‘ᐊᐅᓪᓚᕐᕕᒋᒍᒃ ᓄᓇᕗᑦ’ ᐸᕐᓇᓯᒪᖕᒪᑦ ᐱᕈᖅᐸᓪᓕᐊᓂᕐᒧᑦ, ᑐᓴᖅᑎᑦᑎᔪᖅ ᓄᑖᑦ ᐊᖓᔪᖅᑳᑦ
ᑲᑐᔾᔨᖃᑎᒌᑦ ᑐᕌᒐᖃᕐᑐᑦ ᐱᕈᖅᐸᓪᓕᐊᑎᑦᑎᓂᕐᒥᒃ ᐊᐅᓪᓚᕐᕕᓕᕆᓂᖅ ᑮᓇᐅᔭᓕᐅᕋᓱᖕᓂᐊᕐᓗᑎᒃ ᐱᓕᐊᓐ ᑖᓚᓂ ᐊᕐᕌᒍᑕᒫᑦ 2030 ᑎᑭᑉᐸᑦ
ᓯᐊᕗ ᐊᓐᑎᕗ (Silver Endeavor), ᐅᒥᐊᕐᔪᐊᖅ ᐃᓄᖕᓂ ᐅᓯᑲᖅᑕᖅᑎ ᒫᓂ 200-ᓂ ᐃᓄᖃᖅᖢᓂ, ᓄᖃᖅᑐᖅ ᑭᖓᓂ ᔪᓚᐃ 18-ᖑᑎᓪᓗᒍ. ‘ᐊᐅᓪᓚᕐᕕᒋᒍᒃ ᓄᓇᕗᑦ’ ᐃᓱᒪᖕᒪᑕ ᓴᖅᑭᑦᑎᔪᒪᓪᓗᑎᒃ ᐱᓕᐊᓐ-ᑖᓚᑐᖅᑐᒥ ᐊᐅᓪᓚᕈᔾᔨᖃᑦᑕᕐᓂᕐᒥ ᓄᓇᕗᒥᑦ 2030, ᑕᐃᒪᓕ ᐅᓄᕐᓂᕐᓴᓂ ᐅᒥᐊᕐᔪᐊᕐᓂ ᐃᓄᖕᓂ ᐅᓯᔪᓂ ᐱᑕᖃᕐᓂᕐᓴᐅᓇᔭᕐᑐᖅ. (ᐊᔾᔨᓕᐅᕆᔨ ᐋᑎ ᓴᑭᓯᐊᓐ)
For English version, see Planning for growth, Travel Nunavut announces leadership changes
‘ᐊᐅᓪᓚᕐᕕᒋᒍᒃ ᓄᓇᕗᑦ’ ᓄᑖᒥ ᐊᖓᔪᖅᑳᖃᓕᕐᒪ ᑐᕌᒐᕆᔪᒪᔭᖓᓂ ᑎᑭᐅᑎᑎᑦᑎᓂᐊᖅᑐᒥ ᐱᓕᐊᓐ-ᑖᓚᓂ ᐊᕐᕌᒍᒥ ᑮᓇᐅᔭᓕᐅᕈᑎᖃᕈᒪᓪᓗᑎᒃ ᐃᖅᑲᓇᐃᔭᖅᑎᑦᑎᓗᑎ 5,000-ᓂ ᐃᓄᖕᓂ ᐊᕐᕌᒍ 2030 ᑎᑭᑎᓪᓗᒍ.
ᑲᑐᔾᔨᖃᑎᒌᑦ ᒫᓂ 150 ᖃᓂᒋᔭᖓᓂ ᐃᓚᖃᖅᖢᓂ ᐃᓚᖃᖅᑐᓂᒃ ᐅᑯᓂᖓ ᑐᔪᕐᒥᕕᖕᓂᑦ, ᖃᖓᑕᓲᓂᒃ, ᑎᑎᕋᐅᔭᒐᖅᑎᓂᒃ ᐊᒻᒪ ᒥᑭᑦᑐᓂ ᓇᖕᒥᓂᖅ ᐱᓕᕆᐊᖑᔪᓂᒃ, ᐅᖃᓚᐅᕐᑐᑦ ᐋᓕᒃᔅ ᓯᑕᐱᖕ ᐊᖓᔪᖅᑳᖑᓕᕐᓂᖓᓂ ᔪᓚᐃ 31-ᖑᑎᓪᓗᒍ.
“ᐋᓕᒃᔅ ᐱᓕᕆᐊᖃᓕᒪᑦᑎᐊᕐᒪᑕ ᐱᓕᕆᕝᕕᖓᓚᖕᓂᒃ, ᒐᕙᒪᐅᔪᓂᒃ ᐊᒻᒪ ᑲᑐᔾᔨᖃᑎᒌᓂᒃ ᐊᒻᒪᓗ ᐃᓄᖕᓂ ᑲᑎᑦᑎᕙᒃᖢᑎᒃ ᐃᓱᒪᓕᐅᕆᖃᑎᒌᒍᓐᓇᖅᑐᓂ ᓈᒻᒪᒃᑐᓂᒃ,” ᐅᖃᕐᑐᖅ ᐃᐊᑦ ᕈᒪᓇᐅᔅᑭ, ᑲᑎᒪᔨᓄᑦ ᐃᒃᓯᕙᐅᑕᖅ ‘ᐊᐅᓪᓚᕐᕕᒋᒍᒃ ᓄᓇᕗᑦ’ᑯᓐᓄᑦ, ᐊᐱᕐᓱᖅᑕᐅᑎᓪᓗᒍ ᓄᓇᑦᓯᐊᕐᒥ ᐱᕙᓪᓕᐊᔪᓂ.
ᓯᑕᐱᖕ ᐃᖅᑲᓇᐃᔮᖃᓚᐅᕐᑐᖅ ᐊᔾᔨᒌᙱᑦᑐᓂᒃ ᐅᑯᓄᖓ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ, ᓄᓇᕗᒥᑦ ᒥᕐᖑᐃᕐᓯᕐᕕᓕᕆᔨᓄᑦ ᐊᒻᒪᓗ ᓄᓇᕗᒥᑦ ᒐᕙᒪᒃᑯᓐᓄᑦ, ᑕᕝᕙᓂᓕ ᒥᓂᔅᑕᐅᑉ ᑐᒡᓕᖓᓄᑦ ᐃᑲᔪᖅᑎᐅᓚᐅᕐᑐᖅ ᐃᓕᖅᑯᓯᓕᕆᔨᒃᑯᓐᓄᑦ.
ᐃᖅᑲᓇᐃᔮᕆᓵᖅᑕᒥᓂ ᐱᒋᐊᕐᓂᐊᖅᑐᖅ ᐅᕙᓂ ‘ᐊᐅᓪᓚᕐᕕᒋᒍᒃ ᓄᓇᕗᑦ’ ᓯᑎᐱᕆ 9-ᖑᓕᕐᐸᑦ.
“ᖃᐅᔨᒪᔭᐅᑦᑎᐊᕐᑐᖅ ᐊᑯᓂᐊᓗᒃ ᓄᓇᕗᒥᑦ ᐃᖅᑲᓇᐃᔭᖅᓯᒪᓕᕐᒪᑦ. ᐃᖅᑲᓇᐃᔭᕐᓯᒪᔪᖅ ᒥᑭᓐᓂᕐᓴᓂ ᓄᓇᓕᖕᓂ ᐊᒻᒪ ᐊᖏᓂᕐᓴᓂ, ᐱᓕᕆᐊᒃᓴᖃᒃᑲᓐᓂᕐᓯᒪᓪᓗᓂ ᓄᓇᕗᒥᑦ ᒐᕙᒪᒃᑯᓐᓂ ᑕᐃᒪᓐᓇᓗ ᐱᒻᒪᕆᐅᓂᐊᕐᒪᑦ ᐃᖅᑲᓇᐃᔮᖓᓄᑦ,” ᕈᒪᓇᐅᔅᑭ ᐅᖃᐅᓯᖃᖅᖢᓂ ᓯᑕᐱᖕᒥ.
ᓄᕕᐱᕆᐅᓚᐅᕐᓯᒪᔪᒥ, ‘ᐊᐅᓪᓚᕐᕕᒋᒍᒃ ᓄᓇᕗᑦ’ ᑐᓴᖅᑎᑦᑎᓚᐅᕐᓯᒪᖕᒪᑕ ᑐᕌᒐᕆᓇᓱᒃᑕᖓᓂ ᐱᕈᖅᑎᑦᑎᓂᕐᒥ ᓄᓇᕗᑦ ᐳᓚᕋᖅᑐᓕᕆᓂᖓᓂ ᐊᒻᒪ ᐊᐅᓪᓚᕈᔾᔨᓕᕆᓂᒃᑯᑦ ᐱᓕᐊᓐ ᑖᓚᓂ ᑮᓇᐅᔭᓕᐅᕈᑎᖃᕈᒪᓪᓗᑎ ᐊᕐᕌᒍᒥ ᐃᖅᑲᓇᐃᔭᖅᑎᑦᑎᓗᑎ 5,000-ᓂ ᐃᓄᖕᓂ 2030 ᑎᑭᑎᓪᓗᒍ.
ᐋᓕᒃᔅ ᓯᑕᐱᖕ, ᐊᑯᓂᐊᓗᒃ ᐃᖅᑲᓇᐃᔭᖅᑎᐅᔪᖅ ᓄᓇᕗᒥᑦ ᒐᕙᒪᒃᑯᓐᓄᑦ, ᐊᖓᔪᖅᑳᕆᔭᐅᓂᐊᓕᕐᑐᖅ ‘ᐊᐅᓪᓚᕐᕕᒋᒍᒃ ᓄᓇᕗᑦ’ ᓯᑎᐱᕆᐅᓕᕐᐸᑦ. (ᐊᔾᔨᙳᐊᖅ ᐅᑯᓇᙵᑦ ᐊᐅᑯᕌᑉ ᑐᓴᐅᒪᔾᔪᑎᓕᕆᔨᑦ)
ᐅᖃᐅᓯᐅᓚᐅᕐᑐᕐᓕ ᑕᐃᔅᓱᒪᓂ 2019-ᒥ, ᓄᕙᒡᔪᐊᕐᓇᖅ-19 ᐱᒋᐊᓚᐅᖅᑎᓐᓇᒍ, ᐱᓕᕆᕝᕕᐅᔪᖅ ᐃᖅᑲᓇᐃᔭᖅᑎᑦᑎᓚᐅᕐᓂᖏᓐᓂ 3,000-ᓂ ᐃᓄᖕᓂ ᐊᒻᒪᓗ ᐊᕐᕌᒍᑕᒫᑦ ᑮᓇᐅᔭᓕᐅᖅᐸᒃᖢᑎᒃ $400 ᒥᓕᐊᓐᓂ.
ᕈᒪᓇᐅᔅᑭ ᐅᖃᓚᐅᕐᑐᖅ ‘ᐊᐅᓪᓚᕐᕕᒋᒍᒃ ᓄᓇᕗᑦ’ ᐃᓱᒪᓂᖏᓐᓂᒃ ᐱᐊᓂᒃᓯᔪᒪᓪᓗᑎᒃ ᓄᑖᒥ ᑮᓇᐅᔭᓕᐅᕐᓂᕐᒧᑦ ᐊᒃᑐᐃᒍᑎᓄᑦ ᖃᐅᔨᓴᕐᓂᕐᒥᒃ, ᓄᑖᓂ ᑎᑎᕋᐅᓯᐅᓯᒪᔪᓂᒡᓗ, ᑲᑎᒪᕕᒡᔪᐊᖅᑎᑦᑎᓚᐅᙱᓐᓂᖏᓐᓂᒃ ᓄᕕᐱᕆ 6-ᒥ 8-ᒧ ᐃᖃᓗᖕᓂ.
“ᐊᐅᓪᓚᕈᔾᔨᕙᖕᓂᕐᒥ ᑮᓇᐅᔭᓕᐅᕈᑎᖃᖅᑎᓪᓗᑕ ᐱᕈᖅᑎᑦᑎᓂᐊᕈᒪᒐᑦᑕ ᐃᓅᓯᕐᒧᑦ ᐱᒻᒪᕆᐅᓛᒥ 25-ᓄ ᓄᓇᓕᖕᓄᑦ ᓄᓇᕗᒥᑦ ᐊᒻᒪᓗ ᐱᒻᒪᕆᐊᓘᓪᓗᓂ ᖃᐅᑕᒫᓐ ᐃᓅᓯᕆᔭᐅᔪᓄᑦ ᑭᒃᑯᓕᒫᓄᑦ,” ᐅᖃᓚᐅᕐᑐᖅ ᐅᖃᐅᓯᖃᖅᖢᓂ ᐱᓕᕆᕝᕕᐅᑉ ᑮᓇᐅᔭᓕᐅᕈᑎᒋᕙᒃᑲᖏᓐᓄᑦ ᐊᒃᑐᐃᒍᑎᓂᒃ.
“ᐊᐅᓪᓚᕈᔾᔨᕙᖕᓂᕐᒥ ᑮᓇᐅᔭᓕᐅᕈᑎᖃᕐᓂᖅ ᐊᐃᑉᐸᕆᔭᐅᖕᒪᑦ ᑮᓇᐅᔭᓕᐅᕐᓂᕐᒧᑦ ᐊᒻᒪ ᐃᖅᑲᓇᐃᔮᓄᑦ ᓄᓇᕗᒥᑦ, ᐊᒻᒪᓗ ᖃᐅᔨᒪᓪᓗᑕ ᐳᕈᖅᐸᓪᓕᐊᓂᐊᕐᑐᖅ.”
ᐊᒻᒪᓗ ᓯᑕᐱᖕ ᐃᖅᑲᓇᐃᔭᓕᖅᑎᑕᐅᓂᖓᓄᑦ ᐃᓚᒋᔭᐅᔪᖅ ᐅᑯᐊ ᐊᐅᓪᓚᕈᔾᔨᓂᕐᒧᑦ ᑲᑐᔾᔨᖃᑎᒌᑦ ᑐᓴᖅᑎᑦᑎᓚᐅᕐᒥᔪᑦ ᐱᖓᓱᓂ ᐊᐅᓚᑦᑎᓂᕐᒧᑦ ᐃᖅᑲᓇᐃᔮᓂᒃ.
ᓄᕇᓐ ᓇᒍᑉ ᑲᑐᔾᔨᖃᑎᒌᑦ ᐊᐅᓚᑦᑎᔨ ᑐᑭᒧᐊᖅᑎᑦᑎᔨᒋᓕᖅᖢᓂᔾᔪᒃ; ᑯᕆᔅᑏᓐ ᐳᕈᑦ’ᕼᐆᒻ ᑐᑭᒧᐊᖅᑎᑦᑎᔨᐅᓕᕐᖢᓂ ᓂᐅᕐᕈᑎᖃᕋᓱᖕᓂᕐᒧᑦ ᐃᑲᔫᑎᓄᑦ ᐊᒻᒪ ᐊᐅᓚᑦᑎᓂᕐᒧᑦ; ᐊᒻᒪ ᑳᓕᓐ ᐋᓗᓘ ᑐᑭᒧᐊᖅᑎᑦᑎᔨᐅᓕᕐᖢᓂ ᐃᓚᒋᔭᐅᔪᓄᑦ ᐊᒻᒪ ᐱᓕᕆᖃᑎᖃᕐᓂᕐᒧᑦ.
Hey I know Inuktitut from nunavik it took me 10 min to read that there should be a better way jeez