ᐅᕙᒍᑦ ᑕᓚᕖᓴᖓᓐᓂ ᐱᕗᑦ ᑲᓇᑕᒥ ᑐᓐᓂᖅᓴᖅᑕᐅᓂᖓᓂ ᐊᖏᖅᑕᐅᓂᐅᔪᒥ

For the English version of this story, please see Uvagut TV gains national distribution approval from CRTC.

ᑲᓇᑕᐅᑉ ᓯᕗᓪᓕᖅᐸᐅᔪᒥ ᑲᓇᑕᒥ ᐃᓄᒃᑐᑦ ᑕᓚᕖᓴᖓᓄᑦ ᑕᑯᒃᓴᐅᓂᐅᔪᒥ ᕿᓚᒻᒥᐅᔪᒥ ᑕᑯᒃᓴᐅᑎᑕᐅᓂᐊᖅᐳᖅ ᑲᐃᐳᒃᑯᑦ ᐊᒻᒪ ᖃᖓᑦᑕᖅᑎᑕᐅᓯᒪᓂᐅᔪᒥ ᑐᓂᓯᔨᐅᔪᓂ ᑲᓇᑕᓕᒫᒥ.

ᐱᔭᕆᐊᓕᖕᒥ ᑲᓇᑕᒥ ᑐᓐᓂᖅᓴᖅᑕᐅᓂᖓᓂ ᐅᕙᒍᑦ ᑕᓚᕖᓴᖓᓐᓂ, ᐊᐅᓚᑕᐅᔪᒥ ᓄᓇᕗᒻᒥ ᐃᒻᒥᒃᑰᖅᑐᓂ ᑕᓚᕖᓴᒧᑦ ᑲᓱᖃᑎᒌᒃᓯᒪᔪᓄᑦ, ᐊᖏᖅᑕᐅᓚᐅᖅᐳᑦ ᑲᓇᑕᒥ ᓈᓚᐅᑎᒃᑯᑦ−ᑕᓚᕖᓴᒃᑯᑦ ᐊᒻᒪ ᑐᓴᐅᒪᑎᑦᑎᔾᔪᑎᓄᑦ ᑎᓕᔭᐅᓯᒪᔪᓂᑦ ᐅᒃᑐᐱᕆ 22−ᒥ.

ᐃᓱᒪᓕᐊᖑᔪᖅ ᐊᑐᐃᓐᓇᕐᓂᐊᖅᐳᖅ ᒪᓕᒃᑐᓄᑦ ᐊᕐᕌᒍᓄᑦ ᑕᓪᓕᒪᓄᑦ.

“ᐅᓇ ᐃᖅᑲᐅᒪᓂᐅᓂᐊᖅᐳᖅ ᖃᖓᐅᓂᖓᓂ ᐃᓄᓕᒫᓄᑦ,” ᐅᖃᓚᐅᖅᐳᖅ ᓄᓇᕗᒻᒥ ᐃᒻᒥᒃᑰᖅᑐᓂ ᑕᓚᕖᓴᒧᑦ ᑲᓱᖃᑎᒌᒃᓯᒪᔪᑦ ᐃᓱᒻᒥᖅᑐᐃᔨᖓ ᓘᓯ ᑐᓗᒑᕐᔪᒃ ᐅᒃᑐᐱᕆ 24−ᒥ ᑐᓴᒐᒃᓴᓕᐊᖑᔪᒥ.

ᐅᕙᒍᑦ ᑕᓚᕖᓴᖓᓐᓂ ᒫᓐᓇᐅᔪᒥ ᑕᑯᒃᓴᐅᑎᑦᑎᓲᖑᕗᑦ ᓯᕗᓪᓕᐅᔪᓂ, ᐃᓄᖕᓂ−ᓴᖅᑭᑎᑕᐅᔪᓂ ᐃᓄᒃᑐᑦ ᐱᓕᕆᐊᖑᓂᐅᔪᓂ — ᓲᕐᓗ ᓱᕈᓯᕐᓄᑦ ᑕᑯᓐᓇᒐᒃᓴᖏᓐᓂ, ᑕᕐᕆᔭᓕᐊᓂ ᐊᒻᒪ ᒫᓐᓇᐅᔪᒥ ᖃᓄᐃᑉᐸᓪᓕᐊᓂᐅᔪᓂ — ᓵᒃᑯᑦ, ᐅᑭᐅᖅᑕᖅᑐᒥ ᑯᐊᐸᒃᑯᓐᓂ ᐊᒻᒪ ᓄᓇᓕᖕᓂ ᑲᐃᐳᓂ ᐃᓚᐅᖃᑕᐅᓂᐅᔪᓂ ᐱᔨᑦᑎᕋᕐᓂᕐᓂ ᑲᓇᑕᓕᒫᒥ.

ᐅᓄᕐᓂᖅᓴᐅᔪᒥ 200,000−ᓂ ᐃᓚᐅᖃᑕᐅᓂᐅᔪᖃᖅᐳᖅ ᒫᓐᓇᐅᔪᒥ. ᑭᓯᐊᓂ ᐅᕙᒍᑦ ᑕᓚᕖᓴᖓᓐᓂ ᐃᓚᔭᐅᒍᓂ ᐱᒋᐊᓕᓵᖅᑐᓄᑦ ᑕᓚᕖᓴᒥ ᑲᑎᙵᓂᐅᔪᓄᑦ ᔭᓄᐊᕆ 20, 2025−ᒥ, ᓂᕆᐅᒋᔭᐅᕗᖅ ᑎᑭᐅᑎᓂᐊᕐᓂᖓᓂ 10 ᒥᓕᐊᓐᓂ ᑲᐃᐳᖃᖅᑎᐅᔪᓄᑦ.

“ᐃᓄᑐᖃᕗᑦ ᐃᓅᔪᓐᓃᖅᐸᓪᓕᐊᑎᓪᓗᒋᑦ ᐊᑕᐅᓯᐅᑦᑕᖅᑐᒥ, ᐅᓇᑕᖅᐳᒍᑦ ᖃᖓᐅᓂᖓᓂ ᐃᓕᖅᑯᓯᑦᑎᓐᓂ, ᐅᒃᐱᒋᔭᑦᑎᓐᓂ, ᐊᒻᒪ ᐅᖃᐅᓯᕐᒥ ᐆᒪᑎᑦᑎᓇᓱᐊᕐᓂᕐᒥ ᕿᑐᕐᙵᑦᑎᓐᓄᑦ ᐊᒻᒪ ᐃᕐᙳᑕᑦᑎᓐᓄᑦ,” ᑐᓗᒑᕐᔪᒃ ᐅᖃᓚᐅᖅᐳᖅ ᑐᓴᒐᒃᓴᓕᐊᖑᔪᒥ.

“ᐅᒃᐱᕈᓱᒃᐳᒍᑦ ᐅᕙᒍᑦ ᑕᓚᕖᓴᖓ ᐱᒻᒪᕆᕐᔪᐊᖑᓂᖓᓂ ᐃᑲᔪᕐᓂᕐᒧᑦ ᐸᐸᑦᑏᓐᓇᕐᓂᕐᒥ ᐅᖃᐅᓯᑦᑎᓐᓂ, ᐃᓕᖅᑯᓯᒥ ᐊᒻᒪ ᑕᐃᔅᓱᒪᓂᑐᖃᕐᒥ.”

ᐅᖃᐅᓯᐅᓪᓗᓂ ᑲᓇᑕᒥ ᓈᓚᐅᑎᒃᑯᑦ−ᑕᓚᕖᓴᒃᑯᑦ ᐊᒻᒪ ᑐᓴᐅᒪᑎᑦᑎᔾᔪᑎᓄᑦ ᑎᓕᔭᐅᓯᒪᔪᑦ ᑕᑯᓐᓇᒐᒃᓴᓕᕆᓂᕐᒥ ᐃᓱᒪᓕᐊᖓᓐᓂ, ᐅᕙᒍᑦ ᑕᓚᕖᓴᖓ ᐊᖏᖅᓯᒪᕗᑦ ᓇᓗᓇᐃᖅᓯᓂᕐᒥ 80 ᐳᓴᓐᑎᓪᓗᐊᖓᓂ ᐃᓄᒃᑎᑑᓐᓂᐊᖅᐳᖅ, ᐃᓄᐃᓐᓇᖅᑐᓐ ᐊᒻᒪ ᐃᓄᕕᐊᓗᒃᑐᓐ.

ᐊᒥᐊᒃᑯᖓ 20 ᐳᓴᓐᑎᖓ ᐃᓚᖃᕐᓂᐊᖅᐳᖅ ᐃᓗᓕᖏᓐᓂ ᓴᖅᑭᑎᑕᐅᔪᓂ ᐊᓯᖏᓐᓂ ᓄᓇᖃᖅᑳᖅᓯᒪᔪᓄᑦ ᐅᖃᐅᓯᕐᓂ ᐅᖃᓪᓚᒃᑕᐅᕙᒃᑐᓂ ᑲᓇᑕᒥ ᐅᕝᕙᓘᓐᓃᑦ ᓄᓇᕐᔪᐊᓕᒫᒥ.

ᑐᓗᒑᕐᔪᒃ ᓯᕗᓪᓕᕐᒥ ᑐᒃᓯᕋᓚᐅᖅᓯᒪᕗᖅ ᑕᑯᓐᓇᒐᒃᓴᐅᔪᒥ ᓚᐃᓴᓐᓯᒥ ᐊᐅᓚᑦᑎᓂᕐᒧᑦ ᐅᕙᒍᑦ ᑕᓚᕖᓴᖓᓐᓂ ᔪᓚᐃ 2021−ᒥ ᑎᑎᖅᑲᑎᒍᑦ ᑎᓕᐅᕈᑕᐅᓯᒪᔪᓄᑦ ᑭᒡᒐᖅᑐᐃᓪᓗᓂ ᐃᒻᒥᒃᑰᖅᑐᒥ ᑕᓚᕖᓴᒧᑦ ᖃᓱᖃᑎᒌᖕᓂᐅᔪᒥ. ᑲᓱᖃᑎᖐᖕᓂᐅᔪᖅ ᐱᔭᕆᐊᖃᓚᐅᖅᐳᖅ ᓚᐃᓴᓐᓯᖃᓪᓚᕆᖕᓂᖓᓂ ᐅᕘᓇ ᑲᓇᑕᒥ ᓈᓚᐅᑎᒃᑯᑦ−ᑕᓚᕖᓴᒃᑯᑦ ᐊᒻᒪ ᑐᓴᐅᒪᑎᑦᑎᔾᔪᑎᓄᑦ ᑎᓕᔭᐅᓯᒪᔪᓂᑦ ᖄᖏᐅᑎᓚᐅᖅᑎᓪᓗᒋᑦ 200,000−ᓂ ᐃᓚᐅᖃᑕᐅᓂᐅᔪᓂ.

ᑎᑎᖅᑲᒥ, ᑐᓗᒑᕐᔪᒃ ᑐᒃᓯᕋᓚᐅᕆᕗᖅ ᓵᓄᒥ ᑐᓂᔭᐅᓂᖓᓂ ᐱᔭᕆᐊᓕᖕᒥ ᑐᓐᓂᖅᓴᖅᑕᐅᓂᖓᓂ ᑲᓇᑕᒥ.

ᑐᓗᒑᕐᔫᑉ ᑐᒃᓯᕋᐅᑎᖓ ᓴᓂᕐᕙᒃᑕᐅᓚᐅᖅᐳᖅ ᑭᓯᐊᓂ ᐃᓄᓕᒫᓂ ᑐᓵᑎᑦᑎᓂᐅᔪᒥ ᐱᓕᕆᐊᖑᓚᐅᖅᑎᓪᓗᒍ ᑎᓕᔭᐅᓯᒪᔪᓄᑦ ᒑᑎᓅ, ᑯᐸᐃᖕᒥ ᔫᓂ 2023−ᒥ ᑕᒪᒃᑭᓄᑦ ᓄᓇᕗᒻᒥ ᐃᒻᒥᒃᑰᖅᑐᓂ ᑕᓚᕖᓴᒧᑦ ᑲᓱᖃᑎᒌᒃᓯᒪᔪᓄᑦ ᐊᒻᒪ ᐃᓄᐃᑦ ᑕᓚᕖᓴᖓᓂ ᑲᓱᖃᑎᒌᒃᓯᒪᔪᓄᑦ, ᑕᒪᒃᑭᑦ ᓵᓅᔪᑦ ᑐᒃᓯᕋᓚᐅᕐᒪᑕ ᑕᐃᔅᓱᒥᖓᑦᑕᐃᓐᓇᖅ ᓚᐃᓴᓐᓯᖃᕐᓂᐅᔪᒥ ᐊᒻᒪ ᑐᓐᓂᖅᓴᖅᑕᐅᓂᖓᓂ.

ᐃᓄᐃᑦ ᑕᓚᕖᓴᖓᓂ ᑲᓱᖃᑎᒌᒃᓯᒪᔪᑦ ᐱᒋᐊᖅᑎᑕᐅᓚᐅᖅᐳᖅ ᒪᐃ 2022−ᒥ $2.4 ᒥᓕᐊᓐᓂ ᓄᓇᕗᒻᒥ ᑐᙵᕕᒃᑯᓐᓂ. ᓵᓄᖓ ᑕᑯᓐᓇᒐᖅᑎᑦᑎᓲᖑᕗᖅ ᐃᓄᖕᓄᑦ−ᓴᖅᑭᑎᑕᐅᓯᒪᔪᓂ ᐃᓕᓐᓂᐊᕈᑕᐅᔪᓂ ᑕᓚᕖᓴᒥ ᐱᓕᕆᐊᖑᓂᐅᔪᒥ ᐃᓄᒃᑐᑦ ᐅᖃᓪᓚᐅᓯᓂ ᐅᑭᐅᖅᑕᖅᑐᒥ ᐅᐊᖕᓇᖓᓂ.

ᑎᓕᐅᕆᔭᐅᔪᑦ ᐃᓱᒪᓕᐅᕆᓚᐅᖅᐳᑦ ᑐᓂᓯᙱᓐᓂᕐᒥ ᐱᔭᕆᐊᓕᖕᓂ ᑐᓐᓂᖅᓴᖅᑕᐅᓂᐅᔪᒥ ᑕᒪᒃᑭᓄᑦ ᓵᓅᔪᓄᑦ, ᐅᖃᖅᖢᑎᒃ ᐊᔾᔨᒌᐸᓗᖕᒥ ᐃᓗᓕᖃᖅᑐᓂ “ᐊᔪᕐᓇᖅᑎᑦᑎᓇᔭᕐᓂᖓᓂ ᐊᔾᔨᒌᙱᑎᑕᐅᓂᖏᓐᓂ ᑖᒃᑯᓇᓂ ᐱᔨᑦᑎᕋᕐᓂᐅᔪᓂ”

ᐃᓱᒪᓕᐊᖑᓚᐅᖅᐳᖅ ᓄᓇᕗᒻᒥ ᐃᒻᒥᒃᑰᖅᑐᓂ ᑕᓚᕖᓴᒧᑦ ᑲᓱᖃᑎᒌᒃᓯᒪᔪᑦ ᐃᓕᓯᒪᑦᑎᐊᕐᓂᖅᓴᐅᓂᖓᓂ “ᑐᓂᓯᓂᖓᓂ ᐃᕐᙲᓐᓇᑲᐅᑎᒋᒥ ᐱᔨᑦᑎᕋᕐᓂᕐᒧᑦ ᐃᓄᖕᓄᑦ,” ᐊᑯᓂᐅᓂᖅᓴᐅᔪᒥ ᑕᑯᓐᓇᒐᒃᓴᓕᐊᖑᔪᓂ ᐅᓪᓗᖓᓂ ᐊᒻᒪ ᐱᒧᓐᓇᕐᓂᖓᓂ ᓴᖅᑭᑎᑦᑎᓂᕐᒥ ᖁᑦᑎᖕᓂᖅᓴᐅᔪᓂ ᑭᒡᓕᐅᔪᓂ ᓯᕗᓪᓕᐅᔪᓂ ᐱᓕᕆᐊᖑᓂᐅᔪᓂ.

ᑕᐃᑲᓂ ᑐᓵᑎᑦᑎᓂᐅᔪᒥ ᐊᒻᒪ ᑐᒃᓯᕋᕐᓂᖓᓂ ᐱᓕᕆᓂᐅᔪᒥ, ᓄᓇᕗᒻᒥ ᐃᒻᒥᒃᑰᖅᑐᓂ ᑕᓚᕖᓴᒧᑦ ᑲᓱᖃᑎᒌᒃᓯᒪᔪᑦ ᐱᓚᐅᖅᐳᑦ 167−ᓂ ᑎᑎᕋᖅᓯᒪᔪᓂ ᕿᑎᐊᓃᓐᓂᖓᓂ ᓄᖅᑲᖅᑎᑦᑎᓂᕐᒧᑦ ᐊᒻᒪ 5,000−ᑲᓴᖕᓂ ᐊᑎᓕᐅᕆᓂᐅᔪᓂ ᐃᓄᓕᒫᓂ ᐊᑎᓕᐅᖅᓯᒪᔪᓂ ᑐᒃᓯᕋᐅᑎᒥ ᐃᑲᔪᖅᓱᐃᓂᕐᒥ ᐱᔭᕆᐊᓕᖕᒥ ᑐᓐᓂᖅᓴᖅᑕᐅᓂᖓᓂ.

ᐅᔾᔨᕐᓇᓗᐊᖅᑐᓂ ᐃᑲᔪᖅᓱᐃᔨᐅᔪᓂ ᐃᓚᖃᓚᐅᖅᐳᖅ ᓄᓇᕗᒻᒥ ᐃᓚᒋᔭᐅᔪᒥ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᓗᐊᕆ ᐃᓪᓚᐅᒻᒥ ᐊᒻᒪ ᒪᐃᔭᓂ ᐊᐅᒧᐃᑦᑐᕐᒥ, ᐃᓄᒃᔪᐊᖅ ᐊᒻᒪ ᖃᒪᓂᑦᑐᐊᕐᒥ.

ᓄᓇᕗᒻᒥ ᐃᒻᒥᒃᑰᖅᑐᓂ ᑕᓚᕖᓴᒧᑦ ᑲᓱᖃᑎᒌᒃᓯᒪᔪᑦ, ᒫᓐᓇᐅᔪᒥ ᑕᑯᓐᓇᒐᒃᓴᓕᐊᓲᖑᔪᒥ ᐱᖓᓱᓂ ᑎᓴᒪᓂ ᐊᕕᒃᑐᖅᓯᒪᓂᐅᔪᓂ ᓄᓇᕗᒻᒥ, ᐸᕐᓇᒃᑭᕗᑦ ᓴᖅᑭᑎᑦᑎᓂᕐᒥ ᓄᓇᓕᖕᓂ ᐅᖃᐅᔾᔨᔨᐅᔪᓂ ᑲᑎᒪᔨᕋᓛᓂ, ᐅᖃᐅᓯᐅᓪᓗᓂ ᓴᖅᑭᑎᑕᐅᔪᒥ ᐃᓱᒪᓕᐊᖑᓂᐅᔪᒥ. ᑲᑎᒪᔨᕋᓛᑦ 9−ᓂ ᐃᓄᖕᓂ ᐃᓚᖃᕐᓂᐊᖅᐳᑦ, ᐊᑐᓂ ᓄᓇᕗᒻᒥ, ᓄᓇᕕᖕᒥ, ᐃᓄᕕᐊᓗᐃᑦ, ᓄᓇᑦᓯᐊᕗᑦ, ᐊᒻᒪ ᐃᓄᐃᑦ ᓄᓇᖓᑦᑕ ᓯᓚᑖᓂ.

“ᖁᕕᐊᑉᐳᒍᑦ ᐱᓕᕆᖃᑎᖃᕐᓂᕐᒥ ᐃᓄᖕᓂ ᓄᓇᓕᐅᔪᓂ ᓴᖅᑭᑎᑦᑎᓂᕐᒥ ᐆᒥᖓ ᐱᓕᕆᕝᕕᐅᔪᒥ, ᐅᖃᐅᓯᖃᕐᓂᕐᒥ ᐃᓱᒪᑐᔪᓂ ᐱᓕᕆᓂᐅᔪᓂ ᐃᓄᖕᓂ ᐊᓕᐊᓇᐃᒋᔭᐅᔪᓐᓇᖅᑐᒥ ᑲᓇᑕᒥᐅᑕᓂ ᑲᓇᑕᓕᒫᒥ,” ᐅᖃᓚᐅᖅᐳᖅ ᑐᓗᒑᕐᔪᒃ.