ᖃᓄᖅ ᐅᑭᐅᖅᑕᖅᑐᕐᒥᐅᑕᑦ ᐱᕚᓪᓕᕈᑎᖃᕈᓐᓇᕐᓂᖏᓐᓂ ᐅᓇᑕᖅᑐᒃᓴᓕᕆᔨᒃᑯᑦ ᑮᓇᐅᔭᓂ ᐊᑐᕐᓂᖏᓐᓂ
ᔭᓄᕈᓪ ᔭᓂ ᑭᐊᕆᒡᓇᓐ ᐳᓚᕋᖅᐳᖅ ᐃᖃᓗᖕᓄᑦ ᐅᖃᐅᓯᖃᕐᓂᕐᒥ ᐅᓇᑕᖅᑐᒃᓴᒃᑯᑦ ᐸᕐᓇᐅᑎᖏᓐᓂ ᐅᑭᐅᖅᑕᖅᑐᒧᑦ
ᔭᓄᕈᓪ ᔭᓂ ᑭᐊᕆᒡᓇᓐ, ᑲᓇᑕᐅᑉ ᐊᖓᔪᖅᑳᖓ ᐅᓇᑕᖅᑐᒃᓴᓕᕆᔨᒃᑯᓐᓄᑦ ᐃᖅᑲᓇᐃᔭᖅᑎᓄᑦ, ᐳᓚᕋᖅᐳᖅ ᐃᖃᓗᖕᓄᑦ ᐋᒍᔅᑎ 19−ᒥ ᐅᖃᖃᑎᖃᕐᓂᕐᒧᑦ ᐃᓄᖕᓂ ᐊᒻᒪ ᓄᓇᕗᒻᒥ ᓯᕗᓕᐅᖅᑎᐅᔪᓄᑦ ᐅᓇᑕᖅᑐᒃᓴᒃᑯᑦ ᐸᕐᓇᐅᑎᖏᓐᓂ ᐊᖏᒡᓕᒋᐊᕐᓂᕐᒧᑦ ᐅᑭᐅᖅᑕᖅᑐᒥ. ᓴᓂᓕᐊᓂ Brig.-Gen. ᒫᒃ ᐱᐊᕆᓐᑦ. (ᓕᓕ ᐊᒃᐸᓕᐊᐱᒃ ᐊᔾᔨᖁᑎᖓ)
For the English version of this story, please see From whales to drones, how northerns could benefit from increased defence spending in North.
ᑲᓇᑕᒥ ᐅᓇᑕᖅᑐᒃᓴᒃᑯᑦ ᐊᖏᒡᓕᒋᐊᖅᑎᑦᑎᕗᖅ ᑐᑭᓕᐊᖓᓂ ᐅᓇᑕᖅᑐᒃᓴᓕᕆᔨᒃᑯᑦ ᑮᓇᐅᔭᓂ ᐊᑐᕐᓂᖏᓐᓂ ᑭᐅᓂᕐᒧᑦ ᖃᔅᓯᒐᓚᖕᓄᑦ-ᐱᓕᐊᓐ ᑖᓚᓂ ᐅᐊᖕᓇᒥ ᐊᑦᓛᓐᑎᒃᒥ ᐊᖏᖃᑎᒌᖕᓂᐅᔪᒥ ᑲᑐᔾᔨᖃᑎᒌᖑᔪᒥ ᐊᖏᖅᓯᒪᓂᖓᓐᓂ, ᐅᖃᖅᐳᖅ ᐊᖓᔪᖅᑳᖅ ᐅᓇᑕᖅᑐᒃᓴᓕᕆᔨᒃᑯᑦ ᐃᖅᑲᓇᐃᔭᖅᑎᖏᓐᓄᑦ.
ᔭᓄᕈᓪ ᔭᓂ ᑭᐊᕆᒡᓇᓐ ᐃᖃᓗᖕᓃᓚᐅᖅᐳᖅ ᐋᒍᔅᑎ 19−ᒥ ᑲᑎᒪᖃᑎᖃᕐᓂᕐᒧᑦ ᐃᓄᖕᓂ ᐊᒻᒪ ᓄᓇᕗᒻᒥ ᓯᕗᓕᐅᖅᑎᐅᔪᓂ, ᐊᒻᒪᓗᑦᑕᐅᖅ ᑲᓇᑕᒥ ᐅᓇᑕᖅᑐᒃᓴᙳᐊᓂ, ᐅᖃᓪᓚᖃᑎᖃᕐᓂᕐᒥ ᑲᓇᑕᐅᑉ ᐅᓇᑕᖅᑐᒃᓴᒃᑯᑦ ᑲᔪᓯᔪᒥ ᐸᕐᓇᐅᑎᖓᓂ ᖁᕝᕙᕆᐊᖅᑎᑦᑎᓂᕐᒥ ᐅᑭᐅᖅᑕᖅᑐᒥ ᐅᓇᑕᖅᑐᒃᓴᓕᕆᔨᒃᑯᓐᓂᑦ.
ᐅᑭᐅᖅᑕᖅᑐᒥ ᓇᖕᒥᓂᖃᖃᑕᐅᓂᕐᒥ ᓯᕗᓂᐊᓃᓯᒪᕗᖅ ᐊᒻᒪ ᕿᑎᐊᓃᖦᖢᓂ ᑕᐃᒪᙵᓂ ᒫᒃ ᑳᓂ ᑲᓇᑕᒥ ᐊᖓᔪᖅᑳᕐᔪᐊᙳᓚᐅᖅᑎᓪᓗᒍ ᒫᔾᔨ 2025−ᒥ. ᓕᐳᕈᒃᑯᑦ ᒐᕙᒪᖓᑦ ᒧᓕᓂᕋᐃᓯᒪᕗᖅ ᑭᐅᓂᕐᒥ ᑲᓇᑕᐅᑉ ᐱᓕᕆᐊᒃᓴᖏᓐᓂ ᐅᐊᖕᓇᒥ ᐊᑦᓛᓐᑎᒃᒥ ᐊᖏᖃᑎᒌᖕᓂᐅᔪᒥ ᑲᑐᔾᔨᖃᑎᒌᖑᔪᒥ, ᐅᕝᕙᓘᓐᓃᑦ NATO, ᐊᖏᒡᓕᒋᐊᖅᓯᓂᕐᒥ ᐊᖏᓂᐅᔪᒥ ᑐᓂᓯᕙᖕᓂᖓᓂ ᐅᓇᑕᖅᑐᒃᓴᓕᕆᔨᒃᑯᑦ ᑮᓇᐅᔭᓂ ᐊᑐᖅᑕᖏᓐᓂ 5 ᐳᓴᓐᑎᒥ ᑲᓇᑕᐅᑉ ᓂᐅᕕᖅᑕᐅᓂᑯᓄᑦ ᑮᓇᐅᔭᓕᐊᕆᔭᐅᓯᒪᔪᓄᑦ ᑲᑎᓪᓗᒋᑦ 2035−ᖑᕋᓱᖕᓂᖓᓂ.
ᒐᕙᒪᒃᑯᑦ ᑭᐅᓚᐅᖅᐳᑦ 2 ᐳᓴᓐᑎᒥ ᓱᓕᓂᕋᕈᒻᒥ — ᐅᕝᕙᓘᓐᓃᑦ $81.1 ᐱᓕᐊᓐᓂ ᑲᓇᑕᐅᑉ ᓂᐅᕕᖅᑕᐅᓂᑯᓄᑦ ᑮᓇᐅᔭᓕᐊᕆᔭᐅᓯᒪᔪᓄᑦ ᑲᑎᓪᓗᒋᑦ — ᐅᓇᑕᖅᑐᒃᓴᓕᕆᔨᒃᑯᓐᓄᑦ 2025−ᒥ.
ᑭᐅᓂᕐᒥ ᐆᒥᖓ ᐊᖏᖅᓯᒪᓂᐅᔪᒥ ᑳᓂ ᐅᑭᐅᖅᑕᖅᑐᒧᑦ ᑕᑯᒋᐊᖅᓯᒪᕗᖅ, ᓴᖅᑭᑎᑦᑎᓪᓗᓂ ᐅᓄᕐᓂᖅᓴᐅᔪᓂ $40 ᐱᓕᐊᓐᓂ ᐅᑭᐅᖅᑕᖅᑐᒥ ᐅᓇᑕᖅᑐᒃᓴᓕᕆᔨᒃᑯᓐᓄᑦ ᓄᑖᙳᕆᐊᖅᑎᑕᐅᓂᐅᔪᓂ ᐊᒻᒪ ᐅᖓᕙᕆᐊᖅᓯᒪᔪᒥ ᖃᐅᔨᓴᕈᑎᒥ ᐱᓕᕆᔾᔪᓯᐅᔪᒥ ᖃᐅᔨᓂᕐᒧᑦ ᕿᓚᖏᒥ ᖄᖅᑕᔫᓂ ᐅᓗᕆᐊᓇᕈᑕᐅᔪᓂ.
ᐅᓇ ᓄᑖᖑᔪᖅ ᑕᑯᔭᐅᓂᐅᔪᒥ ᐱᒋᐊᖅᑎᑦᑎᓯᒪᕗᖅ ᐃᓚᖏᓐᓂ, ᐃᓚᖃᖅᑐᒥ ᑲᑐᔾᔨᖃᑎᒌᖑᔪᓂ ᑲᓇᑕᒥ ᓄᓇᓕᐅᔪᓂ, ᐊᔭᐅᕆᓂᕐᒥ ᒐᕙᒪᒃᑯᓐᓂ ᐊᖏᒡᓕᒋᐊᖅᑎᑦᑎᓂᕐᒥ ᐃᓚᒋᔭᐅᔪᒥ ᐅᓇᑕᖅᑐᒃᓴᓕᕆᔨᒃᑯᑦ ᑮᓇᐅᔭᓂ ᐊᑐᕐᓂᖏᓐᓂ ᐃᓚᖃᕐᓂᖓᓂ ᑕᒪᒃᑭᓂ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ, ᓲᕐᓗ ᐱᙳᐊᕐᕕᓂᑦ, ᐃᒡᓗᖃᖅᑎᑦᑎᓂᕐᒥ ᐊᒻᒪ ᐋᓐᓂᐊᕕᖕᓂ.
ᑲᑐᔾᔨᖃᑎᒌᖑᔪᑦ ᑭᐅᓗᒃᐳᑦ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ, ᐅᑭᐅᖅᑕᖅᑐᒥ ᖃᔅᓯᒐᓚᖕᓄᑦ−ᐊᑐᖅᑕᐅᔪᓐᓇᕐᓂᖃᕐᓂᖏᓐᓂ, ᑐᑭᖃᖅᑐᒥ ᐊᑑᑎᖃᕈᓐᓇᕐᓂᖓᓂ ᐅᓇᑕᖅᑐᒃᓴᒃᑯᓐᓄᑦ ᐊᒻᒪ ᐃᓄᑐᐃᓐᓇᕐᓄᑦ.
ᑭᐊᕆᒡᓇᓐ ᐅᖃᓚᐅᖅᐳᖅ ᐅᓇᑕᖅᑐᒃᓴᓕᕆᔨᒃᑯᑦ ᐃᓱᒫᓂᒃᐳᑦ ᑕᐃᒪᓐᓇᒐᓚᒃ.
“ᐱᔭᕆᐊᖃᕐᓂᐊᖅᐳᒍᑦ ᑕᒪᒃᑭᓂ ᐆᒪᙵᑦ ᐃᑲᔪᖅᓱᐃᓂᐅᔪᒥ ᐊᐅᓚᑦᑎᓂᕐᒧᑦ ᐊᒻᒪ ᐊᒡᕕᐊᕈᒪᙱᓚᒍᑦ ᓄᓇᓕᖕᓄᑦ,” ᐅᖃᓚᐅᖅᐳᖅ ᑭᐊᕆᒡᓇᓐ, ᑎᒃᑯᐊᕆᓪᓗᓂ ᐱᔭᕆᐊᖃᕐᓂᐅᔪᒥ ᐊᖏᒡᓕᒋᐊᖅᑎᑦᑎᓂᕐᒧᑦ ᐆᒻᒪᖅᑯᑎᓂ, ᑯᕕᖅᑕᖅᑕᐅᓂᕐᒥ, ᐃᒪᕐᒥ ᐊᒻᒪ ᐃᑭᐊᖅᑭᕕᒃᑰᕈᓐᓇᐅᑎᓂ ᐱᔪᓐᓇᕐᓂᐅᔪᓂ ᓄᓇᓕᖕᓂ ᐅᓇᑕᖅᑐᒃᓴᒃᑯᑦ ᐱᑕᖃᖅᑎᓪᓗᒋᑦ.
ᐅᖃᐅᓯᖃᓚᐅᕆᕗᖅ ᖁᓕᒥᒎᓕᕋᓛᓂ, ᐅᓇᑕᖅᑐᒃᓴᒃᑯᑦ ᐸᕐᓇᐃᓂᖏᓐᓂ ᑐᓂᓯᓂᐊᕐᓂᕐᒥ ᑲᓇᑕᒥ ᐅᓇᑕᖅᑐᒃᓴᙳᐊᓂ, ᐊᒃᓱᕈᕐᓂᐅᔪᒥ ᒫᓐᓇᒨᓕᖓᓕᖅᑎᑦᑎᓂᕐᒥ ᐊᑐᕐᓂᖃᐅᑎᖏᓐᓂ ᐊᒻᒪ ᐱᓕᕆᐊᒃᓴᖏᓐᓂ.
“ᖃᐅᔨᔭᕆᐊᖃᖅᐳᒍᑦ ᕿᓚᓗᒐᕐᓂ ᐊᒻᒪ,ᓗᑦᑕᐅᖅ ᐃᒪᐅᑉ ᐊᑖᓃᓲᓂ ᐅᒥᐊᕐᓂ,” ᐅᖃᓚᐅᖅᐳᖅ, “ᑕᐃᒫᒃ ᖁᓕᒥᒎᓕᕋᓛᑦ ᐊᓯᐊᖑᓗᓂ ᐆᒃᑑᑎᐅᔪᓐᓇᖅᐳᖅ ᖃᔅᓯᒐᓚᖕᓄᑦ-ᐊᑐᖅᑕᐅᕙᒃᑐᓂ ᐱᓕᕆᔾᔪᑎᓂ.”
ᑲᑎᒪᖃᑎᖃᓚᐅᖅᑎᓪᓗᒍ ᑭᐊᕆᒡᓇᓐᒥ ᐊᒻᒪ ᐊᓯᖏᓐᓂ ᐅᓇᑕᖅᑐᒃᓴᒃᑯᑦ ᐱᓕᕆᔨᕐᔪᐊᖑᔪᓂ ᐋᒍᔅᑎ 19−ᒥ ᐃᖃᓗᖕᓂ, ᓯᕗᓕᖅᑎ ᔮᓐ ᒪᐃᓐ ᐅᖃᕆᐊᓪᓚᓚᐅᖅᐳᖅ ᐃᓱᒪᒋᓯᒪᔭᖓᓂ ᐅᖃᐅᓯᕆᓚᐅᖅᓯᒪᔭᖓᓂ ᐱᔾᔪᑎᖃᖅᑐᒥ ᐊᖏᒡᓕᒋᐊᖅᑐᒥ ᐅᓇᑕᖅᑐᒃᓴᒃᑯᑦ ᑮᓇᐅᔭᓂ ᐊᑐᕐᓂᖏᓐᓂ ᐅᑭᐅᖅᑕᖅᑐᒥ.
“ᐅᓇᑕᖅᑐᒃᓴᓕᕆᔨᒃᑯᑦ ᑮᓇᐅᔭᓕᐅᕋᓱᐊᕐᓂᖏᓐᓂ ᓴᖅᑭᑎᑦᑎᓪᓗᐊᕆᕗᖅ ᐊᑯᓂᐅᔪᒥ ᐱᕚᓪᓕᕈᑎᓂ ᓄᓇᕘᑉ ᓄᓇᓕᖏᓐᓄᑦ, ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ, ᐊᒻᒪ ᐃᓄᖕᓄᑦ,” ᐅᖃᓚᐅᖅᐳᖅ ᕙᐃᔅᐳᒃᑯᑦ ᑎᑎᕋᕐᓂᐅᔪᒥ.
ᒫᓐᓇᐅᔪᒥ ᓇᓚᐅᑦᑖᕆᓂᖃᙱᓚᖅ ᐅᑭᐅᖅᑕᖅᑐᒥ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᐃᓚᑰᓂᐅᔪᒥ, ᑭᓯᐊᓂ ᐃᓄᐃᑦ ᑕᐱᕇᑦ ᑲᓇᑕᒥ ᓴᖅᑭᑎᑦᑎᓚᐅᖅᐳᑦ ᐅᓂᒃᑳᓕᓂᐊᖑᔪᒥ 2020−ᒥ ᓇᓚᐅᑦᑖᕆᔭᐅᓯᒪᔪᒥ $75.1 ᐱᓕᐊᓐ−ᖑᓂᖓᓂ.
ᐱᔭᕆᐊᖃᕐᓂᖃᖅᐳᖅ ᑕᒪᒃᑭᓂ ᐅᑭᐅᖅᑕᖅᑐᒥ ᓄᓇᓕᐅᔪᓂ, ᐃᓄᐃᑦ ᐃᒡᓗᖃᕐᓂᖏᓐᓂ ᐸᖕᒥᐅᓗᐊᖅᑐᓂ ᐃᒡᓗᓂᑦ ᖃᓄᐃᓕᖓᓂᐅᔪᓂ, ᓄᑕᐅᔪᓐᓃᖅᐸᓪᓕᐊᔪᓂ ᐃᓕᓐᓂᐊᕐᕕᓂᑦ ᐅᓗᕆᐊᓇᖅᑐᓂ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᐊᑲᐅᙱᓕᐅᕈᑎᖃᖅᑐᓂ, ᐊᒻᒪ ᐃᒪᕐᒥ ᓴᓗᒻᒪᖅᓴᐃᓂᕐᒧᑦ ᐱᓕᕆᕝᕕᓂ ᓄᖑᓪᓕᓂᖅᐸᓪᓕᐊᓪᓗᑎᒃ ᐊᒻᒪ ᐊᔪᓕᖅᐸᓪᓕᐊᓪᓗᑎᒃ.
ᐅᓇᑕᖅᑐᒃᓴᓕᕆᔨᒃᑯᑦ ᐸᕐᓇᒃᐳᑦ ᐊᕕᒃᓯᓂᖏᓐᓂ ᑎᑭᓛᖅᑐᒥ 5 ᐳᓴᓐᑎᒥ ᐅᓇᑕᖅᑐᒃᓴᓕᕆᔨᒃᑯᑦ ᑮᓇᐅᔭᓂ ᐊᑐᕐᓂᖏᓐᓂ ᐱᓕᕆᐊᒃᓴᖏᓐᓂ ᐅᐊᖕᓇᒥ ᐊᑦᓛᓐᑎᒃᒥ ᐊᖏᖃᑎᒌᖕᓂᐅᔪᒥ ᑲᑐᔾᔨᖃᑎᒌᖑᔪᒥ ᑐᓂᓯᓗᑎᒃ 3.5 ᐳᓴᓐᑎᒥ ᑐᕌᖓᔪᒧᑦ ᐅᓇᑕᖅᑐᒃᓴᒃᑯᑦ ᑮᓇᐅᔭᓂ ᐊᑐᕐᓂᖏᓐᓂ ᐊᒻᒪ 1.5 ᐳᓴᓐᑎᒥ ᖃᔅᓯᒐᓚᖕᓄᑦ-ᐊᑐᖅᑕᐅᓂᖏᓐᓂ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ. ᐅᓇ ᐋᖅᑭᒃᓱᐃᓇᔭᖅᐳᖅ $60 ᐱᓕᐊᓐᓄᑦ ᖃᔅᓯᒐᓚᖕᓄᑦ-ᐊᑐᖅᑕᐅᓂᐅᔪᓂ ᐱᓕᕆᐊᒃᓴᐅᔪᓄᑦ 2035−ᒥ, ᐅᓇᑕᖅᑐᒃᓴᓕᕆᔨᒃᑯᑦ ᓇᓚᐅᑦᑖᕆᕗᑦ, ᐅᖃᐅᓯᐅᓪᓗᓂ ᐅᓂᒃᑳᓕᐊᒥ ᓴᖅᑭᑎᑕᐅᔪᒥ ᕕᕗᐊᕆᒥ ᑎᑎᕋᕐᕕᖕᒥ ᑲᓇᑕᐅᑉ ᒪᓕᒐᓕᐅᖅᑎᖏᑦᑕ ᑮᓇᐅᔭᓂ ᐊᑐᖅᑕᐅᔪᒃᓴᓂ ᐱᓕᕆᔨᐅᔪᒧᑦ.
ᑭᒃᑯᓕᒫᑦ ᐊᖏᖃᑎᖃᙱᓚᑦ ᐃᓱᒪᒋᔭᐅᓂᐅᔪᒥ, ᑳᔭ ᑐᐳᐃ, ᐊᑦᑎᖕᓂᖅᓴᒥ ᖃᐅᔨᓴᖅᑎᐅᔪᒥ ᐅᐊᖕᓇᒥ ᐊᑦᓛᓐᑎᒃᒥ ᐊᖏᖃᑎᒌᖕᓂᐅᔪᒥ ᑲᑐᔾᔨᖃᑎᒌᖑᔪᒥ ᑲᑐᔾᔨᖃᑎᒌᖑᔪᒥ ᑲᓇᑕᒥ, ᓯᓚᑦᑐᖅᓴᕐᕕᒡᔪᐊᒥ ᑐᕌᓐᑐᒥ−ᑐᙵᕕᓕᖕᒥ ᖃᐅᔨᓴᕐᓂᕐᒧᑦ ᑲᑎᙵᓂᐅᔪᒥ, ᐊᐱᕆᓚᐅᖅᐳᖅ ᔫᓂ 17−ᒥ ᐃᓱᒪᒋᔭᐅᓂᐅᔪᒥ ᐅᓇ ᖃᔅᓯᒐᓚᖕᓄᑦ-ᐊᑐᖅᑕᐅᓂᐅᔪᒥ ᑕᐅᑐᒃᑕᑐᐊᖃᑲᐃᓐᓇᕐᓂᕐᒥ ᑕᑯᔭᐅᔪᓐᓇᕐᓂᖓᓂ “ᐃᓱᒪᑐᓂᕐᒥ ᑮᓇᐅᔭᓕᕆᓂᐅᔪᒥ.”
“ᑭᓯᐊᓂ ᒐᕙᒪᒃᑯᑦ ᓴᖅᑭᑎᑦᑎᒍᓂ ᖃᔅᓯᒐᒪᖕᓄᑦ-ᐊᕐᕌᒍᓄᑦ ᑮᓇᐅᔭᓂ ᐊᑐᕐᓂᕐᒧᑦ ᐸᕐᓇᐅᑎᒥᒃ ᑲᑎᙵᑎᑦᑎᔪᒥ ᐱᔪᓐᓇᕐᓂᐅᔪᒥ ᑮᓇᐅᔭᓕᐅᕋᓱᐊᕐᓂᕐᒥ 5 ᐳᓴᓐᑎᒧᑦ ᑐᕌᒐᕆᔭᐅᔪᒧᑦ, ᐱᔪᒪᓂᐅᔪᒥ ᐱᔭᐅᔪᓐᓇᖅᐳᖅ ᐱᓕᕆᖃᑎᒌᖑᔪᓂ ᑲᑎᒪᔨᕐᔪᐊᖑᔪᓂ ᖃᐃᖁᔨᓂᐅᔪᒥ ᐅᓇᐅᙱᑦᑐᖅ ᐸᕐᓇᒍᑕᐅᔪᓂ ᐊᖏᖅᓯᒪᓂᐅᔪᒥ,” ᑐᐳᐃ ᐅᖃᓚᐅᖅᐳᖅ ᐱᓕᕆᓂᐅᔪᒥ.
ᐃᖃᓗᖕᓂ, ᑭᐊᕆᒡᓇᓐ ᐊᑐᐃᓐᓇᖃᖅᑎᑦᑎᓚᐅᙱᓚᖅ ᐅᓂᒃᑳᕆᓂᐅᔪᓂ ᐅᕝᕙᓘᓐᓃᑦ ᖃᖓ ᐱᔭᕇᖅᓯᒪᓂᐊᕐᓂᖓᓂ ᓄᑖᖑᔪᓄᑦ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᐱᓕᕆᐊᒃᓴᐅᔪᓄᑦ. ᑭᓯᐊᓂ ᐅᖃᓚᐅᖅᐳᖅ ᐱᓕᕆᔨᕐᔪᐊᖑᔪᓂ ᐅᖃᖃᑎᖃᖅᐳᑦ ᐃᓄᖕᓂ ᐅᑭᐅᖅᑕᖅᑐᒥ ᑭᓱᓂ ᐱᔭᕆᐊᖃᕐᓂᖏᓐᓂ.
“ᐃᓚᖏᓐᓂ ᐃᓂᐅᔪᓂ ᓯᕗᓂᐊᓃᓐᓂᖅᓴᐅᕗᑦ ᐊᓯᖏᓐᓂ; ᑐᓴᐅᒪᔾᔪᑎᒃᓴᖃᕐᓂᖅᓴᐅᕗᒍᑦ, ᑭᓯᐊᓂ ᐱᕕᖃᖅᑎᑦᑎᓂᕐᒥ ᐅᖃᖃᑎᖃᕐᓂᕐᒧᑦ ᐱᒻᒪᕆᐅᕗᖅ,” ᐅᖃᓚᐅᖅᐳᖅ.
(0) Comments