ᐱᓕᕆᔨᒻᒪᕇᑦ ᓈᒻᒪᒃᓴᙱᓗᐊᖅᑐᑦ ᓄᓇᕗᒥᑦ ᒐᕙᒪᒃᑯᑦ ‘ᒪᑦᑐᑎᑐᐃᓐᓇᖅᓯᒪᔭᖓ’ ᐱᓕᕆᐊᖃᕐᓂᕐᒥ ᑲᒪᒋᔭᖃᖅᑎᑦᑎᓂᕐᒥ ᓱᕈᓯᕐᓂ

ᓱᕋᒃᓯᒪᔪᖅ ᓱᕈᓯᕐᓂ ᐃᓄᓕᕆᓂᖅ ᓄᓇᕗᒥᑦ ᐱᒋᐊᕐᕕᖃᕐᒪᓐ ᓄᓇᕗᒥᑦ ᒐᕙᒪᒃᑯᑦ ᓄᓇᓕᙳᖅᑎᑕᐅᑎᓪᓗᒋᑦ ᒪᓕᒃᑕᐅᓯᒪᓂᒃᑯᑦ ᓈᒻᒪᙱᓕᐅᕈᑎᖃᓗᐊᕐᒪᑕ, ᐃᓚᖏᑦ ᐅᖃᕐᓯᒪᔪᑦ ᐊᕐᕌᒍᒐᓴᖕᓂ ᑕᒪᑐᒥᖓ ᐊᑐᕐᓯᒪᓂᑰᔪᑦ ᓱᕈᓯᓕᕆᓂᕐᒥᑦ.

“ᓄᓇᖃᖅᑳᖅᑐᑦ ᓱᕈᓯᖏᑦ ᐱᔭᐅᖃᑦᑕᕐᓂᖏᑦ ᓄᖅᑲᖅᓯᒪᙱᒻᒪᑦ ᐃᓕᓐᓂᐊᕆᐊᕐᕕᐅᕙᓚᐅᖅᑐᓂ,” ᐅᖃᕐᑐᖅ ᔨᐅᕆᒥ ᔭᖕ, ᐊᓈᓇᖓᓂ ᐱᔭᐅᓂᑯ ᓱᕈᓯᐅᑎᓪᓗᒍ. “ᑲᔪᓰᓐᓇᓚᐅᕐᑐᖅ ᓱᕈᓯᕐᓂ ᐊᖓᔪᖅᑳᕆᙱᑕᖏᓐᓄᑦ ᑲᒪᒋᔭᐅᑎᑕᐅᓕᕌᖓᑕ.”

ᔭᖕ ᐅᖃᓪᓚᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐊᑐᖃᑦᑕᖅᓯᒪᔭᕕᓂᕐᒥᓂᒃ ᓄᓇᕗᒥᑦ ᐊᖓᔪᖅᑳᕆᙱᑕᖏᓐᓄᑦ ᑲᒪᒋᔭᐅᖃᑦᑕᕐᓂᐅᔪᒥᑦ ᓄᕕᐱᕆ 5-ᒥ ᐅᖃᐅᓯᖃᖅᖢᓂ ᑭᖑᓪᓕᖅᐹᒥ ᐊᑐᖅᑕᐅᕙᓪᓕᐊᔪᓂᒃ ᖃᐅᔨᓴᖅᑎᓄᑦ ᐊᖓᔪᖅᑳᑉ ᐅᓂᒃᑳᓕᐅᓚᐅᖅᑎᓪᓗᒍ ᓄᓇᕗᒥᑦ ᒐᕙᒪᒃᑯᑦ ᑲᒪᒋᔭᖃᕈᓯᖏᓐᓂᒃ ᐃᓅᓱᒃᑐᓂ ᑲᒪᒋᔭᐅᑎᑕᐅᔪᓂᒃ ᐊᖓᔪᖅᑳᕆᙱᑕᖏᓐᓄᑦ.

ᐱᓇᓱᐊᕈᓯᐅᓚᕐᑐᒥ ᐅᓂᒃᑳᓕᐊᕆᔭᐅᔪᖅ, ᑕᓪᓕᒪᒋᔭᐅᔪᖅ ᐊᕐᕌᒍᑦ 15 ᐃᓗᐊᓂ, ᓴᖅᑭᑎᑦᑎᓯᒪᖕᒪᑦ ᐊᓯᔾᔨᖅᓯᒪᓗᐊᒋᓐᓂᖓᓂ. ᓄᓇᕗᒥᑦ ᒐᕙᒪᒃᑯᑦ ᑲᒪᒋᔭᐅᑎᑕᖏᓐᓂ ᓱᕈᓯᕐᓂ ᖃᐅᔨᒪᓗᐊᙱᒻᒪᑕ ᖃᔅᓯᐅᓂᖏᓐᓂ, ᖃᐅᔨᓴᖃᑦᑕᙱᓗᐊᖅᖢᑎᒡᓗ ᐱᓕᕆᐊᒃᓴᕆᒐᓗᐊᖅᖢᒍ ᑕᒪᒃᑯᐊ ᓱᕈᓰᑦ ᐊᖓᔪᖅᑳᕆᙱᑕᖏᓐᓄᑦ ᑲᒪᔨᒋᔭᐅᔪᑦ ᓈᒻᒪᒃᑐᒥᑦ ᐊᖏᕐᕋᕆᔭᐅᔪᒧᐊᕋᓗᐊᕐᒪᖔᑕ.

ᔭᖕ, ᒫᓐᓇ 26-ᓂ ᐊᕐᕌᒍᖃᓕᕐᑐᖅ ᐊᓈᓇᖓᓂ ᐱᔭᐅᓚᐅᕐᓯᒪᖕᒪᑦ ᓱᕈᓯᐅᑎᓪᓗᒍ ᐸᓐᓂᕐᑑᒥ ᑲᒪᒋᔭᖃᑦᑎᐊᕋᓱᒃᑲᓗᐊᖅᑎᓪᓗᒍ, ᔭᖕ ᐅᖃᕐᑐᖅ.

ᐱᔾᔪᑎᖃᓗᐊᕋᓱᒋᓚᐅᕐᑕᖓ ᐃᓄᒋᐊᓗᐊᖅᑐᒦᓐᓂᕐᒧᑦ ᐊᒻᒪ ᓂᕿᖃᕈᓐᓇᑦᑎᐊᙱᖢᑎᒃ ᐃᓚᒌᑦ, ᐅᖃᖅᖢᓂ ᐊᓈᓇᖓ ᐊᕐᕌᒍᓂ 12-ᓂ ᐃᒡᓗᑖᕋᓱᓚᐅᕐᓯᒪᓂᖓᓂ ᐃᓚᖏᓐᓄᑦ ᑭᓯᐊᓂᓕ ᐊᔪᖅᑎᑕᐅᖏᓐᓇᓚᐅᕐᑐᖅ.

“ᓄᓇᖃᑎᒌᓕᕆᔩᑦ ᓄᓇᖃᖅᑳᖅᑐᓂ ᐃᑲᔪᙱᓗᐊᕐᒪᑕ,” ᐅᖃᕐᑐᖅ. “ᑕᐃᒪᓐᓇ ᐊᔪᕐᓴᑲᑕᓗᐊᖅᐳᒍᑦ. ᑕᐃᒪᓐᓇ ᐊᒃᓱᕈᕐᓇᖅᑐᒃᑰᑲᑕᓚᐅᖅᑐᒍᑦ.”

ᔭᖕ ᐃᓱᒪᔪᖅ ᐃᓄᐃᑦ ᓇᖕᒥᓂᖅ ᒐᕙᒪᖃᕐᓂᖓ ᓈᒻᒪᙱᓕᐅᕈᑎᓂ ᐋᖅᑭᒋᐊᕈᑎᐅᔪᓐᓇᖅᑐᖅ ᓱᕈᓯᕐᓂ ᑲᒪᒋᔭᖃᖃᑦᑕᕐᓂᕐᒧᑦ. ᑲᖏᖅᖠᓂᖅᒥ ᖃᐅᔨᓴᖅᑎ ᐊᒻᒪ ᐃᓕᓐᓂᐊᕐᑐᓕᕆᔨ ᐲᑕ ᕗᐃᓕᐊᒻᓴᓐ, ᐊᒻᒪ ᐋᓖᓐ ᕼᐊᓯ, ᐊᕐᕌᒍᒐᓴᖕᓂ ᐃᑲᔪᖅᑐᐃᔨᐅᔪᖅ ᐱᓕᕆᖃᑎᖃᖅᐸᒃᖢᓂ ᓄᓇᖃᖅᑳᖅᑐᑦ ᐊᕐᓇᖏᓐᓂ ᑕᒪᑐᒥᖓ ᐊᖏᓚᐅᕐᒥᔪᖅ.

ᕗᐃᓕᐊᒻᓴᓐ ᐅᖃᓚᐅᕐᒥᔪᖅ ᓄᓇᕗᒥᑦ ᒐᕙᒪᒃᑯᑦ ᐊᑐᖅᑕᐅᕙᓪᓕᐊᔪᓄᑦ ᖃᐅᔨᓴᖅᑎᓄᑦ ᐊᖓᔪᖅᑳᕐᒥ ᑐᓵᓪᓚᕆᓕᖅᐸᑕ ᐃᓱᒪᓕᐊᖏᓐᓂ ᓱᕈᓯᓕᕆᓂᖅ ᐋᖅᑭᒃᑕᐅᖁᔭᐅᓪᓗᓂ, ᑖᓐᓇᓗ ᐃᓚᖃᖅᖢᓂ ᐱᓕᕆᐊᖑᕙᓪᓕᐊᔪᑦ ᑐᓴᐅᒪᔭᐅᑦᑎᐊᕈᑎᒃᓴᖏᓐᓂ, ᑕᒪᓐᓇᓗ ᐱᒋᐊᕈᑎᐅᔪᒥᑦ ᐋᖅᑭᒋᐊᕈᑎᐅᓇᔭᙱᖢᓂ ᒪᑯᓂᖓ ᓱᕈᓯᕐᓂ ᐃᓚᖏᓐᓂ ᐊᕐᓵᖅᑕᐅᖃᑕᕐᓂᕐᒨᖓᔪᓂ. ᑕᒪᓐᓇᓕ ᐋᖅᑭᒋᐊᕈᑎᑐᐃᓐᓇᐅᖕᒪᑦ.

“ᓇᓗᓇᐃᕐᓯᑲᑕᖕᒪᑕ ᒪᑦᑐᑎᑐᐃᓐᓇᕐᓂ ᐋᖅᑭᒋᐊᕈᑎᓂ ᒐᕙᒪᒃᑯᓐᓂ ᐱᒋᐊᕈᑎᖏᓐᓂ ᐋᖅᑭᒃᓯᙱᖔᖅᖢᑎᑦ ᓄᓇᓕᖕᓂ,” ᕗᐃᓕᐊᒻᓴᓐ ᐅᖃᕐᑐᖅ.

ᐃᒡᓗᖃᑦᑎᐊᙱᓗᐊᕐᓂᖅ, ᐃᓕᓐᓂᐊᕐᓯᒪᑦᑎᐊᙱᓗᐊᕐᓂᖅ, ᐃᖅᑲᓇᐃᔮᒃᓴᖃᙱᓐᓂ ᐊᒻᒪ ᐊᔪᕐᓴᑲᑕᖕᓂᖅ ᐅᓗᕆᐊᓇᕈᑎᐅᖕᒪᑕ ᓱᕈᓯᕐᓂ ᐃᓚᖏᓐᓂ ᐊᕐᓵᖅᓯᖃᑦᑕᕐᓂᕐᒧᑦ, ᕗᐃᓕᐊᒻᓴᓐ ᐅᖃᕐᑐᖅ, ᐅᖃᐅᓯᖃᖅᖢᓂ ᕿᒥᕐᕈᐊᖃᑦᑕᕐᓂᕐᑯᑦ ᖃᐅᔨᓴᖅᑕᐅᓯᒪᔪᓂᒃ ᓄᐊᑦ ᐊᒥᐊᓕᑲᒥ ᐊᒻᒪ ᐅᑭᐅᕐᑕᖅᑐᕐᒥ ᖃᐅᔨᓴᖅᑎᓄᑦ.

“ᐅᑯᐊ ᐊᑐᖅᑕᐃᓗᐊᕐᒪᑕ ᓄᓇᕗᒥᑦ,” ᐅᖃᕐᑐᖅ.

ᐊᓈᓇᒋᔭᐅᔪᑦ ᑐᐊᕕᕐᓇᖅᑐᓕᕆᓂᒃᑯᑦ ᐃᒡᓗᖃᖅᑎᑕᐅᔪᑦ ᐅᓗᕆᐊᓇᖅᑐᒦᓐᓂᕐᓴᐅᖕᒪᑕ ᓱᕈᓯᖏᑦ ᐱᔭᐅᓇᔭᕆᐊᒃᓴᖏᓐᓂ, ᐅᖃᒃᑲᓐᓂᖅᑐᖅ.

ᕼᐋᓯ ᑕᒪᑐᒥᖓ ᐊᖏᓚᐅᕐᒥᔪᖅ, ᐅᖃᖅᖢᓂ ᒫᓐᓇ ᐱᓕᕆᔾᔪᓯᐅᔪᖅ “ᑐᖁᕋᐃᓂᕋᖅᖢᓂᒋᑦ” ᓄᓇᖃᖅᑳᖅᑐᓂ.

“ᐅᑯᐊ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᑦ ᐃᓚᒌᓄᑦ ᐅᐸᒍᑎᔭᕌᖓᑕ ᐅᕝᕙᓘᓐᓃᑦ ᓄᓇᓕᖕᓄᐊᖅᐸᑕ ᑕᒪᑐᒃᑯᓂᖓ ᕿᒥᕐᕈᐊᖃᑦᑕᕐᒪᑕ ᓈᒻᒪᙱᓕᐅᕈᑎᐅᕙᒃᑐᓂᒃ,” ᐅᖃᕐᑐᖅ. “ᓲᖃᐃᒻᒪ ᐃᓱᒪᖏᑦ ᐃᓄᒋᐊᓂ ᐋᖅᑭᒃᓱᐃᓯᒪᓇᓱᖕᓂᖏᓐᓄᑦ ᐊᒻᒪ ᐃᓅᖃᑎᒌᙱᑕᖏᓐᓂ ᐱᐅᒃᓴᖃᑦᑕᙱᓐᓂᕐᒧᑦ.”

ᐊᓯᐊᒎᕈᑎᐅᔪᓐᓇᖅᑐᕐᓕ ᐃᓄᖕᓄᑦ ᐊᐅᓚᑕᐅᔪᓂ, ᓄᓇᓕᖕᓃᑦᑐᓄᑦ “ᐃᑲᔪᖅᑐᐃᓂᕐᒥ ᐃᓚᒌᓂᒃ, ᖃᐅᔨᒪᓗᑎᒃ ᐱᒻᒪᕆᐅᓂᖏᓐᓂᒃ ᐊᒻᒪᓗ ᒪᒥᓴᕈᓐᓇᕐᓂᖏᓐᓂᒃ, ᐊᒻᒪ ᐃᑲᔪᖅᑐᐃᕙᒡᓗᑎᒃ ᐊᒻᒪ ᐊᔪᕈᓐᓃᕐᓴᖅᐸᒡᓗᑎ,” ᐅᖃᕐᑐᖅ.

“ᐃᓄᐃᑦ ᖃᐅᔨᑎᑕᐅᔭᕆᐊᖃᕐᑐᑦ ᐱᕈᕈᓐᓇᕐᓂᖏᓐᓂ ᒫᓐᓇ ᐅᐸᒃᓯᒪᔭᖏᓐᓂ ᓄᑖᒦᖔᓕᕈᑎᒃ. ᑕᐃᒪᓐᓇ ᐃᓐᓇᐃᑦ ᐃᓱᒪᖕᒪᑕ ᐃᓄᐃᑦ ᓄᓇᖏᓐᓃᑦᑐᑦ.”

ᓄᓇᕗᑦ ᐱᒋᐊᓕᓵᕐᓯᒪᑎᓪᓗᒍ 1999-ᒥ, ᓄᓇᒥᑦ ᒐᕙᒪᒃᑯᑦ ᖃᐃᖁᔨᓚᐅᕐᓯᒪᖕᒪᑕ ᕼᐋᓯᒥ ᓄᓇᕗᒥᑦ ᐳᓚᕋᖁᔭᐅᓪᓗᓂ ᓄᓇᓕᖕᓂ ᐊᒻᒪ ᑕᒪᓐᓇ ᑐᓴᐅᒪᔭᐅᔪᖅ ᑐᓴᖅᑕᐅᑎᓪᓗᓂᒋ ᒪᑐᒧᖓ ᓱᕈᓯᕐᓂ ᐊᖓᔪᖅᑳᖏᓐᓂ ᐊᖅᓵᖅᑕᐅᓯᒪᔪᑦ ᒥᒃᓵᓄᑦ, ᐅᖃᕐᑐᖅ.

ᐅᓇ ᐃᓱᒪᒋᔭᐅᓕᓵᙱᑦᑐᖅ. ᐋᖅᑭᒃᓱᐃᓂᖅ ᐊᒻᒪ ᐊᑐᓕᖅᑎᑦᑎᓂᖅ ᕼᐊᕗᐊᐃᒥ 1979-ᒥ, ᓱᓕ ᒫᓐᓇ ᐊᑐᖅᑕᐅᖕᒪᑦ.

“ᐅᓇ ᖃᐅᔨᓇᓱᕈᑎᑦᑎᐊᕙᒃ ᓄᓇᕐᔪᐊᕐᒥ ᓄᓇᖃᖅᑳᖅᑐᓂ ᑐᑭᓯᓯᒪᔭᐅᓂᖓ ᐃᓚᒌᑦ ᒥᒃᓵᓄᑦ ᐊᒻᒪ ᓱᕈᓯᕐᓂ,” ᕼᐋᓯ ᐅᖃᕐᑐᖅ. “ᐅᓇ ᑕᐃᒪᐃᖃᑦᑕᕐᓯᒪᔪᖅ ᐅᕝᕙᓘᓐᓃᑦ ᓄᑖᖑᙱᖢᓂ. ᑭᓯᐊᓂᓕ ᐅᑭᐅᕐᑕᖅᑐᕐᒥ ᑕᐃᒪᐃᖃᑦᑕᓕᑕᐃᓐᓇᕐᒪᑦ ᐃᓄᒋᐊᓃᓕᖅᑕᐅᓯᒪᙱᑉᐸᑦ.”

ᓄᓇᕗᑦ ᑖᔅᓱᒥᖓ ᐊᑐᖅᑕᐅᕙᒃᓯᒪᔪᒥ ᐊᑐᖁᔨᓚᐅᙱᑦᑐᑦ.