ᐊᔪᕈᓐᓃᖅᓴᖅᑎᑦᑎᔨ ‘ᐅᐱᒍᓱᑦᑎᐊᖅᑐᖅ’ ᐃᓚᒌᑦ ᓄᓇᕗᒥᑦ ᐅᓄᙱᓛᑦ ᐱᒡᒍᓴᐅᑎᔪᓂᒃ

For the English version of this story, please see Coach ‘so proud’ of Team Nunavut’s smallest contingent — a figure skating duo.

ᓄᓇᕗᒥᑦ ᐅᓄᙱᓛᑦ ᐱᙳᐊᕆᐊᖅᑐᖅᑐᓂ ᐅᑭᐅᖅᑕᖅᑐᕐᒥ ᐅᑭᐅᒃᑯᑦ ᐱᙳᐊᕕᒡᔪᐊᕐᓇᒥ ᓯᐊᕐᕆᔭᐅᑎᖏᓐᓂᒃ ᐊᑎᕗᑦ ᒫᔅᓯ 15ᒥ ᑭᖑᓪᓕᖅᐹᒥ ᖁᙱᐊᖅᑕᐅᓂᐊᖅᖢᑎᒃ.

ᐃᖃᓗᖕᓂ ᓄᓇᖃᖅᑑᒃ ᑎᐊ ᑭᓚᐸᒃ ᐊᒻᒪ ᑭᒻᐳᓕ ᒋᓯᖕ ᓯᐊᕐᕆᔮᖅᑐᓂ ᖁᙱᐊᖅᑕᐅᔪᒃᓴᓂ ᐃᓚᐅᔪᑑᓚᐅᖅᑑᒃ ᑭᒡᒐᖅᑐᐃᓪᓗᑎᑦ ᓄᓇᕗᒥᑦ ᐅᕙᓂ ᒫᑦ-ᓲ ᕚᓕ, ᐊᓛᔅᑲᒥ ᑕᕝᕙᓂ 2024ᒥ ᐱᙳᐊᕕᒡᔪᐊᕐᓇᖃᖅᑎᓪᓗᒋᑦ.

ᑕᒪᕐᒥ ᐊᕐᓈᒃ ᓯᕗᓪᓕᖅᐹᑦᑎᐊᕐᒥ ᐱᒡᒍᓴᐅᑎᖃᑕᐅᓚᐅᖅᑑᒃ ᓯᐊᕐᕆᔭᐅᑎᓂ ᐊᑐᖅᖢᑎᒃ ᖁᙱᐊᖅᑕᐅᓪᓗᑎᒃ ᐊᒻᒪᓗ ᖁᙱᐊᖅᑕᐅᕝᕕᓪᓚᕆᖕᒦᖢᑎᒃ ᑲᓇᑕᐅᑉ ᓯᓚᑖᓂ.

“ᐊᒃᓱᐊᓗᒃ ᐅᐱᒋᔭᒃᑲ ᑖᒃᑯᐊ ᐊᕐᓈᒃ,” ᐅᖃᕐᑐᖅ ᐊᔪᕈᓐᓃᖅᓴᖅᑎᑦᑎᔨᖓ ᔮᓇ ᒪᒃᓛᒃᓚᓐ ᐊᐱᕐᓱᖅᑕᐅᑎᓪᓗᒍ.

“ᐊᑕᐅᓯᕐᒥ ᖃᐅᔨᒪᔭᐅᖁᒻᒪᕆᒃᑕᕋ ᐅᓇ ᓯᐊᕐᕆᔭᐅᑎᒃᑯᑦ ᖁᙱᐊᖅᑕᐅᓪᓗᓂ ᐊᒃᓱᕈᕐᓇᖅᑐᐊᓘᒻᒪ. ᑎᒦᑦ ᐊᑐᕆᐊᖃᒻᒪᕆᒃᖢᒍ ᐊᒻᒪᓗ ᖃᓄᐃᓕᐅᕐᓂᐊᕐᓂᕐᓂ ᐋᖅᑭᒃᓱᐃᔭᕆᐊᖃᕐᓇᖅᖢᓂ ᐊᒻᒪᓗ ᖁᙱᐊᖅᑐᓂᒃ ᐃᒃᐱᒍᓱᖕᓇᕆᐊᖃᖅᖢᓂ.

“ᐊᒻᒪᓗ ᐃᓄᒋᐊᓄᑦ ᖁᙱᐊᖅᑕᐅᓐᓇᖅᖢᓂ ᐃᓄᑑᓪᓗᓂ ᓂᒡᓚᓱᒃᑐᒥ ᐊᓐᓂᑭᑦᑐᕐᕕᒃᒥ ᐊᓐᓄᕌᖅᓯᒪᑦᑎᐊᕐᓇᙱᖢᓂ ᐊᒻᒪ ᐱᐅᓴᖅᓯᒪᔭᕆᐊᖃᖅᖢᓂ ᑕᐃᒪᓕ ᑕᒪᒃᑯᐊᕈᓘᔭᐃᑦ ᐊᒃᓱᕈᕈᑎᐅᓐᓇᖅᑐᑦ.”

ᑕᒪᓐᓇᓕ ᐃᑲᔫᑎᐅᔪᓐᓇᖅᑐᖅ ᐅᓄᙱᑦᑐᓄᑦ ᐱᙳᐊᖅᑎᓄᑦ. ᒪᕐᕈᑐᐊᖑᓪᓗᑎᒃ ᐊᔪᕈᓐᓃᖅᓴᖅᖢᑎᒃ ᖃᓄᐃᓕᐅᕐᓂᐊᖅᑕᖏᓐᓂᒃ ᐊᑐᓂ ᐱᙳᐊᖅᑏ ᐊᔪᕈᓐᓃᖅᓴᖅᑎᑕᐅᖃᑦᑕᕐᒪᑎᒃ ᐃᓄᑑᑦᑕᖅᖢᑎᒃ.

“ᐃᑲᔪᖅᑕᐅᑦᑎᐊᖃᑦᑕᖅᑐᒍᑦ,” ᑭᓚᐸᒃ ᐅᖃᕐᑐᖅ, ᐅᖃᒃᑲᓐᓂᖅᖢᓂ ᕿᒡᒋᑦᑎᐊᕐᓂᐊᕈᒪᓪᓗᓂ ᐅᐃᔾᔮᕐᓗᓂ ᐊᒻᒪᓗ ᖃᓄᐃᓕᕈᓘᔭᙱᓪᓗᓂ ᖁᙱᐊᖅᑕᐅᓂᕐᒥᓂ.

“ᐅᓄᕈᓘᔭᓚᐅᖅᐸᑕᓕ ᐊᔪᕐᓇᕐᓂᕐᓴᐅᓂᐊᓚᐅᕐᑐᖅ ᐃᑲᔪᑦᑎᐊᕆᐊᒃᓴᖅ ᑭᓯᐊᓂᓕ ᐱᐅᓂᕐᓴᖅ ᐅᕙᒍᑐᐊᖅ ᑲᒪᒋᔭᐅᓪᓗᑕ ᐊᒻᒪ ᐊᔪᕈᓐᓃᕐᓴᕈᓐᓇᕐᓂᕐᓴᐅᓪᓗᑕ.”

ᑭᓚᐸᒃ, 14, ᓯᐊᕐᕆᔭᐅᑎᒃᑯᑦ ᖃᓄᐃᓕᐅᕈᓘᔭᑲᑕᓕᓚᐅᕐᓯᒪᔪᖅ ᐊᕐᕌᒍᖃᖅᖢᓂ ᖁᓕᓂ (10) ᐃᑲᐃᓕᓴᕐᓂᕐᒥ ᐊᔪᕈᓐᓃᕐᓵᓪᓚᓚᐅᖅᓗᓂ. ᓯᕗᓪᓕᖅᐹᖑᓚᐅᕐᑐᖅ ᐱᙳᐊᕕᒡᔪᐊᖅᓇᒥ ᐱᒡᒍᓴᐅᑎᖃᑕᐅᓪᓗᓂ.

ᒋᓯᖕ, ᑖᓐᓇᑦᑕᐅᖅ 14, ᐅᖃᓚᐅᕐᑐᖅ ᐱᖃᑎᖃᑲᑕᒃᖢᓂ ᖁᕕᐊᒋᓂᕋᖅᖢᓂᐅᒃ. ᐅᐸᒃᓯᒪᖃᑎᖃᖅᖢᓂ ᑭᓚᐸᒃᒥ ᑕᐃᒪᓕ ᐃᓕᓴᕐᓇᖅᑐᒥ ᐱᖃᑎᖃᕈᓐᓇᖅᑐᖅ ᓄᖃᖓᓚᐅᑲᖕᓂᖏᓐᓂᒃ ᓲᕐᓗ ᐸᓯᒃᑰᑲᑕᒋᐊᖃᖅᖢᑎᒃ.

“ᖃᐅᔨᒪᔪᖓ ᐃᑲᔪᖅᑐᖅᑕᐅᑦᑎᐊᕐᓂᓐᓂ ᑕᐃᒪᓕ ᖃᓄᐃᒃᑯᒪ ᑭᓇᒥ ᐅᖃᖃᑎᖃᕈᓐᓇᖅᖢᖓ,” ᐅᖃᕐᑐᖅ.

ᒋᓯᖕ ᓯᕗᓪᓕᖅᐹᒥ ᓯᐊᕐᕆᔭᐅᑎᓄᑦ ᓱᒃᑲᓴᐅᑎᓂᕐᒥ ᐃᓕᓐᓂᐊᓚᐅᕐᓯᒪᔪᖅ ᖁᙱᐊᖅᑕᐅᓇᖅᑐᒥ ᐱᓕᕆᐊᖃᙱᑎᓪᓗᒍ ᖃᖓᑲᓪᓛᕐᔫᓕᖅᑐᖅ. ᐅᓇ ᓯᕗᓪᓕᖅᐹᕆᙱᑕᖓ ᐅᐸᒍᑎᓪᓗᓂ ᐱᙳᐊᕕᒡᔪᐊᕐᓇᒥ, ᑕᐃᔅᓱᒪᓂᓕ ᐊᕐᓴᖅᑐᓂ ᐃᓚᐅᓚᐅᕐᓯᒪᓪᓗᓂ (futsal).

“ᐃᓄᑑᓪᓗᓂ ᖁᙱᐊᖅᑕᐅᓪᓗᓂ ᑲᑉᐱᐊᓇᕈᔪᒃᑐᕈᓗ ᑭᓯᐊᓂᓕ ᖁᕕᐊᓇᑦᑎᐊᖅᑐᖅ,” ᐅᖃᕐᑐᖅ.

“ᖃᐅᔨᒪᔪᖓ ᓵᓚᒃᓴᙱᒃᑲᓗᐊᕈᒪ ᐅᕙᖓᑐᐊᖑᓇᔭᕐᒪᑦ ᐱᙳᐊᖃᑎᒃᑲᐅᙱᑦᑐᖅ.”

ᒋᓯᖕ ᐅᖃᓚᐅᕐᑐᖅ ᐃᓱᒪᓂᕋᖅᖢᓂ ᐃᒻᒥᓂ ᐅᒃᐱᕇᓐᓇᕈᒪᔪᖅ ᐊᓯᒥᓂ ᖁᙱᐊᑲᑕᒃᑲᓗᐊᖅᐸᑦ.

“ᖃᐅᔨᒪᔪᖓ ᑖᒃᑯᑎᑐᓇᖅ ᐃᑲᔫᑎᖃᙱᓐᓂᕐᓴᐅᓂᑦᑎᓐᓂᒃ ᑭᓯᐊᓂᓕ ᐊᒃᓱᕈᖅᖢᑕ ᐱᓇᓱᑦᑎᐊᖏᓐᓇᖅᐳᒍᑦ,” ᐅᖃᕐᑐᖅ.

ᑕᒪᑐᒪᓂᓕ ᐊᕐᕌᒍᒥ ᐱᖓᓱᐃᕐᓗᑎ ᓯᐊᕐᕆᔮᖅᑐᓂᒃ ᖁᙱᐊᖅᑕᐅᖃᑕᐅᓪᓗᑎᒃ ᐱᙳᐊᕕᒡᔪᐊᖅᓇᒥ, ᐃᓚᐅᓚᐅᕐᓯᒪᓪᓗᑎᒃ 2014ᒥ ᐊᒻᒪ 2018ᒥ.

ᒪᒃᓛᒃᓚᓐ, ᑖᓐᓇ ᐊᕐᓇᐃᑦ ᐊᔪᕈᓐᓃᖅᓴᖅᑎᑦᑎᔨᖓ, ᐱᒡᒍᓴᐅᑎᖃᑕᐅᓯᒪᔪᖅ ᓯᐊᕐᕆᔮᖅᑐᓂ ᐊᑕᐅᑦᑎᒃᑰᑲᑕᒋᐊᓕᖕᓂ ᐊᒻᒪᓗ ᐱᓕᕆᐊᖃᖅᓯᒪᓪᓗᓂ ᓯᐊᕐᕆᔮᖅᑎᓂᒃ ᖁᙱᐊᖅᑕᐅᕙᒃᑐᓂᒃ ᐃᖃᓗᖕᓂ ᐱᒋᐊᖅᖢᓂ 2006ᒥ.

“ᐊᔪᕈᓐᓃᖅᐹᓪᓕᓪᓚᕆᒃᑐᓄᑦ ᓵᓚᒃᓴᐅᓯᐊᖅᑕᖃᕐᓂᕈᓂ ᐅᑯᓄᖓ ᐊᕐᓈᖕᓄᑦ ᑐᓂᓇᔭᖅᐸᕋ ᓲᖃᐃᒻᒪ ᐊᔪᕈᓐᓃᖅᐹᓪᓕᒻᒪᕆᓚᐅᕐᒪᑎ ᐊᔪᕈᓐᓃᖅᓴᑲᑕᒃᖢᑎᒃ,” ᐅᖃᖅᑐᖅ ᒋᓯᖕ ᐊᒻᒪ ᑭᓚᐸᒃ ᒥᒃᓵᓄᑦ.

“ᐊᔪᕈᓐᓃᖅᓴᖅᓯᒪᖕᒪᑎ ᕿᒡᒋᕈᓐᓇᖅᓯᓯᒪᓪᓗᑎᒃ ᑕᐃᒪᓐᓇᓗ ᐱᓇᓱᓚᐅᕐᓯᒪᓇᑎᒃ ᓯᕗᓂᐊᓂ ᐊᒻᒪᓗ ᒪᑭᑕᐃᓐᓇᕈᓐᓇᖅᖢᑎᒃ ᐊᒻᒪᓗ ᐊᔪᕈᓐᓃᖅᐸᓪᓕᐊᒻᒪᕆᒃᖢᑎᒃ.”

ᒪᒃᓛᒃᓚᓐ ᐅᖃᓚᐅᕐᑐᖅ ᓯᐊᕐᕆᔮᖅᑎᑦ ᐅᓄᕐᓯᕙᓪᓕᐊᓂᖏᓐᓂᒃ ᐃᖃᓗᖕᓂ. ᐊᕐᕌᓂ ᐅᖓᓪᓕᕐᒥᓪᓕ ᒪᕐᕈᐃᓐᓇᐅᓚᐅᕐᓯᒪᔫᒃ ᐊᔪᕈᓐᓃᖅᓴᖅᑎᑦᑎᔩᒃ ᐱᔪᓐᓇᐅᑎᑖᖅᓯᒪᔫᒃ. ᒫᓐᓇᓕ ᑎᓴᒪᓪᓗᑭᐊᖅ ᑕᓪᓕᒪᓪᓗᑭᐊ ᐊᔪᕈᓐᓃᖅᓴᖅᑎᑦᑎᔪᓐᓇᖅᑐᑦ.

“ᐅᓇ ᖃᓄᐃᓕᐅᕈᓯᖅ ᐱᕈᖅᐸᓪᓕᐊᒻᒪᕆᒃᑐᖅ,” ᐅᖃᕐᑐᖅ.

ᑖᒃᑯᐊ ᓯᐊᕐᕆᔭᖅᑎᑦ 1992ᒥ ᐅᓕᒻᐱᒃᔅᓂ ᓯᐊᕐᕆᔮᖅᑎᐅᓂᑯᒥ ᓯᐅᕆ ᐹᓪ ᖃᓄᐃᓕᐅᕈᑎᒃᓴᖏᓐᓂ ᐊᔪᕈᓐᓃᖅᓴᖅᑕᐅᑎᑦᑎᓚᐅᕐᓯᒪᖕᒥᔪᑦ ᕿᓚᐸᒃᒥ ᐊᒻᒪ ᒋᓯᖕᒥ.

ᑖᒃᑯᐊᒃ ᐃᓄᑑᑦᑕᖅᖢᑎᒃ ᖁᙱᐊᖅᑕᐅᓚᐅᖅᑑᒃ ᒫᔅᓯ 13ᒥ, ᐊᒻᒪ ᑭᖑᓂᐊᒍᑦ ᖁᙱᐊᖅᑕᐅᒋᓪᓗᑎᒃ ᒫᔅᓯ 14ᒥ.

ᓯᐊᕐᕆᔮᒃᑲᓐᓂᓚᐅᕐᒥᔫᒃ ᒫᔅᓯ 15ᒥ ᐃᓚᒌᑦᑕᖅᑐᓂᒃ ᐃᓚᐅᑎᑕᐅᓪᓗᑎᒃ ᐊᓯᖏᓐᓂᒃ ᐱᒡᒍᓴᐅᑎᔭᖅᑐᖅᓯᒪᔪᓂᒃ.

ᑖᒃᑯᐊ ᐱᙳᐊᖅᑎᑦ ᓯᐊᕐᕆᔮᖅᑎᓂᒃ 8ᓂ ᐊᔾᔨᒌᙱᑦᑐᓂ ᐱᓕᕆᔾᔪᓯᕐᓂ ᐱᓕᕆᑎᑕᐅᓚᐅᕐᒪᑕ.

“ᑎᓴᒪᓂ ᐅᓄᙱᓛᒃᑯᑦ ᐃᓚᐅᔪᖃᕆᐊᖃᕐᒪᑦ ᑭᓯᐊᓂᓕ ᐊᓯᖏᑦ ᑎᓴᒪᑦ ᐱᙳᐊᖃᑎᒌᑦ (ᐋᐴᑕ, ᔫᑳᓐ, ᓄᓇᑦᓯᐊᖅ ᐊᒻᒪ ᐊᓛᔅᑲ) ᐊᑐᖅᑎᑦᑎᔪᓐᓇᓚᐅᖅᑐᑦ ᓯᐊᕐᕆᔮᖅᑎᖏᓐᓄᑦ ᑖᒃᑯᐊ ᐃᓚᐅᖃᑕᐅᔪᓐᓇᕐᓂᐊᕐᒪᑎᑦ,” ᒪᒃᓛᒃᓚᓐ ᐅᖃᕐᑐᖅ.

“ᐅᓇ ᖃᓄᐃᓕᐅᖃᑎᒌᒍᓐᓇᑦᑎᐊᕐᓂᕐᒥᒃ ᓴᖅᑭᑎᑦᑎᔾᔪᑎᒻᒪᕆᐅᓚᐅᕐᑐᖅ ᐃᑲᔪᖅᑕᐅᓇᓱᒃᑎᓪᓗᑕ.”