ᖃᐅᓱᐃᑦᑐᕐᒥ ᐃᓕᓐᓂᐊᖅᑏᑦ ᐅᐱᒍᓱᒃᐳᑦ ‘ᐊᑖᑕᐅᔪᒥ ᓄᓇᕗᒻᒥ’

For the English version of this story, please see Resolute Bay students honour ‘Father of Nunavut’ through reconciliation project.

ᓄᓇᕗᒻᒥ ᓯᕗᓕᐅᖅᑎᐅᓚᐅᖅᓯᒪᔪᒥ ᔮᓐ ᐊᒪᕈᐊᓕᒃ ᐅᖃᐅᓯᐅᓂᐅᕗᖅ ᖃᐅᔨᓴᕐᓂᕐᒥ ᐱᓕᕆᐊᖑᔪᒥ ᓴᖅᑭᑎᑕᐅᔪᒥ ᖁᑦᑎᖕᓂᓕᖕᓂ 6 ᐊᒻᒪ 8−ᒥ ᐃᓕᓐᓂᐊᖅᑎᐅᔪᓂ ᖃᐅᓱᐃᑦᑐᕐᒥ ᖃᕐᒪᖅᑕᓕᒃ ᐃᓕᓐᓂᐊᕐᕕᖓᓂ. (ᕌᓐᑕ ᒪᑲᓐᓯ ᐊᔾᔨᖁᑎᖓ)

ᔭᐃᒃ ᐊᒪᕈᐊᓕᒃ ᖃᐅᔨᔪᒪᕗᖅ ᐊᔪᕐᓇᓚᐅᕐᒪᖔᑦ ᓄᓇᕗᑖᕋᓱᖕᓂᕐᒥ.

ᐊᑕᐅᓯᐅᕗᖅ 6−ᖑᔪᓂ ᖁᑦᑎᖕᓂᓕᖕᓂ 6 ᐊᒻᒪ ᖁᑦᑎᖕᓂᓕᖕᓂ 8−ᒥ ᖃᕐᒪᖅᑕᓕᒃ ᐃᓕᓐᓂᐊᕐᕕᖓᓂ ᐃᓕᓐᓂᐊᖅᑎᐅᔪᓂ ᖃᐅᓱᐃᑦᑐᕐᒥ ᖃᐅᔨᓴᓚᐅᖅᑐᓂ ᐃᓅᓯᖓᓂ ᐊᒻᒪ ᕿᒻᒪᑯᖏᓐᓂ ᓯᕗᓕᐅᖅᑎᐅᓚᐅᖅᓯᒪᔪᒥ ᔮᓐ ᐊᒪᕈᐊᓕᖕᒥ, ᐊᑕᐅᓯᐅᔪᒥ ᓄᓇᕗᒻᒥ ᓇᓂᓯᐅᖃᑕᐅᔪᒥ, ᐃᓕᓐᓂᐊᕐᕕᐊᕈᓯᕐᒥ ᐱᓂᕆᐊᖑᔪᒧᑦ.

ᖃᐅᔨᓴᕐᓂᖏᑦ ᓴᖅᑭᑎᑦᑎᒃᑲᓐᓂᓚᐅᖅᐳᖅ ᐊᐱᖅᑯᑎᒃᓴᒃᑲᓐᓂᕐᓂ ᐊᒪᕈᐊᓕᐅᑉ ᐃᓅᓯᖓᓂ ᐊᒻᒪ ᐱᓕᕆᓂᖓᓂ, ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ ᐊᐱᕆᓚᐅᖅᑕᖏᓐᓂ ᐊᑖᑕᐅᔪᒥ ᓄᓇᕗᒻᒥ ᐃᒻᒥᓄᑦ, ᔫᓂ 10−ᒥ ᐊᐱᖅᓱᖅᑕᐅᓂᐅᔪᒥ Embassy West ᐃᓄᑐᖃᒃᑯᕕᖕᒥ ᐋᑐᕚᒥ.

“ᐊᐅᓪᓛᖅᑎᓪᓗᑕ ᑲᓇᑕᒥ ᐅᖃᐅᓯᖃᕐᓂᕐᒧᑦ ᓴᖅᑭᑎᑕᐅᓂᖓᓂ ᓄᓇᕗᒻᒥ ᑕᐃᔅᓱᒪᓂ, ᓯᕗᓪᓕᕐᒥ ᐊᔪᕐᓇᓚᐅᖅᐳᖅ,” ᐊᒪᕈᐊᓕᒃ ᐅᖃᓚᐅᖅᐳᖅ ᑭᐅᓂᕐᒧᑦ ᐊᐱᖅᑯᑕᐅᔪᒥ ᐊᒪᕈᐊᓕᐅᑉ ᐊᐱᖅᑯᑎᒋᔭᖓᓄᑦ.

“ᐃᓛᓐᓂᒃᑯᑦ ᐊᒃᓱᕈᖅᐸᓚᐅᖅᐳᒍᑦ ᑐᑭᓯᑎᑦᑎᓇᓱᐊᖅᖢᑕ ᐊᒻᒪ ᐃᓚᖓᓐᓂ ᐊᒃᓱᕈᕐᓇᕐᓂᖃᓚᐅᕐᒪᑦ ᐃᓚᖏᓐᓂ ᑲᓇᑕᒥ …ᑭᓯᐊᓂ ᐃᓱᒪᒋᓚᐅᖅᐸᕗᑦ ᐱᓕᕆᓂᐅᔪᒥ ᐃᓕᑦᑎᖃᑦᑕᐅᑎᒌᖕᓂᐅᔪᒥ ᐊᒻᒪ ᑕᐃᒫᒃ ᐃᖏᕐᕋᓂᓕᐅᓲᖑᕗᑦ.”

ᐃᓕᓐᓂᐊᖅᑏᑦ ᑕᓱᕋᐃ ᑲᓪᓗᒃ ᐊᒻᒪ ᐳᕉᔅ ᐃᓪᓚᐅᑦ ᐃᓱᒪᓚᐅᖅᐳᑦ ᒐᕙᒪᒃᑯᑦ ᐱᓕᕆᔨᕐᔪᐊᖏᑦ ᓈᓚᓚᐅᕐᒪᖔᑕ ᐅᕝᕙᓘᓐᓃᑦ ᐃᒃᐱᒍᓱᑦᑎᐊᕐᒪᖔᑕ ᐃᓄᖕᓂ ᓯᕗᓕᐅᖅᑎᐅᔪᓂᑦ.

“ᑕᐃᔅᓱᒪᓂ, ᓄᓇᕗᑦ ᐃᑲᔪᖅᓱᐃᓂᖃᓚᐅᖅᐳᑦ ᐊᒃᓱᕈᕐᓂᑦᑎᓐᓂ, ᑭᓯᐊᓂ ᐃᓱᒪᓗᐊᕈᓐᓃᖅᐳᑦ,” ᐊᒪᕈᐊᓕᒃ ᐅᖃᓚᐅᖅᐳᖅ. “ᐸᕐᓇᒃᑲᓐᓂᕆᐊᖃᕐᓂᐊᖅᐳᒍᑦ ᐊᓯᐊᓂ ᐊᐅᓪᓛᕐᓂᐅᔪᒥ ᑲᓇᑕᓕᒫᒧᑦ ᐃᖅᑲᐃᑎᑦᑎᓂᕐᒥ ᐃᓄᖕᓂ ᐅᕙᓃᓐᓂᑦᑎᓐᓂ ᐊᒻᒪ ᐅᖃᐅᓯᕗᑦ ᓱᓕ ᐊᑐᖅᑕᐅᕐᔪᐊᕐᓂᖓᓂ.”

ᓯᕗᓪᓕᕐᒥ ᐱᕙᓪᓕᐊᑎᑕᐅᓯᒪᓪᓗᓂ ᑲᓇᑕᐅᑉ ᐅᓪᓗᖓᓂ ᓱᓕᓂᕐᒧᑦ ᐊᒻᒪ ᓴᐃᒻᒪᖃᑎᒌᖕᓂᐅᔪᒥ ᐅᑭᐊᒃᓵᖑᓚᐅᖅᑐᒥ, ᐱᓕᕆᐊᖑᔪᖅ ᕿᒥᕐᕈᕗᖅ ᐊᒪᕈᐊᓕᐅᑉ ᐊᑐᕐᓂᖃᐅᑎᖓᓐᓂ ᓄᓇᕗᑖᕋᓱᐊᕐᓂᕐᒥ ᐊᒻᒪ ᑕᐃᒪᐃᑦᑐᓄᑦ ᐱᓕᕆᓂᐅᔪᓂ ᐃᓄᐃᑦ ᐊᑐᖅᐸᓚᐅᖅᑕᖏᓐᓂ ᖁᑦᑎᒃᑐᒥ ᐅᑭᐅᖅᑕᖅᑐᒥ ᓅᑕᐅᓂᐅᔪᓂ ᐊᒻᒪ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓂ.

ᐊᒪᕈᐊᓕᒃ ᐊᒻᒪ ᐃᓚᖏᑦ ᐃᓱᒪᖅᓱᖅᑎᑕᐅᓇᑎᒃ ᓅᑕᐅᓚᐅᖅᐳᑦ ᖃᐅᓱᐃᑦᑐᕐᒧᑦ ᓄᓇᕕᖕᒥ 1953−ᒥ.

ᐃᖅᑲᓇᐃᔮᕆᓯᒪᔭᖏᓐᓂ, ᐃᒃᓯᕙᐅᑕᐅᓚᐅᖅᐳᖅ ᓄᓇᕗᒻᒥ ᐊᑐᓕᖅᑎᑕᐅᓂᖓᓂ ᑲᑎᒪᔨᐅᔪᓂ, ᐱᔨᑦᑎᕋᖅᖢᓂ ᒪᕐᕉᖕᓂ ᐊᖓᔪᖅᑳᖑᓂᕐᒥ ᐃᓄᐃᑦ ᑕᐱᕇᒃᓴᑦ ᑲᓇᑕᒥ (ᒫᓐᓇ ᑕᐃᔭᐅᔪᒥ ᐃᓄᐃᑦ ᑕᐱᕇᑦ ᑲᓇᑕᒥ), ᐊᒻᒪ ᐃᑲᔪᓚᐅᖅᐳᖅ ᐋᔩᖃᑎᒌᖕᓂᕐᒥ ᓄᓇᕗᒻᒥ ᐊᖏᕈᑕᐅᔪᒥ.

“[ᐃᓕᓐᓂᐊᖅᑎᒃᑲ] ᖃᐅᔨᒪᖁᕙᒃᑲ ᑭᓇᒥᒃᑭᐊᖅ ᐊᒃᓱᕈᖅᖢᓂ ᐱᓕᕆᓚᐅᖅᐳᖅ ᐅᕗᙵᕐᓂᕐᒧᑦ, ᐊᒻᒪ ᓄᓇᕗᖃᖅᑎᑕᐅᓂᕐᒥ,” ᐅᖃᓚᐅᖅᐳᖅ ᐃᓕᓴᐃᔨ ᕌᓐᑕ ᒪᑲᓐᓯ ᐊᐱᖅᓱᖅᑕᐅᓂᐅᔪᒥ ᓲᒻᒧᒃᑯᑦ.

“ᔮᓐ ᐃᓄᑑᓚᐅᙱᓚᖅ ᐅᕙᓂ ᐱᓕᕆᓂᐅᔪᒥ, ᑭᓯᐊᓂ ᓇᖏᖃᑕᐅᓚᐅᖅᐳᖅ ᓯᕗᓂᐊᓂ,” ᐃᓚᒋᐊᖅᓯᓚᐅᖅᐳᖅ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ.

ᑕᑯᒃᓴᐅᑎᑕᐅᓂᐅᔪᖅ ᐃᓕᓴᖅᓯᕗᖅ ᐊᒪᕈᐊᓕᖕᒥ ᐊᑖᑕᐅᔪᒥ ᓄᓇᕗᒻᒥ, ᑕᐃᒎᓯᐅᔪᒥ ᐅᖃᓚᐅᖅᐳᖅ ᓈᒻᒪᒍᓱᖕᓂᖓᓂ ᐅᐱᐅᖅᑲᓪᓗᓂ.

“ᐅᕙᓐᓂ ᑐᓂᓯᕗᖅ ᐅᒃᐱᕈᓱᑦᑎᐊᕐᓂᐅᔪᒥ ᐱᓕᕆᓂᓐᓂ. ᑕᒪᒃᑭᑦᑎᐊᖅ ᓄᓇᕗᒻᒥ ᐃᓄᒋᐊᖕᓂᐅᔪᒥ ᑐᓄᐊᓃᓯᒪᕗᑦ ᐆᒥᖓ ᐱᓕᕆᓂᐅᔪᒥ ᐊᒻᒪ ᑕᐃᓯᔪᒪᒍᑎᒃ ᐅᕙᓐᓂ ᐊᑖᑕᐅᔪᒥ ᓄᓇᕗᒻᒥ, ᐅᐱᒋᕙᕋ,” ᐅᖃᓚᐅᖅᐳᖅ.

ᒪᑲᓐᓯ ᐅᖃᓚᐅᖅᐳᖅ ᐃᓕᓐᓂᐊᕐᕕᐊᕈᓯᖅ ᓇᓗᓇᐃᖅᓰᓐᓇᕐᓂᐊᖅᐳᑦ ᐊᓯᖏᓐᓂ ᐃᓄᖕᓂ ᓯᕗᓕᐅᖅᑎᐅᔪᓂ ᐊᒻᒪ ᐃᓄᑐᖃᕐᓂ, ᐃᓚᖃᖅᑐᒥ ᑕᒑᖅ ᑰᓕ, ᔭᐃᐱᑎ ᓄᙵᖅ. ᓵᓕ ᐅᐊᑦ, ᐊᐃᑉ ᐅᒃᐱᒃ, ᐲᑕ ᐃᕐᓂᖅ ᐊᒻᒪ ᒧᒥᓛᖅ ᖃᖅᑲᖅ.

78-ᓂ-ᐅᑭᐅᓕᒃ, ᐱᕕᖃᓚᐅᖅᑐᒥ ᑕᑯᓂᕐᒥ ᐱᓕᕆᐊᖑᔪᒥ, ᐅᖃᓚᐅᖅᐳᖅ ᐊᒃᑐᖅᑕᐅᓂᖃᓚᐅᖅᐳᖅ ᐃᓕᓐᓂᐊᖅᑏᑦ ᐊᒃᓱᕈᕐᓂᖏᓐᓂ ᐃᓕᑦᑎᓂᕐᒥ ᓄᓇᕗᑖᕋᓱᐊᕐᓂᕐᒥᑦ.

“ᑕᑯᕙᙱᓚᑎᑦ ᑕᐃᒪᐃᑦᑐᒐᓚᖕᓂ ᖃᐅᑕᒫᒥ,” ᐅᖃᓚᐅᖅᐳᖅ, ᑎᒃᑯᐊᖅᑐᖅᖢᓂ ᐃᓕᓐᓂᐊᖅᑏᑦ ᑎᑎᕋᐅᔭᒐᖏᓐᓂ ᐃᒻᒥᓂᒃ. “ᐅᐱᒍᓱᖕᓇᖅᐳᖅ ᖃᓄᖅ ᒪᒃᑯᒃᑐᐃᑦ ᐆᒧᖓ ᐃᓱᒪᒋᔭᖃᕐᓂᖏᓐᓂ. ᑕᐃᒪᐃᑦᑐᒐᓚᖕᓂ ᑕᐃᒪᐃᑉᐸᙱᓚᑦ, ᑭᓯᐊᓂ ᕼᐋᑭᒥ.”

ᐊᒪᕈᐊᓕᒃ ᐅᑎᓚᐅᖅᐳᖅ ᐃᖃᓗᖕᓄᑦ, ᓄᓇᓕᐸᐅᔭᒥ ᑕᐃᔭᖓᓂ ᐊᖏᕐᕋᕆᓂᕋᖅᖢᓂᐅᒃ ᐊᕐᕌᒍᑦ 50−ᓄᑦ, ᔫᓂ 12−ᒥ ᑕᖅᑭᓂᑦ−16-ᓂ ᑐᔪᕐᒥᓂᐅᔪᒥ Embassy West−ᒥ. ᑭᓯᐊᓂ ᐅᖃᓚᐅᖅᐳᖅ ᖃᖓᑭᐊᖅ ᐳᓚᕋᒃᑲᓐᓂᕈᒪᓇᔭᖅᐳᖅ ᐃᓂᐅᔪᒧᑦ ᐱᕈᖅᓴᕐᕕᒋᓚᐅᖅᑕᖓᓂ.

“ᖃᐅᓱᐃᑦᑐᖅ ᐃᓂᖃᐃᓐᓇᐅᔭᕐᓂᐊᖅᐳᖅ ᐆᒻᒪᑎᓐᓂ,” ᐊᒪᕈᐊᓕᒃ ᐅᖃᓚᐅᖅᐳᖅ. “ᐊᑕᐅᓯᐊᒃᑲᓐᓂᕐᓗᖓ ᐅᑎᓛᕈᒪᕗᖓ ᑕᑯᔭᖅᑐᕐᓂᕐᒥ ᖃᓄᐃᓕᕐᓂᖓᓂ ᑕᑉᐹᓂ.”