ᐅᑭᐅᕐᒧᑦ ᑲᑎᒪᑲᑕᖕᓂᖅ ᐃᓱᓕᑉᐳᖅ ᑐᐹᑯᒧᑦ (ᓯᒡᒐᓖᓄᑦ) ᐊᑭᓕᐅᑎᒃᓴᒃᑲᓐᓂᕐᓂ ᐋᖅᑭᒃᓯᓪᓗᑎᒃ, ᐊᓂᒍᖅᑎᑕᐅᔪᖅ ᐊᑐᖅᑕᐅᔪᒃᓴᑦ

For English version, see Tobacco tax, budget passed as legislature winter sitting closes 

ᓄᓇᕗᒻᒥᐅᑕᑦ ᓂᕆᐅᒋᐊᖃᓕᕐᑐᑦ ᑐᐹᑯᒧᑦ ᐊᑭᓖᒃᑲᓐᓂᕆᐊᖃᕐᓂᐊᕐᓂᖏᓐᓂᒃ.

ᐋᖅᑭᒋᐊᖅᑕᐅᓯᒪᔪᖅ ᑐᐹᑯᒧᑦ ᐊᑭᓕᐅᑎᒃᓴᒃᑲᓐᓂᕐᒧᑦ ᒪᓕᒐᖅ ᐃᓚᒋᔭᐅᓚᐅᕐᑐᖅ ᖁᓕᓂ ᒪᓕᒐᕐᓂᒃ ᐊᖏᖅᑕᐅᔪᓂᒃ ᓄᓇᕗᒥᑦ ᒪᓕᒐᓕᕆᕝᕕᒃᒥᑦ ᒫᔅᓯ 11-ᒥ ᐅᑯᐊ ᒪᓕᒐᓕᐅᖅᑎᑦ ᐃᓱᓕᑦᑎᓕᖅᑎᓪᓗᒋᑦ ᐱᓇᓱᐊᕈᓯᕐᓂ ᐱᖓᓱᓂᒃ ᐅᑭᐅᕐᒧᑦ ᑲᑎᒪᓂᕐᒥᒃ.

ᓯᒡᒐᓖᑦ ᑖᒃᓰᔭᕈᑎᐅᖃᑦᑕᕐᓂᐊᓕᕐᑐᑦ 40 ᓴᓐᔅ ᐊᑕᐅᓯᕐᒧᑦ ᓯᒡᒐᓕᐊᒧᑦ, ᖁᕝᕙᕆᐊᖅᖢᓂ 30 ᓴᓐᔅᒥ — ᑖᒃᑯᐊᓕ ᓱᐴᕐᑐᖅᑕᐅᕙᒃᖢᑎᒃ — ᑖᒃᓰᔭᕈᑎᐅᓕᕐᓂᐊᖅᑐᑦ 53.3 ᓴᓐᔅ ᒍᕌᒻᒧᑦ, ᖁᕝᕙᕆᐊᖅᖢᓂ ᐅᕙᙵᑦ 40 ᓴᓐᔅᒥ, ᐊᒻᒪᓗ ᑐᐹᑯᒋᔭᐅᕙᒃᑐᑦ ᓯᒡᒐᓕᐊᒃᑰᙱᑦᑐᖅ (ᓲᕐᓗ ᒪᑯᐊ ᑕᕝᕚᑮ ᑕᒧᐊᔭᕆᐊᓖᑦ) ᑖᒃᓰᔭᕈᑎᐅᓕᕐᓂᐊᖅᑐᑦᒃ 45 ᓴᓐᔅ ᒍᕌᒻᒧᑦ, ᖁᕝᕙᕆᐊᖅᖢᓂ ᐅᕙᙵᑦ 30 ᓴᓐᔅᒥ.

ᐋᖅᑭᒋᐊᕈᑎ ᐊᖏᖅᑕᐅᓚᐅᙱᑎᓪᓗᒋᑦ ᓄᓇᕗᒥᑦ ᒐᕙᒪᒃᑯᑦ ᐃᓱᒪᒋᔭᖃᓚᐅᕐᑐᑦ ᑐᐹᑯᒧᑦ ᑖᒃᓰᔭᕈᑎ ᑮᓇᐅᔭᓕᐅᕈᑎᐅᓇᔭᕆᐊᒃᓴᖓᓂᒃ ᒫᓂ $24.3 ᒥᓕᐊᓐ ᑖᓚᓂ 2025-26ᒥ. ᐅᑯᐊ ᓄᑖᑦ ᑖᒃᓰᔭᕈᑎᒃᓴᑦ ᑮᓇᐅᔭᓕᐅᕈᑎᐅᓂᐊᕐᑐᑦ ᒫᓂ $7.6 ᒥᓕᐊᓐ ᑖᓚᓂ ᐊᕐᕌᒍᒧᑦ, ᑯᓱᒐᖅ ᐅᖃᕐᑐᖅ.

“ᑕᒪᒃᑯᐊ ᑖᒃᓰᔭᕈᑎᑦ ᐅᓄᕐᓯᒋᐊᖅᑕᐅᓂᖏᑦ ᐋᖅᑭᒍᑎᐅᕌᓂᙱᖢᑎᒃ, ᐊᑑᑎᖃᖅᐳᓪᓕ ᓱᐴᕐᑐᙱᓐᓂᕐᓴᐅᓕᖅᑎᑦᑎᓂᕐᒥᒃ, ᐱᓗᐊᖅᑐᒥ ᐃᓅᓱᒃᑐᓂ,” ᑯᓱᒐᖅ ᐅᖃᓚᐅᕐᑐᖅ ᑲᑎᒪᔨᕋᓛᑦ ᑲᑎᒪᑎᓪᓗᒋᑦ.

ᓄᑖᑦ ᐊᑭᓕᐅᑎᒃᑲᓐᓂᒃᓴᐃᑦ ᐊᑐᓕᕐᓂᐊᖅᑐᑦ ᒫᔅᓯ 12ᒥ, ᐅᖃᕐᓯᒪᓚᐅᕐᑐᑦ ᓄᓇᕗᒥᑦ ᒐᕙᒪᒃᑯᑦ ᑐᓴᒐᒃᓴᓕᐊᖓ ᑖᒃᑯᐊ ᓈᒻᒪᒋᔭᐅᓚᐅᖅᑎᓪᓗᒋᑦ ᑲᒥᓯᓇ ᐄᕙ ᐋᕆᐊᒃᒧᑦ.

ᒪᓕᒐᖅ ᐊᑐᓕᖅᑎᑦᑎᔾᔪᑎᐅᓂᐊᕐᑐᖅ ᓄᓇᕗᒥᑦ ᒐᕙᒪᒃᑯᑦ $2.3 ᐱᓕᐊᓐ ᑖᓚᑦ ᐊᐅᓚᑦᑎᔾᔪᑎᓄᑦ ᐊᒻᒪ ᓱᕋᒃᓯᒪᑎᑦᑎᑦᑕᐃᓕᓂᕐᒧᑦ ᐊᐅᓚᑦᑎᔾᔪᑎᐅᓂᐊᖅᑐᓂᒃ ᐊᕐᕌᒍ 2025-26ᒧᑦ, ᑖᓐᓇᓗ ᐱᒋᐊᓕᕐᓂᐊᖅᖢᓂ ᐊᐃᕆᓕ 1ᒥ ᓈᒻᒪᒋᔭᐅᓚᐅᕐᒥᔪᖅ. ᐊᓂᒍᖅᑎᑕᐅᓂᖓ ᐊᐅᓚᑦᑎᔾᔪᑎᒃᓴᐃᑦ ᒪᕐᕉᖕᓂ ᐱᓇᓱᐊᕈᓰᖕᓂ ᐱᓕᕆᐊᖑᑲᑕᓚᐅᕐᑐᖅ ᒪᓕᒐᓕᐅᖅᑎᓄᑦ ᓄᓇᕗᒥᑦ ᒐᕙᒪᒃᑯᑦ ᐱᓕᕆᕝᕕᖏᖕᓄᑦ ᐋᖅᑭᒃᑕᐅᔪᑦ.

ᓄᓇᕗᒥᑦ ᒐᕙᒪᒃᑯᑦ ᐊᑐᖅᑕᐅᔾᔪᑎᒃᓴᓄᑦ ᐸᕐᓇᐅᑎᖏᑦ ᐃᓱᒪᒋᔭᐅᔪᖅ $124 ᒥᓕᐊᓐᓂ ᐊᑭᓕᒃᓴᖃᕈᑎᐅᓂᐊᕆᐊᒃᓴᖓᓂᒃ, ᑯᓱᒐᐅᑦ ᐅᖃᐅᓯᖓᒍᑦ, ᒐᕙᒪᒃᑯᑦ ᑮᓇᐅᔭᓂ ᑲᒪᒋᔾᔪᑎᒋᕙᒃᑕᖓᒍᑦ.

“ᐅᓇ ᑭᖑᓪᓕᖅᐹᖅ ᐊᐅᓚᑦᑎᔾᔪᑎᒃᓴᕆᔭᐅᔪᖅ ᐅᑯᓄᖓ ᒐᕙᒪᐅᔪᓄᑦ ᐊᒻᒪᓗ ᐋᖅᑭᒃᑎᐊᕐᓯᒪᓇᓱᒋᓪᓗᒍ ᑭᖑᓂᑦᑎᓐᓂ ᒐᕙᒪᓕᕆᔨᐅᓂᐊᖅᑐᓄᑦ,” ᑯᓱᒐᖅ ᐊᐱᕐᓱᖅᑕᐅᑎᓪᓗᒍ ᐅᖃᓚᐅᕐᑐᖅ, ᓄᓇᕗᒻᒥᐅᑦ ᓂᕈᐊᓛᕐᓂᐊᕐᓂᕋᖅᖢᓂᒋᑦ ᓄᑖᓂ ᓄᓇᕗᒧᑦ ᒐᕙᒪᐅᓂᐊᖅᑐᓂᒃ ᐅᒃᑑᐱᕆ 27ᒥ.

“ᐱᓕᕆᕈᓘᔭᕐᓯᒪᒐᑦᑕ ᐊᕐᕌᒍᒐᓴᐅᓕᕐᑐᓂᒃ ᑮᓇᐅᔭᓂ ᐱᕈᖅᑎᑦᑎᓇᓱᒃᖢᑕ ᐃᒪᓐᓇ ᓲᕐᓗ ᒫᓐᓇᑐᑦ ᐃᒡᓗᓂ ᓴᓇᒃᑲᓐᓂᕆᐊᖃᕐᒪᑕ ᐊᒻᒪ ᓄᓇᕗᒻᒥᐅᓂ ᐃᑲᔪᒃᑲᓐᓂᕆᐊᖃᖅᖢᑎᒃ ᑕᐃᒪᓗ ᑖᓐᓇ ᑮᓇᐅᔭᓂ ᐱᕈᖅᑎᑕᐅᔪᑦ ᐊᑐᖅᑕᐅᔪᓐᓇᕋᔭᕐᒪᑕ.”

ᐊᒻᒪᓗ ᐊᐅᓚᑦᑎᔾᔪᑎᒃᓴᐃᑦ ᐃᓚᖃᖅᖢᑎᒃ ᐅᑯᐊ ᒪᓕᒐᓕᕆᔨᒃᑯᑦ ᐊᖏᓚᐅᖅᑕᖓᓂ ᒪᕐᕉᖕᓂ ᑮᓇᐅᔭᓂ ᐊᑐᕈᑎᐅᓕᕐᓂᐊᖅᑐᓂᒃ.

ᐊᑕᐅᓯᖅ ᓇᓗᓇᐃᖅᑕᐅᓯᒪᔪᖅ ᐃᓚᓯᑲᓐᓂᕐᓂᐊᕐᓂᖏᓐᓂᒃ $100.2 ᒥᓕᐊᓐᓂ ᐊᐅᓚᑦᑎᔾᔪᑎᒃᓴᓄᑦ ᐊᕐᕌᒍ 2024-25ᒧᑦ.

ᐱᖃᑎᖓ ᐊᓯᐊᓄᐊᖅᑎᑦᑎᔾᔪᑎᐅᓪᓗᓂ $280.7 ᒥᓕᐊᓐᓂ ᐊᑐᖅᑕᐅᓯᒪᙱᖅᑐᓂᒃ ᑮᓇᐅᔭᖅᑐᔪᓄᑦ ᐃᑲᔫᑎᒃᓴᓂᒃ ᐅᕙᙵᑦ ᒫᓐᓇ ᐊᕐᕌᒍᒥ ᐊᕐᕌᒎᓂᐊᖅᑐᒧᑦ.

ᒪᕐᕉᒃᑲᓐᓃᒃ ᑖᒃᓰᓕᕆᔾᔪᑎᐅᖕᒥᔪᑦ ᐊᖏᖅᑕᐅᓚᐅᕐᒥᔫᒃ ᒫᔅᓯ 11ᒥ.

ᐋᖅᑭᒋᐊᖅᑕᐅᔾᔪᑎ ᐃᓐᑲᒻ ᑖᒃᓯ ᒪᓕᒐᖅᒥ ᐱᕕᖃᕈᑎᐅᔪᓐᓇᖅᑐᖅ ᐊᖓᔪᖅᑳᕆᔭᐅᔪᑦ ᐱᑖᖃᑦᑕᖅᑐᑦ ᓄᓇᕗᒥᑦ ᓱᕈᓯᕐᓯᐅᑎᓂᒃ ᐱᔪᓐᓇᕐᓂᖏᓐᓂ ᐃᑲᔫᑎᒃᓴᓂ ᑕᖅᑭᑦ 6 ᐊᓂᒍᕐᓯᒪᓕᕐᓂᖓᓄᑦ ᓱᕈᓯᖓ ᐃᓅᔪᓐᓃᓚᐅᕐᑎᓪᓗᒍ.

ᓄᑖᖅ ᐅᕐᓱᐊᓗᒃᒧᑦ ᑖᒃᓰᔭᕐᓂᕐᒧᑦ ᒪᓕᒐᖅ ᐊᓯᔾᔨᓯᓯᒪᙱᑦᑐᖅ ᑖᒃᓯᓄᑦ ᐊᑭᓕᐅᑎᓂᒃ, ᑭᓯᐊᓂᓕ ᑯᓱᒐᖅ ᑕᒪᑐᒧᖓ ᐅᖃᐅᓯᖃᖅᑐᖅ “ᐊᐅᓚᑦᑎᓂᒃᑯᑦ” ᐊᓯᔾᔨᖅᓯᒪᔪᑦ ᐊᑐᕐᑕᐅᔾᔪᓯᕆᕙᒃᑕᖓᓂᒃ.

ᐃᓕᓐᓂᐊᕐᓂᓕᕆᓂᒃᑯᓪᓕ, ᐃᓕᓐᓂᐊᒃᑲᓐᓂᕈᑎᓂᒃ ᐃᓕᓐᓂᐊᖅᑎᓄᑦ ᐃᑲᔫᑎ ᒪᓕᒐᖅ “ᓄᑖᖅ ᖃᓄᐃᓕᐅᕈᑎᒃᓴᑦ ᐃᓕᓐᓂᐊᖅᑐᓂᒃ ᐃᑲᔪᖅᑐᐃᓂᕐᒥ,” ᐅᖃᕐᑐᖅ ᐃᓕᓐᓂᐊᕐᓂᓕᕆᓂᕐᒧᑦ ᒥᓂᔅᑕ ᐹᒥᓚ ᒍᕉᔅ.

ᐅᓇ ᐱᖁᔭᖅ ᐋᖅᑭᒋᐊᖅᓯᒪᔪᖅ ᓄᑖᙳᕆᐊᖅᓯᒪᓪᓗᓂ ᓄᓇᕗᒥᑦ ᐃᓕᓐᓂᐊᒃᑲᓐᓂᕈᒪᔪᑦ ᓯᓚᑦᑐᖅᓴᕐᕕᐊᓗᒃᒧᑦ ᓯᓚᑦᑐᖅᓴᕐᕕᒃᒧᓪᓗ ᐃᑲᔫᑎᒃᓴᓂᒃ, ᐊᒻᒪᓗ ᑮᓇᐅᔭᑎᒎᙱᑦᑐᖅ ᐃᑲᔫᑎᖃᖅᑎᑕᐅᓂᖅ ᐃᓕᓐᓂᐊᕈᑎᓄᑦ ᐅᑯᓇᙵᑦ ᐃᓕᓐᓂᐊᕐᓂᓕᕆᔨᒃᑯᓐᓂᑦ.

ᐃᑲᔫᑎᒃᓴᖅ ᐅᕘᓇ ᐱᖁᔭᖅᑎᒍ ᐊᖏᖅᑕᐅᒋᐊᖃᕋᔭᖅᑐᖅ ᐃᑲᔫᑎᒃᑲᓐᓂᖃᕆᐊᖃᕐᓂᕐᒥᒃ ᒪᓕᒐᓕᕆᔨᕐᔪᐊᑦ ᑲᑎᒪᒃᑲᓐᓂᓕᖅᐸᑕ, ᐅᖃᓚᐅᕐᑐᖅ ᐊᕐᕕᐊᑦ ᓂᒋᐊᓄᑦ ᒪᓕᒐᓕᐅᖅᑎ ᔫ ᓴᕕᑲᑖᖅ, ᑖᓐᓇ ᐃᒃᓯᕙᐅᑕᕆᔭᐅᔪᖅ ᑲᑎᒪᔨᕋᓛᓄᖅ ᐱᖁᔭᓄᑦ ᐅᖃᐅᓯᒃᑲᖏᓐᓂᑦ ᑲᑎᒪᔨᐃ ᑕᒪᒃᑭᖅᑎᓪᓗᒋ.

ᐱᖓᓱᒃᑲᓐᓂᕐᓂ ᒪᓕᒐᕐᓂ ᐊᓂᒍᐃᑎᑦᑎᓚᐅᕐᑐᑦ. ᐅᑯᐊ ᒪᓕᒐᐃᑦ ᐱᔾᔪᑎᖃᖅᑐᑦ ᒪᓕᒐᓕᐅᕐᑎᑦ ᐃᑦᑐᖅᓯᐅᑎᑖᕈᑎᒃᓴᖏᑦ, ᓄᑖᙳᕆᐊᖅᑕᐅᓪᓗᓂ ᓄᓇᕗᒥᑦ ᓇᖕᒥᓂᖅ ᑮᓇᐅᔭᖃᖅᑎᑦᑎᔨᓄᑦ ᒪᓕᒐᖅᒥᑦ, ᐊᒻᒪ ᒪᓕᒐᕐᓂ ᓄᓇᕗᒥᑦ ᒐᕙᒪᒃᑯᑦ ᐋᖅᑭᒃᓯᓪᓗᑎᒃ ᓄᓇᕗᒥᑦ ᒐᕙᒪᒃᑯᑦ ᐋᖅᑭᒋᐊᒃᑲᓐᓂᕐᓯᒪᔭᖏᓐᓂᑦ ᒪᕐᕉᖕᓂ ᐱᓕᕆᕝᕕᖕᓂ ᐊᐃᕆᓕ 1-ᒧᑦ.

ᒪᓕᒐᓕᐅᖅᑎᑦ ᐃᖃᓗᖕᓄᑦ ᐅᑎᓛᕐᑐᑦ ᐊᐃᕆᓕᒥ ᐱᓇᓱᐊᕈᓯᕐᒥ ᑲᑎᒪᔨᕋᓛᑦ ᑲᑎᒪᓂᐊᓕᖅᐸᑕ. ᑭᖑᓂᐊᒍᑦ, ᐅᐱᕐᖔᒃᑯᑦ ᑲᑎᒪᓂᖅ ᐱᒋᐊᕐᓂᐊᖅᓗᓂ ᒪᐃᒥ, ᐊᒻᒪᓗ ᐱᓕᕆᔪᓐᓃᕐᓂᐊᕐᓂᕐᒧᑦ ᑲᑎᒪᓛᖅᖢᑎᒃ ᓯᑎᐱᕆᒥ ᓯᕗᓂᐊᒍᑦ ᐅᒃᑑᐱᕆ 27 ᓂᕈᐊᕐᓇᐅᓛᖅᑐᒥᒃ.