ᓄᓇᕗᒥᑦ ᕕᐊᓕᐅᖅᕕᒃ ᓄᖅᑲᖅᑐᑦ ᐃᒥᐊᓗᓕᐅᕐᓂᕐᒥᑦ. ᐱᒃᑲᖅᑎᑦᑎᓪᓗᑎᒃ ᐱᖁᔭᐃᑦ ᐊᓯᔾᔨᖅᑕᐅᓂᖏᓐᓄᑦ
ᓄᓇᕗᒥᑦ ᒐᕙᒪᒃᑯᓐᓄᑦ ᕕᐊᒧᑦ ᐊᑭᓕᐅᑎᒋᑎᑕᐅᔪᖅ ᐃᒥᐊᓘᑉ ᓴᙱᓂᖓᒍᑦ ᒪᑯᓂᖓ ᓴᙱᓂᕐᓴᓂ ᕕᐊᓂ ᐊᑭᑦᑐᕆᐊᒃᑲᓐᓂᕈᑎᐅᕗᖅ
ᔪᐊᑕᓐ ᑲᓇᑎ, ᐊᖓᔪᖅᑳᕆᔭᐅᑲᐃᓐᓇᕐᑐᖅ ᐅᑯᓄᖓ ᓄᓇᕗᒥᑦ ᕕᐊᓕᐅᖅᑏᑦ ᓴᓂᑦᑎᐊᖓᓃᑦᑐᖅ ᕕᐊᒥ ᐃᒻᒥᖅᐸᓪᓕᐊᔾᔪᑎᐅᑉ, ᑖᓐᓇᓕ ᓄᖅᑲᖅᑕᐅᓂᑯ ᐊᐅᓚᑕᐅᓂᖓ ᐋᒐᓯᐅᑎᓪᓗᒍ. ᓄᑖᑦ ᐊᑭᓕᐅᑎᐅᓕᖅᑎᑕᐅᔪᖅ ᓈᒻᒪᙱᓗᐊᓚᐅᕐᒪᓐ ᐱᓕᕆᐊᖃᖅᐸᓪᓕᐊᓂᕐᒧᑦ, ᑲᓇᑎ ᐅᖃᕐᑐᖅ. (ᐊᔾᔨᓕᐅᕆᔨ ᑎᐅᕋᓐ ᓚᑦᔅ)
For the English version of this story, please see NuBrew stops canning, blames regulatory changes.
ᓄᓇᕗᒥᑦ ᕕᐊᓕᐅᖅᑏᑦ, ᐊᑕᐅᓯᑐᐊᖅ ᓄᓇᓕᖕᓂ ᕕᐊᓕᐅᖅᕕᒃ, ᓄᖅᑲᓚᐅᕐᒪᑦ ᕕᐊᓕᐅᕐᓂᕐᒥᒃ ᐅᑯᐊ ᓄᓇᕗᒥᑦ ᐃᒥᐊᓗᒃᒧᑦ ᑲᒥᓴᓐᑯᑦ ᐊᓯᔾᔩᑎᓪᓗᒋ ᖃᓄᖅ ᐃᒥᐊᓗᒃ ᐊᑭᓕᐅᑎᒃᓴᓕᐅᖅᑕᐅᖃᑦᑕᕐᓂᐊᕐᓂᖓᓂᒃ.
ᐊᑭᑦᑐᕆᐊᕐᓂᐅᔪᖅ ᒪᑯᓄᖓ ᓄᓇᕗᒥᑦ ᐃᒥᐊᓗᒃᒧᑦ ᐊᒻᒪ ᓱᐴᕐᑐᒐᓕᕆᓂᕐᒧᑦ ᐅᑯᓇᙵᑦ ᑲᒥᓴᓐᑯᓐᓂ ᐅᑯᓄᖓ ᓄᓇᕗᒥᑦ ᕕᐊᓕᐅᖅᑎᒃᑯᓐᓄ 76 ᐳᓴᓐᑎᒥ ᐊᑭᑭᓐᓂᕐᓴᐅᕙᓚᐅᕐᓯᒪᔪᖅ ᒪᑯᓇᙵᓪᓕ ᕕᐊᓂ ᓄᓇᕗᒧᑦ ᑎᑭᑎᑕᐅᕙᒃᑐᓂᒃ. ᐱᒋᐊᖅᖢᓂ ᔫᓂ 1 ᑖᓐᓇ ᐊᔾᔨᒋᙱᔾᔪᑎᒋᔭᐅᔪᖅ ᒥᒃᖠᕚᓕᕈᑎᐅᓚᐅᕐᑐᖅ 40 ᐳᓴᓐᑎᒥ.
“ᐊᔾᓕᒋᙱᔾᔪᑎᒋᔭᖓᓕ ᐊᑭᑦᑐᕆᐊᕈᑎᒋᔭᕗᑦ ᐊᒻᒪ ᐅᑯᐊ ᐊᖏᔪᑦ ᕕᐊᓕᐅᕐᕕᐅᕙᒃᑐᑦ ᐅᑯᑎᑐᓇᖅ ᐋᓐᕼᐊᐅᓱ-ᐳᔅ ᒥᒃᖠᕚᓪᓕᓚᐅᕐᒪᓐ,” ᐅᖃᕐᑐᖅ ᔪᐊᑕᓐ ᑲᓇᑎ, ᐊᖓᔪᖅᑳᕆᔭᐅᑲᐃᓐᓇᕐᑐᖅ ᐅᑯᓄᖓ ᓄᓇᕗᒥᑦ ᕕᐊᓕᐅᖅᑎᒃᑯᓐᓄᑦ.
“ᐅᑯᐊ ᐊᖏᔪᑦ ᕕᐊᓕᐅᕐᕖᑦ ᓄᓇᕗᒥᑦ ᑐᓂᓯᕙᙱᑦᑎᐊᕐᑐᑦ. ᐊᑭᓕᕐᓱᐃᕙᙱᖢᑎᒃ ᐃᖅᑲᓇᐃᔭᖅᑎᓄᑦ ᐊᑭᓕᐅᑎᓂᒃ ᑖᒃᓰᔭᕈᑎᓂᒃ. ᐊᑭᓕᕐᓱᐃᕙᙱᖢᑎᒃ ᓄᓇᒥ ᐱᓕᕆᕝᕕᒋᔭᐅᔪᒥᒃ. ᐃᓄᖕᓂᓪᓗ ᐃᖅᑲᓇᐃᔭᖅᑎᑦᑎᕙᙱᖢᑎᒃ. ᓄᓇᓕᖕᓂ ᑮᓇᐅᔭᑎᒍᑦ ᐃᑲᔪᖃᑦᑕᙱᑦᑐᑦ ᐅᕙᑦᑎᑐᑦ.”
ᑲᓇᑎ ᐅᖃᓚᐅᕐᑐᖅ ᖃᐅᔨᓕᓚᐅᕐᓂᖓᓂ ᐊᑭᒋᑎᑕᐅᔪᑦ ᐅᓄᕐᓯᕚ9ᓕᕐᓂᐊᕐᓂᖏᓐᓂᒃ ᐱᔨᑦᑎᕋᖅᑕᐅᔪᓂᒃ ᓇᒻᒪᒃᓴᙱᑦᑐᖃᖅᑎᓪᓗᒍ ᒫᓂ $120-ᓂ ᐊᑭᑦᑐᕆᐊᕐᓂᖏᓐᓂᒃ ᖃᑦᑕᐅᔭᕆᔭᐅᕙᒃᑐᑦ ᓂᐅᕕᕐᑕᐅᔪᑦ ᐅᕘᓇ ᐃᖃᓗᖕᓂ ᕕᐊᒥ ᐊᒻᒪ ᕗᐊᐃᓂᒥ ᓂᐅᕕᕐᕕᖕᓂ ᔪᓚᐃ ᐃᓱᓕᓕᕐᑎᓪᓗᒍ.
ᑲᓇᑎ ᐅᖃᓚᐅᕐᑐᖅ ᑲᒥᓴᓐᑯᓐᓄᑦ ᐅᖃᖃᑎᖃᓕᕋᒥ ᐊᐅᔭᖅ ᐃᓱᓕᑎᓪᓗᒍ, ᑭᐅᔭᐅᓚᐅᕐᓯᒪᔪᖅ ᐃᓱᒪᓕᐅᕆᔭᐅᓇᓱᒃᖢᓂ ᕕᐊᓕᐅᕐᒥᒃ ᕕᐊᓕᐅᖅᑕᖏᑦᑕ ᓴᙱᓂᖏᑦ ᒥᒃᖠᒋᐊᖅᑕᐅᓗᐊᕐᓂᖏᓐᓂᒃ.
ᐅᓇ ᑕᐃᒪᓐᓇ ᐱᔾᔪᑎᖃᓗᐊᕐᑐᖅ ᐊᓯᔾᔨᕐᓯᒍᑎᒋᔭᐅᔪᖅ ᐃᓚᖓ ᐅᑯᓄᖓ ᓄᓇᕗᒥᑦ ᐃᒥᐊᓗᓕᕆᔨᒃᑯᓐᓄᑦ ᐊᒻᒪ ᓱᐴᕐᑐᒐᓕᕆᔨᒃᑯᓐᓄ ᑲᒥᓴᓐᑯᓐᓄᑦ ᐊᑭᓕᐅᑎᐅᖃᑦᑕᕋᔭᖅᑐᓂ ᐋᖅᑭᒃᑕᕕᓂᖓ ᐃᓚᖃᓚᐅᕐᒪᓐ ᐊᑭᓕᐅᑎᒋᔭᐅᔪᑦ ᒪᓕᒋᐊᖃᕐᓂᖏᓐᓂ ᐃᒥᐊᓘᑉ ᓴᙱᓂᖓᓄᑦ.
ᓯᕗᓂᐊᓂᓪᓕ ᐅᓇ ᐊᑭᑦᑐᕆᐊᕈᑎᐅᔪᖅ ᐋᖅᑭᒃᑕᐅᓯᒪᓚᐅᕐᒪᓐ ᐃᒪᖅᑯᖅᑐᓂᖓᒍᑦ. ᒫᓐᓇᓕ 355 ᒥᓕᓖᑕ ᐃᐳᐃᑦᑐᖅ ᕕᐊ 3..5 ᐳᓴᓐᑎᒥ ᓴᙱᓂᖃᕐᓗᓂ ᓲᕐᓗ ᒪᑯᑎᑐᓇᖅ ᑯᕉᓇ ᓚᐃᑦᑎᑐᑦ, ᐊᑭᑦᑐᕆᐊᕈᑎᖃᖅᑎᑕᐅᖕᒪᑕ $1.46. 6 ᐳᓴᓐᑎᒥ ᓴᙱᓂᓕᒃ ᐊᑭᓂᖓ ᐊᔾᔨᒋᓪᓗᓂᐊ ᐊᑭᑦᑐᕆᐊᖅᑕᐅᔾᔪᑎᖃᕐᒪᑕ $2.50-ᒥᑦ.
ᓄᓇᕗᒥᑦ ᕕᐊᓕᐅᖅᑏᑦ ᓴᓇᕙᒃᑕᖏᑦ ᐃᓚᖃᕐᑐᑦ ᒪᑯᓂᖓ ᓯᓈᖓ (Floe Edge) ᐊᒻᒪ ᐊᐅᐸᖅᑐᖅ ᕕᐊ (Aupaqtuq Red Ale), ᑖᒃᑯᐊᓗ 5 ᐳᓴᓐᑎᒥ ᓴᙱᓂᖃᖅᖢᑎ ᐃᒥᐊᓗᖓ ᐊᒻᒪᓗ ᐅᓇ ᕗᕉᑉ ᒎᓗ ᓴᙱᔪᖅ ᕕᐊ ᓴᙱᓂᖃᖅᖢᓂ 6.8 ᐳᓴᓐᑎᒥ ᐃᒥᐊᓗᓕᖕᒥᑦ.
ᑲᓇᑎ ᐅᖃᒃᑲᓐᓂᓚᐅᕐᑐᖅ ᓈᒻᒪᒃᓴᓗᐊᓚᐅᙱᓐᓂᖓᓂ ᕕᐊᓕᐅᖅᕕᒃ ᑐᓴᐅᒪᑎᑕᐅᓚᐅᙱᓐᓂᖓᓂ ᐅᐱᙶᖅ ᐅᕝᕙᓘᓐᓃᑦ ᐊᐅᔭᖅ, ᓯᕗᓂᐊᒍᑦ ᐅᒥᐊᕐᔪᐊᖃᕐᓇᓚᐅᖅᑎᓐᓇᒍ.
“ᖃᐅᔨᒪᓕᕐᓇᕐᒪᑦ ᖃᓄᐃᑦᑐᓂ ᑎᑭᑎᑦᑎᒐᔭᕆᐊᒃᓴᖅ ᒪᐅᖓ,” ᐅᖃᕐᑐᖅ. “ᑭᓯᐊᓂᓕ ᖃᐅᔨᑎᑕᐅᓯᑳᓪᓚᓚᐅᕋᑦᑕ ᐊᓯᔾᔨᖅᑕᐅᔪᕕᓂᕐᓂ.”
ᓗᐃᔅ ᒪᑲᐃ, ᑐᑭᒧᐊᖅᑎᑦᑎᔨ ᓄᓇᕗᒥᑦ ᐃᒥᐊᓗᒃᒧᑦ ᐊᒻᒪ ᓱᐴᕐᑐᒐᕐᓄᑦ ᑲᒥᓴᓐᑯᓐᓄᑦ, ᐅᖃᓚᐅᕐᑐᖅ ᑐᓴᖅᑎᑦᑎᕙᓗᐊᙱᓐᓂᖏᓐᓂ ᐱᖁᔭᑎᒍᑦ ᐋᖅᑭᒃᑕᐅᓂᐊᖅᑐᓂᒃ.
“ᑐᓴᖅᑎᑦᑎᓗᐊᕈᒪᔪᒍᓪᓗ ᐅᓇ ᓈᒻᒪᙱᓕᐅᕈᑎᓂ ᒥᒃᖠᕚᓕᕈᑎᐅᓇᓱᖕᓂᖓᓂᒃ,” ᒪᑲᐃ ᐅᖃᓚᐅᕐᑐᖅ ᖃᕋᓴᐅᔭᒃᑯᑦ ᑎᑎᕋᖅᖢᓂ. “ᐅᓇ ᓄᓇᕗᒥᑦᐅᓂᒃ ᓴᙲᓐᓂᕐᓴᓂ ᐃᒥᐊᓗᖃᕐᑐᓂ ᐃᒥᙱᓐᓂᕐᓴᐅᑎᑦᑎᓇᓱᖕᓂᕐᒥᒃ.”
ᒫᓐᓇᐅᔪᕐᓕ ᐅᑯᐊ ᐊᓯᔾᔨᖅᑕᐅᔪᑦ ᐃᓱᖃᖅᑎᑦᑎᖕᒪᑕ ᓄᓇᕗᒥᑦ ᕕᐊᓕᐅᕐᕕᒃᒥ ᐊᑭᒋᓂᐊᖅᑕᖏᓐᓂ ᐅᓄᕐᓯᕚᓪᓕᖅᑎᑦᑎᔾᔪᑎᖏᓐᓂ, ᑮᓇᐅᔭᓕᐅᙱᓐᓂᕐᓴᐅᑎᑕᐅᓕᖅᖢᑎᒃ. ᑕᐃᒪᓐᓇᓕ ᕕᐊᓕᖅᑎᒃᑯᑦ ᒪᓕᑐᐃᓐᓇᕐᓂᐊᕐᑐᑦ ᐱᐊᓕᐊᖏᑦᑕ ᓴᙱᑎᒋᓂᖏᓐᓂ ᐊᒻᒪᓗ ᕕᐊᓕᐅᖅᕕᖓᓂ, ᑲᓇᑎ ᐅᖃᕐᑐᖅ.
“ᒐᕙᒪᒃᑯᑦ ᐅᕙᑦᑎᓐᓄ ᐅᖃᒃᑲᓐᓂᕋᓱᒃᐸᑕ ᐊᓯᐊᒎᕈᑎᐅᔪᓐᓇᕋᔭᖅᑐᓂ ᐊᔾᔨᐸᓗᖏᓐᓂᒃ ᐊᑐᖃᑦᑕᓚᐅᖅᑕᑦᑎᓐᓂ ᑕᐃᒪᓕ ᐃᓱᒪᓕᐅᕆᓂᕐᓴᐅᓇᔭᖅᑐᒍᑦ ᕕᐊᓕᐅᖅᕕᒃ ᐱᒋᐊᒃᑲᓐᓂᖅᑎᓐᓇᓱᒋᐊᒃᓴᖅ,” ᐅᖃᕐᑐᖅ.
(0) Comments