ᐃᓄᐃᑦ ᓄᓇᖓᓂᒃ ᐃᒡᓗᓕᕆᓂᕐᒧᑦ ᖃᓄᐃᓕᐅᕈᑎᒃᓴᑦ ᓂᕆᐅᓇᓗᐊᙱᓚ
“ᑭᓇᑐᐃᓐᓇ ᐃᓱᒪᓕᐅᕆᓪᓚᕆᒍᒪᙱᒻᒪ ᑮᓇᐅᔭᓂ ᐊᑐᕐᓂᐊᖅᑎᓪᓗᒋ, ᖃᓄᐃᓕᐅᕈᑎᒋᓂᐊᕐᓗᒋ ᐅᕝᕙᓘᓐᓃᑦ ᐃᒡᓗᓕᐅᕐᓂᐊᕐᓗᑎᒃ”
ᐃᒡᓗᒃᓴᐃᑦ ᓴᓇᔭᐅᕙᓪᓕᐊᔪᑦ ᑰᔾᔪᐊᕐᒥ 2015-ᖑᑎᓪᓗᒍ. (ᐊᔾᔨᙳᐊᖁᑎᒋᔭᐅᔪᖅ)
For an English version of this editorial, see Inuit Nunangat Housing Strategy offers little hope.
ᑎᐱᐊᓗᐊ ᑭᓱᖃᙱᓗᐊᒧᑦ ᐅᕙᙵᑦ ᐃᓄᐃᑦ ᓄᓇᖓᓂ ᐃᒡᓗᓕᕆᓂᕐᒧᑦ ᖃᓄᐃᓕᐅᕈᑎᒃᓴᓂᒃ, “ᐋᖅᑭᒃᓱᐃᖃᑎᒌᖕᓂᒃᑯᑦ” ᐅᑯᓇᙵᑦ ᑲᓇᑕᐅᑉ ᒐᕙᒪᖓᓂᒃ ᐊᒻᒪ ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪ ᓴᖅᑭᑕᐅᓪᓗᑎᒃ ᐄᐳᕈ 3-ᖑᓚᐅᕐᑐᒥ, ᓴᙱᓗᐊᒧᑦ ᑎᐱᖓ ᐊᔪᕐᓇᖅᑐᖅ ᐱᒃᑲᖅᑎᑦᑎᔭᕆᐊᒃᓴᖅ ᐱᒋᐊᖅᑎᑦᑎᔨᖏᑦ ᐃᒪᓐᓇ ᐃᒋᑦᑎᐊᓪᓚᓚᐅᖅᖢᑎᒃ ᕿᒫᓕᖅᖢᑎᒃ.
ᐅᓇ ᐱᒻᒪᕆᐅᓂᕋᐃᔪᖅ ᐅᒃᐱᕆᙱᒃᑯᕕᐃᒃ, ᓴᕿᑎᑦᑎᓯᒪᔪᒍᑦ ᑕᕐᕋᖓᓂ ᖃᓄᐃᓕᐅᕈᑎᒃᓴᐃᑦ ᐊᑖᓃᑦᑐᖅ ᖃᕋᓴᐅᔭᒃᑯᑦ ᓴᕿᔮᖅᑐᒥᑦ ᐅᕙᓂ ᐅᓂᒃᑳᒥ, ᑕᐃᒪᓕ ᐅᖃᓕᒫᕈᓐᓇᖅᑕᑦ ᐃᓕᖕᓄᑦ.
ᑕᑯᔪᓐᓇᖅᑐᑎᑦ ᑎᑎᖃᑦ ᐃᓗᐊᓂ, ᑖᓐᓇᓗ ᑲᓇᑕᐅ ᐊᒻᒪ ᐃᓄᐃᑦ ᑕᐱᕇᑦ ᑲᓇᑕᒥ ᑕᕐᓴᖏᓐᓂᒃ ᓴᕿᔮᖅᑎᑦᑎᓪᓗᓂ, ᑭᓇᑐᐃᓐᓇ ᐅᖃᕐᓯᒪᙱᑦᑐᖅ ᑮᓇᐅᔭᓂ ᐊᑐᕐᓂᐊᕐᓂᕋᖅᖢᓂ, ᖃᓄᐃᓕᐅᕐᓂᐊᕐᓂᕋᖅᖢᑎᒃ ᐅᕝᕙᓘᓐᓃᑦ ᐃᒡᓗᓕᐅᕐᓂᐊᕐᓂᕋᖅᓗᑎᒃ.
ᐊᓯᐊᓂᒃ ᐃᓱᒫᓘᑎᑕᖃᕈᓂ, ᓱᖁᑕᐅᓇᔭᙱᑦᑐᖅ. ᒐᕙᒪᐅᔪᑦ ᐊᒻᒪ ᒐᕙᒪᓕᕆᔨᐅᖂᔨᔪᑦ ᑲᑐᔾᔨᖃᑎᒌᖑᔪᑦ ᐋᕿᒃᓱᐃᖃᑦᑕᕐᒪᑕ ᐊᑐᐊᒐᕐᓂᒃ ᑎᑎᖃᑎᒍᑦ ᑭᒃᑯᑐᐃᓐᓇᕐᓄᑦ ᐅᖃᓕᒫᖅᑕᐅᕙᙱᑦᑐᓂᒃ ᐊᒻᒪ ᒪᓕᒃᑕᐅᕙᙱᖢᑎᒃ ᑭᓇᑐᐃᓐᓇᕐᒧᑦ.
ᑭᓯᐊᓂᓕ ᐃᒡᓗᓕᕆᓂᖅ ᒥᑭᑦᑐᑰᓘᙱᒻᒪᑦ. ᑲᓇᑕᐅᑉ ᐅᑭᐅᕐᑕᖅᑐᖓᓂ ᐃᒡᓗᑭᒃᓴᓗᐊᕐᓂᖅ ᐃᓅᖃᑎᒌᖕᓂᒃᑯᑦ ᐊᑲᐅᙱᓕᐅᕈᑎᐅᒻᒪᕆᖕᒪᑦ, ᐊᒃᑐᐃᓯᒪᓪᓗᓂ ᐃᓱᒪᒧᑦ ᖃᓄᐃᑦᑕᐃᓕᓂᕐᒧᑦ, ᐃᓕᓐᓂᐊᑦᑎᐊᙱᔾᔪᑎᐅᓕᖅᖢᓂ, ᐊᒻᒪᓗ ᖃᖓᑦᑎᐊᓵ ᖁᐊᕐᓵᕐᓇᒻᒪᕆᓚᐅᑲᒃᑐᖅ ᐳᕙᒡᓗᖕᓇᖅ ᐊᒻᒪᓗ ᐊᓯᖏᓐᓂᒃ ᐊᐃᑦᑑᑎᐅᔪᓐᓇᖅᑐᓂᒃ ᐋᓐᓂᐊᕆᔭᐅᕙᒃᑐᓂᒃ.
ᐃᒡᓗᓕᕆᓂᕐᒧᑦ ᖃᓄᐃᓕᐅᕈᑎᒃᓴᖅ ᑕᒪᑐᒥᖓ ᖃᐅᔨᒪᓂᕋᖅᑐᑦ, ᐊᒻᒪᓗ ᑲᑎᑎᑦᑎᓪᓗᑎᒃ ᐊᔾᔨᒌᙱᑦᑑᑎᓂ ᖃᐅᔨᒪᔭᐅᔪᑐᖃᐅᓕᕐᑐᓂᒃ, ᐊᑐᕐᓂᖏᓐᓂᒃ, ᐅᖃᐅᓯᐅᖏᓐᓇᐅᔭᓗᐊᒧᓪᓗ ᑐᑭᓪᓚᕆᖓᓂ ᐊᓯᐅᑐᐃᓐᓇᖅᑰᔨᓕᖅᖢᓂ.
ᑭᓯᐊᓂᓕ ᒪᓂᒻᒪᐃᓯᒪᙱᒻᒪᑦ ᓯᕗᓂᒃᓴᒥ ᓂᕆᐅᒍᑎᐅᔪᓐᓇᕐᓂᐊᖅᑐᓂᒃ, ᐱᓗᐊᖅᑐᒥᒃ ᓄᓇᕗᒥ, ᑕᒫᓂᓗ ᖁᑦᑎᖕᓂᖅᐹᖑᓪᓗᑎᒃ ᐃᓄᒋᐊᓗᐊᖅᐸᑦᑐᓂᒃ ᐊᖏᕐᕋᖃᕐᑐᓂᒃ (56.4 ᐳᓴᓐᑦ), ᖁᑦᑎᖕᓂᖅᐹᖅ ᐃᓄᐃᑦ ᐃᒡᓗᖏᑦ ᓄᑖᙳᕆᐊᖅᑕᐅᔭᕆᐊᖃᖅᑐᓂᒃ (34.3 ᐳᓴᓐᑦ), ᐊᒻᒪᓗ ᖁᑦᑎᖕᓂᖅᐹᙳᓪᓗᑎᒃ ᐃᒡᓗᐃᑦ ᐊᒥᒐᓗᐊᖅᓂᖏᑦᑎᒍᑦ (3,500, ᒫᓃᒐᓱᒋᔭᐅᑎᓪᓗᒍ ᑮᓇᐅᔭᖅᑐᔪᑦ ᐊᑭᖏᑦᑎᒍᑦ $1.7 ᐱᓕᐊᓐ).
ᑐᑭᓯᓇᓗᐊᙱᑦᑐᑦ ᐅᖃᐅᓯᐅᙱᓐᓇᐅᔭᓗᐊᖅᑐᑦ
ᐃᒪᓐᓇᖔᕐᓕ, ᒐᕙᒪᑐᖃᒃᑯᑦ ᐊᒻᒪᓗ ᐅᑯᐊ ᑎᓴᒪᓐ ᐊᕕᒃᑐᕐᓯᒪᓂᒃᑯᑦ ᐃᓄᐃᑦ ᑲᑐᔾᔨᖃᑎᒌᖏᑦ ᐃᖕᒥᖕᓂᒃ ᐱᒃᑯᒋᑲᑕᑐᐃᓐᓇᖅᐳᑦ ᖃᓄᐃᓕᐅᕐᓯᒪᔭᖏᓐᓂᒃ 2016-ᓗ 2018-ᓗ ᐊᑯᓐᓂᖓᓂᒃ. ᓯᕗᓂᒃᓴᒧᓪᓕ, ᐅᖃᐅᓯᖃᖅᑐᑦ ᑐᑭᓯᓇᓗᐊᙱᑦᑐᓂᒃ ᐅᖃᐅᓯᐅᙱᓐᓇᐅᔭᓗᐊᖅᑐᓂᒃ ᐊᓯᖏᓐᓂᒡᓗ ᐅᖃᐅᓯᖃᓗᐊᕋᑎᒃ.
ᓲᕐᓗ ᐅᓇ ᐃᓱᒪᒋᓪᓗᒍ, ᖃᐅᔨᒪᔭᐅᑦᑎᐊᙱᓐᓂᕐᓴ ᑭᓯᐊᓂᓕ ᐱᒻᒪᕆᐅᖃᑕᐅᔪᖅ ᐃᒡᓗᑭᒃᓴᓗᐊᕐᓂᕐᒧᑦ: ᖁᕝᕙᖅᐸᓪᓕᐊᓗᐊᖅᑐᐊᓗᐃᑦ ᐊᐅᓚᑦᑎᔾᔪᑎᓂᒃ ᐊᒻᒪ ᑲᒪᒋᔭᖃᐃᓐᓇᕐᓂᕐᒧᑦ ᒫᓐᓇ ᐃᒡᓗᖁᑎᒋᔭᐅᔪᓄᑦ.
ᑕᖅᑭᐅᓚᐅᕐᑐᖅ ᐃᓱᓕᓕᖅᑎᓪᓗᒍ, ᑎᐅᕆ ᐊᐅᑦᓚ, ᐊᖓᔪᖅᑳᖅ ᓄᓇᕗᑦᒥ ᐃᒡᓗᓕᕆᔨᕐᔪᐊᒃᑯᓐᓄᑦ, ᐅᖃᓚᐅᕐᓯᒪᔪᖅ ᕿᑭᖅᑕᓂ ᒪᐃᔭᓄᑦ ᐃᒡᓗᒥ ᑲᒪᒋᔭᖃᕐᓂᖅ ᐊᒻᒪ ᐊᐅᓚᑦᑎᓂᕐᒥᒃ ᐊᑕᐅᓯᕐᒥᒃ ᓄᓇᕗᒥ ᒫᓃᓕᕐᓂᕋᖅᖢᓂᐅᒃ $26,700 ᐊᕐᕌᒍᒧᑦ.
ᐅᓇ ᑐᑭᖃᖅᑐᖅ ᐅᑯᐊ ᓄᓇᕗᑦᒥ ᐃᒡᓗᓕᕆᔨᕐᔪᐊᒃᑯᑦ ᐃᒻᒥᒃᑰᖓᓗᑎᒃ ᐱᖁᑎᖃᖅᑎᐅᓚᐅᕈᑎᒃ, ᑕᐃᒪᓕ ᐊᑭᓕᖅᓱᐃᑎᑦᑎᓇᔭᓚᐅᕐᑐᑦ ᐊᑐᖅᑐᐊᕐᓂᕐᒧᑦ ᒫᓂ $2,200 ᑕᖅᑭᒥᑦ, ᐅᖓᑖᓄᓪᓘᓐᓃᑦ, ᐊᐅᓚᑦᑎᔾᔪᑎᓂᒃ ᓈᒪᓈᖅᑎᑦᑎᒐᓱᒃᑯᑎᒃ. ᑕᒪᒃᑯᐊ ᐊᑭᓕᐅᑎᒃᓴᐃᑦ, ᐅᑯᓂᖓ ᐃᓚᖃᖅᑐᑦ ᐅᖅᓱᐊᓗᖕᒧᑦ, ᖃᐅᒻᒪᖁᑎᒧᑦ, ᐊᒃᑕᖅᑕᐅᔾᔪᑎᓄᑦ, ᐃᒥᕐᑕᖅᑕᐅᓂᕐᒧᑦ ᐊᒻᒪ ᑯᕕᕐᑕᖅᑕᐅᓂᕐᒧᑦ ᐊᒻᒪᓗ ᐃᒡᓗ ᑲᒪᒋᔭᐅᖃᑦᑕᕐᓂᖓᓄᑦ, ᑐᓴᓕᒪᓇᑐᐃᓐᓇᕐᒥᔪᑦ.
ᑕᒪᒃᑯᐊ ᐊᕐᕌᒍᒐᓴᒻᒪᕆᖕᓂ ᖃᐅᔨᒪᔭᐅᔪᖅ. ᑎᐅᕆᑑᕆᓂᓕ, ᓄᓇᕗᑦ ᒐᕙᒪᖓ ᐊᒻᒪ ᓄᓇᑦᓯᐊᑉ ᒐᕙᒪᖓ ᐊᕐᕌᒍᑕᒫᓐ ᐃᑲᔫᑎᒃᓴᖅᑖᖃᑦᑕᖅᓯᒪᔪᑦ ᑲᓇᑕᒥᑦ ᐃᒡᓗᓕᕆᔨᕐᔪᐊᒃᑯᓐᓂᒃ (CMHC) ᑕᒪᒃᑯᓄᖓ ᐊᑭᓕᐅᑎᒃᓴᓄᑦ. ᑭᓯᐊᓂᓕ ᐃᑲᔫᑎᒃᓴᑦ ᐃᓚᖃᕐᒪᑦ ᑐᖁᓐᓇᖅᑐᒥᑦ ᐄᔭᒐᕐᒥ. ᑕᐃᒪᙵᓂᑦ 2004-ᒥ, ᐃᑲᔫᑎᒃᓴᖅ ᒥᒃᖠᕙᓪᓕᐊᖃᑦᑕᐃᓐᓇᕐᓯᒪᔪᖅ. 2037 ᑎᑭᒃᑯᓂ, ᒥᒃᖠᓗᐊᒧᑦ ᔨᕈᙳᕐᓗᓂ.
ᖃᓄᐃᓕᐅᕈᑎᒃᓴ ᑕᒪᑐᒥᖓ ᓴᕿᑎᑦᑎᓯᒪᔪᖅ, ᐊᒻᒪᓗ ᐅᖃᕐᓯᒪᓪᓗᓂ ᑕᒪᑐᒥᖓ ᐱᓕᕆᐊᖃᕐᓯᒪᔪᑦ ᖃᐅᔨᒪᓂᕋᖅᖢᑎᑦ ᐊᕐᕌᒍᒐᓴᖕᓂᒃ, ᒥᒃᖠᕙᓪᓕᐊᓂᖓᓂᒃ ᐊᐅᓚᑦᑎᓂᕐᒧᑦ ᑲᒪᒋᔭᖃᕐᓂᕐᒧᓪᓗ ᐃᑲᔫᑎᒃᓴᑦ ᐅᑯᓄᖓ ᑎᐅᕆᑑᕆᓂᒃ ᐃᒡᓗᓕᕆᔨᓄᑦ “ᐃᑲᔫᑎᒃᓴᖏᑦ ᒫᓐᓇ ᐃᒡᓗᒋᔭᐅᔪᓄᑦ ᑐᕌᖓᓂᕐᓴᐅᓗᑎᒃ ᐃᒪᓐᓇᐅᙱᖔᕐᑐᖅ ᐃᒡᓗᓕᐅᕐᓗᑎᒃ ᓄᑖᓂᒃ ᐱᔭᐅᔭᕆᐊᖃᓪᓚᕆᒃᑐᓂᒃ.”
ᖃᓄᐃᓕᐅᕈᑎᒃᓴᒧᑦ ᐋᕿᒍᑎᓪᓕ, ᕿᓯᐊᓂ, ᐃᓱᒪᓕᐅᕆᓂᖃᙱᑦᑐᖅ: “ᑭᓯᐊᓂᓕ, ᓂᕆᐅᒋᔭᐅᔪᖅ ᐊᖏᖃᑎᒌᒍᑎᒃᓴᑦ ᐋᕿᒃᓯᒫᓂᐊᕐᓂᖏᓐᓂᒃ 2019-ᒥᑦ, ᒪᑯᐊ ᐳᕌᕕᓐᓯᐅᔪᑦ ᐊᒻᒪ ᑎᐅᕆᑑᕆ ᒐᕙᒪᖏᑦ ᓴᐳᔾᔨᓯᒪᓂᐊᕐᓗᑎᒃ ᐊᒻᒪ ᐅᓄᕐᓯᒋᐊᖅᑎᑦᑎᓂᐊᕐᓗᑎᒃ ᓄᓇᓕᖕᓂ ᐃᒡᓗᓂ ᑲᒪᒋᔭᖃᕐᕕᖏᓐᓂᒃ.”
ᖃᓄᐃᑦᑐᑦ ᐊᖏᕈᑏ? ᑭᒃᑯᑎᒎᓇᖅ? ᐃᓱᒪᒋᓪᓗᒍ ᐳᕌᕕᓐᓯᐅᔪᑦ ᐊᒻᒪ ᑎᐅᕆᑑᕆᐅᔪᑦ ᒐᕙᒪᖏ ᐃᓚᐅᙱᑎᓪᓗᒋ ᐆᒥᖓ ᐃᓄᐃᑦ ᓄᓇᖓᓂ ᐃᒡᓗᓕᕆᓂᕐᒧᑦ ᖃᓄᐃᓕᐅᕈᑎᒃᓴᓄᑦ, ᐊᒻᒪᓗ ᐅᑯᐊ “ᐊᖏᖃᑎᒌᒍᑎ” ᐊᑎᓕᐅᕐᑕᐅᓯᒫᓂᙱᖢᑎᒃ ᓱᓕ, ᐅᓇ ᐅᖃᐅᓯᖅ ᐃᓱᒪᒋᔭᐅᔭᕆᐊᓕᒃ ᓱᓕᒻᒪᕆᒃᑲᓗᐊᕆᐊᒃᓴᖓᓂᒃ.
ᐃᒡᓗᓕᐅᕐᓂᐊᕆᐊᒃᓴᖏᓐᓂᒃ ᓇᓗᓇᖅᑐᖅ
ᐆᑮ. ᑐᓴᙳᖅᑐᒃᓴᐅᕗᓯ ᐊᓯᐅᕙᓪᓕᐊᔪᓂᒃ ᐊᐅᓚᑦᑎᔾᔪᑎᒃᓴᓂᒃ ᐊᒻᒪ ᑲᒪᒋᔭᖃᕈᑎᒃᓴᓄᑦ ᐃᑲᔫᑎᒃᓴᓂᒃ.
ᐅᓇ ᐊᐱᖅᑯᑎ ᐃᓱᒪᒋᖔᓚᐅᕐᓚᕗᑦ ᐱᒻᒪᕆᐅᓂᖓᓄᑦ ᑕᒪᒃᑯᓄᖓ ᐃᒡᓗᖃᙱᑦᑐᓄᑦ. ᖃᔅᓯᒃᑲᓐᓂᕐᓂᒃ ᐃᒡᓗᒃᓴᓂᒃ? ᓇᓂ ᐊᒻᒪ ᖃᖁᒍ ᓴᓇᔭᐅᓛᕐᒪᑕ?
ᑖᓐᓇ ᐃᓱᒪᒋᓪᓗᒍ, ᖃᓄᐃᓕᐅᕈᑎᒃᓴᑦ ᐱᒃᑯᒋᔭᖃᕐᓯᒪᔪᑦ ᓕᐳᕈᓪ ᒐᕙᒪᖓᓂ ᐊᒻᒪᓗ ᐃᓄᐃᑦ ᑲᑐᔾᔾᔨᖃᑎᒌᖏᓐᓂᒃ ᖃᖓᑦᑎᐊᓵᖅ ᐃᒡᓗᓕᐅᕈᒪᓂᕐᒧᑦ ᐅᖃᕐᓯᒪᓚᐅᕐᑕᖏᓐᓄᑦ—ᐅᓐᓃᓪᓘᓐᓃᑦ ᓇᓕᐊᒃ ᑕᑯᓚᐅᕐᓯᒪᙱᒃᑲᓗᐊᖅᑎᓪᓗᒍ ᖃᐅᔨᓴᒃᑲᓐᓂᕐᓂᑯᑦ ᖃᐅᔨᓯᒪᔭᖏᓐᓂᒃ.
ᑕᒪᒃᑯᐊ ᐱᓕᕆᐊᒃᓴᐃᑦ, ᐊᑐᖅᖢᑎᒃ ᒐᕙᒪᑐᖃᒃᑯ ᑮᓇᐅᔭᖏᓐᓂᒃ ᐋᕿᒃᓯᒪᕗᑦ ᐅᕙᓂ 2016-ᒥ ᐊᒻᒪ 2018-ᒥ ᓕᐳᕈᑯᑦ ᐊᐅᓚᔾᔪᑎᒃᓴᖏᓐᓂᒃ, ᓴᕿᑎᑦᑎᒍᑎᐅᓪᓗᓂ 144-ᓂ ᐃᒡᓗᓂᒃ ᓄᓇᕕᒃᒥ ᓴᓇᔭᐅᔪᓂᒃ ᒪᑭᕕᒃᑯᑦ ᐃᒡᓗᓕᐅᕐᑎᖏᓐᓂᒃ, 24 ᐃᒡᓗᐃᑦ ᓴᓇᔭᐅᓪᓗᑎᒃ ᓄᓇᑦᓯᐊᕗᑦᒥ ᓄᓇᕗᐊᕗᑦ ᒐᕙᒪᖏᓐᓂᒃ, ᐊᒻᒪᓗ 15-ᓂ ᐃᒡᓗᓂᒃ ᐃᓄᕕᐊᓗᐃᑦ ᓄᓇᓕᖏᓐᓂᒃ.
ᑭᓯᐊᓂᓕ ᐃᓗᐊᓃᑦᑐᖃᕐᒥᔪᖅ ᑕᑯᔪᒥᓇᖅᑐᒥ ᐃᓱᒪᒋᔭᐅᔪᒥᒃ: ᐅᑯᐊ ᐃᓄᐃᑦ ᑲᑐᔾᔨᖃᑎᒌᖏᑦ ᐃᓚᐅᑎᑕᐅᑦᑎᐊᒻᒪᕆᒡᓗᑎᒃ ᐃᒡᓗᓕᐅᖅᑐᓂᒃ ᐊᒻᒪᓗ ᐊᐅᓚᑦᑎᓂᕐᒥᒃ ᐃᒡᓗᓂᒃ. ᑖᓐᓇᓕ ᓄᑖᖑᖅᑰᔨᔪᖅ ᐃᓱᒪᒋᔭᐅᓂᖅ.
ᑭᓯᐊᓂᓕ ᖃᓄᐃᓕᐅᓛᕐᐸᑦ ᓯᕗᓂᑦᑎᓐᓂ? ᑖᓐᓇ ᐃᓱᒪᒋᓪᓗᒍ, ᐃᒡᓗᓕᕆᓂᕐᒧᑦ ᖃᓄᐃᓕᐅᕈᑎᒃᓴᖅ, ᐊᐃᑦᑖᖑᒐᓗᐊᖅ, ᒪᓂᒻᒪᐃᓯᒪᓗᐊᙱᒻᒪ ᓱᖅᑯᐃᓇᕐᓂᕐᓴᓂᒃ ᐊᒻᒪ ᑐᑭᓯᓇᒃᑲᓐᓂᕈᓐᓇᕈᑎᓂᒃ.
ᓄᓇᕗᒥ, ᓇᓗᓇᐃᒃᑯᑎᒋᓗᒍ, ᖃᓄᐃᓕᐅᕈᑎᒃᓴᖅ ᐅᖃᕐᓯᒪᔪᖅ ᓯᕗᓪᓕᐅᓚᐅᕐᑐᑦ ᓕᐳᕈᒃᑯ ᐊᑐᕐᓂᐊᕐᓂᕐᒥᒃ ᐃᒡᓗᒃᓴᓂᒃ ᓴᓇᓂᕐᒧᑦ—$76.7 ᒥᓕᐊᓐ ᐊᕐᕌᒍᓂ ᒪᕐᕉᖕᓄ ᐱᒋᐊᕐᓗᓂ 2016, ᐊᒻᒪ $240 ᒥᓕᐊᓐ ᐊᕐᕌᒍ ᖁᓕᓄᑦ ᐱᒋᐊᕐᓗᓂ 2017-ᒥᑦ—ᑐᖓᐅᑦᑎᓯᒪᓗᐊᕐᑐᖅ ᐱᔭᐅᔭᕆᐊᓕᖕᓂᒃ.
ᑕᐃᒪᓕ ᖃᓄᐃᓕᐅᕈᑎᒃᓴᓄᑦ ᑎᑎᕋᖅᑎᐅᔪᑦ ᐅᕙᑦᑎᓐᓂᒃ ᐅᖃᐅᔾᔨᓯᒪᕗᑦ ᐅᑯᐊ ᓄᓇᕗᑦ ᑐᙵᕕᒃᑯᑦ ᐊᒻᒪ ᐱᖓᓱᑦ ᐊᕕᒃᑐᖅᓯᒪᓂᒃᑯᑦ ᑲᑐᔾᔨᖃᑎᒌᖑᔪᑦ ᓄᓇᕗᒥ ᐋᕿᒃᓯᔪᒪᓂᖏᓐᓂᒃ “ᐃᓄᐃᑦ ᐋᕿᒃᓯᒪᓂᖓᒍᑦ ᐊᒻᒪ ᐊᑐᖅᑕᐅᓕᖅᑎᓯᒪᔭᖓᒍᑦ, ᐊᑯᓂᐊᓗᒃ ᐊᑐᖅᑐᒃᓴᓂ ᐊᑭᓕᒐᒃᓴᓂᒃ ᐃᒡᓗᓕᕆᓂᕐᒥ.” ᖃᓄᐃᓕᐅᕈᑎᒃᓴᖅ ᐅᖃᕐᓯᒪᖕᒥᔪᖅ ᑕᐃᒪᓐᓇ ᓇᖕᒥᓂᖅ ᐃᒡᓗᖃᓕᕈᓐᓇᖅᑎᑦᑎᓇᓱᖕᓂᕐᒥᑦ ᐊᒻᒪᓗ “ᐃᑲᔫᑎᐅᒃᑲᓐᓂᕐᓗᓂ” ᐃᒡᓗᓕᕆᔨᕐᔪᐊᒃᑯᑦ ᒫᓐᓇ ᒪᓂᒪᓯᒪᔭᖏᓐᓂᒃ.
ᑕᐃᒪᓕ ᑭᓇ ᐊᑭᓖᓇᔭᕐᒪᑦ ᓴᓇᓂᕐᒧ ᐅᑯᓂᖓ “ᐃᓄᐃᑦ ᐋᕿᒃᓯᒪᓂᖓᒍᑦ ᐊᒻᒪ ᐊᑐᖅᑕᐅᓕᖅᑎᓯᒪᔭᖓᒍᑦ” ᐃᒡᓗᒃᓴᐃᑦ ᐊᒻᒪᓗ ᖃᔅᓯᓂ ᐊᑭᓕᖅᓱᐃᓇᔭᖅᐸ? ᑭᐅᔪᖃᙱᑦᑐᖅ. ᖃᔅᓯᓂ ᑕᐃᒪᐃᑦᑐᓂᒃ ᐃᒡᓗᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓴᓇᓇᔭᕐᒪᑕ ᐊᒻᒪᓗ ᓇᓂ ᓴᓇᔭᐅᓇᔭᕐᐸ? ᑭᐅᔪᖃᙱᑦᑐᖅ. ᑭᓇ ᐃᑲᔪᕈᑎᒃᓴᖃᖅᑎᑦᑎᓇᔭᕐᒪ ᐊᐅᓚᑕᐅᓂᖏᓐᓄᑦ ᐊᒻᒪ ᑲᒪᒋᔭᐅᓂᖏᓐᓄᑦ ᐊᑭᓕᐅᑎᒃᓴᓂᒃ? ᑭᐅᔪᖃᙱᑦᑐᖅ.
ᖃᓄᐃᓕᐅᕈᑎᒃᓴᖅ ᐅᖃᕐᓯᒪᙱᑦᑐᖅ ᐃᓄᐃᑦ ᐊᐅᓚᑕᖓ ᐃᒡᓗᓕᕆᓂᖅ ᓄᓇᕗᒥᑦ ᐃᓚᖃᕋᔭᕐᓂᖓᓂᒃ ᑲᑎᓯᒪᔪᓂᒃ ᐃᒻᒥᒃᑰᖓᓂᕐᒧᑦ ᑮᓇᐅᔭᓂ ᐃᑲᔫᑎᒃᓴᓂᒃ ᐊᒻᒪᓗ “ᑐᓐᓂᖁᓯᐊᒃᓴᑐᐃᓐᓇᖅ” ᒐᕙᒪᒃᑯᓐᓂᑦ, ᓇᓗᓇᐃᕐᓯᒪᓇᓂ ᓇᓕᐊᓐᓂᒃ ᒐᕙᒪᐅᔪᓂᒃ. ᐅᑕᕿᙱᓗᓯ. ᐅᓇ ᐱᓂᐊᕐᓂᕋᖅᑕᐅᓯᒪᔪᖅ ᐅᒃᐱᕆᔭᐅᓗᐊᕌᓗᒋᐊᖃᙱᑦᑐᖅ.
ᑕᐃᒪᐃᑎᓪᓗᒍ, ᓕᐳᕈ ᒐᕙᒪᒃᑯ ᑐᕌᒐᖃᓕᕐᑐᑦ ᑲᙳᓇᖅᑐᒃᑯᑦ ᓵᓚᒋᔭᐅᓂᕐᒧᑦ. ᐃᓚᒋᔭᐅᔪᓐᓃᕐᓂᖏ ᒪᕐᕉᒃ ᐃᓱᒪᒋᔭᐅᑦᑎᐊᓛᖑᖃᑕᐅᔫᒃ ᒥᓂᔅᑕᐅᓂᑯᑦ, ᔫᑎ ᕗᐃᐊᓴᓐ-ᕇᐳᑦ ᐊᖅᓴ ᔭᐃᓐ ᐱᐅᐹᑦ, ᓈᒻᒪᒃᓴᕈᓐᓃᕐᓯᒪᖕᒪᑕ ᑐᕇᑑ ᐅᒃᐱᕐᓇᒻᒪᕆᒃᑲᓗᐊᕆᐊᒃᓴᖓᓂ, ᓱᓕᙱᑦᑐᓂᒃ ᑭᐅᔾᔪᑎᒋᔭᖏᓐᓂ ᑲᓇᑕᒥ ᓈᒻᒪᙱᓛᖑᓯᒪᔪᒥ ᐱᓕᕆᓂᐅᓯᒪᔪᓂᒃ ᐊᕐᕌᒍ ᐊᕙᑎᓂ ᐊᓂᒍᕐᓯᒪᓕᖅᑎᓪᓗᒍ ᑭᖑᓕᖅᐹᖅ, ᐃᒪᓐᓇᐃᒍᑎᐅᓕᕐᒪᑦ ᐊᒥᓱᓄᑦ ᑲᓇᑕᒥᐅᑕᓄᑦ, ᓱᕋᐃᒍᑎᐅᓪᓗᓂ ᐅᒃᐱᕐᓇᕐᓂᕆᓚᐅᖅᑕᖓᓂᒃ ᐊᒻᒪ ᐃᓱᒪᒋᔭᖃᑦᑕᐊᕐᓂᒃᑯᑦ ᖃᓄᐃᓕᐅᕈᓯᐊᓂᒃ.
ᑲᓇᑕᒥ ᐃᓱᒪᒋᔭᐅᔪᓂᒃ ᖃᐅᔨᓴᕈᑎᑎᒍᑦ, ᐃᓚᒋᓪᓗᒍ ᓰᐲᓰᑯᑦ ᖃᐅᔨᓴᕈᑎᖓ, ᐅᖃᐅᓯᖃᕐᓯᒪᖕᒪᑕ ᒫᓐᓇ ᓂᕈᐊᕐᓂᖅᑕᖃᕐᓂᐊᕈᓂ, ᐋᓐᑐᕉ ᓯᐅ ᑲᓐᓲᕕᑎᕝᑯᖏ ᒐᕙᒪᐅᓕᕋᔭᕐᓂᖏᓐᓂᒃ ᐅᓄᙱᓐᓂᕐᓴᐅᒐᓗᐊᕐᑎᓪᓗᒋ, ᐅᑯᐊ ᓂᐅ ᑕᒧᑯᕌᑎᒃ ᐹᑎᑯ ᐊᖓᔪᖅᑳᖑᖃᑕᐅᓂᖃᕐᓗᑎᒃ.
ᑕᒪᓐᓇ ᑐᑭᖃᖅᑐᖅ ᐱᓇᓱᐊᕈᓯᐅᓚᐅᕐᑐᒥ ᐃᒡᓗᓕᕆᓂᕐᒧᑦ ᖃᓄᐃᓕᐅᕈᑎᒃᓴᓕᕆᓂᕐᒥᒃ, ᐃᓚᖃᖅᖢᓂ ᐊᑑᑎᖃᕐᓂᕐᓴᓂᒃ ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᕐᒧᑦ ᑲᑎᒪᔩᑦ, ᒫᓐᓇ ᑐᙵᕕᖃᓗᐊᙱᒻᒥᔪᑦ. ᐃᓄᐃᑦ ᑲᑐᔾᔨᖃᑎᒌᖏᑦ ᐃᓚᐅᓯᒪᔪᑦ ᐱᓕᕆᕙᓪᓕᐊᓂᕐᒥ ᐸᐸᑕᒥᖕᓂ ᐊᔾᔨᙳᐊᖃᖃᑎᖃᕐᓂᕐᒥᒃ ᔭᔅᑎᓐ ᑐᕌᑑᒥ ᑐᖅᑯᖅᑎᑦᑎᓗᑎᒃ ᐱᓕᕆᖃᑎᖃᓕᕐᓂᕐᒥᒃ ᐊᓐᑏᐲᑯᓐᓂᒃ ᐊᒻᒪ ᑲᓐᓲᕕᑎᕝᑯᓐᓂᒃ ᐃᓱᒪᓂᕐᓴᐅᔭᕆᐊᖃᓕᕐᑐᑦ.
(0) Comments