ᐅᓪᓕᕕᖕᒥ ᐋᓐᓂᐊᕕᓕᐊᖅᓯᒪᔪᖅ ᐱᔭᕆᐊᓕᖕᒥ ᑲᐃᓪᓗᐊᕈᑎᒥᒃ ᐃᒡᓗᕈᓯᓕᐊᕈᔾᔭᐅᕗᖅ ᐃᑦᑎᕐᕕᖕᒥ ᑲᓕᔾᔪᑎᒥᒃ

For English version, see Ullivik patient needing wheelchair taken to room on luggage cart

ᐋᓐᓂᐊᕕᓕᐊᖅᓯᒪᔪᖅ ᑐᔪᕐᒥᔪᒥ ᑯᐸᐃᖕᒥ ᑐᔪᕐᒥᕕᐅᕙᒃᑐᒥ ᐊᖏᕐᕋᕆᔭᐅᔪᒥ ᐅᖃᖅᐳᖅ ᐅᓯᔭᐅᓚᐅᕐᓂᖓᓂ ᐃᒡᓗᕈᓯᖓᓄᑦ ᐃᑦᑎᕐᕕᖕᒥ ᑲᓕᔾᔪᑎᒥᒃ ᑲᐃᓪᓗᐊᕈᑎᓂ ᐊᑐᐃᓐᓇᐅᓚᐅᙱᒻᒪᑕ.

ᔮᓐ ᒌ ᓴᐃᓐᑦ−ᐊᐅᐱᓐ, ᑲᖏᖅᓱᐊᓗᔾᔪᐊᕐᒥᐅᑕᖅ, ᖃᓪᓗᓈᑦ ᓄᓇᖓᓐᓄᑦ ᖃᖓᑕᒐᔪᒃᐳᖅ ᐱᓂᕐᒥ ᑳᓐᓱᒧᑦ ᐃᓅᓕᓴᖅᑕᐅᓂᕐᒧᑦ ᒪᓐᑐᕆᐊᑉ ᐃᓂᐅᔪᒥ. ᑕᐃᒪᓐᓇᑎᑐᑦ ᐊᒥᓱᓂ ᐊᓯᖏᓐᓂ ᐆᓐᓂᐊᕕᓂᐊᖅᑐᓄᑦ ᓄᓇᕕᖕᒥ, ᑐᔪᕐᒥᓲᖑᕗᖅ ᐅᓪᓕᕕᖕᒥ ᑐᐊᕚᓪ, ᑯᐸᐃᖕᒥ, ᑐᓂᓯᕙᒃᑐᒥ ᐊᖏᕐᕋᕆᔭᐅᓚᐅᑲᖕᓂᐊᖅᑐᒥ ᐃᓄᖕᓄᑦ ᐊᕕᒃᑐᖅᓯᒪᓂᐅᔪᒥ ᕿᓂᖅᑐᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᔭᐅᓂᐅᔪᒥ ᖃᓪᓗᓈᑦ ᓄᓇᖓᓐᓂ.

ᓴᐃᓐᑦ−ᐊᐅᐱᓐ, 76, ᐅᖃᓚᐅᖅᐳᖅ ᑎᑭᓚᐅᖅᐳᖅ ᐅᓪᓕᕕᖕᒧᑦ ᒫᔾᔨ 1−ᒥ ᑕᖃᐃᖅᓯᕐᓂᐊᕈᒪᓪᓗᓂ ᒪᓕᒃᑐᒥ ᑕᖃᓇᕐᔪᐊᖅᑐᒥ ᐆᑕᖅᑕᐅᓂᐅᔪᒥ ᐅᐸᒃᓯᒪᓚᐅᕐᓂᖓᓂ. ᑭᓯᐊᓂ ᑎᑭᓐᓇᒥ, ᑲᐃᓪᓗᐊᕈᑎ ᓴᓂᕐᕙᒐᓱᒋᓚᐅᖅᑕᖓᓂ ᐱᔭᐅᓚᐅᕐᓂᖓᓂ.

“ᑕᖃᖓᒐᓚᓚᐅᖅᐳᖓ ᐊᒻᒪ ᐱᓱᒍᓐᓇᙱᓐᓇᒪ, ᐅᖃᓚᐅᖅᐳᖓ, ‘ᐊᒡᔭᖅᓯᔪᓐᓇᕈᑎᒃ ᐅᓯᑲᑦᑕᖅᑕᐅᔪᓂ ᐆᒥᖓ, ᐃᓄᖕᓂ ᐊᒡᔭᖅᓯᔪᓐᓇᕆᕗᑦ,’” ᐅᖃᓚᐅᖅᐳᖅ.

“ᑲᐃᓪᓗᐊᕈᑎᖃᓚᐅᖅᐳᖓ, ᐃᓕᔭᕆᐊᖃᓚᐅᖅᐸᕋ ᐅᐊᑦᑎᔨᐅᔪᓄᑦ ᑐᓄᐊᓂ ᓴᓂᕐᕙᒃᓴᑕᐅᓯᒪᓂᐊᕐᒪᑦ… ᑭᓯᐊᓂ ᑕᐃᔅᓱᒪᓂ ᐃᖅᑲᓇᐃᔮᒥᓂᒃ ᐱᓕᕆᓚᐅᙱᓚᖅ ᐊᒻᒪ ᐊᓯᐊᓂ ᐱᔭᐅᓚᐅᖅᐳᖅ.”

ᓯᕗᓪᓕᖅᐸᐅᙱᖦᖢᓂ ᑭᓇᑐᐃᓐᓇᖅ ᐱᔪᓐᓇᓚᐅᙱᓐᓂᖓᓂ ᑲᐃᓪᓗᐊᕈᑎᒥᒃ ᐱᔭᕆᐊᖃᖅᑎᓪᓗᒋᑦ, ᓴᐃᓐᑦ−ᐊᐅᐱᓐ ᐅᖃᓚᐅᖅᐳᖅ.

ᐅᖃᓚᐅᖅᐳᖅ ᑕᑯᓯᒪᕗᖅ ᐊᓯᖏᓐᓂ ᐃᓄᖕᓂ ᐊᑲᖅᓴᙱᑦᑐᓂ ᐅᓪᓕᕕᖕᒥ ᐃᖅᑲᓇᐃᔭᖅᑎᓂ ᐊᐱᕆᒑᖓᒥᒃ ᑲᐃᓪᓗᐊᕈᑎᒥᒃ ᐊᒻᒪ ᐅᖃᐅᔾᔭᐅᓪᓗᑎᒃ ᓈᒻᒪᒃᑐᓂ ᐊᑐᐃᓐᓇᖃᙱᓐᓂᖏᓐᓂ.

“ᐅᓄᖅᓯᕙᓪᓕᐊᔪᓂ ᐃᓄᖕᓂ ᐃᓐᓇᕈᖅᐸᓪᓕᐊᔪᓂ, ᐊᒻᒪ ᐅᓄᕐᓂᖅᓴᐃᑦ ᐃᓄᖕᓂ ᖃᓂᒻᒪᒃᐸᒃᑐᓂ,” ᐅᖃᓚᐅᖅᐳᖅ.

“ᐱᑕᖃᖅᐳᖅ ᖃᔅᓯᓂ … ᑕᓪᓕᒪᓂ 6−ᓂᓪᓘᓐᓃᑦ ᑲᐃᓪᓗᐊᕈᑎᓂ ᐅᑯᓄᖓ, ᖃᔅᓯᓄᑦ ᐃᓄᖕᓄᑦ?”

ᓴᐃᓐᑦ−ᐊᐅᐱᓐ ᐅᖃᓚᐅᖅᐳᖅ ᑕᒪᒃᑭᒐᓚᖓᓂ, ᐅᓪᓕᕕᒃ ᐃᒻᒥᓄᑦ ᐱᑦᑎᐊᖅᓯᒪᕗᑦ. ᐅᖃᓚᐅᖅᐳᖅ ᐱᔨᑦᑎᕋᕐᓂᖅ ᐱᐅᒐᔪᒃᐳᖅ ᐊᒻᒪ ᐃᖅᑲᓇᐃᔭᖅᑎᖏᑦ ᐃᑲᑦᑐᕆᒃᐳᑦ.

ᐊᖏᕐᕋᓚᐅᖅᑎᓪᓗᒍ ᑲᖏᖅᓱᐊᓗᔾᔪᐊᕐᒧᑦ, ᐅᑎᖅᑐᒃᓴᐅᓚᐅᖅᐳᖅ ᐅᓪᓕᕕᖕᓄᑦ ᑕᒪᑐᒪᓂ ᐱᓇᓱᐊᕈᓯᐅᔪᒥ ᐃᓅᓕᓴᖅᑕᐅᒃᑲᓐᓂᕆᐊᖅᑐᕐᓗᓂ.

ᑭᓯᐊᓂ, ᐱᕈᖅᓴᐃᔪᒪᕗᖅ ᐅᔾᔨᕈᓱᖕᓂᐅᔪᒥ ᐃᒡᓗᕐᔪᐊᖅ ᐱᔭᕆᐊᖃᖅᐳᑦ ᐅᓄᕐᓂᖅᓴᐅᔪᓂ ᑲᐃᓪᓗᐊᕈᑎᓂᑦ ᓇᓗᓇᐃᖅᓯᓂᕐᒥ ᐊᓯᖏᓐᓂ ᐃᓄᑐᖃᑦ ᐊᒻᒪ ᐃᓄᖕᓂ ᐊᐅᓚᔪᓐᓇᕐᓂᕐᒧᑦ ᐊᑲᐅᙱᓕᐅᕈᑎᖃᖅᑐᓄᑦ ᖃᓪᓗᓈᑦ ᓄᓇᖓᓐᓄᐊᖅᐸᒃᑐᓂ ᐃᓗᐊᖅᓴᕐᓂᖃᕐᓂᖏᓐᓂ ᐱᔭᕆᐊᓕᖏᓐᓂ.

“ᐱᕕᖃᑦᑎᐊᖅᐳᒍᑦ ᑕᐃᒪᐃᑦᑐᖃᕐᓂᕐᒥ, ᑕᒪᓐᓇ ᐅᕙᑦᑎᓐᓄᑦ, ᐃᓄᐃᑦ ᐅᑭᐅᖅᑕᖅᑐᒥᐅᑕᐅᔪᑎᒍᑦ. ᐅᖃᐱᓗᙱᓚᖓ,” ᓴᐃᓐᑦ−ᐊᐅᐱᓐ ᐅᖃᓚᐅᖅᐳᖅ.

“ᐃᓄᒃ ᐊᐅᓚᔪᓐᓇᙱᑦᑎᐊᒻᒪᕆᒃᐸᑦ, ᖃᓄᕐᓕ ᐃᒡᓗᕈᓯᖓᓄᐊᕐᓂᐊᖅᐸ? ᐃᓱᒪᒃᑭᐅᓴᕈᒪᙱᓚᖓ, ᐱᔭᕆᐊᖃᕐᓂᑐᐃᓐᓇᐅᕗᖅ.”

ᓄᓇᕕᖕᒥ ᐊᕕᒃᑐᖅᓯᒪᓂᐅᔪᒧᑦ ᑲᑎᒪᔨᐅᔪᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐊᒻᒪ ᐃᓄᓕᕆᓂᕐᒥ ᐅᖃᖅᑎᐅᔪᖅ ᓇᓗᓇᐃᖅᓯᓚᐅᖅᐳᖅ ᓴᐃᓐᑦ−ᐊᐅᐱᓐ ᖃᓄᐃᓕᖓᓂᖓᓂ ᐅᖃᐅᓯᒃᓴᓕᐊᖑᔪᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᖏᓐᓄᑦ ᐊᒻᒪ ᐅᖃᓚᐅᖅᐳᖅ ᐅᓪᓕᕕᒃ 8−ᓂ ᑲᐃᓪᓗᐊᕈᑎᖃᖅᐳᑦ ᐊᑐᐃᓐᓇᖃᖅᐳᑦ ᐅᑎᖅᑕᖅᐸᓪᓕᐊᔪᒥ ᐊᑐᖅᑕᐅᕙᒃᑐᓂ.

“ᐃᒃᓯᕚᕈᒪᓕᒃᑲᓐᓂᖅᑎᓪᓗᒍ ᑲᐃᓪᓗᐊᕈᑎᒥ, ᑲᐃᓪᓗᐊᕈᑎᑦ ᕿᓚᒻᒥᐅᔪᒥ ᐊᑐᖅᑕᐅᓚᐅᖅᐳᑦ ᐊᓯᖏᓐᓂ ᐊᐅᓚᔪᓐᓇᙱᑦᑎᐊᒻᒪᕆᒃᑐᓄᑦ,” ᐅᖃᓚᐅᖅᐳᖅ ᐅᖃᖅᑎᐅᔪᖅ ᑳᑦᓖᓐ ᐴᓕᓐ ᓴᐃᓐᑦ−ᐊᐅᐱᓐ ᑐᕌᖓᔪᒥ ᖃᓄᐃᓕᖓᓂᖓᓂ.

“ᐊᑐᓂ ᐱᓕᕆᔾᔪᔾᔭᐅᕙᒃᑐᖅ ᖃᐃᖁᔭᐅᕗᑦ ᐊᑐᕐᓂᕐᒥ ᐱᓕᕆᔾᔪᑕᐅᔪᓂ ᐅᑲᐅᓈᕆᔪᓐᓇᕐᓂᕐᒥ ᖃᓄᐃᓐᓂᖏᓐᓂ, ᐅᕝᕙᓘᓐᓃᑦ ᓇᓗᓇᐃᖅᓯᓂᕐᒥ ᐱᔭᕆᐊᓕᖏᓐᓂ ᐅᕝᕙᓘᓐᓃᑦ ᐊᓯᔾᔨᖅᓯᓂᕐᒥ ᖃᓄᐃᓐᓂᖓᓂ ᐅᓪᓕᕕᒃ ᐃᖅᑲᓇᐃᔭᖅᑎᐅᔪᑦ ᐃᑲᔪᖅᓱᐃᔪᓐᓇᕐᓂᐊᕐᒪᑕ ᓈᒻᒪᒃᑐᒥ.”

ᐴᓕᓐ ᐅᖃᓚᐅᖅᐳᖅ ᐅᓪᓕᕕᒃ ᓂᕆᐅᒃᐳᑦ ᑎᓴᒪᒃᑲᓐᓂᕐᓂ ᑲᐃᓪᓗᐊᕈᑎᓂ ᑐᓂᔭᐅᓛᕐᓂᖏᓐᓂ ᕿᓚᒻᒥᐅᔪᒥ.