‘ᓴᖑᐃᖓᓪᓗᓂ ᐊᒻᒪ ᖃᓄᐃᒃᓴᖅᑰᔨᙱᖢᓂ’ ᓇᓄᙳᐊᖅ ᓄᓇᓯᐅᑎᓄ ᓚᐃᓴᓐᓯ ᐅᑎᕐᐳᖅ

For English version, see ‘Curvy and stoic’ polar bear licence plates return to Nunavut

ᓵᓐᑎ ᓵᓐ ᓂᐅᕕᕐᑎᓪᓗᒍ ᓄᓇᓯᐅᑎᒃᓴᒥᓂᒃ ᖃᖓᑦᑎᐊᓵᕈᓗᒃ, ᖁᕕᐊᓲᑎᖃᑦᑎᐊᓚᐅᕐᑐᖅ.

ᐊᕐᕌᒍᓂ 13-ᓂ ᓄᓇᓯᐅᑎᒥ ᐃᑭᒪᖃᑕᐅᕙᒃᖢᓂ ᐊᒻᒪ ᑖᒃᓯᑲᑕᒃᐸᒃᖢᓂ ᐃᖃᓗᖕᓂ, ᓯᕗᓪᓕᖅᐹᖅ ᓄᓇᓯᐅᑎᖓᓂ ᖁᕕᐊᒋᔭᖃᑦᑎᐊᓚᐅᕐᑐᖅ “ᐃᓅᓱᒃᑐᑎᑐᑦ,” ᐅᖃᕐᑐᖅ, ᑕᑯᑎᑦᑎᓪᓗᓂᓗ ᐱᖁᑎᖃᕐᕕᒋᔪᓐᓇᖅᑕᖓᓂ ᐊᖏᔪᒥ ᐊᒻᒪ ᐃᒃᓯᕙᐅᑕᖏᓐᓂ ᐋᖅᑭᒋᐊᕈᓐᓇᖅᑐᒥ ᓯᐊᕐᓇᕈᔪᖕᒥᓐ 2013 ᓲᐸᕉ ᑯᕌᔅᑐᕆᐊᒃ (2013 Subaru Crosstrek).

ᖃᓄᐃᓕᐅᕈᒪᔭᖏᓐᓂ ᐊᑐᕈᑎᒋᑐᐃᓐᓇᙱᖢᓂᐅᒃ ᐅᓐᓄᖕᒥ, ᐅᓇ ᓄᑖᖅ ᓄᓇᓯᐅᑎ ᐃᓚᖃᓚᐅᕐᑐᖅ ᓇᓗᓇᐃᒃᑯᑎᒥ — ᐋᖅᑭᒋᐊᒃᑲᓐᓂᕐᓯᒪᔪᖅ ᓇᓄᙳᐊᖅ ᓚᐃᓴᓐᓯ ᓄᓇᓯᐅᑎᒧᑦ ᑕᕐᓴᖃᖅᖢᓂ ᑐᖑᔪᕐᑐᒥ ᐊᒻᒪ ᖁᕐᓱᖅᑐᕐᒥ ᓯᓚᑎᐊᖑᑦ ᐊᒻᒪ ᐊᐅᐸᕐᑐᒥ ᐃᓄᒃᓱᙳᐊᖅ ᕿᑎᐊᓂ.

“ᓴᖑᐃᖓᓪᓗᓂ ᐊᒻᒪ ᖃᓄᐃᒃᓴᖅᑰᔨᙱᖢᓂ,” ᓵᓐ ᐅᖃᕐᑐᖅ, ᐅᖃᒃᑲᓐᓂᖅᖢᓂ ᓈᒻᒪᑦᑎᐊᕐᓂᖓᓂ ᓄᓇᓯᐅᑎᖓᓄ ᑖᓐᓇᑦᑕᐅᖅ “ᓴᖑᖓᓂᖃᐅᕐᒪᑦ.”

ᓵᓐᓕ ᓈᒻᒪᒃᓴᙱᔾᔪᑎᑐᐊᕆᓚᐅᕐᑕᖓ ᐊᑕᐅᓯᑐᐃᓐᓇᑯᓗᖕᒥ ᓚᐃᓴᓐᓯᑖᕈᓐᓇᕐᓂᖓᓂ, ᓄᓇᓯᐅᑎᐅ ᑐᓄᐊᓃᑦᑐᒃᓴᒥ.

“ᖃᐅᔨᒪᓚᐅᙱᑦᑐᖓ ᐊᑕᐅᓯᑐᐊᕐᒥ ᐱᒋᐊᖃᖅᑐᒍᑦ — ᒪᕐᕈᐃᖑᒍᑎ ᓄᓇᓯᐅᑎᐅ ᐊᕙᓗᐊᓃᓐᓇᔭᕐᔭᑑᒃ,” ᐅᖃᕐᑐᖅ.

“ᓲᕐᓗ ᓇᓄᙳᐊᑦ ᐃᑭᐊᕐᒥᖃᕐᓗᑎᒃ.”

ᓵᓐ ᐊᓯᓂ ᓚᐃᓴᓐᓯᐅ ᐃᓂᐊᓄᐊᕐᓯᑐᐃᓐᓇᕆᐊᓕᒃ ᓄᓇᓯᐅᑎᐅᑉ ᓵᖓᓂ ᑭᓯᐊᓂᓕ ᑐᐊᕕᕐᓇᙱᑦᑐᖅ, ᐅᖃᕐᑐᖅ.

“ᐃᓱᒪᖕᓇᓛᖑᔪᕐᓕ ᐅᖂᓴᐅᑎᖃᓕᕐᓗᓂ ᓂᓚᓱᓕᓚᐅᙱᓐᓂᖓᓂ ᒫᓂ -40C,” ᐅᖃᕐᑐᖅ.

ᓄᓇᕗᑦ ᐅᑎᕐᓂᖏᑦ ᓇᓄᙳᐊᓂ ᓚᐃᓴᓐᓯᓄᑦ ᐊᕐᕌᓂ ᑐᓴᕐᑎᑦᑎᔾᔪᑎᐅᓚᐅᕐᓯᒪᔪᖅ ᐃᓚᒋᔭᐅᓪᓗᓂ ᓄᓇᕗᑦ ᐊᕐᕌᒍᖃᓕᕐᓂᖓᓂ 25-ᓂ ᓇᓪᓕᐅᑎᖃᕐᑎᓪᓗᒋᑦ. ᓇᓄᙳᐊᖅ ᓴᖅᑭᑕᐅᓚᐅᕐᓯᒪᔪᖅ ᖃᓄᐃᓕᖓᓂᐊᕐᓂᖓ ᒪᐃᖑᑎᓪᓗᒍ.

ᐅᓇ ᐃᓇᖏᕐᓯᔪᖅ ᓴᓂᒧᑦ ᑕᑭᓂᕐᓴᒥ ᑭᑉᐹᕆᒃᑐᓂ ᓚᐃᓴᓐᓯᓂ ᑕᕐᓴᖃᖅᖢᓂ ᐅᑭᐅᕐᑕᖅᑐᕐᒥ ᐅᓄᙳᐊᕐᒥ, ᓇᓄᙳᐊᕐᒥ ᐊᒻᒪ ᐃᓄᒃᓱᙳᐊᕐᒥ.

ᐅᓇ ᓴᓇᓯᒪᓂᖓ ᐱᒋᐊᕐᑕᐅᓚᐅᕐᓯᒪᔪᖅ 2012-ᒥ ᐊᑐᕈᓐᓃᖅᖢᑎᒃ ᑐᖑᔪᕐᑐᒥ ᐊᒻᒪ ᖃᑯᕐᑕᒥ ᑕᕐᓴᓕᒃᒥ ᓇᓄᙳᐊᕐᒥ ᓚᐃᓴᓐᓯᒋᔭᐅᔪᒥᒃ, ᑕᕐᓴᕆᔭᐅᓕᕐᓯᒪᔪᖅ ᓄᓇᕗᑦ ᐃᓚᒋᔭᐅᑎᓪᓗᒍ ᓱᓕ ᓄᓇᑦᓯᐊᕐᒧᑦ.

ᐅᓇ ᓇᓄᙳᐊᖅ ᓚᐃᓴᓐᓯ ᐸᐸᒐᒃᓴᑐᐃᓐᓇᐅᓕᓚᐅᕐᓯᒪᔪᖅ ᐃᓛᓐᓂᒃᑯᓪᓗ ᓂᐅᕕᐊᒃᓴᕆᔭᐅᕙᒃᖢᑎᒃ ᐊᑭᑦᑐᕋᑎᓂᒃᑯᑦ ᐊᑭᑐᒻᒪᕆᓕᖅᐸᒃᖢᓂ.

“ᑕᕐᓴᖓ ᐊᔾᔨᐅᖏᒻᒪ ᐅᑭᐅᕐᑕᖅᑐᕐᒥᐅᑕᐅᓪᓗᓂ, ᐊᒻᒪᓗ ᐊᓕᐊᓇᐃᑦ ᐅᑎᕐᑎᑕᐅᒻᒪᑦ,” ᐅᖃᕐᑐᖅ ᓵᓐ, ᐃᒻᒥᓂ ᐊᔾᔨᓕᐅᕐᓯᒪᔭᖓᓂ ᓇᒡᓯᐅᔾᔨᓯᒪᓪᓗᓂ ᓚᐃᓴᓐᓯᖓᓂ ᐃᒻᒥᓂᒡᓗ ᐃᓚᖏᓐᓄᓪᓗ ᐱᖃᓐᓇᖏᓐᓄᓪᓗ ᓇᒡᓯᐅᑎᑲᑕᒃᖢᓂᒋᑦ ᓄᓇᓯᐅᑎ ᐱᓵᖅᑎᓪᓗᓂᐅᒃ.

“ᓇᓗᓇᐃᒃᑯᑎᓪᓚᕆᐅᒻᒪᑦ. ᒪᑯᓇᓃᒻᒪᓪᓘᓐᓃᑦ ᑮᖃᕐᕕᖕᓂ ᐊᒻᒪ ᐅᕕᓂᕈᕐᓂ ᐊᒻᒪ ᑕᑯᔭᒐᒃᓴᓂ ᖃᓄᐃᑦᑐᑐᐃᓐᓇᕐᓂᓪᓗ, ᑕᐃᒪᓕ ᑕᒪᒃᑯᓂᖓ ᒪᓕᓕᕐᒪ ᐊᓕᐊᓇᐃᑦ.”

ᑕᒪᕐᒥ ᓄᓇᕗᒥᑦ ᓄᓇᓯᐅᑦ ᓄᑖᒥ ᓚᐃᓴᓐᓯᖃᕈᓐᓇᕐᓯᔪᑦ, ᐊᒻᒪᓗ ᓵᓐ ᑕᑯᕙᓪᓕᐊᓂᕐᓴᐅᓂᕋᓕᕐᖢᓂ ᑖᒃᑯᓂᖓ ᐃᖃᓗᖕᓂ.

ᐅᖃᓚᐅᕐᑐᖅ ᐱᐅᓇᔭᕐᑐᖅ ᐊᓯᖏᑦ ᐅᑭᐅᕐᑕᖅᑐᕐᒦᑦᑐᑦ ᐅᑯᑎᑐᓇᖅ ᐊᓛᔅᑲ, ᔫᑳᓐ ᐊᒻᒪ ᑲᓛᖡᑦ ᓄᓇᖓᓂ ᓇᓄᙳᐊᕐᒥ ᓚᐃᓴᓐᓯᖃᓕᕐᒥᒍᑎ.

“ᐱᐅᓇᔭᕐᑐᖅ ᐃᒪᓐᓇ ᐱᑕᖃᕈᑎ ‘ᑐᙵᓱᒋᑦᑎ ᐅᑭᐅᕐᑕᖅᑐᕐᒧᑦ’.” ᐅᖃᕐᑐᖅ.