ᑑᕐᖔᓗᒃ ᖃᓄᐃᓕᐅᑲᑕᒍᒪᔪᖅ ᓄᓇᕗᑦ ᑐᙵᕕᒃᑯᓐᓄᑦ ᐊᖓᔪᖅᑳᖑᓗᓂ

For the English version of this story, please see Jeremy Tunraluk plans to be on the move as NTI president.

ᔨᐅᕆᒥ ᑑᕐᖔᓗᒃ, ᓂᕈᐊᖅᑕᐅᓵᖅᑐᖅ ᐊᖓᔪᖅᑳᒧᑦ ᓄᓇᕗᑦ ᑐᙵᕕᒃᑯᓐᓄᑦ, ᓂᕈᐊᖅᑕᐅᓚᐅᖅᖢᓂ ᖃᐅᒃᐸᙳᕐᑎᓪᓗᒍ ᑐᙵᓱᒃᑎᑕᐅᑲᑕᒃᖢᓂ ᐊᒻᒪᓗ ᐊᖓᔪᖅᑳᖑᓂᕐᒥᓂ ᖃᓄᐃᓕᐅᕐᓂᐊᕐᓂᕐᒥᓂ ᖃᐅᔨᓇᓱᒃᑐᖅ.

“ᐊᒃᓱᕈᕈᓘᔭᕐᓇᕐᒪᑦ ᐅᓪᓗᒥ,” ᐅᖃᕐᑐᖅ ᐊᐃᑉᐹ ᐅᓪᓛᖓᓂ, ᐃᑲᕐᕋ 12 ᑐᖔᓂ ᓂᕈᐊᕈᑎᑦ ᓇᐃᓴᖅᑕᐅᓚᐅᖅᑎᓪᓗᒋᑦ. “ᐅᖄᓚᐅᑎᒐ ᓯᕙᓂᑲᑕᐃᓐᓇᕐᑐᖅ.”

ᑑᕐᖔᓗ ᓵᓚᒃᓴᓚᐅᕐᑐᖅ ᓄᓇᕗᑦ ᑐᙵᕕᒃᑯᓐᓄᑦ ᐊᖓᔪᖅᑳᖑᓂᐊᕐᓂᕐᒧᑦ, ᑲᑐᔾᔨᖃᑎᒌᑦ ᑲᒪᒋᔭᖃᕐᑐᑦ ᐃᓄᖕᓄᑦ ᐱᔭᐅᔭᕆᐊᓕᖕᓂ ᐅᕘᓇ ᓄᓇᕗᒧᑦ ᐊᖏᕈᑎᓂ ᐊᑐᖅᑕᐅᒐᓗᐊᕆᐊᒃᓴᖏᓐᓂᑦ, 515-ᓂ ᐅᓄᕐᓂᕐᓴᓂ ᓂᕈᐊᖅᑕᐅᓪᓗᓂ ᓂᕈᐊᒐᒃᓴᐅᖃᑎᖓᓂᒃ.

ᓂᕈᐊᖅᑕᐅᓚᐅᕐᑐᖅ 5,730-ᓄᑦ, ᓵᒪᖃᖅᖢᓂ ᑐᒡᓕᕆᔭᐅᔪᒥ ᑳᑎ ᑕᐅᑐᙱᒥ ᑖᓐᓇᓕ ᓂᕈᐊᖅᑕᐅᓪᓗᓂ 5,215-ᓄᑦ. ᐋᓐᑐᕉ ᓇᑲᓱᒃ ᐱᖓᔪᒋᔭᐅᓪᓗᓂ 3,628-ᓄᑦ ᓂᕈᐊᖅᑕᐅᓪᓗᓂ ᐊᒻᒪ ᓂᑰᓪ ᑳᒻᕼᐊᒡ ᑎᓴᒪᒋᔭᐅᓪᓗᓂ 2,092-ᓄᑦ ᓂᕈᐊᖅᑕᐅᓪᓗᓂ ᑖᒃᑯᐊᓗ ᑕᐃᒪᓐᓇ ᑎᑎᕋᕐᓯᒪᓚᐅᖅᖢᑎᒃ ᓄᓇᕗᑦ ᑐᙵᕕᒃᑯᑦ ᖃᕋᓴᐅᔭᒃᑯᑦ ᓴᖅᑭᔮᒐᖓᓂ ᐊᐃᑉᐹ ᐅᓪᓛᖓᓂ.

ᓂᕈᐊᓚᐅᖅᑎᓪᓗᒋᑦ ᖃᐅᒃᐸᖓᓂ ᑲᑎᖃᑎᖃᓚᐅᕐᑐᖅ ᓯᕗᓕᐅᕐᑎ ᐸᐅᓗᓯ ᐊᕿᐊᕈᖅᒥ, ᑖᓐᓇ ᓄᓇᕗᑦ ᑐᙵᕕᒃᑯᑦ ᑎᑎᕋᕐᕕᖓᓄᐊᖅᖢᓂ ᖁᕕᐊᓱᖃᑎᖃᕆᐊᖅᑐᖅᖢᓂ.

“ᓯᕗᓕᐅᕐᑎ ᐅᖃᐅᑎᓚᐅᕐᑕᕋ, ᐊᖏᖃᑎᒌᖃᑦᑕᐃᓐᓇᔾᔮᙱᓐᓂᕋᕐᓂᑦᑎᓐᓂ,” ᐅᖃᕐᑐᖅ ᑑᕐᖔᓗᒃ, 38-ᓂ ᐅᑭᐅᓕᒃ ᑎᑎᕋᖅᑎ-ᑮᓇᐅᔭᓕᕆᔨᐅᓂᑯ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ, ᑖᔅᓱᒪᑦᑕᐅᖅ ᐊᕿᐊᕉᑉ ᐊᖓᔪᖅᑳᖑᕝᕕᒋᓂᑯᖓ ᓯᕗᓕᐅᖅᑎᐅᓕᓚᐅᙱᑎᓪᓗᒍ.

“ᓯᕗᓂᒃᓴᖅ ᑕᐅᑐᒃᖢᒍ, ᐱᓕᕆᖃᑎᖃᕈᒪᔪᖓ ᒐᕙᒪᒃᑯᓐᓂ.”

ᑖᒃᑯᐊ ᐱᓕᕆᖃᑎᒌᖕᓂᐊᕐᓗᑎᒃ ᓄᓇᕗᑦ ᑐᙵᕕᒃᑯᑦ ᐃᖅᑲᖅᑐᐃᕕᒃᑰᖅᑎᑦᑎᓯᒪᔪᖅ ᓄᓇᕗᒥᑦ ᒐᕙᒪᒃᑯᓐᓂ ᐅᒃᑑᐱᕆ 2021-ᒥ, ᐅᖃᖅᖢᑎᒃ ᓄᓇᕗᒥᑦ ᒐᕙᒪᒃᑯᑦ ᐃᓄᒃᑐᑦ ᐃᓕᓐᓂᐊᖅᑎᑦᑎᙱᓗᐊᕐᓂᖏᓐᓂ ᒪᑯᑎᑐᓇᖅ ᖃᓪᓗᓈᑎᑐᑦ ᐊᒻᒪ ᐅᐃᕖᑎᑐᑦ ᐃᓕᓐᓂᐊᖅᑕᐅᔪᓂᒃ.

ᓄᕕᐱᕆᒥ, ᓄᓇᕗᒥ ᒐᕙᒪᒃᑯᑦ ᐃᖅᑲᖅᑐᐃᕕᒡᔪᐊᒃᑯᓐᓂ ᑲᓇᑕᒥ (Supreme Court of Canada) ᐊᑐᕈᓐᓃᖅᑎᑦᑎᖁᓪᓗᒋᑦ ᓄᓇᕗᑦ ᑐᙵᕕᒃᑯᑦ ᐃᖅᑲᖅᑐᐃᕕᒃᑰᖅᑎᑦᑎᔾᔪᑎᒋᔭᖓᓂᒃ ᐅᑯᐊ ᓄᓇᕗᒥᑦ ᐃᖅᑲᖅᑐᐃᕕᒃᑯᑦ ᐃᓱᒪᓕᐊᕆᔭᐅᓯᒪᔪᓂ ᓈᒻᒪᒃᓴᙱᔾᔪᑎᒋᔭᐅᔪᓄᑦ ᐃᖅᑲᖅᑐᐃᕕᒃᑯᑦ (Court of Appeal) ᑖᔅᓱᒥᖓ ᑲᔪᓯᓂᐊᕋᓱᒋᑎᓪᓗᒋᑦ.

ᑑᕐᖔᓗ ᐅᖃᓚᐅᕐᑐᖅ ᐊᓯᐊᒍᑦ ᖃᓄᐃᓕᐅᕈᑎᐅᔪᓐᓇᖅᑐᓂᒃ ᐃᓱᒪᓕᐅᕆᔪᒪᓂᕋᖅᖢᓂ ᑕᒪᓐᓇ ᐃᖅᑲᖅᑐᐃᕕᒃᑰᖅᑎᑦᑎᓂᖅ ᐱᓕᕆᐊᖑᓚᐅᖅᑎᓐᓇᒍ.

“ᐋᖅᑭᒃᓯᔪᓐᓇᕈᑦᑕ ᐊᒻᒪ ᐃᖅᑲᖅᑐᐃᕕᒃᑰᙱᑦᑐᓐᓇᕈᑦᑕ ᐱᐅᒋᓇᔭᖅᑕᕋ,” ᐅᖃᕐᑐᖅ. “ᓱᒃᑲᐃᑎᑦᑎᒃᑲᓐᓂᕈᓐᓇᕈᑦᑕ ᐊᒻᒪ ᐅᖃᐅᓯᕐᒧᑦ ᒪᓕᒐᖅ ᐃᓄᓄᑦ ᐃᑲᔪᕈᑎᐅᓂᕐᓴᐅᔪᓐᓇᕐᓗᓂ ᑕᐃᒪᓕ ᑕᒪᓐᓇ ᐋᑭᒃᓯᒍᑎᒋᔪᓐᓇᕋᔭᕋᑦᑎᒍᑦ. ᑕᐃᒪᓐᓇ ᐃᓱᒪᔪᖓ — ᐱᓕᕆᖃᑎᒌᒍᓐᓇᕐᓗᑕ.”

ᐅᕘᓇᓕ ᓇᒡᒐᔾᔭᐅᒥ ᓂᕈᐊᕈᑎᓂᒃ ᓇᐃᓴᖅᑕᐅᓯᒪᔪᓂᒃ ᑑᕐᖔᓗᒃ ᐃᑲᔪᖅᑐᖅᑕᐅᓯᒪᓂᕐᓴᐅᓚᐅᕐᑐᖅ ᕿᑭᖅᑕᓂ ᓄᓇᖃᖅᑐᓂ ᑖᒫᓂᓕ ᓂᕈᐊᖅᑕᐅᓛᖑᓚᐅᕐᑐᖅ 8-ᓂ ᓄᓇᓕᖕᓂ 13-ᓂᙶᖅᑐᓂ.

ᑕᐅᑐᒃᖢᒋᑦ ᓵᓚᒃᓴᓚᐅᕐᑐᖅ ᒫᕐᕉᖕᓂ ᑭᕙᓪᓕᖅᒥ ᓄᓇᓕᖕᓂ 7-ᓂᙶᖅᑐᓂᒃ ᐊᒻᒪᓗ ᓵᓚᖃᙱᖢᓂ ᑕᓪᓕᒪᓂ ᕿᑎᕐᒥᐅᑦ ᓄᓇᓕᖏᓐᓂᒃ.

ᑭᓯᐊᓂᓕ ᑕᒪᒃᑯᐊ ᐃᓱᒫᓗᒋᔾᔮᙱᑕᖏᑦ ᑑᕐᖔᓘᑉ ᖃᓄᐃᓕᐅᕋᓱᖕᓂᒃᑯᑦ ᕿᑎᕐᒥᐅᓂ ᐊᒻᒪ ᑭᕙᓪᓕᖅᒥᐅᓂ, ᐅᖃᕐᑐᖅ. “ᐱᕈᕐᓯᒪᒐᒪ ᐅᖃᐅᔾᔭᐅᕙᒃᖢᖓ ᐊᔾᔨᒌᒃᑎᑦᑎᖃᑦᑕᖁᔭᐅᓪᓗᖓ ᓇᓂ ᓄᓇᖃᕋᓗᐊᖅᐸᑕ,” ᐅᖃᕐᑐᖅ. “ᐅᑯᐊ ᐃᓱᒫᓘᑎᒋᙱᑕᒃᑯᑦ ᐊᒻᒪᓗ ᓈᒻᒪᒃᓴᙱᔾᔪᑎᖃᕋᓱᒃᐸᙱᖢᖓ.”

ᐋᖅᑭᒃᓱᖅᓯᒪᓚᐅᕐᑕᖏ ᑭᓱᑦ ᐱᒻᒪᕆᐊᓛᖑᖕᒪᖔᑕ ᓂᕈᐊᒐᒃᓴᐅᑎᓪᓗᒍ — ᓴᖅᑭᔮᖃᑦᑕᕐᓂᖅ ᐊᒻᒪ ᑲᒪᒋᔭᖃᒻᒪᕆᖕᓂᖅ — ᑲᑎᖃᑎᖃᕐᓵᓕᓗᓂ ᐊᒻᒪ ᑲᑎᖃᑎᖃᖅᓵᓕᕙᒡᓗᓂ ᐃᓄᖕᓂ ᓄᓇᓕᖕᓃᑦᑐᓂᒃ.

“ᑲᑎᖃᑎᖃᕈᒪᔪᖓ ᑕᒪᐃᓐᓂ ᕼᐋᒻᒪᓚᒃᑯᓐᓄᑦ ᑲᑎᒪᔨᓂ, ᐊᖓᓇᓱᒃᑐᓕᕆᔨᓂ ᐊᒻᒪᓗ ᓄᓇᖃᖅᑐᓂ ᐊᒻᒪᓗ ᐅᖃᐅᓯᕆᔭᐅᔪᓂᒃ ᑐᓵᑲᑕᑦᑎᐊᕋᓱᒡᓗᑕ,” ᐅᖃᕐᑐᖅ.

ᓂᕈᐊᒐᒃᓴᐅᑲᑕᒃᑎᓪᓗᒋᑦ ᑑᕐᖔᓗᒃ ᐅᑯᓄᖓ ᓄᓇᓕᖕᓄᐊᓚᐅᕐᑐᖅ ᐃᖃᓗᒃᑑᑦᑎᐊᖅ, ᖁᒡᓗᖅᑑᖅ, ᑲᖏᖅᖠᓂᖅ ᐊᒻᒪ ᐃᖃᓗᐃᑦ ᐊᑯᒃᑐᔾᔪᑎᒋᔭᐅᔪᓂᒃ ᐊᒃᑐᐊᑎᑦᑎᓂᕐᓴᐅᓇᓱᒃᖢᓂ ᐅᑯᓄᖓ ᓄᓇᕗᑦ ᑐᙵᕕᒃᑯᓐᓂᓪᓗ ᐊᒻᒪ ᓄᓇᕗᒥᐅᑕᓂᒃ.

ᓂᕈᐊᒐᒃᓴᐅᑲᑕᖕᓂ ᐊᓂᒍᖅᑐᖅ ᑭᓯᐊᓂᓕ ᑑᕐᖔᓘᑉ ᐊᑐᕈᒪᓚᐅᕐᑕᓂ ᓄᓇᓕᓕᒫᓂ ᑕᑯᔭᖅᑐᕈᒪᓂᖓ ᑲᔪᓯᓂᐊᕐᓂᕋᖅᑕᖓ, ᐅᖃᕐᑐᖅ.

“ᓂᕈᐊᒐᒃᓴᐅᑎᓪᓗᒍ ᐃᓄᐃᑦ ᐅᖃᐅᑎᖃᑦᑕᓚᐅᕋᒃᑐᑦ, ᑕᒪᕐᒥᓕᒫᖅ — ᓈᓚᐅᑎᒃᑯᑦ, ᑐᓴᒐᒃᓴᑎᒍᑦ — ᑕᒪᕐᒥ, ᐳᓛᕐᓂᐊᕐᓂᕋᖅᖢᖓ ᑕᒪᐃᓐᓂ ᓄᓇᓕᖕᓂ ᐅᕝᕙᓘᓐᓃᑦ ᐱᓕᕆᔨᑦᑎᓐᓂ ᓄᓇᓕᖕᓄᐊᖅᑎᑦᑎᕙᒡᓗᑕ ᐊᒻᒪ ᐃᓄᖕᓂ ᑐᓴᕋᓱᑲᑕᒃᐸᒡᓗᑕ ᐊᒻᒪ ᖃᐅᔨᓇᓱᒡᓗᑕ ᑭᓱᒥ ᐱᔭᕆᐊᖃᕐᒪᖔᑕ,” ᐅᖃᕐᑐᖅ.

ᑮᓇᐅᔭᓕᕆᔾᔪᑎᐅᕙᒃᑐᑦᑕᐅᖅ ᓯᕗᓪᓕᐅᑎᑦᑕᕆᐊᖃᕐᒥᔪᑦ, ᐅᖃᒃᑲᓐᓂᖅᑐᖅ, ᐊᒻᒪᓗ ᐊᑐᐃᓐᓇᖃᕈᓐᓇᕐᓂᖅ.

“ᐱᓕᕆᖃᑎᖃᕆᐊᖃᕐᓂᐊᕋᒪ ᐊᖓᔪᖅᑳᕆᔭᐅᔪᓂᒃ ᐊᒻᒪ ᐊᖓᔪᖅᑳᒧᑦ ᑐᒡᓕᕆᔭᐅᔪᓂᒃ ᐃᓄᐃᑦ ᑲᑐᔾᔨᖃᑎᒌᓄᑦ ᐊᒻᒪᓗ ᑎᑎᕋᕐᕕᑦᑎᓐᓄᐊᕈᓐᓇᕐᓗᑎᒃ ᐅᕙᓐᓂ ᐅᖃᖃᑎᖃᕈᓐᓇᕐᓗᑎᒃ,” ᐅᖃᕐᑐᖅ.

“ᓂᕈᐊᒐᒃᓴᐅᓇᓱᒃᖢᓂ ᖃᓄᐃᓚᐅᙱᑦᑐᖅ, ᐊᒻᒪᓗ ᓂᕈᐊᕆᐊᖅᑐᖅᑐᓄᑦ ᓇᓗᓇᙱᓚᖅ ᓯᕗᒧᑦ ᐱᕙᓪᓕᐊᓂᑦᑎᓐᓂ ᐊᒻᒪᓗ ᐃᓄᖕᓄᑦ ᖃᓪᓕᕚᓪᓕᕐᓂᑦᑎᓐᓂ.”