ᓄᓇᕕᖕᒥ ᓯᐊᕐᕆᔭᐅᑎᑯᑖᒥᑦ ᐊᐅᓪᓛᕐᓂᖅ ᖁᕝᕙᖅᓴᐃᕗᖅ ᓯᓚᒥ ᐊᔪᙱᓐᓂᐅᔪᒥ

ᒪᒃᑯᒃᑐᓂ ᐃᓚᐅᖃᑕᐅᔪᑦ ᑕᓪᓕᒪᓂ ᓄᓇᕕᖕᒥ ᓄᓇᓕᐅᔪᓂ ᐸᕐᓇᓚᐅᖅᐳᑦ ᐊᐅᓪᓛᕐᓂᕐᒧᑦ ᐅᓪᓗᓂ−ᑕᓪᓕᒪᓂ ᓯᐊᕐᕆᔭᐅᑎᑯᑖᒥᑦ ᐊᐅᓪᓛᕐᓂᐅᔪᒥ ᑰᔾᔪᐊᕐᒥ ᑕᒪᑐᒪᓂ ᐱᓇᓱᐊᕈᓯᐅᔪᒥ.

ᓄᕐᕋᐃᑦ — Jeunes Karibus ᐱᓕᕆᐊᖑᕗᖅ ᐊᑐᐃᓐᓇᐅᑎᑕᐅᔪᒥ ᓄᓇᓕᖕᓂ ᐃᓕᓐᓂᐊᕐᕕᓂᑦ ᐋᖅᑭᒃᓱᐃᓲᖑᔪᒥ ᓄᓇᒥ ᖃᓄᐃᓕᐅᕈᑕᐅᔪᓂ ᒪᒃᑯᒃᑐᓄᑦ ᐊᕕᒃᑐᖅᓯᒪᓂᐅᔪᒥ.

ᐃᓕᓐᓂᐊᕐᕕᖕᓂ ᑲᑎᙵᓂᐅᔪᓂ ᐅᒥᐅᔭᕐᒥ, ᐃᓄᒃᔪᐊᖅ, ᐃᕗᔨᕕᒃ, ᑲᖏᖅᓱᔾᔪᐊᖅ ᐊᒻᒪ ᑕᓯᐅᔭᕐᒥ ᐸᕐᓇᓚᐅᖅᐳᑦ ᐊᐅᓪᓚᕐᓂᐊᕐᓂᕐᒥ ᒫᔾᔨ 2−ᒥ ᐊᒻᒪ ᐅᑎᕐᓗᑎᒃ ᒫᔾᔨ 6−ᒥ. ᑲᑎᓪᓗᒍ, ᐅᓄᕐᓂᖅᓴᐅᔪᓂ 40−ᓂ ᐃᓄᖕᓂ ᐊᐅᓪᓛᖃᑕᐅᔪᓐᓇᓚᐅᖅᐳᑦ.

“ᓯᐊᕐᕆᔭᐅᑎᑯᑖᒃᑰᕐᓂᐊᖅᐳᒍᑦ ᑕᖕᒫᕐᕕᖕᒥ ᐃᓂᒋᔭᖓᓂ ᐊᒻᒪ ᓯᓂᒃᐸᒡᓗᑕ ᑐᓂ, ᐱᖅᑯᓯᑐᖃᖅᑎᒍᑦ ᑐᐱᕐᓂ,” ᐅᖃᓚᐅᖅᐳᖅ ᐱᓕᕆᐊᖑᔪᒥ ᑲᒪᔨᐅᔪᖅ ᐅᓕᕕᐊᐃ ᒨᕐᓯᐅᕐ ᐱᓇᓱᐊᕈᓯᐅᓚᐅᖅᑐᒥ, ᐊᐅᓪᓚᓚᐅᖅᑳᕐᓇᑎᒃ.

ᓄᕐᕋᐃᑦ — Jeunes Karibus ᑮᓇᐅᔾᔭᒃᓴᕈᑕᐅᙱᑦᑐᒥ ᑲᑐᔾᔨᖃᑎᒌᖑᔪᒥ ᑮᓇᐅᔭᖃᖅᑎᑕᐅᓪᓗᓂ ᒪᑭᕝᕕᒃᑯᓐᓂ, ᑲᑎᕕᖕᒥ ᐊᕕᒃᑐᖅᓯᒪᓂᐅᔪᒥ ᒐᕙᒪᖓᓐᓂ ᐊᒻᒪ ᑯᐸᐃᖕᒥ ᒥᓂᔅᑕᖃᕐᕕᖓ ᐃᓄᓕᒫᓄᑦ ᒥᐊᓂᖅᓯᔩᑦ.

ᑕᐃᒪᙵᓂ ᐱᒋᐊᕐᓂᖓᓂ 2014−ᒥ, ᑕᐃᑯᖓ 2024−ᒧᑦ, ᐱᓕᕆᐊᖑᔪᖅ ᐃᓚᐅᑎᑦᑎᓯᒪᕗᖅ 1,284−ᓂ ᒪᒃᑯᒃᑐᓂᓄᓇᕕᓕᒫᒥ, ᐃᖅᑲᓇᐃᔭᖅᑎᑦᑎᓪᓗᑎᒃ 120−ᓂ ᐃᓄᖕᓂ ᐊᐅᓪᓛᕈᔾᔨᔨᐅᔪᓂ ᐃᑲᔪᕐᓂᕐᒧᑦ ᐊᐅᓪᓛᕐᓂᐅᔪᓂ ᐊᒻᒪ ᑐᓂᓯᓚᐅᖅᐳᑦ 2,734 ᓄᓇᒥ ᖃᓄᐃᓕᐅᕈᑕᐅᔪᓂ.

ᒨᕐᓯᐅᕐ ᐅᖃᓚᐅᖅᐳᖅ ᐊᐅᓪᓛᕈᔾᔨᔩᑦ ᐃᑲᔪᓲᖑᑎᓪᓗᒋᑦ ᓇᓗᓇᐃᖅᓯᓂᕐᒥ ᐊᑦᑕᓇᔾᔭᐃᖅᓯᓯᒪᓂᕐᒥ, ᐅᓯᑲᑦᑕᕐᓗᑎᒃ ᐱᖁᑎᓂᑦ ᐊᒻᒪ ᐋᖅᑭᒃᓱᐃᓗᑎᒃ ᑕᖕᒫᕐᕕᖓᓂ, ᓯᕗᓪᓕᐅᔪᒥ ᐊᑐᕐᓂᖃᐅᑎᖏᑦ ᐅᖃᐅᓯᖃᕐᓂᕐᒥ ᖃᐅᔨᒪᓂᖏᓐᓂ ᑕᖕᒫᕐᓂᕐᒥ, ᐃᖃᓪᓕᐊᕐᓂᕐᒥ ᐊᒻᒪ ᐊᖑᓇᓱᖕᓂᕐᒥ ᐊᔪᙱᓐᓂᖏᓐᓂ ᐊᒻᒪ ᐃᓕᖅᑯᓯᒧᑦ ᐱᖅᑯᓯᑐᖃᖅᑎᒍᑦ.

ᐊᐅᓪᓛᕐᓂᖅ ᒪᑐᐃᖓᕗᖅ ᐃᓕᓐᓂᐊᖅᑎᓄᑦ ᖁᑦᑎᖕᓂᓕᖕᓂ 7−ᒥ ᑭᖑᓪᓕᖅᐹᖓᓄᑦ ᐊᕐᕌᒍᖓᓂ ᖁᑦᑎᒃᑐᒥ ᐃᓕᓐᓂᐊᕐᕕᖕᒥ, ᑭᓯᐊᓂ ᒪᒃᑯᖕᓂᖅᓴᓂ ᐃᓕᓐᓂᐊᖅᑎᓂ ᖁᑦᑎᖕᓂᓕᖕᓂ 5 ᐊᒻᒪ 6−ᒥ ᐃᓚᐅᖃᑕᐅᓚᐅᖅᐳᑦ ᐱᒋᐊᕐᓂᖓᓂ ᑲᑎᙵᓂᐅᔪᒥ ᑕᐅᑐᒃᑕᑐᐊᖃᑲᐃᓐᓇᖅᑐᒥ ᐃᓕᑦᑎᓂᕐᒥ ᓯᐊᕐᕆᔭᐅᑎᑯᑖᒃᑰᕐᓂᕐᒥᑦ ᐊᒻᒪ ᐃᓱᓕᓚᐅᖅᐳᖅ ᓄᓇᓕᖕᓂ ᑕᖕᒫᕐᓂᕐᒧᑦ ᐊᐅᓪᓛᕐᓂᐅᔪᒥ, ᒨᕐᓯᐅᕐ ᐅᖃᓚᐅᖅᐳᖅ.

2016−ᒥ, ᓄᕐᕋᐃᑦ — Jeunes Karibus ᐊᖏᒡᓕᒋᐊᓚᐅᖅᐳᑦ ᐃᓚᓕᐅᔾᔨᓂᕐᒥ ᑐᑦᑐᐃᑦ ᐱᓕᕆᐊᖑᔪᒥ, ᐃᓕᓐᓂᐊᖅᑎᑦᑎᔪᒥ ᐃᓚᐅᖃᑕᐅᔪᓂ ᐅᑭᐅᓕᖕᓂ 14−ᒥ 16−ᒧᑦ ᑲᑎᙵᔪᓄᑦ ᓯᕗᓕᐅᖅᑎᐅᓂᕐᓂ ᐊᒻᒪ ᐱᓗᑎᒃ ᐃᖅᑲᓇᐃᔮᒃᓴᓂ ᐱᕕᒃᓴᖃᕐᓂᐅᔪᓂ ᖁᑦᑎᒃᑐᒥ ᐃᓕᓐᓂᐊᕌᓂᒃᑯᑎᒃ.

ᐊᓯᐊᓂ ᐱᓕᕆᐊᖑᔪᒥ, ᐃᑳᖅᑐᐃᑦ, ᐊᑐᐃᓐᓇᖃᖅᑎᑦᑎᕗᖅ ᐅᓪᓗᓂ−30-ᓂ ᕿᔪᓕᕆᓂᕐᒥ ᐃᖅᑲᓇᐃᔭᖅᓯᓐᓈᑦ ᐃᓕᓐᓂᐊᖅᑐᒥ ᐅᕝᕙᓘᓐᓃᑦ ᐅᓪᓗᓂ−10-ᓂ ᖃᔭᖅᑐᕐᓂᕐᒥ ᐊᐅᓪᓛᕐᓂᐅᔪᒥ ᐊᐅᔭᒃᑯᑦ ᒪᒃᑯᒃᑐᓄᑦ ᐃᓄᖕᓄᑦ ᐅᑭᐅᓕᖕᓂ 14−ᒥ 30−ᒧᑦ.

ᑕᒪᒃᑭᑦ ᐱᖓᓱᑦ ᐱᓕᕆᐊᖑᔪᑦ ᑐᓂᔭᐅᕙᒃᐳᑦ ᐅᑯᓇᓂ 14−ᓂ ᓄᓇᕕᖕᒥ ᓄᓇᓕᐅᔪᓄᑦ.

ᒨᕐᓯᐅᕐ ᐅᖃᓚᐅᖅᐳᖅ ᑰᔾᔪᐊᕐᒥ ᐊᐅᓪᓛᕐᓂᐅᔪᖅ ᖃᕋᓴᐅᔭᑎᒎᖅᑕᐃᓕᒪᓂᖃᓚᐅᖅᐳᖅ ᑲᔪᖏᖅᓴᐃᓂᕐᒥ ᒪᒃᑯᒃᑐᓂ ᑯᑉᐳᔾᔭᐃᖅᓯᓂᖏᓐᓂ ᐅᖃᓘᑎᕋᓛᖏᓐᓂ ᐊᒻᒪ ᖃᕋᓴᐅᔭᒃᑰᕈᑎᕋᓛᓂᑦ ᐊᒻᒪ ᓴᓇᓗᑎᒃ ᖃᓄᐃᙱᑦᑎᐊᕐᓂᐅᔪᓂ ᐊᑐᖅᑕᐅᓕᒪᓂᐅᔪᓂ.

“ᑕᐃᒪᑐᖅ ᐃᓕᓐᓂᐊᖅᑏᑦ ᐃᒃᐱᒍᓱᖕᓂᐊᖅᐳᑦ ᑎᑭᐅᑎᑦᑎᐊᕈᓐᓇᕐᓂᕐᒥ − ᐃᓱᒪᓂᐅᔪᒥ ᐱᓕᕆᒍᕕᑦ ᓯᕗᒻᒧᑦ ᑭᓱᑐᐃᓐᓇᒥᒃ, ᑎᑭᐅᑎᔪᓐᓇᖅᐸᐃᑦ,” ᐅᖃᓚᐅᖅᐳᖅ.