ᐃᒡᓗᓕᐅᕐᕕᒃ ᐱᒋᐊᕐᐳᖅ ᐊᕐᕕᐊᓂᑦ
ᐅᓇ $75-ᒥᓕᐊᓐ, ᐊᖏᓂᖃᖅᖢᓂ 64,500 ᑭᑉᐹᕿᒃᑎᓯᒪᔪᓂ ᕘᑦ ᐱᓕᕆᕝᕕᒃᓴᖅ ᐱᓕᕆᐊᖃᕐᓂᖅᓴᐅᑎᑦᑎᓂᐊᕐᑐᖅ ᒪᐅᖓ 100 ᐳᓴᓐᑎᓂ ᑕᖅᑭᑦ 18
ᐃᓄᖕᓄᑦ ᓇᖕᒥᓂᕆᔭᐅᔪᖅ ᓴᒃᑯ ᖃᓄᐃᓕᐅᕈᑎᖏᓐᓄᑦ ᐃᒡᓗᒃᓴᓕᐅᕐᓂᖅ ᐊᕐᕕᐊᓂ ᐱᓕᕆᖃᑎᒌᖕᓂᒃᑰᖓᔪᖅ ᐅᑯᓄᖓ ᓴᒃᑯ ᐃᑲᔫᑎᓕᕆᔨᓄᑦ ᐊᒻᒪ ᑯᐸᐃᒃᒥ ᐃᒡᓗᓕᐅᖅᑎᓄᑦ RG Solution. (ᐊᔾᔨᙳᐊᖅ ᐅᑯᓇᙵᑦ ᑕᓃᔅ ᑯᓱᒐᖅ/ᓴᒃᑯ ᐃᑲᔫᑎᓕᕆᔨᓄᑦ ᑯᐊᐳᕇᓴᓐᑯᓐᓂᑦ)
For the English version of this story, please see Modular home factory begins production in Arviat.
ᒪᑐᐃᖅᑕᐅᓂᖓᓄᑦ ᖁᕕᐊᓲᑎᖃᖅᖢᑎᒃ ᑭᐱᓯᓪᓗᑎᒃ ᒪᑐᐊᕈᑎᖓᓂ ᐅᓇ ᐃᒡᓗᓕᐅᕐᕕᒃᓴᖅ ᒪᑐᐃᖅᑕᐅᓪᓚᕆᓚᐅᕐᑐᖅ ᓯᑎᐱᕆ 29-ᖑᑎᓪᓗᒍ.
ᐅᓇ $75-ᒥᓕᐊᓐᑖᓚᑐᕐᑐᖅ, ᐊᖏᓂᖃᖅᖢᓂ 64,500-ᑭᑉᐹᕆᒃᑎᓯᒪᔪᓂ ᕘᑦᓂ ᐱᓕᕆᕝᕕᒃᓴᖅ ᐱᒋᐊᕈᑎᐅᓚᐅᕐᑐᖅ 60 ᐳᓴᓐᑎᒥ ᐱᒋᐊᕈᑎᖃᖅᖢᑎᒃ ᓯᑎᐱᕆ 23-ᖑᑎᓪᓗᒍ, ᐅᖃᓚᐅᕐᑐᖅ ᓴᒃᑯᒃᑯᑦ ᐊᐅᓚᑦᑎᓂᕐᒧᑦ ᑐᑭᒧᐊᖅᑎᑦᑎᔨᖓ ᔭᐃᓴᓐ ᒋᐸᓐᔅ ᐊᐱᕐᓱᖅᑕᐅᑎᓪᓗᒍ. ᑕᖅᑭᑦ 18 ᐃᓗᐊᒍᑦ ᐅᓇ ᐃᒡᓗᓕᐅᕐᕕᒃ ᐱᓕᕆᐊᖏᓐᓂᑦ ᑕᒪᒃᑮᓕᖅᑎᑦᑎᓂᐊᕐᑐᖅ ᓴᓇᕙᒡᓗᑎᒃ 40-ᓂ ᐃᓚᒌᓄᑦ ᐊᒻᒪ ᑲᑎᕐᖓᐅᖅᑐᓄᑦ ᐃᒡᓗᓂ ᐊᕐᕌᒍᒥ.
ᐃᓄᖕᓄᑦ ᓇᖕᒥᓂᕆᔭᐅᔪᖅ ᐃᒡᓗᓕᐅᕐᕕᒃ ᐊᕐᕕᐊᓂᒃ ᐊᐅᓚᑕᐅᔪᖅ ᐅᕘᓇ ᓴᒃᑯ ᖃᓄᐃᓕᐅᕈᑎᖏᓐᓄᑦ ᐃᒡᓗᓕᐅᕈᑎᓄᑦ, ᐱᓕᕆᖃᑎᖃᕐᓂᒃᑯᑦ ᐅᑯᓄᖓ ᓴᒃᑯ ᐃᑲᔫᑎᓕᕆᔨᓄᑦ ᐊᒻᒪ ᑯᐸᐃᒃᒥ ᐃᒡᓗᓕᐅᖅᑎᓄᑦ (ᐊᔾᔨᙳᐊᖅ ᐅᑯᓇᙵᑦ ᑕᓃᔅ ᑯᓱᒐᖅ/ᓴᒃᑯ ᐃᑲᔫᑎᓕᕆᔨᓄᑦ ᑯᐊᐳᕇᓴᓐᑯᓐᓂᑦ)
ᐃᒡᓗᓕᐅᕐᕕᒃ ᐃᖅᑲᓇᐃᔭᖅᑎᖃᕐᑐᖅ 15-ᓂ, 14 ᐃᓅᓪᓗᑎᒃ ᐅᖃᕐᑐᖅ ᑭᐅᕈᓕᓐ ᓅᑦ, ᐊᐅᓚᑦᑎᔨ ᐊᖓᔪᖅᑳᖅ ᐅᑯᓄᖓ ᓴᒃᑯ ᖃᓄᐃᓕᐅᕈᑎᖏᓐᓄᑦ ᐃᒡᓗᓕᐅᕈᑎᒃᑯᑦ, ᐱᓕᕆᐊᕆᔭᐅᔪᖅ ᐅᑯᓄᖓ ᓴᒃᑯ ᐃᑲᔫᑎᓕᕆᔨᓄᑦ ᐊᒻᒪ ᑯᐸᒃᒥᑦ ᐃᒡᓗᓕᐅᖅᑎᓄᑦ RG Solution-ᑯᓐᓄᑦ, ᐊᐅᓚᑕᐅᓪᓗᓂ ᐃᓄᖕᓄᑦ ᓇᖕᒥᓂᕆᔭᐅᔪᒧᑦ ᐱᓕᕆᕝᕕᒃᒥ. ᑖᒃᑯᓇᙵᑦ ᖁᓕᑦ ᐱᓕᕆᐊᖃᖅᐸᒃᑐᑦ ᐃᒡᓗᓕᐅᕐᕕᒃᒥ ᐊᐅᓚᑦᑎᓂᒃᑰᖓᙱᖢᑎᒃ.
“ᐊᑕᐅᓯᑐᐊᕐᒥ ᐃᓅᙱᑦᑐᒥ ᐃᖅᑲᓇᐃᔭᖅᑎᖃᕐᑐᑦ, ᐅᕙᓐᓂ,” ᓅᑦ ᐅᖃᕐᑐᖅ ᐊᐱᕐᓱᖅᑕᐅᑎᓪᓗᒍ.
2028 ᐊᕐᕌᒍ ᑎᑭᑉᐸᑦ ᐃᖅᑲᓇᐃᔭᖅᑐᑦ 40-ᐅᓕᕐᓂᐊᖅᑐᑦ ᐃᓚᖃᕐᓗᑎᒃ ᐃᖅᑲᓇᐃᔮᖃᓪᓚᕆᒃᐸᒃᑐᓂᑦ, ᕿᔪᓕᕆᔨᓂᒃ, ᓱᓪᓗᓕᕆᔨᓂᒃ ᐊᒻᒪ ᐅᐊᔭᓕᕆᔨᓂᒃ, ᒋᐸᓐᔅ ᐅᖃᕐᒥᔪᖅ.
ᐱᔪᓐᓇᐅᑎᖃᓕᖅᑎᑦᑎᓂᖅ ᒪᑯᓂᖓ ᕿᔪᓕᕆᔨᓂ ᐊᒻᒪ ᐱᓕᕆᐊᖃᓪᓚᕆᒃᑐᓂᒃ ᐅᓇ ᑲᒻᐸᓂᐅᔪᖅ ᐃᒡᓗᓕᐅᕐᓂᕐᒥ ᐊᔪᕈᓐᓃᖅᓴᖅᑎᑦᑎᓂᐊᖅᑐᑦ ᐊᒻᒪ ᐱᓕᕆᖃᑎᖃᕐᓗᑎᒃ ᓄᓇᕗᒥᑦ ᓯᓚᑦᑐᖅᓴᕐᕕᒃᒥ ᓇᓗᓇᐃᒃᑯᑎᑖᖅᑎᑕᐅᓇᓱᒡᓗᑎᒃ ᓴᓇᔨᐅᔪᑦ, ᓅᑦ ᐅᖃᕐᑐᖅ.
ᓴᒃᑯᑯᑦ ᐃᓱᒪᔪᑦ ᐃᖅᑲᓇᐃᔮᒃᓴᓂ ᑕᒪᐅᖔᕐᓯᒪᙱᑦᑐᓂ ᓴᖅᑭᑎᑦᑎᓂᐊᕋᓱᒋᓪᓗᑎᒃ ᒪᐅᓇ ᐃᖏᕐᕋᔾᔪᑎᓕᕆᓂᒃᑯᑦ, ᐋᖄᖅᑭᒃᓱᐃᕙᓪᓕᐊᓂᒃᑯᑦ ᐊᒻᒪ ᐱᐊᓂᒃᑕᐅᑎᑦᑎᔾᔪᑎᒃᑯᑦ.
ᒫᓂ ᐊᑕᐅᓯᖅ ᐱᖓᓲᓕᖓᓪᓗᒍ ᐱᓕᕆᕝᕕᒃ, ᑖᓐᓇᓗ ᓴᓇᔭᐅᓕᓚᐅᕐᓯᒪᔪᖅ 2023-ᒥ ᐊᐅᓚᔾᔪᑎᖃᖅᖢᓂ ᒫᓂᒃ $50 ᒥᓕᐊᓐ ᑖᓚᓂ ᐅᖅᑰᑕᐅᑎᖃᑦᑎᐊᑦᑐᑦ ᓯᕐᓗᐊᖅ. ᓂᒡᓕᓇᖅᑐᓂᒃ ᐃᓂᖃᕐᕕᐅᓂᐊᖅᑐᖅ ᓯᕐᓗᐊᖅ ᓴᓂᑦᑎᐊᖓᓃᓐᓂᐊᖅᑐᖅ ᐱᐊᓂᒃᑕᐅᓂᐊᕋᓱᒋᔭᐅᔪᖅ ᓄᕕᐱᕆᐅᓕᕐᐸᑦ. ᐃᓂᖃᕐᕕᐅᑎᑕᐅᓂᐊᖅᖢᓂ ᐊᕐᕌᒍᒧᑦ ᐊᑐᖅᑕᐅᓂᐊᖅᑐᓂᒃ ᐃᒡᓗᒃᓴᕆᔭᐅᓂᐊᖅᑐᓂᒃ.
ᐅᓇ 6-ᓄᑦ ᐃᓚᒌᓄᑦ ᑲᖏᖅᖠᓂᖅᒥ ᓴᓇᔭᐅᓚᐅᕐᓯᒪᔪᖅ ᐱᓕᕆᐊᕆᔭᐅᓪᓗᓂ ᐅᑯᓄᖓ ᓴᒃᑯ ᖃᓄᐃᓕᐅᕈᑎᖏᓐᓄᑦ ᐃᒡᓗᓕᐅᕈᑎᒃᑯᑦ, ᐱᓕᕆᖃᑎᒌᖕᓂᒃᑰᖓᔪᖅ ᐅᑯᓄᖓ ᓴᒃᑯ ᐃᑲᔫᑎᓕᕆᔨᓄᑦ ᐊᒻᒪ ᑯᐸᐃᒃᒥ ᐃᒡᓗᓕᐅᖅᑎᓄᑦ RG Solution. (ᐊᔾᔨᙳᐊᖅ ᐅᑯᓇᙵᑦ ᑕᓃᔅ ᑯᓱᒐᖅ/ᓴᒃᑯ ᐃᑲᔫᑎᓕᕆᔨᓄᑦ ᑯᐊᐳᕇᓴᓐᑯᓐᓂᑦ)
ᓴᒃᑯ ᐃᑲᔫᑎᒃᓴᓕᕆᔨᒃᑯᑦ ᑮᓇᐅᔭᖃᖅᑎᑦᑎᓯᒪᔪᑦ ᐃᒡᓗᓕᐅᕐᕕᒃᒥ ᐊᑐᖅᖢᑎᒃ ᐃᓄᖕᓅᖓᔪᓄᑦ ᐱᖁᑎᓄᑦ ᐊᒻᒪ ᐱᓕᕆᖃᑎᒌᖕᓂᒃᑯᑦ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ, ᑲᓇᑕᒥ ᐅᑭᐅᕐᑕᖅᑐᕐᒥ ᐱᕙᓪᓕᐊᔪᓕᕆᔨᒃᑯᓐᓂ, ᐃᓛᒌᓄᑦ ᐱᕙᓪᓕᐊᔪᓕᕆᔨᓄᑦ, ᑲᓇᑕᒥ ᐃᒡᓗᓕᕆᔨᕐᔪᐊᓄᑦ, ᑲᓇᑕᒥ ᖃᐅᔨᓴᖅᑐᓕᕆᔨᒃᑯᑦ ᑲᑎᒪᔨᖏᓐᓄᑦ ᑲᓇᑕᒥ ᐊᒻᒪ ᓄᓇᕗᒥᑦ ᒐᕙᒪᒃᑯᓐᓄᑦ.
ᐃᒡᓗᓕᐅᕐᕕᐅᔪᖅ ᓴᖅᑭᑎᑦᑎᕙᓪᓕᐊᓚᐅᕐᑐᖅ ᐃᓚᒋᔭᐅᓂᐊᖅᑐᓂ ᑕᖅᑭᐅᓵᖅᑐᒥ 9-ᓂ ᐱᖓᓱᓂ ᐃᒡᓗᕈᓯᖃᖅᑐᓂ ᐃᒡᓗᒃᓴᓂᒃ, ᑖᒃᑯᐊᓗ ᐋᖅᑭᒃᑕᐅᓯᒪᓪᓗᑎᒃ ᓄᓇᓕᖕᓄᑦ ᐃᓕᐅᖃᖅᑕᐅᓂᐊᕐᓗᑎᒃ ᐅᐱᕐᖔᙳᖅᐸᑦ, ᓅᑦ ᐅᖃᕐᑐᖅ. ᑲᒻᐸᓂᒃᑯᑦ ᐸᕐᓇᒃᐸᓪᓕᐊᔪᑦ ᒪᕐᕈᐃᓂ 12-ᓂ ᑲᑎᕐᖓᐅᖅᑐᓂᒃ ᐃᒡᓗᓕᐅᕐᓂᐊᕐᓗᑎᒃ ᑲᖏᖅᖠᓂᖅᒥᓐ.
ᓯᕗᓂᐊᒍᑦ ᐃᒡᓗᓕᐅᕐᑕᐅᔪᑦ ᐱᐊᓂᒃᑕᐅᓚᐅᖅᑎᓐᓇᒋᑦ ᑯᐸᐃᒃᒥ ᐃᒡᓗᓕᐅᕐᕕᒃᓴᓂᑦ, ᑲᒻᐸᓂᒃᑯᑦ ᐋᖅᑭᒃᓯᓚᐅᕐᑐᑦ ᒪᕐᕈᐃᓂ ᑕᓪᓕᒪᐅᓕᖓᔪᓂᒃ ᐃᒡᓗᒃᓴᓂᒃ ᐊᕐᕕᐊᓂᑦ, ᒪᕐᕈᐃᓄᑦ ᐃᓚᒌᓄᑦ ᐃᒡᓗᒃᓴᓂ ᓴᓪᓕᓂᑦ ᐊᒻᒪ ᑎᓴᒪᓂᒃ ᖁᓕᕇᓕᖕᓂ ᐃᒡᓗᒃᓴᓂᒃ, 6-ᓄᑦ ᐃᓚᒌᓄᑦ ᐃᒡᓗᒃᓴᒥᑦ ᐊᒻᒪᓗ ᒪᕐᕈᐃᓕᖓᔪᒥᑦ ᑲᖏᖅᖠᓂᖅᒥᓐ.
ᐃᒡᓗᐃᑦ ᐋᖅᑭᒃᑕᐅᓯᒪᔪᑦ ᐅᑭᐅᕐᑕᖅᑐᕐᒥ ᐃᓅᓯᕐᒧᑦ, ᐃᒻᒥᒃᑳᖓᔪᓂᒃ ᐃᓯᕐᕕᖃᐅᖅᖢᑎᒃ ᐃᓚᒌᓅᖓᔪᓄᑦ ᐃᒡᓗᓂ ᐊᒻᒪᓗ ᑐᕐᓲᖃᖅᖢᑎᒃ ᓯᕗᓂᐊᓂ ᐊᒻᒪ ᑐᓄᖏᓐᓂ ᐊᑕᐅᓯᐅᓈᕐᓯᒪᔪᓂᒃ ᐃᒡᓗᒃᓴᓂᒃ, ᓅᑦ ᐅᖃᕐᑐᖅ.
ᐊᓂᐊᕐᕕᖃᑦᑎᐊᖕᓂᖏᓐᓄᑦ ᐅᖁᔭᔾᔮᖏᑦᑐᑦ ᐊᒻᒪ ᖃᓄᐃᓕᒍᑎᖃᙱᓐᓂᕐᓴᐅᓗᑎᒃ, ᐅᖃᕐᑐᖅ.
ᒪᑐᐃᖅᑕᐅᑎᓪᓗᒍ ᖁᕕᐊᓲᑎᖃᕐᓂᖅ ᐅᐸᒃᑕᐅᓚᐅᕐᑐᖅ ᐅᑯᓇᙵᑦ ᑭᕙᓪᓕᖅᒥᑦ ᐃᓄᐃᑦ ᑲᑐᔾᔨᖃᑎᒌᑦ ᐊᖓᔪᖅᑳᖓᓄ ᑯᓄ ᑕᑦᑎᐃᓂᕐᒧᑦ, ᓄᓇᕗᒥᑦ ᑐᙵᕕᒃᑯᑦ ᐊᖓᔪᖅᑳᖓᓄᑦ ᒍᓘᕆᐊ ᐅᓗᕐᓯᒧᑦ, ᔮᓐ ᒪᐃᓐᒧᑦ ᐊᒻᒪ ᒪᓕᒐᓕᐅᖅᑎ ᓘᕆ ᐃᓪᓚᐅᕐᒧᑦ.
(0) Comments