ᐃᑭᐊᖅᑭᕕᒃ ᑐᕌᖓᓇᓱᐊᖅᐳᖅ ᐃᑲᔪᕐᓂᕐᒥ ᐃᓱᒪᒃᓴᖅᓯᐅᕆᒃᑲᓐᓂᕐᓂᕐᒥ ᐃᒡᓗᖃᖅᑎᑦᑎᓂᕐᒥ ᓄᓇᕕᖕᒥ

For English version, see Website aims to help reimagine housing in Nunavik

ᐊᕐᕌᒍᒐᓴᓂ ᖃᐅᔨᒪᖅᑕᐅᑎᒋᓂᕐᒥ ᖃᕋᓴᐅᔭᑎᒍᑦ ᐃᒡᓗᒃᓴᓂ ᑎᑎᕋᐅᔭᕐᓂᕐᒥ ᐊᒻᒪ ᐃᒡᓗᖃᖅᑎᑦᑎᓂᕐᒥ ᓄᓇᕕᖕᒥ ᒫᓐᓇ ᐊᑐᐃᓐᓇᐅᕗᖅ ᐊᑕᐅᓯᐅᔪᒥ ᐃᓂᐅᔪᒥ.

ᓚᕚᓪ ᓯᓚᑦᑐᖅᓴᕐᕕᒡᔪᐊᖓ  ᐱᒋᐊᖅᑎᑦᑎᓚᐅᖅᐳᖅ ᓄᑖᖑᔪᒥ ᐃᑭᐊᖅᑭᕕᖕᒥ ᒫᔾᔨ 20−ᒥ ᑕᐃᔭᐅᔪᒥ ᓄᓇᖃᕐᓂᕐᒥ ᐅᐊᖕᓇᒥ ᑯᐸᐃᖕᒥ. ᑲᑎᙵᓂᐅᕗᖅ ᖃᐅᔨᒪᓂᐅᔪᓂ ᓄᓇᕕᐅᑉ ᐃᒡᓗᒃᓴᓂ ᐱᔭᕆᐊᖃᕐᓂᐅᔪᓄᑦ, ᐅᖃᐅᓯᐅᓪᓗᓂ ᐃᓄᑐᖃᕐᓂ, ᐃᖅᑲᓇᐃᔮᒥᓂᒃ ᖃᐅᔨᒪᔨᕐᔪᐊᖑᔪᓂ ᐊᒻᒪ ᐃᓕᓐᓂᐊᖅᓯᒪᔪᓂ ᐊᕐᕌᒍᒐᓴᓄᑦ.

ᐅᓕᕕᐊ ᐊᐃᑭ ᐅᖃᐅᔾᔪᐃᔨᐅᕗᖅ ᐱᓕᕆᐊᒃᓴᐅᔪᒥ ᐊᒻᒪ ᐱᓕᕆᖃᑎᖃᖅᓯᒪᕗᖅ ᓚᕚᓪ ᓯᓚᑦᑐᖅᓴᕐᕕᒡᔪᐊᖓᓂ  ᑕᐃᒪᙵᓂ 2017−ᒥ. ᐊᑐᖅᑎᐅᔪᑦ ᐅᖃᐅᔾᔪᖅᑕᐅᔪᓐᓇᖅᐳᑦ ᐃᓄᐃᑦ ᐱᓐᓇᕆᔭᖏᓐᓂ ᐊᒻᒪ ᖃᓄᖅ ᐅᑯᐊ ᐱᓐᓇᕆᔭᐅᔪᑦ ᐅᖃᐅᔾᔨᔪᓐᓇᕐᓂᖏᓐᓂ ᓇᑉᐸᖅᑎᕆᓂᕐᒥ ᐊᒻᒪ ᐃᒡᓗᒃᓴᓂ ᑎᑎᕋᐅᔭᕐᓂᕐᒥ ᓴᓇᓯᒪᓂᐅᔪᓂ, ᐅᖃᓚᐅᖅᐳᖅ.

“ᐱᐅᕐᒧᐊᖅᖢᓂ ᐱᓕᕆᓂᐅᕗᖅ ᐅᖃᐅᓯᖃᕐᓂᕐᒥ ᑐᓴᒐᒃᓴᓂ,” ᐅᖃᓚᐅᖅᐳᖅ. “ᐱᓗᐊᖅᑐᒥ ᐅᕙᑦᑎᓐᓄᑦ ᐊᖏᕐᕋᑦᑎᓐᓂ ᐅᖃᐅᓯᖅᑎᒍᑦ ᐃᓕᖅᑯᓯᖃᕐᓂᐅᔪᑎᒍᑦ, ᐃᓕᖅᑯᓯᐅᔪᒥ ᐅᓂᒃᑳᖅᑐᐊᕐᓂᕐᒥ.”

ᐃᑭᐊᖅᑭᕕᒃ ᐊᑐᐃᓐᓇᖃᖅᑎᑦᑎᕗᖅ ᑕᕐᕆᔭᓕᐊᖑᔪᓂ, ᑕᑯᒃᓴᐅᑎᑕᐅᓂᐅᔪᓂ ᐊᒻᒪ ᖃᐅᔨᒪᓂᐅᔪᒥ ᐊᔾᔨᒌᙱᑦᑐᓂ ᐃᓄᖕᓂ ᐱᓕᕆᓯᒪᔪᓂ ᐃᒡᓗᖃᖅᑎᑦᑎᓂᕐᒥ ᐅᑭᐅᖅᑕᖅᑐᒥ.

ᓴᓇᓯᒪᕗᖅ ᑐᓂᓯᓂᕐᒥ ᐱᕙᓪᓕᐊᑎᑦᑎᔨᐅᔪᓂ ᑐᑭᓯᐅᒪᓂᖅᓴᐅᓂᕐᒥ ᐃᒡᓗᓕᐅᕐᓂᕐᒥ ᓄᓇᕕᖕᒥ ᐱᔭᕆᐊᖃᕋᔭᖅᑐᒃᓴᐅᓂᖏᓐᓂ, ᐃᓕᖅᑯᓯᑎᒍᑦ ᐊᒻᒪ ᓄᓇᒋᔭᖓᓂ.

ᓄᓇᕕᒃ ᑕᒪᒃᑭᒐᓚᖕᓂ ᐃᓘᖁᑎᖏᓐᓂ ᐊᑐᐃᓐᓇᐅᑎᑕᐅᕗᑦ ᑯᐸᐃᒃ ᒐᕙᒪᒃᑯᓐᓂ ᐃᓅᖃᑎᒌᖑᔪᓄᑦ ᐃᒡᓗᖁᑕᐅᔪᑎᒍᑦ.

“ᐅᓇ ᐃᒡᓗᓕᕆᔨᒃᑯᑦ ᐱᓕᕆᔨᐅᔪᑦ ᖃᓪᓗᓈᑦ ᓄᓇᖓᓐᓂᙶᖅᑐᒥ ᑐᑭᓯᐅᒪᓪᓚᕆᙱᓚᑦ ᓱᓕᓂᐅᔪᓂ ᐅᑭᐅᖅᑕᖅᑐᒥ,” ᐊᐃᑭ ᐅᖃᓚᐅᖅᐳᖅ.

ᐃᓕᖅᑯᓯᒧᑦ ᓈᒻᒪᒃᑐᒥ ᐃᓗᐊᒍᑦ ᓴᓇᓯᒪᓂᖓᓂ ᐊᖏᕐᕋᐅᔪᓄᑦ ᓄᓇᕕᖕᒥ. (ᐅᓕᕕᐊ ᐊᐃᑭᒧᑦ ᐊᔾᔨᓕᐅᖅᑕᐅᔪᖅ)

ᓄᑖᖑᔪᓂ ᐊᖏᕐᕋᓂ ᐆᒃᑑᑎᐅᔪᓂ ᓇᒃᓯᐅᔾᔭᐅᕙᒃᑐᓂ ᐅᑭᐅᖅᑕᖅᑐᒧᑦ ᐃᓛᓐᓂᒃᑯᑦ ᓈᒻᒪᓲᖑᙱᓚᑦ ᐅᑭᐅᖅᑕᖅᑐᕐᒥᐅᓂ ᐃᓅᓯᕆᕙᒃᑕᖏᓐᓂ, ᑐᕌᖅᑎᑦᑎᔪᓐᓇᖅᑐᒥ ᐊᖏᐸᓗᒃᑐᓂ ᐊᑲᐅᙱᓕᐅᕈᑕᐅᔪᓄᑦ. ᐊᐃᑭ ᑎᒃᑯᐊᕆᓚᐅᖅᐳᖅ ᒫᓐᓇᒨᓕᖓᔪᓂ ᐅᖅᓱᐊᓗᖕᒥ ᐊᐅᓚᑕᐅᔪᓂ ᑭᐊᒃᓴᐅᓯᓂ ᐱᓕᕆᔾᔪᓯᐅᔪᓂ ᓄᑖᖑᔪᓂ ᐊᖏᕐᕋᐅᔪᓂ ᐆᒃᑑᑎᐅᓗᓂ.

“ᐅᑯᓂᖓ ᓄᑕᐅᙱᑦᑐᓂ ᑭᐊᒃᓴᐅᑎᖃᖅᐳᒍᑦ ᐊᒻᒪ ᐱᐅᓛᖑᕗᑦ,” ᐅᖃᓚᐅᖅᐳᖅ.

“ᓄᑖᖑᔪᑦ ᑭᐊᒃᓴᐅᑎᐅᔪᓂ ᐱᓕᕆᔾᔪᓯᐅᔪᓂ ᐱᐅᙱᕐᔪᐊᖅᐳᑦ ᐃᒡᓗᖏᓐᓄᑦ. ᓄᓇᓕᖕᒥᐅᑕᐃᑦ ᐅᖃᐅᔾᔪᖅᑕᐅᓚᐅᙱᓚᑦ ᖃᓄᖅ ᐊᑐᕐᓂᕐᒥ … ᑕᐃᒫᒃ ᓴᖅᑭᑎᑦᑎᓚᐅᖅᐳᑦ ᐅᖁᖕᒥ.”

ᐊᓯᐊᓂ ᐃᓱᒪᓂᐅᔪᒥ ᓄᓇᖃᕐᓂᕐᒥ ᐅᐊᖕᓇᒥ ᑯᐸᐃᖕᒥ ᐱᓕᕆᐊᒃᓴᐅᔪᒥ ᐊᑐᐃᓐᓇᖃᖅᑎᑦᑎᕗᖅ ᓱᖏᐅᔾᔨᔪᓐᓇᖅᑐᒥ, ᖃᔅᓯᒐᓚᖕᓂ−ᐱᐅᓯᖃᑎᒌᖑᔪᓂ ᐃᒡᓗᓄᑦ. ᐅᓄᕐᓂᖅᓴᓂ ᐊᖏᖃᑎᖃᓚᐅᖅᐳᑦ ᖃᐅᔨᓴᐃᓂᐅᔪᓂ ᑭᓱᓂ ᓄᓇᕕᒻᒥᐅᑕᓂ ᐱᔭᒪᓚᓇᔭᕐᓂᖏᓐᓂ ᐊᖏᕐᕋᖏᓐᓂ.

ᐃᑭᐊᖅᑭᕕᒃ ᑎᒃᑯᐊᕆᓚᐅᕆᕗᖅ ᐊᑕᐅᓯᐅᔪᒥ ᐊᖏᓂᖓᓂ ᓈᒻᒪᙱᓚᖅ ᑕᒪᒃᑭᓂ ᓄᓇᕕᖕᒥ ᓄᓇᓕᐅᔪᓂ. ᓲᕐᓗ, ᑲᖏᖅᓱᐊᓗᔾᔪᐊᕐᒥ ᓇᐹᖅᑐᖃᖅᐳᑦ ᓴᓪᓗᐃᑦ ᐃᓂᖃᖅᖢᓂ ᐅᔭᕋᕐᔪᐊᕐᒥ. ᐅᑯᐊ ᐊᔾᔨᒌᙱᑦᑐᓂ ᐊᕙᑎᐅᔪᓂ ᖃᐃᖁᔨᓂᖃᖅᐳᖅ ᐊᔾᔨᒌᙱᑦᑐᓂ ᑐᕌᒐᕆᔭᐅᔪᓂ ᐃᒡᓗᒃᓴᓂ ᓇᑉᐸᖅᑎᕆᓂᕐᒥ ᐊᒻᒪ ᓴᓇᔭᐅᓂᖓᓂ.

ᐊᐃᑭ ᐅᖃᓚᐅᖅᐳᖅ ᓯᓚᑦᑐᖅᓴᕐᕕᒡᔪᐊᖅ ᑕᒪᒃᑭᓗᒃᑖᓂ ᑐᓴᒐᒃᓴᐅᔪᓂ ᐊᑐᐃᓐᓇᐅᑎᑦᑎᔪᒪᕗᑦ ᓄᓇᓕᖕᒥᐅᑕᓄᑦ, ᑕᑯᒃᓴᐅᑎᑕᐅᓗᓂ ᐃᓕᓐᓂᐊᕐᕕᖕᓄᑦ ᐊᒻᒪ ᐃᑲᔪᕐᓗᑎᒃ ᒪᒃᑯᒃᑐᓂ ᑐᑭᓯᐅᒪᓂᕐᒥ ᖃᓄᖅ ᐃᑲᔪᕈᓐᓇᕐᓂᖏᓐᓂ ᐊᒃᑐᐃᓂᖏᓐᓂ ᐃᒡᓗᖃᖅᑎᑦᑎᓂᕐᒥ ᓄᓇᕕᖕᒥ.

“ᓄᓇᖃᖅᖢᓂ ᐅᐊᖕᓇᒥ ᑯᐸᐃᖕᒥ 500-ᓂ−ᒪᒃᐱᒐᖃᖅᑐᓂ ᐅᓂᒃᑳᓕᐊᖑᑐᐃᓐᓇᙱᓚᖅ, ᑭᓯᐊᓂ ᐱᐅᕐᒧᐊᖅᑐᒥ ᐱᓕᕆᓂᐅᔪᒥ ᐅᖃᐅᓯᖃᕐᓂᕐᒥ ᑐᓴᒐᒃᓴᓂ ᓄᓇᓕᖕᓄᑦ,” ᐅᖃᓚᐅᖅᐳᖅ.