ᐃᒪᖅ ᖃᓄᐃᙱᑦᑐᖅ ᐃᒥᕐᕕᐅᔭᕆᐊᒃᓴᖅ ᐱᕐᕈᓗᐊᕿᑦᑕᐃᓕᓂᕐᒥ ᓱᕋᐃᓯᒪᒐᓗᐊᖅᑎᓪᓗᒋᑦ: ᒥᓂᔅᑕ

For the English version of this story, please see Water is safe to drink despite safety violations: Minister.

ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᓄᑦ ᒥᓂᔅᑕ ᑕᐃᕕᑦ ᔪᐊᓇᓯ ᑐᓴᖅᑎᑦᑎᓚᐅᕐᑐᖅ ᒪᓕᒐᓕᐅᖅᑎᓂ ᒪᐃ 29-ᒥ ᓄᓇᕗᒥᑦ ᓄᓇᓖᑦ ᐃᒥᕐᑕᖅᕕᖏᑦ ᖃᓄᐃᙱᓐᓂᕋᖅᖢᓂᒋᑦ ᐃᒥᕐᕕᐅᑲᑕᒋᐊᒃᓴᖅ ᒪᑯᐊᖑᒐᓗᐊᖅᑎᓪᓗᒋᑦ 17 ᐅᑯᓇᙵᑦ 25-ᓂ ᓄᓇᓕᖕᓂ ᐃᒥᕐᑕᖅᕕᖏᑦ ᐊᓂᒍᓚᐅᙱᑎᓪᓗᒋ ᐋᓐᓂᐊᖃᖅᑕᐃᓕᓂᕐᒧᑦ ᐊᒻᒪ ᐱᕐᕈᓗᐊᕿᑦᑕᐃᓕᓂᕐᒧᑦ ᖃᐅᔨᓴᖅᑕᐅᑎᓪᓗᒋᑦ.

ᑕᐃᒪᓐᓇ ᐅᖃᓕᓚᐅᕐᑐᖅ ᑲᑎᒪᕕᒡᔪᐊᕐᓇᒥ ᐊᐱᖅᓱᖅᑎᓪᓗᒍ ᐃᖃᓗᐃᑦ-ᓯᓈ ᒪᓕᒐᓕᐅᖅᑎᖓ ᔮᓇᑦ ᐱᑦᓯᐅᓛᖅ ᐳᕉᔅᑐ, ᑖᓐᓇ ᐅᖃᖅᖢᓂ ᓄᓇᕗᒥᑦ ᐃᒪᓕᕆᓂᖅ ᖃᓄᐃᓕᖓᓂᖓ ᐅᖃᐅᓯᐅᓚᐅᕐᓯᒪᓂᖓᓂ ᐋᑐᕚᒥ ᒪᓕᒐᓕᕆᕕᒡᔪᐊᕐᒥᑦ.

“ᖁᔭᒋᑦᑎᐊᖅᑕᕋ ᒪᓕᒐᓕᕆᔨᐅᖃᑕᐅᔪᖅ ᐅᑯᓄᖓ ᓂᐅ ᕗᐃᐊᔅᑦᒥᓐᔅᑐ-ᐳᓇᐱᒧᑦ ᑕᒪᑐᒥᖓ ᒪᓕᒐᓕᕆᕕᒡᔪᐊᕐᒥ ᐅᖃᐅᓯᖃᕈᓐᓇᓚᐅᕐᒪᑦ,” ᐅᖃᕐᑐᖅ.

ᐲᑕ ᔫᓕᐊᓐ, ᓂᐅ ᑐᒧᑯᕌᑎᒃᑯᓐᓄᑦ ᒪᓕᒐᓕᐅᖅᑎ ᐳᕆᑎᔅ ᑲᓚᒻᐱᐊᒥ, ᓄᓇᑦᓯᐊᕐᒥ ᐱᕙᓪᓕᐊᔪᓂᒃ ᐅᓂᒃᑳᓕᐅᕕᓂᕐᓂ ᒪᐃᖑᑎᓪᓗᒍ ᐊᒻᒪᓗ ᐅᖃᖅᖢᓂ ᑐᐊᕕᕐᓇᕐᓂᖓᓂᒃ ᒐᕙᒪᑐᖃᒃᑯᑦ ᓄᓇᕗᒥᑦ ᓄᓇᓕᖕᓂ ᓴᓗᒪᔪᒥ ᐃᒪᖃᖅᑎᑦᑎᔭᕆᐊᖃᕐᓂᖏᓐᓂᒃ.

17 ᐃᒥᕐᑕᖅᕖᑦ ᓄᓇᕗᒥᑦ ᐊᓂᒍᐃᓚᐅᕐᓯᒪᙱᒻᒪᑕ ᖃᐅᔨᓴᕈᑎᐅᔪᓂᒃ, ᑕᒪᕐᒥ ᑖᒃᑯᐊ ᐋᓐᓂᐊᖃᖅᑕᐃᓕᓂᕐᒧᑦ ᐅᕝᕙᓘᓐᓃᑦ ᐊᑦᑕᓇᖅᑐᒦᑦᑕᐃᓕᓂᕐᒧᑦ ᓈᒻᒪᙱᓕᐅᕈᑎᖃᓚᐅᕐᒪᑕ, ᐅᖃᕐᓯᒪᓚᐅᕐᑐᖅ ᓄᓇᕗᒥᑦ ᒐᕙᒪᒃᑯᑦ ᐋᓐᓂᐊᖃᕐᓇᙱᑦᑐᒥ ᖃᐅᔨᓴᖅᑎ ᑖᓐᓇᓗ ᐅᓂᒃᑳᖅ ᐱᔭᐅᔪᓐᓇᓚᐅᖅᖢᓂ ᐱᔪᓐᓇᕐᓂᖃᕐᓂᕐᒥ ᑐᓴᐅᒪᔭᕆᐊᓕᖕᓂ ᑐᓴᐅᒪᔭᕆᐊᖃᕐᓂᕐᒧᑦ.

ᐱᖓᓱᑦ ᓄᓇᓖᑦ ᒫᓐᓇ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᑲᒪᒋᔭᐅᔭᕆᐊᖃᕆᔭᐅᓪᓗᑎᒃ.

ᓄᓇᕗᒥᑦ ᐃᒪᕐᒥ ᐱᓕᕆᐊᖃᕐᓂᖅ “ᐱᓕᕆᕝᕕᖕᒧᑦ ᐊᑭᓕᖅᓱᐃᕈᑎᐅᕗᖅ” ᒫᓂ $605 ᒥᓕᐊᓐ ᑖᓚᓂ, ᐅᖃᕐᓯᒪᓚᐅᕐᑐᑦ ᓄᓇᕗᒥᑦ 2023-ᒥ ᐃᒥᕐᑕᖅᕕᖕᓄᑦ ᖃᓄᐃᓕᐅᕈᑎᒃᓴᐃᑦ.

ᔪᐊᓇᓂ ᐅᖃᓚᐅᕐᑐᖅ ᖃᐅᔨᒪᓂᕋᖅᖢᓂ ᓄᓇᕗᒥᑦ ᐃᒪᓕᕆᓂᖅ ᖃᓄᐃᑦᑕᕆᐊᒃᓴᖓᓂ ᐊᒻᒪᓗ ᐅᖃᐅᓯᐅᑦᑕᐃᓐᓇᕐᓂᖓᓂ ᒪᓕᒐᓕᕆᔨᓄᑦ ᑲᑎᒪᓂᖏᓐᓂ ᐊᒻᒪᓗ ᐊᖏᖅᖢᓂ ᓯᕗᓪᓕᐅᑎᑕᐅᔭᕆᐊᖃᕐᓂᖓᓂᒃ ᐃᑲᔫᑎᒃᓴᓕᕆᓂᒃᑯᑦ.

ᐅᓄᕐᓂᕐᓴᐃᑦ ᓄᓇᕗᒥᑦ ᐃᒥᕐᑕᖅᕖᑦ ᒪᓕᒐᕆᔭᐅᔪᓂ ᒪᓕᒃᓯᒪᙱᓗᐊᕐᒪᑕ ᐅᑯᓇᙵᑦ ᒐᕙᒪᑐᖃᒃᑯᑦ ᑐᑭᒧᐊᕈᑎᖏᓐᓂᒃ ᑲᓇᑕᒥ ᐃᒥᕐᑕᖅᕖᑦ ᐱᐅᑎᒋᓂᕆᔭᕆᐊᖃᖅᑕᖏᓐᓂᒃ, ᐅᖃᕐᑐᖅ.

ᑕᐃᒪᐃᓕᐊᓪᓚᓚᐅᖅᖢᑕ, ᐃᒥᕐᑕᖅᕖᑦ ᖃᐅᑕᒫᑦ ᖃᐅᔨᓴᖅᑕᐅᕙᒃᑐᑦ ᑯᓘᕇᓐᒧᑦ, ᐃᖏᕐᕋᓂᖓᓂᒃ ᐊᒻᒪᓗ ᐅᓗᕆᐊᓇᖅᑐᓂ ᐋᓐᓂᐊᕈᑎᐅᔭᑦᑐᓂᒃ.

ᐃᒪᖅ “ᐊᖏᓛᒃᑯᑦ ᐊᖏᖅᑕᐅᓯᒪᔪᓂ ᐃᓚᐅᕈᑎᖃᖅᐳᖅ ᒥᑭᑦᑐᕈᓗᖕᓄᑦ ᐅᓗᕆᐊᓇᖅᑐᓂᒃ ᐊᒻᒪ ᐃᓚᐅᕈᑎᓂ,” ᔫᐊᓇᓯ ᐅᖃᕐᑐᖅ.

ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᑐᓂᓯᓚᐅᕐᑐᑦ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ ᐅᓗᕆᐊᓇᖅᑐᓂ ᖃᐅᔨᓴᕈᑎᖏᓐᓂᒃ ᑕᒪᐃᓐᓂ ᓄᓇᓖᑦ ᐃᒥᕐᑕᖅᕕᖏᓐᓂᒃ.

ᐅᓇ ᖃᐅᔨᓴᕈᑎ ᐅᖃᕐᓯᒪᔪᖅ ᐅᑯᐊ 6 ᐃᒥᕐᑕᖅᕖᑦ ᒥᓪᓗᐊᕈᑎᖃᕐᕖᓪᓘᓐᓃᑦ — ᐅᑯᓇᓂ ᑲᖏᖅᑐᒑᐱᒃ, ᓴᓪᓖᑦ, ᐃᒃᐱᐊᑉᔪᒃ, ᑭᒻᒥᕈᑦ, ᑭᙵᐃᑦ ᐊᒻᒪ ᐸᓐᓂᕐᑑᖅ — ᒪᓕᒃᓯᒪᙱᓐᓂᖏᓐᓂᒃ ᒐᕙᑐᖃᒃᑯᑦ ᐃᒥᕐᑕᖅᕕᖕᓄᑦ ᑐᑭᒧᐊᕈᑎᖏᓐᓂᒃ.

ᐊᓯᖏ ᐅᓗᕆᐊᓇᕈᑎᐅᔪᑦ ᖃᐅᔨᓴᕈᑎᓂ ᐃᓚᖃᓚᐅᕐᑐᑦ ᐊᑕᐅᑦᑎᒃᑰᖅᑕᙱᓗᐊᕐᓂᖏᑦ ᐃᒥᕐᑕᖅᕕᖕᒥ ᑲᒪᒋᔭᐅᔾᔪᑎᐅᔪᑦ ᐅᕙᓂ ᑕᓗᕐᔪᐊᖅᒥ; ᐃᒪᓕᕆᕝᕕᒃᒥ ᐊᒻᒪ ᐱᐅᑎᒋᓂᖓᓄᑦ ᐃᓱᒫᓘᑎᖃᖅᖢᑎᒃ ᖁᒡᓗᖅᑑᖅᒥ; ᓈᒻᒪᙱᓕᐅᕈᑎᑦ ᖃᐅᒻᒪᖅᑯᑎᒧ ᐱᓕᕆᔾᔪᑎ ᐊᕐᕕᐊᓂ: ᐊᒻᒪᓗ ᐃᒪᐅᑉ ᐱᐅᑎᒋᓂᖓ ᐊᒻᒪ ᐅᔾᔨᕐᓱᕆᐊᖃᕐᓂᖏᑦ ᖃᒪᓂᑦᑐᐊᕐᒥ, ᐃᒡᓗᓕᒃᒥ, ᐅᖅᓱᖅᑑᖅᒥ ᐊᒻᒪᓗ ᓴᓂᑭᓗᐊᖅᒥ.

“ᐱᓕᕆᐊᖃᕋᓱᒃᑲᑦᑕ ᐅᓄᕈᓘᔭᖅᑐᓂᒃ ᐃᒥᕐᑕᖅᕕᖕᓂ ᓄᑖᙳᕆᐊᖅᑕᐅᓂᐊᖅᑐᓂᒃ ᐅᕝᕙᓘᓐᓃᑦ ᐊᓯᔾᔨᖅᑕᐅᓂᐊᖅᑐᓂᒃ,” ᔪᐊᓇᓯ ᐅᖃᕐᑐᖅ.

ᑕᒪᐃᓐᓂᐸᓗᒃ ᓄᓇᓖᑦ ᐅᖃᐅᔾᔭᐅᓯᒪᔪᑦ ᓄᑖᒥ ᐅᕝᕙᓘᓐᓃᑦ ᓄᑖᙳᕆᐊᖅᑕᐅᓯᒪᔪᒥ ᐃᒥᕐᑕᖅᕕᖃᕈᒪᓗᑎᒃ, ᐅᕝᕙᓘᓐᓃᑦ ᑲᔪᓯᑐᐃᓐᓇᕐᓗᑎᒃ ᓄᑖᙳᕆᐊᖅᑎᑦᑎᑲᑕᖕᓂᕐᒥ ᐊᓯᔾᔩᓂᕐᒥᓪᓘᓐᓃᑦ, ᐅᖃᕐᓯᒪᓚᐅᕐᑐᖅ ᖃᐅᔨᓴᕈᑎᒋᔭᐅᔪᖅ. ᐅᖃᐅᓯᐅᓚᐅᙱᑦᑐᑐᐊᖅ ᑎᑭᕋᕐᔪᐊᖅ ᓲᖃᐃᒻᒪ ᓄᑖᒥ ᐃᒥᕐᑕᖅᕕᖃᓕᕐᒪᑕ.

ᐊᕐᕌᒍᓂ ᐱᖓᓱᓂ ᓄᓇᕗᒥᑦ ᒐᕙᒪᒃᑯᑦ ᐊᑐᕐᓂᐊᖅᑐᑦ $127 ᒥᓕᐊᓐ ᑖᓚᓂ ᓄᓇᓕᖕᓂ ᐊᔾᔨᒌᙱᑦᑐᓂᒃ ᑖᒃᑯᓂᖓ ᓄᑖᙳᕆᐊᖅᑎᑦᑎᑲᑕᒡᓗᑎᒃ, ᐅᖃᕐᑐᖅ ᔪᐊᓇᓯ.

ᑲᓇᑕᒥ ᒐᕙᒪᒃᑯᑦ ᑐᓴᖅᑎᑦᑎᓵᓚᐅᕐᒥᔪᑦ $2 ᒥᓕᐊᓐ ᐊᑐᖅᑕᐅᓂᐊᕐᓗᓂ ᐃᒡᓗᓕᒃᒥ, ᓴᓪᓕᓂ ᐊᒻᒪ ᑲᖏᖅᑐᒑᐱᒃᒥ ᓄᑖᙳᕆᐊᖅᑎᑦᑎᔪᒪᔾᔪᑎᓄᑦ ᐃᒥᕐᑕᖅᕕᖏᓐᓂᒃ.

“ᐊᓯᐊᒍᑦ ᐃᓱᒪᒋᔭᒃᓴᐅᙱᑦᑐᖅ ᐊᑐᕆᐊᖃᖅᑐᓂᒃ ᐱᓕᕆᔾᔪᑎᒋᔭᐅᔪᓂᒃ ᒐᕙᒪᒃᑯᓐᓂ ᐆᑐᓇᖅ ᐅᓗᕆᐊᓇᙱᑦᑐᒥ ᐃᒥᕐᑕᖅᑐᖃᕐᓂᕐᒥ ᓄᓇᖃᖅᑐᓄᑦ,” ᐳᕉᔅᑐ ᐅᖃᓚᐅᕐᑐᖅ ᒪᐃ 29-ᒥ ᒪᓕᒐᓕᕆᕕᒡᔪᐊᕐᒥᑦ.