ᐅᒥᐅᔭᖅᒧ ᒪᐃᔭ ᐋᓐᓂᐊᕕᖕᒦᑦᑐᓐᓃᖅᑐᖅ ᐋᓐᓂᖅᓱᖅᑕᐅᓚᐅᖅᑎᓪᓗᒍ

For English version, see Umiujaq mayor discharged from hospital, recovering after attack

ᐋᓐᓂᖅᓱᖅᑕᐅᓚᐅᖅᑎᓪᓗᒍ ᐱᓇᓱᐊᕈᓯᐅᓚᐅᕐᑐᒥ, ᐅᒥᐅᔭᖅᒧ ᒪᐃᔭ ᑕᐃᕕᑎ ᓴᐸ ᐋᓐᓂᐊᕕᖕᒥ ᐊᓂᑎᑕᐅᕗᖅ ᐊᒻᒪ ᒪᒥᓴᑦᑎᐊᓕᖅᖢᓂ, ᓇᔭᖓ ᒥᐊᓕ ᓴᐸ ᐅᖃᓚᐅᕐᑐᖅ.

ᑕᐃᕕᑎ ᓴᐸ ᐊᖏᕐᕋᖓᓂ ᐋᓐᓂᖅᓱᖅᑕᐅᓚᐅᕐᓯᒪᖕᒪᑦ ᔫᓂ 23-ᖑᑎᓪᓗᒍ, ᓄᓇᕕᒃᒥ ᐸᓖᓯᒃᑯᑦ ᑐᓴᒐᒃᓴᑎᒍᑦ ᐅᖃᐅᓯᕆᓚᐅᕐᑕᖓ ᑖᓐᓇ ᖃᓄᐃᓕᐅᕈᑎᕕᓂᖅ.

47-ᓂ ᐊᕐᕌᒍᓕ ᐃᖅᑲᓇᐃᔭᖅᑎ ᑎᒍᔭᐅᓚᐅᕐᓯᒪᔪᖅ ᐊᒻᒪ ᐸᓯᔭᒃᓴᙳᖅᑎᑕᐅᓪᓗᓂ ᐋᓐᓂᖅᓱᐃᕆᓂᕐᒧᑦ ᐊᒻᒪ ᐃᓵᓚᐅᕐᓂᖓᓄᑦ, ᐸᓖᓯᒃᑯᑦ ᐅᖃᖅᑐᐃᑦ.

ᐃᖅᑲᖅᑐᐃᕕᒃᒧᐊᓚᐅᕐᓯᒪᔪᖅ ᔫᓂ 25-ᒥ.

ᐋᓐᓂᖅᓱᖅᑕᐅᓚᐅᖅᑎᓪᓗᒍ ᓴᐸ ᖃᖓᑕᓲᒃᑯᑦ ᐋᓐᓂᐊᕐᕕᓕᐊᖅᑎᑕᐅᓚᐅᕐᓯᒪᔪᖅ, ᓯᕗᓪᓕᖅᒥ ᐳᕕᕐᓂᑐᖅᒧᑦ ᐊᒻᒪ ᒪᓐᑐᕆᐊᒧᑦ ᑲᒪᒋᔭᐅᒃᑲᓐᓂᕐᓂᐊᕐᒪᑦ. ᐸᓖᓯᒃᑯᑦ ᐅᖃᓚᐅᕐᑐᑦ “ᐊᒃᓱᐊᓗᒃ” ᐋᓐᓂᖅᓱᖅᑕᐅᓚᐅᕐᓂᖓᓂᒃ.

ᐋᓐᓂᐊᕐᕕᐊᓗᖕᒥ ᐊᔾᔨᙳᐊᖓ, ᑐᓂᔭᐅᓂᑯ ᓴᐸᐅᑉ ᐃᓚᖏᓐᓄᑦ, ᓴᖅᑭᑎᑦᑎᓯᒪᔪᖅ ᑕᐃᕕᑎ ᓴᐸᒥ ᐅᓄᕈᓘᔭᖅᑐᓂ ᐊᒦᒐᓚᒃᓯᒪᓂᖓᓂ ᐊᒻᒪ ᓱᙴᔭᒐᓚᒃᖢᓂ ᑮᓇᖓᒍᑦ ᓂᐊᖁᐊᒍᓪᓗ, ᐊᒻᒪᓗ ᒥᕐᓱᖅᑕᐅᓯᒪᓪᓗᓂ ᑕᓕᖅᐱᐊᓂ ᐃᔨᖓᒍᑦ ᐊᒻᒪ ᖃᓂᖓᑕ ᖁᓕᑦᑎᐊᖓᒍᑦ.

ᐊᓂᑎᑕᐅᓚᐅᕐᑐᖅ ᐋᓐᓂᐊᕕᐊᓗᒃᒥ ᔫᓂ 26-ᖑᑎᓪᓗᒍ ᐊᒻᒪᓗ ᒫᓐᓇ ᑐᔪᕐᒥᕕᒃᒦᖢᓂ ᒪᓐᑐᕆᐊᒥ, ᒥᐊᓕ ᓴᐸ ᑎᑎᕋᓯᒪᓚᐅᕐᑐᖅ ᕙᐃᔅᐳᒃᑯᑦ ᓄᓇᑦᓯᐊᒥ ᐱᕙᓪᓕᐊᔪᓄᑦ.

“ᓯᓂᑲᑕᐃᓐᓇᖅᑐᖅ,” ᐅᖃᕐᑐᖅ, ᐅᖃᒃᑲᓐᓂᖅᖢᓂ ᓘᒃᑖᓄᑦ ᖃᐅᔨᓴᖅᑕᐅᑲᑕᐃᓐᓇᕐᓂᕋᖅᖢᓂᐅᒃ ᐊᒻᒪ ᖃᐅᔨᓴᖅᑕᐅᕝᕕᖃᖅᖢᓂ ᔫᓂ 28-ᒥ.

ᒥᐊᓕ ᓴᐸ ᐳᕕᕐᓂᑐᖅᒥᐅᑕᖅ ᐊᒻᒪᓗ ᐅᐸᒍᓐᓇᓚᐅᙱᖢᓂᐅᒃ ᐊᓂᖓ ᐋᓐᓂᐊᕕᐊᓗᒃᒦᑎᓪᓗᒍ. ᐅᖃᖅᖢᓂ “ᖁᕕᐊᓱᑦᑎᐊᖅᑐᖓ ᐊᓂᒐ ᖃᓄᐃᑦᑐᓐᓃᕐᒪᑦ.”

ᐅᖃᕈᓐᓇᓚᐅᙱᑦᑐᖅ ᖃᖓ ᑕᐃᕕᑎ ᓴᐸ — ᓂᕈᐊᖅᑕᐅᓂᑯ ᒪᐃᔭᐅᓂᕐᒧᑦ 2021-ᒥ — ᐃᖅᑲᓇᐃᔮᒥᓄᑦ ᐅᑎᕐᓂᐊᕆᐊᒃᓴᖓᓂ.

ᑕᐃᒪᐃᓐᓂᖓᓄᑦ ᑖᓐᓇ ᖃᓄᐃᓕᐅᖅᑕᐅᓂᖓ ᐃᖅᑲᓇᐃᔭᕐᕕᒃᒥ ᐊᒃᑐᐃᒻᒪᕆᓚᐅᕐᑐᖅ ᐅᕙᓂ ᐅᒥᐅᔭᖅᒥ ᑎᑎᕋᖅᕕᖓᒥ,

ᐊᑯᓕᐊ ᐊᓄᕙᒃ, ᓄᓇᓕᖕᓂ ᐊᐅᓚᑦᑎᔨᒧᑦ ᐃᑲᔪᖅᑎ ᐅᖃᓚᐅᕐᑐᖅ ᐅᖄᓚᐅᑎᒃᑯᑦ ᔫᓂ 26-ᖑᑎᓪᓗᒍ ᐊᒥᓱᕈᓘᔭᐃᑦ ᐃᖅᑲᓇᐃᔭᖅᑎᑦ ᓄᖃᖓᓯᒪᓂᖏᓐᓂ ᑕᐃᒪᐃᑕᐅᓚᐅᖅᑎᓪᓗᒍ.

ᐱᓕᕆᐊᖓ ᐊᒃᑐᐊᓂᖃᙱᒃᑲᓗᐊᖅᑎᓪᓗᒍ ᐃᖅᑲᓇᐃᔭᖅᑎᓄᑦ ᐊᑭᓕᐅᑎᒃᓴᓕᕆᓂᕐᒥ, ᐊᓄᕙᒃ ᐅᖃᓚᐅᕐᑐᖅ ᑖᔅᓱᒥᖓ ᐱᓕᕆᐊᖃᕆᐊᖃᓕᕐᓂᖓᓂ.

“ᐃᓄᐃᑦ ᐊᑭᓕᖅᑕᐅᔭᕆᐊᖃᕐᒪᑕ, ᐊᒻᒪᓗ ᐃᑲᔪᕆᐊᖃᖅᖢᖓ ᑖᒃᑯᓂᖓ,” ᐅᖃᕐᑐᖅ.

ᐅᖃᒃᑲᓐᓂᖅᖢᓂ: “ᐅᓇ ᓄᓇᕗᑦ ᒪᑐᐃᖓᔭᕆᐊᖃᕐᒪᑦ, ᓲᖃᐃᒻᒪ ᒪᑐᒍᓂ ᐅᑯᐊ ᐃᒥᖅᑕᐅᑎᑦ ᐃᖏᕐᕋᔪᓐᓃᕋᔭᕐᒪᑕ, ᑭᓱᓕᒫᓪᓗ ᓄᖃᖓᓕᕐᓗᑎᒃ.”

ᐊᓄᕙᒃ ᑭᐅᑲᑕᒍᒪᔪᓐᓃᓚᐅᕐᑐᖅ ᐊᐱᖅᑯᑎᒋᔭᐅᔪᓂᒃ.

ᐅᒥᐅᔭᖅᒧᑦ ᑮᓇᐅᔭᓕᕆᔨ ᐲᑕ ᑐᑲᓗᒃ ᐅᖃᓪᓚᒍᒪᓚᐅᙱᒻᒥᔪᖅ ᖃᓄᐃᓕᐅᕈᑎᕕᓂᕐᓂ ᐊᒻᒪᓗ ᖃᓄᐃᓕᕐᒪᖔᑕ ᐱᔨᑦᑎᕋᐅᑎᒋᔭᐅᔪᑦ ᓄᓇᓕᖕᓄᑦ.