ᒪᕐᕉᖕᓂ ᐅᒥᐊᖅᑐᖅᑎᓂ ᑐᖁᔪᖃᖅᐳᖅ ᐅᖅᓱᖅᑑᕐᒥ ᖃᓄᐃᓐᓂᐅᔪᒥ
ᓄᓇᓕᒃ ᐃᓗᐃᓪᓕᕿᕗᑦ ᑐᖁᓂᐅᔪᓂ; ᐅᒥᐊᖅ ᐅᐃᔾᔮᖅᑐᒥ ᐱᒋᐊᖅᑎᑦᑎᕗᖅ ᕿᓂᕐᓂᕐᒥ−ᐊᒻᒪ−ᓴᐳᔾᔨᓂᐅᔪᒥ ᑭᐅᓂᐅᔪᒥ
ᒪᕐᕉᖕᓂ ᐊᖑᑎᓂ ᐅᖅᓱᖅᑑᒥ ᑐᖁᓚᐅᖅᐳᑦ ᐅᒥᐊᖅᑐᕐᓂᕐᒥ ᖃᓄᐃᓐᓂᐅᔪᒥ ᔪᓚᐃ 19−ᒥ. (ᑐᓴᒐᒃᓴᓕᕆᔨᒃᑯᑦ ᐊᔾᔨᖁᑎᖓ)
ᔨᐊᕝ ᐱᓚᑦᑎᐊᐃᒧᑦ – ᓄᓇᓕᖕᓂ ᑐᓴᒐᒃᓴᓕᐅᕐᓂᕐᒧᑦ ᐱᒋᐊᕈᑕᐅᔪᒥ ᑐᓴᒐᒃᓴᓕᐅᖅᑎ
ᓄᓇᓕᒃ ᐅᖅᓱᖅᑑᒥ ᐃᓗᐃᓪᓕᕿᕗᑦ ᐊᓯᐅᔨᓂᐅᔪᒥ ᒪᕐᕉᖕᓂ ᐊᖑᑎᓂ, ᑐᖁᓚᐅᖅᑐᓂ ᐅᒥᐊᖅᑐᕐᓂᕐᒥ ᖃᓄᐃᓐᓂᐅᔪᒥ ᔪᓚᐃ 19−ᒥ.
ᐸᓖᓯᒃᑯᑦ ᐊᒻᒪ ᕿᓂᕐᓂᕐᒥ−ᐊᒻᒪ−ᓴᐳᔾᔨᓂᐅᔪᒥ ᑲᑎᙵᓂᐅᔪᑦ ᓴᐳᔾᔨᓇᓱᐊᓚᐅᖅᐳᑦ ᐊᖑᑎᓂ ᐃᒫᓚᐅᖅᑎᓪᓗᒋᑦ ᐅᒥᐊᖓᓐᓂ ᐅᐃᔾᔮᓚᐅᕐᒪᑦ, ᐅᖃᓚᐅᖅᐳᖅ ᑯᕆᔅ ᐋᕐᒧᕐ, ᕿᓂᕐᓂᕐᒥ−ᐊᒻᒪ−ᓴᐳᔾᔨᓂᐅᔪᒥ ᐱᓕᕆᔨᐅᔪᖅ ᒐᕙᒪᑐᖃᒃᑯᑦ ᑲᑐᔾᔨᓪᓗᑎᒃ ᓴᐳᔾᔨᓇᓱᐊᕐᓂᕐᒥ ᐱᓕᕆᕝᕕᖓᓂ ᑐᕋᓐᑕᓐ, ᐋᓐᑎᐊᕆᐅᒥ
ᒪᕐᕉᒃ ᐊᖑᑏᒃ ᐃᓄᑐᐊᖑᓚᐅᖅᐳᑦ ᐅᒥᐊᕐᒥ ᑕᐃᔅᓱᒪᓂ, ᐅᖃᓚᐅᖅᐳᖅ.
“ᑲᓇᑕᒥ ᐸᓖᓯᒃᑯᑦ ᑕᑯᓚᐅᖅᐳᑦ ᒪᕐᕉᖕᓂ ᐃᓄᖕᓂ ᐃᒪᕐᒥ ᐊᒻᒪ ᐅᒥᐊᕐᒧᐊᑲᐅᖅᑐᓚᐅᖅᐳᑦ, [ᐊᒻᒪᓗ] ᓴᐳᔾᔨᓇᓱᐊᓚᐅᖅᐳᑦ,” ᐋᕐᒧᕐ ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ.
ᐸᓖᓯᒃᑯᑦ ᓄᓱᒃᓯᔪᓐᓇᓚᐅᖅᐳᑦ ᐊᑕᐅᓯᐅᔪᒥ ᐊᖑᑎᓂ ᐅᒥᐊᖓᓐᓄᑦ, ᑭᓯᐊᓂ ᑎᒡᓕᕐᓂᖃᓚᐅᙱᓚᖅ, ᐅᖃᓗᓚᐅᖅᐳᑦ ᑐᕋᓐᑕᓐᒧᑦ ᐃᖏᕐᕋᓯᑎᑦᑎᓂᕐᒥ ᑲᓇᑕᐅᑉ ᐃᒪᖓᓂᒃ ᒥᐊᓂᖅᓯᔩᑦ ᐃᑲᔪᖅᓱᐃᔨᐅᔪᓂ, ᐊᒻᒪ ᓄᓇᓕᖕᒥᐅᑦ ᐃᓚᐅᖃᑕᐅᓚᐅᖅᐳᑦ ᐊᒃᓱᕈᕈᑕᐅᔪᒥ.
ᕿᓂᕐᓂᖅ ᐃᓱᓕᓚᐅᖅᐳᖅ 9 ᐅᓐᓄᐸᓗᒃᑯᑦ ᐊᐃᑉᐸᖓ ᐊᖑᑎ ᓇᓂᔭᐅᒐᒥ ᑐᖁᖓᓪᓗᓂ.
ᑭᓇᐅᓂᖏᓐᓂ ᐊᖑᑎᓂ ᐅᖃᐅᓯᐅᓯᒪᙱᓚᑦ ᐱᔪᓐᓇᕐᓂᖃᖅᑎᐅᔪᓂ.
ᑐᑭᓯᓇᓗᐊᙱᓚᖅ ᖃᓄᐃᒻᒪᑦ ᐅᒥᐊᖅ ᐅᐃᔾᔮᓚᐅᕐᓂᖓᓂ, ᐋᕐᒧᕐ ᐅᖃᓚᐅᖅᐳᖅ.
“ᑲᓇᑕᒥ ᐸᓖᓯᒃᑯᑦᒪ ᐅᕙᑦᑎᓐᓄᑦ ᐅᖃᓗᖕᒪᑕ, ᑕᐃᒪᓐᓇ ᐅᖃᓚᐅᖅᐳᑦ: ᐅᒥᐊᖅ ᐅᐃᔾᔮᓚᐅᖅᐳᖅ ᐊᒻᒪ ᒪᕐᕉᒃ ᐃᓗᐊᓃᑦᑐᑦ ᐅᒥᐊᕐᒥ ᐃᒪᕐᒧᐊᓚᐅᖅᐳᑦ,” ᐅᖃᓚᐅᖅᐳᖅ.
“ᓱᒃᑲᔪᐊᓗᖕᒥ ᖃᓄᐃᓐᓂᖃᐅᖅᐳᖅ.… ᐊᖏᔪᐊᓘᙱᓚᖅ ᑭᓴᕐᕕᒃᓴᖅ, ᑕᐃᒫᒃ ᕿᓂᖅᓴᕐᕕᐅᑦᑎᐊᓚᐅᖅᐳᖅ.”
ᐅᓐᓄᖓᓂ ᔪᓚᐃ 19−ᒥ ᑕᐃᑯᖓ ᒪᓕᒃᑐᒥ ᐅᓪᓛᖓᓂ, ᐊᒥᓱᓂ ᐃᓄᖕᓂ ᑎᑎᕋᓚᐅᖅᐳᑦ ᐅᖃᐅᓯᒃᓂ ᐅᒡᒍᐊᕐᓂᕐᓂ ᐊᒻᒪ ᑐᒃᓯᐊᕐᓂᐅᔪᓂ ᓄᓇᓕᖕᒥᐅᑕᓄᑦ ᐅᖅᓱᖅᑑᒥ ᐃᓅᖃᑎᒌᖑᔪᓄᑦ ᓯᐊᒻᒪᖅᑎᑦᑎᕕᐅᔪᒥ.
ᖃᕋᓴᐅᔭᒃᑯᑦ ᑎᑎᕋᕐᓂᐅᔪᒥ ᕼᐋᒻᓚᒃᑯᑦ ᑎᑎᕋᕐᕕᖓᓂ ᓇᒃᓯᐅᔾᔭᐅᔪᒥ ᑭᒡᒐᖅᑐᐃᓪᓗᑎᒃ ᓄᓇᓕᖕᓂ ᐊᐅᓚᑦᑎᔨᐅᓚᐅᑲᒃᑐᒥ ᐃᓄᒃ ᐸᐅᓗᓯ ᐅᖃᓚᐅᖅᐳᖅ, “ᓄᒫᓇᖅᖢᓂ ᖃᓄᐃᓐᓂᐅᓚᐅᖅᐳᖅ ᐃᑉᐸᒃᓴᖅ ᐊᒻᒪ ᓄᓇᓕᓕᒫᖅ ᐃᓚᐅᖃᑕᐅᓚᐅᖅᐳᑦ ᓴᐳᔾᔨᓇᓱᐊᕐᓂᐅᔪᒥ ᒪᕐᕉᖕᓂ ᐃᓄᖕᓂ ᑲᑕᓚᐅᖅᑐᓂ ᐅᒥᐊᕐᒥ ᐃᒪᕐᒧᑦ.
“ᖃᐅᔨᒪᓂᐊᖅᐳᓯ ᐃᓄᐃᑦ ᐃᓚᐅᖃᑕᐅᔪᓂ ᐅᕙᓂ ᖃᓄᐃᓐᓂᐅᔪᒥ ᐃᓚᖃᐅᖅᐳᑦ ᐃᓚᖃᖅᑐᒥ ᕼᐋᒻᓚᒃᑯᑦ ᐃᖅᑲᓇᐃᔭᖅᑎᐅᔪᓂ ᐊᒻᒪ ᓂᕈᐊᖅᑕᐅᓯᒪᔪᓂ ᑲᑎᒪᔨᐅᔪᓂ ᐊᒻᒪ ᐊᒃᑐᐃᓴᕋᐃᓐᓂᐅᕗᖅ ᐅᖃᐅᓯᕆᔭᕆᐊᒃᓴᖅ.”
ᓯᐊᕋ ᑲᒥᒻᒪᓕᒃ, ᕿᓂᕐᓂᕐᒥ−ᐊᒻᒪ−ᓴᐳᔾᔨᓂᐅᔪᒥ ᓴᓇᔨᐅᔪᖅ ᐅᖅᓱᖅᑑᒥ, ᐅᖃᓚᐅᖅᐳᖅ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᐱᓂᕐᓗᒡᔪᐊᕐᓂᐅᔪᖅ ᐊᓯᐅᔨᓂᕐᔪᐊᖑᓚᐅᖅᐳᖅ ᑭᒃᑯᓕᒫᓄᑦ ᓄᓇᓕᖕᓂ 1,300−ᐸᓗᖕᓂ ᓄᓇᖃᖅᑎᐅᔪᓂ.
ᑎᑎᕋᓚᐅᖅᐳᖅ ᐅᖅᓱᖅᑑᒥ ᕿᓂᓂᕐᒧᑦ ᐊᒻᒪ ᓴᐳᔾᔨᔨᐅᔪᓄᑦ ᕙᐃᔅᐳᒃᑯᑦ ᑲᑎᙵᓂᐅᔪᒥ, ᖁᔭᓕᓪᓗᓂ ᑭᒃᑯᓕᒫᓂ ᐊᒃᓱᕈᓚᐅᕐᓂᖏᓐᓂ ᐃᓱᒪᒋᓇᒍ ᓄᒫᓇᖅᑐᒥ ᖃᓄᐃᓕᖓᓂᐅᔪᒥ, ᐊᒻᒪ ᐊᔭᐅᕆᕗᖅ ᐃᓄᖕᓂ ᐅᖃᖃᑎᒌᖕᓂᕐᒥ ᐃᑲᔪᖅᓱᐃᖃᑦᑕᐅᑎᓂᕐᒧᑦ.
“ᑕᒪᔅᓯᑦᑎᐊᖅ ᐱᓕᕆᑦᑎᐊᕐᔪᐊᓚᐅᖅᐳᓯ ᐅᓪᓗᒥ ᖃᓄᓕᒫᑦᑎᐊᖅ ᐱᓕᕆᓪᓗᓯ,” ᑎᑎᕋᕐᓂᐅᔪᖅ ᐅᖃᓚᐅᖅᐳᖅ.
“ᐃᖅᑲᐅᒪᓂᐊᖅᐳᓯ ᖃᓄᐃᓕᐅᕐᓂᕆᔭᔅᓯ ᐅᕙᓂ ᑐᓂᓯᓯᒪᕗᖅ ᒪᑐᓯᓂᐅᔪᒥ ᑕᒪᒃᑭᓗᒃᑖᖅ ᖃᓄᐃᓐᓂᐅᔪᒥ. ᐊᔪᕐᓇᖅᑐᐊᓘᕗᖅ ᐆᒥᖓ ᐊᑐᕐᓂᕐᒥ. ᑲᑎᙵᑦᑎᐊᖁᕙᔅᓯ. ᐅᖃᖃᑎᖃᕆᐊᖃᖅᐳᑎᑦ. ᐅᖃᖃᑎᒌᒡᓗᓯ. ᐃᓴᒡᓗᓯ ᓇᓕᐊᑐᐃᓐᓇᑦᑎᓐᓄᑦ ᑭᓱᑐᐃᓐᓇᒥᒃ ᐱᔭᕆᐊᖃᕈᔅᓯ. ᐆᒻᒪᑎᒐ ᐃᓕᔅᓯᓐᓃᑉᐳᖅ ᑕᒪᒃᑭᓕᒫᔅᓯᓐᓄᑦ.”
ᓄᓇᕗᒻᒥ ᑲᓇᑕᒥ ᐸᓖᓯᒃᑯᑦ ᑭᐅᓚᐅᙱᓚᑦ ᑐᒃᓯᕋᕐᓂᐅᔪᒥ ᐅᖃᐅᓯᒃᓴᓕᐅᕐᓂᕐᒧᑦ.
(0) Comments