ᐊᓄᕆᒨᖅᑐᒥ ᐸᐅᕋᐅᑎᒥ ᐱᓕᕆᐊᖑᕙᓪᓕᐊᕗᖅ ᑲᑉᐱᕼᐃᓕᖅᑑᖅ ᒎᓗᒧᑦ ᐅᔭᕋᖕᓂᐊᕐᕕᖓᓄᑦ
ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦ, ᑐᒡᓕᒃ ᐆᒻᒪᖅᑯᑎᓕᕆᔨᒃᑯᑦ ᐱᓂᐊᖅᐳᑦ $20 ᒥᓕᐊᓐᓂ ᐊᑐᖅᑐᐊᑎᑕᐅᓂᕐᒥ ᐱᓕᕆᐊᒃᓴᐅᔪᒧᑦ
ᑲᓇᑕᒥ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᑮᓇᐅᔭᒃᑯᕕᖓ $20-ᒥᓕᐊᓐᓂ ᐊᑐᖅᑐᐊᖅᑎᑕᖓᑦ ᕿᑎᕐᒥᐅᑦ ᑎᒥᖁᑎᖓᓄᑦ ᐊᒻᒪ ᑐᒡᓕᒃ ᐆᒻᒪᖅᑯᑎᓕᕆᔨᒃᑯᓐᓄᑦ ᐃᑲᔪᕐᓂᐊᖅᐳᖅ ᐊᑭᓖᓂᕐᒧᑦ ᐊᓄᕆᒨᖅᑐᒥ ᐊᒻᒪ ᕚᑕᓖᖓᓂ ᑐᖅᑯᐃᕝᕕᐅᓂᐊᖅᑐᒧᑦ ᐊᒡᓂᑯ ᐄᒍᓪ ᐅᔭᕋᖕᓂᐊᕐᕕᒃ ᓕᑎᒥᑦᑯᑦ ᑲᑉᐱᕼᐃᓕᖅᑑᖅ ᐃᓂᒋᔭᖓᓂ, 125 ᑭᓛᒥᑐᓂ ᓂᒋᖅᐸᓯᐊᓂ ᐃᖃᓗᒃᑑᑦᑎᐊᕐᒥ. (ᐊᒡᓂᑯ ᐄᒍᓪ ᐅᔭᕋᖕᓂᐊᕐᕕᒃ ᓕᑎᒥᑦ ᐊᔾᔨᖁᑎᖓ)
For the English version of this story, please see Kitikmeot Inuit Association, Tugliq Energy to receive $20M loan for wind project.
ᑲᓇᑕᒥ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᑮᓇᐅᔭᒃᑯᕕᖓ ᐊᑐᖅᑐᐊᖅᑎᑦᑎᕗᖅ $20 ᒥᓕᐊᓐᓂ ᒪᓐᑐᕆᐋᓪᒧᑦ-ᑐᙵᕕᓕᖕᒥ ᑲᒻᐸᓂᐅᔪᒥ ᐊᒻᒪ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦᑕ ᓇᖕᒥᓂᕆᔭᐅᔪᒧᑦ ᐱᕙᓪᓕᐊᑎᑦᑎᓂᕐᒧᑦ ᐃᓚᖓ ᐊᓄᕆᒨᖅᑐᒧᑦ ᐆᒻᒪᖅᑯᑎᓕᕆᕝᕕᖕᒥ ᐱᓕᕆᐊᒃᓴᐅᔪᒧᑦ ᐊᒡᓂᑯ ᐄᒍᓪ ᐅᔭᕋᖕᓂᐊᕐᕕᒃ ᓕᑎᒥᑦᑯᑦ ᑲᑉᐱᕼᐃᓕᖅᑑᖅ ᒎᓗᒧᑦ ᐅᔭᕋᖕᓂᐊᕐᕕᖓᓄᑦ ᐃᓂᒋᔭᖓᓂ ᖃᓂᒋᔮᓂ.
ᑮᓇᐅᔭᒃᑯᕕᒃ ᐅᖃᐅᓯᖃᓚᐅᖅᐳᖅ ᐊᑐᖅᑐᐊᕐᓂᐅᔪᒥ ᓯᑎᐱᕆ 9−ᒥ ᑐᓴᒐᒃᓴᓕᐊᖑᔪᒥ.
ᓯᕗᓪᓕᖅᐸᐅᔪᒥ ᐱᓕᕆᓂᐅᔪᒥ ᐱᓕᕆᐊᒃᓴᐅᔪᒥ ᑕᑯᓂᐊᖅᐳᖅ 4.2-ᒥᐊᒐᐅᐊᑦ ᐊᓄᕆᒨᖅᑐᒥ ᐸᐅᕋᐅᑎᒥ ᐊᒻᒪ 4-ᒥᐊᒐᐅᐊᑦ ᐆᒻᒪᖅᑯᑎᒧᑦ ᑐᖅᑯᖅᑕᐅᓂᐅᔪᒥ ᐱᓕᕆᔾᔪᓯᐅᔪᒥ ᐃᓕᔭᐅᔪᒥ ᓴᓂᓕᐊᓂ ᐅᔭᕋᖕᓂᐊᕐᕕᖓᓄᑦ, ᐃᓂᖃᖅᑐᒥ 125 ᑭᓛᒥᑐᐸᓗᖕᓂ ᓂᒋᖅᐸᓯᐊᓂ ᐃᖃᓗᒃᑑᑦᑎᐊᕐᒥ.
ᓂᕆᐅᒋᔭᐅᕗᖅ ᑐᓂᓯᓂᐊᕐᓂᖓᓂ 20 ᐳᓴᓐᑎᒥ ᑲᑉᐱᕼᐃᓕᖅᑑᑉ ᐆᒻᒪᖅᑯᑎᖏᓐᓂ ᐱᔭᕆᐊᓕᖏᓐᓂ ᐱᓕᕆᓂᐅᔪᓂ ᐊᓄᕌᕐᔪᐊᖅᑎᓪᓗᒍ ᐊᒻᒪ ᒥᒃᖠᒋᐊᖅᑎᑦᑎᓗᓂ ᐅᔭᕋᖕᓂᐊᕐᕕᐅᑉ ᐊᕐᕌᒍᑕᒫᒥ ᐅᖅᓱᐊᓗᑐᐃᓐᓇᕐᒧᑦ ᐊᑐᕐᓂᖏᓐᓂ 7 ᐳᓴᓐᑎᒧᑦ, ᐅᖃᐅᓯᐅᓪᓗᓂ ᐊᒡᓂᑯ ᐄᒍᓪᑯᓐᓂ.
“ᑕᑉᐹᓂ ᐊᓄᕆᖃᕐᔪᐊᖅᑐᐊᓗᒃ,” ᐅᖃᓚᐅᖅᐳᖅ ᐊᒡᓂᑯ ᐄᒍᓪ ᐊᖓᔪᖅᑳᑉ-ᑐᖏᓕᖓ ᑯᕆᒡᑕᕗ ᐋᑕᒻᔅ ᐅᖃᓘᑎᒃᑯᑦ ᐊᐱᖅᓱᖅᑕᐅᓂᐅᔪᒥ ᑎᑎᕋᕐᕕᖓᓂᑦ ᑐᕌᓐᑎᒥ. “ᐅᓇ ᖁᕕᐊᔾᔪᑎᒋᕐᔪᐊᖅᐸᕗᑦ ᐱᒋᐊᕐᓂᕐᒥᕐ ᐊᑕᐅᓯᕐᒥ ᐸᐅᕋᐅᑎᒥᒃ. ᐸᕐᓇᒃᐳᒍᑦ ᓴᓇᓂᕐᒥ ᑎᓴᒪᒃᑲᓐᓂᕐᓂ.”
ᓅᓐᓂᖅ ᐅᖅᓱᐊᓗᑐᐃᓐᓇᒥᒃ ᐊᓄᕆᒨᖅᑐᒥ ᐆᒻᒪᖅᑯᑎᓄᑦ ᑮᓇᐅᔭᓂ ᐊᑐᓗᐊᙱᑎᑦᑎᓂᖅᓴᐅᔾᔮᙱᒃᑲᓗᐊᖅᑎᓪᓗᒍ ᐅᔭᕋᖕᓂᐊᕐᕕᖕᒧᑦ ᓯᕗᓪᓕᕐᒥ, ᐋᑕᒻᔅ ᐅᖃᓚᐅᖅᐳᖅ ᐊᒡᓂᑯ ᐄᒍᓪ ᖁᕕᐊᓱᒃᐳᖅ ᐃᑲᔪᕐᓂᕐᒥ ᒥᒃᖠᒋᐊᖅᑎᑦᑎᓂᕐᒥ ᓄᓇᕘᑉ ᐊᑐᓕᒪᓂᖓᓂ ᐅᖅᓱᐊᓗᑐᐃᓐᓇᕐᒥᑦ.
“ᓲᕐᓗ ᓯᕗᓪᓕᖅᐹᒥᒃ ᐱᓕᕆᐊᕆᔭᐅᔪᑎᑐᑦ, ᓯᕗᓪᓕᖅᐹᖑᔪᒥ ᐊᓄᕆᒨᖅᑐᒥ ᐸᐅᕋᐅᑎᒥ, ᐊᒻᒪ ᐅᕙᑦᑎᓐᓂ ᑐᓂᓯᓪᓚᕆᖕᓂᐊᖅᑐᖅ ᐱᕕᒃᓴᖃᕐᓂᐅᔪᒥ ᑐᑭᓯᓪᓚᑦᑖᕐᓂᕐᒥ ᐱᔪᓐᓇᕐᓂᑦᑎᓐᓂ,” ᐅᖃᓚᐅᖅᐳᖅ.
ᐱᓕᕆᐊᒃᓴᐅᔪᖅ ᐊᓯᐊᓂ ᐱᕚᓪᓕᕈᑎᖃᕐᓂᐊᕆᕗᖅ, ᐅᖃᓚᐅᖅᐳᖅ ᕿᑎᕐᒥᐅᑦ ᑎᒥᖁᑎᖓ ᐊᐅᓚᑦᑎᔨᒻᒪᕆᒃ ᑕᐃᕕᑦ ᐅᒥᓪᒍᐃᑦᑐᖅ: ᐃᖅᑲᓇᐃᔮᒃᓴᓂ ᐱᕕᒃᓴᖃᕐᓂᐅᔪᓂ ᐃᓄᖕᓄᑦ.
“ᐅᒃᐱᕈᓱᒃᐳᒍᑦ ᐅᓇ ᐱᒋᐊᕐᓂᐅᓂᐊᕐᓂᖓᓂ ᐊᖏᓂᖅᓴᐅᔪᒥ ᑲᑎᖅᓱᖅᑕᐅᕙᓪᓕᐊᔪᓂ ᑮᓇᐅᔭᓂ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂ ᐊᒻᒪ ᑮᓇᐅᔾᔭᒃᓴᓂᕐᒧᑦ ᐊᒃᑐᐃᓂᐅᔪᓂ ᐃᓗᐊᓂ ᐊᕕᒃᑐᖅᓯᒪᓂᐅᔪᒥ ᐊᕐᕌᒍᒐᓴᓄᑦ ᑎᑭᑉᐸᓪᓕᐊᔪᓄᑦ,” ᐅᒥᓪᒍᐃᑦᑐᖅ ᑎᑎᕋᓚᐅᖅᐳᖅ ᑐᓴᒐᒃᓴᓕᐊᖑᔪᒥ ᑲᓇᑕᒥ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᑮᓇᐅᔭᒃᑯᕕᖓᓐᓂ
ᕼᐃᓗᕆ ᑖᑦᓱᕐ, ᑮᓇᐅᔭᒃᑯᕕᐅᑉ ᐃᓱᒻᒥᖅᑐᐃᔨᖏᓐᓄᑦ ᐊᖓᔪᖅᑳᑉ-ᑐᖏᓕᖓ ᓄᓇᖃᖅᑳᖅᓯᒪᔪᓄᑦ ᐊᒻᒪ ᐅᑭᐅᖅᑕᖅᑐᒥ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᑲᑎᖅᓱᖅᑕᐅᕙᓪᓕᐊᔪᓂ ᑮᓇᐅᔭᓂ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂ, ᐅᖃᓚᐅᖅᐳᖅ ᑲᑐᔾᔨᖃᑎᒌᖓ ᒐᕙᒪᑐᖃᒃᑯᑦ ᑎᒥᐅᕗᖅ ᑕᐅᑐᒃᑕᑐᐊᖃᑲᐃᓐᓇᖅᑐᒥ ᐊᒃᑐᐃᓂᐅᔪᓂ, ᓲᕐᓗ ᒥᒃᖠᒋᐊᖅᑎᑦᑎᓂᕐᒥ ᓯᓚᕐᔪᐊᑉ ᐅᔅᓯᒃᓯᕙᓪᓕᐊᔾᔪᑎᖏᓐᓂ ᐃᓯᐊᖅᑭᔪᓂ ᐊᒻᒪ ᑮᓇᐅᔾᔭᒃᓴᓂᕐᒧᑦ ᐃᓚᐅᖃᑕᐅᓂᕐᒥ ᐃᓄᖕᓂ, ᖃᑭᓇᓱᐊᕐᓂᐅᙱᑦᑐᒧᑦ.
“ᓴᖑᓴᕋᐃᓐᓂᖅᓴᐅᕗᒍᑦ ᐊᑭᓕᖅᓱᐃᑎᑦᑎᓂᑦᑎᓐᓂ,” ᐅᖃᓚᐅᖅᐳᖅ. “ᑮᓇᐅᔭᑦ ᐅᑎᖅᑎᑕᐅᔭᕆᐊᖃᖅᐳᑦ, ᑭᓯᐊᓂ ᐅᕙᓃᙱᓚᒍᑦ ᑮᓇᐅᔭᓕᐅᕐᕌᓗᒐᓱᙱᓐᓂᕐᒧᑦ.”
“ᐊᓄᕆᖃᑦᑎᐊᕈᕕᑦ, ᐊᒻᒪ ᓴᖅᑭᑎᑦᑎᒍᓂ ᐆᒻᒪᖅᑯᑎᕐᔪᐊᓂ, ᐊᑭᓕᖅᑕᐅᔪᓐᓇᖅᐳᒍᑦ ᕿᓚᒻᒥᐅᓂᖅᓴᐅᔪᒥ, ᑕᐃᒫᒃ ᓴᖑᓴᕋᐃᓐᓂᖃᕐᔪᐊᖅᐳᒍᑦ ᐊᒻᒪ ᓵᙵᔭᐅᔾᔪᑎᖃᖅᑎᑦᑎᕙᙱᓚᒍᑦ ᓂᐅᕕᖅᐸᒃᑐᓂ, ᓵᙵᔭᐅᔾᔪᑎᖃᖅᑎᑦᑎᕙᙱᓚᒍᑦ ᐊᑐᖅᑐᐊᖅᑎᑕᑦᑎᓐᓂ ᑖᔅᓱᒥᖓ ᐱᔾᔪᑎᓕᖕᒥ.”
ᑲᑉᐱᕼᐃᓕᖅᑑᖅ ᐅᔭᕋᖕᓂᐊᕐᕕᖓ ᐊᑕᐅᓯᐅᕗᖅ ᐊᒡᓂᑯ ᐄᒍᓪᑯᑦ ᐱᖓᓱᓂ ᒎᓗᒧᑦ ᐅᔭᕋᖕᓂᐊᕐᕕᖏᓐᓂ ᓄᓇᕗᒻᒥ. ᐊᐃᑉᐸᖏᑦ ᒪᕐᕉᒃ ᐊᐳᖅᑎᓈᖅᑐᖅ ᕐᕕᒃ, ᐃᓂᖃᖅᑐᖅ ᖃᒪᓂᑦᑐᐊᑉ ᖃᓂᒋᔭᖓᓂ ᐊᒻᒪ ᐃᖃᓗᒑᕐᔪᒃ ᕐᕕᒃ, ᐃᓂᖃᖅᑐᖅ ᑲᖏᖅᖠᓂᐅᑉ ᖃᓂᒋᔭᖓᓂ.
ᐸᐅᕋᐅᑎ ᑐᓂᔭᐅᓵᓚᐅᖅᐳᖅ ᑲᑉᐱᕼᐃᓕᖅᑑᖅ ᐃᓂᒋᔭᖓᓄᑦ ᐊᒻᒪ ᐱᒋᐊᖅᑐᒃᓴᐅᑕᐅᕗᖅ ᐆᒻᒪᖅᑯᓯᐅᓕᕐᓂᐊᕐᓂᖓᓂ ᐊᕐᕌᓂᐅᓂᐊᖅᑐᒥ.
(0) Comments