ᐃᓄᒃᑐᑦ ᐱᑕᖃᐃᓐᓇᕐᓂᐊᖅᐹ?

ᖁᕕᐊᓲᑎᖃᕋᑦᑕ ᓄᓇᕗᑦ 20-ᐅᓕᕐᓂᖓᓂᒃ ᕿᒥᕐᕈᐊᖅᖢᑎᒍᑦ ᑖᔅᓱᒪ ᓇᖕᒥᓂᖅ ᒐᕙᒪᓕᕆᔨᖃᖅᑐᑦ ᑎᐅᕆᑑᕆᐅᑉ ᐊᓂᒍᐃᓯᒪᓂᖏᓐᓂ ᐊᒻᒪ ᐱᓇᓱᒋᐊᖃᖅᓯᒪᔭᖏᓐᓂᒃ ᒫᙵᑦ ᑎᑕᐅᓯᕆᓂᕐᒥᒃ ᐊᒻᒪ ᑕᑯᓐᓇᒐᒃᓴᓕᕆᓂᕐᒥᒃ ᒪᐅᖓ ᑮᓇᐅᔭᓕᐅᕋᓱᖕᓂᕐᒧᑦ, ᐃᓄᒃᑐᑦ ᖃᓄᐃᓕᕐᓂᖓᓂᒃ ᐊᒻᒪᓗ ᓯᓚᐅᑉ ᐊᓯᙳᖅᓂᖓᓂᒃ. ᐃᓚᖏᓐᓂᒃ ᓄᓇᕗᒻᒥᐅᑕᑦ ᐅᓂᒃᑲᐅᓯᖏᓐᓂᒃ ᑐᓴᕐᓂᐊᖅᑐᒍ ᖃᓄᖅ ᓄᓇᕗᑦ ᑐᑭᖃᕐᒪᖔᑦ ᑖᒃᑯᓄᖓ ᐊᒻᒪᓗ ᖃᓄᐃᑦᑐᓂ ᐊᓯᙳᕈᑎᒃᓴᓂᒃ ᑕᑯᔪᒪᖕᒪᖔᖏᓐᓂᒃ ᐊᕐᕌᒍ 20 ᐊᒡᒋᖅᑐᓂᒃ.

ᓄᓇᕗᑦᐱᒋᐊᖅᑕᐅᓚᐅᕐᓯᒪᔪᖅ ᒐᕙᒪᒃᑯᑦ ᐃᓄᖕᓄᑦ ᖃᒡᓕᓂᕐᓴᐅᖁᓪᓗᒋᑦ, ᒪᑯᓄᖓᓗᐊᖅ ᐃᓄᖕᓂ ᐅᖓᓯᒃᑐᕐᒥᐅᓂᒃ ᓄᓇᕗᒥᐅᑕᓂᒃ.

ᐃᒪᓐᓇᐅᓗᐊᓚᐅᕐᓯᒪᔪᖅ, ᐱᑕᖃᕐᓂᐊᕐᓂᖓ ᓄᓇᕗᑦ ᓴᐳᔾᔨᓯᒪᕐᓂᒨᕐᓂᐊᕐᓂᕋᖅᑕᐅᓪᓗᓂ—ᐊᒻᒪᓗ ᓲᖃᐃᒻᒪ ᓴᕿᑎᒋᐊᖅᑎᑦᑎᒃᑲᓐᓂᕐᓂᕐᒥᒃ—ᐃᓄᒃᑐᑦ, ᐃᓱᒪᒋᔭᐅᓪᓗᓂ ᑖᓐᓇ ᐅᖃᐅᓯᖅ, ᐱᒻᒪᕆᐊᓘᓂᖓᒍᑦ ᐊᒻᒪ ᐊᑑᑎᖃᕐᓂᖓᓄᓪᓗ, ᐊᑐᖅᑕᐅᓕᕐᓗᓂ ᐊᐅᓚᑦᑎᓂᖏᑦᑎᒍᑦ ᒐᕙᒪᒃᑯᑦ ᐱᔨᑦᑎᕋᐅᑎᓕᕆᓂᒃᑯᑦ ᐃᓄᖕᓄᑦ.

ᑐᓴᖃᑦᑕᖅᐳᒍ, ᐱᕙᓪᓕᐊᓪᓗᓂᓗ, ᑕᒪᓐᓇᑕᐃᒪᐃᓯᒪᙱᑦᑐᖅ, ᐊᒻᒪᓗ ᖁᕕᐊᓇᙱᑦᑐᓂᒃ ᑐᓵᖃᑦᑕᖅᐳᒍ ᖃᓄᐃᒻᒪ ᑕᒪᓐᓇ ᐱᓪᓚᕆᐅᓕᕐᓯᒪᙱᓐᓂᖓᓂᒃ. ᐃᓛᓐᓂᒃᑯᑦ ᑐᓴᓚᐅᖅᐸᒃᖢᑕ ᐃᓱᒪᒋᔭᓕᖕᓂᑦ ᐅᖃᐅᓯᕗᑦ ᑲᑕᒃᓯᒪᓂᖓᓂᒃ.

ᑕᒪᐅᓇᑦᑕᐃᓐᓇᖅ, ᑐᓴᖃᑦᑕᖅᐳᒍᑦ ᐃᒡᓗᖔᖓᒍᑦ ᐃᒪᓐᓇ—ᐅᖃᐅᓯᕐᓂᒃ ᐅᖃᖅᑐᓂᒃ ᐃᒪᓐᓇ ᐅᖃᐅᓯᖅ ᖃᓄᐃᙱᓐᓂᖓᓂᒃ ᐊᒻᒪ ᐱᕙᓪᓕᐊᓂᖓᓂᒃ, ᐊᒻᒪᓗ ᐅᓄᕐᓂᕐᓴᐅᓕᖅᖢᑎᒃ ᐃᓄᐃᑦ ᐅᖃᓪᓚᒍᓐᓇᕐᓂᕋᖅᑐᑦ ᐃᓄᒃᑐᑦ. ᓇᓕᐊᙳᖕᒪᑦ? ᐃᓄᒃᑐᑦᐱᑕᖃᐃᓐᓇᕐᓂᐊᕐᐹ?

ᓄᓇᕐᔪᐊᑉ ᐃᓚᖓᓂᒃ, ᐅᖃᐅᓯᕐᒥ ᐊᓯᐅᔪᖃᖃᑦᑕᖅᐳᖅ ᐅᓪᓗᐃ 14 ᓇᓪᓕᕌᖓᑕ. ᐅᖃᐅᓯᓕᕆᔩᑦ ᐅᒃᐱᕈᓱᒃᑐᑦ ᓇᑉᐸᓪᓗᐊᖏᑦ 7,000-ᓂᒃ ᐅᖃᐅᓯᕐᓂᒃ, ᐱᑕᖃᕈᓐᓃᑦᐊᒻᒪᕆᖕᓂᐊᕐᓂᖏᓐᓂᒃ ᐊᕐᕌᒍᑦ 100 ᐊᓂᒍᕐᓯᒪᓕᕈᑎ.

ᔫᓇᐃᑕᑦ ᓇᐃᓴᓐᔅ ᐃᓕᓐᓂᐊᖅᑐᓕᕆᓂᕐᒧᑦ, ᖃᐅᔨᓴᖅᑐᓕᕆᓂᕐᒧᑦ ᐊᒻᒪ ᐃᓕᖁᓯᓕᕆᓂᕐᒧᑦ ᑲᑐᔾᔨᖃᑎᒌᖏᑦ ᐋᕿᒃᓱᐃᖃᑦᑕᕐᒪᑕ ᖁᐊᕐᓵᕐᓇᖅᑐᒦᑦᑐᓂᒃ ᐅᖃᐅᓯᕐᓂᒃ ᒪᓕᒃᖢᑎᒃ ᖃᓄᑎᒋ ᐊᓯᐅᑐᐃᓐᓇᕆᐊᖃᕐᓂᖏᑦᑎᒍᑦ. ᐊᒥᓲᓂᕐᓴᐃᑦ ᐅᖃᓪᓚᐅᓰᑦ ᐃᓄᐃᑦ ᐅᖃᐅᓯᖓᒍᑦ ᑲᓇᑕᒥ ᓇᓗᓇᐃᖅᑕᐅᓯᒪᕗᑦ “ᐊᓯᐅᑐᐃᓐᓇᕆᐊᖃᖅᑐᑦ,” ᑕᒪᓐᓇ ᑐᑭᖃᖅᑐᖅ ᐃᒪᓐᓇ “ᐊᒥᓲᓂᕐᓴᑦ ᓱᕈᓰᑦ ᐅᖃᓪᓚᖃᑦᑕᖅᑐᑦ ᐅᖃᐅᓯᕐᒥᓂᒃ ᐊᑐᕐᖢᑎᒃ, ᑭᓯᐊᓂᓕ ᑕᒪᓐᓇ ᐃᓚᐃᓐᓇᙱᓐᓄᑦ ᐅᐸᒃᓯᒪᕙᒃᑕᖏᓐᓂᒃ ᐊᑐᖅᑕᐅᕙᒃᖢᓂ (ᓲᕐᓗᐊᖏᕐᕋᒥ).”

ᓲᓯ ᐊᒻᒪᓘᓯ ᐅᓈᓕᒃ ᐅᖃᓕᒫᖅᐴᒃ ᕿᒻᒥᕈᑦ ᖃᖅᑲᓕᒃ ᐃᓕᓐᓂᐊᕐᕕᒃᒥᑦ ᓈᑦᑎᖑᔭᐅᑎᓪᓗᒍ, ᔭᓄᐊᕆ 27-ᒥ, 2019, ᓇᓪᓕᐅᓐᓂᕐᓯᐅᖅᑎᓪᓗᒋᑦ 20-ᖓᓂᒃ ᑲᓇᑕᒥ ᐃᓚᒌᑦ ᐅᖃᓕᒫᕐᓇᐅᑉ ᐅᓪᓗᖓᓂᒃ, ᐊᖓᔪᖅᑳᖑᔪᑦ ᐊᒻᒪ ᑲᒪᔨᐅᔪᑦ ᐃᓕᓐᓂᐊᕐᕕᒃᒥᑦ ᐅᖃᓕᒫᑲᑕᒍᓐᓇᖅᖢᑎᒃ ᐃᓄᒃᑎᑑᖓᔪᓂᒃ ᐊᒻᒪ ᖃᓪᓗᓈᑎᑐᑦ. (ᐊᔾᔨᙳᐊᖅ ᓄᓇᕗᑦ ᒐᕙᒪᒃᑯ ᐃᓕᓐᓂᐊᕐᓂᓕᕆᔨᖏᓐᓂᒃ)

ᐃᓄᐃᓐᓇᖅᑐᓐ ᐅᖃᐅᓯᖅ ᓇᓗᓇᐃᕐᑕᐅᓯᒪᔪᖅ “ᖁᐊᕐᓵᕐᓇᖅᑐᒦᓪᓚᕆᖕᓂᖓᓂᒃ” (ᐆᑐᓇᖅᑕᐅᖅ ᓄᓇᑦᓯᐊᕗᑦ ᐅᖃᓪᓚᐅᓯᖓᑎᑐᑦ ᓛᐸᑐᐊᒥᑦ); ᑕᒪᓐᓇᓕ ᑐᑭᓕᒃ ᐃᒪᓐᓇ “ᓱᕈᓰᑦ ᐊᖏᕐᕋᖏᓐᓂᒃ ‘ᐅᖃᐅᓯᕐᖓᐅᑎᒥᑦ’ ᐊᑐᕈᓐᓃᕐᓂᖏᓐᓂᒃ ᐊᖏᕐᕋᕆᔭᖏᓐᓂᒃ.” (ᐊᓯᖏᑦ ᓇᓗᓇᐃᕐᓯᓯᒪᒍᑎᑦ, ᐱᕙᓪᓕᐊᓂᖓ ᐊᓯᐅᑐᐃᓐᓇᕆᐊᖃᕐᓂᖓ, “ᐊᒃᓱᐊᓗᒃ ᖁᐊᕐᓵᕐᓇᖅᑐᒦᓐᓂᖅ” ᐊᒻᒪ “ᖁᐊᕐᓵᕐᓇᖅᑐᒦᒻᒪᕆᒃᑐᑦ.” ᑭᖑᓪᓕᖅᐹᕐᓕ ᓇᓗᓇᐃᔭᕈᑎᓂᒃ “ᐊᓯᐅᒻᒪᕆᒃᑐᖅ.”)

ᖃᐅᔨᒪᔪᒍᑦ ᐃᓄᒃᑐᑦ, ᐊᓯᖏᑦᑎᑐᑦ ᐅᖃᐅᓯᖅᑎᑐᑦ, ᐊᓯᖑᖅᐸᓪᓕᐊᖕᒪᑦ. ᑭᓯᐊᓂᓕ ᐅᖃᐅᓰᑦᑕᐅᖅ ᐊᓯᐅᑐᐃᓐᓇᔭᒻᒪᑕ.

ᐃᓄᒃᑐᑦ ᑕᐃᒪᐃᖃᑕᐅᓛᖂᖅᐹ? ᐊᑕᐅᓯᖅ ᑲᓇᑕᒥ ᐃᓄᐃᑦ ᐅᖃᐅᓯᖓ ᐊᓯᐅᓯᒪᓕᖅᑐᖅ ᐊᕐᕌᒍ ᖁᓪᓕᑦ ᐃᓗᐊᓂᑦ. ᐅᓇ ᐅᖃᓪᓚᐅᓯᐅᖃᑦᑕᕐᓂᑯ ᕆᒍᓚᑦ, ᓛᐸᑐᐊᒥᑦ, ᓄᓇᓕᒃ ᐃᓚᒋᔭᐅᔪᖅ ᓛᐸᑐᐊᒥᑦ ᐃᓄᐃᑦ ᓄᓇᖓᓂᒃ.

ᑭᓯᐊᓂᓕ ᑕᐃᒪᐃᒃᑲᓐᓂᕆᐊᖃᕈᓐᓃᖅᑐᖅ, ᐅᖃᖅᑐᓯ. ᑕᒪᑐᒥᖓ ᐅᒃᐱᕈᓱᓗᐊᙱᓗᓯ. ᑕᑯᓚᐅᕐᑕ ᓇᓗᓇᒃᑯᑎᓂᒃ ᓴᖏᓂᖓᑕ ᐅᖃᐅᓯᐅᑉ.

“ᐱᒻᒪᕆᐅᒐᓱᖕᓂᖅ” ᐃᑲᔪᖅᐳᖅ ᑐᑭᓯᑎᑦᑎᒃᑲᓐᓂᕐᓂᕐᒥᒃ ᐊᑐᖅᑕᐅᓂᕋᖅᓯᒪᔪᓂᒃ

ᐃᓄᒃᑐᑦ ᐅᖃᐅᓯᕐᖓᐅᑎᐅᖕᒪᑦ 22,000-ᓄᑦ 35,000-ᖏᓐᓃᓪᓗᐊᕐᑐᓂᒃ ᐃᓄᖕᓂᑦ ᓄᓇᕗᒥᑦ. ᑕᒪᓐᓇ ᓈᒻᒪᒃᑐᖅ ᓇᐃᓴᐅᑎᑎᒍᑦ.

ᑭᓯᐊᓂᓕ UNESCO ᓇᓗᓇᐃᕐ ᓯᓯᒪᔪᑦᓯᓯᓕᐊᓐ (ᐅᖃᐅᓯᖅᐃᑕᓕᒥᑦ), 5 ᒥᓕᐊᓐᓄᑦ ᐅᖃᐅᓯᐅᕙᒃᖢᓂ, ᐃᒪᓐᓇ “ᐊᓯᐅᑐᐃᓐᓇᕆᐊᓕ,” ᐊᒻᒪ ᓚᒻᐹᑦ, ᐅᖃᐅᓯᖅ 3.5 ᒥᓕᐊᓐᓄ ᐃᓄᖕᓂ ᐃᑕᓕᐅᑉ ᐃᓚᖓᓂᒃ ᐊᒻᒪ ᓱᕕᑦᓱᓚᓐᒥ ᓇᓗᓇᐃᖅᑕᐅᓯᒪᓪᓗᓂ “ᖁᐊᕐᓵᕐᓇᖅᑐᒦᓪᓚᕆᒃᑐᑦᒥᑦ.” ᓇᓗᓇᙱᓚᕐᓕ, ᖃᔅᓯᐅᓂᖏ ᐅᖃᓪᓚᒃᐸᒃᑐᑦ ᓇᓗᓇᐃᒃᑯᑎᐅᙱᓐᓂᖓᓂᒃ ᐱᑕᖃᐃᓐᓇᐅᔭᕈᓐᓇᕐᓂᖓᓄᑦ.

ᑭᓯᐊᓂᓕ ᐃᓄᒃᑐᑦ ᐊᑐᖅᑕᐅᕙᓪᓕᐊᔪᖅ, ᐅᖃᖅᑐᓯ. ᐄᓛᒃ, ᓇᐃᓴᐃᔨᒃᑯᑦ ᓇᐃᓴᐅᑎᖏᑦ ᓴᕿᑎᑦᑎᓯᒪᔪᑦ ᐃᓄᐃᑦ ᐅᖃᕐᓯᒪᔪᑦ ᐃᓄᒃᑐᑦ ᐅᖃᐅᓯᖃᕐᖓᐅᑎᖃᕐᓂᕋᖅᖢᑎᒃ ᐅᕝᕙᓘᓐᓃᑦ ᐅᖃᐅᓯᐅᓂᖓᓂᒃ ᐊᖏᕐᕋᕆᔭᐅᔪᓂᒃ ᐅᓄᕐᓯᕚᓪᓕᕐᓯᒪᓪᓗᑎ ᐊᕐᕌᒍᓂ ᐊᓂᒍᓵᕐᓯᒪᔪᓂᒃ, ᐊᕐᕌᒍᒐᓴᖕᓂ ᓱᒃᑲᐃᑦᑐᒥᒃ ᓄᖑᑉᐸᓪᓕᐊᓚᐅᕐᑎᓪᓗᒍ. ᐊᒻᒪᓗ ᑕᒪᒃᑯᐊ ᓇᐃᓴᐃᔨᒃᑯᑦ ᓇᐃᓴᐅᑎᖏᑦ ᑕᒻᒪᕐᓯᒪᓪᓗᐊᙱᑦᑐᑦ, ᕼᐃᓖ.

ᑕᒪᓐᓇ ᑕᐃᒪᐃᓪᓕᖓᓪᓚᕆᒋᐊᒃᓴᖓ ᐅᒃᐱᕆᓗᐊᙱᓪᓗᒍ. ᓇᐃᓴᐃᔨᒃᑯᑦ ᓇᐃᓴᐅᑎᖏ ᐅᖃᐅᓯᓕᕆᓂᒃᑯᑦ ᐊᖏᕐᕋᕆᔭᐅᔪᓂᒃ ᒪᓕᒃᓯᒪᔪᖅ ᓇᖕᒥᓂᖅ ᐅᓂᒃᑲᐅᓯᖃᕐᓂᒃᑯᑦ. ᓇᐃᓴᐅᓯᕆᔨ ᑎᑎᖅᓯᑐᐃᓐᓇᕐᓗᓂ ᐄᒥᑦ ᐅᕝᕙᓘᓐᓃᑦ ᐋᒃᑳᒥᑦ.

ᐅᖃᕈᕕᑦ ᐃᓄᒃᑐᑦ ᐅᖃᓪᓚᒍᓐᓇᕐᓂᕐᓂᒃ, ᑕᕝᕙᐄ. ᖃᐅᔨᒪᓇᙱᑦᑎᐊᕐᑐᖅ ᖃᓄᑎᒋ ᐃᓄᒃᑐᑦ ᑭᐅᔨᐅᔪᖅ ᐅᖃᓪᓚᒃᑎᒋᖃᑦᑕᕐᒪᖔᑦ, ᐅᕝᕙᓘᓐᓃᑦ ᐅᖃᓪᓚᑦᑎᐊᖃᑦᑕᕐᒪᖔᑦ.

ᑭᓯᐊᓂᓕ ᑭᓱᒧ, ᐊᐱᕆᕗᑎᑦ, ᐃᓄᒃ ᐃᓄᒃᑑᒥ ᐅᖃᐅᓯᖃᕐᓂᕐᒥᑦ ᐅᖃᐅᓯᖃᓚᐅᙱᑦᑐᖅ ᒫᓐᓇ ᐃᓄᒃᑑᕈᓐᓇᕐᓂᕋᓕᕐᐸ? ᐃᒪᓐᓇᖃᐃᑦ, “ᑕᑯᒥᓇᕐᓂᕐᒧᑦ”, ᓄᓇᖃᖅᑳᕐᓯᒪᓂᖅ “ᑕᕝᕙᐅᓕᕐᒪᑦ.” ᐃᓄᐃᑦ ᐃᓄᖕᓂᑦᖃ ᓪᓗᓈᓂᓪᓗ ᓯᕗᕚᓖᑦ ᑕᒪᐃᓐᓂᐸᓗᒃ ᓇᓗᓇᐃᕐᓯᒪᖕᒪᑕ “ᐃᓅᓂᕐᒥᒃ.” ᑕᒪᓐᓇ “ᑕᑯᒥᓇᕐᒪᑦ” ᐃᓅᓪᓗᓂ ᐅᕝᕙᓘᓐᓃᑦ ᐃᓄᒃᑐᑦ ᐅᖃᕈᓐᓇᕐᓂᕋᕐᓂᖅ.

ᑕᒪᓐᓇ ᐱᔾᔪᑎᐅᔪᖅ, ᐊᖏᓂᕐᓴᒃᑯᑦ, ᐅᓄᕐᓯᕚᓪᓕᕈᑎᖃᕐᓂᕐᒥᒃ ᐃᒪᓐᓇ ᓇᖕᒥᓂ ᐅᖃᐅᓯᕆᓂᒃᑯᑦ ᐃᓄᒃᑐᑦ ᐊᑐᖃᑦᑕᕐᓂᕐᒥᒃ.

ᐃᓱᒪᓕᕌᖓᑦᑕ ᐅᖃᐅᓯᐅᑉ ᐊᓯᙳᕐᓂᖓᓂᒃ, ᐃᓱᒪᔭᓐᓇᑦᑕ ᐅᖃᓪᓚᐅᓯᕐᒥᒃ, ᐃᓱᒪᙱᓐᓂᕐᓴᐅᓪᓗᑕ ᖃᓄᖅ ᐅᖃᖅᑕᐅᓂᖏᓐᓂᒃ (ᑐᓴᕐᓴᐅᓂᖏᑦ) ᐊᒻᒪ ᐅᖃᓪᓚᐅᓯᒻᒪᕆᒃᑯᑦ. ᑐᓴᖃᑦᑕᕐᓂᒃᑯᑦ ᐊᒻᒪ ᐅᖃᓪᓚᐅᓯᒻᒪᕆᐅᔪᑦ ᐊᓯᙳᓕᔭᒻᒪᑕ, ᐃᓛᓐᓂᒃ ᐊᑯᓂᐊᓘᒐᓗᐊᖅ.

ᑭᓯᐊᓂᓕ ᐊᓯᙳᕈᑎᐅᔪᑦ ᐅᖃᐅᓯᒃᑯᑦ—ᐃᓚᖏᓐᓄᑦ ᑕᐃᔭᐅᕙᓕᕐᑐᖅ ᐅᖃᓪᓚᐅᓯᖅ—ᕿᓚᒥᐊᓗᒃ ᐊᓯᙳᕈᑎᐅᔪᓐᓇᕐᒪᑕ. ᑕᒪᑐᒥᖓ ᐅᖃᐅᓯᖃᒡᒍᔪᐃᑦ ᐅᖃᐅᓯᖃᓕᕌᖓᑕ ᐅᖃᐅᓯᐅᑉ ᐊᓯᙳᖅᐸᓪᓕᐊᓂᖓᓂᒃ.

ᑭᓱᓕᕆᓗᐊᙱᓐᓂᖅ ᐃᓅᓯᖅ, ᐅᖃᖃᑎᖃᙱᓐᓂᕐᓴᐅᓂᖅ

ᓄᒃᑎᖅᑕᐅᓂᖅ ᓄᓇᓕᕋᓛᓂᒃ ᓄᓇᓕᐅᓕᖅᑐᓄᑦ 1950-ᖏᓐᓂᒃ ᐊᒻᒪ 1960-ᖏᓐᓂᒃ ᑕᒪᐃᓐᓂᐸᓗᒃ ᓄᓇᕗᒥᑦ ᐊᓯᙳᕈᑎᐅᓚᐅᕆᕗᖅ ᐅᖃᓪᓚᐅᓯᕐᒧᑦ. ᐊᒻᒪᓗ ᐊᖑᑏᑦ ᖃᓄᐃᓕᐅᕈᓯᖏᑦ ᐊᓯᙳᖅᓕᖅᖢᑎᒃ ᐊᖑᓇᓱᒃᐸᖕᓂᕐᒥᑦ ᐃᖅᑲᓇᐃᔮᖃᓕᕐᓂᕐᒧᑦ ᑮᓇᐅᔭᓕᐅᕈᑎᒃᓴᓂᒃ, ᒪᑯᐊ ᖃᐅᔨᒪᔭᐅᑦᑎᐊᓚᐅᕐᑐᑦ ᐅᖃᐅᓰᑦ ᓯᓚᐅᑉ ᒥᒃᓵᓄᑦ, ᓯᖁ ᖃᓄᐃᓕᖓᓂᖓ, ᐊᐳᑎ, ᖁᐊᖃᑦᑕᕐᓂᖅ ᐊᒻᒪ ᒪᙳᒃᐸᓪᓕᐊᓂᖅ, ᓂᕐᔪᑏᑦ ᐃᓕᖁᓯᖏᑦ, ᐊᒻᒪᓗ ᐊᒥᓱᑦ ᐃᓅᓯᖏᓐᓄᑦ ᐊᒃᑐᐊᓂᑯᑦ ᓄᓇᓕᕋᓛᖑᑎᓪᓗᒋᑦ ᐊᑐᖅᑕᐅᙱᓐᓂᕐᓴᐅᓕᖅᖢᑎᒃ.

ᑭᓇᒧᑦ ᑖᒃᑯᐊ ᐅᖃᐅᓰᑦ ᐊᑐᖅᑕᐅᒋᐊᖃᙱᑉᐸᑕ, ᑕᐃᒪᓕ ᐅᖃᐅᓰ ᑭᖑᕚᑦᑎᓐᓄᑦ ᑐᓴᖅᑕᐅᙱᓐᓂᕐᓴᐅᓇᔭᕐᑐᑦ ᑖᒃᑯᐊᓗ ᓄᓇᓕᖕᓃᑐᐃᓐᓇᓕᕐᓗᑎᒃ, ᐊᒃᑐᐊᓂᖃᕈᓐᓃᕐᓗᑎᒃ ᐃᑲᔫᑎᐅᔪᓐᓇᕋᔭᖅᑐᓂᒃ—ᑭᓯᐊᓂᓕ ᐃᓱᒪᒃᑯᑦ—ᓄᓇᒧᑦ.

ᐊᖏᕐᕋᕆᔭᒥᑦ, ᐊᕐᓇᓄᑦ ᐃᓂᒋᔭᐅᓂᕐᓴᐅᓚᐅᕐᑐᖅ, ᐃᓚᖏᑦ ᐊᕐᓇᐃᑦ ᐃᒪᐃᑦᑐᓴᐅᓚᐅᕆᕗᑦ ᐅᖃᐅᓯᕐᓂᒃ ᐊᒃᑐᐊᔪᓂᒃ ᒥᕐᓱᕐᓂᕐᒧᑦ ᐊᒻᒪ ᓂᕿᓕᕆᓂᕐᒧᑦ ᐊᑐᙱᓐᓂᕐᓴᐅᓕᖅᖢᑎᒃ, ᑖᒃᑯᐊᓗ ᐃᖅᑲᓇᐃᔮᒃᓴᓂᒃ ᐃᓱᒪᓂᕐᓴᐅᓪ ᓗᑎᒃ ᒪᑯᓂᖓᐅᙱᑦᑐᖅ ᐊᑐᖅᑕᐅᖃᑦᑕᖅᑐᓂᒃ ᓄᓕᐊᕆᔭᐅᔪᓄᑦ ᐊᒻᒪ ᐊᓈᓇᒋᔭᐅᔪᓄᑦ.

ᑕᐃᒪᐃᓐᓂᖓᓄᓪᓕ, ᑭᓇᑐᐃᓐᓇᖅᐋᕿᒃᓯᓯᒪᙱᒃᑯᓂ ᐊᓯᖑᖅᑎᑦᑎᓇᓱᖕᓂᕐᒥᑦ ᐅᖃᐅᓯᕐᓂᒃ, ᑕᐃᒪᓕ ᐊᓯᙳᕈᑎᐅᕗᖅ.

ᐊᓯᙳᕈᑎ, ᓴᙲᒡᓕᕚᓪᓕᕋᔭᕐᒪᑦ. ᐊᕐᕌᒍᓂ ᖃᓂᑦᑐᓂᒃ ᐊᒡᒋᖅᑐᓂᒃ, ᑐᑭᓕᐅᕆᔩᑦ ᐊᒻᒪ ᑎᑎᕋᖅᐸᓪᓕᐊᕙᒃᑐᑦ—ᐊᒻᒪ ᑕᒪᕐᒥᒃ ᒪᒃᑯᒃᑑᙱᑦᑐᑦ ᐃᓚᖏᑦ—ᐱᓕᕆᖃᑕᐅᓯᒪᓂᑯᑦ ᓄᑕᐅᙱᑦᑐᒥᒃ ᐃᒡᓗᓕᒃᒥᑦ ᐅᖃᐅᓯᓕᕆᓂᕐᒧᑦ ᐱᓕᕆᐊᒧᑦ ᐊᐱᖅᓱᕈᑎᓂᒃ ᐊᒻᒪ ᐱᓕᕆᖃᑕᐅᓯᒪᓂᑯᑦ ᓄᑕᐅᙱᑦᑐᒥᒃ ᐃᒡᓗᓕᒃᒥᑦ ᐅᖃᐅᓯᓕᕆᓂᕐᒥᒃ ᐱᓕᕆᐊᒧᑦ ᐊᐱᖅᓱᕈᑎᓂᒃ ᐊᒻᒪ ᓰᐲᓰᑦ ᑲᑎᕐᓱᒐᖏᓐᓂᒃ ᓂᐱᓕᐊᓂᒃ, ᐅᖃᕐᓯᒪᖕᒪᑕ ᐅᖃᐅᓯᕐᓂᒃ ᑐᓴᕐᓯᒪᓂᖏᓐᓂᒃ ᑐᓴᓕᒪᙱᑕᖏᓐᓂᒃ. ᐊᕐᕌᒍᑦ 100 ᓇᑉᐸᓪᓗᐊᖓᓂᒃ ᑐᖔᓂᓪᓘᓐᓃᑦ, ᐃᓚᖏᑦ ᐅᖃᐅᓰᑦ ᐊᑐᖅᑕᐅᕙᓚᐅᕐᑐᑦ ᐃᓐᓇᑐᖃᕐᓄᑦ ᖃᐅᑕᒫᑦ ᐅᖃᐅᓯᖏᑦᑎᒍᑦ ᒫᓐᓇ ᑐᑭᓯᐅᒪᔭᐅᔪᓐᓃᖅᑐᑦ.

ᑕᐅᑐᒃᖢᓂ ᐅᖃᐅᓯᐅᑉ ᐊᓯᙳᖅᐸᓪᓕᐊᓂᖓᓂᒃ ᐃᓄᒃᑐᑦ, ᖃᐅᔨᒪᓇᕐᐳᖅ ᐃᓕᖁᓯᖅ ᐅᖃᐅᓯᑐᖃᖅ ᒥᒃᖠᕚᓪᓕᕐᓂᖓᓂᒃ ᐅᖃᕈᓯᖏᑦᑎᒍᑦ, ᑕᒪᐅᓇᑦᑕᐃᓐᓇᕐᓗ ᐅᖃᐅᓯᐅᓕᓵᖅᑐᑎᑐᑦ ᐱᔭᐅᓕᕐᑐᑦ—ᐅᖃᐅᓰᑦ ᐊᑐᖅᑕᐅᔭᕆᐊᖃᖅᑐᑦ ᓇᓗᓇᐃᔭᕈᑎᓂᒃ ᐅᖃᐅᓯᕐᓂᒃ, ᒪᓕᒐᓕᕆᓂᕐᒥᒃ, ᐃᓅᓕᓴᐅᑎᓕᕆᓂᕐᒥᒃ, ᐃᓚᖏᓐᓂᒃ ᖃᐅᔨᓴᖅᑐᓕᕆᓂᕐᒧᒃ, ᐊᐅᓚᑦᑎᓂᕐᒥᒃ—ᐊᖏᒡᓕᕙᓪᓕᐊᓕᕐᑐᑦ.

ᖁᒻᒧᑦ ᐅᓇᑖᕆᔭᖃᕐᓂᖅ ᖃᓪᓗᓈᑎᑐᑦ ᐅᖃᐅᓯᕐᒥᒃ

ᒪᕐᕈᐃᙳᖕᒪᑕ ᐃᓱᒪᒍᑎᐅᔪᓐᓇᖅᑐᑦ ᖃᓄᖅ ᐱᓕᕆᐊᖃᕐᓂᐊᕆᐊᒃᓴᒧᑦ ᓴᕿᑕᐅᓕᓵᖅᑐᓂᒃ ᓄᑖᓂ ᐃᓱᒪᒍᓯᕐᓂᒃ.

ᐊᑕᐅᓯᕐᓕ ᐅᖃᐅᓰᑦ ᒪᓕᑐᐃᓐᓇᓕᕐᓗᒋᑦ—ᐊᑐᖅᑕᐅᓯᒪᔪᓂᒃ ᐅᕝᕙᓘᓐᓃᑦ ᓴᓇᔭᐅᓵᕐᓯᒪᔪᓂᒃ—ᒪᑯᐊ ᐅᖃᐅᓰᑦ ᐃᓄᒃᑐᑦ ᐅᖃᐅᓯᐅᖃᑕᐅᓕᕐᑐᑦ—ᐅᑯᑎᑐᓇᖅ ᖃᒧᑕᐅᔭᖅ ᐊᒻᒪ ᓯᑭᑑᒪᑯᓄᖓ snowmobile, ᒪᓕᒃᖢᓂ ᖃᓄᖅ ᐅᖃᐅᓯᖃᕐᓂᕐᒥᒃ, ᐅᕝᕙᓘᓐᓃᑦ ᒪᓕᒐᓕᐅᖅᑎ ᐃᓚᒋᔭᐅᔪᒧᑦ ᒪᓕᒐᓕᕆᕕᒡᔪᐊᕐᒥᑦ, ᐃᒻᒪᖄᑦ ᐃᒪᓐᓇᓘᓐᓃᑦ ᐃᒃᓯᕙᐅᑕᖅ ᐃᒃᓯᕙᐅᑕᒧᑦ ᑲᑎᒪᔨᓄᑦ—ᖃᓪᓗᓈᑎᑑᖓᔪᓂ ᓄᑖᓂ ᐅᖃᐅᓯᕐᓂᒃ ᐊᑐᓕᕐᓂᖅ ᐃᓱᒪᒍᓯᕐᓂ ᓱᓕ ᑕᐃᔭᐅᓯᒪᙱᑦᑐᓂᒃ.

ᐊᐃᑉᐸᖓᓕ ᓄᑖᓂ ᐅᖃᐅᓯᓕᐅᕐᓂᖅ ᐃᓄᒃᑐᑦ ᓄᑖᓄᑦ ᐃᓱᒪᒍᓯᕐᓄᑦ.

ᐊᑐᖅᑕᐅᓂᕐᓴᐅᖂᔨᔪᕐᓕ ᓄᓇᕗᒻᒥᐅᓄᑦ ᑭᖑᓪᓕᖅ. ᑲᑐᔾᔨᖃᑎᒌᑦ ᐅᑯᐊ ‘ᐃᓄᐃᑦ ᐅᖃᐅᓯᖏᓐᓂᒃ ᑕᐃᒎᓯᓕᐅᖅᑎᑦ’ ᐱᔭᒃᓴᖃᖅᑎᑕᐅᖕᒪᑕ ᐋᕿᒃᓱᐃᓂᕐᒥᑦ ᓄᑖᓂᒃ ᐅᖃᕈᓯᒃᓴᓂᒃ ᓄᓇᕗᒧᑦ. ᐱᓪᓚᕆᒡᓕ ᐱᔭᒃᓴᖓᑦ ᐅᓇ ᐱᓕᕆᐊᕆᔭᖓ ᐃᓄᖕᓄᑦ ᐊᑐᖅᑕᐅᓕᖅᑎᑦᑎᒐᓱᖕᓂᖓ ᐃᓄᓕᒫᑦ ᐊᑐᕈᓐᓇᕐᓕᕐᓂᐊᕐᒪᑕ ᐅᖃᐅᓯᓕᐅᕆᓵᖅᑕᖏᓐᓂᒃ.

ᐃᖏᕐᕋᓂᖓ ᐃᓄᒃᑐᑦ ᐊᓯᙳᖅᐸᓪᓕᐊᓂᖓᑕ ᓱᑲᓕᕙᓪᓕᐊᖂᔨᔪᖅ. ᐱᔾᔪᑎᐅᔪᕐᓕ ᐊᓯᙳᕐᓂᖓᓄᑦ—ᐅᓗᕆᐊᓇᕈᑏᑦ ᐅᖃᐅᓯᐅᑉ ᐊᓯᐅᑐᐃᓐᓇᕆᐊᖃᕐᓂᖓᓄᑦ—ᒪᑯᓇᙵᑦ ᖃᓪᓗᓇᐅᔭᖅᑐᑦ ᐅᓄᕐᓂᕐᓴᐅᓂᖓᓄᑦ, ᐱᓗᐊᖅᑐᒥᒃᑕᓚᕖᓴᓐᑯᑦ.

ᐊᕐᓇᖅ ᐃᓕᓴᓚᐅᕐᓯᒪᔭᕋ ᐃᓕᓐᓂᐊᖅᑎ ᐃᒃᐱᐊᕐᔪᒃᒥᑦ 1970-ᖏᓐᓂᒃ ᓄᓇᖃᖅᓯᒪᔪᖅ ᐃᓐᕗᓇᔅ, ᓯᑳᑦᓚᓐᒥᑦ ᐊᕐᕌᒎᓕᖅᑐᓂᒃ 40-ᓂᒃ. ᐃᓄᒃᑐᑦ ᐅᖃᓪᓚᒃᑐᖃᕈᓐᓇᙱᑦᑐᑦ ᐃᓐᕗᓇᔅᒥᑦ.

ᑯᓄ ᐅᖃᐅᓯᕐᒥᓂᒃ ᐳᐃᒍᕐᓯᒪᙱᑦᑐᖅ; ᐱᓯᒪᐃᓐᓇᑐᐃᓐᓇᖅᑕᖓ. ᐱᖃᓐᓇᕆᔭᖏᑦ ᐊᒻᒪ ᐃᓚᖏ ᐅᖃᓪᓚᖃᑎᖃᖅᐸᒃᑐ ᐅᖄᓚᐅᑎᒃᑯᑦ ᐱᒃᑯᓕᕙᒃᑐᑦ ᐅᖃᓪᓚᐅᓯᖓᓂᒃ ᐊᒻᒪ “ᐃᓄᒃᑎᑑᓪᓚᕆᖕᓂᖓᓂᒃ”, ᐊᒻᒪᓗ ᐅᖃᓪᓚᒃᖢᑎᒃ ᐅᔾᔨᕆᓕᖅᐸᒃᖢᑎᒃ ᐅᖃᐅᓯᖏ ᐊᓯᙳᕐᓯᒪᓂᖓᓂᒃ.

ᑭᓯᐊᓂᓕ ᖃᐅᑕᒫᑦ ᐃᓅᓯᕐᒥᑦ ᓄᓇᕗᒥᑦ, ᒥᑭᑦᑐᓪᓛᓗᐃᑦ ᐅᖃᐅᓯᐅᑉ ᐃᓚᖏ ᐊᓯᙳᖅᑐᑦ ᐅᔾᔨᕆᔭᐅᔭᙱᑦᑐᑦ. ᑕᑯᓯᒪᒐᒪ ᐃᓚᖏ ᐅᖃᐅᓯᕐᓂᒃ ᐱᒋᐊᖅᑎᑦᑎᒃᑲᓐᓂᕋᓱᖕᓂᕐᒧᑦ ᐃᓕᓐᓂᐊᕈᑎᓂᒃ ᐊᑐᖅᑕᐅᔪᓂᒃ. ᑕᐅᑐᒃᖢᒋᑦ ᖁᕕᐊᓇᖅᑑᒐᓗᐊᑦ ᑭᓯᐊᓂᓕ ᕿᒥᕐᕈᐊᓪᓚᕆᒃᖢᒍ ᖁᕕᐅᓇᙱᒻᒪᕆᒃᑐᖅ.

ᐱᔾᔪᑎᖃᖅᑐᓪᓕ ᐃᒪᓐᓇᐅᓕᔭᒻᒪᑦ ᐃᓕᓐᓂᐊᖅᑎ—ᑖᓐᓇᓗ ᐃᓕᓐᓂᐊᖅᑎᑦᑎᔨᐅᔫᑉ ᑭᖑᓂᑦᑎᐊᖓᒍᑦ ᐊᔪᕈᓐᓃᖅᐸᓪᓕᐊᒋᓪᓗᓂ—ᐃᓕᓐᓂᐊᖅᖢᑎ ᒪᑯᓂᖓ ᑭᓲᓂᕐᒧᑦ ᐅᖃᐅᓰᑦ (nouns), “ᑎᒃᑯᐊᕐᓗᒋᑦ” ᑐᑭᓯᓇᖅᑐᑦ ᐅᖃᐅᓯᕐᓂᒃ, ᐃᒪᓐᓇ ᐅᖃᕈᓐᓇᓂᕐᒥᒃ ᐊᐱᕆᔭᐅᓗᓂ “ᐅᓇᑭᓱ?” (“una kisu?”— “What’s this?).

ᑕᐃᒪᓐᓇᓕ ᐅᖃᐅᓯᕐᓂ ᑐᑭᓯᒍᑎᐅᔪᓐᓇᕈᑎᐅᕙᒃᖢᑎᒃ, ᑭᓯᐊᓂᓕ ᖃᐅᔨᒪᙱᖢᑎᒃ ᖃᓄᖅ ᐅᖃᐅᓯᒐᓴᐃᑦ ᑲᑎᓪᓗᒋ ᑐᑭᖃᓕᖅᑎᑦᑎᔪᓐᓇᕐᓂᕐᒥᒃ, ᐃᓱᒪᒥᒃ, ᐅᖃᐅᓯᕆᔭᒥᒃ. ᑕᒪᑐᒪᓕ ᐃᓱᐊ ᐃᓛᓐᓂᑦ ᓈᒻᒪᖃᑦᑕᙱᑦᑐᖅ ᐃᓕᓐᓂᐊᖅᑐᒧᑦ, ᓄᖃᑐᐃᓐᓇᖔᓕᑐᐃᓐᓇᕆᐊᖃᕐᒪ ᐊᔪᕐᓴᑲᑕᓕᕈᓂ ᓯᕗᕚᖏᑦᑕ ᐅᖃᐅᓯᑐᖃᖏᓐᓂᒃ.

ᐊᔪᕆᕐᓱᐃᔨᕐᔪᐊᖅ ᑖᓄᑦ ᕗᐃᑦᐳᕆᐊᑦ ᐃᓕᓐᓂᐊᖅᑎᑦᑎᔪᖅ ᐃᓐᓇᕐᓂᒃ ᐃᐅᐋᓂᒃ ᐃᖃᓗᖕᓂ 1972-ᒥᑦ. (ᐅᕙᙵᑦ ᐊᔪᕆᕐᓱᐃᔨᒃᑯ ᑲᑎᕐᓱᒐᖏᓐᓂᒃ, ᐋᖕᓕᑲᓐᑯᑦ ᑐᒃᓯᐊᕐᕕᖓ ᑲᓇᑕᒥ, (P8803-AR-53).

ᐊᖓᔪᖄᑦ ᐃᓚᐅᕙᖕᓂᖏᑦ ᐅᖃᐅᓯᕐᒥᒃ ᐊᓯᐅᔨᙱᔾᔪᑎᐅᓐᓇᕐᐳᖅ

ᐃᓄᒃᑎᑐᑦ ᐱᑕᖃᐃᓐᓇᕐᓂᐊᕐᐹ? ᐄᖑᓂᐊᖅᑐᒃᓴᐅᕗᖅ. ᑭᓯᐊᓂᓕ ᖃᓄᐃᓕᖓᓕᕐᓗᓂ?

ᐃᓚᖏᓐᓂᒃ ᓄᓇᕐᔪᐊᒦᑦᑐᓂᒃ, ᐊᑐᖅᑕᐅᕙᙱᓗᐊᓕᕐᓂᑯᒧᑦ ᐊᑐᖅᑕᐅᖃᑦᑕᑐᐃᓐᓇᓕᖅᑐᑦ ᐊᑐᖅᑕᐅᙱᓐᓇᖏᑦᑐᓂᒃ ᖃᓄᐃᓕᐅᕈᓯᕐᓂᒃ ᐃᓕᖁᓯᕆᓂᕐᒧᑦ. ᑕᒪᑐᒧᖓᓕ, ᐃᒪᓐᓇ ᐅᖃᖅᑐᖅᖓ ᓲᕐᓗ ᑐᒃᓯᐊᕐᓂᒃᑯᑦ ᐱᒋᐊᕈᑎᓂᒃ ᐊᒻᒪ ᐱᐊᓂᒍᑎᓂᒃ ᑲᑎᒪᓂᕐᓂᒃ, ᐅᕝᕙᓘᓐᓃᑦ ᐅᖃᓪᓚᖕᓂᕐᒥᑦ ᖁᕕᐊᓲᑎᖃᕐᓂᕐᒧᑦ ᓲᕐᓗ ᖁᓪᓕᕐᒥᑦ ᐃᑯᒻᒪᐃᓪᓗᓂ ᐃᓄᒋᐊᓂᒃ.

ᐃᒪᓐᓇᐅᕙᖕᒪᑦ, ᐃᓚᖏᑦ ᐃᓄᒃᑐᑦ ᐅᖃᐅᓰᑦ ᐊᒻᒪ ᐱᒋᐊᕈᑏ ᐃᓚᓕᐅᔾᔭᐅᓪᓗᑎᒃ ᖃᓪᓗᓈᑦ ᐅᖃᓪᓚᐅᓯᖏᓐᓂᒃ ᐊᒻᒪᓗ ᖃᐅᑕᒫᑦ ᐊᑐᖅᑕᐅᕙᒃᖢᑎᒃ ᐅᖃᓪᓚᑲᑕᖕᓂᒃᑯᑦ ᖃᐅᔨᒫᓂᙱᑦᑐᓂᒃ ᐅᖃᐅᓯᕐᒥᒃ; ᐃᓱᒪᔪᖓ ᒪᑯᐊ ᖃᓄᐃᒍᓰᑦ ᐆᑐᓇᖅ “ᐊᐃᒻᑯᐃᖕ ᐳᓛᑭᖕ”—ᐱᒋᐊᕈᑎᖃᖅᖢᓂ ᐳᓛᖅᒥᑦ—ᑐᑭᖃᕋᓱᒃᖢᓂ ᐳᓛᕈᒪᓂᕐᒥᒃ. ᑕᐃᒪᓐᓇ ᐅᖃᓪᓚᖃᑦᑕᕐᓂᖅ ᐱᕚᓪᓕᑐᐃᓐᓇᕆᐊᓕᒃ, ᑕᐃᒪᓐᓇᓗ ᐊᐃᑦᑖᕌᓘᓪᓗᓂ ᐅᖃᐅᓯᕐᒥ ᐱᒻᒪᕆᐅᒋᔭᓕᖕᓂᒃ.

ᓱᓕ ᑕᑯᔭᕆᐊᖃᖅᐳᒍ ᐃᓄᒃᑐᑦ ᐅᖃᐅᓯᖅ ᐱᓕᕆᔾᔪᓯᐅᓕᕐᓂᐊᕆᐊᒃᓴᖓᓂᒃ ᒐᕙᒪᒃᑯᓐᓄᑦ ᑕᐃᒪᓐᓇ ᐃᓱᒪᒋᔭᐅᖃᑕᐅᓂᑰᖕᒪᑦ ᓄᓇᕗᑦ ᖃᓄᐃᓕᖓᓂᒃᓴᖓᒍᑦ. ᐊᑐᖅᑕᐅᓂᕐᓴᐅᕙᓪᓕᐊᔪᖅ ᒪᓕᒐᓕᕆᕕᒡᔪᐊᕐᒥᑦ, ᑭᓯᐊᓂᓕ ᐊᑐᖅᑕᐅᓂᖓ ᐊᐅᓚᑦᑎᓂᒃᑯᑦ ᐊᑐᓕᖅᑕᐅᔪᓐᓇᐃᓪᓕᖂᔨᔪᖅ.

ᐊᑐᖅᑕᐅᑦᑎᐊᖃᑦᑕᖅᑐᖅ ᐃᓕᓐᓂᐊᕐᕕᖕᓂᑦ ᐊᑦᑎᖕᓂᕐᓴᓂᒃ ᐃᓕᓐᓂᐊᖅᑐᓂᒃ, ᑭᓯᐊᓂᓕ ᐊᔾᔨᒌᙱᑦᑑᑎᐅᔪᖅ ᓄᓇᓖᑦ ᒪᓕᒃᖢᒋᑦ ᐊᒻᒪ ᐊᕕᒃᑐᖅᓯᒪᓂᒃᑯᑦ—ᑭᓯᐊᓂᓕ ᑐᕌᒐᕆᔭᐅᓇᓱᒃᑐᖅ ᐅᖃᐅᓯᓕᕆᓂᕐᒥᑦ ᐃᓕᓐᓂᐊᖅᑎᖃᕐᓂᖅ ᖁᑦᑎᖕᓂᕐᓴᓃᑦ ᑐᓄᑦᐊᓯᐅᕙᓪᓕᐊᖂᔨᕗᖅ. ᐃᓕᓐᓂᐊᕈᑎᒃ ᓴᖅᑕᖃᙱᓗᐊᕐᒪᑦ, ᐊᒻᒪᓗ ᐱᑕᖃᙱᓗᐊᖅᖢᓂ ᐃᓕᓴᐃᔨᓂᒃ ᐊᒻᒪᓗ ᒪᒃᑯᒃᑐᐃᑦ ᐱᓇᓱᓗᐊᖂᔨᙱᖢᑎᒃ ᐊᒃᓱᕈᕈᓘᔭᕐᓇᖅᑐᒥᑦ ᐃᓕᓐᓂᐊᕐᕕᒃᒥᑦ ᐃᓕᓴᐃᔨᐅᓂᕐᒥᒃ.

ᐊᒥᓱᑦ ᒫᓐᓇᓕᓴᐅᓕᕐᑐᑦ ᐃᓄᐃᑦ ᐅᒃᐱᕈᓱᒃᑐᑦ ᒐᕙᒪᒃᑯᑦ ᐱᔭᕆᐊᖃᖅᑕᖏᓐᓂᒃ ᐋᕿᒃᓱᐃᔭᕆᐊᖃᕐᓂᖏᓐᓂᒃ. ᑕᐃᒪᓕ, ᐃᓄᒃᑐᑦ ᐊᑐᖅᑕᐅᓪᓚᕆᖕᓂᖓ ᑲᑕᒃᐸᓪᓕᐊᒃᐸᑦ, ᒐᕙᒪᒃᑯᑦ ᐱᒃᑲᖅᑎᒐᒃᓴᐅᕗᑦ.

ᐄᓛᒃᒐᕙᒪᒃᑯᑦ ᑲᒪᒋᔭᖃᖅᑐᑦ ᓄᓇᑖᕈᑎᓄᑦ ᐊᖏᕈᑎᓃᑦᑐᓂᒃ ᐊᑐᕆᐊᖃᕐᓂᖏᓐᓂᒃ. ᐃᓕᓐᓂᐊᕐᕕᐅᔪᑦ ᑲᒪᒋᔭᖃᕐᑐᑦ ᐱᐅᓂᖅᐹᒃᑯᑦ ᐃᓄᒃᑐᑦ ᐅᖃᐅᓯᕐᒥᑦ ᐃᓕᓐᓂᐊᖅᑎᑦᑎᒐᓱᖕᓂᕐᒥᒃ. ᑭᓯᐊᓂᓕ ᓄᓇᓖᑦ ᐊᒻᒪ ᐊᖏᕐᕋᕆᔭᐅᔪᑦ ᐊᒻᒪ ᑲᒪᒋᔭᖃᕐᒥᔪᑦ ᐅᖃᐅᓯᕐᒥᑦ ᐊᓯᐅᑎᑦᑎᑦᑕᐃᓕᓂᕐᒥᒃ.

ᐃᓄᒃᑐᑦ-ᐅᖃᓪᓚᒃᐸᒃᑐᑦ ᐊᖓᔪᖅᑳᖑᔪᑦ ᐊᒻᒪ ᐊᖓᔪᖅᑳᕆᔭᐅᔪᑦ ᐊᖓᔪᖅᑳᖏᑦ ᐅᖃᐅᓯᕐᒥᑦ ᐊᑐᖅᑎᑦᑏᓐᓇᕈᓐᓇᕐᒪᑕ ᕿᑐᕐᖓᖏᓐᓄᑦ ᐃᕐᖑᑕᖏᓐᓄᓪᓗ ᒐᕙᒪᒃᑯᓐᓂᒃ ᐃᑲᔪᖅᑕᐅᙱᓪᓗᑎᒃ. ᖁᕕᐊᓇᕈᓘᔭᖅᐸᒃᑎᓪᓗᒍ ᑕᓚᕖᓴᐃᑦ ᓱᕋᐃᙱᑎᓪᓗᒋ ᐃᓅᖃᑎᒌᖕᓂᕐᒥᒃ ᐅᑭᐅᕐᑕᖅᑑᑉ ᓄᓇᓕᖏᓐᓂᒃ—1960-ᖏᓐᓂᒃ ᐊᒻᒪ 1970-ᖏᑦ ᐱᒋᐊᓵᕐᓯᒪᑎᓪᓗᒋᑦ—ᐃᖅᑲᐅᒪᕗᖓ ᐃᓄᖕᓂ ᐳᓛᕐᖢᖓ ᓄᑕᕋᐃᑦ ᐊᖓᔪᖅᑳᖏᓐᓄᑦ ᑎᒍᒥᐊᖅᑕᐅᔪᑦ ᐊᒻᒪ ᐃᓕᓐᓂᐊᖅᑎᑕᐅᔪᑦ ᐃ ᐅ ᐊ-ᓂᒃ ᐅᖃᐅᓯᖏᑦᑎᒍᑦ ᑐᒃᓯᐅᑎᓂᑦ ᐸᐃᑉᐹᖁᑎᒥᓪᓘᓐᓃᑦ ᐅᖃᖅᑎᑕᐅᑲᓐᓂᖅᐸᒃᖢᑎᒃ.

ᐊᐃ, ᐃ, ᐅ, ᐊ, ᐸᐃ, ᐱ, ᐳ, ᐸ… ᑕᐅᕗᖓᓕᒫᖅ, ᓂᐱᖏᑦ ᐊᔾᔨᒌᒃᑐᐃᓐᓇᐅᓪᓗᓂ. ᑕᐃᒪᐃᓕᐅᖅᖢᑎᒃ ᐅᖃᓕᒫᕈᓐᓇᕐᓯᓚᐅᕐᑐᑦ ᐃᓄᒃᑎᑐᑦ ᐃ ᐅ ᐊ-ᓂᒃ.

ᐃᑲᔪᖅᑐᐃᔨᐅᓇᓱᙱᑦᑐᖓ ᑕᐃᒨᖔᖃᑦᑕᕐᓂᕐᒥᒃ ᐸᐃᑉᐹᖁᑎᓂᒃ, ᐃᑲᔪᖅᑐᐃᔨᐅᕗᖓ ᐊᖓᔪᖅᑳᑦ ᐃᑲᔪᒃᑲᓐᓂᖁᓪᓗᒋᑦ ᐊᒻᒪ ᑲᒪᒋᔭᖃᕐᓂᕐᓴᐅᓗᑎᒃ ᐅᖃᐅᓯᕐᒥᑦ ᐃᓕᓐᓂᐊᖅᑎᑦᑎᓂᕐᒥᒃ ᓱᕈᓯᖏᓐᓄᑦ. ᐊᒻᒪᓗ ᖃᐅᔨᒪᑦᑎᐊᖅᑐᖓ ᓄᓇᕗᑦ ᐃᓚᖓ ᒥᑭᑦᑑᒐᓗᐊᖅ ᐃ ᐅ ᐊ-ᓂᒃ ᑎᑎᕋᐅᓯᖃᙱᑦᑐᑦ, ᑭᓯᐊᓂᓕ ᑕᐃᒪᓐᓇᑦᑕᐃᓐᓇ ᐃᓕᓐᓂᐊᖅᑎᑦᑎᔪᓐᓇᕐᒥᔪᑦ ᐅᖃᓕᒫᕈᓐᓇᕐᓂᕐᒥᒃ ᐃᓄᐃᓐᓇᖅᑐᓐ.

ᐊᔪᕆᕐᓱᐃᔨ ᔭᐃᒥᓯ ᐃᓄᒃᑎᑐᑦ ᐃᓕᓐᓂᐊᖅᑎᑦᑎᔪᖅ ᐃᓄᖕᓄᑦ ᓱᕈᓯᕐᓄᑦ. (ᑭᐊᓐ ᕼᐋᐳ ᑲᑎᕐᓱᒐᖏᓐᓂᒃ)

ᐅᖓᑖᓅᕐᓂᖅ ᐱᒃᑲᖅᑎᑦᑎᑲᑕᖕᓂᐅ

ᐃᓄᒃᑐᑦ ᐱᕕᖃᕐᓂᕐᓴᐅᓇᔭᖅᑐᖅ ᐊᓯᐅᖏᓐᓂᕐᓴᐅᓗᓂ ᐃᓄᐃᑦ ᑕᓚᕖᓴᖏᓐᓂᒃ ᖃᒥᑦᑎᓚᐅᕐᐸᒡᓗᑎᒃ ᐃᖕᒥᖕᓄᑦ ᐅᖃᓪᓚᑲᑕᖔᖅᐸᒡᓗᑎᒃ ᐸᒡᕕᓵᕆᔭᐅᙱᓪ ᓗᑎᒃ. ᖃᖓᑦᑎᐊᐸᓘᓕᕐᑐᖅ, ᑕᓚᕖᓴᑦ ᐊᑐᖅᑕᐅᕙᓪᓕᐊᓕᒻᒪᕆᒃᑎᓪᓗᒍ ᐊᐃᔅᓚᓐᒥᑦ, ᑎᓴᒻᒥᕐᒥᒃ ᓴᕿᔮᖅᑐᖃᖅᐸᓚᐅᙱᑦᑐᖅ. ᑖᓐᓇ ᐃᓚᒌᓄᑦ ᐅᓪᓗᕆᔭᐅᓚᐅᕐᒪᑦ, ᐃᓚᒌᑦ ᐱᖃᑎᒌᒍᓐᓇᖁᓪᓗᒋᑦ.

ᐊᐃᑦᑖᖑᒐᓗᐊᖅ ᑕᐃᒪᐃᑦᑐᓐᓃᕐᒥᔪᖅ. ᐃᓱᒪᓇᙱᒻᒪᓪᓘᓐᓃᑦ ᑕᐃᒪᐃᓇᔭᕆᐊᒃᓴᖏᓐᓂᒃ ᓄᓇᕗᒥᑦ. ᐊᖓᔪᖅᑳᖓᔪᑦ ᐊᖓᔪᖅᑳᖏᓪᓗ ᐃᖕᒥᖕᓂᒃ ᖃᒥᑎᑦᑎᔪᒪᒍᑎᒃ ᖃᒥᑎᑦᑎᔪᓐᓇᕐᒪᑕ.

ᐊᐃᑦᑖᖑᒐᓗᐊᖅ ᐃᓚᖏᑦ ᐃᓐᓇᐃᑦ ᓈᒻᒪᙱᓕᐅᕈᑎᐅᖃᑕᐅᓕᕐᒪᑕ ᐋᕿᒃᓱᐃᔨᐅᙱᓐᓂᕐᓴᐅᓪᓗᑎᒃ. ᐃᓚᖏᑦ ᒪᒃᑯᒃᑐᑦ ᐃᓄᐃᑦ ᐅᖃᕐᓯᒪᖕᒪᑕ ᐃᓐᓇᕐᓄᑦ ᐅᖃᐅᔾᔭᐅᕙᖕᓂᖏᓐᓂᒃ ᐊᒻᒪ ᐃᓱᕆᔭᐅᕙᖕᓂᖏᓐᓂᒃ ᐃᓄᒃᑐᑦ ᐊᑐᑦᑎᐊᕐᓗᑎᒃ ᐅᖃᕈᓐᓇᑦᑎᐊᙱᓐᓂᖏᓐᓂᒃ.

ᑕᐃᒪᓐᓇ ᐱᓇᓱᒃᑲᓐᓂᕈᒥᓇᕈᓐᓃᕐᓇᕐᒪᑦ, ᐅᕝᕙᓘᓐᓃᑦ ᐊᒃᓱᕈᒃᑲᓐᓂᕈᒪᔪᓐᓃᕈᑎᐅᓪᓗᓂ. ᐃᑲᔪᖅᑐᐃᓂᖅ ᐃᑲᔪᖅᐳᖅ; ᐱᐅᒃᓴᙱᓐᓂᑐᐃᓐᓇᕐᓕ ᐋᒃᑲ.

ᐃᒪᓐᓇᑦᑕᐅᖅ, ᐊᔾᔨᒌᒃᑎᑦᑎᒐᓱᖕᓂᖅ ᓄᓇᕗᒥᑦ ᐊᒻᒪ ᐊᓯᖏᓐᓂᒃ ᐃᓄᐃᑦ ᓄᓇᖏᓐᓂᑦ ᐊᒻᒪ ᑲᓛᖡᑦ ᓄᓇᖓᓂ—ᐊᔾᔨᒌᒃᑎᑦᑎᒐᓱᖕᓂᒃᑯᑦ ᑲᓇᑕ ᐊᓪᓕᐅᒋᓐᓇᐅᔭᖅᖢᓂ—ᐊᒻᒪᑦᑕᐅᖅ ᐃᑲᔪᙱᓚᖅ.

ᑲᓇᑕ ᑲᓛᖡᑦ ᓄᓇᒋᙱᒻᒪᒍ. ᑲᓛᖡᑦ ᓄᓇᖓᑦ ᐱᓕᕆᑦᑎᐊᕐᓯᒪᔪᐊᓘᖕᒪᑦ ᐅᖃᐅᓯᕐᒥᖕᓂ ᐊᑐᕐᓂᕐᒥᒃ ᑲᓛᓕᓱᑦ, ᑭᓯᐊᓂᓕ ᐃᓅᖃᑎᒌᖕᓂᒃᑯᑦ-ᒪᓕᒐᓕᕆᓂᒃᑯᑦ ᑕᐃᒪᐃᔾᔪᑎᖃᕐᒪᑕ ᐃᓚᒋᔭᐅᙱᑦᑐᓂᒃ ᓄᓇᕗᒥᑦ ᐅᕝᕙᓘᓐᓃᑦᑲᓇᑕᐅᑉ ᑭᒡᓕᐊᓃᑦᑐᓄᑦ. ᐊᒻᒪᓗ ᑲᓛᖡᑦ ᓄᓇᖓ ᐊᓂᒍᐃᑦᑎᐊᕋᓗᐊᖅᑎᓪᓗᒍ, UNESCO-ᑯᑦ ᓱᓕ ᓇᓗᓇᐃᕐᓯᓯᒪᔪᑦ ᑲᓛᓕᓱᑦ ᐅᖃᐅᓯ ᖁᐊᕐᓵᕐᓇᖅᑐᒦᑐᐃᓐᓇᕆᐊᖃᕐᓂᖓᓂᒃ.

ᓱᒃᑲᓕᕚᓪᓕᖅᑎᑦᑎᔪᓐᓇᕈᑦᑕ ᐊᕐᕌᒍᓄᑦ 50-ᓄᑦ 100-ᓄᓪᓘᓐᓃᑦ ᓯᕗᓂᑦᑎᓐᓂ, ᑐᓴᕋᔭᖅᑐᒃᓴᐅᕗᒍᑦ ᐃᓄᒃᑐᑦ ᐅᖃᐅᓯᐅᔪᖅ ᐃᓚᖏᓐᓂᒃ ᓄᓇᓕᖕᓂ ᒫᓐᓇ ᐅᖃᓪᓚᒡᕕᐅᕙᒃᑐᓂᑦ. ᑭᓯᐊᓂᓕ ᐊᔾᔨᒋᔾᔮᙱᑕᖓ. ᐃᓚᖏᓪᓘᓐᓃᑦ ᐅᖃᐅᓰᑦ ᓱᖅᑯᐃᓇᙱᒻᒪᕆᖕᓂᐊᕐᑐᑦ. ᐊᑕᐅᓯᖅ ᐅᖃᐅᓯᓕᕆᔨ ᐃᓱᒪᓚᐅᕐᑐᖅ ᐃᒪᓐᓇ, ᐃᓄᐃᑦ ᐅᖃᓪᓚᐃᓐᓇᕈᑎᒃ ᓱᓕ ᐃᓄᒃᑑᓇᔭᕐᒪᑦ.

ᑕᒪᓐᓇ ᐊᒃᓱᕈᕈᑎᐅᓪᓗᓂ ᐊᒥᓲᙱᑦᑐᓄᑦ ᐃᓄᖕᓄᑦ ᓄᓇᕗᙳᖅᑎᑕᐅᓚᐅᕐᑐᖅ. ᐃᓚᖓᑦ ᑐᕌᒐᕆᓚᐅᕐᑕᖓᓕ ᐃᓄᒃᑐᑦ ᐅᖃᐅᓯᖅ ᖃᐅᑕᒫᑦ ᐃᓅᓯᒃᑯᑦ ᐊᑐᖅᑕᐅᖃᑦᑕᐃᓐᓇᕐᓗᓂ. ᑕᒪᓐᓇᓕ ᐃᓄᓕᒫᓄᑦ ᑲᒪᒋᔭᒃᓴᐅᕗᖅ ᐃᓄᒃᑐᑦ ᐱᑕᖃᐃᓐᓇᕐᑎᓐᓂᐊᕈᓂ ᐊᒻᒪ ᐱᕙᓪᓕᐊᖏᓐᓇᕐᓂᐊᕈᓂ ᓄᓇᕗᒥᑦ—ᐊᒻᒪᐊᓯᖏᓐᓂᒃ.

ᑭᐊᓐ ᕼᐋᐳ ᐃᒻᒪᓕᓴᓕᕆᔨᐅᕗᖅ ᐊᒻᒪ ᑎᑎᕋᖅᑎᐅᓪᓗᓂ ᐅᑭᐅᖅᑕᖅᑐᕐᒥ ᓄᓇᖃᓕᖅᑐᖅ 50 ᐅᑭᐅᑦ ᐅᖓᑖᓂᒃ. ᑎᑎᕋᕐᓯᒪᔪᖅ ᐅᖃᓕᒫᒐᕐᒥᒃ “Minik, the New York Eskimo” ᐊᒻᒪ “Thou Shalt Do No Murder,” ᐊᓯᖏᓐᓂᒡᓗ ᐊᓯᖏᓐᓂᒃ ᐅᖃᓕᒫᒐᕐᓂᒃ.