Twin Flames ᓇᒃᓴᖅᐳᑦ ᓄᑕᐅᙱᑦᑐᓂ ᑐᓴᕐᓂᕆᔭᐅᔪᓂ, ᓄᑖᓂ ᐃᙱᐅᓯᓂᑦ ᐊᖅᐱᒃ ᑎᑕᖕᓂᐅᔪᒧᑦ

For the English version of this story, please see Twin Flames big old favourites, new hits to Aqpik Jam.

Twin Flames ᒪᑐᓯᓚᐅᖅᐳᑦ ᐊᖅᐱᒃ ᑎᑕᖕᓂᐅᔪᒥ ᐋᒍᔅᑎ 16−ᒥ ᓄᑖᓂ ᓂᔾᔮᑎᑦᑎᓂᐅᔪᒥ ᑎᑭᑉᐸᓪᓕᐊᔪᒥ ᑲᑎᙵᓂᐅᔪᒥ.

ᑎᑕᒃᑎᑦ, ᓴᓇᓯᒪᔪᒥ ᔮᔾᔨ ᐊᒻᒪ ᓯᐅᓪᓯ ᔫᓐᒥ, ᐃᓚᖃᓚᐅᖅᐳᖅ ᓯᕗᓪᓕᐅᔪᓂ ᐃᙱᐅᓯᖏᓐᓂ ᓴᓂᓕᐊᓂ ᐊᑐᐃᓐᓇᖃᖅᑎᑦᑎᓂᐅᔪᒥ Hugging the Cactus−ᒥ, ᐋᖅᑭᒃᑕᐅᓯᒪᔪᒥ ᓴᖅᑭᑎᑕᐅᓂᐊᕐᓂᖓᓂ ᑕᒪᑐᒪᓂ ᐅᑭᐊᒃᓵᖑᔪᒥ.

ᐊᖅᐱᒃ ᑎᑕᖕᓂᐅᔪᒥ ᓄᓇᕕᐅᑉ ᐃᒻᒥᓂᒃ-ᑕᐃᓯᒪᔪᒥ ᐊᖏᓛᖑᔪᒥ ᓂᔾᔮᑎᑦᑎᓂᕐᒧᑦ ᖁᕕᐊᓱᒍᑕᐅᔪᒥ. ᐊᐅᓚᓚᐅᖅᐳᖅ ᐋᒍᔅᑎ 13−ᒥ ᐋᒍᔅᑎ 16−ᒧᑦ, ᓴᖅᑭᔮᖅᑎᑦᑎᓪᓗᓂ ᐅᑭᐅᖅᑕᖅᑐᒥ ᐊᒻᒪ ᐅᖓᑖᓂ.

ᔮᔾᔨᐅᑉ ᐱᓕᕆᓕᒪᓂᖓᓂ ᐊᖅᐱᒃ ᑎᑕᖕᓂᐅᔪᒥ ᐅᕙᙶᖅᐳᖅ ᐊᑕᐅᓯᐅᔪᒥ ᓯᕗᓪᓕᖅᐸᐅᔪᓂ ᐊᕐᕌᒍᓂ ᖁᕕᐊᓱᒍᑕᐅᔪᒥ, 1990ᖏᓐᓂ ᓄᙳᐊᓂ.

“ᐃᓕᑦᑎᕋᑖᓚᐅᖅᐳᖓ ᑎᓴᒪᓂ ᑯᑭᑦᑕᐹᕐᓂᐅᔪᓂ, ᐊᒻᒪ ᐅᖃᓚᐅᖅᐳᖅ, ᐊᑏ, ᐱᓕᕆᓂᐊᖅᐸᕗᑦ,’” ᔮᔾᔨ ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ ᑎᑕᒃᑏᑦ ᓂᐱᖓᓂ ᖃᐅᔨᓴᓚᐅᖅᑎᓪᓗᒋᑦ ᐋᒍᔅᑎ 16−ᒥ, ᑭᖑᓪᓕᖅᐹᖑᔪᒥ ᐅᓪᓗᖓᓂ ᖁᕕᐊᓱᒍᑕᐅᔪᒥ.

“ᑲᑎᙵᐃᓐᓇᓚᐅᙱᓚᕋ; ᐱᐅᒍᑦᑎᐊᓚᐅᖅᐸᕋ ᖃᓄᖅ ᐱᙳᐊᓂᕐᒥ ᒪᓕᒃᑐᓄᑦ ᐊᕐᕌᒍᓄᑦ 15−ᓄᑦ.”

ᔮᔾᔨ ᐅᖃᓚᐅᖅᐳᖅ ᐱᒋᐊᓚᐅᖅᐳᖅ ᐱᓇᓱᐊᕐᓂᖓᓂ ᓂᔾᔮᑎᑦᑎᓂᕐᒥ ᐱᓪᓚᕆᒃᖢᓂ 2014−ᒥ, 30-ᖏᓐᓃᓕᖅᑎᓪᓗᒍ ᐊᒻᒪ ᔫᓐ 20 ᐃᓱᐊᓃᓕᖅᑎᓪᓗᒍ. ᓯᐅᓪᓯ ᐃᖅᑲᓇᐃᔭᓚᐅᖅᐳᖅ ᒐᕙᒪᑐᖃᒃᑯᓐᓄᑦ ᐊᒻᒪ ᐊᓈᓇᐅᓚᐅᖅᐳᖅ.

ᔮᔾᔨ, ᐃᙱᖅᑎ-ᑯᑭᑦᑕᐹᖅᑎ ᒪᕐᕉᔪᓂ ᐃᙱᖅᑎᓂ Twin Flames−ᑯᓐᓂ, ᐅᑎᖅᐳᑦ ᐊᖏᕐᕋᖓᓄᑦ ᓄᓇᓕᖓᓄᑦ ᐃᓄᒋᐊᖑᔪᓄᑦ ᑰᔾᔪᐊᕐᒧᑦ, ᑐᓴᕐᓂᕈᓱᒃᑐᑦ ᐃᙱᖃᑕᐅᓚᐅᖅᖢᑎᒃ ᐃᓄᒃᑎᑐᑦ. (ᐊᔾᔨᓕᐅᖅᑕᐅᔪᖅ ᓴᑐᕆᒃ ᒐᓛᓐᑦᒧᑦ)

ᔮᔾᔨ ᐅᑎᓚᐅᖅᐳᖅ ᐊᖅᐱᒃ ᑎᑕᖕᓂᐅᔪᒥ 2014−ᒥ ᐊᒻᒪ ᐊᓱᐃᓛᒃ ᐊᕐᕌᒍᑦ ᒪᕐᕉᒃ ᐊᓂᒍᖅᑎᓪᓗᒍ, ᐃᓚᒋᔭᐅᓕᖅᖢᓂ ᔫᓐᒧᑦ ᑎᑕᒃᑎᐅᓪᓗᑎᒃ.

ᑕᐃᒫᒃ ᐱᙳᐊᓲᖑᕗᖅ ᐅᑭᐅᖅᑕᖅᑐᒥ ᐃᒃᐱᖕᓇᐃᓐᓇᐅᔭᖅᐳᖅ ᐊᖏᕐᕋᒧᑦ ᑎᑭᓐᓂᖓᓂ, ᑎᑕᒃᑎᑦ ᐅᖃᖅᐳᑦ. ᔮᔾᔨ ᓄᓇᖃᓚᐅᖅᐳᖅ ᑰᔾᔪᐊᕐᒥ ᖃᔅᓯᒐᓚᖕᓄᑦ ᐊᕐᕌᒍᓄᑦ ᐊᒻᒪ ᒪᕐᕉᒃ ᕿᑐᕐᙵᖏᑦ ᑕᐃᑲᓂᕐᒥᐅᑕᐅᕗᑦ.

ᔫᓐ ᐱᒋᐊᓚᐅᖅᐳᖅ ᐃᖅᑲᓇᐃᔮᕆᔪᒪᔭᖓᓂ ᐱᙳᐊᖃᑎᖃᖅᖢᓂ ᔮᔾᔨᒥ ᐅᑭᐅᖅᑕᖅᑐᒥ.

“ᐅᑭᐅᖅᑕᖅᑐᖅ ᓴᓇᓪᓚᕆᓚᐅᖅᐳᑦ ᑎᑕᒃᑎᓂ Twin Flames−ᑯᓐᓂ,” ᐅᖃᓚᐅᖅᐳᖅ. ᓯᕗᓪᓕᖅᐸᐅᔪᒥ ᖁᙱᐊᖅᑕᐅᓂᐅᔪᒥ ᐳᕙᕐᓂᖅᑐᒥ ᐊᐳᒻᒥ ᖁᕕᐊᓱᒍᑕᐅᔪᒥ 2015−ᒥ.

ᑕᒪᑐᒪᓂ ᐊᐅᔭᐅᔪᒥ, ᐱᙳᐊᓚᐅᖅᐳᑦ ᐃᖃᓗᖕᓂ ᐊᓕᐊᓇᐃᑦ ᖁᕕᐊᓱᒍᑕᐅᔪᒥ, ᓄᓇᕗᑦ ᐅᓪᓗᖓᓂ ᖁᕕᐊᓱᒍᑕᐅᔪᒥ ᑲᖏᖅᖠᓂᕐᒥ ᐊᒻᒪ ᐱᙳᐊᖅᑐᒃᓴᐅᑕᐅᕗᑦ ᓴᓂᑭᓗᐊᕐᒥ ᐋᒍᔅᑎ ᓄᙳᐊᓂ.

“ᑕᒪᑐᒪᓂ ᐊᐅᔭᐅᔪᒥ ᓲᕐᓗ ᐅᑎᕐᓂᐅᔪᒥ ᐅᑭᐅᖅᑕᖅᑐᒥ ᐳᓚᕋᕐᓂᐅᔪᒥ ᐅᕙᑦᑎᓐᓄᑦ,” ᔫᓐ ᐃᔪᕋᓚᓚᐅᖅᐳᖅ.

“ᐅᑎᖅᖢᓂ ᐃᓂᐅᔪᒧᑦ ᐃᓄᐃᑦ ᑐᑭᓯᐅᒪᓂᖏᓐᓂ ᐅᖃᐅᓯᕐᒥ ᐃᙱᖅᑕᕐᓂ ᐊᒻᒪ ᖃᐅᔨᒪᓪᓗᑎᒃ ᐃᙱᐅᓯᓂ ᑲᒪᓇᕐᔪᐊᖅᐳᖅ.”

ᑎᑕᒃᑎᑦ ᐱᓕᕆᓚᐅᖅᐳᑦ ᖁᙱᐊᕐᕕᐅᔪᒥ ᑰᔾᔪᐊᕐᒥ ᑕᐃᑲᙵᓪᓚᕆᒃ ᓯᓈᓂ ᓄᓇᕐᒧᐊᒥ ᓂᔾᔮᑎᑦᑎᓂᕐᒥ ᖁᕕᐊᓱᒍᑕᐅᔪᒥ ᐳᕆᑎᔅ ᑲᓚᒻᐱᐊᒥ ᐃᑲᕐᕋᓂ 28−ᓂ ᐊᐅᓪᓛᕐᓂᐅᔪᒥ.

ᔮᔾᔨ ᐊᒻᒪ ᓯᐅᓪᓯ ᔫᓐ ᐱᙳᐊᖅᐳᑦ ᐊᖅᐱᒃ ᑎᑕᖕᓂᐅᔪᒥ ᐋᒍᔅᑎ 16−ᒥ ᐃᓄᒋᐊᖑᔪᓄᑦ ᑰᔾᔪᐊᕐᒥ ᑲᑎᓐᓂᐅᔪᒥ. (ᐊᔾᔨᓕᐅᖅᑕᐅᔪᖅ ᓴᑐᕆᒃ ᒐᓛᓐᑦᒧᑦ)

ᐅᑯᐊ ᐅᖓᓯᖕᓂᐅᔪᓂ ᑲᓇᑕᒥ ᐊᔪᕐᓇᖅᑐᒥ ᐃᓂᐅᔪᒥ ᐳᓚᕋᕐᓂᕐᒧᑦ, ᔮᔾᔨ ᐅᖃᓚᐅᖅᐳᖅ.

“ᓯᒥᓚᐅᙱᓚᒍᑦ ᐃᑲᕐᕋᓂ 30−ᓂᑦ,” ᐅᖃᓚᐅᖅᐳᖅ.

ᐃᓚᒋᐊᖅᓯᔪᒥ ᑕᐃᔅᓱᒥᖓ ᐊᒃᓱᕈᕐᓂᐅᔪᒥ ᐃᓄᑭᐸᓗᒃᑐᓂ ᐃᓄᒋᐊᖕᓂᐅᔪᓂ ᓇᒦᕈᓘᔭᖅᑐᓂ ᐅᑯᓂᖓ ᐅᖓᓯᒃᑐᒻᒪᕆᐊᓗᖕᓂ ᐅᖓᓯᖕᓂᐅᔪᓂ. ᑕᐃᒫᒃ Twin Flames ᐸᕐᓇᒃᐳᑦ ᐳᓚᕋᕐᓂᐊᕐᓂᕐᒥ ᔫᓇᐃᑎᑦ ᔅᑕᐃᑦᔅᓂᑦᑕᐅᖅ, ᐱᙳᐊᕐᓂᐅᔪᓂ Montana−ᒥ ᐊᒻᒪ North Carolina−ᒥ.

“ᕿᓯᐊᓂ ᐃᑳᕈᕕᑦ ᓯᓚᑖᓂ ᑭᒡᓕᐅᔪᒥ [ᔫᓇᐃᑎᑦ ᔅᑕᐃᑦᔅᓄᑦ] ᐃᕐᙲᓐᓇᑲᐅᑎᒋᒥ, ᐱᓕᕆᑦᑎᐊᕐᓃᑦ ᐃᓱᓕᕝᕕᖃᖅᐳᖅ,” ᔮᔾᔨ ᐅᖃᓚᐅᖅᐳᖅ.

ᑭᓯᐊᓂ, ᔮᔾᔨ ᐃᓚᒋᐊᖅᓯᓚᐅᖅᐳᖅ, ᐳᓚᕋᕐᓂᕐᒥ ᑲᓇᑕᒥ ᐊᒻᒪ ᑕᐅᑐᒃᑕᑐᐊᖃᑲᐃᓐᓇᕐᓂᕐᒥ ᓄᓇᖃᖅᑳᖅᓯᒪᔪᓄᑦ ᓄᓇᓕᐅᔪᓄᑦ ᓱᓕ ᓯᕗᓪᓕᐅᑎᑕᐅᖏᓐᓇᖅᐳᖅ.

“ᑕᑯᑎᑦᑎᓂᕐᒥ ᒪᒃᑯᒃᑐᓂ ᐱᔪᒪᓂᖃᕈᕕᑦ, ᐱᓕᕆᔪᓐᓇᖅᐳᑎᑦ ᐊᓕᐊᓇᐃᒋᕕᒡᔪᐊᖅᑕᕐᓂ ᐊᒻᒪ ᐃᓕᓯᓗᑎᑦ ᐃᓕᖕᓂ ᑕᖅᑲᐅᖓ ᐃᓱᒪᕗᖓ ᐱᒻᒪᕆᕐᔪᐊᖑᓂᖓᓂ,” ᔮᔾᔨ ᐅᖃᓚᐅᖅᐳᖅ.

ᐅᖃᐅᓯᐅᓪᓗᓂ ᔮᔾᔨᓄᑦ, ᒪᕐᕉᔪᓂ ᐃᙱᖅᑎᓂ ᑎᑭᑉᐸᓪᓕᐊᔪᒥ ᑲᑎᙵᓂᐅᔪᒥ ᐃᓚᖃᖅᐳᖅ ᐃᙱᐅᓯᒥ ᑖᖅᑐᒥ ᐃᙱᕐᓂᖃᖅᑐᓂ ᐊᒻᒪ ᓄᑖᖑᓂᐅᔪᒥ.

Hugging the Cactus ᓂᐱᓕᐅᖅᑕᐅᓚᐅᖅᐳᖅ ᐱᖓᓱᓂ ᐊᔾᔨᒌᙱᑦᑐᓂ ᓂᐱᓕᐅᕐᕕᓂᑦ, ᐊᑕᐅᓯᖅ ᐃᓚᖃᖅᑯᒥ ᐱᐅᓪ ᓂᐱᓕᐅᕆᕝᕕᒃ ᑲᓇᑕᒥ ᓂᔾᔮᑎᑦᑎᓂᕐᒥ ᐱᓕᕆᕝᕕᖕᒥ ᑳᓪᒍᕆᒥ, ᑎᑕᒃᑏᑦ ᓲᕐᓗ Rolling Stones, Fleetwood Mac ᐊᒻᒪ ᓃᐅᓪ ᔭᖕ ᓂᐱᓕᐅᕆᒪᐅᕐᓂᖏᓐᓂ ᑐᓴᕐᓂᕆᔭᐅᕐᔪᐊᖅᑐᓂ ᑲᑎᙵᓂᐅᔪᓂ.

“ᐱᙳᐊᕈᓐᓇᓚᐅᖅᐳᖓ ᓃᐅᓪ ᔭᖕ ᓈᔅᕕᐅᓪᒥ ᖁᑭᑦᑕᐹᖓᓐᓂ ᖃᔅᓯᐊᕐᔪᓂ ᐃᙱᐅᓯᐅᔪᓂ,” ᔮᔾᔨ ᐅᖃᓚᐅᖅᐳᖅ ᖁᕕᐊᖦᖢᓂ.

ᑎᑕᒃᑎᑦ ᓴᖅᑭᑎᑦᑎᓚᐅᖅᐳᑦ ᐱᖓᓱᓂ ᐃᙱᐅᓯᓂ ᑲᑎᙵᓂᐅᔪᒥ, ᐃᓚᖃᖅᑐᒥ ᓯᕗᓪᓕᖓᓂ House of the Rising Sun−ᒥ, ᓯᕗᓪᓕᐅᔪᒥ ᑎᑎᕋᖅᑕᐅᓂᑯᒥ ᐊᒻᒪ ᐱᙳᐊᖅᑕᐅᓪᓗᓂ Animals−ᓂ 1964−ᒥ.

ᐋᖅᑭᒃᓱᐃᓂᕐᒥ ᓴᖅᑭᑎᑦᑎᓂᐅᔪᒥ ᑲᑎᙵᓂᐅᔪᒥ ᔫᓅᒥ-ᓵᓚᖃᕋᓱᐊᕐᓂᐅᔪᒥ-ᓵᓚᖃᖅᑐᒥ ᔮᓐ “ᐲᑐᓪ” ᐸᐃᓕᒧᑦ.

Hugging the Cactus ᓴᖅᑭᑎᑕᐅᔪᒃᓴᐅᑕᐅᕗᖅ ᐅᒃᑐᐱᕆᒥ.