ᓄᓇᕕᒃᒥ ᐸᓖᓯᒃᑯᑦ ᐱᒋᐊᖅᑎᑦᑎᒃᑲᓐᓂᕐᑐᑦ ᐅᓇᑕᖅᑐᒃᓴᙳᐊᓂ ᐃᓄᐃᑦ ᐱᓕᕆᐊᖃᕈᓐᓇᖁᓐᓄᒋᑦ

ᓄᓇᕕᒃᒥᑦ ᐸᓖᓯᓕᕆᔨᒃᑯᑦ ᐱᒋᐊᖅᑎᑦᑎᒃᑲᓐᓂᕐᑐᑦ ᐅᓇ ᐅᓇᑕᖅᑐᒃᓴᙳᐊᓂ ᐃᓄᖕᓂ ᐅᓄᕐᓯᑎᑦᑎᓂᕐᓴᐅᓇᓱᒃᖢᑎᒃ ᐃᖅᑲᓇᐃᔭᖅᑎᖏᓐᓂ ᐊᒻᒪᓗ ᐊᔪᕈᓐᓃᕐᓴᕈᑎᐅᓗᓂ ᐃᓅᓱᒃᑐᓄᑦ.

8 ᑕᖅᑭᓄᑦ ᐱᓕᕆᐊᒃᓴᖅ ᐃᓅᓱᒃᑐᓂ ᐱᓕᕆᓕᖅᑎᑦᑎᔾᔪᑎᐅᓂᐊᕐᑐᖅ ᐊᕐᕌᒍᓕᖕᓂ 12-ᓂ 20-ᒧᑦ ᑰᔾᔪᐊᖅᒥ ᐃᓚᐅᓂᐊᖅᑐᓂ ᐊᔾᔨᒌᙱᑦᑑᑎᓂ ᐱᓕᕆᐊᒃᓴᓂ ᐊᒃᑐᐊᔪᓂᒃ ᐸᓖᓯᓕᕆᓂᕐᒧᑦ, ᐆᒪᓇᓱᖕᓂᕐᒧᑦ, ᐋᓐᓂᖅᑐᓕᕆᓂᕐᒧᑦ ᐊᒻᒪ ᐃᖅᑲᐃᓕᓴᖃᑦᑕᕐᓂᕐᒥ ᐊᔪᕈᓐᓃᕐᓴᕐᓂᖅᒧᑦ, ᐅᖃᓚᐅᕐᑐᖅ ᐱᓕᕆᐊᒧᑦ ᑐᑭᒧᐊᖅᑎᑦᑎᔨ ᔭᓯᑲ ᐋᔅᑯᕌᕝᑦ ᐅᐃᕖᑐᑦ ᐊᐱᕐᓱᖅᑕᐅᑎᓪᓗᒍ.

ᐸᓕᓯᒃᑯᓐᓄᑦ ᐊᖓᔪᖅᑳᕕᓂᖅ ᔮᓐ-ᐱᐊᕐ ᓚᕉᔅ ᑐᓴᖅᑎᑦᑎᓚᐅᕐᓯᒪᔪᖅ ᒫᔅᓯ 2025-ᒥ ᐅᓇ ᐱᓕᕆᐊᒃᓴᖅ ᐅᑎᖅᑎᑕᐅᓂᐊᕐᓂᕋᖅᖢᓂᐅ ᐃᓱᓕᓚᐅᖅᑎᓪᓗᒍ ᑖᓐᓇᓗ ᐱᒋᐊᖅᑎᑕᐅᓂᑰᓪᓗᓂ 2018-ᒥ ᑭᓯᐊᓂᓕ ᐃᒃᓯᖕᓇᖅᑕᐅᑐᐃᓐᓇᕐᓂᑰᓪᓗᓂ.

ᐱᓕᕆᐊᒃᓴᖅ ᐊᕐᕌᓂ ᐊᐅᔭᒃᑯᑦ ᐅᑎᖅᑎᑕᐅᔪᓐᓃᓚᐅᕐᓯᒪᖕᒪᑦ ᐅᑎᕐᓂᐊᕋᓱᒋᔭᐅᒐᓗᐊᖅᑎᓪᓗᒍ, ᐅᖃᕐᑐᖅ ᐋᔅᑯᕌᕝᑦ, ᑖᓐᓇᓕ ᐃᖅᑲᓇᐃᔭᓕᓚᐅᕐᓯᒪᔪᖅ ᐅᒃᑑᐱᕆᒥ, ᐊᒻᒪᓗ ᑭᖑᕙᕆᐊᖅᑕᐅᓯᒪᓂᖓ ᐊᓯᖏᓐᓂ ᐸᓖᓯᓂ ᐊᖓᔪᖅᑳᖅᑖᕐᓂᑰᓂᖏᓐᓄᑦ ᐊᒻᒪᓗ ᓴᙱᓂᕐᓴᒥ ᐱᓕᕆᐊᒥ ᐱᓕᕆᐊᖃᕈᒪᓂᕐᒧᑦ.

ᔮᓐ-ᕗᕌᓐᓱᐊ ᐴᓂᐅ ᐊᖓᔪᖅᑳᙳᓚᐅᕐᓯᒪᖕᒪᑦ ᓄᓇᕕᒃᒥ ᐸᓕᓯᓕᕆᔨᓄᑦ ᓄᕕᐱᕆ 2025-ᒥᑦ.

ᐅᓇ ᐱᓕᕆᐊᒃᓴᖅ ᐋᖅᑭᒃᑕᐅᓯᒪᓇᓱᒃᑐᖅ ᐃᓅᓱᒃᑐᐃᑦ ᐸᓖᓯᓕᕆᓂᕐᒥ ᖃᐅᔨᑎᑕᐅᓂᖏᑦᑕ ᐅᖓᑖᓄᒃᑲᓐᓂᖅ, ᐋᔅᑯᕌᕝᑦ ᐅᖃᕐᑐᖅ.

“ᐱᓕᕆᐊᒃᓴᖃᕈᒪᒐᑦᑕ ᐃᑲᔫᑎᒋᔪᓐᓇᖅᑕᖏᓐᓂᑦ ᑖᒃᑯᓂᖓ,” ᐅᖃᕐᑐᖅ. “ᓈᒻᒪᙱᓕᐅᕈᑎᕕᓂᕐᐳᑦ ᖃᐅᔨᕚᓪᓕᕈᑎᒋᓚᐅᕋᑦᑎᒍᑦ ᐊᒻᒪ ᐊᑐᒃᑲᓐᓂᕈᒪᙱᖢᑎᒍᑦ.”

ᐱᓕᕆᐊᒃᓴᐃᑦ ᐊᕕᒃᑐᖅᑕᐅᓯᒪᓂᐊᖅᑐᖅ ᐃᒪᓐᓇ ᐊᕐᕌᒍᖏᑦᑎᒍᑦ: 12-ᓂ 14-ᓄ, 15-ᓂ 17-ᓄ, ᐊᒻᒪ 18-ᓂ 20-ᓄ.

ᐅᓇᑕᕐᑐᒃᓴᙳᐊᑦ ᑲᑎᑎᑕᐅᖃᑦᑕᕐᓂᐊᖅᑐᑦ ᐊᐃᑉᐹᙳᕌᖓᑦ ᐃᓕᓐᓂᐊᖅᑎᑕᐅᓚᐅᕐᓗᑎᒃ ᐱᒋᐊᕈᑎᒋᓂᐊᖅᑕᖏᓐᓂ ᐸᓖᓯᓕᕆᓂᕐᒥᒃ ᐊᒻᒪ ᐱᓕᕆᐊᖃᖅᑎᑕᑎᑕᐅᓗᓯ ᐋᓐᓂᖅᑐᓕᕆᓂᕐᒥ ᐊᒻᒪ ᐊᓯᖏᓐᓂ ᐊᔪᕈᓐᓃᕆᐊᖃᖅᑕᖏᓐᓂᒃ.

ᐋᔅᑯᕌᕝᑎ ᐅᖃᓚᐅᕐᑐᖅ ᐱᓕᕆᖃᑎᖃᓕᕐᓂᖓᓂᒃ ᐅᑯᓂᖓ ᓴᖅᑭᔪᖅᑯᓐᓂ, ᑖᒃᑯᐊᓕ ᐃᓕᖅᑯᓯᓕᕆᓂᕐᒥᑦ ᐱᓕᕆᐊᖃᖃᑦᑕᖅᑐᑦ ᑲᑐᔾᔨᖃᑎᒌᓅᖓᔪᓂᒃ ᒪᑯᑎᑐᓇᖅ ᐊᖑᓇᓱᖃᑦᑕᕐᓂᕐᒥᒃ ᐊᒻᒪ ᐃᖃᓗᒐᓱᑲᑕᒃᑎᓐᓂᕐᒥ ᐅᓇᑕᖅᑐᙳᐊᓂᒃ.

“ᐸᓕᓯᓕᕆᔪᓂ ᐱᓕᕆᓂᕐᓴᐅᑎᑦᑎᔪᒪᒐᑦᑕ, ᑭᓯᐊᓂᓕᑦᑕᐅᖅ ᐃᓕᖅᑯᓯᕆᔭᐅᔪᓂᒃ ᐊᑐᖅᑎᑦᑎᔪᒪᓪᓗᑕ.” ᐋᔅᑯᕌᕝᑦ ᐅᖃᕐᑐᖅ.

ᐅᖃᕆᓪᓗᓂ ᐃᓄᐃᑦ ᐸᓖᓯᓕᕆᔨᐅᔪᑦ ᖃᓄᐃᑦᑕᐃᓕᒪᓂᖏᓐᓂᒃ ᐃᑲᔪᕋᓱᒃᖢᓂ. ᐅᖃᓚᐅᕐᑐᖅ ᓯᕗᓪᓖᑦ ᐅᓇᑕᖅᑐᒃᓴᙳᐊᑦ ᐸᓖᓯᙳᕋᓱᒃᑐᑦ ᓈᒻᒪᙱᓕᐅᕈᑎᖃᔭᕐᓂᖏᓐᓂ ᖃᓄᐃᑦᑐᓂ ᐃᑲᔪᕆᐊᕋᓱᒃᖢᑎᒃ ᓄᓇᖏᓐᓂ.

“ᐃᓚᖓᓪᓕ ᓈᒻᒪᙱᓕᐅᕈᑎᐅᓚᐅᕐᑐᖅ ᓈᒻᒪᙱᓕᐅᕈᑎᒋᔭᐅᔪᓂᒃ ᓴᖅᑭᒃᑐᖃᕈᑎᐅᓪᓗᑎᒃ. ᐅᖄᓚᔪᑎᒍᑦ ᐊᒻᒪ ᐊᑐᕐᑕᐅᓂᑯᓂ ᐃᓱᒪᒋᔭᖃᕈᑎᐅᓕᖅᖢᑎᒃ, ᑕᒪᒃᑯᐊᓗ ᐱᓕᕆᐊᖑᐊᓂᒃᓯᒪᙱᓐᓂᑰᓪᓗᑎᒃ,” ᐅᖃᕐᑐᖅ.

ᐱᓕᕆᐊᖃᕐᑐᖅ ᑲᑎᕐᓱᐃᓪᓗᓂ ᐱᓕᕆᖃᑎᒌᖕᓂᐊᖅᑐᓂ ᒪᐅᓇ ᐃᓱᒫᓗᐊᖅᑕᐃᓕᓂᕐᒥ ᐊᐅᓚᑦᑎᓂᕐᒧᑦ, ᐃᓱᒫᓗᓗᐊᖅᑐᓂᒃ ᖃᐅᔨᒪᓕᕐᓂᕐᒥᒃ ᐊᒻᒪ ᖃᓄᐃᑎᑦᑎᑦᑕᐃᓕᓂᕐᒥᒃ.

“ᑭᖑᓂᐊᒍᓪᓕᖃᐃ ᑕᐃᒪᐃᑦᑐᖃᕈᒪᒍᓂ ᐊᑕᐅᓯᐅᓇᖅᑕᕐᓗᒋ ᐃᑲᔪᕈᓐᓇᕐᓯᓂᕐᒥᒃ.” ᐋᔅᑯᕌᕝᑦ ᐅᖃᕐᑐᖅ ᓂᕆᐅᖕᓂᕋᖅᖢᓂ ᐊᖏᓂᕐᓴᒃᑯᑦ ᐱᓕᕆᐊᖃᕐᓂᕐᒥᒃ ᐅᒃᐱᕆᔭᐅᑦᑎᐊᓕᕈᑎᓂ ᐊᒻᒪ ᐃᓅᓱᒃᑐᓂ ᑕᒪᑐᒥᖓ ᐱᓕᕆᐊᖃᕈᒪᓕᖅᑎᑦᑎᓂᕐᒥᒃ ᐃᓕᖅᑯᓯᖏᓐᓂ ᐊᑐᐃᓐᓇᕐᓗᑎᒃ ᓄᓇᖏᓐᓃᓪᓗᑎᒡᓗ.

“ᑐᕌᒐᕆᔭᐅᒍᓂ ᓄᓇᓕᖕᓂ ᐸᓖᓯᓕᕆᓂᕐᒥ ᑕᐃᒪᓕ ᒪᑯᐊ ᐃᓅᓱᖕᓂᕐᓴᐃᑦ ᐃᑲᔪᖃᑦᑕᕈᓐᓇᓕᕐᓗᑎᒃ ᖃᓄᐃᓕᐅᕈᑎᓂᒃ ᐊᒻᒪᓗ ᐃᓐᓇᑐᖃᕐᓂ ᐅᖃᖃᑎᖃᕈᓐᓇᑦᑎᐊᓕᕐᓗᑎᒃ,” ᐅᖃᕐᑐᖅ.

“ᐅᓇ ᓄᓇᓕᖕᓄᑦ ᐃᓕᓴᕆᔭᐅᔾᔪᑎᐅᔪᓐᓇᖅᑐᖅ.”