ᐃᕗᔨᕕᒃᒥᐅᑕᖅ ᓴᓇᙳᐊᖅᑎ ‘ᐅᐱᒍᓱᒃᑐᖅ’ ᓴᓇᔨᐅᓂᐊᕐᓂᖓᓂᒃ ᐊᖏᔪᐊᓗᒃᒥ ᖁᓪᓕᕐᒥᒃ

For an English version of this story, please see Ivujivik carver ‘proud’ to be designer of giant qulliq.

ᓴᓇᙳᐊᕐᑎ ᐃᕗᔨᕕᒃᒥᐅᑕᖅ ᑎᑎᕋᐅᔭᓚᐅᕐᒪᓐ ᐃᓱᒪᒋᔭᖓ ᐊᖏᓂᖅᐹᑦᑎᐊᖑᓂᐊᕐᓗᓂ ᖁᓪᓕᖅ ᓴᓇᔭᐅᓂᑯᓂᒃ ᓄᓇᕕᒻᒥ.

ᒫᑎᐅᓯ ᐃᔭᐃᑦᑐᒃ ᐋᖅᑭᒃᓯᓚᐅᕐᒪᑦ ᖃᓄᐃᓕᖓᓇᔭᕐᓂᖓ ᓴᓇᔭᐅᓂᐊᕐᑐᖅ ᐊᒻᒪᓗ ᑭᖑᓂᐊᒍᑦ ᐱᐊᓂᒃᑕᐅᕙᓪᓕᐊᓕᕈᓂᒃ ᖁᓪᓕᐊᓗᒃ ᐋᖅᑭᒃᓯᑲᑕᖕᓂᐊᕆᓪᓗᑎᒃ ᐱᐊᓂᒍᑎᒋᓂᐊᖅᑕᖏᓐᓂᒃ.

ᐱᐊᓂᒃᑕᐅᒃᐸᑦ, ᐃᓯᖅᐸᓪᓕᐊᔪᓂᒃ ᑐᙵᓱᒃᑎᑦᑎᖃᑦᑕᕐᓂᐊᖅᑐᖅ ᐅᕙᓂ ᑰᔾᔪᐊᖅᒥ ᓄᑖᑦ ᐃᓱᐊᕐᓯᕕᒃ ᒪᒥᓴᕐᕕᒃᒥᑦ, ᑖᓐᓇ ᒪᑐᐃᖅᑕᐅᓛᖅᖢᓂ ᐊᕐᕌᒍᒋᔭᑦᑎᓐᓂᒃ. ᐃᓱᐊᕐᓯᕕᒃ ᒪᒥᓴᕐᕕᐅᕙᒃᑐᖅ ᐊᑐᓗᐊᖅᓯᒪᔪᓄᑦ ᐃᓄᖕᓄᑦ ᓄᓇᕕᒻᒥᐅᑕᓄᑦ.

ᐃᔭᐃᑦᑐᒃ ᐅᖃᓚᐅᕐᑐᖅ ᐅᐱᓐᓂᕋᖅᖢᓂ ᐱᓕᕆᐊᒥᒃ ᐃᓚᐅᑎᑕᐅᓂᖓᓂᒃ, ᑖᓐᓇᓗ ᐃᑲᔫᓯᐊᖃᖅᑎᑕᐅᓪᓗᓂ ᐱᓕᕆᕝᕕᖕᓄᑦ ᐃᑲᔫᓯᐊᖅᑖᖅᑎᑦᑎᕙᒃᑐᓂᒃ ᓲᖃᐃᒻᒪ ᐃᓄᖕᓂ ᑐᙵᓱᒃᑎᑦᑎᖃᑦᑕᕐᓂᐊᕐᒪ ᒪᒥᓴᕆᐊᖅᑐᓂᒃ

“ᐅᐱᓐᓇᕐᑐᖅ ᐊᔾᔨᐅᙱᑦᑐᒥᒃ ᐱᓕᕆᑎᑕᐅᓂᐊᖅᖢᓂ, ᑖᓐᓇᓗ ᐱᒻᒪᕆᐊᓘᓪᓗᓂ,” ᐅᖃᖅᑐᖅ. “ᐊᓕᐊᓇᐃᑦ ᖁᓪᓕᓕᐅᖃᑕᐅᓂᐊᕋᒪᒃ ᓴᓇᔭᐅᓚᐅᕐᓯᒪᙱᑦᑐᒥᒃ ᓄᓇᕕᒻᒥ.”

ᐃᓕᖅᑯᓯᑐᖃᒃᑯᑦ ᖁᓪᓕᖅ ᖃᐅᒻᒪᖅᑯᑎᒋᔭᐅᓯᒪᔪᖅ ᐅᕐᓱᖃᖅᐸᒃᖢᑎᒃ ᓇᑦᑎᐅᑉ ᐅᕐᓱᖓᓂᒃ, ᑭᓯᐊᓂᓕ ᐅᓇ ᐊᔾᔨᒋᔭᐅᔾᔮᙱᑦᑐᖅ, ᐃᔭᐃᑦᑐᒃ ᐅᖃᖅᑐᖅ.. ᐃᑯᒪᔪᓐᓇᕐᓂᐊᕐᒪᓪᓕ ᐃᓕᖅᑯᓯᒃᑯᑦ ᐅᕐᓱᕆᔭᐅᔪᓂᒃ ᐊᑐᙱᓪᓗᑎᒃ ᑭᓯᐊᓂ ᐃᑯᒪᖃᕐᕕᖃᕐᓂᐊᖅᖢᓂ.

“ᐅᕐᓱᖃᕐᓂᐊᕐᑐᖅ ᐅᓗᕆᐊᓇᙱᑦᑐᒥᒃ ᐃᒡᓘ ᐃᓗᐊᓃᓪᓗᓂ,” ᐅᖃᖅᑐᖅ.

ᐅᓇ ᖁᓪᓕᖅ ᓴᓇᔭᐅᓂᐊᖅᑐᖅ 1.2 ᑕᓐᔅ ᐅᒃᑯᓯᒃᓴᒥᒃ — ᓄᓇᓯᐅᑎᐅᑉ ᐅᖁᒪᐃᓐᓂᓪᓗᐊᖓᓂᒃ — ᐅᕙᙶᖅᑐᒥᒃ ᐅᕌᒡᓚᓐ ᐅᔭᕋᒃᓯᐅᕐᕕᒃᒥᒃ ᑲᖏᖅᓱᔾᔪᐊᑉ ᐱᖓᖕᓇᖓᓃᑦᑐᒥᒃ.

ᐅᒃᑯᓯᒃᓴᖅ ᒪᓐᑐᕆᐊᒧᖓᖅᑕᐅᓚᐅᕐᓯᒪᔪᖅ ᐊᒻᒪᓗ ᑯᐸᐃᒃᒦᖢᓂ ᐱᓕᕆᕝᕕᐅᓂᐊᕐᑐᒥᒃ, ᐃᔭᐃᑦᑐᒃ ᐅᖃᓚᐅᕐᑐᖅ. ᐱᒋᐊᖅᑕᐅᕙᓪᓕᐊᓕᕐᑐᖅ ᑭᓯᐊᓂᓕ ᐃᔭᐃᑦᑐᒃ ᐅᖃᓚᐅᕐᑐᖅ ᖃᓪᓗᓈᓄᑦ ᐊᐅᓪᓚᓚᐅᙱᓐᓂᖓᓂᒃ   ᓄᕙᒡᔪᐊᕐᓇᖅ-19 ᐱᔾᔪᑎᐅᓪᓗᓂ.

ᐃᔭᐃᑦᑐᒃ ᐊᒻᒪ ᐊᓯᖏᑦ ᐱᓕᕆᐊᖃᕐᓂᐊᖅᑐᑦ ᐅᒃᑯᓯᒃᓴᒥ ᓴᓇᙳᐊᕐᓂᐊᖅᑐᑦ ᐊᒻᒪᓗ ᐃᑯᒪᖃᕐᕕᖃᓕᕐᓗᒍ ᑰᔾᔪᐊᕐᒥ. ᓴᓇᔪᐃᑦ ᒫᓐᓇ ᓄᑖᒥᒃ ᐃᓱᐊᕐᓯᕕᒃᒥ ᓄᖃᖓᓚᐅᑲᖕᒪᑕ ᓯᓚ ᐱᔾᔪᑎᐅᓪᓗᓂ ᐊᒻᒪᓗ ᐅᐱᕐᖔᖅ ᐱᒋᐊᖅᑕᐅᒃᑲᓐᓂᕐᓂᐊᖅᖢᓂ, ᐅᖃᓚᐅᕐᑐᖅ ᒧᕆ-ᕼᐊᓕᓐ ᑭᐅᕋᓐ, ᑐᓴᐅᒪᔾᔪᑎᓕᕆᔨᓄᑦ ᑐᑭᒧᐊᖅᑎᑦᑎᔨ ᒪᒥᓴᕐᕕᒃᒥ.

“ᐅᑯᐊ ᐱᓕᕆᐊᖃᕐᓂᐊᖅᑐᑦ ᐱᓕᕆᓪᓚᕆᖕᓂᐊᖅᑐᑦ ᐃᒡᓗᓕᐅᕐᓂᖅ ᐊᑕᐅᑦᑎᒃᑰᖅᑕᐅᓗᓂ,” ᐅᖃᓚᐅᕐᑐᖅ ᖃᕋᓴᐅᔭᒃᑯ ᑎᑎᕋᖅᑕᖏᑦᑎᒍ.

“ᐊᐅᓚᑦᑎᔨᒋᔭᕗᑦ ᐊᒻᒪ ᐱᓕᕆᔨᒋᔭᕗᑦ ᐱᓕᕆᐊᖃᖅᐸᓪᓕᐊᔪᑦ ᒪᒥᓴᕐᕕᓕᕆᓂᕐᒥᒃ ᐊᒻᒪᓗ ᐋᖅᑭᒃᓱᐃᕙᓪᓕᐊᓪᓗᑎᒃ ᓄᑖᓂᒃ ᐱᔨᑦᑎᕋᐅᑎᒃᓴᓂᒃ ᐊᒻᒪᓗ ᓄᑖᒧᑦ ᓄᒃᑎᖅᐸᓪᓕᐊᓂᕐᓂᕐᒥᒃ.”

ᐃᔭᐃᑦᑐᒃ ᐅᖃᓚᐅᕐᑐᖅ ᑖᔅᓱᒥᖓ ᐱᐊᓂᒃᓯᓂᐊᕈᒪᓪᓗᓂ ᐊᒻᒪᓗ ᖁᕕᐊᓱᒃᖢᓂ ᐱᓕᕆᐊᖃᒃᑲᓐᓂᕈᓐᓇᓕᕐᓂᖓᓂᒃ ᓄᕙᒡᔪᐊᕐᓇᖅ-19 ᐱᒋᐊᓚᐅᕐᓯᒪᑎᓪᓗᒍ.

“ᓴᓇᙳᐊᓚᐅᕐᓯᒪᙱᓐᓇᒪ ᑕᐃᒪᙵᑦ ᓄᕙᒡᔪᐊᕐᓇᖅ ᐱᒋᐊᓚᐅᕐᓯᒪᖕᒪᑦ ᐅᑭᐅᕐᑕᖅᑐᕐᒥ, ᓄᓇᕕᒻᒥ,” ᐅᖃᖅᑐᖅ. “ᐅᐱᒍᓱᑦᑎᐊᖅᑐᖓ ᐃᓚᒋᔭᐅᓂᐊᕋᒪ ᐱᓕᕆᐊᒥᒃ.”