ᔫᓇᐃᑎᑦ ᔅᑕᐃᑦᔅ ᑭᒡᒐᖅᑐᖅᑎᒻᒪᕆᒃ ᓄᓇᐅᑉ ᐊᓯᖓᓐᓂᒃ ᐅᖃᓪᓚᒃᐳᖅ ᓇᖕᒥᓂᖃᕐᓂᐅᔪᒥ, ᐊᑦᑕᓇᔾᔭᐃᖅᓯᓯᒪᓂᕐᒥ ᓯᕗᓪᓕᖅᐸᐅᔪᒥ ᐊᐅᓪᓛᕐᓂᐅᔪᒥ ᓄᓇᕗᒻᒧᑦ

ᔫᓇᐃᑎᑦ ᔅᑕᐃᑦᔅ’ ᑭᒡᒐᖅᑐᖅᑎᒻᒪᕆᒃ ᓄᓇᐅᑉ ᐊᓯᖓᓐᓂᒃ ᑲᓇᑕᒧᑦ ᓯᕗᓪᓕᖅᐹᒥ ᐊᐅᓪᓛᕐᓂᖃᓚᐅᖅᐳᖅ ᐃᖃᓗᖕᓄᑦ ᐱᓇᓱᐊᕈᓯᐅᓚᐅᖅᑐᒥ, ᐅᖃᖃᑎᖃᖅᖢᓂ ᒐᕙᒪᐅᔪᓄᑦ ᐊᒻᒪ ᓇᖕᒥᓂᖃᕐᓂᕐᒧᑦ ᑭᒡᒐᖅᑐᐃᔨᐅᔪᓄᑦ ᐊᒻᒪ ᑕᑯᓂᕐᒥ ᓄᓇᓕᐸᐅᔭᒥ.

“ᑭᒃᑯᓕᒫᑦ ᑐᙵᓇᖅᓯᒪᕗᑦ, ᑐᙵᓇᖅᖢᑎᒃ ᐊᒻᒪ ᐱᖃᓐᓂᖅᖢᑎᒃ,” ᐅᖃᓚᐅᖅᐳᖅ ᑕᐃᕕᑦ ᑰᐃᓐ, ᑎᑭᓚᐅᖅᑐᖅ ᔪᓚᐃ 9−ᒥ — ᓄᓇᕗᑦ ᐅᓪᓗᖓᓂ — ᐊᒻᒪ ᐊᐅᓪᓚᓚᐅᖅᐳᖅ ᔪᓚᐃ 12−ᒥ. “ᑲᒪᓇᕐᔪᐊᖅᖢᓂ ᐳᓚᕋᕐᓂᐅᓚᐅᖅᐳᖅ ᑕᐃᔅᓱᒪᙵᑦ ᐃᓱᒪᒋᔭᐅᓂᐅᔪᒥ.”

ᓇᓗᓇᐃᖅᑕᐅᓚᐅᖅᖢᓂ ᔫᓇᐃᑎᑦ ᔅᑕᐃᑦᔅ ᑭᒡᒐᖅᑐᖅᑎᒻᒪᕆᒃ ᓄᓇᐅᑉ ᐊᓯᖓᓐᓂᒃ ᑲᓇᑕᒧᑦ ᓄᕕᐱᕆ 2021−ᒥ, ᑰᐃᓐ ᐊᕐᕌᒍᒐᑲᓴᖕᓂ 20−ᓂ ᐃᓱᒻᒥᖅᑐᐃᔨᐅᔪᓂ ᐊᒻᒪ ᐊᖓᔪᖅᑳᖅ ᐅᖃᐅᔾᔨᔨᐅᓪᓗᓂ Comcast Corp.−ᑯᓐᓂ, ᐊᒥᐊᓕᑲᒥ ᓯᐊᒻᒪᖅᑎᑦᑎᓂᕐᒧᑦ ᑲᑎᙵᓂᐅᔪᒥ.

ᐅᖃᖃᑎᖃᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ ᔪᓚᐃ 12−ᒥ ᐅᐸᒃᓯᒪᓚᐅᕐᓂᖓᓂ ᐃᖃᓗᖕᓂ ᐊᒻᒪ ᓯᕗᓪᓕᐅᑎᑕᐅᖁᔭᖏᓐᓂ ᑭᒡᒐᖅᑐᖅᑎᒻᒪᕆᒃ ᓄᓇᐅᑉ ᐊᓯᖓᓐᓂᒃ, ᐃᓚᖃᖅᑐᒥ ᐅᑭᐅᖅᑕᖅᑐᒥ ᓇᖕᒥᓂᖃᕐᓂᕐᒥ ᐱᕈᖅᑎᑦᑎᓂᐅᔪᒥ ᐊᒻᒪ ᐅᑭᐅᖅᑕᖅᑐᒥ ᐊᑦᑕᓇᔾᔭᐃᖅᓯᓯᒪᓂᖓᓂ.

ᑰᐃᓐ ᐅᖃᓚᐅᖅᐳᖅ ᓄᓇᓕᐸᐅᔭᕐᒦᑎᓪᓗᒍ ᑭᒡᒐᖅᑐᐃᕝᕕᒻᒪᕆᒃ ᓄᓇᐅᑉ ᐊᓯᖓᓂ ᓯᕗᓪᓕᐅᑎᑕᐅᖁᔭᖓᓂ ᐃᑲᔪᕐᓂᕐᒧᑦ ᒥᑭᑦᑐᓂ ᐊᒻᒪ ᕿᑎᖅᐸᓯᐊᓂ-ᐊᖏᓂᓕᖕᓂ ᓇᖕᒥᓂᕆᔭᐅᔪᓂ ᐱᕈᖅᐸᓪᓕᐊᑎᑕᐅᓂᖓᓐᓂ.

ᑲᑎᒪᖃᑎᖃᓚᐅᖅᐳᖅ ᓄᓇᓕᖕᓂ ᓇᖕᒥᓂᖃᖅᑎᐅᔪᓂ ᐅᖃᐅᓯᖃᕐᓂᕐᒧᑦ ᐱᕕᒃᓴᖃᕐᓂᐅᔪᓂ ᐊᒻᒪ ᐊᒡᕕᐊᕈᑕᐅᔪᓂ ᓵᙵᕙᒃᑕᖏᓐᓂ ᐊᒻᒪ ᐱᓕᕆᓪᓗᓂ ᑲᑎᒪᓂᐅᔪᒥ ᑕᒪᒃᑭᐅᒪᔪᓄᑦ ᐅᖃᖃᑎᖃᕐᓂᕐᒧᑦ ᕿᑭᖅᑖᓗᖕᒥ ᐊᕕᒃᑐᖅᓯᒪᓂᐅᔪᒥ ᓇᖕᒥᓂᖅ ᐃᖅᑲᓇᐃᔭᕐᕕᓖᑦ ᑲᑐᔾᔨᖃᑎᒌᖏᓐᓂ ᐊᒻᒪ ᑭᒡᒐᖅᑐᐃᔨᐅᔪᓂ ᕿᑭᖅᑖᓗᑦ ᑎᒥᖁᑕᐅᔪᓂ, ᐊᒻᒪᓗᑦᑕᐅᖅ ᑮᓇᐅᔭᓕᕆᔨᐅᔪᓄᑦ ᐱᓕᕆᕝᕕᖕᒥ Lester Landau−ᑯᓐᓂ.

“ᐊᑕᐅᓯᐅᔪᒥ ᐱᓕᕆᓇᓱᐊᖅᑕᑦᑎᓐᓂ [ᐱᓕᕆᐊᒃᓴᑦᑎᓐᓂ] ᓇᓗᓇᐃᖅᓯᓂᕐᒥ ᐱᕕᒃᓴᖃᕐᓂᐅᔪᓂ ᒥᑭᑦᑑᑎᓄᑦ ᓇᖕᒥᓂᕆᔭᐅᔪᓂ ᐊᒻᒪ ᖃᓄᐃᓕᐅᕈᓐᓇᕐᓂᑦᑎᓐᓂ ᒥᒃᖠᒋᐊᖅᑎᑦᑎᓂᕐᒧᑦ ᑕᐃᔅᓱᒥᖓ ᐊᒡᕕᐊᕈᑕᐅᔪᒥ,” ᑰᐃᓐ ᐅᖃᓚᐅᖅᐳᖅ.

ᐊᑕᐅᓯᖅ ᐱᔪᓐᓇᑐᐃᓐᓇᕆᐊᖃᖅᑐᒥ, ᐅᖃᓚᐅᖅᐳᖅ, ᒥᑭᑦᑐᓂ ᓇᖕᒥᓂᕆᔭᐅᔪᓂ ᐱᓕᕆᖃᑎᖃᕐᓂᕐᒥ ᐊᖏᓂᖅᓴᐅᔪᓂ ᐱᓂᕐᒧᑦ ᐱᓪᓚᕆᐅᔪᓂ ᐅᔭᕋᐅᔭᓂᑦ ᓄᓇᕗᒻᒥ.

ᐊᐱᕆᔭᐅᒐᒥ ᖃᓄᖅ ᑲᔪᖏᖅᓴᐃᔪᓐᓇᕐᓂᕐᒥ ᐊᕙᑎᒥᒃ ᐸᐸᑦᑏᓐᓇᕋᓱᐊᕐᓂᕐᒥ ᐅᔭᕋᖕᓂᐊᕐᓂᕐᒥ ᓄᓇᒥᙶᖅᑐᓂ ᐊᑐᖅᑐᒃᓴᓂ, ᑰᐃᓐ ᓇᓗᓇᐃᖅᓯᓚᐅᖅᐳᖅ “ᐱᓕᕆᓂᐅᕗᖅ ᓇᓕᒧᑎᑦᑎᓂᕐᒥ.”

ᐅᖃᓚᐅᖅᐳᖅ ᐃᓄᐃᑦ ᓲᖃᐃᒻᒪ ᕿᒃᓵᖕᓂᖏᓐᓂ ᐊᑐᕐᓂᖓᓂ ᐊᒻᒪ ᐱᕚᓪᓕᕈᑎᖃᕐᓂᖓᓂ ᐱᓪᓚᕆᐅᔪᓂ ᐅᔭᕋᐅᔭᕐᓂ ᓄᓇᒥᑦ.

“ᑭᓯᐊᓂ ᐱᓕᕆᓂᖃᖅᐳᖅ ᐃᓚᐅᖃᑕᐅᓂᕐᒥ ᐊᖏᔪᐊᓗᖕᒥ ᑮᓇᐅᔾᔭᒃᓴᓂᕐᒧᑦ ᐱᕕᒃᓴᖃᕐᓂᐅᔪᒥ ᐱᑕᖃᕐᓂᖓᓂ ᐅᑭᐅᖅᑕᖅᑐᒥ, ᓄᓇᕗᒻᒧᑦ, ᐱᓪᓚᕆᐅᔪᒥ ᐅᔭᕋᐅᔭᕐᓄᑦ ᐃᓂᐅᔪᒥ ᐃᒃᐱᒍᓱᑦᑎᐊᖅᑎᓪᓗᒋᑦ ᓄᓇᒥ ᐊᒻᒪ ᐃᒃᐱᒍᓱᑦᑎᐊᕐᓂᕐᒥ ᐸᐸᑦᑏᓐᓇᕐᓂᐅᔪᒥ,” ᐅᖃᓚᐅᖅᐳᖅ.

ᑕᒪᓐᓇ ᐃᓚᖃᖅᐳᖅ ᐅᖃᖃᑎᖃᕐᓂᕐᒥ ᐃᓄᖕᓂ, ᐅᖃᓚᐅᖅᐳᖅ.

“ᐃᓱᒪᒋᓂᕆᔭᕗᑦ ᐃᓚᐅᑎᑦᑎᔪᒪᕗᒍᑦ ᓄᓇᖃᖅᑳᖅᓯᒪᔪᓂ ᐃᓄᖕᓂ ᐅᕙᓂ ᐃᓱᒪᓕᐅᕆᓂᐅᔪᒥ ᐱᒋᐊᕐᓂᖓᓂ,” ᑰᐃᓐ ᐅᖃᓚᐅᖅᐳᖅ.

ᐅᑭᐅᖅᑕᖅᑐᒥ ᐊᑦᑕᓇᔾᔭᐃᖅᓯᓯᒪᓂᕐᒥ ᑭᐳᒦᓚᐅᕆᕗᖅ ᐃᖃᓗᖕᓃᑎᓪᓗᒍ.

ᑰᐃᓐ ᐅᐱᒍᓱᓚᐅᖅᐳᖅ ᑲᓇᑕᒥ ᐅᖃᐅᓯᒃᓴᓕᐊᖓᓐᓂ ᐊᕐᕌᒎᓚᐅᖅᑐᒥ ᐊᑐᕐᓂᐊᕐᓂᖓᓂ ᐅᓄᕐᓂᖅᓴᐅᔪᒥ $38 ᐱᓕᐊᓐᓂ ᐊᕐᕌᒍᓄᑦ 20−ᓄᑦ ᓄᑖᙳᕆᐊᖅᑎᑦᑎᓂᕐᒥ ᐸᕐᓇᒍᑎᖓᓐᓂ ᐅᐊᖕ/ᓴᒥ ᐊᒥᐊᓕᑲᓂ ᓄᑖᙳᕆᐊᖅᑎᑕᐅᓂᕐᒥ ᐃᓱᒪᒋᔭᖃᖅᑐᒥ ᖃᖓᑕᓂᐅᔪᒥ ᐊᒻᒪ ᐊᓂᕐᓂᖃᕐᓇᙱᑦᑐᒥ ᐅᕝᕙᓘᓐᓃᑦ Norad, ᐅᓇᑕᖅᑐᒃᓴᓂ ᐱᓕᕆᖃᑎᖃᕐᓂᐅᔪᒥ ᐅᑯᓇᓂ ᔫᓇᐃᑎᑦ ᔅᑕᐃᑦᔅ ᐊᒻᒪ ᑲᓇᑕᒥ.

ᐅᔾᔨᕆᓱᓚᐅᖅᐳᖅ ᑲᓇᑕᐅᑉ ᐱᕕᒃᓴᖃᕐᓂᖓᓂ ᐊᑯᓂᐅᓂᖓᓂ ᓄᑖᖑᔪᒥ ᕿᓚᐅᑉ ᐅᖓᑖᓂ ᖃᐅᔨᓴᕈᑕᐅᔪᓂ ᐱᓕᕆᔾᔪᓯᐅᔪᒥ 2028. ᕿᓚᐅᑉ ᐅᖓᑖᓂ ᖃᐅᔨᓴᕈᑕᐅᔪᓂ ᖃᐅᔨᔪᓐᓇᖅᐳᑦ ᑎᑭᑉᐸᓪᓕᐊᔪᓂ ᖄᖅᑕᔫᓂ ᐅᕝᕙᓘᓐᓃᑦ ᑐᕌᒐᒃᓴᐅᔪᓂ ᐅᖓᓯᒃᑐᐊᓗᖕᒥ

“ᑐᑭᓯᓇᑦᑎᐊᖅᑐᒥ ᐸᕐᓇᒍᑕᐅᔪᖃᖅᐳᖅ ᐱᒻᒪᕆᐅᔪᒥ ᑲᓇᑕ ᐊᖏᖃᑎᖃᖅᓯᒪᓂᖓᓂ, ᓇᓗᓇᐃᖅᓯᓂᕐᒥ Norad ᓈᒻᒪᒃᑐᒥ ᐃᑲᔪᕈᑎᒃᓴᖃᕐᓂᖓᓂ ᑐᓂᓯᓂᕐᒥ ᓴᐳᔾᔨᓯᒪᓂᐅᔪᒥ ᐅᔾᔨᕈᓱᖕᓂᐅᔪᒥ ᐊᒻᒪ ᓴᐳᔾᔨᓯᒪᓂᕐᒥ ᐱᔪᓐᓇᕐᓂᖓᓂ ᑕᒪᒃᑭᑦ ᓄᓇᐅᔪᑦ ᐱᔭᕆᐊᖃᕐᓂᖏᓐᓂ ᐅᑭᐅᖅᑕᖅᑐᒥ,” ᐅᖃᓚᐅᖅᐳᖅ.

ᑲᑐᔾᔭᐅᔪᒥ ᐅᖃᐅᓯᒃᓴᓕᐊᖑᔪᒥ, ᓄᓇᕗᒻᒥ ᓯᕗᓕᖅᑎ P.J. ᐊᕿᐊᕈᖅ ᐊᒻᒪ ᓯᕗᓕᖅᑎᐅᑉ ᑐᒡᓕᖓ ᐹᒥᓚ ᒍᕉᔅ ᐅᖃᓚᐅᖅᐳᑦ ᑰᐃᓐ ᐳᓚᕋᕐᓂᖓ “ᑲᒪᒋᔭᖃᕐᓂᐊᖅᐳᖅ ᐊᖏᒡᓕᒋᐊᖅᑐᒥ ᑲᑐᔾᔨᖃᑎᒌᖕᓂᐅᔪᒥ ᐅᑭᐅᖅᑕᖅᑐᒥ.”

“ᓴᙱᔪᒥ ᑲᑎᙵᓂᖃᖅᐳᖅ ᒪᕐᕉᔪᓂ ᐊᕕᒃᑐᖅᓯᒪᓂᖁᑎᑦᑎᓐᓂ, ᐊᒻᒪ ᐱᔪᒪᓂᖃᖅᑐᐃᓐᓇᐅᕗᒍᑦ ᐃᓂᐅᔪᓂ ᓲᕐᓗ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ, ᓇᖕᒥᓂᖅ ᐊᐅᓚᑦᑎᓂᕐᒧᑦ ᐊᒻᒪ ᐊᑦᑕᓇᔾᔭᐃᖅᓯᓯᒪᓂᕐᒥ,, ᐅᓯᑲᑦᑕᕐᓂᕐᒥ, ᐱᓪᓚᕆᐅᔪᓂ ᐅᔭᕋᐅᔭᓂ ᐊᒻᒪ ᓴᐳᔾᔨᓯᒪᓂᐅᔪᒥ ᐃᒪᖁᑎᒋᔭᑦᑎᓐᓂ,” ᑲᑐᔾᔭᐅᔪᒥ ᐅᖃᐅᓯᒃᓴᓕᐊᖅ ᐅᖃᓚᐅᖅᐳᖅ.

ᑰᐃᓐ ᐅᖃᓚᐅᕆᕗᖅ ᐊᓕᐊᓇᐃᒍᓱᓚᐅᖅᐳᖅ ᐃᖃᓗᖕᓃᓐᓂᖓᓂ ᓄᓇᕗᑦ ᐅᓪᓗᖓᓂ, ᐅᖃᖃᑎᖃᖅᖢᓂ ᓄᓇᓕᖕᒥᐅᑕᓂ ᐃᓚᐅᖃᑕᐅᔪᓂ ᖁᕕᐊᓱᒍᑕᐅᔪᓂ.

ᐅᖃᓚᐅᖅᐳᖅ ᐅᐸᒃᓯᒪᓚᐅᖅᐳᖅ ᒍᕉᔅᒥ ᐊᒻᒪ ᐅᖃᐅᓯᖃᓚᐅᖅᐳᑦ ᐱᒻᒪᕆᐅᓂᖓᓂ ᐸᐸᑦᑎᓂᕐᒥ ᐃᓄᐃᑦ ᐃᓕᖅᑯᓯᖓᓐᓂ.

“ᓴᖅᑭᔮᕐᕕᐅᕐᔪᐊᖅᐳᖓ ᐃᓕᖅᑯᓯᒧᑦ ᑐᕌᖓᓪᓚᕆᒃᑐᒥ ᐊᒻᒪ ᑐᕌᖓᓪᓚᕆᙱᑦᑐᒥ,” ᑰᐃᓐ ᐅᖃᓚᐅᖅᐳᖅ ᐳᓚᕋᕐᓂᖓᓂ.