ᐅᖂᑕᖅ ᑲᑐᔾᔨᖃᑎᒌᑦ ᐸᕐᓇᐅᑎᓕᐊᕆᓚᐅᖅᑕᖏᓐᓂᒃ ᓄᑖᒥ ᐊᖏᕐᕋᖃᙱᒃᑐᒃᑯᕕᒃᒥ ᓴᓇᔪᒪᓂᕐᒧᑦ ᐃᖃᓗᖕᓂ ᓄᖅᑲᖅᑎᑦᑎᕗᑦ
ᑲᑐᔾᔨᖃᑎᒌᑦ ᐅᖃᖅᑐᖅ ᐅᑯᐊ ᓄᓇᕗᒥᑦ ᒐᕙᒪᒃᑯᑦ ᐃᑲᔪᕈᑎᒃᓴᓂᒃ ᑐᓂᓯᔾᔮᙱᓐᓂᖏᓐᓂᒃ
ᐅᖂᑕᖅ ᑲᑐᔾᔨᖃᑎᒌᑦ ᐸᕐᓇᐅᑎᒋᓚᐅᖅᑕᖓ ᐅᓇ ᐊᖑᑎᓄᑦ ᐊᖏᕐᕋᖃᙱᑦᑐᒃᑯᕕᐅᓚᐅᕐᑐᖅ ᐃᖃᓗᖕᓂ ᐋᖅᑭᒃᓱᖅᑕᐅᔪᒪᓪᓗᓂ ᐊᕐᓇᓄᓪᓗ ᑕᒪᐃᓐᓄ ᐊᖏᕐᕋᖃᙱᑦᑐᑯᕕᐅᓂᐊᓕᕐᓗᓂ ᓄᖅᑲᖅᑎᑕᐅᑐᐃᓐᓇᓕᓚᐅᖅᑐᖅ ᐃᑲᔫᑎᒃᓴᖃᙱᓗᐊᕐᓂᖓᓄᑦ. (ᐅᔾᔨᙳᐊᖁᑎᖓ ᑕᐃᕕᑦ ᕕᐊᓐ)
For an English version of this story, see Uquutaq Society withdraws plan to open new homeless shelter in Iqaluit
ᐃᖃᓗᖕᓂ ᐅᖂᑕᖅ ᑲᑐᔾᔨᖃᑎᒌᑦ ᐸᕐᓇᐅᑎᒋᓚᐅᖅᑕᖏᓐᓂᒃ ᒫᓐᓇ ᐊᑐᔾᔮᙱᓚᐅᑲᒃᑐᑦ ᒫᓂ ᓯᒡᔭᖅᐸᓯᖕᒦᑦᑐᒥ ᐅᖃᖅᖢᑎᒃ ᐃᑲᔫᑎᒃᓴᖅᑖᖅᓯᒪᙱᓐᓂᖏᓐᓄᑦ ᓄᓇᕗᒥᑦ ᒐᕙᒪᒃᑯᓐᓂ.
“ᐊᑭᓕᒃᓴᖃᕐᓗᑕ ᐊᐅᓚᑦᑎᔪᓐᓇᔾᔮᙱᓐᓇᑦᑕ,” ᐅᖃᖅᑐᖅ ᓘᕈᓪ ᒪᒃᑯᕆᔅᑕᓐ, ᑲᑐᔾᔨᖃᑎᒌᓄᑦ ᐊᐅᓚᑦᑎᔨ.
ᑖᒃᑯᐊ ᑲᑐᔾᔨᖃᑎᒌᑦ ᖃᖓᑦᑎᐊᓵᖅ ᐱᓇᓱᒍᑎᖏᓐᓂᒃ ᓄᓇᓕᐸᐅᔭᓂᒃ ᐆᒥᖓ ᐊᖑᑎᓄᑦ ᐃᒡᓗᖃᙱᑦᑐᒃᑯᕕᐅᓚᐅᕐᑐᖅ ᓴᓇᔭᐅᓂᐊᕐᓗᓂ 42-ᓂ ᐃᒡᓕᖃᕐᓗᓂ ᑕᒪᐃᓐᓄ ᐊᖑᑎᓄᑦ ᐊᒻᒪ ᐊᕐᓇᓄᑦ. ᐊᒻᒪᓗ ᑕᒪᒃᑯᓂᖓ ᐋᖓᔮᖅᑐᓂᒃ ᐃᓗᐊᓃᑎᑦᑎᔾᔪᑎᐅᕙᒡᓗᓂ.
ᑐᒃᓯᕋᐅᑎᓕᐊᕆᔭᖓᑦ ᑭᒃᑯᑐᐃᓐᓇᕐᓂᒃ ᐅᖃᓪᓚᖃᑎᖃᑲᑕᖕᓂᒃᑰᖓᓚᐅᕐᑐᖅ ᐊᒻᒪᓗ ᑭᒃᑯᓕᒫᓂᒃ ᑲᑎᒪᑎᑦᑎᔾᔪᑎᐅᓛᕐᓗᓂ ᑕᒪᑐᒪᓂ ᑕᖅᑭᒥᓐ.
ᑖᒃᑯᐊ ᑲᑐᔾᔨᖃᑎᒌᑦ ᒫᓐᓇ ᐊᐅᓚᑦᑎᔪᑦ 60-ᓂ ᐃᒡᓕᖃᖅᑐᒥᓐ ᐊᖏᕐᕋᖃᙱᑦᑐᒃᑯᕕᖕᒥᑦ ᐊᒻᒪᓗ ᐊᖏᕐᕋᖃᕐᕕᖃᖅᖢᑎᒃ ᐃᒡᓗ 1077-ᒥᑦ ᐊᒻᒪᓗ 1079-ᒥᑦ ᐊᒻᒪᓗ ᐅᕙᓂ 534-ᒥ ᐋᖓᔮᖅᑐᓄᑦ ᐅᐸᒡᕕᐅᔪᓐᓇᖅᖢᓂ.
ᒪᒃᑯᕆᔅᑕᓐ ᐅᖃᓚᐅᕐᑐᖅ ᑲᑐᔾᔨᖃᑎᒌᑦ ᐊᐱᕆᓚᐅᖅᓯᒪᓂᕋᖅᖢᓂᒋᑦ ᐃᓄᓕᕆᔨᒃᑯᓐᓄᑦ — ᑖᒃᑯᐊᓕ 85 ᐳᓴᓐᑎᖓᓂ ᐃᑲᔫᑎᖃᖅᑎᑦᑎᕙᒃᖢᑎᒃ ᐊᐅᓚᔾᔪᑎᓂᒃ — ᒪᐅᓇ $1.3 ᒥᓕᐊᓐ, ᑭᓯᐊᓂᓕ ᑐᓂᔭᐅᓚᐅᖅᖢᑎᒃ $821,000. ᐅᓇᓕ ᖁᕝᕙᒃᐹᓪᓕᖅᓯᒪᔪᖅ ᐅᕙᙵᑦ $671,000 ᐊᕐᕌᓂ ᐱᓚᐅᖅᑕᖓᓂᒃ.
“ᐊᖏᓚᐅᕐᓯᒪᒐᑦᑕ ᑲᒪᒋᔭᖃᕐᓂᐊᕐᓗᑕ ᐊᖏᕐᕋᖃᙱᑦᑐᒃᑯᕕᒃᒥ ᐅᑯᑎᒎᓇᖅ ᐃᓄᓕᕆᔨᑎᒍᑦ, ᐊᖏᕈᑎᖃᖅᖢᑕ ᐱᓕᕆᐊᕆᓂᐊᕐᓂᕋᖅᖢᑎᒍ ᐃᑲᔫᓯᐊᖅᑖᕈᑎᒋᔪᓐᓇᕐᓂᐊᕈᑦᑎᒍᑦ,” ᐅᖃᖅᑐᖅ.
ᑭᓯᐊᓂᓕ ᐊᐅᓚᑦᑎᓪᓗᓂ ᐊᖏᕐᕋᖃᙱᑦᑐᒃᑯᕕᖕᒥ ᐊᑭᑐᓕᔭᒻᒪᑦ, ᒪᑯᓄᖓ ᐃᖅᑲᓇᐃᔭᖅᑐᓄᑦ ᐊᑐᖅᑕᐅᔭᕆᐊᓕᖕᓄᑦ.
ᑲᑐᔾᔨᖃᑎᒌᑦ ᐱᐅᓯᕚᓪᓕᖅᑎᑦᑎᓚᐅᖅᑐᑦ ᓴᓗᒻᒪᑎᑦᑎᓂᖏᓐᓂᒃ ᐊᒻᒪᓗ ᐃᖅᑲᓇᐅᔭᖅᑏᑦ ᑮᓇᐅᔭᓕᐊᖏᑦ ᐊᑭᑦᑐᕆᐊᖅᑕᐅᓪᓗᑎᒃ $20-ᒥᑦ ᐃᑲᕐᕋᒧᑦ ᒪᐅᖓ $25-ᒧᑦ ᐃᑲᕐᕋᒧᑦ. ᐃᑲᔪᕈᑎᒃᓴᖃᓚᐅᕐᒥᔪᑦ ᐃᖅᑲᓇᐃᔭᖅᑎᓂᒃ ᐃᖅᑲᓇᐃᔭᖅᑎᑦᑏᓐᓇᕋᓱᒃᖢᑎᒃ ᑕᐃᒪᙵᓪᓕ ᒪᒃᑰᕆᔅᑕᓐ ᐃᖅᑲᓇᐃᔭᓕᕆᐊᓚᐅᖅᓯᒪᖕᒪᑦ 2019-ᒥᑦ, ᐅᖃᖅᑐᖅ.
“ᐅᖂᑕᖅ ᐱᐅᓯᕚᓪᓕᖅᓯᒪᓕᖅᑐᖅ — ᑕᐃᒪᐃᑦᑕᕆᐊᖃᕐᓂᖓᓄᑦ — ᑭᓯᐊᓂᓕ ᑕᒪᓐᓇ ᐊᑭᖃᖅᖢᓂᐅᖕᒥᖕᒪᑦ,” ᐅᖃᖅᑐᖅ.
ᔫᑎ ᑑᑐᓪ-ᐊᕙ, ᑐᑭᒧᐊᖅᑎᑦᑎᔨ ᐊᑐᐊᒐᓕᕆᓂᖅᒧᑦ ᐊᒻᒪ ᐸᕐᓇᐅᓯᐅᕐᓂᖅᒧᑦ ᐃᓄᓕᕆᔨᒃᑯᓐᓄᑦ, ᐅᖃᕈᒪᓚᐅᙱᑦᑐᖅ ᖃᓄᐃᒻᒪ ᑲᑐᔾᔨᖃᑎᒌᑦ ᐃᑲᔫᑎᑖᓚᐅᙱᓐᓂᖓᓂᒃ ᐱᔪᒪᑎᓪᓗᒋᑦ, ᑭᓯᐊᓂᓕ ᐅᖃᖅᖢᓂ “ᐃᓄᓕᕆᔨᒃᑯᑦ ᐱᓕᕆᖃᑎᖃᐃᓐᓇᕐᓂᐊᖅᑐᑦ ᐅᖂᑕᖅᒥ ᐊᒥᒐᕈᑎᒋᔭᖏᑦ ᖃᓄᖅ ᐱᓕᕆᐊᕆᔭᐅᓇᓱᒡᓗᑎᒃ.”
“ᒐᕙᒪᒃᑯᑦ ᐃᑲᔫᑎᒋᔭᖏᑦ ᑖᒃᑯᐊᑐᐊᖑᑎᓪᓗᒋ ᓈᒻᒪᙱᓗᐊᕐᒪᑕ … ᐃᑲᔪᖅᑕᐅᔭᕆᐊᖃᕋᑦᑕ ᑎᒍᒥᐊᖅᑎᑦ ᐊᒻᒪᓗ ᐃᖃᓗᖕᒥᐅᑕᑦ ᑲᑎᓪᓗᑎᒃ ᑲᑐᔾᔨᖃᑎᒌᓂᒃ ᐃᑲᔪᕈᑎᓕᕆᓗᑎᒃ ᐅᑯᑎᑐᓇᖅ ᐅᖂᑕᖅ ᑲᑐᔾᔨᖃᑎᒌᑎᑐᑦ,” ᐅᖃᖅᑐᖅ.
ᒪᒃᑯᕆᔅᑕᓐ ᑕᒪᑐᒥᖓ ᓈᒻᒪᒃᓴᓚᐅᙱᑦᑐᖅ.
“ᑕᐅᑐᒃᑲᑦᑎᒍᓪᓕ ᐃᓄᓕᕆᔨᒃᑯᑦ ᐃᑲᔫᑎᒃᓴᖃᖅᑎᑦᑎᔭᕆᐊᖃᕐᓂᖏᓐᓂᒃ ᐊᖏᕐᕋᖃᙱᑦᑐᓕᕆᕝᕕᐅᔪᓂᒃ,” ᐅᖃᖅᑐᖅ.
ᐃᓂᒃᓴᖅᑕᖃᙱᓗᐊᖅᑎᓪᓗᒍ ᐅᓇ ᐅᖂᑕᖅ ᐊᖏᕐᕋᖃᙱᑦᑐᓂᒃ ᐃᓂᒃᓴᖃᖅᑎᑦᑎᔪᓐᓇᔾᔮᙱᑦᑐᑦ ᐅᑭᐅᖑᓕᖅᐸᑦ, ᒪᒃᑯᕆᔅᑕᓐ ᐅᖃᖅᑐᖅ.
“ᐃᓄᐃᑦ ᐊᕐᕌᓂ ᓯᓚᐃᓐᓇᕐᒦᖃᑦᑕᓚᐅᖅᑐᑦ ᓱᓕ ᑕᐃᒪᐃᑦᑕᕆᐊᖃᕐᓂᐊᖅᑐᑦ ᑕᒪᑐᒪᓂ ᐊᕐᕌᒍᒥᒃ,” ᐅᖃᖅᑐᖅ.
“ᐊᒃᓱᓪᓘᓐᓃᑦ ᐊᑕᐅᓯᕈᓘᒐᓗᐊᒥ ᐃᓂᒃᓴᖃᙱᑦᑐᒥ ᐊᓂᑎᑦᑎᖃᑦᑕᕋᔭᖅᑐᒍᑦ. ᑖᒃᑯᐊᓗ ᐅᓗᕆᐊᓇᖅᑐᒦᔭᓕᕐᓗᑎᒃ ᐊᒻᒪᓗ ᓯᓚᒦᑦᑕᕆᐊᖃᓕᕐᓗᑎᒃ.”
ᑲᑐᔾᔨᖃᑎᒌ ᑲᑎᒪᔨᖏ ᑲᑎᒪᓛᖅᑐᑦ ᐋᒐᓯᐅᓕᖅᐸᑦ ᐊᒻᒪᓗ ᐊᕐᕌᒍᓕᒫᖅᓯᐅᑎᓄᑦ ᑲᑎᒪᕕᒡᔪᐊᖅᑎᑦᑎᓛᖅᖢᑎᒃ ᓯᑎᐱᕆᒥ, ᑕᕝᕙᓂᓕ ᑲᑎᒪᔩᑦ ᖃᓄᐃᓕᐅᕐᓂᐊᕆᐅᒃᓴᖏᓐᓂᒃ ᖃᐅᔨᓕᓛᖅᖢᑎᒃ.
“ᐋᖅᑭᒋᐊᒃᑲᓐᓂᕆᐊᖃᕋᑦᑕ,” ᐅᖃᖅᑐᖅ.
They can’t afford to operate but they plan to construct a new building? Maybe ditch the greedy landlord asking $10,000 a month rent for a condemned building that is not boarded up.