ᓄᓇᕗᒥᑦ 8-ᒋᔭᐅᔪᒥᒃ ᐃᓅᔪᓐᓃᖅᑐᖃᖅᐳᖅ ᓄᕙᒡᔪᐊᕐᓇᖅ-19-ᒧ

For English version, see Nunavut records eighth death from COVID-19

ᓄᓇᕗᒥᑦ 8-ᒋᔭᐅᔪᖅ ᐃᓅᔪᓐᓃᖅᑐᖅ ᓄᕙᒡᔪᐊᕐᓇᖅ-19-ᒧ ᓇᓗᓇᐃᖅᑕᐅᓚᐅᕐᑐᖅ ᐱᓇᓱᐊᕈᓯᐅᓚᐅᕐᑐᒥ ᓄᓇᕗᒥᑦ ᒐᕙᒪᒃᑯᓐᓄᑦ

ᐊᖓᔪᖅᑳᖅ ᐋᓐᓂᐊᖃᕐᓇᙱᑦᑐᓕᕆᔨᓄᑦ ᓘᒃᑖᖅ ᐹᑐᓴᓐ ᐅᖃᓚᐅᕐᑐᖅ ᑐᓴᒐᒃᓴᓕᐅᖅᑎᓪᓗᒍ ᒪᐃ 12-ᒥ ᓄᓇᕗᒥᑦ ᒐᕙᒪᒃᑯᑦ ᖃᐅᔨᑎᑕᐅᓚᐅᕐᓂᖏᓐᓂᒃ ᐃᓅᔪᓐᓃᖅᑐᒥᒃ ᐱᓇᓱᐊᕈᓯᐅᑉ ᓯᕗᓂᐊᓂ. ᐅᖃᓚᐅᕐᑐᖅ ᓄᓇᕗᒻᒥᐅᑕᑦ ᑲᐱᔭᐅᓯᒪᖃᓪᓗᓂᒋᑦ.

ᐊᓯᒃᑲᓐᓂᖓᓂ ᐅᖃᓚᐅᙱᑦᑐᑦ ᐃᓅᔪᓐᓃᖅᑑᑉ ᒥᒃᓵᓄᑦ ᐅᑯᓂᖓᓗᑦ ᖃᔅᓯᓂ ᐊᕐᕌᒍᖃᕐᒪᖔᑦ, ᐊᖑᑕᐅᖕᒪᖔᑦ ᐊᕐᓇᐅᖕᒪᖔᓪᓘᓐᓃᑦ, ᐅᕝᕙᓘᓐᓃᒃ ᓇᓂ ᓄᓇᖃᕐᒪᖔᑦ.

ᓄᓇᕗᒥᑦ ᐋᓐᓂᐊᕕᒡᔪᐊᕐᓇᒧᑦ ᓯᕗᓪᓕᖅᐹᖅ ᐊᒻᒪ ᑐᒡᓕᖓ ᐃᓅᔪᓐᓃᖅᑐᑦ ᓇᓗᓇᐃᖅᑕᐅᓚᐅᕐᓯᒪᔪᑦ ᑎᓯᐱᕆ 2020-ᒥ.

ᐃᓚᒋᔭᐅᔪᑦ ᓇᓗᓇᐃᕐᓯᓚᐅᕐᑐᑦ ᐅᑯᐊᖑᓂᕋᖅᑕᐅᓪᓗᑎᒃ ᓘᑭ ᓴᒻᒧᕐᑐᖅ ᐊᕐᕕᐊᕐᒥᐅᑕᖅ ᐊᒻᒪᓗ ᑖᓐ ᐊᐅᑐᑦ ᑲᖏᖅᖠᓂᖅᒥᐅᑕᖅ.

ᑭᖑᓪᓕᖅᐹᖅ ᓄᓇᕗᒥ ᐃᓅᔪᓐᓃᓚᐅᕐᑐᖅ ᑕᒪᑐᒧᖓ ᓇᓗᓇᐃᖅᑕᐅᓚᐅᕐᓯᒪᔪᖅ ᑕᖅᑭᐅᓚᐅᖅᑑ ᐅᖓᑖᓂ ᐅᑯᐊ ᓄᓇᕗᒥᑦ ᒐᕙᒪᒃᑯᑦ ᓄᕙᒡᔪᐊᕐᓇᖅ-19ᒥ ᓇᓗᓇᐃᕐᓯᑲᑕᒃᑎᓪᓗᒋᑦ.

ᐄᐳᕈᓪ 7ᒥ ᐹᑐᓴᓐ ᐅᖃᓚᐅᕐᓯᒪᔪᖅ ᓄᓇᕗᒥᑦ ᒐᕙᒪᒃᑯᑦ ᐅᓂᒃᑲᐅᓯᖃᑲᑕᔾᔮᔪᓐᓃᕐᓂᕋᖅᖢᓂᖏᑦ ᓄᕙᒡᔪᐊᕐᓇᖅ-19 ᒥᒃᓵᓄᑦ. ᑭᓯᐊᓂᓕ ᑐᓴᐅᒪᑎᑦᑎᑲᑕᐃᓐᓇᕐᓂᐊᕐᑐᑦ ᒐᕙᒪᑐᖃᒃᑯᓐᓂᒃ ᐊᒻᒪᓗ ᐋᓐᓂᐊᖃᕐᓇᙱᒃᑐᓕᕆᓂᕐᒧᑦ ᒪᓕᒐᖅᑎᒍᑦ ᑕᐃᒪᐃᖁᔭᐅᓯᒪᒃᐸᑕ.