪᑦ ᐱᓕᕆᕝᕕᖓ ᐅᖄᓚᕝᕕᐅᖃᑦᑕᓚᐅᕐᓂᖓᓂ ᒪᕐᕈᐃᖅᑕᐅᓪᓗᓂ ᐱᓇᓱᐊᕈᓯᑕᒫᓐ ᓱᕈᓯᕐᓂ ᖁᓄᔪᕐᓂᐊᖅᑕᐅᔪᕕᓃᑦ ᒥᒃᓵᓄᑦ.

ᐅᓇ ᑐᑭᖃᖅᑐᖅ ᑕᐃᒪᙵᑦ 2020-ᖑᓚᐅᕐᓯᒪᔪᒥᑦ, “ᖃᔅᓯᐅᓂᖏᑦ ᐅᓄᕐᓯᕚᓪᓕᓚᐅᕐᑐᑦ 400 ᐳᓴᓐᑎᒥ,” ᐲᑦᔅ ᐅᖃᓚᐅᕐᑐᖅ, ᐅᖃᒃᑲᓐᓂᖅᖢᓂ ᐅᓄᕐᓂᕐᓴᐅᓇᓱᒋᓪᓗᓂᐅᒃ ᐅᖃᐅᓯᐅᓯᒪᔪᓂ ᐅᕝᕙᓘᓐᓃᑦ ᑐᓴᖅᑎᑕᐅᓯᒪᙱᓗᐊᕐᓂᕐᒧᑦ ᐃᓚᖏᑦ ᐊᕕᒃᑐᖅᓯᒪᓂᒃᑰᖓᔪᑦ.

“ᐅᓇ ᑲᒪᓇᓗᐊᖅᑐᐊᓗᒃ. ᐅᕗᙵᓚᐅᕐᓯᒪᔪᖓ 2021-ᒥ ᐊᒻᒪ ᐅᖃᓪᓚᓚᐅᕐᓯᒪᓪᓗᖓ ᓱᕈᓰᑦ ᖁᓄᔪᕐᓂᐊᖅᑕᐅᕙᓗᐊᕐᓂᖏᓐᓂ ᐊᒻᒪᓗ ᖃᐅᔨᒪᔭᒃᑯᑦ ᐸᕐᓇᐅᓯᐅᖅᓯᒪᔪᓂ ᓱᓕ ᑕᑯᒃᓴᐅᔪᖃᓚᐅᙱᑦᑐ ᑕᒪᑐᒧᖓ ᓈᒻᒪᙱᓕᐅᕈᑎᒧᑦ.”

ᐅᑲᒃᑲᓐᓂᖅᖢᓂ, “ᐅᖃᕐᕕᐅᓚᐅᙱᑦᑐᖓᓱᓕ ᐸᕐᓇᐅᑎᐅᓇᔭᖅᑐᓂ ᑕᒪᑐᒧᖓ. ᐅᓇ ᐃᓱᒫᓗᖕᓇᓗᐊᖅᑐᖅ.”

ᑭᖑᓂᐊᒍᓪᓕ, ᑕᒪᓐᓇ ᐅᖃᐅᓯᐅᓯᒪᔫᒐᓗᐊᖅ ᒪᓕᒐᓕᕆᕕᒡᔪᐊᕐᒥ ᐅᕝᕙᓘᓐᓃᑦ ᑲᑎᒪᔨᕋᓛᓄᑦ “ᑭᓯᐊᓂᓕ ᖃᓄᐃᓕᔾᔪᑎᐅᓚᐅᙱᑦᑐᖅ,” ᐲᑦᔅ ᐅᖃᕐᑐᖅ, ᑭᓯᐊᓂᓕ ᑎᑎᕋᕐᕕᖓᓂ ᑐᓴᖅᑕᐅᕙᓪᓕᐊᔪᓂ ᐅᓇ “ᑲᓄᐃᓕᐅᕐᓂᖅ ᐱᓗᐊᓕᕐᓂᖓᓄᑦ ᐊᐅᓚᑕᐅᔪᓐᓇᐃᓪᓕᔪᖅ.”

ᑕᐅᑐᒃᖢᒍ ᐲᑦᔅ’ ᐃᓱᒪᒋᔭᖓᒍ ᐅᑯᐊ ᓇᓗᓇᐃᖅᑕᐅᓯᒪᔪᑦ ᓈᒻᒪᓈᕐᓯᒪᓇᓱᒋᙱᖢᓂᒋ5, ᐃᖃᓗᐃᑦ-ᒪᓂᕋᔭᒃᒧᑦ ᒪᓕᒐᓕᐅᖅᑎ ᐋᑕᒻ ᐋᕆᐊᒃ ᓚᐃᑦᓯᑑᓐ ᐅᖃᓚᐅᕐᑐᖅ ᓱᕈᓯᕐᓂ ᖁᓄᔪᕐᓂᐊᖅᓯᖃᑦᑕᕐᓂᖅ ᓄᓇᕗᒥᑦ “ᐅᐊᑲᓪᓚᓗᐊᕌᓘᓂᖓᓂᒃ.”

ᑲᓄᐃᓕᐅᕈᑎᐅᔭᑦᑐᑦ ᑎᑎᕋᐅᓯᖃᖃᑦᑕᖅᑐᑦ ᐃᓄᓕᕆᔨᒃᑯᓐᓂ ᐅᖃᐅᓯᐅᖃᑦᑕᕐᓯᒪᔪᑦ.

ᓚᐃᑦᓯᑑᓐ ᐊᐱᕆᓚᐅᕐᑐᖅ ᔮᓇᑕᓐ ᐃᐊᔅᕘᒧ, ᐃᓄᓕᕆᔨᒃᑯᓐᓄᑦ ᒥᓂᔅᑕᒧᑦ ᑐᒡᓕᕆᔭᐅᔪᖅ, ᑖᒃᑯᓂᖓ ᐅᖃᐅᓯᐅᓯᒪᔪᓂ ᓇᓗᓇᐃᕐᓯᒃᑲᓐᓂᕈᓐᓇᕆᐊᒃᓴᖓᓂ.

“ᓇᓗᓇᐃᕈᓐᓇᙱᑕᒃᑲ ᑕᒻᒪᕐᓯᒪᙱᑦᑐᒃᑯᑦ ᖃᔅᓯᐅᓂᖏᓐᓂ,” ᐃᐊᔅᕗᑦ ᑭᐅᓚᐅᕐᑐᖅ.

ᐃᐊᔅᕗᑦ ᐅᖃᓚᐅᕐᑐᖅ ᐅᓄᙱᓐᓂᕐᓴᐅᓇᓱᒋᓪᓗᓂᒋᑦ, ᐊᒻᒪᓗ “ᐊᒻᒪᓗ ᑖᓐᓇ ᓇᓗᓇᐃᕐᓯᓯᒪᒻᒪᕆᒐᓱᒋᙱᖢᒍ ᑕᒪᑐᒧᖓ ᓱᕈᓯᕐᓂ ᖁᓄᔪᕐᓂᐊᕐᓂᕋᐃᓯᒪᔪᓂᒃ.”

ᐃᖃᓗᐃᑦ-ᓯᓈᒧᑦ ᒪᓕᒐᓕᐅᖅᑎ ᔮᓇᑦ ᐱᑦᓯᐅᓛᖅ ᐳᕉᔅᑐ ᐅᖃᓚᐅᕐᑐᖅ “ᐃᓱᒪᔪᖓ ᐱᒻᒪᕆᐊᓘᓂᖓᓂ ᑕᒪᑐᒥᖓ ᕿᒥᕐᕈᐊᕆᐊᖃᕐᓂᑦᑎᓐᓂ ᖃᐅᔨᕚᓪᓕᖅᓯᒪᓂᒃᑯᑦ ᐆᒥᖓ ᓱᕈᓯᕐᓂ ᖁᓄᔪᕐᓂᐊᖃᑦᑕᕐᓂᕐᒥ.”

“ᐃᓄᓕᕆᓂᒃᑯᑦ ᓈᒻᒪᙱᓕᐅᕈᑎᐅᓗᐊᖅᑐᑦ ᐊᕐᕌᒍᒐᓴᖕᓂ ᐱᓕᕆᐊᖑᓯᒪᓕᕐᒪᑦ ᐊᒻᒪᓗ ᑕᒪᓐᓇ ᐋᖅᑭᑲᐅᖅᑐᕈᓐᓇᔾᔮᙱᖢᓂ,” ᐲᑦᔅ ᐅᖃᕐᑐᖅ.

“ᒪᑐᐃᖓᑐᐃᓐᓇᖅᑐᖓ ᑎᑎᕋᕐᕕᖕᓂ ᐊᔪᕈᓐᓃᖅᓯᒪᓂᒃᑯᑦ ᐃᖏᖃᑎᖃᕈᓐᓇᖅᖢᖓ ᐊᒻᒪ ᐋᖅᑭᒃᓱᐃᖃᑕᐅᔪᓐᓇᖅᖢᖓ ᓱᕈᓯᕐᓂ ᖁᓄᔪᕐᓂᐊᓂᓕᕆᓂᕐᒥᑦ.

“ᐃᓱᒪᒋᓗᒍ ᐸᕐᓇᐅᑎ ᑲᔪᓯᑎᑕᐅᔭᕆᐊᖃᕐᓂᐊᕐᓂᖓᓂ. ᑕᐃᒪᓕ ᑕᐃᒪᐃᑎᑦᑎᑦᑕᐃᓕᓂᖅᑕᕆᐊᓕᒃ, ᓄᖅᑲᖅᑎᑦᑎᔾᔪᑎᓕᕆᓂᖅ ᐊᒻᒪ ᑲᒪᒋᔭᖃᕐᓂᖅ ᐱᓕᕆᐊᖑᓂᑯᕕᖕᓂ.