ᐅᖂᑕᖅ ᑕᓪᓕᒪᓂ ᓇᑎᓕᖕᒥ ᐃᒡᓗᕐᔪᐊᕐᒥ ᓴᓇᔪᒪᔪᑦ

For English version, see Uquutaq proposes new 5-storey affordable housing, commercial building

ᐅᖂᑕᖅ ᑲᑐᔾᔨᖃᑎᒌᑦ ᐋᖅᑭᒃᓱᐃᕙᓪᓕᐊᖕᒪᑕ ᐸᕐᓇᐅᑎᒃᓴᓂ ᓴᓇᔪᒪᓂᕐᒧᑦ ᑕᓪᓕᒪᓂ ᓇᑎᓕᖕᒥ, ᐊᔾᔨᒌᙱᑦᑐᓄᑦ ᐊᑐᖅᑕᐅᓇᔭᖅᑐᒥ ᐃᒡᓗᕐᔪᐊᕐᒥ ᐊᒻᒪ ᐱᓕᕆᕝᕕᒃᓴᒥ ᐃᖃᓗᐃᑦ ᕿᑎᕐᐸᓯᐊᓂ.

ᑭᓯᐊᓂᓕ ᓄᓇᓕᐸᐅᔭᐃᑦ ᐃᖃᓗᖕᓂ ᓱᓕ ᒪᑐᐃᕐᓯᓚᐅᙱᒻᒪᑕ ᐊᑭᑦᑐᕋᐅᑎᒃᓴᓂ ᓄᓇᒧᑦ ᐅᖂᑕᒃᑯᑦ ᓴᓇᕝᕕᒋᔪᒪᔭᖓᓂ, ᑖᓐᓇᓗ ᓄᓇ ᒫᓃᖢᓂ ᑯᐃᓐ ᐃᓕᓴᐱ ᕗᐃ ᓄᐊᑦᒫᑦ ᐊᒻᒪ ᐋᑎᒃ ᐸᓐᓱᔅ ᐊᑯᓐᓂᖓᓂ ᑕᐃᔭᐅᔪᒥ ᐋᑦᑯ (ATCO) ᓘᑉ, ᑕᒫᓂ ᑖᒃᑯᐊ ᑲᒻᐸᓃᑦ ᐱᖁᑎᖃᕐᒪᑕ.

ᓄᓇᓕᐸᐅᔭᐃᑦ ᐃᖃᓗᖕᓂ ᑐᒃᓯᕋᐅᑎᓂ ᑐᓂᓯᔪᒪᔪᑦ ᓴᓇᔪᒪᓂᕐᒥ ᒫᓂ ᓄᓇᒥ ᐊᑐᖅᑕᐅᓂᐊᖅᑐᒥ ᑮᓇᐅᔭᓕᐅᕋᓱᒐᑎᒃ. (ᐊᔾᔨᙳᐊᖅ ᐃᖃᓗᐃᑦ ᓄᓇᓕᐸᐅᔭᖓᓂ)

ᑭᐊᕕᓐ ᐄᑕᓐ, ᐅᖂᑕᒃᑯᑦ ᐊᐅᓚᑦᑎᔨ ᑐᑭᒧᐊᖅᑎᒃᓴᖓᑦ, ᑐᓴᖅᑎᑦᑎᓚᐅᕐᑐᖅ ᑐᒃᓯᕋᐅᓯᐊᕆᔭᐅᔪᒥ ᓄᓇᓕᖕᓂ ᑲᑎᒪᑎᑦᑎᑎᓪᓗᒋᑦ ᐅᖂᑕᒃᑯᑦ ᑐᑭᒧᐊᖅᑎᑦᑎᔨᖏᑦ ᐅᒃᑑᐱᕆ 21-ᒥ.

“ᐅᓇ ᐱᓕᕆᐊᒃᓴᖅ ᐋᖅᑭᒃᓯᒪᔪᖅ ᐊᑭᓕᒐᕐᓂᖅᑐᓂᒃ ᐃᒡᓗᓕᐅᕈᒪᓪᓗᑎᑦ ᐃᓄᖕᓄᑦ ᐃᓚᒌᓄᑦ ᐊᒻᒪ ᐃᒻᒥᒃᑰᖓᔪᓂᑦ ᐃᓱᒪᒋᓪᓗᒋᑦ ᐃᒡᓗᑖᕆᐊᖃᖅᑐᓂ ᐊᑯᓂᕈᓗᒡᓗ ᐊᑐᖅᑕᐅᔪᓐᓇᕋᔭᖅᑐᓂ,” ᐄᑕᓐ ᐅᖃᕐᑐᖅ.

ᑐᒃᓯᕋᐅᑎᐅᔪᒪᔪᖅ ᐃᒡᓗᕐᔪᐊᒃᓴᖅ ᐃᓚᖃᕐᓂᐊᖅᑐᖅ ᐃᓯᕆᐊᕐᕕᖓᑕ ᓇᑎᖓᓂ ᓴᓇᕝᕕᖃᕐᓗᓂ ᑐᕌᖓᓪᓗᓂ ᓄᓇᓕᖕᓂ ᑮᓇᐅᔭᓕᐅᕋᓱᓂᕐᒨᙱᑦᑐᖅ ᑲᑐᔾᔨᖃᑎᒌᓄᑦ.

ᖁᓛᓃᑦᑐᓪᓕ ᓇᑏᑦ 60 ᑎᑭᓪᓗᒍ ᐊᖏᕐᕋᖅᓴᕆᔭᐅᓂᐊᕐᓗᑎᒃ ᐊᔾᔨᒌᙱᑦᑐᓂ ᐅᓄᕐᓂᖃᕐᓗᑎᒃ ᐃᒡᓗᕈᓯᕐᓂ ᒫᙵᑦ ᐊᑕᐅᓯᕐᒥ, ᒪᕐᕉᖕᓂ, ᐱᖓᓱᓂᓪᓘᓐᓃᑦ ᐃᒡᓗᕈᓯᖃᕐᓂᐊᖅᑐᓂ.

ᐄᑕᓐ ᐅᖃᓚᐅᕐᑐᖅ ᖃᓄᐃᓕᖓᓂᐊᕐᓂᖏᑦ “ᐱᓕᕆᐊᖑᕙᓪᓕᐊᓕᕐᑐᑦ.”

ᐃᓚᖏᑦ ᖃᓄᐃᓕᖓᓂᐊᕐᓂᖏᑦ ᐃᓚᖃᕐᑐᖅ ᐃᓄᒋᐊᒃᑐᒃᑯᕕᒃᓴᖃᖅᖢᓂ, ᐊᒻᒪᓗ ᐅᒥᐊᓄᑦ, ᖃᒧᑕᐅᔭᓄᑦ ᐊᒻᒪ ᑎᓴᒪᓕᖕᓄᑦ ᐃᓂᒃᓴᖃᕐᓂᐊᖅᖢᓂ.

ᓇᓕᐊᒃ ᐄᑕᓐ, ᐅᓇᓘᓐᓃᑦ ᐅᖂᑕᒃᑯᑦ ᐊᐅᓚᑦᑎᔨ ᑐᑭᒧᐊᖅᑎᑦᑎᔨᖓᑦ ᓘᕈᓪ ᒪᑰᕆᔅᑕᓐ, ᐅᖃᕈᓐᓇᓚᐅᙱᑦᑑᒃ ᖃᓄᖅ ᐊᑯᓂᐊᑎᒋᓇᔭᕐᒪᖔᑦ ᐱᓕᕆᐊᖑᓗᓂ ᐅᕝᕙᓘᓐᓃᑦ ᖃᔅᓯᑐᕋᔭᕐᒪᖔᑦ ᐱᓕᕆᐊᒃᓴᖅ.

ᐅᖂᑕᖅ ᐅᑕᕿᔪᑦ ᑐᓂᓯᓐᓇᐅᓛᖅᑐᒥᓐ ᑐᒃᓯᕋᐅᓯᐊᓂ ᐱᔪᒪᓕᕐᐸᑕ ᓄᓇᓕᐸᐅᔭᐃᑦ ᐃᖃᓗᖕᓂ.

ᓄᓇ ᓴᓇᕝᕕᐅᔪᒪᔪᖅ ᐃᓚᒋᔭᐅᔪᖅ ᓄᓇᓕᐸᐅᔭᐃᑦ ᐸᕐᓇᒃᓯᒪᔭᖏᓐᓂ ᑕᒫᓂ ᓄᓇᓂ, ᐊᖏᖅᑕᐅᓚᐅᕐᓯᒪᓪᓗᓂᓗ ᐃᖃᓗᐃᑦ ᓄᓇᓕᐸᐅᔭᓄᑦ ᑲᑎᒪᔨᓄᑦ ᐊᕐᕌᓂᐅᓚᐅᕐᑐᖅ.

ᐃᓚᒋᔭᐅᓪᓗᓂ ᐸᕐᓇᐅᓯᐊᕆᔭᐅᓯᒪᔪᒥᒃ, ᓄᓇᓕᖕᓄᑦ ᐸᕐᓇᐃᔩᑦ ᒥᑭᒃᑑᑎᐅᓂᕐᓴᓂᒃ ᓄᓇᓂ ᐋᖅᑭᒃᑕᐅᓯᒪᔪᓂ ᑲᑎᑎᑦᑎᓪᓗᑎᒃ ᐱᖓᓱᙳᖅᑎᑦᑎᓚᐅᕐᑐᑦ ᐊᖏᓂᕐᓴᐅᓕᖅᖢᑎᒃ ᐃᓂᒋᔭᐅᔪᓐᓇᖅᑐᓂ ᐅᓄᕐᓂᕐᓴᓄᑦ ᐃᒡᓗᒃᓴᓄᑦ.

ᓄᓇᓕᐸᐅᔭᐃᑦ ᐱᒡᒍᓴᐅᑎᑎᑦᑎᓚᐅᕐᑐᑦ ᒪᕐᕉᖕᓂ ᓄᓈᖕᓂ ᐃᒡᓗᓕᐅᕐᕕᒃᓴᓂ ᐊᑐᖅᑐᐊᖅᑎᑦᑎᓪᓗᑎᒃ ᒫᓐᓇ ᐊᑐᖅᑐᐊᖅᑐᓂᒃ ᓴᓇᕝᕕᐅᔪᓐᓇᖅᖢᓂ ᐃᓱᒪᒋᔭᐅᔪᒥ, ᑭᓯᐊᓂᓕ ᓄᓇ ᐃᓚᖓ ᐅᐊᖕᓇᖅᐸᓯᐊᑕ ᑲᓇᖕᓇᖓᓂ ᒪᑐᐃᖅᑕᐅᓂᐊᖅᑐᑦ ᐃᒡᓗᓕᐅᕐᕕᐅᔪᓐᓇᕐᓗᓂ ᑮᓇᐅᔭᓕᐅᕋᓱᙱᓐᓂᕐᒧᑦ ᐃᒡᓗᓕᐅᕈᒪᔪᓄᑦ.

ᐃᓚᖏᑦ ᑕᒫᓂ ᓄᓇᒥ ᖃᐅᔨᓴᖅᑕᐅᕙᓪᓕᐊᔪᑦ ᖃᓄᐃᓕᖓᓂᖏᓐᓂᑦ ᐊᒻᒪ ᐆᒃᑐᕋᖅᑕᐅᒃᑲᓐᓂᕐᓗᓂ, ᐱᓕᕆᔪᓪᓗ ᐱᐊᓂᖕᓂᐊᕋᓱᒋᔭᐅᓪᓗᑎᒃ ᓄᕕᐱᕆᒥᑦ, ᐅᖃᕐᑐᖅ ᔨᐊᕝ ᐴᓐ, ᐃᖃᓗᐃᑦ ᓄᓇᓕᐸᐅᔭᓄᑦ ᐅᖃᖅᑎᒋᔭᐅᔪᖅ. ᐱᓕᕆᐊᖑᔪᕐᓕ ᐱᐊᓂᒃᑕᐅᒃᐸᑦ ᑕᐃᒪᓕ ᓄᓇᓕᐸᐅᔭᐃᑦ ᑐᒃᓯᕋᐅᑎᓂ ᐱᔪᒪᓕᕐᓂᐊᖅᖢᑎᒃ.

“ᖃᐅᔨᓴᓱᖃᑦᑕᖅᑐᓂᓪᓕ ᐊᑭᑦᑐᕋᐅᑎᔪᒪᓇᔭᕐᑐᓂᑦ, ᓄᓇᓕᐸᐅᔭᐃᑦ ᓇᓕᐊᓐᓂ ᐅᖃᖃᑎᖃᖅᓯᒪᙱᑦᑐᑦ ᐊᔾᔨᒌᒃᑎᑦᑎᓂᐊᕈᒪᓂᕐᒧᑦ ᐊᒻᒪ ᐱᒡᒍᓴᐅᑎᑦᑎᐊᕈᓐᓇᖁᓪᓗᒋᑦ,” ᐴᓐ ᐅᖃᕐᑐᖅ.

“ᐊᑭᑦᑐᕋᐅᑎᔪᒥᓇᕐᑐᑦ, ᐃᓚᒋᔭᐅᓪᓗᓂ ᐅᖂᑕᖅ, ᑐᓴᐅᒪᔭᐅᔭᕆᐊᓕᖕᓂ ᑐᓴᐅᒪᑎᑕᐅᓂᐊᕐᒥᔪᑦ. ᓄᓇᓕᐸᐅᔭᐃᑦ ᐊᔪᙱᑦᑐᓂ ᐱᓇᓱᖕᓂᐊᖁᔨᔪᑦ, ᑕᐃᒪᓐᓇ ᐱᓕᕆᓂᐊᕐᒥᖕᒪᑕ ᓄᑖᓂᑦ ᐊᒻᒪ ᐋᖅᑭᒃᓯᒫᓂᒃᑐᑎᑐᓂᓪᓗ ᑲᑐᔾᔨᖃᑎᒌᑐᓂ.”