ᐃᓚᒌᑦ ᐊᓕᐊᓇᐃᒍᓱᒃᐳᑦ ᐃᓄᐊᖅᓯᓂᐅᔪᒥ ᐃᖅᑲᖅᑐᒐᒃᓴᒥ, ᓴᙱᓇᓱᐊᖅᐳᑦ ᐃᖅᑲᖅᑐᐃᕕᖕᒥᒥ ᐱᓕᕆᓂᐅᔪᒥ

For English version, see Mary Ann Birmingham’s family lauds news of murder charge, braces for long court process

ᖃᖓᐅᓂᐅᕗᖅ ᐃᓕᓴᐱ ᓯᐅᑎᐊᐱᒃ ᐊᒻᒪ ᐹᐅᑉ ᓴᕕᓐᔭᐃ ᑕᑯᔪᒪᓯᒪᕗᑦ ᐊᕐᕌᒍᓄᑦ 38−ᓄᑦ — ᑎᒍᔭᐅᓂᐅᔪᒥ ᑐᖁᓂᐅᔪᒧᑦ ᐃᓅᓱᒃᑑᓪᓗᓂ ᓄᑲᖓᓐᓂ, ᒥᐊᕆ ᐋᓐ ᐴᒥᖕᕼᐋᒻᒥ.

“ᖁᕕᐊᒐᓚᓚᐅᖅᐳᖓ ᑭᓯᐊᓂ ᐊᐃᑦᑳᕈᓯᓕᖅᖢᖓ ᐅᔾᔨᕆᓕᕋᑦᑕ ᐊᑯᓂᐅᓗᖕᒥ ᐱᓕᕆᓂᐅᓂᐊᕐᓂᖓᓂ,” ᓯᐅᑎᐊᐱᒃ ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ.

“ᐱᓕᕆᓂᐅᔪᖅ ᐱᒋᐊᖅᓯᒪᕗᖅ, ᑭᓯᐊᓂ ᐊᑯᓂᐅᓂᐊᕐᓂᕋᖅᑕᐅᕗᖅ.”

ᔫᐱ ᐊᑦᓯᖅᑕᖅ ᓴᖅᑭᓚᐅᖅᓯᒪᕗᖅ ᐃᖃᓗᖕᓂ ᐃᖅᑲᖅᑐᐃᕕᖕᒥ ᓯᑎᐱᕆ 25−ᒥ ᓵᙵᓂᕐᒥ ᐃᓄᐊᕐᓂᕐᒥ ᐸᕐᓇᒃᓯᒌᖅᓯᒪᓇᓂ ᐃᖅᑲᖅᑐᒐᒃᓴᐅᓂᖓᓂ ᑐᖂᑦᑎᓂᕐᒥ 15ᑐᖁᑕᐅᓚᐅᖅᑐᒥ ᐊᖏᕐᕋᖓᓂ ᒪᐃ 28, 1986−ᒥ.

ᒪᕐᕈᖓᓂ ᐊᑦᓯᖅᑕᖅ ᐃᖅᑲᖅᑐᒐᒃᓴᐅᓂᖓᓂ ᐃᓄᐊᖅᓯᓂᐅᔪᒥ ᐴᒥᖕᕼᐋᒻᒧᑦ. ᓯᕗᓪᓕᖅ ᐃᖅᑲᖅᑐᒐᒃᓴᖅ ᑎᑭᐅᑎᓚᐅᖅᓯᒪᙱᓚᖅ ᐃᖅᑲᖅᑐᐃᓂᕐᒧᑦ, ᓄᓇᕗᒻᒥ ᐃᖅᑲᖅᑐᐃᔨᐅᔪᒥ ᓇᓂᓯᔪᓐᓇᓚᐅᙱᒻᒪᑦ ᓴᖅᑭᑎᑕᐅᔪᓂ ᑲᔪᓯᓂᕐᒧᑦ ᐃᖅᑲᖅᑐᖅᑕᐅᔾᔪᑎᒃᓴᖃᕐᒪᖔᑦ ᖃᐅᔨᓇᓱᐊᕐᓂᖃᓚᐅᖅᑎᓪᓗᒍ.

ᐃᖅᑲᖅᑐᐃᕕᓕᕆᔾᔪᑕᐅᔪᖅ ᖃᐅᔨᔭᐅᓂᖃᓚᐅᙱᓚᖅ ᑭᓯᐊᓂ ᐱᓇᓱᐊᕈᓯᐅᓚᐅᖅᑐᒥ, ᑐᓴᒐᒃᓴᖃᖅᑎᓪᓗᒍ ᓄᑖᖑᔪᒥ ᐃᖅᑲᖅᑐᒐᒃᓴᒥ ᐊᑦᓯᖅᑕᕐᒧᑦ. ᐅᓄᕐᓂᖅᓴᐅᔪᓂ 50−ᓂ ᐃᓚᒋᔭᐅᔪᓂ ᐊᒻᒪ ᐃᑲᔪᖅᓱᐃᔨᐅᔪᓂ ᐴᒥᖕᕼᐋᒻᒥ ᐃᓚᖏᓐᓂ ᐃᓄᒋᐊᒃᑎᑦᑎᓪᓗᑎᒃ ᐃᖅᑲᖅᑐᐃᕕᖕᒥ ᓴᖅᑭᓐᓂᖓᓄᑦ.

ᐅᓄᕐᓂᖅᓴᐅᔪᒥ 2,000 ᑭᓛᒥᑐᓂ ᓂᒋᕐᒥ, ᓯᐅᑎᐊᐱᒃ ᐊᒻᒪ ᓴᕕᓐᔭᐃ ᖁᙱᐊᓚᐅᖅᐳᑦ ᐃᖅᑲᖅᑐᐃᓂᐅᔪᒥ ᐅᕘᓇ ᑕᕐᕆᔭᐅᑎᒃᑯᑦ ᑲᑎᒪᓂᐅᔪᒥ ᐃᓚᒋᔭᐅᔪᓂ ᐊᖏᕐᕋᕆᔭᐅᔪᒥ ᐋᑐᕚᒥ.

ᓯᐅᑎᐊᐱᒃ, ᐃᖃᓗᖕᓂ ᒪᐃᔭᐅᓚᐅᖅᓯᒪᔪᒥ ᐊᒻᒪ ᒪᓕᒐᓕᐅᖅᑎᐅᓂᑰᓪᓗᓂ, ᐅᖃᓚᐅᖅᐳᖅ “ᐅᖃᓕᒫᒐᕐᒥ ᑎᑎᕋᕈᓐᓇᖅᑐᒃᓴᐅᕗᖅ” ᐃᓚᖏᑦᑕ ᐊᕐᕌᒍᓄᑦ−38-ᓄᑦ ᐅᑕᖅᑭᓂᖏᓐᓂ ᒪᓕᒐᓕᕆᓂᕐᒧᑦ.

ᐅᕙᓂ 2016−ᒥ ᑐᓴᒐᒃᓴᓕᕆᔨᒃᑯᑦ ᐊᔾᔨᖁᑎᖓᓂ ᐹᐅᑉ ᓴᕕᓐᔭᐃ, ᒪᐃᒥᖕᒥ, ᐊᒻᒪ ᐊᓈᓇᖓ ᓯᐊᕋ ᐴᒥᖕᕼᐋᒻ ᑎᒍᒥᐊᖅᐳᖅ ᐊᔾᔨᙳᐊᒥ ᖃᑕᙳᑎᒌᓂ ᒥᐊᕆ ᐋᓐ ᐴᒥᖕᕼᐋᒻ ᐊᒻᒪ ᓚᐃᑕ ᐴᒥᖕᕼᐋᒻ. (ᑐᓴᒐᒃᓴᓕᕆᔨᒃᑯᑦ ᐊᔾᔨᖁᑎᖓ ᔨᒻ ᐱᐅᓪᒧᑦ)

ᐃᓚᖓ ᓄᒫᓇᕐᓂᐅᔪᖅ, ᓴᕕᓐᔭᐃ ᐅᖃᓚᐅᖅᐳᖅ, ᐅᕙᙶᖅᐳᖅ ᓱᓕᓂᐅᔪᒥ ᐃᓚᖏᑦ ᐃᓚᖏᓐᓂ ᐃᓚᖃᖅᑐᒥ ᐊᓈᓇᖓ ᓯᐊᕋ ᐴᒥᖕᕼᐋᒻ, ᐃᓅᔪᓐᓃᖅᓯᒪᓂᖏᓐᓂ ᑕᑯᓂᕐᒥ ᑎᒍᔭᐅᓂᐅᔪᒥ.

“ᓄᒫᓱᒃᐳᒍᑦ ᐊᓈᓇᕗᑦ ᐅᕙᓃᑦᑐᓐᓇᓚᐅᙱᓐᓂᖓᓂ, ᑭᓯᐊᓂ ᐅᕙᓃᑉᐳᒍᑦ ᓇᖏᖅᖢᑕ ᓄᑲᕇᑎᒍᑦ,” ᐅᖃᓚᐅᖅᐳᖅ.

ᐅᖁᒪᐃᑦᑐᓂ ᐃᒃᐱᒍᓱᖕᓂᖃᕋᓗᐊᖅᑎᓪᓗᒍ, ᓴᕕᓐᔭᐃ ᐃᒡᓚᓚᐅᖅᐳᖅ ᐃᖅᑲᐅᒪᑎᓪᓗᒍ ᓱᕈᓯᐅᖃᑎᖃᕐᓂᖓᓂ ᓄᑲᖓᓂ ᒥᐊᕆ ᐋᓐᒥ.

ᐴᒥᖕᕼᐋᒻ ᓯᒃᑲᖓᔮᓚᐅᖅᐳᖅ, ᖃᐅᔨᒪᕐᔪᐊᖅᖢᓂ ᐊᒻᒪ ᐊᔪᙱᕐᔪᐊᖅᖢᓂ, ᓴᕕᓐᔭᐃ ᐅᖃᓚᐅᖅᐳᖅ. ᓵᓚᒃᓴᖃᑦᑕᓚᐅᖅᐳᖅ ᐅᖃᓗᕋᐅᔭᐅᑎᓂ ᐊᒻᒪ ᓴᓇᐅᒐᓂ ᓵᓚᖃᕋᓱᐊᕐᓂᐅᔪᓂ ᐱᒋᐊᓕᓵᖅᑐᓄᑦ ᐃᓕᓐᓂᐊᖅᑎᓪᓗᒍ, ᐊᒻᒪ ᒧᒥᕈᒻᒪᐅᓚᐅᖅᐳᖅ ᐊᒻᒪ ᐊᓐᓄᕌᖅᑐᕈᓘᔪᒻᒪᐅᓚᐅᖅᐳᖅ.

“ᐆᒻᒪᕇᓐᓇᐅᔭᓚᐅᖅᑐᖅ, ᐊᖏᓛᑦᑎᐊᒥ ᖁᖓᑉᐸᓚᐅᖅᑐᖅ, ᐱᐅᔪᒻᒪᕆᐊᓗᖕᒥ ᖁᖓᓐᓂᐅᔪᒥ, ᐊᒻᒪ ᐃᓯᕋᒥ ᐃᒡᓗᒧᑦ ᖃᐅᒻᒪᖅᑎᑦᑎᕙᓚᐅᖅᐳᖅ ᐃᒡᓗᒥ,” ᓴᕕᓐᔭᐃ ᐅᖃᓚᐅᖅᐳᖅ.

“ᐊᒥᓱᓂ ᐱᐅᔪᓂ ᐃᖅᑲᐅᒪᓂᖅᑕᖃᓚᐅᖅᐳᖅ … ᐊᓕᐊᓇᐃᒋᔭᖃᑦᑎᐊᓚᐅᖅᐳᖅ ᖁᕕᐊᓇᕐᓂᕐᒥ.”

ᒪᕐᕉᒃ ᓄᑲᕇᒃ ᖁᔭᓕᓚᐅᖅᐳᑦ ᑭᒃᑯᓕᒫᓂ ᐃᖅᑲᖅᑐᐃᕕᖕᒧᐊᓚᐅᖅᑐᓄᑦ ᐃᑲᔪᖅᓱᐃᔭᖅᑐᖅᑐᓂ.

ᐅᖃᓚᐅᖅᐳᖅ ᐊᑐᐃᓐᓂᓇᖃᕐᓂᐊᖅᐳᑦ ᒪᓕᒐᓕᕆᔨᒃᑯᑦ ᐱᕋᔭᒃᑕᐅᓂᑯᓄᑦ ᐱᒡᑦᑎᕋᕐᓂᖓᓂ ᐊᒻᒪ ᑲᔪᖏᖅᓴᐃᓚᐅᖅᐳᑦ ᐊᓯᖏᓐᓂ ᑕᐃᒪᐃᖃᑕᐅᓂᖏᓐᓂ ᐱᔭᕆᐊᖃᕈᑎᒃ ᐃᖅᑲᖅᑐᐃᕕᓕᕆᔭᐅᔪᖅ ᐃᖅᑲᖅᑐᐃᕕᒃᑰᖅᑎᓪᓗᒍ.

ᐴᒥᖕᕼᐋᒻ ᑐᖁᓂᖓ ᐊᒃᑐᐃᓂᖃᑐᐃᓐᓇᓚᐅᙱᓚᖅ ᐃᒻᒥᖕᓄᑦ ᑭᓯᐊᓂᑦᑕᐅᖅ ᐊᓯᖏᓐᓂ ᐃᓚᒋᔭᐅᔪᓂ, ᓄᓇᓕᖕᒥᐅᑕᓂ ᐊᒻᒪ ᓯᕗᓪᓕᐅᔪᓂ ᑭᐅᔨᐅᔪᓄᑦ, ᓴᕕᓐᔭᐃ ᐅᖃᓚᐅᖅᐳᖅ.

“ᐊᒥᓱᒻᒪᕆᐊᓗᖕᓂ ᐃᓄᖕᓂ ᐊᒃᑐᐃᓂᖃᓚᐅᖅᐳᖅ ᐃᓄᑭᑦᑐᑯᓘᓪᓗᓂ ᓄᓇᓕᐅᓚᐅᕐᒪᑦ ᑕᐃᔅᓱᒪᓂ,” ᐅᖃᓚᐅᖅᐳᖅ.

“ᑲᒪᓇᕐᔪᐊᓚᐅᖅᐳᖅ ᒪᒃᑯᒃᖢᓂ ᐊᕐᓇᐅᓪᓗᓂ. ᐊᔪᕐᓇᖅᐳᖅ ᐱᐅᒍᕆᐊᒃᓴᖅ ᐱᔭᐅᓚᐅᖅᓯᒪᓂᖓᓂ ᒪᒃᑯᒃᑐᑯᓘᑎᓪᓗᒍ.”

ᐊᑦᓯᖅᑕᐅᑉ ᒪᓕᒃᑐᒥ ᐃᖅᑲᖅᑐᖅᑕᐅᓂᖓᓂ ᐅᓪᓗᖓ ᐅᒃᑐᐱᕆ 29−ᖑᓂᐊᖅᐳᖅ.

ᓄᓇᕗᒻᒥ ᑲᓇᑕᒥ ᐸᓖᓯᒃᑯᑦ ᓴᖅᑭᑎᑦᑎᓚᐅᖅᐳᑦ ᐅᖃᐅᓯᒃᓴᓕᐊᖑᔪᒥ ᓯᑎᐱᕆ 26−ᒥ.

ᐅᖃᖅᓯᒪᓚᐅᖅᐳᖅ ᐊᑦᓯᖅᑕᖅ ᑎᒍᔭᐅᓚᐅᖅᐳᖅ ᓯᑎᐱᕆ 24−ᒥ ᐋᑐᕚᒥ ᑲᓇᑕᓕᒫᒥ ᑎᒍᓯᔾᔪᒻᒥ ᐃᑲᔪᖅᓱᐃᓂᖃᖅᖢᑎᒃ ᐋᑐᕚᒥ ᐸᓖᓯᒃᑯᓐᓂ ᐱᔨᑦᑎᕋᖅᑎᐅᔪᓂ.

ᐊᑦᓯᖅᑕᖅ ᐊᓄᓪᓚᒃᓰᕕᖕᒥ ᐊᓂᓯᒪᓚᐅᖅᐳᖅ ᐊᓄᓪᓚᒃᓯᕆᐊᖃᕐᓂᖓ ᐃᓱᓕᑎᓐᓇᒍ ᑎᒍᔭᐅᑎᓪᓗᒍ. ᓯᕗᓂᐊᓂ ᐸᓯᔭᐅᓂᖓᓂ 1986−ᒥ ᐃᓄᐊᖅᓯᓂᐅᔪᒥ ᐃᖃᓗᖕᒥᐅᑕᓂ ᐳᑐᒍ ᐃᔨᑦᓯᐊᕐᒥ, 21, ᐊᒻᒪ ᐊᓈᓇᖓᓂ, ᐅᓛᔪ ᐃᔨᑦᓯᐊᕐᒥ, 51.