ᐃᓄᐃᑦ ᓄᓇᖓᑦ ᒫᓐᓇ ᐃᓕᓴᕆᔭᐅᓕᕐᑐᖅ ‘ᐃᒻᒥᒃᑰᕐᑐᖅ ᓄᓇᒋᔭᐅᔪᖅ’

ᑐᕉᑑ, ᐅᐱᐊᑦ ᐅᖃᕐᑐᑦ ᓄᑖᖅ ᐊᑐᐊᒐᖅ ᐱᐅᓯᕚᓪᓕᖅᑎᑦᑎᓂᐊᕐᓂᖓᓂᒃ ᐅᑭᐅᕐᑕᖅᑐᕐᒥ ᐱᖃᕈᑎᒋᔭᐅᔪᒥᒃ, ᐃᓄᐃᑦ ᓂᐱᖃᖅᑎᑕᐅᓂᕐᓴᐅᓕᕐᓗᑎᒃ ᐅᑭᐅᕐᑕᖅᑐᕐᒧᑦ ᐃᓱᒪᓕᐅᕈᑎᑎᒍᑦ

ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓ ᓇᐃᑕᓐ ᐅᐱᐊᑦ, ᓴᐅᒥᐊᓂ, ᑐᓵᔪᖅ ᐳᕋᐃᒻ ᒥᓂᔅᑕ ᔭᔅᑎᓐ ᑐᕉᑑ ᐅᖃᓪᓚᒃᑎᓪᓗᒍ ᑐᓴᒐᒃᓴᓕᐅᖅᑎᓄᑦ ᒐᕙᒪᖓᑕ ᓄᑖᖅ ᐃᓄᐃᑦ ᓄᓇᖓᓄᑦ ᐊᑐᐊᒐᕐᒥ ᑐᓴᒐᒃᓴᓕᐅᕐᓇᒥ ᐋᑐᕚᒥ ᐄᐳᕈᓪ 21-ᖑᑎᓪᓗᒍ. (ᐊᔾᔨᓕᐅᕆᔨ ᑰᕆ ᓚᐅᕌᒃ)

By ᒧᕆᐊᓪ ᔭᒫᓪ

For English version, please see Inuit Nunangat now recognized as ‘distinct region’

ᓄᑖᖅ ᒐᕙᒪᑐᖃᒃᑯᑦ ᐊᑐᐊᒐᖓ ᐃᓕᓴᖅᓯᔾᔪᑎ ᐃᓄᐃᑦ ᓄᓇᖓ ᐃᒻᒥᒃᑰᕐᓂᖓᓂ ᑐᑭᖃᖅᑐᖅ ᐃᓄᐃᑦ ᐅᑭᐅᕐᑕᖅᑐᕐᒥ ᐱᕙᓪᓕᐊᔪᓕᕆᓂᒃᑯᑦ ᓂᐱᖃᕈᓐᓇᕐᓂᕐᓴᐅᓂᐊᓕᕐᓂᖏᓐᓂᒃ, ᐅᖃᓚᐅᕐᑐᖅ ᐳᕋᐃᒻ ᒥᓂᔅᑕ ᔭᔅᑎᓐ ᑐᕉᑑ.

ᑐᕉᑑ ᐊᒻᒪ ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓ ᓇᐃᑕᓐ ᐅᐱᐊᑦ ᑐᓴᕐᑎᑦᑎᓚᐅᕐᒪᑕ ᓄᑖᒥ ᐊᑐᐊᒐᕐᒥ ᐋᑐᕚᒥ ᐄᐳᕈᓪ 21-ᖑᑎᓪᓗᒍ.

“ᐃᓛᓐᓂᒃᑯᑦ ᒐᕙᒪᒃᑯᑦ ᐅᖃᐅᓯᖃᖃᑦᑕᕐᒪᑕ ᐋᕿᒋᐊᒃᑲᓐᓂᕐᓂᕐᒥᒃ ᒪᐅᓇ ᒪᒥᐊᓂᕋᕐᓂᒃᑯᑦ. ᐃᓛᓐᓂᒃᑯᑦ ᒐᕙᒪᒃᑯᑦ ᐅᖃᐅᓯᖃᖃᑦᑕᕐᒪᑕ ᐋᕿᒋᐊᒃᑲᓐᓂᕐᓂᕐᒥᒃ ᐃᑲᔫᑎᒃᓴᓕᕆᓂᒃᑯᑦ ᓇᓕᒧᒌᒃᑎᑕᐅᔾᔪᒥᒍᑎᒃᓴᓂᒃ,” ᑐᕉᑑ ᐅᖃᓚᐅᕐᑐᖅ ᑐᓴᒐᒃᓴᓕᐅᕐᑎᓄᑦ.

“ᐅᓪᓗᒥ ᐅᓇ ᑐᓴᒐᒃᓴᖅ ᐱᔾᔪᑎᖃᕐᑐᖅ ᐊᓯᙳᖅᑎᑦᑎᓇᓱᖕᓂᕐᒥᒃ ᓈᒥᒪᙱᓕᐅᕈᑎᐅᕙᒃᑐᓂᒃ ᒐᕙᒪᒃᑯᑎᒍᑦ, ᒪᑯᐊ ᐃᓱᒪᓕᐅᕆᔾᔪᑎᐅᔪᑦ ᐅᑭᐅᕐᑕᖅᑐᕐᒧ ᐃᓄᐃᑦ ᐃᓚᐅᑎᑕᐅᙱᖢᑎᒃ ᐃᓱᒪᓕᐅᕆᓇᓱᒃᑎᓪᓗᒋᑦ.”

$25 ᒥᓕᐊᓐ ᑖᓚᓂ ᐊᕐᕌᒍᓄᑦ ᑕᓪᓕᒪᓄᑦ, ᐅᓇ ᓄᑖᖅ ᐊᑐᐊᒐᖅ ᒐᕙᒪᑐᖃᒃᑯᓐᓄᑦ ᑐᑭᒧᐊᕈᑎᐅᓂᐊᕐᑐᖅ ᐃᓄᐃᑦ ᐱᔪᓐᓇᐅᑎᖏᓐᓄᑦ, ᐱᓕᕆᐊᕆᔪᒪᔭᖏᓐᓄᑦ ᐊᒻᒪᓗ ᖃᓄᐃᓕᐅᕈᑎᓄᑦ.

ᐊᑐᕐᑕᐅᓂᐊᕐᒥᔪᖅ ᓇᓗᓇᐃᔭᕈᑎᐅᓗᓂ ᖃᓄᐃᓕᖓᓂᐊᕐᓂᖏᓐᓂᒃ ᐊᑐᐊᒐᐃᑦ, ᐱᓕᕆᐊᒃᓴᐃᑦ ᐊᒻᒪ ᐱᔨᑦᑎᕋᐅᑎᑦ ᐊᒃᑐᐃᓇᔭᕐᑐᑦ ᐃᓄᐃᑦ ᓄᓇᖓᓂᒃ ᐅᕝᕙᓘᓐᓃᑦ ᐃᑲᔫᑎᓄᑦ ᐃᓄᖕᓄᑦ ᐅᕘᓇᓂ ᒐᕙᒪᒃᑯᑦ ᑐᓴᒐᒃᓴᖓᒍᑦ.

ᑐᓴᒐᒃᓴᖓᓂ ᑐᕉᑑ ᐅᖃᓚᐅᕐᑐᖅ ᐊᑐᐊᒐᖅ ᑐᑭᖃᕐᑐᖅ ᐅᑯᐊᑐᐊᖅ ᒐᕙᒪᒃᑯᑦ ᓄᓇᖃᖅᑳᖅᑐᓕᕆᔨᒃᑯᑦ ᐅᑭᐅᕐᑕᖅᑐᕐᓕᕆᓂᕐᒧᑦ ᐅᕝᕙᓘᓐᓃᑦ ᓄᓇᖃᖅᑳᖅᑐᓄᑦ ᐱᔨᑦᑎᕋᐅᑎᑦ ᐱᓕᕆᔪᑑᖃᑦᑕᔾᔮᔪᓐᓃᕐᓂᖏᓐᓂᒃ ᐃᓄᖕᓄᑦ ᐊᐅᓚᑕᐅᔭᕆᐊᓕᖕᓂᒃ.

ᓇᐃᑕᓐ ᐅᐱᐊᑦ, ᐊᖓᔪᖅᑳᖅ ᐃᓄᐃᑦ ᑕᐱᕇᑦ ᑲᓇᑕᒥ, ᐅᖃᓪᓚᒃᑐᖅ ᑐᓴᒐᒃᓴᓕᐅᕐᓇᒥ ᐋᑐᕚᒥ, ᐅᓇ ᐳᕋᐃᒻ ᒥᓂᔅᑕ ᔭᔅᑎᓐ ᑐᕉᑑ ᑐᓵᑎᓪᓗᒍ. ᑐᕉᑑ ᐊᒻᒪ ᐅᐱᐊᑦ ᑐᓴᒐᒃᓴᖃᓚᐅᕐᒪᑕ ᐃᓄᐃᑦ ᓄᓇᖓᓄᑦ ᐊᑐᐊᒐᕐᒥᒃ, ᑐᑭᒧᐊᕈᑎᐅᓇᔭᖅᖢᓂ ᒐᕙᒪᑐᖃᒃᑯᓐᓄᑦ ᐱᓕᕆᖃᑎᖃᖅᑎᓪᓗᒋᑦ ᐃᓄᖕᓂ. (ᐊᔾᔨᓕᐅᕆᔨ ᑰᕆ ᓚᐅᕌᒃ)

ᑭᓯᐊᓂᓕ, ᑕᒪᕐᒥ ᒐᕙᒪᓕᕆᕝᕕᐅᔪᑦ ᑕᒪᐅᖓ ᐅᖃᖃᑎᖃᖃᑦᑕᕆᐊᖃᖅᑐᑦ ᐊᒻᒪ ᐃᓚᐅᑎᑦᑎᕙᒡᓗᑎᒃ ᐃᓄᖕᓂᒃ ᐃᓱᒪᓕᐅᕆᓂᒃᑯᑦ.

“ᑕᒪᐃᓐᓂ ᐱᓕᕆᕝᕕᐅᕙᒃᑐᓂᒃ ᒐᕙᒪᒃᑯᓐᓂᒃ ᑕᐃᒪᓕ ᑐᓚᒃᑕᕐᕕᒃᒥᑦ ᓴᓇᔪᒪᒃᐸᑕ ᐅᑭᐅᕐᑕᖅᑐᕐᒥ, ᓄᑖᒥᓪᓘᓐᓃᑦ ᒥᑕᕐᕕᒃᒥᑦ, ᐃᓱᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᑐᐊᒐᓂᒃ ᐋᖅᑭᒃᓱᐃᕙᓪᓕᐊᓂᕐᒧᑦ, ᐃᑲᔪᖅᑕᐅᔪᒪᓗᓂ ᐃᖃᓗᓕᕆᔨᑦ — ᑕᐃᒪᓕ ᐱᓕᕆᖃᑎᒌᖕᓂᒃᑰᕋᔭᖅᖢᑎᒃ ᐅᖃᖃᑎᖃᕐᓗᑎᒃ ᐃᓄᖕᓂᒃ,” ᑐᕉᑑ ᐅᖃᕐᑐᖅ.

“ᐅᓇ ᐊᓯᔾᔨᕈᑎ ᐸᕐᖓᐃᕈᑎᐅᓂᐊᕐᑐᖅ ᐊᖏᔪᒻᒪᕆᖕᒥᒃ, ᐊᕐᕌᒍᓄᑦ ᐊᒡᒋᖅᑐᓄᑐᐊᙳᙱᑦᑐᖅ ᑭᓯᐊᓂᓕ ᐊᕐᕌᒍᒐᓴᒻᒪᕆᖕᓄᑦ.”

ᐅᕘᓇᓕ ᐅᐱᐊᑦᑯᑦ, ᐃᓄᐃᑦ ᓄᓇᖓᓄᑦ ᐊᑐᐊᒐᖅ ᐱᓪᓚᕆᐅᔪᖅ ᓲᖃᐃᒻᒪ ᑐᑭᒧᐊᕈᑎᐅᓂᐊᕐᒪᑦ ᒐᕙᒪᑐᖃᒃᑯᓐᓄᑦ ᖃᓄᖅ ᐃᓄᖕᓂ ᐱᓕᕆᖃᑎᖃᖃᑦᑕᕐᓂᕐᒥᒃ, ᐱᓗᐊᕐᑐᒥᒃ ᐃᓚᐅᑎᑕᐅᒋᒻᒪᑕ ᒐᕙᒪᑐᖃᒃᑯᑦ ᐊᓪᓚᓄᑦ ᒪᓕᒐᕐᒥ.

“ᓄᓇᖃᖃᑕᐅᒐᑦᑕ ᐳᕌᕕᓐᓯᓂᒃ ᐊᒻᒪ ᑎᐅᕆᑑᕆᓂᒃ, ᐱᓕᕆᐊᖃᖃᑦᑕᕋᑦᑕ ᒐᕙᒪᒃᑯᑎᒍᑦ ᐊᔾᔨᒋᙱᑕᖓᒍᑦ, ᑕᐃᒪᓐᓇᓗ ᐊᔾᔨᒋᙱᖢᓂᐅᒃ ᐊᓪᓚᖓᔪᓂᒃ ᐊᒻᒪᓗ ᐊᓪᓚᓂᒃ,” ᐅᖃᕐᑐᖅ.

“ᐱᑕᖃᕆᐊᖃᕐᓂᖓ ᐊᑐᐊᒐᖅ ᑕᐃᒪᓐᓇ ᒐᕙᒪᒃᑯᓐᓂᒃ ᖃᓄᐃᓕᐅᕆᐊᖃᕐᓂᖏᓐᓂᒃ ᐃᓄᐃᑦ ᒥᒃᓵᓄᑦ ᐋᖅᑭᒃᓯᒪᔪᖅ, ᐊᒻᒪᓗ ᖃᓄᖅ ᐃᓱᒪᒋᔭᖃᕆᐊᖃᕐᓂᖏᓐᓂᒃ ᐃᓄᐃᑦ ᓇᖕᒥᓂᖅ ᐱᓇᓱᐊᕈᓐᓇᕐᓂᖏᓐᓂᒃ.”

ᐊᑐᐊᒐᖅ ᐃᓕᓴᖅᓯᓯᒪᔾᔪᑎ ᐃᓄᐃᑦ ᓄᓇᖓᑦ ᐃᒻᒥᒃᑰᖓᓂᖓᓂᒃ ᓄᓇᑎᒍᑦ, ᐃᓕᖁᓯᑎᒍᑦ ᐊᒻᒪᓗ ᒪᓕᒐᓕᕆᓂᒃᑯᑦ, ᐅᑯᑎᒎᓇᖅ ᐃᓄᕕᐊᓗᐃᑦ ᓄᓇᖓᑦ, ᓄᓇᕗᑦ, ᓄᓇᕕᒃ ᐊᒻᒪ ᓄᓇᑦᓯᐊᕗᑦ.

ᐅᐱᐊᑦ ᐅᖃᒪᐅᕐᑐᖅ ᐃᓕᓴᕆᔭᐅᓯᒪᓂᖅ ᐱ’ᒻᒪᕆᐊᓘᓂᖓᓂᒃ ᓄᓇᓕᕆᓂᒃᑯᑦ ᒪᓕᒐᓕᕆᓂᖅ ᐊᓯᙳᕐᓯᒪᓂᖓᓄᑦ ᐊᒻᒪᓗ ᐅᓗᕆᐊᓇᕈᑎᓄᑦ ᑲᓇᑕᐅᑉ ᐅᑭᐅᕐᑕᖅᑐᖓ ᐊᓯᖏᓐᓂᒃ ᓄᓇᓕᕐᔪᐊᓂᒃ.

“ᐃᓄᐃᑦ ᑐᙵᕕᐅᖕᒪᑕ ᐅᑭᐅᕐᑕᖅᑐᕐᒥ ᐱᖁᑎᖃᕐᓂᕐᒥᒃ ᑲᓇᑕᒥ,” ᐅᖃᕐᑐᖅ.

ᐆᒧᖓᓕ ᑐᕉᑑᒧᑦ, ᓯᕗᓂᐊᓂ ᒐᕙᒪᐅᓂᑯ ᑲᓇᑕᐅᑉ ᐅᑭᐅᕐᑕᖅᑐᖓᓂ ᐱᖁᑎᖃᕐᓂᖅ ᐅᓇᑕᖅᑐᒃᓴᑎᒎᕐᓂᑰᖕᒪᓐ.

ᐆᒧᖓ ᓄᑖᒧᑦ ᐊᑐᐊᒐᕐᒧᓪᓕ ᒫᓐᓇ ᒐᕙᒪᑐᖃᐅᔪᑦ “ᐱᖁᑎᖃᕐᓂᖅ ᐅᑭᐅᕐᑕᖅᑐᕐᒥ ᓄᓇᖃᖅᑐᓄᑦ ᐊᖅᑯᓵᕆᐊᖃᕐᓂᐊᕐᑐᑦ ᓄᓇᖃᖅᑐᑐᖃᖅᑎᒍᑦ ᐊᕐᕌᒍᒐᓴᖕᓂ.”

“ᓯᕗᒧᒃᐸᓪᓕᐊᒐᓗᐊᕈᑦᑕ ᐆᒥᖓ ᓄᐊᑦ ᐊᒥᐊᓕᑲᒥᒃ ᓯᓚᓐᓂᐊᕐᓂᒃᑯᑦ ᓴᐳᓐᓂᐊᖅᑐᓕᕆᓂᕐᒥᒃ (NORAD) ᐱᐅᓯᕚ[ᓕᖅᑎᑦᑎᓇᓱᖕᓂᒃᑯᑦ ᐊᒻᒪ ᐃᑲᔪᕈᑎᖃᕐᓂᒃᑯᑦ ᓴᐳᓐᓂᐊᕐᓂᕐᒥᒃ ᐅᑭᐅᕐᑕᖅᑐᕐᒥ … ᑕᒪᓐᓇ ᐱᓕᕆᐊᖑᔭᕆᐊᖃᕐᑐᖅ ᐅᖃᖃᑎᖃᑲᑕᖕᓂᒃᑯᑦ ᐊᒻᒪ ᐱᓕᕆᖃᑎᖃᑲᑕᖕᓂᒃᑯᑦ ᐃᓄᖕᓂᒃ, ᑭᓯᐊᓂᓕ ᐃᓱᒪᔭᕆᐊᓖᑦ, “ᑕᒫᓂ ᓄᑖᓂ ᒥᑦᑕᕐᕕᓕᐅᕐᓂᐊᕈᒪᒍᑦᑕ ᑕᒪᓐᓇ ᓈᒻᒪᒐᔭᕐᒪᑦ ᐃᓄᐃᑦ ᓯᕗᓪᓕᐅᖁᔭᖏᓐᓅᑦ ᐊᒻᒪ ᐱᕙᓪᓕᐊᔪᓕᕆᓂᕐᒧ?” ᐅᖃᕐᑐᖅ.

“ᖃᓄᕐᓕ ᐃᑲᔫᑎᒃᓴᓕᕆᔪᓐᓇᕋᑦᑕ ᓴᙱᒃᑎᕚᓪᓕᕈᑎᐅᔪᓐᓇᖅᑐᓂᒃ ᐊᒻᒪ ᐊᑐᖅᑐᓂᒃ ᐃᓄᖕᓄᑦ ᑕᒪᑐᒥᖓ ᓄᓇᒥ ᓴᐳᔾᔨᓯᒪᐃᓐᓇᐅᔭᖅᑐᓄᑦ ᐊᒻᒪ ᓄᓇᖃᐃᓐᓇᐅᔭᖅᑐᓄᑦ?.”

Share This Story

(0) Comments

Join the Conversation

Your email address will not be published. Required fields are marked *

*