ᐃᒡᓕᐅᑉ ᑯᒪᖏᓐᓂ ᑕᑯᑲᑕᒃᑐᓄᑦ ᐃᓱᒫᓘᑎᐅᓕᕐᐳᖅ ᓄᓇᕕᒃᒥᐅᓄᑦ ᐋᓐᓂᐊᕐᕕᓕᐊᖅᑐᓄᑦ ᒪᕐᑐᕆᐊᒧᑦ

ᐃᒡᓕᐅᑉ ᑯᒪᖏᓐᓂᒃ ᑕᑯᖃᑦᑕᕐᓂᐅᔪᖅ ᓄᓇᕕᒃᒥᐅᑦ ᑐᔪᕐᒥᕕᒋᔭᖏᓐᓂᒃ ᐋᓐᓂᐊᕐᕕᓕᐊᖅᑎᓪᓗᒋᑦ ᒪᓐᑐᕆᐊᒧᑦ ᐃᓱᒫᓘᑎᐅᓐᓇᓗᐊᖅᐳᑦ ᑐᔪᕐᒥᔪᓄᑦ ᐃᓚᖏᓐᓄᓪᓗ.

ᐅᒃᑑᐱᕆᐅᑉ ᕿᑎᐊᓂᑦ, ᓯᓯᓕᐊ ᑯᑦᓵᑲ ᐊᓈᓇᒥᓂ ᐳᓛᕐᓯᒪᓪᓗᓂ ᑯᐊᓕᑎ ᑐᔪᕐᒥᕕᒃᒥᑦ ᐅᕙᓂ ᑰᑦ ᑎ ᓖᔅ ᑐᐊᕚᓪᒥ ᐊᒃᓱᐊᓗᒃ ᑲᑉᐱᐊᓱᓚᐅᕐᓯᒪᔪᖅ: ᕿᐱᐅᑉ ᐊᑎᑦᑎᐊᖓᓂ ᐃᓕᐅᑉ ᑯᒪᖓᓂ ᑕᑯᓚᐅᕐᓯᒪᖕᒪᑦ, ᑖᓐᓇᓗ ᐊᔾᔨᓕᐅᖅᖢᓂᐅᒃ.

ᑯᑦᓵᑲ ᑕᑯᓂᖓᓂᒃ ᐃᒡᓕᐅᑉ ᑯᒪᖓᓂᒃ ᐅᖃᓚᐅᕐᑐᖅ ᐋᓐᓂᐊᕐᕕᓕᐊᖅᑐᓂᒃ ᓄᓇᕕᒃᒥᑦ ᓇᐅᑦᑎᖅᓱᖅᑎᐅᔪᒧ ᐅᕙᓂ ᐅᓪᓕᕕᒃ ᑐᔪᕐᒥᕕᒃᒥᑦ, ᑕᕝᕙᓂᓕ ᐃᒡᓗᕈᓯᒐᓚᖕᓂᒃ ᑐᔪᕐᒥᕕᖃᖅᖢᑎᒃ, 39 ᑲᑎᖢᑎᒃ, ᓯᕗᓪᓕᖅᐹᖓᓂ ᓇᑎᕐᒥ ᑕᑕᓗᐊᕌᖓᑦ.

ᑯᑦᓵᑲ ᐊᓈᓇᒥᓄᑦ ᐅᖄᓚᓪᓗᓂ ᐅᖃᐅᑎᓪᓗᓂᐅᒃ ᑕᐃᑲᓃᒃᑲᓐᓂᓚᐅᕐᓯᒪᔾᔮᔪᓐᓃᕐᓂᖓᓂᒃ.

ᑐᔪᕐᒥᕕᐅᑉ ᐊᖓᔪᖅᑳᖓ, ᓴᐃᑐ ᐊᑉᑐᓪ ᓄᕐ, ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄ ᐱᓇᓱᐊᕈᓯᐅᓚᐅᕐᑐᒥ ᑲᒪᓂᕋᖅᖢᓂ ᐃᒡᓕᐅᑉ ᑯᒪᖓᓂ ᑕᑯᑲᑕᒃᑐᓂᒃ. ᑕᐃᒪᐃᑦᑐᕐᓕ ᖃᖓᑦᑎᓵᖑᓚᐅᕐᑐᖅ, ᖃᐅᔨᓴᖅᑕᐅᑲᑕᒃᑎᓪᓗᒍ, ᖁᐱᕐᕈᓕᕆᔨᓄᓪᓗ ᐅᓂᒃᑳᓂ ᐱᓯᒪᓪᓗᓂ, ᓇᓂᓯᔪᓐᓇᓚᐅᙱᑦᑐᑦ.

ᐅᓇ ᐊᔾᔨᙳᐊᖅ ᓴᕿᑎᑦᑎᓯᒪᔪᖅ ᐃᒡᓕᐅᑉ ᑯᒪᖓᓂ ᐆᒪ ᓯᓯᓕᐊ ᑐᑦᓵᑲ ᑕᑯᓚᐅᕐᑕᖓ ᑕᖅᑭᐅᓚᐅᖅᑐᒥ ᐊᓪᓕᕐᒥ ᐊᓈᓇᖓᑕ ᐃᒡᓗᕈᓯᐊᓂᒃ ᐅᕙᓂ ᑯᐊᓕᑎ ᑐᔪᕐᒥᕕᒃᒥᑦ ᐅᕙᓂ ᑰᑦ ᑎ ᓖᔅ ᑐᐊᕚᓪᒥᑦ. (ᐊᔾᔨᙳᐊᖅ ᐅᕙᙵᑦ ᓯᓯᓕᐊ ᑐᑦᓵᑲ)

ᐊᑕᐅᓯᖅ ᐃᒡᓗᕈᓯᕐᒥ ᖃᐅᔨᓴᕐᓂᐅᔪᖅ ᓇᓂᓯᔾᔪᑎᐅᓚᐅᕐᑐᖅ ᑕᕝᕙᓂ ᐃᒡᓕᕐᓄᑦ ᑯᒪᖃᕐᓂᑰᓂᖓᓂᒃ, ᑭᓯᐊᓂᓕ ᑕᕝᕙᓃᑦᑐᓐᓃᖅᑐᑦ.

ᐋᑉᑐᓪ ᓄᕐ ᖃᕋᓴᐅᔭᒃᑯᑦ ᑎᑎᕋᖅᑕᐅᓂᑯᓂᒃ ᑕᑯᑎᑦᑎᓚᐅᕐᒥᔪᖅ ᑐᔪᕐᒥᓂᑯᓂᑦ ᑕᑯᖃᑦᑕᖅᑐᕕᓂᕐᓂᒃ ᐃᒡᓕᐅᑉ ᑯᒪᖏᓐᓂᒃ.

ᐱᒻᒪᕆᐅᓂᖓᓄᑦ ᐅᓪᓕᕕᒃ ᑐᔪᕐᒥᕕᐊᑕ ᐊᐅᓚᓂᖓᓄᑦ, ᐋᑉᑐᓪ ᓄᕐ ᐅᖃᓚᐅᕐᑐᖅ ᐃᒡᓗᕈᓯᓕᒫᑦ ᐱᓕᕆᐊᖑᓚᐅᕐᓂᕋᖅᖢᓂᒋᑦ ᑕᒪᑐᒪᓂ ᐊᕐᕌᒍᒥ ᐊᒻᒪᓗ ᖃᐅᔨᓴᖅᑕᐅᖃᑦᑕᐃᓐᓇᖅᖢᑎᒃ ᐊᒻᒪ ᐱᓕᕆᐊᖑᕙᒃᖢᑎᒃ ᐱᓕᕆᐊᖑᔭᕆᐊᖃᕈᑎᒃ.

ᓄᓇᑦᓯᐊᕐᒥ ᐱᕙᓪᓕᐊᔪᑦ ᐅᖃᖃᑎᖃᕈᓐᓇᓚᐅᙱᑦᑐᑦ ᓄᓇᕕᒃ ᓄᓇᓕᓕᒫᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᑎᒪᔨᓂ ᐅᑯᓇᙵᓪᓘᓐᓃᑦ Module du nord-québécois ᐱᓕᕆᐊᖃᖅᐸᒃᑐᑦ ᓄᓇᕕᒃᒥ ᐋᓐᓂᐊᕕᖕᒧᑦ ᒪᓐᑐᕆᐊᒧᐊᕐᓯᒪᔪᓂᒃ ᒪᑯᓂᖓ ᐃᒡᓕᐅᑉ ᑯᒪᖏᓐᓂᒃ ᐊᒻᒪᓗ ᑕᒪᑐᒥᖓ ᖃᓄᐃᓕᐅᕆᐊᒃᓴᖏᓐᓂᒃ.

ᐅᑯᐊᓕ MNQ-ᑯᑦ ᐃᓱᒫᓘᑎᖏᓐᓂᒃ ᑎᑎᕋᐅᓯᖃᖅᓯᒪᔪᑦ ᖃᕋᓴᐅᔭᒃᑯ ᐋᑉᑐᓪ ᓄᕐᒧᑦ.

“ᐃᒪᓐᓇᐅᖂᔨᖕᒪᑦ ᑐᔪᕐᒥᖃᑦᑕᖅᑐᑦ ᐃᒡᓕᐅᑉ ᑯᒪᖏᓐᓂᒃ ᑕᑯᑲᑕᖕᓂᖏᓐᓄᑦ ᐊᒻᒪᓗ ᑐᔪᕐᒥᕕᖕᒦᑦᑐᒪᔪᓐᓃᖅᖢᑎᒃ,” ᑎᑎᕋᖅᑐᖅ ᔪᐊᔾ ᑎᓚᑐᓚ, ᐊᖓᔪᖅᑳᖅ ᐅᓪᓕᕕᒃᒥᑦ ᐅᒃᑑᐱᕆ 16-ᖑᑎᓪᓗᒍ.

“ᑐᓴᖅᑎᑕᐅᓚᐅᕐᓚᖓ ᑭᓲᖕᒪᖔᑦ ᐊᒻᒪ ᖃᓅᖕᒪᖔᑦ ᐊᒻᒪ ᖃᖓᐅᖕᒪᖔᑦ ᓈᒻᒪᙱᓕᐅᕈᑎ ᐋᖅᑭᒃᑕᐅᓂᐊᕆᐊᒃᓴᖓᓂᒃ. ᐋᓐᓂᐊᕕᓕᐊᕐᑐᑦ ᑐᓴᐅᒪᑎᑦᑕᕆᐊᖃᕋᑦᑎᒍᑦ ᐃᒡᓕᐅᑉ ᑯᒪᖏᑦ ᑲᒪᒋᔭᐅᓚᐅᕐᓂᖏᓐᓂᒃ.”

ᐅᓪᓕᕕᒃ ᐋᓐᓂᐊᕐᕕᓕᐊᖅᑐᑦ ᐊᓐᓄᕌᒃᑯᕕᖏᓐᓂᒃ/ᐴᖏᓐᓂᒃ ᑲᒪᒋᔭᖃᐃᓐᓇᖅᐸᒃᑐᑦ ᐃᓯᓚᐅᙱᓐᓂᖏᓐᓂᒃ.

ᐃᒡᓕᐅᑉ ᑯᒪᖏᓐᓂᒃ ᐱᑕᖃᖅᑐᖅ ᐃᓛᒃ ᒪᓐᑐᕆᐊᒥ: ᑯᒪᖃᓗᐊᕐᓂᕐᒧᑦ ᒐᕙᒪᒃᑯᑦ ᑎᑎᕋᕐᕕᖏᑦ ᒪᑐᔭᐅᔭᕆᐊᖃᓕᓚᐅᕐᓯᒪᔪᑦ ᐅᕙᓂ Complexe Guy-Favreau ᑕᕿᐅᓚᐅᕐᑐᒥ.

ᐊᒻᒪᓗ ᐃᒡᓕᐅᑉ ᑯᒪᖏᓐᓂᒃ ᐱᑕᖃᕈᓂ ᐋᓐᓂᐊᕐᕕᓕᐊᖅᓯᒪᔪᓂᒃ ᐅᑭᐅᕐᑕᖅᑐᕐᒥᑦ, ᑖᓐᓇ ᓯᕗᓪᓕᖅᐸᐅᓇᔭᙱᑦᑐᖅ, ᑕᐃᒪᐃᓚᐅᕐᓯᒪᖕᒥᖕᒪᑕ 2010-ᒥ ᐅᐃᓂᐱᒡᒥᑦ.

ᐃᒡᓕᐅᑉ ᑯᒪᖏᑦ ᐱᒋᔪᒥᓇᙱᑦᑐᐊᓗᐃᑦ: ᒥᑭᑦᑐᕈᓘᒐᓗᐊᑦ, ᑭᓯᐊᓂᓕ ᐅᖏᓚᖕᓇᕐᓯᕙᒃᑯᑦ ᑕᒧᐊᕝᕕᒋᓂᖑᖏᑦ, ᐃᒻᒪᖕᓇᖅᖢᑎᒃ ᐊᒻᒪ ᐊᒥᕐᓗᓕᕐᓇᖅᖢᑎᒃ ᐅᕕᓂᖕᒥᑦ ᑮᓯᓚᐅᖅᑎᓪᓗᒋᑦ.

ᑕᒪᒃᑯᐊ ᑯᒪᐃᑦ ᓱᓪᓗᖃᖅᑐᒥ ᓄᕙᖕᒥᓂᒃ ᐊᐅᖕᒧᐊᖅᓯᒍᑎᖃᖅᑐᑦ ᑖᓐᓇ ᐊᐅᖓ ᐃᔾᔪᓗᐊᕈᓐᓃᕐᓂᐊᕐᒪᑦ ᐊᒻᒪ ᐊᕕᓂᖕᒥᒃ ᐃᒃᐱᒍᓱᑦᑎᐊᕈᓐᓃᕐᓇᖅᖢᓂ. ᐊᓯᐊᓄᓪᓕ ᓱᓪᓗᖃᖅᑐᒧᑦ, ᐃᒡᓕᐅᑉ ᑯᒪᖓ ᐊᐅᖕᒥ ᒥᓪᓗᐊᖅᐸᒃᑐᖅ, ᐃᓛᓐᓂ 5 ᒥᓂᑦᒥᓪᓘᓐᓃᑦ.

ᐊᐅᒃᑐᐊᓪᓚᓚᐅᖅᖢᑎᒃ, ᕿᓈᖓᓕᖅᖢᑎ ᐊᐅᐸᑑᕙᒃᑐᑦ ᐊᒻᒪ ᐳᕕᕐᓯᒪᖂᔨᓕᖅᖢᑎᒃ.

ᐃᒡᓕᐅᑉ ᑯᒪᖏᑦ ᓂᕆᕙᒃᑐᑦ ᐅᓪᓗᐃᑦ ᑕᓪᓕᒪᓂ ᖁᓕᓄᑦ ᐊᓂᒍᕌᖓᑦ ᐊᒻᒪᓗ ᐊᕐᕌᒍᓕᒫᒥᑦ ᐃᓅᔪᓐᓇᖅᖢᑎᒃ, ᒪᑯᓇᓃᑉᐸᒃᖢᑎᒃ ᐊᓪᓕᖅᐹᑉ ᐃᓗᑐᔫᓂᖏᓐᓂᒃ, ᐊᒡᓕᓂᕐᓂᒃ ᐊᒻᒪ ᐊᓯᖏᓐᓂ ᐆᓇᔪᒃᑐᓂᒃ, ᑖᖅᑐᓂᒃ ᐊᒻᒪ ᓴᖅᑭᑉᐸᒃᖢᑎ ᓂᕆᔪᒪᓕᕈᑎᒃ.

ᐅᓇ ᑐᓴᕐᓂᕈᑎᐅᔪᕐᓕ ᑕᒪᒃᑯᐊ ᐃᒡᓕᐅᑉ ᑯᒪᖏᑦ ᓂᒡᓕᓇᖅᑐᒦᑉᐸᙱᒻᒪᑕ, ᑕᐃᒪᐃᓐᓂᖓᓄᓪᓗ ᓯᓂᑐᐃᓐᓇᓕᖅᖢᑎᒃ ᐊᒻᒪ ᐃᓅᔪᓐᓃᖅᐸᒃᖢᑎ.

ᑕᐃᒪᓕ ᑐᖁᑎᑦᑐᓐᓇᖅᑕᓯ ᐴᕆᔭᓯ ᓯᓚᒦᑎᓪᓗᒋᑦ ᐅᓪᓗᓂ ᒪᕐᕉᖕᓂ ᐅᖓᑖᓄᑦ ᐅᖂᓂᖃᙲᓐᓇᕈᓂ.

ᐃᒡᓕᐅᑉ ᑯᒪᒃᑕᖅᑕᐃᓕᓇᓱᒡᓗᑎᑦ ᐊᐅᓪᓚᕐᓯᒪᓗᑎᑦ, ᖃᐅᔨᓴᖅᐸᒡᓗᒋᑦ ᐃᒡᓗᐅᑉ ᓂᐊᖁᖓᓃᑦᑐᖅ, ᐊᓪᓕᖅᐹᕐᓗ ᑕᑯᒋᐊᕐᓗᒍ ᐊᒻᒪ ᐴᕆᔭᓯ ᐃᒡᓕᕐᒦᑎᙱᓪᓗᒋᑦ.

ᐊᒻᒪᓗ ᐊᖏᕐᕋᕈᔅᓯ, ᐊᓐᓄᕌᓯ ᐅᐊᓴᕐᓗᒋᑦ ᐃᒡᓗᕈᓯᕐᓄᐊᓚᐅᙱᓐᓂᖏᓐᓂᑦ ᐊᒻᒪᓗ ᐴᕆᔭᑎᑦ ᑯᒪᖃᙱᒃᑲᓕᐊᕆᒃᓴᖏᓐᓂᒃ ᖃᐅᔨᓴᕐᓗᒋᑦ.

ᑕᑯᒍᕕᑦ ᐃᒡᓕᐅᑉ ᑯᒪᖓᓂ ᒪᓐᑐᕆᐊᒥ ᑐᔪᕐᒥᕕᖕᒥᑦ, ᐅᖄᓚᒍᓐᓇᖅᑐᑎᑦ 311 ᓄᓇᓕᐸᐅᔭᓄᑦ ᓈᒻᒪᙱᓕᐅᕈᑎᖕᓄᑦ.