ᓂᕕᐊᖅᓵᑯᓗᒃ ᑐᖁᕗᖅ ᐸᓖᓯᒃᑯᓐᓂ-ᐃᓚᐅᔪᓂ ᖁᑭᖅᓯᓂᐅᔪᒥ

For English version, see 6-year-old girl dies after police-involved shooting in Inukjuak

6-ᓂ ᐅᑭᐅᓕᒃ ᓂᕕᐊᖅᓵᖅ ᓇᓗᓇᐃᖅᑕᐅᓯᒪᕗᖅ ᐃᓅᔪᒥ ᐃᓅᔪᓐᓃᓚᐅᖅᑐᒥ ᐸᓖᓯᒃᑯᓐᓂ-ᐃᓚᐅᖃᑕᐅᔪᓂ ᖁᑭᖅᓴᕐᓂᐅᔪᒥ ᐃᓄᒃᔪᐊᕐᒥ ᑎᓯᐱᕆ 20−ᒥ.

“ᐋᓚᓯ ᐃᒡᓕᕐᒦᖃᑎᖃᓚᐅᖅᐳᖅ ᐊᓈᓇᒥᓂᒃ ᐱᕐᕈᓗᐊᕿᓂᐅᔪᖃᖅᑎᓪᓗᒍ,” ᐅᖃᓚᐅᖅᐳᖅ ᓘᓯ ᓇᐅᕋ, ᐅᓂᒃᑳᕆᓪᓗᓂ ᖃᓄᐃᓐᓂᐅᔪᓂ ᐅᓪᓛᕐᔪᐊᖓᓂ ᖃᓄᐃᓐᓂᐅᔪᒥ.

ᓇᐅᕋ ᐃᓪᓗᕆᔭᐅᕗᖅ ᐋᓐᑐᕉ ᓇᓗᒃᑐᒃ, ᐋᓚᓯ ᐃᖃᓘᑉ ᐊᑖᑕᒋᔭᖓ. ᓇᐅᕋ ᓇᓗᓇᐃᖅᓯᓚᐅᖅᐳᖅ ᓇᓗᒃᑐᖕᒥ ᐊᓯᖓᓂ ᐃᓄᖕᒥ ᐋᓐᓂᓚᐅᖅᑐᒥ ᑲᑎᕕᒃ ᐊᕕᒃᑐᖅᓯᒪᓂᐅᔪᒥ ᒐᕙᒪᒃᑯᑦ ᑕᐃᔭᖓᓂ “ᑕᐅᖅᓰᓂᐅᔪᒥ ᖁᑭᖅᓴᕐᓂᐅᔪᒥ” ᑎᓯᐱᕆ 23−ᒥ ᑐᓴᒐᒃᓴᓕᐊᖑᔪᒥ.

ᐊᓯᐊᓂ ᐅᖃᐅᓯᒃᓴᓕᐊᖑᔪᒥ ᑐᓂᔭᐅᔪᒥ ᑲᑎᕕᒃ ᐊᕕᒃᑐᖅᓯᒪᓂᐅᔪᒥ ᒐᕙᒪᒃᑯᓐᓂᑦ ᑎᓯᐱᕆ 31−ᒥ, ᐃᒃᓯᕙᐅᑕᖅ ᒫᒋ ᐃᒧᓪᓗᒃ ᐅᖃᓚᐅᖅᐳᖅ, “ᓄᒫᑦᑕᕐᔪᐊᖅᐳᖓ ᑐᓴᕐᓂᕐᒥ ᐃᓅᔪᓐᓃᕐᓂᖓᓂ ᓂᕕᐊᖅᓵᑯᓗᖕᒥ. ᐃᓚᐅᖃᑕᐅᓇᓂ ᐱᕋᔭᒃᑕᐅᓂᐅᕗᖅ ᓄᒫᓇᕐᔪᐊᖅᑐᒥ ᐱᓂᕐᓗᒡᔪᐊᕐᓂᐅᔪᒥ.”

ᐅᓪᓗᓂ ᑭᖑᓂᐊᓂ ᖁᑭᖅᓴᕐᓂᐅᓚᐅᖅᑐᒥ, ᐊᖑᑎ ᐊᒻᒪ ᐸᓂᑯᓗᐊ ᓯᕗᓪᓕᕐᒥ ᐅᓂᒃᑳᕆᔭᐅᓚᐅᖅᐳᑦ ᐱᓪᓚᕆᐅᔪᒥ ᑭᓯᐊᓂ ᖃᓄᐃᓐᓂᖏᑦ ᑐᙵᓂᖃᑦᑎᐊᓚᐅᖅᐳᑦ ᒪᓐᑐᕆᐋᓪᒥ ᐋᓐᓂᐊᕕᖓᓂ ᒪᓕᒃᑐᒥ ᖃᓄᐃᓐᓂᐅᔪᒥ ᓄᓇᓕᖕᓂ 1,800−ᐸᓗᖕᓂ ᐃᓄᓕᖕᓂ ᓄᓇᕕᐅᑉ ᑲᖏᖅᓱᐊᓘᒃ ᓯᒡᔭᖅᐸᓯᖓᓂ.

ᑎᓯᐱᕆ 20−ᒥ, ᓄᓇᕕᖕᒥ ᐸᓖᓯᒃᑯᑦ ᑭᐅᓚᐅᖅᐳᑦ ᐅᖃᓗᖕᓂᐅᔪᒥ 911−ᒧᑦ ᐅᖃᓗᖕᓂᐅᔪᒥ 3:30 ᐅᓪᓛᒃᑯᑦ ᐅᓂᒃᑳᕆᓪᓗᓂ ᐃᓄᖕᒥ ᐊᖏᕐᕋᒥ ᐅᓗᕆᐊᓇᖅᑐᒦᑎᑦᑎᓚᐅᕐᓂᖓᓂ ᐊᓯᖏᓐᓄᑦ, Bureau des enquêtes indépendantes ᐅᖃᓚᐅᖅᐳᖅ ᑐᓴᒐᒃᓴᓕᐊᖑᔪᒥ ᑎᑎᕋᖅᑕᐅᔪᒥ ᐃᑭᐊᖅᑭᕕᖓᓐᓂ ᑎᓯᐱᕆ 21−ᒥ.

ᐸᓖᓯᒃᑯᑦ ᑎᑭᐅᑎᖕᒪᑕ, ᐊᖑᒻᒥ ᖁᑭᐅᓯᔭᖅᑐᒥ ᒡᐸᖅᓯᓚᐅᖅᐳᖅ, ᑲᑎᕕᒃ ᐊᕕᒃᑐᖅᓯᒪᓂᐅᔪᒥ ᒐᕙᒪᒃᑯᑦ ᐅᖃᓚᐅᖅᐳᖅ. ᐊᖑᑦ, ᐅᓂᒃᑳᕆᔭᐅᔪᒥ “ᖁᑭᐅᓯᔭᖅᑎᐅᓂᖓᓂ,” ᐊᒻᒪ ᓱᕈᓯᕐᒥ ᐃᓗᐊᓃᓚᐅᖅᐳᑦ ᐊᖏᕐᕋᒥ, ᐋᓐᓂᓚᐅᖅᐳᑦ.

ᒪᕐᕉᒃ ᐃᓅᓕᓴᖅᑕᐅᓚᐅᖅᐳᑦ ᑕᐃᑲᓂ, ᐊᓱᐃᓛᒃ ᑐᐊᕕᕐᓇᖅᑐᒃᑯᑦ ᖃᖓᑕᓲᒃᑯᑦ ᐊᐅᓪᓚᖅᑎᑕᐅᓚᐅᖅᐳᑦ ᒪᓐᑐᕆᐋᓪᒧᑦ.

ᑎᓯᐱᕆ 30−ᒥ, ᖃᐅᔨᓴᖅᑎᑦ — ᑯᐸᐃᒃ ᐸᓖᓯᒃᑯᓐᓄᑦ ᖃᐅᔨᓴᖅᑎᖏᑦ, ᖃᐅᔨᓴᖅᑐᒥ ᐸᓖᓯᒃᑯᑦ ᑭᐅᓂᖓᓂ 911−ᒧᑦ ᐅᖃᓗᖕᓂᐅᔪᒥ — ᐅᖃᐅᓯᖃᓚᐅᖅᐳᑦ ᐊᑕᐅᓯᕐᒥ ᐃᓄᖕᒥ ᐃᓅᔪᓐᓃᖅᑐᖃᕐᓂᖓᓂ ᖃᓄᐃᓐᓂᐅᔪᒥ ᑭᓯᐊᓂ ᓇᓗᓇᐃᖅᓯᓚᐅᙱᓚᑦ ᑭᓇᐅᓂᖓᓂ ᐅᕝᕙᓘᓐᓃᑦ ᖃᖓ ᑐᖁᓂᖓᓂ.

“BEI ᓇᓗᓇᐃᖅᓯᕙᙱᑦᑎᐊᖅᐳᑦ ᑭᓇᐅᓂᖓᓂ ᐱᕋᔭᒃᑕᐅᔪᓂ ᓄᖅᑲᖅᑎᑕᐅᓇᓱᐊᕐᓂᐅᔪᓂ ᑐᓴᖅᑕᐅᔭᕆᐊᖃᙱᓐᓂᕐᒥ ᐱᔾᔪᑕᐅᔪᓂ,” ᐅᖃᖅᑎᐅᔪᖅ ᔨᐊᕋᒥ ᑲᒻᑐᐊ ᐅᖃᓚᐅᖅᐳᖅ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᑎᓯᐱᕆ 31−ᒥ.

“ᓇᓗᓇᐃᖅᓯᔪᓐᓇᖅᐳᒍᑦ ᐃᓄᑦ ᐃᓅᔪᓐᓃᓚᐅᖅᑐᖅ ᐋᓐᓂᕐᔪᐊᖅᓯᒪᓚᐅᕐᓂᖓᓂ ᒪᓕᒃᑐᒥ ᓄᖅᑲᖅᑎᑦᑎᓇᓱᐊᕐᓂᐅᔪᒥ, ᓇᓂᔭᐅᓚᐅᖅᑐᒥ ᐃᒡᓗᒥ.”

ᑲᒻᑐᐊ ᑐᕌᖅᑎᑦᑎᖁᔨᕗᖅ ᖃᐅᔨᒋᐊᒃᑲᓐᓂᕐᓂᐅᔪᓂ ᑯᐸᐃᖕᒧᑦ ᑐᖁᖓᔪᓕᕆᔨᒃᑯᑦ ᑎᑎᕋᕐᕕᖓᓄᑦ.

ᑐᖁᖓᔪᓕᕆᔨᒃᑯᑦ ᑎᑎᕋᕐᕕᖓ ᑭᐅᓚᐅᙱᓚᑦ ᑐᒃᓯᕋᕐᓂᐅᔪᒥ ᐅᖃᐅᓯᒃᓴᓕᐅᕐᓂᕐᒧᑦ.

ᓇᐅᕋ ᓇᓗᓇᐃᖅᓯᓚᐅᖅᐳᖅ ᑐᖁᓂᐅᔪᒥ 6-ᓂ ᐅᑭᐅᓕᒃᐋᓚᓯ ᐃᖃᓗᖕᒥ.

ᓇᐅᕋ ᐅᖃᓚᐅᖅᐳᖅ ᐋᓚᓯ ᓂᐊᖁᖓᒍᑦ ᐋᓐᓂᕐᓂᖃᓚᐅᕐᓂᖓᓂ. ᐅᖃᓚᐅᖅᐳᖅ ᐸᓖᓯᒃᑯᑦ ᖁᑭᕆᐊᓚᐅᖅᐳᑦ ᑕᓪᓕᒪᐃᖅᓱᖅᖢᑎᒃ — ᐊᑕᐅᓯᖅ ᓱᕈᓯᕐᒥ ᖁᑭᖅᓯᓂᖃᖅᖢᓂ ᐊᒻᒪ ᐊᓯᖓᓂ ᐋᓐᓂᖅᓯᓪᓗᓂ ᓇᓗᒃᑐᒃᒥ.

“ᐅᓇ ᐊᒃᓱᐊᓗᒃ ᐋᓐᓂᕐᓇᖅᓯᒪᕗᖅ ᐅᕙᑦᑎᓐᓄᑦ, ᐊᒻᒪ ᐃᒃᐱᒍᓱᑦᑎᐊᕐᓂᕐᒧᑦ ᑕᐃᔅᓱᒧᖓ ᐊᒻᒪᓗ ᑭᒃᑯᑐᐃᓐᓇᕐᓅᖓᖏᓐᓂᑦᑎᓐᓂ, ᐅᖃᐅᓯᖃᔾᔮᙱᓚᖓ ᐅᓂᒃᑳᕆᕐᓘᑎᖃᕐᓂᕐᓂ,” ᑎᑎᕋᓚᐅᖅᐳᖅ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ.

16−ᓂ ᐃᓄᖕᓂ ᑐᖁᓯᒪᕗᑦ ᐹᖅᓯᓂᐅᔪᓂ ᐸᓖᓯᒃᑯᓐᓂ ᑕᐃᒪᙵᓂ 2016−ᒥ. ᑎᓴᒪᐃᑦ ᐅᑯᓂᖓ ᖃᓄᐃᓐᓂᐅᔪᓂ ᐱᓯᒪᕗᑦ ᖄᖏᖅᓯᒪᔪᓂ ᑕᖅᑭᓂᑦ 14−ᓂᑦ, ᐃᓚᖃᖅᑐᒥ ᑎᓴᒪᓂ ᑐᖁᓂᐅᔪᓂ.

ᔮᓱᐊ ᐸᐱᒐᑐᑦᕝᒃ ᑐᖁᓚᐅᖅᐳᖅ ᓄᕕᐱᕆ 2024−ᒥ ᐊᒻᒪ ᒪᕐᕈᓕᐊᖑᖃᑎᖓ ᓄᑲᖓ ᒑᓂᑦ ᐋᓐᓂᕐᔪᐊᓚᐅᖅᐳᖅ ᖁᑭᖅᑕᐅᓚᐅᖅᑎᓪᓗᒋᑦ ᐸᓖᓯᒃᑯᓐᓂ.

ᒪᐃ 2025−ᒥ, ᒫᒃ R. ᐋᓇᓈᒃ ᑐᖁᓚᐅᖅᐳᖅ ᑲᖏᖅᓱᐊᓗᔾᔪᐊᕐᒥ ᐹᖅᓯᓂᖃᓚᐅᖅᑎᓪᓗᒍ ᐸᓖᓯᒃᑯᓐᓂ. ᐊᒻᒪ ᔪᓚᐃ 2025−ᒥ, ᔭᐃᒥᓯ ᑲᕕᒃ ᐃᓄᒃᔪᐊᒥ ᑐᖁᓚᐅᖅᐳᖅ ᖃᓄᐃᓐᓂᐅᔪᒥ ᑭᖑᓂᐊᒍᑦ ᐃᓚᖃᖅᑐᒥ ᐸᓖᓯᒃᑯᓐᓂ.

Sûreté du Québec, ᑲᓇᑕᒥ ᐊᕕᒃᑐᖅᓯᒪᓂᐅᔪᒥ ᐸᓖᓯᒃᑯᑦ ᑐᕌᖅᑎᑦᑎᔪᒥ ᖃᐅᔨᓴᖅᑕᐅᓂᖓᓂ ᑎᓯᐱᕆ 20−ᒥ ᐃᓄᒃᔪᐊᒥ ᖃᓄᐃᓐᓂᐅᔪᒥ, ᓇᓗᓇᐃᖅᓯᓯᒪᙱᓚᑦ ᓇᓗᒃᑐᒃ ᐅᕝᕙᓘᓐᓃᑦ ᐊᓯᖔᖓᓂ ᐃᖅᑲᖅᑐᒐᒃᓴᙳᕐᓂᐊᕐᓂᖓᓂ ᒪᓕᒃᑐᒥ ᖃᓄᐃᓐᓂᐅᔪᒥ.