ᐃᓄᒃᑐᑦ ᓴᖅᑭᔮᒐᒃᓴᖅ ᑕᓚᕕᓴᓐᑯᑦ ᓴᖅᑭᔮᖃᑦᑕᓯᕗᖅ

For an English version of this story, see Uvagut TV fulfils a long-cherished dream, NITV chairperson says

ᐊᑯᓂᕈᓗᒃ ᐅᑕᖅᑭᔭᐅᓯᒪᓕᕐᑐᖅ ᐃᓄᒃᑎᑐᑐᐃᓐᓇᖅ ᑲᐃᐳᒃᑯᑦ ᐊᒻᒪ ᖁᒻᒧᒃᑎᑕᐅᓯᒪᔪᒃᑯᓪᓗ ᓴᖅᑭᔮᕐᕕᒃ ᓵᓄᓪ ᐱᒋᐊᖅᑎᑕᐅᓚᐅᕐᐳᖅ 12:01 ᐅᓐᓄᐊᒃᑯᑦ ᔭᓄᐊᕆ 18-ᒥ.

ᓄᓇᕗᒥᑦ ᐃᒻᒥᒃᑰᖓᔪᖅ ᑕᓚᕖᓴᓐ ᐊᒻᒪ ᐃᓱᒪ ᑏᕖ ᐊᐅᓚᑦᑎᔨᐅᓂᐊᕐᑐᑦ ᑖᔅᓱᒥᖓ ᓄᑖᒥᒃ ᓴᖅᑭᔮᒐᖃᕐᕕᒃᒥ, ᑕᐃᔭᐅᓪᓗᓂ ᐅᕙᒍᑦ ᑏᕖ. ᖃᓪᓗᓈᑐᑦ. In English, the word “uvagut” means “us” or “we.”

“ᐅᕙᓐᓄᓪᓕ, ᐅᕙᒍᑦ ᑏᕖ ᐱᓪᓚᕆᙳᕐᓯᒪᖕᒪᓐ ᐊᑐᕈᒪᓯᒪᔭᓐᓂ — ᐃᓄᐃᑦ ᐃᓕᖅᑯᓯᖏᑦ ᐊᒻᒪ ᐅᖃᐅᓯᖏ ᐅᓴᕐᓴᐅᖃᑦᑕᐃᓐᓇᕐᓗᑎᒃ ᑕᓚᕖᓴᓐᑯ,” ᓘᓯ ᑐᓗᒑᕐᔪᒃ, ᐊᐅᓚᑦᑎᔨ ᑐᑭᒧᐊᖅᑎᑦᑎᔨ ᐊᒻᒪ ᐃᒃᓯᕙᐅᑕᕆᔭᐅᔪᖅ ᐅᑯᓄᖓ NITV-ᑯᓐᓄᑦ ᐅᖃᓚᐅᕐᑐᖅ ᑐᓴᒐᒃᓴᓕᐅᕈᑎᒃᑯᑦ.

ᑖᓐᓇ ᓄᑖᖅ ᓴᖅᑭᔮᕐᕕᒃᓴᖅ, ᑐᓴᖅᑎᑦᑎᓚᐅᕐᑐᑦ ᓴᖅᑭᔮᖅᑎᑦᑎᖃᑦᑕᕐᓂᐊᕐᓂᖏᓂᒃ 168-ᓂ ᐃᑲᕐᕋᓂ ᐃᓄᒃᑐᑦ ᓴᖅᑭᔮᒐᓂᒃ ᐱᓇᓱᐊᕈᓯᑕᒫᖅ — ᐃᑲᕐᕋᓂ 24-ᓂ ᐅᓪᓗᕐᒥ, ᐅᓪᓗᓂ 7-ᓂ ᐱᓇᓱᐊᕈᓯᕐᒥ — ᒪᑯᓇᙵᑦ ᐋᖅᑭᒃᓱᐃᔨᐅᕙᒃᑐᓂᒃ ᓴᖅᑭᒐᒃᓴᓂᒃ ᐅᑯᑎᑐᓇᖅ ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᓐᓂᒃ, ᐃᓱᒪ, ᐊᕐᓇᐃᑦ ᑕᑯᓐᓇᒐᒃᓴᖏᑦ, ᐋᑦ ᓲᒃ ᑯᖑᓪᓖᑦ ᐊᒻᒪ ᑕᖅᑯᑦ ᓴᖅᑭᑎᑦᑎᔩᑦ, ᐊᒻᒪᓗ ᐃᓄᕕᐊᓗᐃᑦ ᑐᓴᐅᒪᔾᔪᑎᓕᕆᔨᒃᑯᓐᓂ.

ᐅᓇ ᐃᓚᖃᕐᑐᖅ ᑕᓪᓕᒪᓂᒃ ᐃᑲᕐᕋᓂᒃ ᓱᕈᓯᕐᓄᑦ ᑐᕌᖓᔪᓂᒃ ᓴᖅᑭᔮᒐᒃᓴᓂ ᐅᓪᓗᕐᒥ, ᐃᓚᖃᖅᖢᓂ ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᑦ ᓴᖅᑭᔮᒐᕆᕙᒃᑕᖓ ᑕᑯᒋᓇᐃᑦ.

ᑕᒪᕐᒥᓕᒫᑦ ᓴᖅᑭᔮᖅᑎᑕᐅᔪᑦ ᐊᑐᐃᓐᓇᐅᓂᐊᕐᑐᑦ ᐅᓄᕐᑐᓄᑦ ᓄᓇᕗᒻᒥᐅᓄᑦ ᐊᒻᒪ ᓄᓇᑦᓯᐊᕐᒥᐅᓄᑦ ᑲᐃᐳᒥ ᐊᑭᓕᕐᓱᐃᕙᒃᑐᓄᑦ ᑯᐊᐸᒃᑯᑎᒍᑦ ᐱᔨᑦᑎᕋᐅᑎᒥ ᐅᕝᕙᓘᓐᓃᑦ ᖁᒻᒧᒃᑎᑕᐅᓯᒪᔪᒃᑯᑦ ᐊᐅᓚᑕᐅᔪᒥᒃ ᓵ ᑐᕋᒃᑯᓐᓂᑦ (Shaw Direct).

NITV, ᐃᓱᒪ ᐊᒻᒪ ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᑦ ᐱᓕᕆᖃᑎᖃᕐᓯᒪᖕᒪᑕ ᓵᑯᓐᓂᒃ ᐊᒻᒪ ᐅᑭᐅᕐᑕᖅᑐᕐᒥ ᑯᐊᐸᒃᑯᓐᓂᒃ ᓯᑎᐱᓕᕆᐅᓚᐅᕐᑐᒥ ᐱᓇᓱᒃᖢᑎᒃ ᐃᓄᖕᓅᖓᔪᓂᒃ ᑕᓚᕖᓴᓐᑯᑦ ᓴᖅᑭᔮᕐᕕᒃᓴᒥᑦ ᓵᓄᒥᑦ.

ᐅᑭᐅᕐᑕᖅᑐᕐᒥ ᑯᐊᐸᒃᑯᑦ ᒪᓂᒻᒪᐃᓯᒪᖕᒪᑕ ᑲᐃᐳ ᑕᓚᕖᓴᒥᑦ 19-ᓂ ᓄᓇᕗᑦ ᓄᓇᓕᖏᓐᓂᒃ ᐊᒻᒪ ᒪᕐᕉᖕᓂ ᓄᓇᑦᓯᐊᕐᒥ, ᐊᑐᖅᖢᑎᒃ ᓵᒃᑯᑦ (Shaw) ᖁᒻᒧᒃᑎᑕᐅᓯᒪᔪᒧᑦ ᐱᔨᑦᑎᕋᐅᑎᖓᓂᒃ. ᓵᒃᑯᑦ ᓇᖕᒥᓂᖅ ᐊᖏᕐᕋᕆᔭᐅᔪᓄᑦ ᐊᑦᑕᑕᕈᓐᓇᐅᑎ ᖁᒻᒧᒃᑎᑕᐅᓯᒪᔪᒃᑯ ᐊᑐᐃᓐᓇᐅᖕᒥᔪᖅ ᓄᓇᑦᓯᐊᕐᒥ ᐊᒻᒪ ᓄᓇᕗᒥᑦ.

ᐅᓇ ᐱᒋᐊᖅᑕᐅᓚᐅᕐᓯᒪᑎᓐᓇᒍᑦ ᐄᐲᑏᐊᓐ (ᓄᓇᖃᖅᑳᖅᑐᑦ ᑕᓚᕕᓴᓕᕆᔾᔪᑎᖓ), ᐃᓄᐃᑦ ᐅᖃᐅᓯᖓᓂᒃ ᐱᖃᖅᑐᓂᒃ ᐅᑯᓇᙵᑦ ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᓐᓂ ᐊᒻᒪ ᐊᓯᖏᓐᓂᒃ ᐊᑐᐃᓐᓇᐅᓚᐅᕐᓯᒪᔪᑦ ᐅᕘᓇ ᑲᓇᑕᐅᑉ ᐅᑭᐅᕐᑕᖅᑐᖓᓂᒃ ᑕᓚᕖᓴᓐᑯᑦ, ᑖᒃᑯᐊᓗ ᓴᖅᑭᔮᖅᑎᑦᑎᕙᒃᖢᑎᒃ ᐱᖓᓱᓄᑦ ᑎᐅᕆᑑᕆᓄᑦ ᐅᑭᐅᕐᑕᖅᑐᕐᒥ.

ᑭᓯᐊᓂᓕ ᑲᓇᑕᐅᑉ ᐅᑭᐅᕐᑕᖅᑐᖓᓂᒃ ᑕᒪᕖᓴᓐᑯᑦ ᐃᓂᖃᓕᕐᑎᑦᑎᑎᓪᓗᒋᑦ ᐄᐲᑏᐊᓐᑯᓐᓂᒃ, ᐃᓄᒃᑎᑑᖓᔪᓂᒃ ᐋᖅᑭᒃᓱᐃᔨᐅᕙᒃᑐᑦ ᖃᐅᔨᓕᓚᐅᕐᓯᒪᔪᑦ ᐅᑯᐊ ᐄᐲᑏᐊᓐᑯᑦ ᐃᓂᖃᖅᑎᑦᑎᓚᐅᒐᒍᓐᓇᕐᓂᖏᓐᓂᒃ ᐃᓄᒃᑐᑦ ᐅᖃᓪᓚᒃᑐᓂᒃ ᓴᖅᑭᔮᖅᑎᑦᑎᓂᕐᒥᒃ.

ᑕᐃᒪᓗ ᐅᓇ ᐅᕙᒍᑦ ᑏᕖ ᓵᓄᖓᓂᒃ ᐱᒋᐊᖅᑎᑦᑎᓂᖓ ᑐᑭᖃᕐᑐᖅ ᐃᓄᒃᑎᑐᑦ ᐅᖃᓪᓚᒃᐸᒃᑐᑦ ᓄᓇᕗᒥᑦ ᐊᒻᒪ ᓄᓇᑦᓯᐊᕐᒥ ᑕᐅᑯᒍᓐᓇᖃᑦᑕᕐᓂᐊᓕᖏᓐᓂᒃ ᐃᓄᒃᑑᖓᔪᓂᒃ ᓴᖅᑭᔮᒐᒃᓴᓂᒃ ᑕᐅᑐᒃᑕᐅᓐᓇᕐᓂᕐᓴᐅᑎᓪᓗᒋ ᐅᑯᓇᙵᓪᓕ ᐄᐲᑏᐊᓐᑯᓐᓂᐅᓚᐅᕐᑐᖅ.

ᐅᕙᒍᑦ ᑏᕖ ᐅᖃᓚᐅᙱᑦᑐᑦ ᓴᖅᑭᔮᕐᕕᒋᖃᑦᑕᕐᓂᐊᕐᑕᖓᑦᑕ ᐃᓂᒋᓂᐊᕐᑕᖓᓂᒃ ᐊᑐᖅᑕᐅᖃᑦᑕᕐᓂᐊᕐᑐᓂᒃ ᐅᑭᐅᕐᑕᖅᑐᕐᒥ ᑯᐊᐸᒃᑯᑦ ᑲᐃᐳᓕᕆᓂᖏᑦᑎᒍᑦ ᐊᒻᒪᓗ ᓵ ᑐᕋᒃᑎᒍᑦ.

ᓂᕆᐅᓇᙱᑦᑐᒥ, ᔪᓚᐃ 9-ᖑᑎᓪᓗᒍ ᓄᓇᕗᑦ ᑐᙵᕕᒃᑯᑦ ᑐᓂᓯᓚᐅᕐᓯᒪᖕᒪᑕ $2.4 ᒥᓕᐊᓐ ᑖᓚᓂ ᐃᒻᒥᒃᑰᖅᑐᒧᑦ ᑕᐃᔭᐅᔪᖅ “ᐃᓄᐃᑦ ᑏᕖ,” ᐊᖓᔪᖅᑳᖃᖅᖢᑎᒃ ᐊᓖᑎᐊ ᐊᕐᓇᖅᑯᖅ-ᐳᕆᐊᓪ ᐃᖃᓗᖕᒥᐅᑕᒥᑦ, ᐱᔾᔪᑎᖃᖅᖢᑎᒃ ᐱᒋᐊᖅᑎᑦᑎᖁᓪᓗᑎᒃ ᐃᓄᒃᑐᑦ ᐅᖃᐅᓯᖓᓂᒃ ᑕᓚᕖᓴᓐᑯᑦ ᓴᖅᑭᔮᒐᖃᓕᕐᓂᕐᒧᑦ.

ᑕᐃᒪᓕ ᐅᑯᐊ NITV ᐱᒋᐊᓕᓚᐅᕐᓂᖏᓐᓂᒃ ᐱᓇᓱᖕᓂᕐᒥᒃ ᓇᖕᒥᓂᖅ ᓴᖅᑭᔮᒐᖃᕐᕕᒃᓴᒥᑦ (ᓵᓄᓪ), ᑖᓐᓇ ᐱᓕᕆᐊᖑᔪᖅ ᖃᓄᐃᓐᓂᐊᕆᐊᒃᓴᖓᓂᒃ ᓱᓕ ᓇᓗᓇᕐᑐᖅ.