ᐃᓄᐃᑦ ᐃᑲᔪᖅᑐᐃᓯᒪᕗᑦ ᓄᓇᖃᖅᑳᖅᑐᓂᒃ ᐋᒥᔭᓐᒥᑦ: ICC

ᓄᓇᕐᔪᐊᒥ ᐅᑭᐅᕐᑕᖅᑐᕐᒧᑦ ᑲᑐᔾᔨᖃᑎᒌᑦ ᑭᒡᒐᖅᑐᐃᓪᓗᑎᒃ ᐃᓄᖕᓂᑦ ᐊᓛᔅᑲᒥ, ᑲᓇᑕ, ᓱᑯᑦᑲ ᐊᒻᒪ ᑲᓛᖡᑦ ᓄᓇᖓᓂ ᑐᓴᖅᑎᑦᑎᓚᐅᕐᐳᑦ ᐃᑲᔪᖅᑐᐃᓂᖏᓐᓂᒃ ᓄᓇᖃᖅᑳᖅᑐᓂᒃ ᓄᓇᓕᖕᓂ ᐋᒥᔮᓐᒥᑦ, ᐊᒻᒪ ᐃᓱᒫᓘᑎᖃᕐᓂᕋᖅᖢᑎᒃ ᒫᓐᓇ ᐃᑯᐊᓚᔪᐃᑦ ᓇᐹᖅᑐᖃᕐᓂᖓᒍᑦ ᐊᒃᑐᐃᒍᑎᐅᓇᔭᕐᓂᖓᓂᒃ ᓯᓚᕐᔪᐊᑉ ᖃᓄᐃᒍᓯᐊᓂᒃ.

“ᐅᑭᐅᕐᑕᖅᑑᑉ ᓄᓇᖓ ᐊᓯᙳᖅᐸᓪᓕᐊᓂᖓ ᐊᒻᒪ ᐃᓄᐃᑦ ᐃᓅᓯᖏᑦ ᐊᒻᒪ ᐆᒪᔾᔪᑎᒋᕙᒃᑕᖏ ᐊᒃᑐᐊᒻᒪᕆᒃᑐᑦ ᓄᓇᒧᑦ, ᐱᒋᐊᓪᓚᒃᑲᓐᓂᕋᔭᕐᒪᑦ ᐊᒻᒪ ᓈᒻᒪᙱᓕᐅᕈᑎᖃᒃᑲᓐᓂᕐᓗᓂ ᒪᑯᓇᙵᑦ ᓇᐹᖅᑐᖃᕐᓂᖓᓂ ᐋᒥᔮᓐ ᐃᑭᓐᓂᖏᓐᓄᑦ ᑖᒃᑯᐊᓗ ᓯᓚᕐᔪᐊᑉ ᐅᖅᑰᓂᖓᓂᒃ ᖁᕝᕙᕆᐊᕈᑎᐅᓪᓗᓂ ᐊᒻᒪ ᓯᑯᓂᒃ ᐊᒻᒪ ᐊᐅᔪᐃᑦᑐᓂᒃ ᐊᐅᒃᑎᑦᑎᕚᓪᓕᕈᑎᐅᓪᓗᓂ,” ᐃᓄᐃᑦ ᓄᓇᕐᔪᐊᕐᒥᑦ ᑲᑎᒪᔨᕐᔪᐊᑦ ᐊᖓᔪᖅᑳᖓ ᑲᓇᑕᒧᑦ, ᒫᓂᑲ ᐃᐊᓪ-ᑲᓇᔪᒃ ᐅᖃᓚᐅᕐᑐᖅ ᐊᐃᑉᐹᓂᑦ, ᐋᒐᓯ 27, ᑐᓴᒐᒃᓴᓕᐅᖅᑎᓪᓗᒋᑦ.

“ᖃᓄᐃᑦᑐᖃᖅᐸᑦ ᓄᓇᕐᔪᐊᑉ ᐃᓚᖓᓂ ᐊᒃᑐᐃᓂᖃᖅᐳᖅ ᐅᕙᑦᑎᓐᓄᓕᒫᖅ.”

ᐃᓄᐃᑦ ᓄᓇᖓᑦᑕ ᓄᓇᖏᑦ ᒪᑐᒥᖓ ᐊᑐᓕᕇᕐᒪᑕ “ᖃᓄᐃᒍᑎᕐᔪᐊᓂᒃ ᓯᓚᐅᑉ ᐊᓯᙳᕐᓂᖓᓄᑦ,” ᐅᖃᖅᑐᖅ.

ᐅᓇ 7.4 ᒥᓕᐊᓐ ᑭᑉᐹᕆᒃᑎᕐᓯᒪᓪᓗᓂ ᑭᓛᒥᑕ ᐋᒥᔮᓐ ᓄᓇᒋᔭᐅᕗᖅ 1 ᒥᓕᐊᓐᓄ ᓄᓇᖃᖅᑳᖅᑐᓄᑦ, ᐊᒻᒪᓗ 3 ᒥᓕᐊᓐᐸᓗᖕᓂᑦ ᐱᕈᖅᑐᓄᑦ ᐊᒻᒪ ᓂᕐᔪᑎᓄᑦ, ᐅᖃᖅᑐᑦ ᐃᓄᐃᑦ ᓄᓇᕐᔪᐊᕐᒥ ᑲᑎᒪᔨᖕᔪᐊᖏᑦ, ᓇᓗᓇᐃᒃᑲᓐᓂᕐᖢᑎᒃ ᑕᒪᓐᓇ ᓄᓇ ᓯᓚᐅᑉ ᖃᓄᐃᑉᐸᓪᓕᐊᓂᖓ ᐃᖏᕐᕋᔾᔪᑎᐅᕙᖕᓂᖓᓂᒃ ᓯᓚᐅᑉ ᐊᓯᙳᖅᐸᓪᓕᐊᓂᖓᓂᒃ, ᑕᒪᒃᑯᐊ ᓇᐹᖅᑐᐊᓗᐃᑦ ᓯᓚᐃᓐᓇᒦᑦᑐᓂ ᐊᓂᕐᓵᖅᑐᕈᑎᖃᖅᐸᖕᒪᑕ ᓯᓚᒧ ᓈᒻᒪᙱᓕᐅᕈᑎᐅᕙᒃᑐᓂᒃ ᐊᕐᕌᒍᑕᒪᑦ.

ᑭᓯᐊᓂᓕ ᓇᐹᖅᑐᖃᖅᑐᑦ ᐃᑭᑎᓪᓗᒋᑦ, ᒪᑯᐊ ᓇᐹᖅᑐᓄᑦ ᐱᔭᐅᕙᓪᓕᐊᓂᑯᑦ ᑳᐸᓐ (carbon) ᓯᓚᐃᓐᓇᕐᒨᓕᔭᒻᒪᑦ, ᐊᒻᒪᓗ ᓇᐹᖅᑐᓖᑦ ᑕᒪᑐᒥᖓ ᐱᔪᓐᓇᕐᓂᖏᑦ ᐊᓯᐅᑐᐃᓐᓇᓕᖅᖢᓂ.

“ᐅᓇ ᐊᒃᑐᐃᒍᑎᒻᒪᕆᐊᓗᒃ ᓄᓇᕐᒧᐊᑉ ᑳᐸᓐᖃᕐᓂᖓ ᐊᒃᑐᐃᓂᖃᒻᒪᕆᖕᓂᐊᕐᒪᑦ ᐅᖓᓯᒃᑐᓄᓪᓘᓐᓂᑦ, ᐃᓚᐅᓪᓗᓂ ᐅᑭᐅᕐᑕᖅᑐᖅ,” ᐃᓄᐃᑦ ᓄᓇᕐᔪᐊᒥᑦ ᑲᑎᒪᔨᕐᔪᐊᖏᑦᑕ ᑐᓴᒐᒃᓴᖓ ᐅᖃᕐᓯᒪᔪᖅ.

ᓄᓇᙳᐊᖅ ᖁᓛᓂ ᓴᕿᑎᑦᑎᓯᒪᔪᖅ ᐃᑯᐊᓚᔪᓂᒃ ᐳᕋᔨᐅᒥᑦ (Brazil), ᐅᑯᓇᙵᑦ NASA-ᑯᑦ ᖁᒻᒧᒃᑎᓯᒪᔭᖏᓐᓂᒃ ᑕᐅᑐᒃᑕᐅᓂᖓᒍ ᐋᒐᓯ 15-ᓗ ᐋᒐᓯ 22-ᓗ ᐊᑯᓐᓂᖓᓂᒃ. ᐃᑭᑦᑐᑦ ᐊᐅᐸᔮᖅᑐᑦ ᐆᕆᓐᔾ. ᓄᓇᓕᕐᔪᐊᑦ ᒥᑭᓐᓂᕐᓴᓪᓗ ᓄᓇᓖᑦ ᖃᐅᓪᓗᖂᔨᓪᓗᑎᒃ; ᓇᐹᖅᑐᖃᐅᕐᓂᖓ ᕿᕐᓈᖓᓪᓗᓂ, ᐊᒻᒪᓗ ᓇᐹᖅᑐᖃᙱᓐᓂᐅᔪᑦ ᐊᒻᒪ ᓇᐹᖅᑐᖃᓗᐊᖏᓐᓃᑦ (ᖃᐅᔨᒪᔭᐅᔪᖅ ᐃᒪᓐᓇ ᐳᕋᓯᐅᒥ ᓯᕌᑐᒥ) ᓯᐊᕐᓇᐅᓂᐅᓪᓗᑎᒃ. (ᐊᔾᔨᙳᐊᖅ NASA-ᑯᓐᓂᑦ)

ᐃᓄᐃᑦ ᓄᓇᕐᔪᐊᒥᑦ ᑲᑎᒪᔨᕐᔪᐊᖏᑦᑕ ᐃᒃᓯᕙᐅᑕᖓ, ᑖᓖ ᓵᒻᐳ ᑐᕈ, ᐅᖃᓚᐅᕐᑐᖅ ᐅᑯᖓ ᐃᓄᐃᑦ ᓄᓇᕐᔪᐊᒥᑦ ᑲᑎᒪᔨᕐᔪᐊᖏᑦ “ᐃᓱᒫᓘᑎᖃᓪᓚᕆᖕᒪᑕ” ᒪᑯᓂᖓ ᐅᓂᒃᑳᓕᐊᖑᑲᑕᒃᑐᓂᒃ ᓄᓇᖃᖅᑳᖅᑐᓂᒃ ᐳᕋᔨᐅᒥᑦ ᐅᖃᐅᓯᓕᖕᓂᒃ ᒐᕙᒪᖏᓐᓂᒃ ᐆᒪ ᔭᐃᐊ ᐳᓪᓱᓂᐅᕈ (Jair Bolsonaro).

“ᐅᓇ ᑐᓴᖅᖢᒍ ᒐᕙᒪᖏᑦ ᐱᒋᐊᓚᐅᕐᓂᖏᓐᓂᒃ ᓈᒻᒪᙱᓕᐅᕈᑎᒃᓴᓂᒃ ᓄᓇᖃᖅᑳᖅᑐᓄᑦ ᓱᖁᑎᒃᓴᙱᑐᐃᓐᓇᕐᓂᒃᑯᑦ, ᑕᒪᒃᑯᐊ ᐱᕈᖅᑐᓂᒃ ᓂᕿᒃᓴᓕᐅᕐᑏᑦ, ᓂᕐᔪᑎᓂᒃ ᐱᖁᑎᓖᑦ ᐊᒻᒪ ᐅᔭᕋᒃᓯᐅᖅᑏᑦ ᐊᒥᔮᓐ ᓇᐹᖅᑐᖃᓂᖓᓄᐊᒃᑲᓂᕈᓐᓇᖁᓪᓗᒋᑦ—ᐊᖏᕐᕋᖏᓐᓄᑦ,” ᐅᖃᖅᑐᖅ.

ᐋᒥᓱᑦ ᓄᓇᖃᖅᑳᖅᑐᑦ ᖃᑦᑎᕆᔨᖃᙱᒻᒪᑕ, ᖃᓄᑐᐃᓐᓇᖅ ᖃᒥᑦᑎᒍᑎᖃᙱᖢᑎᒃ ᑖᒃᑯᓂᖓ ᐃᑯᐊᓚᔪᐊᓗᖕᓂ.”

ᐱᔾᔪᑎᒋᓪᓗᒍ ᐃᑯᐊᓚᔪᐊᓗᐃᑦ, ᐋᒥᔮᓐᒥᐅᑕᑦ, ᐊᖏᓂᖅᐹᖅ ᐊᕕᒃᑐᖅᓯᒪᓂᖓᒍᑦ ᐳᕋᔨᐅᓪ, ᑐᐊᕕᕐᓇᖅᑐᒦᓐᓂᕋᖅᖢᑎᒃ, ᐳᓕᕕᐊ, ᑲᓚᒻᐱᐊ ᐊᒻᒪ ᐳᕉ ᐃᑭᐊᓚᔪᖃᕐᓂᕋᐃᓯᒪᖕᒥᔪᑦ ᐊᒥᓱᒻᒪᕆᐊᓗᖕᓂᒃ.

“ᓄᓇᓕᖕᔪᐊᑦ ᐃᓱᒪᒋᔭᖃᑦᑎᐊᖅᑐᑦ ᓄᓇᖃᖅᑳᖅᑐᑦ ᐱᔪᓐᓇᐅᑎᖏᑦ ᐱᒻᒪᕆᐊᓘᓂᖏᓐᓂᒃ ᐱᓇᓱᒋᐊᖃᖅᑐᑦ ᐳᕋᔨᐅᓪ ᒫᓐᓇ ᐊᑐᖅᑕᖓᑕ ᐊᓯᐊᒎᙶᖅᑎᑦᑎᓇᓱᒃᑎᑦᑎᓗᑎᒃ,” ᓵᒻᐳ ᑐᕈ ᐅᖃᖅᑐᖅ.

“ᐱᒃᑯᒋᕙᕗᑦ ᕗᕌᓐᔅ ᒐᕙᒪᖓᑦ ᑲᑎᒪᔾᔪᑎᒃᓴᓂ G7 ᑲᑎᒪᓂᕐᒧᐊᕐᒥ ᐅᕙᓃᓐᓂᐊᖁᔨᓂᖓ ᐱᐊᕆᑦᔾᒥᑦ (Biarritz), ᐊᒻᒪᓗ ᑕᒪᓐᓇ ᓄᓇᕐᔪᐊᓕᒫᒧᑦ ᐱᒻᒪᕆᐊᓘᓂᕋᖅᖢᓂᐅᒃ.”

ᐅᕙᓂᓕ G7-ᒥ, ᓯᕗᓕᐅᕐᑎᐅᔪᑦ ᐅᑯᓇᓂ ᑲᓇᑕ, ᕗᕌᓐᔅ, ᔪᒪᓂ, ᐃᑕᓕ, ᔪᐹᓐ, ᔫᓇᐃᑕᑦ ᑭᖕᑕᒻ ᐊᒻᒪᓗ ᔫᓇᐃᑕᑦ ᓯᑕᐃᑦᔅ ᑐᓴᖅᑎᑦᑎᓚᐅᕐᒪᑕ ᐊᒥᐊᓕᒐᐃᑦ ᑮᓇᐅᔭᖓᒍᑦ $20 ᒥᓕᐊᓐᑖᓚᓂ ᐃᑲᔫᑎᐅᓂᐊᖅᑐᓂᒃ ᐃᑯᐊᓚᔪᓂᒃ, ᐅᑯᓗᐊ ᕘᕌᓐᔅᒥᐅᑦ ᐅᓇᑕᖅᑐᒃᓴᓂᒃ ᐃᑲᔪᕆᐊᖅᑎᑦᑎᓗᑎᒃ.

ᑲᓇᑕᒥᐅᑦ ᐃᓱᒪᔪᑦ ᓇᒡᓯᐅᔾᔨᒃᑲᓐᓂᕐᓂᐊᕈᒪᓪᓗᑎᒃ $15 ᒥᓕᐊᓐ ᑖᓚᓂᒃ ᐊᒻᒪ ᖃᖓᑕᓲᓂᒃ ᖃᑦᑎᕈᑎᓕᖕᓂᒃ, ᐃᓄᐃᑦ ᓄᓇᕐᔪᐊᕐᒥᑦ ᑲᑎᒪᔨᕐᔪᐊᖏᑦ ᐅᖃᓚᐅᕐᑐᑦ.

ᐃᓄᐃᑦ ᐅᑭᐅᕐᑕᖅᑐᕐᒥ ᑲᑎᒪᔨᕐᔪᐊᖏᑦ ᐊᒻᒪ ᖁᕕᐊᒋᔭᖃᓚᐅᕐᒥᔪᑦ ᖃᕋᓴᐅᔭᒃᑯᑦ ᐱᓇᓲᑎᐅᔪᑦ ᐅᑯᖓ ᐃᐅᕈᑉᒥ ᑲᑐᔾᔨᖃᑎᒌᑦ ᐊᒻᒪ ᔫᓇᐃᑕᑦ ᓇᐃᓴᓐᔅᑯᑦ ᖃᓄᐃᑕᐅᔾᔪᑎᐅᓇᔭᖅᑐᓂᒃ ᐅᑯᓄᖓ ᐳᕋᔨᐅᓪ ᒐᕙᒪᖏᓄᑦ ᐅᓇ ᓈᒻᒪᙱᓕᐅᕈᑎ ᐱᓕᕆᐊᖑᖁᔭᐅᓪᓗᓂ ᓇᐹᖅᑐᖃᕈᓐᓃᑐᐃᓐᓇᕆᐊᖃᕐᓂᕐᒧᑦ.

“ᐅᒃᐱᕈᓱᒃᑲᑦᑕ ᐊᓯᖏᑦ ᓄᓇᓕᕐᔪᐊᑦ, ᐃᓚᐅᓗᓂ ᑲᓇᑕ, ᓴᙱᔪᒃᑯᑦ ᖃᓄᐃᓕᐅᕈᓐᓇᕐᓂᖏᓐᓂᒃ,” ᐅᖃᖅᑐᖅ ᐃᐅᓪ-ᑲᓇᔪᒃ. “ᑲᓇᑕᒥᐅᑦ ᐱᔭᒃᓴᖃᕐᒪᑕ ᑕᒪᑐᒧᖓ ᓂᐱᖃᕆᐊᖃᕐᓂᕐᒥᒃ.”

ᐅᓇ ᔫᓇᐃᑕᑦ ᓇᐃᓴᓐᑯᑦ ᓯᓚᒧᑦ ᖃᓄᐃᓕᐅᕈᑎᒃᓴᓄᑦ ᑲᑎᒪᓂᒃᓴᖅ ᑎᑭᐅᑎᓕᕐᒪᑦ ᑕᖅᑭᐅᙱᑦᑐᒥᓪᓘᓐᓃᑦ ᐊᒻᒪᓗ ᐊᕐᕌᒍᑕᒫᑦ ᑲᑎᒪᓂᕐᔪᐊᖓ ᔫᓇᐃᑕᑦ ᓇᐃᓴᓐᑯᑦ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᑲᑎᒪᓂᖅ ᐋᕿᒃᑕᐅᓯᒪᓪᓗᓂ ᑎᓯᐱᕆᒥ, ᐅᖃᖅᑐᖅ “ᑕᐃᒪᓕ ᑕᒪᓐᓇ ᓈᒻᒪᓈᕐᒪᕆᒃᐳᖅ, ᑐᐊᕕᕐᓇᖅᑐᒥ ᐅᑕᖅᑭᓐᓇᕈᓐᓃᕐᓗᓂ, ᑕᒪᓐᓇ ᐱᒋᐊᓕᕈᑎᐅᓕᖅᓗᓂ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᖃᓄᐃᓕᐅᕈᑎᒃᓴᓂᒃ ᓄᓇᕐᔪᐊᑎᒍᑦ.”

“ᖃᐅᔨᒪᕗᒍᑦ ᑕᒪᑐᒧᖓ ᖃᓄᐃᓕᐅᕆᐊᖃᕐᓂᑦᑎᓐᓂᒃ ᐃᓅᓪᓗᑕ, ᐃᑲᔪᕐᖢᑎᒍᑦ ᓄᓇᖃᖅᑳᖅᑐᑦ ᖃᑕᙳᑎᕗᑦ, ᐊᒻᒪᓗ ᒐᕙᒪᐅᔪᓄᑦ ᐅᖃᕈᓐᓇᖅᖢᑕ ᓄᓇᖃᖅᑳᖅᑐᓂᒃ ᐃᑲᔪᖅᑐᐃᖁᓗᒋ ᐊᒻᒪᓗ ᑐᐊᕕᕐᓇᖅᑐᓕᕆᓂᕐᒥ ᐱᓕᕆᐊᖃᕐᐸᒡᓗᑎᒃ ᐆᑐᓇᖅ ᐃᑲᔪᖅᑕᐅᔭᕆᐊᓕᒃᑯᑦ.”

ᓄᓇᐃᓐᓇᓂ ᐃᑭᑦᑐᖃᑲᑕᖕᒥᖕᒪᑦ ᐊᓛᔅᑲᒥ ᐊᒻᒪ ᑲᓛᖡᑦ ᓄᓇᖓᓂᑦ ᐊᐅᔭᐅᔪᖅ.