ᐅᓄᙱᓗᐊᖅᑐᑦ ᓄᓇᕕᒃᒥ ᓄᓇᓖᑦ ᐃᒪᖏᓐᓂᒃ ᖃᐅᔨᓴᖃᑦᑕᕐᒪᑕ: ᑲᑎᕕᒃ ᓄᓇᓕᓕᒫᑦ ᒐᕙᒪᖓᑦ

For the English version of this story, please see Too few Nunavik communities regularly test their water: KRG.

ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

ᑲᑎᕕᒃ ᓄᓇᓕᓕᒫᑦ ᒐᕙᒪᖓ ᓄᓇᓕᖕᓂ ᐱᓕᕆᐊᒃᓴᓄᑦ ᑐᑭᒧᐊᖅᑎᑦᑎᔨ ᑐᓴᖅᑎᑦᑎᓚᐅᕐᑐᖅ ᐱᓇᓱᐊᕈᓯᐅᓚᐅᕐᑐᒥ ᓄᓇᕕᒃᒥ ᓄᓇᓖᑦ ᐃᒪᖏᓐᓂᒃ ᖃᐅᔨᓴᖃᑦᑕᙱᓗᐊᕐᓂᖏᓐᓂᒃ.

ᓄᓇᓕᓕᒫᑦ ᒐᕙᒪᖓ ᐱᓇᓱᐊᕈᓯᑕᒫᑦ ᐃᒪᕐᒥ ᖃᐅᔨᓴᖃᑦᑕᖁᔨᓯᒪᔪᑦ ᐊᒻᒪᓗ ᖃᐅᔨᓴᕈᑎᐅᔪᑦ ᖃᐅᔨᑎᑦᑎᔾᔪᑎᐅᕙᒡᓗᑎᒃ ᓄᓇᓕᖕᓂ ᐱᓕᕆᐊᒃᓴᓄᑦ ᑐᑭᒧᐊᖅᑎᑦᑎᔨᒧᑦ.

ᑕᓪᓕᒪᑦ ᐱᓇᓱᐊᕈᓰ 2024 ᐱᒋᐊᖅᑎᓪᓗᒍ ᐅᑯᐊ ᑲᑎᕕᒃ ᓄᓇᓕᓕᒫᑦ ᒐᕙᒪᖓ 79 ᐳᓴᓐᑎᖏᓐᓂᒃ ᖃᐅᔨᓴᕈᑎᓂ ᑐᓂᔭᐅᓚᐅᕐᒪᑕ, ᑐᑭᒧᐊᖅᑎᑦᑎᔨ ᕼᐅᓰᓐ ᓴᕕᒐᑎ ᐅᖃᓚᐅᕐᑐᖅ.

ᐅᓇ ᓇᐃᓴᐅᑎ “ᐊᑦᑎᖕᓂᖅᓴᖅ ᐊᑐᖃᑦᑕᖁᔭᑦᑎᓐᓂ,” ᐅᖃᓚᐅᕐᑐᖅ ᑲᑎᕕᒃ ᓄᓇᓕᓕᒫᑦ ᒐᕙᒪᖓᓄᑦ ᑲᑎᒪᔨᓄ ᕕᕝᕗᐊᕆ 21ᖑᑎᓪᓗᒍ.

ᐊᒻᒪᓗ ᑯᐸᐃᒃ ᒐᕙᒪᖓᑦ ᐊᕐᕌᒍ ᑎᓴᒪᐃᕐᓗᒍ ᐃᒪᕐᒥᒃ ᐃᓚᐅᕈᑎᖏᓐᓂᒡᓗ ᖃᐅᔨᓴᖃᑦᑕᖁᔨᓯᒪᓪᓗᑎᒃ. ᑭᖑᓪᓕᖅᐹᖅ ᐱᓕᕆᓂᐅᓚᐅᕐᑐᖅ ᔭᓄᐊᕆᒥ, ᐅᖃᕐᑐᖅ ᓴᕕᒐᑎ, ᐊᒻᒪᓗ ᒪᕐᕉᒃ ᓄᓇᓖᒃ 14ᓂ ᓄᓇᓕᖕᓂ ᑐᓂᓯᓯᒪᓪᓗᑎᒃ ᖃᐅᔨᓴᖅᑕᐅᔪᕕᓂᕐᓂ.

“ᐱᒻᒪᕆᐅᓛᕐᓕ ᐱᓕᕆᕝᕕᑦᑎᓐᓂ ᖃᐅᔨᒪᓇᓱᖃᑦᑕᕐᓂᖅ ᐃᒥᖅᑕᐅᕙᒃᑐᒥ ᐃᒪᕐᒥ ᐱᐅᒐᓗᐊᕐᒪᖔᑦ,” ᐅᖃᕐᑐᖅ.

ᑯᐸᐃ ᐊᕙᑎᓕᕆᔨᒃᑯᑦ ᖃᕋᓴᐅᔭᒃᑯᑦ ᓴᖅᑭᔮᒐᖓᒍᑦ ᐃᒪᕐᒥ ᐊᒻᒪ ᐃᓚᐅᕈᑎᖏᓐᓂ ᖃᐅᔨᓴᖃᑦᑕᕐᕋᖅᖢᓂᖏᑦ ᒪᓐᓇ

ᑐᐊᐸᒃ ᐊᒃᑐᐃᖃᑦᑕᙱᒃᑲᓗᐊᕐᒪᖓᑦ ᐃᒪᕆᔭᐅᕙᒃᑐᓂ. ᒪᑯᐊ ᖃᐅᔨᓴᕈᑎᐅᕙᒃᑐᑦ ᐱᑕᖃᕆᐊᒃᓴᖏᓐᓂᒃ ᐋᓯᓂᒃ (arsenic), ᒫᓐᒐᓃᔅ (manganese), ᑯᓘᕋᐃᑦ (chlorides) ᐊᒻᒪᓗ ᐱᐅᕆᐊᒻ (barium) ᐊᓯᖏᓪᓗ.

ᐊᑐᓂ ᓄᓇᓕᒃ ᐃᒥᑕᕐᕕᓕᕆᔨᖃᕐᒪᑕ ᖃᐅᔨᓴᖃᑦᑕᖅᑐᒥ ᐃᒪᕐᒥ ᐱᓇᓱᐊᕈᓯᑕᒪᑦ.

ᐃᓱᒪᒋᓪᓗᒍ ᐃᓚᖏ ᕿᑲᓚᐅᕆᐊᒃᓴᖏᓐᓂᒃ ᔭᓄᐊᕆ ᐱᒋᐊᓕᖅᑎᓪᓗᒍ, ᓴᕕᒐᑎ ᓄᓇᓕᖕᓂ ᐃᓇᖏᖅᑎᑕᖃᖃᑦᑕᖁᔨᔪᖅ ᐱᓕᕆᐊᖃᖃᑦᑕᕋᔭᖅᑐᒥ.

“ᒪᐃᔭᐅᓂᐅᑉ ᓴᓂᐊᒍᑦ ᐅᓇ ᐱᒻᒪᕆᐊᓛᖅ ᐃᖅᑲᓇᐃᔮᓂᒃ ᐃᒥᕐᑕᕐᕕᓕᕆᔨ,” ᐅᖃᕐᑐᖅ, ᐅᖃᒃᑲᓐᓂᖅᖢᓂ ᐱᓕᕆᕝᕕᒃ ᓱᕋᒃᓯᒪᔪᓕᕆᓂᕐᒧᑦ ᐃᑲᔪᖅᑕᐅᑎᑦᑎᔪᓐᓇᕐᓂᕋᖅᑕᖏ ᑭᓯᐊᓂᓕ “ᐅᐸᒍᑎᔪᓐᓇᙱᒻᒪᑕ ᐃᒥᕐᑕᕐᕕᒃᓂ ᓄᓇᓕᖕᓂ ᖃᐅᔨᓴᑲᑕᒋᐊᖅᑐᕐᓗᑎᒃ.”

ᓴᕕᒐᑎ ᐅᖃᓚᐅᕐᑐᖅ ᓈᒻᒪᙱᓕᐅᕈᑎᖃᓗᐊᖃᑦᑕᕐᓂᖏᑦ ᐅᑯᐊ ᑲᖏᖅᓱᔾᔪᐊᖅ, ᐃᕗᔨᕕᒃ, ᐊᑯᓕᕕᒃ ᐊᒻᒪ ᐅᒥᐅᔭᖅ.

ᑕᓯᐅᔭᖅ, ᐃᕗᔨᕕᒃ ᐊᒻᒪ ᐅᒥᐅᔭᖅ ᑭᖑᓪᓕᖅᐹᖑᓪᓗᑎ ᐃᒪᖏᓐᓂ ᖃᓛᖅᑎᑦᑎᖃᑦᑕᖁᔭᐅᓯᒪᔪᑦ ᖃᐅᔨᓴᕈᑎᒋᔭᐅᓚᐅᖅᑐᓄ, ᑎᑎᕋᐅᓯᐅᓂᑯ ᕕᕝᕗᐊᕆ 22ᒥ.

“ᖃᐅᔨᓴᖃᑦᑕᕆᐊᖃᕋᑦᑎᒍᑦ ᐃᒪᐅᑉ ᖃᓄᐃᓐᓂᖓ ᐱᓕᕆᐊᖑᓯᒪᙱᑦᑐᖅ ᐊᒻᒪᓗ ᐃᒪᖅ ᐱᓕᕆᐊᖑᓯᒪᔪᖅ ᖃᓄᑐᐃᓐᓴᖅ,” ᐅᖃᕐᑐᖅ.

“ᓯᓚ ᐊᓯᔾᔨᖅᐸᓪᓕᐊᓂᖓᓄᑦ ᐊᕙᑎᑦᑎᓐᓃᑦᑐ ᖃᓄᐃᕈᓘᔭᖃᑦᑕᖅᓯᒪᓕᕐᒪᑕ, ᑕᐃᒪᓕ ᐃᒪᖅ ᐱᓕᕆᐊᖑᓯᒪᙱᑦᑐᖅ ᐊᓯᔾᔨᖅᐸᑦ ᑕᐃᒪᓕ ᐊᓯᐊᒍᑦ ᐱᓕᕆᐊᖑᔭᕆᐊᖃᓕᕋᔭᖅᑐᖅ.”

ᒫᓐᓇᓕ ᓱᕋᕐᓯᒪᔪᓕᕆᔪᖃᑲᑕᖕᒪᑦ ᐃᒥᕐᑕᕐᕕᐅᕙᒃᑐᓂᒃ ᐅᑯᓇᓂ ᑰᔾᔪᐊᖅ, ᑕᓯᐅᔭᖅ, ᐊᐅᐸᓗᒃ, ᑲᖏᕐᓱᒃ, ᖁᐊᖅᑕᖅ ᐊᒻᒪ ᐃᕗᔨᕕᒃᒥ.

ᐃᓱᒪᒋᓪᓗᒋᓪᓗ ᑯᕕᖅᑕᕐᕕᐅᕙᒃᑐᑦ, ᓄᑖᒥ ᐱᓕᕆᐊᖃᓕᕐᑐᖅ ᖃᓄᐃᓕᖓᓂᐊᕐᓂᖓᓂ ᐅᕙᓂ ᓴᓪᓗᐃᑦ ᐱᔾᔪᑎᖃᖅᖢᑎᒃ ᓄᓇᓯᐅᑏ ᑎᑭᐅᑎᑲᐅᖅᑐᕈᓐᓇᙱᒻᒪᑕ ᖁᑦᑎᒃᑐᒧᑦ ᐱᓗᐊᖅᑐᒥ ᐅᑭᐅᒃᑯᑦ.

ᐅᓇ ᐱᓕᕆᐊᒃᓴᖅ ᖃᓄᐃᓕᐅᕈᑎᐅᔪᓐᓇᖅᑐᓂ ᐃᓱᒪᒃᓴᖅᓯᐅᕋᓱᖕᓂ ᖃᓄᖅ ᑯᕕᑕᕐᕕᖕᓂ ᐱᔭᐅᔪᑦ ᑯᕕᖅᑕᕐᕕᒃᒧᐊᖅᑕᐅᔪᓐᓇᕋᔭᕐᒪᖔᑦ.

ᓴᕕᒐᑎ ᐅᖃᓚᐅᕐᑐᖅ ᐃᓄᒃᔪᐊᒃᒥᑦ ᐱᓕᕆᖃᑎᖏᑦ ᑯᕕᖅᑕᕐᕕᒃᒥ ᑯᕕᑲᑕᒐᓱᒋᓐᓈᓕᖅᖢᑎᒃ ᑕᐅᑐᒃᖢᒍ ᐃᒪᕐᓲᓕᖅᑐᖅ ᖃᓂᒋᔭᖓᓂ ᐱᑕᖃᖃᑦᑕᓚᐅᙱᖢᓂ, ᐊᒻᒪᓗ ᐅᑯᐊ ᑲᑎᕕᒃ ᓄᓇᓕᓕᒫᑦ ᐱᓕᕆᑎᑦᑎᓚᐅᕐᑐᑦ ᑕᒪᑐᒥᖓ ᖃᐅᔨᓴᕐᓂᐊᖅᑐᒥᑦ.