ᔫᓂᐊᕈᖅᓯᒪᔪᑦ ᓄᓇᕗᒻᒥ ᒐᕙᒪᒃᑯᓐᓂ ᓴᓇᔨᐅᔪᑦ ᐊᖏᓪᓚᕆᒃᐳᑦ ᐊᕐᕌᒍᓄᑦ−4-ᓂ ᑳᓐᑐᕌᒃᒥ

For the English version of this story, please see Unionized GN workers ratify 4-year contract.

ᑮᓇᐅᔾᔭᒃᓴᓂᕐᒥ ᐊᖏᒡᓕᒋᐊᖅᑕᐅᒃᑲᓐᓂᕐᓂᐅᔪᓂ, ᐅᖃᐅᓯᕐᒧᑦ ᐊᑭᓕᐅᑕᐅᒃᑲᓐᓂᖅᐸᒃᑐᓄᑦ ᐊᒻᒪ ᑕᖃᐃᖅᓯᕐᓂᕐᒧᑦ ᐱᓕᕆᓂᐅᔪᓂ ᐃᓚᒋᔭᐅᕗᑦ ᓵᓚᖃᕐᓂᐅᔪᓂ ᓄᓇᕗᒻᒥ ᐃᖅᑲᓇᐃᔭᖅᑎᓄᑦ ᔫᓂᐊᓐᑯᑦ ᖁᕕᐊᓱᒍᑎᖃᕐᓂᖏᓐᓂ ᐊᖏᖃᑎᖃᓪᓚᕆᓚᐅᖅᑎᓪᓗᒋᑦ ᓄᑖᖑᔪᒥ ᐃᖅᑲᓇᐃᔭᖅᑎᓄᑦ ᐊᖏᕈᑕᐅᓯᒪᔪᒥᑦ ᓄᓇᕗᒻᒥ ᒐᕙᒪᒃᑯᓐᓂ.

ᔫᓂᐊᓐ ᐅᖃᐅᓯᖃᓚᐅᖅᐳᑦ ᑎᓯᐱᕆ 4−ᒥ ᕙᐃᔅᐳᒃᑯᑦ ᐃᓚᒋᔭᐅᔪᑦ ᓂᕈᐊᖅᓯᒪᓂᖏᓐᓂ ᐊᖏᖅᓯᓂᕐᒥ ᑳᓐᑐᕌᖑᔪᒥ.

ᐊᕐᕌᒍᓄᑦ-ᑎᓴᒪᓄᑦ ᑳᓐᑐᕌᒃ, ᐊᒃᑐᐃᓯᒪᔪᒥ 4,000−ᐸᓗᖕᓂ ᓄᓇᕗᒻᒥ ᐃᓄᓕᒫᓄᑦ ᐱᔨᑦᑎᕋᖅᑎᓂ, ᐃᓱᓕᓐᓂᐊᖅᐳᖅ ᓯᑎᐱᕆ 30, 2028−ᒥ. ᐃᓇᖏᖅᓯᕗᖅ ᐃᖅᑲᓇᐃᔭᖅᑎᓄᑦ ᐊᖏᕈᑕᐅᓯᒪᔪᒥᑦ ᐃᓱᓕᓚᐅᖅᑐᒥ ᐃᓱᐊᓂ ᓯᑎᐱᕆ 2024−ᒥ.

“ᑐᓴᑲᑕᒃᐳᒍᑦ ᐃᓚᒋᔭᐅᔪᓂ ᐊᒻᒪ ᖁᕕᐊᓱᑦᑎᐊᖅᐳᑦ,” ᐅᖃᓚᐅᖅᐳᖅ ᔭᐃᓴᓐ ᕉᓵᓐ, ᔫᓂᐊᓐᑯᑦ ᐊᖓᔪᖅᑳᖓ, ᐊᐱᖅᓱᖅᑕᐅᓂᐅᔪᒥ.

ᖄᒃᑲᓐᓂᐊᒍᑦ 9%−ᒥ ᑮᓇᐅᔾᔭᒃᓴᓂᐅᔪᒥ ᐊᖏᒡᓕᒋᐊᕐᓂᐅᔪᒥ ᐅᖃᐅᓯᐅᓚᐅᖅᑐᒥ ᐊᕐᕌᓂ ᐊᑐᓕᓚᐅᖅᑐᒥ ᓯᑎᐱᕆ 2024−ᒥ, ᖁᕝᕙᕆᐊᕐᓂᐅᔪᓂ ᐋᖅᑭᒃᓱᖅᑕᐅᓯᒪᓚᐅᖅᐳᑦ ᐊᒥᐊᒃᑯᖓᓂ ᐊᕐᕌᒍᓄᑦ ᐱᖓᓱᓄᑦ ᐱᓕᕆᓂᐅᔪᒥ: 3%−ᒥ 2025−ᒧᑦ — ᐊᑐᖅᑕᐅᔪᖅ ᑭᖑᓂᖓᒍᑦ ᐅᒃᑐᐱᕆ 1−ᒥ ᑕᒪᑐᒧᖓ ᐊᕐᕌᒎᔪᒧᑦ — ᐊᒻᒪᓗ 3%−ᒥ 2026−ᒧᑦ, ᐊᒻᒪ 2.5%−ᒥ 2027−ᒧᑦ.

ᐅᑭᐅᖅᑕᖅᑐᒥ ᐃᓚᒋᐊᕈᑎᖓ — ᐊᔾᔨᒌᙱᑦᑕᑦᑐᓂ ᐃᖅᑲᓇᐃᔮᒧᑦ ᐊᒻᒪ ᐃᓂᖓᓂ — ᐋᖅᑭᒃᑕᐅᓯᒪᕗᑦ ᐊᖏᒡᓕᒋᐊᕐᓂᐊᕐᓂᖓᓂ 2%-ᒥ ᐊᕐᕌᓂᐅᓂᐊᖅᑐᒥ ᐊᒻᒪ 3%−ᒥ 2027−ᒥ.

ᐃᓄᒃᑐᑦ ᐅᖃᐅᓯᕐᒧᑦ ᐊᑭᓕᐅᑕᐅᒃᑲᓐᓂᖅᐸᒃᑐᓄᑦ ᐊᖏᒡᓕᒋᐊᕐᓂᐊᕆᕗᑦ ᑕᒪᒃᑭᓂ ᐱᖓᓱᓂ ᑭᒡᓕᐅᔪᓂᑦ ᐅᖃᕈᓐᓇᑦᑎᐊᕐᓂᕐᓄᑦ. ᐃᖅᑲᓇᐃᔭᖅᑏᑦ ᕿᓂᖅᑐᓂ ᖃᐅᔨᓴᖅᑕᐅᓂᐅᔪᒥ ᐃᓄᒃᑐᑦ ᐅᖃᕈᓐᓇᑦᑎᐊᕐᓂᖏᓐᓂ ᖃᐅᔨᓴᖅᑕᐅᔭᕆᐊᖃᖅᐳᑦ ᐃᓗᐊᓂ ᑕᖅᑭᓂ 6−ᓂ.

“ᐃᓕᖕᓂ ᖃᐅᔨᓴᖅᓯᔪᓐᓇᙱᑉᐸᑕ ᑕᖅᑭᓂ 6−ᓂ, ᐱᑲᐅᑎᒋᓯᑲᐅᑎᒋᐊᖅᐳᑦ ᐅᖃᐅᓯᕐᒧᑦ ᐊᑭᓕᐅᑕᐅᒃᑲᓐᓂᖅᐸᒃᑐᓄᑦ ᐃᓄᒃᑎᑐᑦ ᐃᖅᑲᓇᐃᔭᕐᕕᖕᒥ ᐅᑎᕐᕕᐅᔭᕆᐊᖃᖅᐳᑦ ᐊᒻᒪ ᐃᖅᑲᓇᐃᔭᖅᑎᖁᑎᓕᒃ ᐱᓕᕆᑦᑎᐊᕐᓂᖅᓴᐅᔭᕆᐊᖃᖅᐳᖅ [ᖃᐅᔨᓴᕐᓂᕐᒥ ᐃᖅᑲᓇᐃᔭᖅᑎᓂᑦ],” ᕉᓵᓐ ᐅᖃᓚᐅᖅᐳᖅ.

ᑳᓐᑐᕌᒃ ᑭᐅᒋᕗᖅ ᐊᑲᐅᙱᓕᐅᕈᑕᐅᔪᓂ ᐃᖅᑲᓇᐃᔭᑲᐃᓐᓇᖅᑐᓄᑦ ᐃᖅᑲᓇᐃᔭᖅᑎᐅᔪᓄᑦ. ᐃᖅᑲᓇᐃᔭᑲᐃᓐᓇᖅᑐᑦ, ᐃᖅᑲᓇᐃᔭᖅᑎᑕᐅᔪᓂ ᕿᓚᒻᒥᐅᔪᒥ ᐊᑐᕐᓂᖃᐅᑎᓂᑦ, ᓅᑦᑐᓐᓇᖅᐳᑦ ᐊᑯᓂᐅᓂᖅᓴᐅᔪᒧᑦ ᐃᖅᑲᓇᐃᔮᖃᕐᓂᕐᒥ ᐅᖓᕙᕆᐊᖅᑕᐅᒍᑎᒃ ᑕᖅᑭᑦ ᑎᓴᒪᐃᑦ ᐅᖓᑖᓄᑦ.

ᐊᒻᒪᓗᑦᑕᐅᖅ, ᐃᓚᖃᖅᐳᖅ ᐃᓚᒋᐊᖅᓯᓂᐅᔪᒥ ᐱᔭᕆᐊᓕᖕᒥ ᑕᖃᐃᖅᓯᕐᓂᐅᔪᒥ ᐱᓕᕆᓂᐅᔪᒥ ᐃᑲᕐᕋᓪᓗᐊᓂ 8−ᓂ ᐃᖅᑲᓇᐃᔭᓕᒃᑲᓐᓂᓚᐅᙱᓐᓂᖏᓐᓂ — ᑕᒪᓐᓇ ᕉᓵᓐ ᐅᖃᓚᐅᖅᐳᖅ ᑭᐅᔪᒥ ᑕᖃᓗᐊᖃᑦᑕᕐᓂᕐᒧᑦ.

“ᐃᓄᐃᑦ ᑕᖃᐃᖅᓯᕆᐊᖃᖅᐳᑦ ᐊᒻᒪ ᖃᓄᐃᙱᑦᑎᐊᕆᐊᖃᖅᐳᑦ ᐊᒻᒪ ᐊᑦᑕᓇᖅᑐᒦᒋᐊᖃᙱᓚᑦ ᐃᖅᑲᓇᐃᔭᕐᕕᖕᒥ,” ᕉᓵᓐ ᐅᖃᓚᐅᖅᐳᖅ.

ᐊᖏᖅᑕᐅᓪᓚᕆᖕᓂᐅᔪᖅ ᐃᓚᖏᓐᓂ ᐊᑭᕋᖅᑐᖅᑕᐅᓚᐅᖅᐳᖅ.

ᐋᓂᒃᔅ ᒪᑳᓇᓯ, ᔫᓂᐊᓐᑯᑦ ᐊᕕᒃᑐᖅᓯᒪᓂᐅᔪᒥ ᐊᖓᔪᖅᑳᑉ−ᑐᒡᓕᕆᔭᖓ ᐃᖃᓗᖕᓄᑦ, ᐊᓂᑕᐅᓚᐅᖅᐳᖅ ᐊᑐᕐᓂᖃᐅᑎᖓᓐᓂ ᐅᖃᓪᓚᐅᓯᖃᓚᐅᖅᑎᓪᓗᒍ ᐃᓱᒫᓘᑕᐅᔪᓂ ᐊᖏᖅᑕᐅᓇᓱᐊᖅᑐᒧᑦ. ᓄᕕᐱᕆᒥ, ᐅᖃᓚᐅᖅᐳᖅ ᑮᓇᐅᔾᔭᒃᓴᓂᕐᒥ ᐊᒻᒪᓗ ᐅᑭᐅᖅᑕᖅᑐᒥ ᐃᓚᒋᐊᕈᑎᖓᓂ ᐊᖏᒡᓕᒋᐊᖅᑕᐅᓂᖓ “ᐊᒥᒐᓗᐊᖅᐳᖅ” ᓱᒃᑲᓂᖓᓂ ᓱᓇᑐᐃᓐᓇᐃᑦ ᐊᑭᑦᑐᖅᐸᓪᓕᐊᓂᖏᓐᓂ.

“ᐅᖃᓪᓚᒍᒪᙱᓚᖓ ᐃᓕᖅᑯᓯᕆᔭᖓᓂ ᐊᒻᒪ ᓂᐱᖓᓂ ᐊᒻᒪ ᐅᖃᓪᓚᐅᓯᖓᓂ,” ᕉᓵᓐ ᐅᖃᓚᐅᖅᐳᖅ ᑭᐅᓂᐅᔪᒥ ᐊᐱᖅᑯᑕᐅᔪᒥ ᒪᑳᓇᓯᒥ.

ᕉᓵᓐ ᐅᖃᓚᐅᖅᐳᖅ ᔫᓂᐊᓐ ᕿᓚᒻᒥᐅᔪᒥ ᐱᓂᐊᖅᐳᑦ ᑐᒃᓯᕋᐅᑕᐅᔪᓂ ᓄᑖᖑᔪᒧᑦ ᐊᖓᔪᖅᑳᑉ−ᑐᒡᓕᖓᓄᑦ.

ᒪᑳᓇᓯ, ᑭᓯᐊᓂ, ᐅᖃᓚᐅᖅᐳᖅ ᑎᓯᐱᕆ 5−ᒥ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ ᐃᒻᒥᓂᒃ ᐊᒻᒪ ᐊᓯᖏᓐᓂ ᔫᓂᐊᓐᒥ ᐃᓚᒋᔭᐅᔪᑦ ᑭᐅᔭᐅᔪᒪᕗᑦ ᑕᐃᔭᖓᓂ “ᐱᔭᕇᖅᓯᒪᔭᕆᐊᓕᖕᓂ ᐊᒻᒪ ᐱᓕᕆᓂᐅᔪᓂ ᐊᑭᓕᐅᑎᓂᑦ ᐊᑭᓕᖅᑕᐅᔭᕆᐊᓕᖕᓂ ᐊᒻᒪ ᐊᓯᖏᓐᓂ ᐊᑐᖅᑕᐅᔪᑦ ᑭᖑᓂᖓᒍᑦ ᑮᓇᐅᔭᓕᕆᓂᕐᒧᑦ ᐋᖅᑭᒋᐊᖅᑕᐅᓂᐅᔪᓄᑦ.”

“ᑕᑯᒃᓴᐅᓂᖃᑦᑎᐊᖅᑐᒥ ᐊᒻᒪ ᐱᓕᕆᑎᑦᑎᓂᕐᓂ ᐋᔩᖃᑎᒌᖕᓂᐅᔪᒥ ᐅᕙᓂ ᐱᓕᕆᓂᐅᔪᒥ ᐱᓪᓚᕆᐅᕗᖅ ᐋᖅᑭᐅᒪᑎᑦᑎᓂᕐᒥ ᐅᒃᐱᕈᓱᖕᓂᐅᔪᒥ ᐊᒻᒪ ᓇᓗᓇᐃᖅᓯᓂᕐᒥ ᐃᓚᒋᔭᐅᔪᑦ ᐅᒃᐱᕈᓱᑦᑎᐊᕐᓂᖏᓐᓂ ᖃᓄᐃᓕᖓᓂᐅᔪᓂ ᓂᕈᐊᕐᓂᐅᔪᓂ ᐊᑐᓕᖅᑎᑕᐅᓂᖏᓐᓂ ᐋᔩᖃᑎᒌᖕᓂᐅᔪᒥ,” ᒪᑳᓇᓯ ᐅᖃᓚᐅᖅᐳᖅ.

ᑐᓴᐅᒪᔾᔪᑎᒃᓴᐃᑦ ᓄᑖᖑᔪᒥ ᐊᖏᕈᑎᒥᒃ ᐊᑐᐃᓐᓇᐅᕗᖅ ᐅᕘᓇ ᐊᖏᓪᓚᕆᖕᓂᐅᔪᒥ ᑲᑎᙵᓂᐅᔪᒥ ᔫᓂᐊᓐᑯᑦ ᓇᒃᓯᐅᔾᔨᓚᐅᕐᓂᖓᓂ ᐃᓚᒋᔭᖏᓐᓄᑦ.

ᓄᓇᕗᒻᒥ ᒐᕙᒪᒃᑯᑦ ᐃᖅᑲᓇᐃᔭᒻᑐᓕᕆᔨᒃᑯᖏᑦ, ᐅᖃᐅᓯᖃᓚᐅᖅᑐᒥ ᐊᖏᕈᑕᐅᓇᓱᐊᖅᑐᒥ ᑎᑭᐅᑎᔭᐅᑎᓪᓗᒍ ᓯᑎᐱᕆᒥ, ᑐᓂᓯᓚᐅᙱᓚᖅ ᐅᖃᐅᓯᒃᓴᓕᐊᒥᒃ ᐊᖏᕈᑕᐅᓪᓚᕆᒃᑐᒥ ᐱᓕᕆᓂᐅᔪᒥ.