ᐃᓱᒪᒃᑯᑦ ᐋᓐᓂᕐᓯᒪᓗᐊᕐᑐᑦ ᓄᓇᕗᒥᑦ ᐸᓖᓯᒃᑯᑦ ᐃᖅᑲᓇᐃᔭᖅᑎᖏᓐᓂᒃ ᐃᖅᑲᖅᑐᐃᕕᒃᑯᑦ ᐸᓯᔭᒃᓴᙳᖅᑎᑦᑎᕗᑦ

ᑎᓴᒪᑦ ᐸᓖᓯᒃᑯᑦ ᐱᑦᑎᐊᙱᓐᓂᓗᐊᕌᓗᖕᒥ ᐱᓕᕆᐊᖃᕐᓯᒪᔪᑦ ᐱᔨᑦᑎᕋᖅᑎᓪᓗᒋᑦ ᓄᓇᕗᒥᑦ ᐃᖅᑲᖅᑐᐃᕕᒃᑰᕈᑎᓂᒃ ᑐᓂᓯᓯᒪᓕᕐᑐᑦ ᒐᕙᒪᑐᖃᒃᑯᑦ ᐃᖅᑲᖅᑐᐃᕕᒡᔪᐊᖓᓄᑦ ᑲᓇᑕᒥᑦ ᐅᖃᕐᓯᒪᓪᓗᑎᒃ ᐃᖅᑲᓇᐃᔭᖅᑎᑦᑎᔨᖏᓐᓂᒃ ᐱᖃᖅᑎᑦᑎᕙᙱᓐᓂᖏᓐᓂᒃ ᐃᓱᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᓄᑦ ᑲᒪᒋᔭᐅᑎᑦᑎᓂᕐᒥᒃ ᐊᒻᒪᓗ ᐱᑦᑎᐊᖅᑕᐅᕙᙱᓐᓂᕐᒥᒃ ᐊᒻᒪ ᐊᔾᔨᖃᖅᑎᑦᑎᙱᓐᓂᕐᒧᑦ ᐱᓕᕆᐊᕆᔭᐅᒍᒪᓂᕐᑯᑦ ᓲᕐᓗ ᒪᐅᓇ ᑲᒪᒋᔭᐅᔪᒪᓂᒃᑯᑦ.

ᐅᖃᐅᓯᖏᑦ ᑮᓇᐅᔭᖅᑖᕋᓱᖕᓂᕐᒧᑦ, ᐱᓕᕆᐊᖑᑎᑕᐅᓕᕐᓂᑯᑦ ᓯᑎᐱᕆ 16-ᒥᑦ ᐅᖃᐅᓯᖃᕐᒥᔪᑦ ᓈᒻᒪᙱᑦᑐᐊᓗᖕᓂᒃ ᖃᓄᐃᓕᐅᕐᓂᕋᐃᓯᒪᔪᓂᒃ ᐅᖃᕐᓯᒪᓪᓗᑎᒃ ᓄᓇᕗᒥᑦ ᐸᓖᓯᒃᑯᑦ ᓈᒻᒪᙱᓕᐅᕈᑎᖃᓗᐊᕐᓂᖏᓐᓂᒃ ᐃᖅᑲᓇᐃᔭᕐᕕᖕᒥᑦ ᐱᓕᕆᐊᕆᖃᑦᑕᕐᓂᖏᑦᑎᒍᑦ.

ᑖᒃᑯᐊ ᑎᓴᒪᑦ ᐸᓖᓯᑦ, ᐱᖓᓱᑦ ᓅᕙ ᓯᑰᓯᐊᒦᓕᕐᑐᑦ, ᐅᖃᕐᓯᒪᔪᑦ ᑖᒃᑯᐊ ᐸᓖᓯᑦ ᐃᑲᔪᖅᑕᐅᔪᒪᑎᓪᓗᒋᑦ ᐃᖅᑲᓇᐃᔭᕐᕕᖕᒥᑦ ᐋᓐᓂᕐᓯᒪᒍᑎᖏᓐᓄᑦ, ᑲᒪᔨᖏᑦ ᑕᒪᑐᒨᓇ ᐃᑲᔪᕈᒪᓗᐊᖅᐸᙱᑦᑐᑦ ᐊᒻᒪᓗ ᐋᒃᑳᕐᓂᕐᓴᐅᕙᒃᖢᑎᒃ ᐊᑐᖅᑕᐅᔪᒪᔪᓂᒃ.

ᐊᒻᒪᓗ ᐅᖃᕐᓯᒪᒋᓪᓗᓂ ᐃᖅᑲᖅᑐᐃᕕᒃᑰᕈᑎ ᑕᒪᒃᑯᐊ ᐸᓖᓯᒃᑯᑦ ᐃᓱᒪᒃᑯᑦ ᐋᓐᓂᕐᓯᒪᓗᐊᕐᑐᑦ ᑲᒪᒋᔭᐅᕌᓂᒃᑳᖓᒥᒃ ᐃᓱᒪᓕᕆᔨᓄᑦ, ᐅᑎᖅᖢᑎᒃ ᐃᖅᑲᓇᐃᔭᕐᕕᖏᓐᓄᑦ ᐊᒻᒪᓱᓕ ᑲᒪᔨᖏᓐᓄᑦ ᐱᑦᑎᐊᖅᑕᐅᕙᒎᓐᓂᖅᐸᒃᖢᑎᒃ ᑕᐃᒪᓐᓇᓗ ᐃᓱᒪᒥᒍᑦ ᐋᓐᓂᐊᕆᔭᖏᑦ ᐱᒋᐊᓪᓚᖕᓂᕐᓴᐅᓕᖅᐸᒃᖢᑎᒃ.

ᐅᓄᕈᓘᔭᕐᑐᑦ ᐱᑦᑎᐊᙱᓗᐊᕐᓂᐊᓗᖕᓄᑦ ᖃᓄᐃᓕᐅᕈᑎᑦ

ᑕᒪᒃᑯᐊ ᐃᓱᒪᒃᑯᑦ ᐋᓐᓂᕈᑎᐅᓗᐊᕐᓯᒪᔪᑦ ᐸᓖᓯᓄᑦ ᐊᒃᑐᐊᓗᐊᕐᓯᒪᔪᑦ ᐅᓄᕈᓘᔭᕐᑐᓄᑦ ᐱᑦᑎᐊᙱᓗᐊᕐᓂᐊᓗᖕᓄᑦ ᖃᓄᐃᓕᐅᕈᑎᓂᒃ ᓄᓇᕗᒥᑦ, ᑖᒃᑯᐊᑦᑕᐅᖅ ᐸᓯᔭᒃᓴᙳᖅᑎᑦᑎᓯᒪᔪᑦ ᐃᓱᒪᒃᑯᑦ ᐋᓐᓂᕈᑎᖃᕐᓯᒪᓕᐊᓂᒃᑲᓗᐊᖅᖢᑎ ᖃᓄᐃᓕᐅᕈᑎᐅᓗᐊᖅᑐᕕᓂᕐᓄᑦ ᐊᓯᖏᓐᓂᒃ ᓄᓇᓕᖕᓂᒃ, ᓲᕐᓗ ᐅᑯᓇᓂ ᓛᐸᑐᐊᒥ ᐊᒻᒪ ᒫᓂᑑᐸᐅᑉ ᐅᐊᖕᓇᖓᓂᒃ.

ᐅᑯᐊ ᑎᓴᒪᑦ ᐃᖅᑲᖅᑐᐃᕕᒃᑰᖅᑎᑦᑎᓇᓱᒃᑐᑦ ᐊᐱᕆᓯᒪᔪᑦ ᒐᕙᒪᑐᖃᒃᑯᑦ ᐃᖅᑲᖅᑐᐃᕕᒡᔪᐊᖓᑦ ᑖᔅᓱᒥᖓ ᐃᖅᑲᖅᑐᖅᑕᐅᒍᑎᒃᓴᒥᑦ ᐃᓄᒋᐊᓅᖓᓕᕐᑎᓯᒪᓗᓂ.

ᐃᖅᑲᖅᑐᐃᕕᒃᑯᑦ ᐊᖏᖅᐸᑕ, ᑕᒪᓐᓇ ᑐᑭᖃᓕᕋᔭᖅᑐᖅ ᑕᒪᕐᒥᓕᒫᖅ ᐸᓖᓯᑦ (ᐳᑭᖅᑕᓖᑦ) ᐋᓐᓂᐊᕕᒃᑯᑦ ᐋᓐᓂᐊᖃᕐᓂᕋᖅᑕᐅᓯᒪᔪᑦ ᐱᓕᕆᐊᖏᓐᓄᑦ ᐱᔪᓐᓇᕐᓯᖃᑕᐅᓇᔭᖅᑐᖅ ᑮᓇᐅᔭᖅᑖᕋᓱᖕᓂᕐᒥ ᑖᓐᓇ ᑲᔪᓯᓗᓂ ᐊᓂᒍᑦᑎᐊᕐᓂᐊᕐᐸᑦ ᐃᖅᑲᖅᑐᐃᕕᒃᑰᖅᑎᑦᑎᓂᖅ.

ᐅᓇ ᐱᑖᕋᓲᑎᐅᔪᖅ, ᐃᓚᖃᖅᖢᓂ ᓱᕋᐃᓂᕐᒧᑦ ᑐᓐᓂᖅᑯᑎᓂᒃ, ᐱᔪᒪᓪᓗᑎᒃ ᓈᒻᒪᒃᑐᓂᒃ ᐃᑲᔫᑎᒃᓴᓂᒃ ᐋᖅᑭᒃᓱᖅᑕᐅᓂᐊᕐᑐᒥᓐ, ᐊᑐᓕᖅᑎᑦᑎᓂᖅ, ᐊᐅᓚᑦᑎᓂᖅ ᐊᒻᒪᓗ ᑲᒪᒋᔭᖃᕐᓂᖅ ᐃᓱᒪᒧᑦ ᐱᔨᑦᑎᕋᐅᑎᓕᕆᓂᕐᒥᒃ ᐃᓚᒋᔭᐅᔪᓄᑦ ᐃᖅᑲᖅᑐᐃᕕᒃᑰᖅᑎᑦᑎᓂᕐᒥᒃ ᐊᒻᒪᓗ ᐃᑲᔪᖅᑕᐅᑲᑕᒍᓐᓇᕐᓗᑎᒃ ᐃᓚᒋᔭᐅᔪᑦ ᑖᒃᑯᓄᖓ.

“ᐱᑦᑎᐊᙱᓗᐊᕐᓂᐊᓗᒃ, ᐅᓗᕆᐊᓇᖅᑐᒦᓐᓂᖅ, ᐊᒻᒪ ᐃᓅᔪᓐᓃᕈᑎᑦ”

ᐃᓚᖓᑦ ᐸᓖᓯ, ᑰᐳᕈᓪ ᒋᐅᕋᑦ ᒨᐊ, ᓄᓇᕗᒧᑦ ᓄᑖᐅᓚᐅᕐᓯᒪᔪᖅ 2012-ᒥᑦ ᐊᓂᒍᐃᕌᓂᒃᑎᓪᓗᒍ ᑕᖅᑭᓂᒃ 6-ᓂᒃ ᐃᓕᓐᓂᐊᒐᒃᓴᒥ ᕆᔭᐃᓇᒥ.

“ᐊᕐᕌᒍᓯ ᓯᕗᓪᓕᖅᐹᖓᓂ ᐳᑭᖅᑕᓕᐅᓪᓗᓂ, ᑰᐳᕈᓪ ᒨᐊ ᑕᑯᒐᔪᓚᐅᕐᓯᒪᔪᖅ ᐱᑦᑎᐊᙱᓗᐊᕐᓂᐊᓗᖕᓂᒃ, ᖁᐊᕐᓵᕐᓇᒻᒪᕆᒃᑐᓂᒃ, ᐊᒻᒪᓗ ᐃᓅᔪᓐᓃᕈᑎᒥ ᐅᑭᐅᕐᑕᖅᑐᕐᒥ ᐱᓕᕆᐊᖃᖅᑎᓪᓗᒍ,” ᐱᓇᓱᑎᒋᔭᐅᔪᑦ ᐅᖃᕐᓯᒪᔪᑦ.

ᑭᓯᐊᓂᓕ ᐳᑭᖅᑕᓕᒃᑯᑦ ᓄᓇᕗᒥᑦ ᒪᓂᒻᒪᐃᓯᒪᙱᒻᒪᑕ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔨᑦᑎᕋᐅᑎᓂᒃ.

“ᑕᐃᒪᐃᓐᓂᖓᓄᑦ, ᑰᐳᕈᓪ ᒨᐊ ᐃᓱᒪᖓᒍᑦ ᓈᒻᒪᙱᓕᐅᕈᑎᖓᓂᒃ ᐃᑲᔪᖅᑕᐅᓚᐅᙱᑦᑐᖅ ᖃᓄᐃᓕᐅᕈᓘᔭᖅᑐᓂᒃ ᐅᐸᑲᑕᓚᐅᖅᑎᓪᓗᒍ ᐊᒻᒪᓗ ᓈᒻᒪᙱᓗᐊᖅᑐᐊᓗᖕᓂᑦ ᖃᓄᐃᓕᐅᕈᑎᓂᒃ ᐱᓕᕆᐊᖃᓚᐅᕐᑎᓪᓗᒍ,” ᐅᖃᕐᓯᒪᔪᖅ ᑮᓇᐅᔭᖅᑖᕈᑎᐅᓇᓱᒃᑐᖅ.

ᑭᖑᓂᐊᖑᓪᓕ ᒨᐊ ᕿᒪᐃᓕᓚᐅᕐᑐᖅ ᓄᓇᕗᒥᑦ ᐱᔨᑦᑎᕋᕆᐊᖅᑐᖔᓕᕐᖢᓂ ᓲᕗᑦ ᐹᒃ, ᐋᐴᑕᒥ. 2017-ᒥᑦ, ᐋᓐᓂᐊᖅᑐᓕᕆᔨᓄᑦ ᖃᐅᔨᓴᖅᑕᐅᒍᑎᖓ ᖃᐅᔨᒍᑎᐅᓕᓚᐅᕐᓯᒪᔪᖅ ᐅᓗᕆᐊᓇᖅᑐᒦᓐᓂᖓᓂᒃ ᒪᑯᓂᖓ ᐃᓱᒫᒃᑯᑦ ᐋᓐᓂᐊᕈᑎᓄᑦ ᓈᒻᒪᙱᓕᐅᕈᑎᖃᓕᕋᔭᕆᐊᒃᓴᖓᓂᒃ.

ᐳᑭᖅᑕᓕᒃᑯᑦ ᒨᐊᒥ ᐅᑎᖅᑎᑦᑎᑐᐃᓐᓇᓚᐅᕐᓯᒪᔪᑦ ᓄᓇᕗᒧᑦ. ᑕᐃᑲᓂᓕ, ᐃᓱᒪᖓᒍᑦ ᐋᓐᓂᐊᕆᔭᖓ ᐱᕙᓪᓕᐊᓕᓚᐅᕐᐳᖅ, ᑭᓯᐊᓂᓕ ᐃᑲᔪᖅᑕᐅᔪᒪᑎᓪᓗᒍ ᐳᑭᖅᑕᓕᒃᑯᑦ ᐃᑲᔪᕈᓐᓇᓚᐅᙱᑦᑐᑦ.

“ᐊᔾᔨᐅᙱᑎᑕᐅᓂᕐᒥᒃ ᐊᑐᖃᑦᑕᓚᐅᕐᑐᖅ ᐊᒻᒪᓗ ᑭᓲᙱᑎᑕᐅᓇᓱᖕᓂᕐᒥᓪᓗ ᐊᖓᔪᖅᑳᓄᑦ ᐊᒻᒪ ᐱᓕᕆᖃᑎᖏᓐᓄᑦ ᐃᑲᔪᖅᑕᐅᔪᒪᑐᐊᕐᒪᑦ ᐋᓐᓂᐊᖃᕐᓇᙱᑦᑐᓕᕆᔨᓄᑦ,” ᐅᖃᕐᓯᒪᓚᐅᕐᑐᑦ ᐱᑖᕈᑎᐅᓇᓱᒃᑐᖅ.

ᑎᓯᐱᕆ 2018-ᒥᑦ, ᒨᐊ ᖁᑭᖅᓴᖅᑐᒥ ᐱᓕᕆᐊᖃᖁᔭᐅᓚᐅᕐᓯᒪᔪᖅ ᑖᒃᑯᐊ ᐳᑭᖅᑕᓖᑦ ᖁᑭᒃᓴᖅᑕᐅᑎᓪᓗᒋᑦ ᐃᑲᕐᕋᒐᓴᒻᒪᕆᖕᓂᒃ.

ᐅᖃᐅᓯᐅᔪᓂᒃ ᑮᓇᐅᔭᖅᑖᕋᓲᑎᑦ ᐅᖃᕐᓯᒪᙱᑦᑐᑦ ᓇᓂ ᑕᐃᒪᐃᓂᒃᑰᔭᕆᐊᒃᓴᖏᓐᓂᒃ.

ᑭᓯᐊᓂᓕ ᑎᓯᐱᕆ 22, 2018-ᒥᑦ, ᐅᑯᓇᙵᑦ ᐳᑭᖅᑕᓕᓄᑦ ᐅᖃᐅᓯᐅᓯᒪᔪᑦ ᑕᐃᔅᓱᒪᓂ ᐃᒪᓐᓇ “ᒫᓐᓇ ᖁᑭᖅᓴᖅᑐᖃᓂᖓᓄᑦ,” ᒪᕐᕉᒃ ᐊᖑᑏᒃ ᕼᐋᐱ ᕚᓕᒥ ᐃᖃᓗᖕᓂ ᖁᑭᕐᓴᑲᑕᓚᐅᕐᓯᒪᖕᒪᑕ ᐸᓖᓯᓄᑦ ᐃᑲᕐᕋᒐᓴᒻᒪᕆᖕᓂᒃ ᑖᖅᑐᕈᓗᖕᒥᑦ ᐅᑭᐅᖑᖕᒪᑦ.

ᐅᓪᓗᒃ ᐱᖓᓱᑦ ᓯᕗᓂᐊᓂᒃ, ᐊᓯᖓᓂᒃ ᐊᖏᕐᕋᕆᔭᐅᔪᒥᒃ, ᐃᖃᓗᖕᒥᐅᑕᖅ ᐱᖓᓱᓂᒃ ᓱᕈᓯᕐᓂ ᐊᓂᑎᑦᑎᑦᑕᐃᓕᒪᓚᐅᕐᓯᒪᖕᒪᑦ ᐃᑲᕐᕋᓂᒃ 12-ᓂᒃ, ᐅᑯᐊ ᐳᑭᖅᑕᓕᒃᑯᑦ ᖁᐊᕐᓵᕐᓇᖅᑐᓕᕆᔨᖏᑦ ᐅᖃᓪᓚᖃᑎᖃᑲᑕᖕᓂᒃᑯᑦ ᓄᖅᑲᖅᑎᑦᑎᔪᓐᓇᕐᓯᓚᐅᕐᓯᒪᔪᑦ.

“ᐊᑐᙱᑦᑐᒧᑦ ᓄᑭᖃᓗᐊᕐᑐᖅ ᐊᒻᒪ ᓄᖃᑐᐃᓐᓇᕈᓐᓇᙱᑦᑐᖅ”

ᐳᑭᖅᑕᓕᒃᑯᑦ ᑕᒪᑐᒥᖓ ᐱᓕᕆᖃᑕᐅᔪᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᖃᐅᔨᓴᖅᑕᐅᔪᒪᓪᓚᐅᕐᑎᓪᓗᒋᑦ ᐅᑯᐊ ᐱᓕᕆᓕᒪᓂᕐᓴᑦ ᐸᓖᓯᒃᑯᑦ ᓄᓇᕗᒥᑦ ᖃᐅᔨᒪᓇᓱᓚᐅᕐᑐᑦ ᓇᓕᐊᑦ ᐳᑭᖅᑕᓕᒃ ᐃᑲᔪᖅᑕᐅᔪᒪᓯᒪᖕᒪᖔᑕ.

“ᑕᐃᒃᑯᐊᓕ ᐃᑲᔪᖅᑕᐅᓚᐅᕐᑐᑦ ᑲᒪᒋᔭᐅᔪᓐᓇᓚᐅᕐᑐᑦ ᐊᒻᒪ ᐱᓕᕆᐊᖑᐃᓐᓇᑲᑕᓕᕐᖢᑎᒃ ᐊᑐᙱᑦᑐᒧᑦ ᓄᑭᖃᕐᓂᕋᖅᑕᐅᓪᓗᑎᒃ ᐊᒻᒪᓗ ᓄᖃᑐᐃᓐᓇᕈᓐᓇᙱᓐᓂᖏᓐᓂᒃ ᒪᑯᓄᖓ ᐊᓂᒍᐃᑦᑎᐊᕈᑎᐅᔪᓐᓇᖅᑐᓄᑦ ᐃᖅᑲᓇᐃᔮᒃᓴᓄᑦ ᐊᒻᒪ ᐃᖅᑲᓇᐃᔮᒃᑯᑦ ᐱᕚᓪᓕᐊᒍᑎᒃᓴᓄᑦ,” ᐅᖃᕐᓯᒪᖕᒥᔪᖅ ᐱᑖᕋᓲᑎᑦ.

ᑕᒪᒃᑯᓂᖓ ᖃᓄᐃᓕᐅᕐᓂᕐᓂᒃ ᐊᑐᑲᑖᓪᓚᓚᐅᕐᑎᓪᓗᒍ, ᒨᐊ ᐋᑐᕚᒥ ᖃᐅᔨᓴᖅᑕᐅᒐᒥ ᐋᓐᓂᐊᖃᕐᓂᕋᖅᑕᐅᓕᓚᐅᕐᓯᒪᔪᑦ post-traumatic stress (ᑕᑯᓂᕐᓗᒃᓯᒪᓗᐊᕐᓂᕐᒧᑦ ᐃᓱᒫᓗᓗᐊᕐᓂᖅ). ᐅᖃᕐᓯᒪᔪᖅ ᐳᑭᖅᑕᓕᒃᑯᑦ ᐱᓕᕆᔨᒻᒪᕆᖏᑦ ᓄᖅᑲᖅᑎᑦᑎᓇᓱᓕᕐᖢᑎᒃ ᑐᓂᓯᓂᐊᕐᓗᑎᒃ ᐋᓐᓂᐊᕐᓂᕐᒧᑦ ᓄᖅᑲᖅᑎᑕᐅᒍᑎᓂᒃ.

“ᐋᓐᓂᐊᕐᓂᕆᔭᖓᓄᑦ (PTSD-ᒧᑦ) ᓈᒻᒪᙱᓕᐅᑎᖃᕈᑎᖃᖃᑦᑕᓕᓚᐅᕐᑐᖅ ᐊᒻᒪ ᓈᒻᒪᒋᔭᐅᑲᑕᙱᖢᓂ, ᐅᖃᐅᓯᑦᑎᐊᕙᐅᙱᑦᑐᓂᒃ ᐅᖃᕐᓯᐅᕙᒃᖢᓂ, ᐊᒻᒪᓗ ᓄᖅᑲᖁᔭᐅᑦᑎᐊᒻᒪᕆᒃᐸᒃᖢᓂ,” ᐅᖃᐅᓯᐅᔪᑦ ᐅᖃᕐᓯᒪᔪᑦ.

ᐊᓯᖓᑦᑕᐅᖅ ᐃᖅᑲᖅᑐᐃᕕᒃᑰᖅᑎᑦᑎᖃᑕᐅᔪᖅ, ᑳᓐᔅᑕᐳᓪ ᑭᐊᓕ ᒪᑯᐃᑦ, ᐃᓱᒪᖓᒍᑦ ᐋᓐᓂᐊᕈᑎᒥᓂᒃ ᑲᒪᒋᔭᖃᕈᓐᓇᓚᐅᕐᑐᖅ ᖃᓪᓗᓈᓂᒃ ᐃᖅᑲᓇᐃᔭᖅᑎᓪᓗᒍ 2010-ᒥᑦ, ᖃᐅᔨᓴᖅᑕᐅᔭᖅᑐᕈᓐᓇᓚᐅᕋᒥ ᐃᓱᒪᓕᕆᔨᒧᑦ.

ᑭᓯᐊᓂᓕ 2017-ᖑᑎᓪᓗᒍ, ᓄᓇᕗᒧᑦ ᓅᑕᐅᑎᓪᓗᒍ, “ᑐᐸᒃᓯᒪᒻᒪᕆᓚᐅᕐᑐᖅ” ᖃᐅᔨᒐᒥ ᐳᑭᖅᑕᓕᒃᑯᑦ ᐃᓄᑭᑦᑑᑎᒦᑦᑐᑦ ᐊᑐᐃᓐᓇᖃᙱᑦᑎᐊᒻᒪᕆᓚᐅᕐᓂᖏᓐᓂᒃ ᐃᓱᒪᒃᑯᑦ ᐋᓐᓂᐊᖃᑦᑕᐃᓕᓂᕐᒧᑦ ᐱᔨᑦᑎᕋᐅᑎᓂᒃ.

ᓱᖅᑯᑎᒋᔭᐅᙱᑦᑐᑦ, ᐃᒡᓚᐅᑎᒋᔭᐅᑐᐃᓐᓇᖅᑐᑦ ᐃᑲᔪᖅᑕᐅᔪᒪᓂᖏᓐᓂᒃ

ᑐᒡᓕᕇᐸᓗᕈᓗᓐᓂᒃ ᖃᓄᐃᓕᐅᕈᑎᕐᔪᐊᓂ ᓯᕗᓪᓕᖅᐹᒥ ᐊᕐᕌᒍᒥ ᓄᓇᕗᒦᓕᖅᑎᓪᓗᒍ, ᐅᖃᓚᐅᕐᑐᖅ ᐃᓱᒪᓕᕆᔨᒃᑯᓐᓄᑦ ᐃᑲᔪᖅᑕᐅᔪᒪᓂᕋᖅᖢᓂ, ᑭᓯᐊᓂᓕ “ᑕᐃᒪᐃᙱᓐᓂᕋᐃᔪᓂᒃ ᐊᒻᒪ ᐱᑦᑎᐊᖅᑕᐅᙱᓐᓂᕐᒥ” ᐊᑐᓕᓚᐅᕐᓯᒪᔪᖅ ᑲᒪᔨᖏᓐᓂᒃ.

“ᑕᐃᒪᙵᑦ ᐱᔪᒪᔭᖓᓄᑦ ᓈᒻᒪᙱᓕᐅᕈᑎᖃᐃᓐᓇᕋᓗᐊᖅᖢᓂ ᑳᓐᔅᑕᐳᓪ ᒪᑯᐃᑦ ᓄᖅᑲᓚᐅᕐᓯᒪᙱᑦᑐᖅ ᐃᓱᒪᒃᑯᑦ ᐋᓐᓂᐊᖅᑐᓕᕆᔨᓄᑦ ᑲᒪᒋᔭᐅᔪᒪᓂᕐᒥᒃ,” ᐅᖃᐅᓯᐅᔪᑦ ᐱᑖᕋᓱᖕᓂᕐᒧᑦ ᐅᖃᕐᓯᒪᔪᑦ.

ᑕᐃᒪᐃᓕᐅᕐᓂᖓᓄᑦ ᑲᒪᔨᖓᑕ ᐅᖃᐅᑎᓕᓚᐅᕐᓯᒪᔭᖓ “ᓱᖅᑯᑎᒋᔭᐅᙱᓐᓂᖓᓂᒃ” ᐊᒻᒪᓗ ᑐᒃᓯᕋᐅᑎᒋᓇᓱᒃᑕᖏᑦ ᑕᒪᐃᓐᓂ ᐊᖏᖅᑕᐅᔾᔮᙱᓐᓂᕋᖅᑕᐅᓪᓗᑎᒃ.

“ᒫᓐᓇᓕ ᐋᓐᓂᐊᖅᑐᓕᕆᔨᒃᑯᑎᒍᑦ ᓄᖅᑲᖓᓕᕐᑐᖅ ᐆᒧᖓ PTSD ᐊᒻᒪᓗ ᖃᐅᔨᒪᙱᖢᓂ ᖃᑯᒍ ᐅᑎᕈᓐᓇᓛᕐᓂᕐᒥᓂᒃ ᐃᖅᑲᓇᐃᔮᖓᓄᑦ,” ᐅᖃᐅᓯᐅᔪᑦ ᐱᑖᕋᓱᖕᓂᕐᒧᑦ ᐅᖃᕐᓯᒪᔪᑦ.

ᐃᖅᑲᓇᐃᔭᖅᑎᓄᑦ ᔮᔾᔭᓐᑦ ᑕᐃᕕᑦ ᑳᒻᑕᓐ, ᐊᕐᕌᒍᓂ 25-ᓂ ᐱᓕᕆᔨᐅᓯᒪᓕᕐᑐᖅ ᐳᑭᖅᑕᓕᖕᓄᑦ, ᐅᖃᓚᐅᕐᒥᔪᖅ ᑕᐃᒪᓐᓇᑦᑕᐃᓐᓇᐸᓗᒃ ᐱᓕᕆᐊᖑᓚᐅᕐᓯᒪᓂᖓᓂᒃ ᐱᓕᕆᓕᒪᓂᕐᓴᓄᑦ ᐳᖅᑭᖅᑕᓖᑦ ᐃᖅᑲᓇᐃᔭᖅᑎᓄᑦ, ᐅᓄᕈᓘᔭᖅᑐᓂᒃ ᐃᓄᑭᑦᑐᓂᑦ ᓄᓇᓕᖕᓃᑲᑕᓚᐅᖅᖢᓂ ᐃᓚᒋᓪᓗᒍ ᓄᓇᕗᑦ, ᑕᕝᕙᓂᓗ “ᐱᓕᕆᐊᖃᖃᑦᑕᓚᐅᕐᑐᖅ ᑕᒪᐃᓐᓂ ᐱᑦᑎᐊᙱᕕᒡᔪᐊᖅᑐᐊᓗᖕᓂᒃ ᐊᒻᒪᓗ ᐊᔾᔨᒌᙱᑎᑦᑎᓗᐊᕐᓂᐊᓗᖕᒥ ᐃᖅᑲᓇᐃᔭᕐᕕᖕᒥ ᐱᓕᕆᔾᔪᓯᕐᒥᑦ.”

ᑳᒻᑕᓐ ᐅᖃᖅᑐᖅ ᐊᑯᓂᐊᓗᒃ ᑲᒪᒋᔭᐅᓯᒪᓇᓂ PTSD-ᒥ ᐋᓐᓂᐊᖃᕐᓯᒪᓕᕐᑐᖅ ᐊᕐᕌᒍᒐᓴᒻᒪᕆᖕᓂᒃ ᐊᒻᒪᓗ ᒫᓐᓇ ᑕᐃᒪᓐᓇ ᐃᓅᓯᓕ ᐋᓐᓂᐊᖅᑲᖅᖢᓂ “ᐊᕐᕌᒍᒐᓴᖕᓂᒃ ᑕᒪᑐᒥᖓ ᐋᓐᓂᐊᕐᓯᒪᓂᕐᒥᑦ ᐊᓯᐊᓄᑦ ᖃᐅᔨᒪᔭᐅᙱᖢᓂ ᐊᒻᒪ ᓂᐱᖃᕈᑎᒋᙱᑐᐃᓐᓇᖅᖢᓂᐅᒃ.”

ᑳᓐᔅᑕᐳᓪ ᒍᕌᒻ ᕗᐊᔅ, ᐊᓯᑲᓐᓂᖓᑦᑕᐅᖅ ᐃᖅᑲᖅᑐᐃᕕᒃᑰᖅᑎᑦᑎᖃᑕᐅᔪᖅ ᐅᖃᓚᐅᕐᑐᖅ ᐋᓐᓂᐊᖃᓯᒪᕙᒌᖅᖢᓂ PTSD-ᒥ ᑲᒪᒋᔭᐅᔾᔪᑎᒋᓯᒪᙱᑕᖓᓂ ᐃᖃᓗᖕᓄᑦ ᓅᑕᐅᓚᐅᕐᓯᒪᓂᖓᓂᒃ 2016-ᒥᑦ.

“ᑕᑯᖃᑦᑕᐃᓐᓇᓚᐅᕐᑐᖅ ᐱᑦᑎᐊᙱᑦᑐᐊᓗᖕᓂ, ᑭᓯᐊᓂᓕ ᐃᓱᒪᒃᑯᑦ ᐋᓐᓂᐊᖃᖅᑐᓕᕆᓂᕐᒧᑦ ᐱᔨᑦᑎᕋᐅᑎᓂᒃ ᐱᑕᖃᓚᐅᙱᑦᑐᖅ,” ᐅᖃᕐᓯᒪᔪᖅ ᐱᑖᕋᓱᒍᑎᓂᒃ.

ᐃᓚᐅᓚᐅᕐᓯᒪᔪᖅ ᖁᑭᖅᓴᖅᑐᖃᑲᑕᒃᑎᓪᓗᒍ 2018-ᒥᑦ ᐊᒻᒪᓗ ᖃᐅᔨᓴᖅᑕᐅᓪᓗᓂ ᐋᓐᓂᐊᖃᕐᓂᕋᖅᑕᐅᓕᓚᐅᕐᓯᒪᔪᖅ PTSD-ᒥᑦ 2019 ᐅᐱᕐᖔᖓᓂᒃ.

ᐅᑎᖅᑎᓪᓗᒍ, ᐅᖃᓪᓚᒃᑐᓂᒃ ᑐᓴᓚᐅᕐᓯᒪᔪᖅ ᒪᑯᐊ “ᐱᓕᕆᓕᒪᓂᕐᓴᐃᑦ, ᑲᒪᔩᑦ ᐊᒻᒪ ᐃᖅᑲᓇᐃᔭᖃᑎᒋᔭᐅᔪᑦ ᐃᔪᑲᑕᒃᖢᑎᒃ ᐳᑭᖅᑕᓕᖕᓂᒃ ᐱᓕᕆᐊᖏᓐᓄᑦ ᐃᓱᒪᖏᑦᑎᒍᑦ ᐋᓐᓂᕐᓯᒪᔪᓂᒃ, ᓲᕐᓗ ᐅᖃᖅᖢᑎᒃ ᑖᒃᑯᐊ ᓴᙱᙱᓗᐊᕐᓂᖏᓐᓂᒃ ᐱᓕᕆᐊᖏᓐᓂᒃ ᐱᓕᕆᐊᖃᕆᐊᒃᓴᖅ,” ᐅᖃᕐᓯᒪᔪᖅ ᐱᑖᕋᓲᑎ.

ᑕᒪᒃᑯᐊ ᐸᓯᔭᒃᓴᐅᒍᑎᐅᔪᑦ ᓱᓕ ᐃᖅᑲᖅᑐᐃᕕᒃᑯᑦ ᓴᖅᑭᑕᐅᓪᓚᕆᒋᐊᖃᕐᓂᐊᖅᑐᑦ. ᖃᕋᓴᐅᔭᒃᑯᑦ ᑎᑎᕋᖅᑕᐅᓯᒪᔪᓂᒃ ᐃᖅᑲᖅᑐᐃᕕᒡᔪᐊᒃᑯᑦ ᑲᓇᑕᒥ ᕼᐋᓕᕚᒃᔅᒥᑦ ᑎᑎᕋᕐᕕᐊᓂ ᓴᖅᑭᑎᑦᑎᓯᒪᔪᑦ ᐅᑯᐊ ᒪᓕᒐᓕᕆᓂᕐᒧᑦ ᐊᖓᔪᖅᑳᖅ ᑲᓇᑕᒧᑦ, ᐳᑭᖅᑕᓕᒃᑯᑦ ᒪᓕᒐᓕᕆᔨᖏᓪᓗ ᓱᓕ ᓴᐳᔾᔨᓯᒪᒍᑎᓂᒃ ᑎᑎᕋᕐᓯᒪᓚᐅᙱᑦᑐᑦ.

ᑕᐃᒪᐃᕈᓘᔭᕐᑎᓪᓗᒋᑦ ᐊᒻᒪ ᑕᒪᑐᒧᖓ ᐊᒃᑐᖅᑕᐅᓯᒪᙱᖢᓂ ᐅᓇ ᓄᓇᕗᒥᑦ ᑮᓇᐅᔭᓕᕆᓂᕐᒧᑦ ᒥᓂᔅᑕ ᔪᐊᔾ ᕼᐃᒃᔅ ᐅᖃᓚᐅᕐᑐᖅ ᑲᑎᒪᔨᓄᑦ ᓯᑎᐱᕆ 24-ᒥᑦ ᒪᓕᒐᓕᕆᔨᓄᑦ ᒫᓂ 11 ᓄᓇᕗᒥᑦ ᐳᑭᖅᑕᓕᐅᖃᑕᐅᔪᑦ ᐊᑯᓂᐊᓗᖕᒧᑦ ᐊᔪᕈᑎᖃᕐᓂᕐᒧᑦ ᑮᓇᐅᔭᖅᑖᖃᑦᑕᕐᓯᒪᔪᑦ 2019/20-ᒥᑦ, ᖁᕝᕙᖅᐹᓪᓕᖅᖢᓂ ᐅᕙᙵᑦ 1.25 ᐸᓖᓯᓂᒃ 2012/13-ᒥᑦ.

ᐊᒻᒪᓗ ᓄᓇᕗᑦ ᒐᕙᒪᒃᑯᑦ ᑕᒪᒃᑯᓄᖓ ᐊᑭᓕᕐᓱᐃᔭᕆᐊᖃᖅᐸᒃᖢᑎᒃ, ᐅᖃᖅᑐᖅ.

“ᐳᑭᖅᑕᓕᓂᒃ ᐃᖅᑲᓇᐃᔭᖅᑐᖃᕈᓐᓃᖅᐸᑦ ᐅᑯᓂᖓ ᐱᑖᖃᑦᑖᖔᓕᕐᓗᓂ ᐊᑯᓂᐊᓗᖕᒧᑦ ᐊᔪᕈᑎᖃᕐᓂᕐᒧᑦ ᑮᓇᐅᔭᖅᑖᕈᑎᓂᒃ ᓱᓕ ᑲᔪᓯᖃᑦᑕᖅᐳᒍ ᑖᒃᑯᓂᖓ ᐊᑭᓕᕐᓱᐃᓂᕐᒥᒃ ᐊᒻᒪᒃᑲᓐᓂᖅ ᐃᓇᖏᕐᓯᔪᒥᒃ ᐸᓖᓯᒥᓐ,” ᐅᖃᖅᑐᖅ.