‘ᐃᓱᒪᒋᔭᖃᓪᓚᕆᖕᓂᖅ’ ᓴᓇᐅᒐᐃᑦ ᓇᓗᓇᐃᖅᑕᐃᓯᒪᓪᓚᕆᖕᓂᖏᓐᓂᒃ

For an English version of this story, please see ‘There’s a real appetite’_ Inuit artisans interested in artwork authentication program.

ᐃᓄᐃᑦ ᓴᓇᐅᒐᓕᐅᕐᑎᑦ ᓇᓗᓇᐃᕐᓯᑲᑕᓕᕐᒪᑕ ᖃᓄᖅ ᓴᓇᐅᒐᖏᑦ ᓇᓗᓇᖅᑕᐃᓯᒪᔭᕆᐊᖃᕐᓂᖏᓐᓂ, ᐅᖃᕐᑐᖅ ᑐᑭᒧᐊᖅᑎᑦᑎᔨ ᖃᓄᐃᓕᐅᕈᑎᓴᓕᕆᔨ ᓄᓇᖃᖅᑳᖅᑐᑦ ᓇᖕᒥᓂᖅ ᐱᓕᕆᐊᖏᓐᓂ ᐊᒻᒪ ᑮᓇᐅᔭᓕᐅᕋᓱᒃᑎᓂᒃ.

ᑕᐃᕕᑦ ᓲᔪᕆ, ᖃᓄᐃᓕᐅᕈᑎᒃᓴᓂ ᑐᑭᒧᐊᖅᑎᑦᑎᔨ ᓄᓇᖃᖅᑳᖅᑐᓄᑦ ᑯᐸᐃᒃᒥ ᐊᒻᒪ ᓛᐸᑐᐊᒥ ᐱᕙᓪᓕᐊᔪᓕᕆᓂᕐᒧᑦ ᑲᒥᓴᓐᑯᓐᓄᑦ, ᐅᖃᓪᓚᓚᐅᕐᑐᖅ ᓄᓇᕕᒃᒥ ᐅᔭᕋᒃᓯᐅᖅᕕᒃᒥ ᖃᐅᔨᓇᓱᖕᓂᕐᒧᑦ ᐃᑲᔫᑎᒃᓴᓕᕆᓂᕐᒧᑦ ᐃᓕᓐᓂᐊᕈᑎᓂ ᑰᔾᔪᐊᖅᒥ ᒪᐃ 21-ᖑᑎᓪᓗᒍ.

ᐅᖃᐅᓯᖃᓚᐅᕐᑐᖅ ᖃᓄᖅ ᑯᐊᐳᕇᓴᐃᓐ ᐱᕙᓪᓕᐊᔪᓕᕆᓂᒃᑯᑦ ᐱᓕᕆᖃᑎᖃᒃᑲᓐᓂᕈᓐᓇᕐᓂᖏᓐᓂᒃ ᓄᓇᖃᖅᑳᖅᑐᑦ ᓄᓇᓕᖏᓐᓂ ᐃᓚᒋᔭᐅᓗᓂ ᐋᖅᑭᒋᐊᖅᑎᑦᑎᓇᓱᖕᓂᕐᒧᑦ.

“ᐃᓱᒪᒋᔭᖃᓪᓚᕆᖕᓂᖅᑕᖃᕐᒪᑦ,” ᐅᖃᕐᑐᖅ ᓇᓗᓇᐃᔭᐃᖅᓯᑲᒪᖕᓂᕐᒥᒃ.

ᐱᒋᐊᖅᑎᑕᐅᓂᑰᓪᓗᓂ 2021-ᒥ ᐊᒻᒪᓗ ᓇᓄᙳᐊᖃᖅᖢᓂ ᓴᓇᐅᔭᓂᑯᒥ ᐊᓪᓚᒧᑦ ᐋᑳᓐᑯᐃᓐᒧᑦ ᕗᕌᖕᒃ ᐴᓪᓴᓐᒧᑦ, ᐅᓇ ᓇᓗᓇᐃᒃᑯᑎ ID1N ᓇᓗᓇᐃᖅᓯᓯᒪᔾᔪᑎᐅᔪᖅ ᓄᓇᖃᖅᑳᖅᑐᓄᑦ ᓴᓇᔭᐅᔪᓄᑦ ᐊᒻᒪ ᐱᔨᑦᑎᕋᐅᑎᓄᑦ ᑕᒪᐅᓇᑦᑕᐃᓐᓇᖅ ᑎᒡᓕᒃᑎᑦᑎᑦᑕᐃᓕᓂᒃᑯᑦ ᐊᒻᒪ ᐃᓕᑦᑯᓯᒃᑯᑦ ᐊᑐᖅᑕᐅᓯᒪᔪᓂᒃ, ᓲᔾᔪᕆ ᐅᖃᕐᑐᖅ ᐊᐱᖅᓱᖅᑕᐅᑎᓪᓗᒍ.

ᓇᓗᓇᐃᒃᑯᑎ ᐊᑐᕐᓂᐊᕐᓗᒍ, ᓴᓇᐅᒐᓕᐅᖅᑏᑦ, ᑎᑎᕋᐅᔭᒐᖅᑏᑦ ᐊᒻᒪ ᓇᖕᒥᓂᖅ ᐱᓕᕆᐊᖃᖅᑐᑦ ᓇᓗᓇᐃᕆᐊᖃᖅᑐᑦ ᓄᓇᖃᖅᑳᖅᓯᒪᓂᖏᓐᓂ. ᓇᖕᒥᓂᖅ ᐱᓕᕆᐊᕆᔭᐅᔪᑦ ᓇᑉᐸᖓ ᓄᓇᖃᖅᑳᖅᑐᓄᑦ ᓇᖕᒥᓂᕆᔭᐅᓂᖓᓐᓂ ᐊᒻᒪ ᐊᐅᓚᑕᐅᓂᖏᓐᓂᒃ. ᐊᔪᕈᓐᓃᖅᑎᑕᐅᓚᐅᖅᑎᓪᓗᒍ ᒪᐅᓇ ᑲᑐᔾᔨᖃᑎᒌᑦ ᓇᓗᓇᐃᔭᖅᓯᒪᔭᖏᓐᓃᓕᕋᔭᖅᑐᑦ.

ᓲᔾᔪᕆ ᐅᖃᓚᐅᕐᑐᖅ ᑕᒪᓐᓇ ᐱᓕᕆᓂᖅ ᐊᖏᒡᓕᒋᐊᖅᑎᑦᑎᔪᒪᓂᕋᖅᖢᓂᐅᒃ, ᐃᓚᐅᑎᑦᑎᓕᕐᓗᑎᒃ ᐃᓄᐃᑦ ᓄᓇᓕᖏᓐᓂᒃ ᐊᒻᒪ ᐊᔾᔨᒋᙱᑕᖓᓂ ᑕᕐᓴᓕᐅᕐᓗᑎᒃ.

ᔩᓂ ᓵᓚ ᒍᐊᑕᓐ, 68-ᓂ ᐊᕐᕌᒍᓕ ᓴᓇᐅᒐᓕᐅᖅᑎ, ᓴᓇᖃᑦᑕᕐᓯᒪᖕᒪᑦ ᓴᐸᖓᕐᓂ ᓯᐅᑎᕈᑎᒃᓴᓂ ᑕᐃᒪᙵ ᓱᕈᓯᐅᓂᕐᒥᓂᒃ. ᓴᓇᐅᒐᖏᑦ, ᐃᓚᖃᖅᖢᑎᒃ ᑎᑎᕋᐅᔭᖅᓯᒪᔭᖏ ᓴᖅᑭᑎᑦᑎᓯᒪᔪᑦ ᐃᓄᖕᓂᒃ ᐊᒻᒪ ᕿᒧᒃᓯᐅᑎᒋᔭᒃᑕᖏᓐᓂ ᕿᒻᒥᕐᓂ, ᐊᒻᒪᓗ ᐱᓕᕆᐊᖃᕐᓂᖓ ᐃᓱᒫᓘᑎᒋᔭᖏᓐᓄᑦ ᐃᑲᔪᕈᑎᐅᕙᒃᖢᑎᒃ.

“ᐃᖅᑲᐅᒪᒐᒪ ᕿᒻᒥᕆᕙᓚᐅᖅᑕᓐᓂ ᐃᒻᒪᒃᑲᓐᓂᖅ, ᓱᕈᓯᐅᑎᓪᓗᒍ, ᑐᖁᕋᖅᑕᐅᓚᐅᖅᑎᓐᓇᒋᑦ,” ᒍᐊᑕᓐ ᐅᖃᕐᑐᖅ, ᐅᖃᐅᓯᖃᖅᖢᓂ ᕿᒻᒥᕐᓂ ᑐᖁᕋᐃᑲᑕᓚᐅᖅᓯᒪᓂᖏᓐᓂᒃ 1950-ᖏᓐᓂᒃ ᐊᒻᒪ 1960-ᖏᓐᓂᒃ. “ᓴᓇᖃᑦᑕᖅᑕᒃᑲ ᐃᖅᑲᐅᒪᔾᔪᑎᒋᔭᒃᑭᑦ ᐋᓐᓂᖅᑕᐅᓯᒪᓂᑦᑎᓐᓂ ᐸᐸᑦᑏᓐᓇᕆᐊᖃᙱᓐᓂᑦᑎᓐᓂᒃ ᐃᓅᓯᑦᑎᓐᓂ.”

ᓂᐅᕕᐊᒃᓴᖃᖃᑦᑕᖅᑐᖅ ᓯᐅᑎᕈᑎᓕᐊᖏᓐᓂᒃ ᐊᒻᒪ ᑎᑎᕋᐅᔭᒐᖏᓐᓂᒃ ᐃᓕᓐᓂᐊᕐᓂᖅᑕᖃᓕᕌᖓᑦ, ᑕᐃᒪᓐᓇᓗ ᓇᓗᓇᐃᖅᑕᐅᓯᒪᔭᕆᐊᖃᕐᓂᖏᓐᓂᒃ ᐱᓕᕆᖁᔨᓪᓗᓂ.

“ᐃᑲᔪᖅᑕᐅᔪᓐᓇᕈᒪ ᖃᓄᐃᒋᓇᔭᙱᑦᑎᐊᖅᑕᕋ. ᖃᓄᐃᓕᐅᕈᑎᒃᓴᓂ ᖃᐅᔨᒪᓗᐊᙱᓐᓇᒪ,” ᒍᐊᑕᓐ ᐅᖃᕐᑐᖅ.

ᑕᐃᕝ ᕘᕋᔅᑦ, ᑏᕕ ᓴᓇᐅᒐᓂ ᓴᖅᑭᔮᒐᖃᕐᕕᒃᒥ ᐱᒋᐊᖅᑎᑦᑎᓯᒪᔪᖅ, ᐃᓄᐃᓪᓗ ᓴᓇᐅᒐᖏᓐᓂᒃ ᓂᐅᕈᑎᖃᖅᐸᒃᖢᑎᒃ ᐊᒻᒪ ᐊᓐᓄᕌᕆᔭᐅᕙᒃᑐᓂᒃ ᐅᖃᓚᐅᕐᒥᔪᖅ ᐃᑲᔪᖅᑐᐃᓯᒪᓂᖓᓂᑦᑕᐅᖅ ᓇᓗᓇᐃᔭᐃᖅᓯᓯᒪᓂᕐᒥᒃ.

ᓂᐅᕕᕐᕕᒋᔭᐅᔪᖅ ᓂᐅᕕᕐᕕᐅᕙᒃᑐᖅ ᐃᓄᖕᓂ ᓴᓇᔭᐅᔪᓂ ᐊᒻᒪᓗ ᓂᐅᕕᕐᕕᐅᓪᓗᓂ ᐃᓚᖏᓐᓄᑦ. “ᐱᑕᖃᕈᓘᔭᕐᒪᓐ ᐱᓪᓚᕆᐅᙱᑦᑐᓂ ᓴᓇᔭᐅᓯᒪᔪᓂᒃ,” ᕘᕋᔅᑦ ᐅᖃᕐᑐᖅ. “ᓂᐅᕕᐊᒃᓴᖃᖃᑦᑕᖅᑐᓂ ᑕᑯᖃᑦᑕᕋᔭᖅᑐᑎᑦ ᒪᓐᑐᕆᐊᒥ ᑕᒪᒃᑯᓂᖓ.”

ᓂᐅᕕᕐᕕᒃ ᐊᑐᕐᓯᒪᔪᖅ ᐃᒡᓗᕕᒐᙳᐊᓂ ᓇᓗᓇᐃᒃᑯᑎᓂ, ᑖᓐᓇᓗ ᓇᓗᓇᐃᒃᑯᑎ ᐱᒋᐊᖅᑕᐅᓯᒪᓪᓗᓂ ᐃᓄᐃᑦ ᓴᓇᐅᒐᖏᓐᓄᑦ ᑐᙵᕕᒃᒥ ᑭᓯᐊᓂᓕ ᑖᓐᓇ ᐊᑐᐃᓐᓇᐅᔪᓐᓃᕐᓯᒪᖕᒪᑦ, ᕘᕋᔅᑦ ᐅᖃᕐᑐᖅ.

“ᒫᓐᓇ ᓇᓗᔪᒍᑦ ᐃᒡᓗᕕᒐᙳᐊᒥ ᓇᓗᓇᐃᒃᑯᑎᑖᕋᔭᕆᐊᒃᓴᖅ. ᑕᐃᒪᓕ ᒫᓐᓇᒧᑦ ᐊᑐᖃᑦᑕᙱᓐᓇᑦᑎᒍᑦ.”

ᓇᓗᓇᐃᒃᑯᓯᕐᓯᓂᖅ ᒫᓐᓇ ᕿᒥᕐᕈᐊᖅᑕᐅᓕᕐᑐᖅ ᐊᒻᒪᓗ ᓄᑖᓂᒃ ᓚᐃᓴᓐᓯᑖᕋᓱᒃᑐᓂ ᐱᓇᓱᑲᑕᙱᖢᑎᒃ, ᐅᖃᕐᓯᒪᔪᖅ ᐃᓄᐃᑦ ᓴᓇᐅᒐᖏᓐᓄᑦ ᑐᙵᕕᒃᑯᑦ ᖃᕋᓴᐅᔭᒃᑯᑦ ᓴᖅᑭᔮᒐᖓ.

ᓲᔾᔪᕆ ᐅᖃᓚᐅᕐᑐᖅ ᐅᖃᐅᓯᕆᔭᖏᑦ ᐃᓕᓐᓂᐊᕐᑎᑕᐅᑎᓪᓗᒋᑦ ᐅᖃᐅᓯᒃᓴᓕᐅᕈᑎᐅᒃᑲᓐᓂᓚᐅᕐᑐᖅ ᐅᑯᓄᖓ ᒪᑭᕝᕕᒃ ᑯᐊᐳᕇᓴᓐᑯᓐᓄᑦ, ᐊᒻᒪᓗ ᓂᕆᐅᖕᓂᕋᖅᖢᓂ ᖃᓄᖅ ᑕᒪᑐᒥᖓ ᐱᓕᕆᐊᑎᒌᒐᔭᕆᐊᒃᓴᖏᓐᓂᒃ.