ᓯᓚᓕᕆᕝᕕᒃ ᑐᓂᓯᕗᖅ ᒫᓐᓇᓪᓚᕆᐅᔪᒥ ᕿᒥᕐᕈᓂᕐᒥ ᐊᓯᔾᔨᖅᐸᓪᓕᐊᔪᒥ ᐅᑭᐅᖅᑕᖅᑐᒥ
ᐊᐅᓱᐃᑦᑐᕐᒥ ᐱᓕᕆᐊᒃᓴᖅ ᐃᓚᖓ ᐊᕐᕌᒍᓄᑦ−3-ᓄᑦ, $300,000 ᖃᐅᔨᓴᕐᓂᐅᔪᒥ ᐱᖅᓯᒥ-ᐊᐅᓚᑕᐅᔪᒥ ᓯᒡᔭᖅᐸᓯᖕᒥ ᓄᖑᑉᐸᓪᓕᐊᓂᐅᔪᒥ
ᑕᐃᕕᑦ ᑎᑎᐊᕐ, ᓴᐅᒥᖕᒥ, ᓄᓇᓕᕆᓂᕐᒥ ᐃᓕᓴᐃᔨᕐᔪᐊᖅ ᐊᒻᒪ ᑐᑭᒧᐊᒃᑎᑦᑎᔨ ᐅᑭᐅᖅᑕᖅᑐᒥ ᐅᑭᐅᖅᑕᖅᑐᒥᓪᓗ ᓯᒡᔭᖅᐸᓯᖕᒥ ᖃᐅᔨᓴᕐᕕᖕᒥ, ᕿᑐᕐᙵᖓᓂ ᐊᒫᖅᖢᓂᐅᒃ, ᐊᒻᒪ ᑎᐊᕆ ᓄᐊ, ᓇᖕᒥᓂᖃᖅᑎ ᐊᐅᓱᐃᑦᑐᖅ ᖃᓄᐃᓕᐅᕈᓘᔭᕐᓂᕐᒥ, ᐃᓕᓯᕗᑦ ᓴᖅᑭᔮᑲᐅᑎᒋᔪᒥ ᓯᕿᙳᔭᒧᑦ ᐊᑐᖅᑐᒥ ᐊᔾᔨᓕᐅᕈᒻᒥ ᐱᓕᕆᕝᕕᖕᒥ ᐊᐅᓱᐃᑦᑑᑉ ᖃᓂᒋᔭᖓᓂ ᔪᓚᐃ 8−ᒥ. ᖃᕋᓴᐅᔭᒃᑯᑦ ᐊᔾᔨᓕᐅᕈᑎ ᐱᓕᕆᔾᔪᓯᖅ ᐋᖅᑭᒃᑕᐅᓯᒪᔪᒥ ᓯᒡᔭᖅᐸᓯᐅᑉ ᖃᓂᒋᔭᖓᓂ ᐃᑲᔪᓲᖑᕗᖅ ᖃᐅᔨᓴᖅᑎᓂ ᓇᐅᑦᑎᖅᓱᕐᓂᕐᒥ ᑕᕆᐅᑉ ᓯᑯᖓᓐᓂ ᖃᓄᐃᓐᓂᕆᔭᖓᓐᓂ. (ᐋᓐ−ᒪᕇ ᑐᐸᐃᒧᑦ ᐊᔾᔨᓕᐅᖅᑕᐅᔪᖅ)
For the English version of this story, please see New weather station gives Grise Fiord real-time look at changing Arctic.
ᑕᒃᓯᓕᖅᑎᓪᓗᒍ ᐊᐅᓱᐃᑦᑐᕐᒥ ᐱᓇᓱᐊᕈᓯᐅᓚᐅᖅᑐᒥ, ᒫᑎ ᖁᓪᓗᒍᖅᑐᖅ ᖃᕋᓴᐅᔭᒃᑯᑦ ᖃᐅᔨᒋᐊᓚᐅᖅᐳᖅ ᐊᑦᑕᓇᙱᒃᑲᓗᐊᕐᒪᖔᑦ ᐊᐅᓪᓛᕐᓂᕐᒧᑦ.
ᕗᕌᓐᓯᔅ ᒎᑦᑎᐊᐃ, ᐃᓕᓴᐃᔨᕐᔪᐊᖅ Université du Québec à Rimouski−ᒥ, ᐋᖅᑭᒋᐊᑦᑎᐊᒃᑲᓐᓂᖅᓯᕗᖅ ᑭᖑᓪᓕᖅᐹᖑᔪᓂ ᐱᓕᕆᓂᐅᔪᓂ ᐃᓕᓯᓂᕐᒥ 10-ᒦᑕᓂ-ᖁᑦᑎᖕᓂᓕᖕᒥ ᓯᓚᓕᕆᕝᕕᖕᒥ ᐊᐅᓱᐃᑦᑑᑉ ᖃᓂᒋᔭᖓᓂ ᐋᒍᔅᑎ 15. ᐱᓕᕆᕝᕕᒃ ᐃᑲᔪᖅᓱᐃᓲᖑᕗᖅ ᖃᐅᔨᓴᕐᓂᕐᒥ ᐱᖅᓯᕐᓂᕐᓂ, ᑕᕆᐅᑉ ᓯᑯᖓᓐᓂ ᐊᒻᒪ ᓯᒡᔭᖅᐸᓯᖓᓐᓂ ᓄᖑᑉᐸᓪᓕᐊᓂᐅᔪᒥ. (ᑕᐃᕕᑦ ᑎᑎᐊᕐ ᐊᔾᔨᓕᐅᖅᑕᖓ)
ᐅᕘᓇ ᐅᑭᐅᖅᑕᖅᑐᒥ ᐅᑭᐅᖅᑕᖅᑐᒥᓪᓗ ᓯᒡᔭᖅᐸᓯᖕᒥ ᖃᐅᔨᓴᕐᕕᐅᑉ ᐃᑭᐊᖅᑭᕕᖓᓐᓂ, ᖃᐅᔨᒋᐊᓚᐅᖅᐳᖅ ᒫᓐᓇᓪᓚᕆᐅᔪᒥ ᐊᔾᔨᙳᐊᓂ ᓄᑖᖑᔪᒥ ᓯᓚᓕᕆᕝᕕᖕᒥ ᐃᓂᖃᖅᑐᒥ 5 ᑭᓛᒥᑐᐸᓗᖕᓂ ᓄᓇᓕᖕᒥᑦ.
ᑕᑯᒃᓴᐅᓂᖅ ᑕᑯᒃᓴᐅᑎᑦᑎᕗᖅ ᑕᖅᓯᖅ ᓄᓇᓕᖕᓃᑐᐃᓐᓇᕐᓂᖓᓂ, ᖃᓄᐃᓐᓂᐅᔪᑦ ᐅᖓᓯᖕᓂᖅᓴᐅᔪᒥ ᓯᓚᑦᑎᐊᕙᐅᓪᓗᓂ.
“ᑕᐃᒫᒃ ᑲᔪᓯᓚᐅᖅᐳᒍᑦ ᓯᓚᑦᑎᐊᕙᐅᓂᐅᔪᒧᑦ,” ᐅᖃᓚᐅᖅᐳᖅ ᖁᓪᓗᒍᖅᑐᖅ, ᕼᐋᒻᓚᒃᑯᑦ ᐊᐅᓚᑦᑎᔨᖓᑕ ᐃᑲᔪᖅᑎᖓ.
“ᐃᑲᔪᕐᓂᖃᕐᔪᐊᖅᐳᖅ ᐱᓪᓚᕆᐅᔪᒥ, ᑕᑯᒃᓴᐅᔪᒥ ᐃᑲᔪᖅᓱᐃᓂᐅᔪᒥ ᒫᓐᓇᓪᓚᕆᐅᔪᒥ,” ᐅᖃᓚᐅᖅᐳᖅ.
10-ᒦᑕᒥ-ᖁᑦᑎᖕᓂᓕᖕᒥ ᐱᓕᕆᕝᕕᒃ, ᓴᓇᔭᐅᓚᐅᖅᑐᒥ ᑕᖅᑭᐅᓚᐅᖅᑐᒥ ᐃᓚᒋᔭᐅᕗᖅ ᐊᖏᓂᖅᓴᐅᔪᒥ ᖃᐅᔨᓴᕐᓂᕐᒧᑦ ᐱᓕᕆᐊᒃᓴᐅᔪᒥ ᐊᐅᓚᑕᐅᔪᒥ ᑎᐊᕆ ᓄᐊᒧᑦ, ᓇᖕᒥᓂᖃᖅᑎᐅᔪᖅ ᓄᓇᓕᖕᓂ ᐊᐅᓪᓚᕈᔾᔨᓂᕐᒥ ᐊᒻᒪ ᐊᐅᓪᓚᐅᔾᔨᔨ ᑲᒻᐸᓂᐅᔪᒥ ᐊᐅᓱᐃᑦᑐᖅ ᖃᓄᐃᓕᐅᕈᓘᔭᕐᓂᕐᒥ.
ᐱᓕᕆᐊᒃᓴᖅ ᐱᓂᐊᖅᐳᖅ $300,000−ᓂ ᐊᕐᕌᒍᓄᑦ ᐱᖓᓱᓄᑦ ArcticNet−ᑯᓐᓂ, ᑲᓇᑕᒥ ᑮᓇᐅᔾᔭᒃᓴᕈᑕᐅᙱᑦᑐᒥ, ᖃᐅᔨᓴᕐᓂᕐᒧᑦ ᐱᖅᓯᒧᑦ-ᐱᑎᑕᐅᔪᒥ ᓯᒡᔭᖅᐸᓯᖕᒥ ᓄᖑᑉᐸᓪᓕᐊᓂᐅᔪᒥ ᐊᒻᒪ ᑕᕆᐅᕐᒥ ᐊᓯᔾᔨᖅᐸᓪᓕᐊᓂᐅᔪᓂ ᐊᐅᓱᐃᑦᑑᑉ ᐃᒪᕕᖓᓂ, ᓯᒡᔭᖅᐸᓯᖓᓐᓂ ᐅᖅᓱᖅᑑᒥ.
ArcticNet ᐅᖃᐅᓯᖃᓚᐅᖅᐳᖅ ᑮᓇᐅᔭᖃᖅᑎᑦᑎᓂᐅᔪᒥ ᔪᓚᐃ 29−ᒥ, ᐃᓚᒋᔭᐅᓪᓗᓂ $9.3 ᒥᓕᐊᓐᓂ ᑲᑎᓪᓗᒍ ᐅᕗᙵᓚᐅᖅᑐᓂ 13−ᓄᑦ ᓄᓇᖃᖅᑳᖅᓯᒪᔪᓄᑦ- ᐊᒻᒪ ᐅᑭᐅᖅᑕᖅᑐᒥ-ᐊᐅᓚᑕᐅᔪᓂ ᖃᐅᔨᓴᕐᓂᕐᒧᑦ ᐱᓕᕆᐊᒃᓴᐅᔪᓄᑦ ᐃᓄᐃᑦ ᓄᓇᖓᓐᓂ ᐊᒻᒪ ᐊᖏᓂᖅᓴᐅᔪᒥ ᑲᓇᑕᐅᑉ ᐅᑭᐅᖅᑕᖅᑐᖓᓂ.
ᓄᐊᑉ ᓯᓚᓕᕆᕝᕕᖓ ᐊᑕᐅᓯᐅᓪᓗᓂ 7−ᖑᔪᓂ ᐱᓂᐊᖅᑐᓂ ᐃᓚᖓᓐᓂ $1.6 ᒥᓕᐊᓐᓂ ᐊᕐᕌᒍᓄᑦ ᐱᖓᓱᓄᑦ ᐅᕘᓇ ᐃᓄᐃᑦ ᖃᐅᔨᓴᕐᓂᕐᒧᑦ ᐱᓕᕆᔾᔪᑏᑦ ᐱᓕᕆᐊᖑᔪᒥ.
ᓯᒡᔭᒥ ᐊᐅᓱᐃᑦᑐᕐᒥ ᐊᑐᖅᑕᐅᕙᒃᑐᒥ ᐊᖑᓇᓱᒃᑎᓂ ᑭᓴᖅᓯᓂᕐᒥ ᐅᒥᐊᖏᓐᓂ ᒫᓐᓇ ᓯᕕᑐᓂᖅᓴᐅᓕᖅᐳᖅ ᐱᔾᔪᑎᖃᖅᑐᒥ ᓯᒡᔭᖅᐸᓯᖕᒥ ᓄᖑᑉᐸᓪᓕᐊᓂᐅᔪᒥ ᖄᖏᖅᓯᒪᔪᓂ ᐊᕐᕌᖑᓄᑦ ᖁᓕᓄᑦ, ᖁᓪᓗᒍᖅᑐᖅ ᐅᖃᓚᐅᖅᐳᖅ.
“ᒥᑭᑦᑐᓄᑦ ᐅᒥᐊᕐᓄᑦ ᑭᓴᕐᕕᒃᓴᖃᙱᓐᓇᑦᑕ ᐅᕝᕙᓘᓐᓃᑦ ᓈᒻᒪᒃᑐᒥ ᐅᒥᐊᕐᓄᑦ ᑐᓚᒃᑕᕐᕕᓂᑦ, ᓱᓕ ᑭᓴᖅᓯᓲᖑᕗᒍᑦ ᐅᒥᐊᑦᑎᓐᓂ ᓯᒡᔭᒥ ᐅᓗᕆᐊᓇᕐᓂᐅᔪᒥ ᐅᓕᙵᔪᒥ ᐊᒻᒪ ᑎᓂᙵᔪᒥᑦ ᐊᒻᒪ ᓯᓚᒥᑦ,” ᐅᖃᓚᐅᖅᐳᖅ.
ᒥᑭᑦᑐᓄᑦ ᐅᒥᐊᕐᓄᑦ ᑭᓴᕐᕕᒃᓴᒥ ᐳᒃᑕᓛᖅᑐᓂ ᑐᓚᒃᑕᕐᕕᖕᓂ, ᐅᒥᐊᕐᒧᑦ ᓯᕕᑐᔪᒥ ᐊᒻᒪ ᑐᓚᒃᑕᕐᕕᖕᒥ ᑐᓂᓯᓇᔭᖅᐳᖅ ᐊᑦᑕᓇᙱᓐᓂᖅᓴᐅᔪᒥ ᐊᑐᐃᓐᓇᖃᕐᓂᕐᒥ ᐃᒪᕐᒥ ᐱᓕᕆᐊᖑᕙᓪᓕᐊᕗᖅ ᑭᓯᐊᓂ ᐱᓕᕆᐊᒃᓴᖅ ᐋᖅᑭᒃᓱᖅᑕᐅᓯᒪᕗᖅ ᐱᔭᕇᖅᑕᐅᓂᐊᕐᓂᖓᓂ 2029−ᒥ, ᖁᓪᓗᒍᖅᑐᖅ ᐅᖃᓚᐅᖅᐳᖅ.
“ᐅᔾᔨᕆᓯᒪᓪᓚᕆᒃᐳᒍᑦ ᐃᓚᖏᓐᓂ ᐊᓯᔾᔨᕐᓂᐅᔪᓂ ᓯᒡᔭᑦᑎᓐᓂ ᐊᒻᒪ ᓯᒡᔭᖅᐸᓯᑦᑎᓐᓂ, ᐊᒻᒪ ᒪᓕᒃᐳᖅ ᐃᓱᒪᓂᑦᑎᓐᓂ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ,” ᐅᖃᓚᐅᖅᐳᖅ.
ᑕᐃᕕᑦ ᑎᑎᐊᕐ, ᓄᓇᓕᕆᓂᕐᒧᑦ ᐃᓕᓴᐃᔨᕐᔪᐊᖅ Université du Québec à Rimouski−ᒥ ᐊᒻᒪ ᑐᑭᒧᐊᒃᑎᑦᑎᔨ ᐅᑭᐅᖅᑕᖅᑐᒥ ᐅᑭᐅᖅᑕᖅᑐᒥᓪᓗ ᓯᒡᔭᖅᐸᓯᖕᒥ ᖃᐅᔨᓴᕐᕕᖓᓂ, ᐃᑲᔪᓚᐅᖅᐳᖅ ᓴᓇᓂᕐᒥ ᐱᓕᕆᕝᕕᖕᒥ ᐱᓕᕆᖃᑎᖓᓂ ᕗᕌᓐᓯᔅ ᒎᑦᑎᐊᐃ ᐊᒻᒪ ᓄᐊᒥᒃ ᐱᓕᕆᔾᔪᑎᑦ ᐅᒥᐊᕐᔪᐊᒃᑰᖅᑎᑕᐅᓚᐅᖅᑎᓪᓗᒋᑦ ᐋᒍᔅᑎᒥ.
ᐱᓕᕆᕝᕕᒃ ᓂᐱᓕᐅᕆᓲᖑᕗᖅ ᐊᓄᕆᒥ ᐊᒻᒪ ᐊᓯᖏᓐᓂ ᖃᓄᐃᓐᓂᐅᔪᓂ ᐃᑲᔪᕈᓐᓇᖅᑐᓂ ᖃᐅᔨᓴᖅᑎᓂ ᑐᑭᓯᐅᒪᓂᖏᓐᓂ ᖃᓄᖅ ᐱᖅᓰᑦ ᐊᐅᓚᑦᑎᓂᖏᓐᓂ ᒪᓪᓕᕐᓂᑦ ᐊᒻᒪ ᐃᑲᔪᖅᓱᐃᓂᖏᓐᓂ ᓯᒡᔭᖅᐸᓯᖕᒥ ᓄᖑᑉᐸᓪᓕᐊᓂᐅᔪᒥ, ᐅᖃᓚᐅᖅᐳᖅ, ᐊᒻᒪ ᑕᑯᒃᓴᐅᑲᐅᑎᒋᔪᒥ ᐊᔾᔨᓕᐅᕈᒻᒥ ᖃᐅᔨᓴᕐᓂᕐᒧᑦ ᑕᕆᐅᑉ-ᓯᑯᖓᓂ ᖃᓄᐃᓐᓂᐅᔪᓂ.
ᓯᓚᓕᕆᕝᕕᒃ ᑲᑎᙵᖃᑎᖃᖅᐳᖅ Silanga.ca−ᒧᑦ, ᐅᖃᐅᓯᖃᓲᖑᔪᒥ ᓯᓚᐅᑉ ᒥᒃᓵᓄᑦ ᓄᓇᓕᖕᓂ ᐱᓕᕆᕝᕕᓂ ᓄᓇᕗᒻᒥ, ᐃᓚᖃᖅᑐᒥ ᐃᒡᓗᓕᒃ, ᐃᒃᐱᐊᕐᔪᒃ ᐊᒻᒪ ᒥᑦᑎᒪᑕᓕᖕᒥ.
“ᐅᓇ ᐱᓕᕆᐊᖑᔪᖅ ᒥᑭᖦᖢᓂ ᐱᓕᕆᓂᐅᕗᖅ ᐱᓕᕆᓂᐅᔪᒥ ᓇᓗᓇᐃᖅᓯᓂᕐᒥ ᑲᑎᖅᓱᐃᓂᖏᓐᓂ ᖃᐅᔨᓴᖅᑕᐅᓂᑯᓂ ᑎᑎᕋᖅᓯᒪᔪᓂ ᐱᔭᕆᐊᓕᖏᓐᓂ ᓯᓚᒧᑦ ᓱᖏᐅᔾᔨᕙᓪᓕᐊᓂᕐᒧᑦ, ᐅᓇᑐᐊᖑᙱᑦᑐᖅ ᓯᒡᔭᖅᐸᓯᖕᒥ ᐊᑦᑕᓇᕆᔭᐅᔪᓄᑦ, ᑭᓯᐊᓂᑦᑕᐅᖅ ᐊᐅᓪᓛᕐᓂᕐᒧᑦ ᐊᑦᑕᓇᙱᓐᓂᐅᔪᒧᑦ. ᓂᕿᒃᓴᖃᑦᑎᐊᕐᓂᕐᒧᑦ, ᐊᒻᒪ ᐃᓂᒃᓴᖃᕐᓂᕐᒥ ᐸᕐᓴᐃᓂᕐᒥ ᓄᓇᓕᖕᓂ,” ᑎᑎᐅᕐ ᐅᖃᓚᐅᖅᐳᖅ.
ᖃᐅᔨᓴᕐᓂᖅ ᐅᖓᕙᕆᐊᖅᓯᒪᒋᕗᖅ ᑕᕆᐅᕐᒧᑦ.
ᕿᐊᕆᓐ ᐴᑐᕌᓐ, ᑎᐅᓪᕼᐊᐅᓯ ᓯᓚᑦᑐᖅᓴᕐᕕᒡᔪᐊᖓᓂ ᒥᑭᑦᑑᑎᑯᓗᖕᓂ ᖃᐅᔨᓴᖅᑎ, ᖃᐅᔨᓴᖅᐳᖅ ᐱᖅᓰᑦ ᐃᑲᔪᓲᖑᖕᒪᖔᑕ ᓅᑎᕆᓂᕐᒥ ᓂᕿᑦᑎᐊᕙᖃᑦᑎᐊᕐᓂᐅᔪᒥ ᐃᑎᔪᒥ ᐃᒪᕐᒥ ᓅᓐᓂᖓᓂ ᖄᖓᓄᑦ.
ᓄᐊ ᐃᑲᔪᖅᐳᖅ ᐴᑐᕌᓐ ᖃᐅᔨᓴᕐᓂᖓᓂ ᑲᑎᖅᓱᐃᓪᓗᓂ ᐃᒪᕐᒥ ᖃᐅᔨᓴᖅᑕᐅᓂᐊᖅᑐᓂ ᐊᒻᒪ ᓇᒃᓯᐅᑎᓪᓗᓂᒋᑦ ᖃᐅᔨᓴᕐᕕᖓᓄᑦ. ᐴᑐᕋᓐ ᖃᐅᔨᓴᕆᕗᖅ ᐃᒪᕐᒥ ᐊᑐᖅᖢᓂ ᐃᒃᐱᒍᓱᖕᓂᐅᔪᓂ ᐃᓕᔭᐅᔪᓂ ᑕᕆᐅᕐᒧᑦ ᐆᒃᑐᕋᐃᔪᒥ ᓂᒡᓕᓇᕐᓂᖓᓂ ᐆᓇᕐᓂᖓᓂ, ᑕᕆᐅᖑᓂᖓᓂ ᐊᒻᒪ ᐃᑎᓂᖓᓂ. ᐱᓕᕆᓂᖅ ᐱᓕᕆᐊᖑᔪᒃᓴᐅᑕᐅᕗᖅ ᔪᓚᐃᒥ ᑕᐃᑯᖓ ᓄᕕᐱᕆᒧᑦ, ᑕᐃᑲᓂ ᑕᕆᐅᑉ ᓯᑯᖓ ᓯᑯᖃᕈᓐᓃᖅᑎᓪᓗᒍ ᐊᒻᒪ ᐱᖅᓰᑦ ᐊᖏᓂᖅᓴᐅᔪᒥ ᐊᒃᑐᐃᓂᖃᕈᓐᓇᕐᓂᖓᓂ ᓯᒡᔭᖅᐸᓯᖕᒧᑦ.
“ᓯᕗᓪᓕᖅᐹᒥ ᐱᖅᓯᕐᓂᕐᒦᑉᐳᒍᑦ ᖁᙱᐊᕐᓂᕐᒧᑦ ᒫᓐᓇᐅᔪᒥ, ᑕᐃᒫᒃ ᐅᓇ ᐱᓪᓚᕆᐅᕗᖅ ᐱᓕᕆᓂᐅᔪᒥ,” ᐴᑐᕋᓐ ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᖃᐅᔨᓴᕐᓂᕐᒥ ᐊᐅᓱᐃᑦᑐᕐᒥ ᑕᑯᒃᓴᐅᑎᑦᑎᑐᐃᓐᓇᕆᐊᖃᕐᓂᖓᓂ ᖃᓄᐃᓕᖓᓂᐅᔪᓂ ArcticNet ᑲᑎᒪᓂᐅᔪᒥ ᕼᐋᓕᕚᒃᔅᒥ ᑕᒪᑐᒪᓂ ᑎᓯᐱᕆᐅᓛᖅᑐᒥ.
“ᐅᓇ ᐱᓕᕆᐊᒃᓴᖅ ᑕᐃᒪᑐᖅ ᐃᑲᔪᖅᓱᐃᓂᐊᕆᕗᖅ ᒐᕙᒪᓕᕆᓂᕐᒧᑦ ᐱᓕᕆᓂᐅᔪᓂ ᐅᑭᐅᖅᑕᖅᑐᒥ, ᐃᑲᔪᖅᓱᐃᓂᕐᒥ ᐅᕙᑦᑎᓐᓂ ᖃᓄᐃᓕᐅᕆᐊᖃᕐᓂᑦᑎᓐᓂ ᐆᒪᓇᓱᐊᕐᓂᕐᒧᑦ ᐊᒻᒪ ᑭᒡᒐᖅᑐᐃᓂᕐᒥ ᑲᓇᑕᐅᑉ ᐅᖓᓯᓛᖓᓂ ᓄᓇᓕᖓᓐᓂ ᐅᕙᑦᑎᓐᓂ ᑐᓴᐅᒪᑎᑦᑎᓂᕐᒥ,” ᖁᓪᓗᒍᖅᑐᖅ ᐅᖃᓚᐅᖅᐳᖅ.
(0) Comments