ᐃᓕᓐᓂᐊᖅᑏᑦ, ᐃᓐᓇᑐᖃᐃᓪᓗ ᑲᑎᖃᑎᒌᒃᐳᑦ ᓄᓇᕕᒃᒥ

For English version, see ‘We have an amazing culture’: Students, elders reconnect in Nunavik

ᐅᓄᕈᓘᔭᕐᑐᑦ ᐃᓕᓐᓂᐊᖅᕖᑦ ᓄᓇᕕᒃᒥ ᐃᓕᖅᑯᓯᓕᕆᓂᖅᒧᑦ ᐱᓇᓱᐊᕈᓯᖃᓚᐅᖅᑐᑦ ᒫᔅᓯᐅᑎᓪᓗᒍ, ᐃᓕᓐᓂᐊᖅᑎᓂᒃ ᐃᓐᓇᑐᖃᕐᓂ ᐅᐸᒍᑎᑦᑎᑲᑕᖅᖢᑎᒃ ᐊᒻᒪ ᐃᓕᖅᑯᓯᑐᖃᕐᓂᖅ ᑕᐅᑐᒃᑎᑕᐅᑲᑕᖅᖢᑎᒃ.

ᐃᓄᒃᔪᐊᒃᒥ ᐱᓕᕆᓂᖅ ᐸᕐᓇᒃᑕᐅᓯᒪᓚᐅᖅᑐᖅ ᕕᕝᕗᐊᕆ 26-ᒥ ᐱᒋᐊᕐᓗᓂ ᐃᓱᒪᕐᓗᓂ ᒫᔅᓯ 1-ᒥ. ᑭᓯᐊᓂᓕ, “ᐱᖅᓯᕐᓂᐊᓗᒃ” ᐊᕕᐊᓕᓚᐅᕐᒪᑦ, ᐅᖃᖅᑐᖅ ᓈᓐᓯ ᐋᔅᐳᐊᓐ, ᐃᖅᑲᓇᐃᔮᒃᓴᓄᑦ ᐊᔪᕈᓐᓃᖅᓴᕈᑎᒃᓴᓕᕆᔨ ᐃᓕᓴᐃᔨ.

“ᐱᓇᓱᐊᕈᓯᕆᔭᕗᑦ ᐅᖓᕙᕆᐊᖅᑎᑕᐅᓕᓚᐅᖅᑐᖅ ᑎᑭᖢᒍ ᐊᐃᕆᓕ 4,” ᐅᖃᕐᑐᖅ.

ᐅᓇ ᓄᖃᕈᑎᒋᔭᐅᓚᐅᙱᑦᑐᖅ ᐱᓕᕆᔪᓂᒃ ᐅᖂᑕᖅ ᐃᓕᓐᓂᐊᖅᕕᒃᒥ ᖃᓄᐃᓕᐅᑲᑕᖕᓇᐅᑎᓪᓗᒍ ᐱᓇᓱᐊᕈᓯᖅ, ᐱᒋᐊᕈᑎᖃᖅᖢᑎ ᖁᓪᓕᖅᒥ ᐃᑯᒻᒪᐃᔪᖃᖅᖢᓂ ᐊᒻᒪ ᑭᖑᓂᐊᒍᑦ ᖁᙱᐊᑲᑕᒃᖢᑎᒃ ᖃᓄᐃᓕᐅᖅᑎᐅᔪᓂᒃ ᐊᒻᒪ ᐃᓕᓐᓂᐊᖅᑎᕕᓂᕐᓂᒃ ᐃᓕᓐᓂᐊᖅᕕᐅᑉ ᐃᖃᐃᓕᓴᖅᕕᖓᓂᒃ.

ᑭᖑᓂᐊᒍᑦ ᓄᓇᓕᒃᑰᓚᐅᕐᒥᔪᑦ ᐃᓕᓐᓂᐊᖅᑎᑦ ᑎᑎᕋᖅᓯᒪᐅᖅᑐᓂᒃ ᑎᒍᒥᐊᖅᑳᑎᒋᓪᓗᑎᒃ ᐃᓄᒃᑎᑑᖓᔪᓂᒃ, ᓴᖅᑭᑎᑦᑎᓯᒪᓪᓗᑎᒃ ᐃᓕᖅᑯᓯᑐᖃᖏᓐᓂ.

ᖃᐅᒃᐸᖓᓂᒃ ᐅᐸᑲᑕᓚᐅᖅᑐᑦ ᐃᒡᓗᕕᒐᕐᓂ ᓴᓇᔭᐅᓂᑯᓂᒃ ᐃᓄᒃᔪᐊᒃᒥ ᐊᖑᑎᑦ ᑲᑐᔾᔨᖃᑎᒌᓄᑦ ᐱᖓᓱᓂᒃ ᕿᒧᓯᖅᑐᓂᒃ ᐊᔾᔭᖅᑐᐃᑲᑕᒃᖢᑎᒃ ᐃᓕᓐᓂᐊᖅᑎᓂᒃ ᐃᓕᓐᓂᐊᖅᕕᒃᒧᑦ ᐅᑎᒧᓪᓗ.

ᐃᒡᓗᕕᒐᐃᑦ ᐅᖂᓴᖅᓯᒪᓪᓗᓂ ᐊᒻᒪ ᖁᓪᓗᖅᒧᑦ ᖃᐅᒪᓪᓗᑎᒃ ᑖᒃᑯᐊ ᐃᓐᓇᑐᖃᐃᑦ ᐅᓂᒃᑳᖃᑦᑕᓚᐅᖅᑐᑦ ᐃᓅᓱᒃᑐᓄᑦ ᐅᐸᒍᑎᓯᒪᔪᓄᑦ.

“ᑐᓴᖅᑎᑕᐅᖃᑦᑕᓚᐅᖅᑐᑦ ᐃᓅᓯᕆᔭᐅᕙᓚᐅᖅᓯᒪᔪᓂᒃ, ᐱᕈᖅᐸᓪᓕᐊᑎᓪᓗᒋᑦ ᐊᒻᒪ ᐃᓅᓯᖃᖅᑎᓪᓗᒋᑦ ᐃᒡᓗᕕᒐᕐᓂ ᐃᒡᓗᖃᐅᖅᖢᑎᒃ,” ᐋᔅᐳᐊᓐ ᐅᖃᖅᑐᖅ.

ᖁᓪᓕᖅ ᐃᑯᒻᒪᖅᑕᐅᔪᖅ ᐃᓄᒃᔪᐊᒃᒥ. (ᐊᔾᔨᙳᐊᖅ ᐅᑯᓇᙵᑦ ᑲᑎᕕᒃ ᐃᓕᓴᕐᓂᓕᕆᓂᖅ)

ᐃᖃᐃᓕᓴᖅᕕᒃ ᐃᓕᖅᑯᓯᑐᖃᓕᕆᔪᓂ ᐱᑕᖃᐅᓚᐅᕐᒥᔪᖅ ᐃᓕᓐᓂᐊᖅᑐᓄᑦ ᐅᐸᒃᑕᐅᔪᓐᓇᖅᑐᓂᒃ. ᑭᖑᓪᓕᖅᐹᖓᓂᓪᓗ ᐅᓪᓗᖅᒥ ᓂᕆᕕᒡᔪᐊᓚᐅᖅᓯᒪᔪᑦ.

“ᓱᕈᓰᑦ ᖁᕕᐊᓱᑦᑎᐊᖅᑐᖅ ᐊᒻᒪ ᖁᕕᐊᓱᒃᖢᑎᒃ ᖃᓄᐃᓕᐅᖅᑐᓂᒃ,” ᐅᖃᕐᑐᖅ ᐋᔅᐳᐊᓐ.

“ᖃᓄᐃᓕᐅᕈᓘᔭᕐᓇᖅᑐᖅ ᐋᖅᑭᒃᓱᖅᖢᒍ ᐱᓇᓱᐊᕈᓯᖅ, ᑭᓯᐊᓂᓕ ᑕᑯᓪᓗᒋ ᐃᓄᐃᑦ ᐊᒻᒪ ᖁᖓᑲᑕᒃᓯᒪᓂᖏ ᖁᕕᐊᓇᑐᐃᓐᓇᖅᑐᖅ.”

ᓯᑕᓚ ᓯᒪᐃᓗᕐ, ᐃᓄᒃᑎᑐᑦ ᐃᓕᓐᓂᐊᖅᑎᑦᑎᕙᒃᑐᖅ ᐅᖂᑕᖅ ᐃᓕᓐᓂᐊᖅᕕᒃᒥᑦ ᐃᓄᒃᔪᐊᒃᒥ, ᐅᖃᓚᐅᖅᑐᖅ ᑖᓐᓇ ᖃᓄᐃᓕᐅᕐᓇᖅ ᐊᖏᒡᓕᒋᐊᒃᑲᓐᓂᖁᓪᓗᓂᐅᒃ.

“ᐅᓇ ᓄᓇᓕᖕᓄᓕᒫᖑᖁᓇᔭᖅᑕᕋ, ᐃᓕᓐᓂᐊᖅᕕᑐᐊᖅ ᐱᓕᕆᐊᖃᙱᓪᓗᓂ,” ᐅᖃᕐᑐᖅ.

ᓯᒪᐃᓗᕐ ᐅᖃᓚᐅᖅᑐᖅ ᖃᓄᐃᓕᐅᕈᑎᐅᔪᑦ ᑕᐃᒪᐃᑦᑐᑦ “ᐱᒻᒪᕆᐊᓘᓂᖏᓐᓂᒃ, ᓲᖃᐃᒻᒪ ᓄᓇᓖᑦ ᐊᒻᒪ ᐃᓐᓇᑐᖃᐃᑦ ᐃᓕᓐᓂᐊᕐᕕᒃᒧᐊᕈᓐᓇᕐᒪᑕ. ᓱᕈᓯᕗᑦ ᑕᐃᒪᓐᓇ ᑕᑯᓪᓗᑎᒃ ᐊᑕᖃᑦᑕᐅᑎᓂᖅᓴᐅᖂᔨᕙᒃᑐᑦ.”

ᑰᔾᔪᐊᖅᒥ ᔮᓂᒪᕆᒃ ᐃᓕᓐᓂᐊᖅᕕᒃᒥᑦ, ᐃᓕᖅᑯᓯᑐᖃᓕᕆᓂᖅᒧᑦ ᐱᓇᓱᐊᕈᓯ ᐊᒻᒪ ᖃᓄᐃᓕᐅᕈᓘᔭᕐᓇᓚᐅᕐᒥᔪᖅ. ᒫᔅᓯ 19-ᒥ ᐃᓕᓐᓂᐊᖅᑏᑦ ᐃᖅᑲᓇᐃᔭᖅᑐᓪᓗ ᐃᓕᓐᓂᐊᖅᕕᒃᒥ ᐃᖃᓗᒐᓱᒍᑎᓂ ᐊᒻᒪ ᐊᖑᓇᓲᑎᓂᒃ ᓴᓇᑲᑕᓚᐅᕐᑐᑦ ᐊᒻᒪ ᐊᓯᖏᓐᓂ ᐃᓕᖅᑯᓯᒃᑯᑦ ᖃᓄᐃᓕᐅᒐᒃᓴᓂᒃ.

ᐃᓕᓴᐃᔨᓄᑦ ᐊᖔᔪᖅᑳᒧᑦ ᑐᒡᓕᕆᔭᐅᑲᐃᓐᓇᖅᑐᖅ ᓈᓐᓯ ᑲᐃᓐ ᐅᖃᓚᐅᖅᑐᖅ ᐱᓇᓱᐊᕈᓯᕐᒥᑦ ᐱᓕᕆᐊᒃᓴᖃᕈᓘᔭᓚᐅᕐᓂᖏᓐᓂᒃ.

“ᐱᒻᒪᕆᐊᓘᖕᒪᑦ ᐃᓅᓱᒃᑐᖁᑎᕗᑦ ᐃᖅᑲᐅᒪᓗᑎᒃ ᐃᓕᖅᑯᓯᑐᖃᖅ ᐱᒻᒪᕆᐊᓘᓂᖓᓂᒃ,” ᐅᖃᕐᑐᖅ. “ᐅᕙᑦᑎᓐᓂ ᐃᖅᑲᐃᑎᖃᑦᑕᕆᐊᖃᕋᑦᑕ ᐱᐅᔪᐊᓗᖕᒥ ᐃᓕᖅᑯᓯᑐᖃᖃᕐᓂᑦᑎᓐᓂᒃ.

“ᖁᕕᐊᓇᕐᒪᑦ ᐃᓐᓇᑐᖃᕐᓂ ᐅᓂᒃᑳᖅᑐᓂ ᑐᓵᓪᓗᓂ. ᐅᓄᕐᓂᕐᓴᓂ ᐃᓐᓇᑐᖃᕐᓂ ᐃᓕᓐᓂᐊᕐᕕᒃᒧᐊᖅᑐᖃᖃᑦᑕᕆᐊᓕᒃ ᐊᒻᒪ ᐅᓂᒃᑲᐅᓯᖃᖅᐸᒡᓗᑎᒃ ᐃᓅᓯᕐᒥ.”

ᐃᓕᖅᑯᓯᑐᖃᓕᕆᓂᖅᒧᑦ ᐱᓇᓱᐊᒍᓯ ᓄᓇᓕᖕᓂ ᐋᖅᑭᓱᖅᑕᐅᖃᑦᑕᖅᑐᑦ ᐊᒻᒪᓗ ᓂᕈᐊᖅᐸᒃᖢᑎᒃ ᖃᖓᒃᑯᑦ ᐃᓕᖅᑯᓯᑐᖃᓕᕆᓂᖅ ᐊᑐᖅᑕᐅᓇᔭᕐᓂᖓᓂᒃ.