ᐊᓯᖓᓂ ᓄᓇᕗᒻᒥ ᑐᙵᕕᒃᑯᑦ ᓂᕈᐊᕐᓂᖅ ᑎᑭᑉᐸᓪᓕᐊᔪᒥ, ᑐᓴᕐᓇᙱᓚᖅ ᓱᓕ ᓂᐅᕕᕈᓐᓇᐅᑎᓂᑦ ᐊᐅᒃᑕᔫᓂ
ᐊᖓᔪᖅᑳᒃᓴᒧᑦ ᓂᕈᐊᕐᕕᒪᕆᒃ ᐊᓂᒍᖅᓯᒪᑎᓪᓗᒍ ᓂᕈᐊᖅᑎᑦᑎᒃᑲᓐᓂᕐᓂᖅ ᐋᖅᑭᒃᓱᖅᑕᐅᓯᒪᕗᖅ ᑎᓯᐱᕆᒧᑦ, ᑎᓴᒪᓂ ᓂᕈᐊᒐᒃᓴᐅᑐᐃᓐᓇᕆᐊᓕᖕᓂ ᖃᐅᔨᓴᖅᐳᑦ ᓂᕈᐊᕐᓂᐅᓂᐊᖅᑐᒥ
ᐸᕐᓇᐃᓂᖅ ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᒃᓴᒧᑦ ᓂᕈᐊᕐᕕᒪᕆᒃ ᐊᓂᒍᖅᓯᒪᑎᓪᓗᒍ ᓂᕈᐊᖅᑎᑦᑎᒃᑲᓐᓂᕐᓂᖅ ᓱᓕ ᐱᓕᕆᐊᖑᕙᓪᓕᐊᕗᖅ, ᐅᖃᖅᑎᐅᔪᒥ ᐅᖃᖅᐳᖅ. (ᑐᓴᒐᒃᓴᓕᕆᔨᒃᑯᑦ ᐊᔾᔨᖁᑎᖓ)
For English version, see With another election coming, no word from NTI on possibly offering vouchers again
ᓄᓇᕗᒻᒥ ᑐᙵᕕᒃᑯᑦ ᑐᓂᓯᓂᐊᖅᐳᑦ ᑐᓴᐅᒪᔾᔪᑎᒃᓴᓂ “ᓈᒻᒪᒃᓯᒍᓂ” ᑎᑭᑉᐸᓪᓕᐊᔪᒥ ᑎᓯᐱᕆᒥ ᐊᖓᔪᖅᑳᒃᓴᒧᑦ ᓂᕈᐊᕐᕕᒪᕆᒃ ᐊᓂᒍᖅᓯᒪᑎᓪᓗᒍ ᓂᕈᐊᖅᑎᑦᑎᒃᑲᓐᓂᕐᓂᖅ.
ᑭᓯᐊᓂ ᐅᖃᖅᑎᐅᔪᖅ ᐳᕉᑎ ᓚᕌᒃ ᑭᐅᓚᐅᙱᓚᖅ ᐊᐱᕆᔭᐅᒐᒥ ᓄᓇᕗᒻᒥ ᑐᙵᕕᒃᑯᑦ ᐊᑐᐃᓐᓇᖃᖅᑎᑦᑎᒃᑲᓐᓂᕐᓂᐊᕐᒪᖔᑕ ᓂᐅᕕᕈᓐᓇᐅᑎᓂᑦ ᐊᐅᒃᑕᔫᓂ ᐊᔭᐅᕆᓂᕐᒥ ᓂᕈᐊᕆᐊᖅᑐᖅᑐᓂ ᐅᓄᕐᓂᖏᓐᓂ, ᑕᐃᒪᐃᓚᐅᕐᓂᖏᓐᓂ 2024 ᓂᕈᐊᕐᓂᕐᒥ.
“ᓇᓗᓇᐃᖅᓯᓂᖅ ᐊᑐᓂ ᐃᓅᑉ ᓂᐱᖓ ᑐᓴᖅᑕᐅᓂᖓᓂ ᐃᓚᒋᔭᐅᓗᓂ ᓂᕈᐊᕐᓂᕐᒧᑦ ᐱᔪᓐᓇᕐᓂᕆᔭᐅᔪᓂ ᐃᑲᔪᓲᖑᕗᖅ ᐊᔪᕆᖅᓱᐃᓂᕐᒥ ᐱᓕᕆᓂᑦᑎᓐᓂ ᓄᓇᕗᒻᒥ ᑐᙵᕕᒃᑯᓐᓂᑦ,” ᐅᖃᓚᐅᖅᐳᖅ ᓚᕌᒃ, ᑎᒥᖁᑕᐅᔪᑦ ᐅᖃᖅᑎᖓ, ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᕕᕗᐊᕆ 4−ᒥ.
“ᐸᕐᓇᐃᓂᖅ ᓂᕈᐊᕐᓂᐅᔪᒧᑦ ᓱᓕ ᐱᓕᕆᐊᕆᔭᐅᖏᓐᓇᖅᐳᖅ, ᐊᒻᒪ ᑐᓂᓯᓂᐊᖅᐳᒍᑦ ᑐᓴᐅᒪᔾᔪᑎᒃᓴᓂ ᓈᒻᒪᒃᓯᒍᓂ.”
ᓄᓇᕗᒻᒥ ᑐᙵᕕᒃᑯᑦ ᑲᑐᔾᔨᖃᑎᒌᖑᕗᖅ ᓇᓗᓇᐃᖅᓯᔪᒥ ᓱᓕᓂᕋᖅᑕᐅᔪᓂ ᓴᓇᔭᐅᔪᓂ ᐅᕘᓇ ᓄᓇᕗᒻᒥ ᐊᖏᕈᑎᒥ ᐱᓕᕆᐊᖑᕙᖕᓂᖓᓂ. ᑲᑐᔾᔨᖃᑎᒌᖑᔪᑦ ᐊᖓᔪᖅᑳᖓ ᔨᐊᕋᒥ ᑑᕐᙶᓗᒃ ᓄᖅᑲᓚᐅᖅᐳᖅ ᑕᖅᑭᐅᓚᐅᖅᑐᒥ ᓵᙵᑎᓪᓗᒍ ᐋᓐᓂᖅᓯᕆᓂᐅᔪᒥ ᐃᖅᑲᖅᑐᒐᒃᓴᐅᓂᖓᓂ, ᑭᖑᓂᐊᒍᑦ ᓄᖅᑲᖅᑎᑕᐅᑲᐃᓐᓇᖅᑎᓪᓗᒍ.
ᐊᖓᔪᖅᑳᑉ ᑐᖓᓕᖓ ᐹᓪ ᐃᕐᙵᐅᑦ ᐃᓯᓚᐅᖅᐳᖅ ᐊᖓᔪᖅᑳᖑᓚᐅᑲᖕᓂᖓᓂ.
ᑑᕐᙶᓗᒃ ᓂᕈᐊᖅᑕᐅᓚᐅᖅᐳᖅ ᐊᕐᕌᒍᓄᑦ ᑎᓴᒪᓄᑦ ᐊᖓᔪᖅᑳᖑᓂᕐᒥ ᑎᓯᐱᕆ 2024−ᒥ ᓂᕈᐊᖅᑎᓂ ᓂᕈᐊᖅᖢᑎᒃ 66.7 ᐳᓴᓐᑎᒥ — ᑎᓴᒪᐃᖅᓱᖅᑐᒥ ᖁᑦᑎᖕᓂᖅᓴᐅᔪᒥ 2021−ᒥ ᐊᖓᔪᖅᑳᒃᓴᒧᑦ ᓂᕈᐊᕐᓂᕐᒥ, ᐊᓗᑭ ᑰᑦᑎᖅ ᓂᕈᐊᖅᑕᐅᑎᓪᓗᒍ 17.5 ᐳᓴᓐᑎᑐᐃᓐᓇᕐᒥ ᐱᔪᓐᓇᖅᑐᓂ ᓄᓇᕗᒻᒥ ᐱᔪᓐᓇᕐᓂᖅᑖᖅᑎᑕᐅᓯᒪᔪᓂ ᓂᕈᐊᖅᖢᑎᒃ.
ᖁᕝᕙᕆᐊᖅᑎᑦᑎᓂᕐᒥ ᓂᕈᐊᕐᓂᕐᒧᑦ ᐃᓚᐅᖃᑕᐅᓂᖏᓐᓂ 2024−ᒥ ᓂᕈᐊᕐᓂᕐᒥ, ᓄᓇᕗᒻᒥ ᑐᙵᕕᒃᑯᑦ ᐊᑐᐃᓐᓇᖃᖅᑎᑦᑎᓚᐅᖅᐳᑦ $100 ᓂᐅᕕᕈᓐᓇᐅᑎᓂᑦ ᐊᐅᒃᑕᔫᓂ ᑯᐊᐸᒃᑯᓐᓄᑦ ᐅᕝᕙᓘᓐᓃᑦ ᓂᐅᕕᕐᕕᖕᒧᑦ ᑭᓇᑐᐃᓐᓇᒧᑦ ᓂᕈᐊᓚᐅᖅᑐᒧᑦ.
ᓄᓇᕗᒻᒥ ᑐᙵᕕᒃᑯᑦ ᑮᓇᐅᔭᓂ ᐊᑐᖅᑕᐅᔪᒃᓴᓕᐅᓚᐅᖅᐳᑦ $2 ᒥᓕᐊᓐᓂ ᓂᐅᕕᕈᓐᓇᐅᑎᓂᑦ ᐊᐅᒃᑕᔫᓄᑦ.
ᐱᒋᐊᕈᑕᐅᔪᖅ ᐊᑭᕋᖅᑐᖅᑕᐅᓚᐅᖅᐳᖅ ᐃᓚᖏᓐᓂ ᓂᕈᐊᒐᒃᓴᐅᔪᓂ ᐊᒻᒪ ᖁᙱᐊᖅᑎᐅᔪᓂ, ᐃᓚᖃᖅᑐᒥ ᓄᓇᕗᒻᒥ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᐃᓚᒋᔭᐅᓚᐅᖅᓯᒪᔪᖅ ᐲᑕ ᐃᑎᓐᓄᐊᕐᒧᑦ, ᑕᐃᓪᓗᓂᐅᒃ “ᐃᓕᖅᑯᓯᖃᑦᑎᐊᕋᓱᙱᓐᓂᖓᓂ” ᐊᒻᒪ “ᐱᑦᑎᐊᙱᓐᓂᐅᕗᖅ” ᓂᕈᐊᕐᓂᕐᒥ-ᓂᐅᕕᕐᓂᐅᔪᒥ ᐱᓕᕆᓂᐅᔪᒥ.
ᓂᕈᐊᕐᓂᖃᐃᓐᓇᕐᒪᑕ, ᓄᓇᕗᒻᒥ ᑐᙵᕕᒃᑯᑦ ᐊᐅᓚᑦᑎᔨᒻᒪᕆᖓ ᑭᓕᒃᕙᒃ ᖃᑉᓗᓈ ᐅᖃᓚᐅᖅᐳᖅ “ᖁᕕᐊᓐᓂᖓᓂ” ᖁᑦᑎᖕᓂᖅᓴᐅᔪᒥ ᓂᕈᐊᖅᑎᓂᑦ ᐃᓚᐅᖃᑕᐅᓂᖏᓐᓂ ᑭᓯᐊᓂ ᐅᖃᓚᐅᙱᓚᖅ ᑲᑐᔾᔨᖃᑎᒌᖑᔪᑦ ᑲᔪᓯᓂᐊᕐᒪᖔᑕ ᐱᓕᕆᓂᐅᔪᒥ.
ᑑᙶᓘᑉ ᓄᖅᑲᕐᓂᖓᓂ, ᓄᓇᕗᒻᒥ ᑐᙵᕕᒃᑯᑦ ᐋᖅᑭᒃᓯᓚᐅᖅᐳᑦ ᓂᕈᐊᕐᕕᒪᕆᒃ ᐊᓂᒍᖅᓯᒪᑎᓪᓗᒍ ᓂᕈᐊᖅᑎᑦᑎᒃᑲᓐᓂᕐᓂᕐᒥ ᐱᓕᕆᐊᖑᓂᐊᖅᑐᒥ ᑎᓯᐱᕆᒥ.
ᖃᔅᓯᒐᓚᖕᓂ ᓂᕈᐊᒐᒃᓴᐅᔪᒪᔪᓂ ᐅᖃᐅᓯᖄᓂᒃᓯᒪᕗᑦ ᐱᔪᒪᓂᐅᔪᒥ ᐱᓇᓱᐊᕐᓂᕐᒥ ᓄᓇᕗᒻᒥ ᑐᙵᕕᒃᑯᑦ ᖁᑦᑎᓛᖓᓂ ᐃᖅᑲᓇᐃᔮᖑᔪᒥ ᐃᓚᖃᖅᑐᒥ ᐸᖕᓂᖅᑑᕐᒥᐅᑕᖅ ᐋᓐᑐᕉ ᓇᑲᓱᒃ, ᓄᖅᑲᖅᓯᒪᓕᖅᑐᖅ ᒪᓕᒐᓕᐅᖅᑎᐅᓚᐅᖅᓯᒪᔪᖅ ᒪᓃᑦᑐᖅ ᑖᒻᓯᓐ, ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᕆᓚᐅᖅᓯᒪᔭᖓ ᑳᑎ ᑕᐅᑐᙱ ᐊᒻᒪ ᑑᕐᙶᕐᓗᒃ, ᐊᑭᕋᖅᑐᓚᐅᖅᑐᒥ ᓄᓇᕗᒻᒥ ᑐᙵᕕᒃᑯᓐᓂᑦ “ᐊᒡᕖᖅᑎᑕᐅᓂᖓᓂ”.
ᐊᖓᔪᖅᑳᒃᓴᒧᑦ ᓂᕈᐊᕐᕕᒪᕆᒃ ᐊᓂᒍᖅᓯᒪᑎᓪᓗᒍ ᓂᕈᐊᖅᑎᑦᑎᒃᑲᓐᓂᕐᓂᖅ ᐋᖅᑭᒃᑕᐅᓯᒪᕗᖅ ᐊᐅᓚᓂᖓᓂ ᑕᐃᑲᓂᑦᑕᐃᓐᓇᖅ ᑲᑐᔾᔨᖃᑎᒌᖑᔫᑉ ᐋᖅᑭᒃᑕᐅᓯᒪᓂᖓᓂ ᐊᖓᔪᖅᑳᑉ ᑐᖏᓕᖓᓂ ᓂᕈᐊᕐᓂᐅᔪᒥᑦ.
After all that votes that Jeremy was saying that he will do his job. For sure he did work hard. He said he will worked on mental health for Inuit and by those health professionals this happen. Saying about him on charges to make it more serious. Always makes excuses those with authority towards Inuit. They have been trying to silence Inuit for what they had done. And can be investigated and to RCMP they make statements in there work. If there is nothing in police station, they didn’t do their work. That’s how they miss this discrimination those who work at government workplace.